གཟའི་རྟགས་བསྟོད་མེ་རླུང་འཚུབས་མ་བཞུགས་སོ།།

ཧཱུྃ། རྡོ་རྗེ་འཆང་ཆེན་ཐུགས་ལས་སྤྲུལ་པའི་སྲས། །འཇིགས་བྱེད་མི་བཟད་སྡེ་བརྒྱད་ཀུན་གྱི་གཙོ། །ཆེ་བའི་ཆེ་མཆོག་འཇིགས་བྱེད་རཱ་ཧུ་ལ། །མཐུ་སྟོབས་རྫུ་འཕྲུལ་ནམ་མཁའི་མཐའ་དང་མཉམ། །སྐུ་མདོག་དུད་ཁ་མི་བཟད་འཇིགས་པའི་སྐུ། །རོ་སྟོད་མི་ལ་རོ་སྨད་སྦྲུལ་དུ་འཁྱིལ། །ལུས་གཅིག་མགོ་དགུ་སྲིད་གསུམ་ཀུན་གྱི་བདག །དབུ་གཅིག་ལྷ་མིན་དབང་པོ་ཁྲོས་པའི་ཞལ། །ཉི་ཟླ་གཉིས་ཀྱང་གྲིབ་ཀྱིས་གནོན་པར་བྱེད། །གཅིག་ནི་བགད་ཅིང་བཞད་པར་བྱེད་པའི་ཞལ། །དགྱེས་པ་བཀའ་ཡི་བྱ་ར་བྱེད་པའི་རྟགས། །གཅིག་ནི་ཁྲོས་པར་བྱེད་པ་སྲིན་པོའི་ཞལ། །གདུག་པའི་དགྲ་བགེགས་ཟས་སུ་ཟ་བར་བྱེད། །གཅིག་ནི་རྔམས་པར་བྱེད་པ་ཟ་བྱེད་གདོང་། །གནམ་ལྕགས་མེ་ཡི་ཐོག་སེར་འབེབས་པའི་རྟགས། །གཅིག་ནི་འཇིགས་བྱེད་མ་རུང་པ་ཡི་ཞལ། །ཚ་གྲང་འཐབ་པའི་རྐན་སྒྲ་སྒྲོག་པར་བྱེད། །གཅིག་ནི་འཁྲུགས་བྱེད་འཇིགས་པར་བྱེད་པའི་ཞལ། །གཡོ་འགུལ་ཆེན་པོས་སེར་བ་འབེབས་པའི་རྟགས། །གཅིག་ནི་གཏུམ་བྱེད་ཡེ་ཤེས་གསལ་བའི་ཞལ། །མངོན་ཤེས་ནུས་སྟོབས་ཕྱོགས་མེད་སྟོན་པའི་ཞལ། །གཅིག་ནི་ལས་སྟོབས་རྫུ་འཕྲུལ་སྟོན་པའི་ཞལ། །སངས་རྒྱས་བསྟན་པ་སྲུང་བར་བྱེད་པའི་རྟགས། །གཅིག་ནི་ཞི་བ་ཡེ་ཤེས་ལྷ་ཡི་ཞལ། །སྒྲུབ་པ་པོ་ལ་དངོས་གྲུབ་སྟེར་བའི་རྟགས། །སྟེང་གི་ཕྱོགས་ན་བྱ་རོག་ཞལ་བསྟན་པ། །དཀོན་མཆོག་དབུ་འཕང་གཉན་པོ་བསྟོད་པའི་རྟགས། །མཐུ་ཆེན་ཁྱོད་ཀྱི་ཕྱག་བཞི་རྔམ་པ་ཡི། །རལ་གྲི་འབར་བ་འཕྲུལ་གྱི་ཞགས་པ་ཡིས། །སྡང་བྱེད་དགྲ་བོའི་སྐྱེ་བརྒྱུད་གཅོད་པའི་རྟགས། །ཆུ་སྲིན་རྒྱལ་མཚན་སྦྲུལ་ཞགས་གཡུག་པ་ཡིས། །སྲིད་པ་གསུམ་ཡང་དབང་དུ་བསྡུ་བའི་རྟགས། །ར་ཡི་མདའ་གཞུ་འགེངས་ཤིང་བསྣམས་པ་ནི། །དམིགས་པའི་དགྲ་བོ་རྩད་ནས་གཅོད་པའི་རྟགས། །སྤྱན་སྟོང་སྡང་མིག་དགྲ་ལ་བལྟས་པའི་ཚེ། །དངོས་དང་དངོས་མེད་དགྲ་བགེགས་འདུལ་བའི་རྟགས། །སྐུ་སྨད་དུག་སྦྲུལ་ས་ལ་བརྡབས་པ་ཡིས། །འཇིག་རྟེན་ཁམས་རྣམས་གཡོ་འགུལ་འདེགས་པར་བྱེད། །ཞལ་ནས་ཧཱུྃ་དང་ཕཊ་སྒྲ་སྒྲོག་པ་ཡིས། །དྲེགས་པ་ཕོ་མོ་དབང་དུ་སྡུད་པའི་རྟགས། །སྐུ་མདོག་དུད་ཁ་འཇིགས་པར་བསྟན་པ་ནི། །ཁམས་གསུམ་སྐྱེ་འགྲོ་ཟིལ་གྱིས་གནོན་པའི་རྟགས། །ཞིང་ཆེན་གཡང་གཞིའི་སྟོད་གཡོགས་བྱས་པ་ནི། །ཉོན་མོངས་ཕྲག་དོག་དབྱིངས་སུ་དག་པའི་རྟགས། །སྟག་གི་ལྤགས་པའི་ཤམ་ཐབས་དཀྲིས་པ་ནི། །ཉོན་མོངས་ང་རྒྱལ་གནས་སུ་དག་པའི་རྟགས། །ཐོད་པ་སྐམ་པོས་དབུ་རྒྱན་བྱས་པ་ནི། །ཉོན་མོངས་གཏི་མུག་དབྱིངས་སུ་དག་པའི་རྟགས། །མི་མགོ་ལྔ་བཅུའི་དོ་ཤལ་བྱས་པ་ནི། །ཉོན་མོངས་འདོད་ཆགས་གནས་སུ་དག་པའི་རྟགས། །ཀླུ་ཆེན་རིགས་ལྔའི་སྦྲུལ་ཆུན་བྱས་པ་ནི། །ཉོན་མོངས་ཞེ་སྡང་དབྱིངས་སུ་དག་པའི་རྟགས། །ཛཿ་ལས་ཡབ་རྗེ་རྡོ་རྗེ་སྲིན་པོ་ནི། །སྐུ་མདོག་མཐིང་ནག་མགོ་དགུ་ཕྱག་གཉིས་པ། །དབྱུག་ཏོ་དང་ནི་ཁྲག་གི་མཚོ་ཆེན་བསྣམས། །ཞེ་སྡང་རུས་པའི་ཁྲིར་བཞུགས་ཁྱོད་ལ་བསྟོད། །ཕུ་ལས་ཡུམ་མཆོག་རྡོ་རྗེ་གློག་འགྱུ་མ། །སྐུ་མདོག་དམར་ནག་མགོ་དགུ་ཕྱག་གཉིས་པ། །སྦྲུལ་ཞགས་དང་ནི་ཁྲག་གི་མཚོ་ཆེན་བསྣམས། །འདོད་ཆགས་ཁྲག་མཚོའི་ཀློང་བཞུགས་ཁྱོད་ལ་བསྟོད། །ནུབ་ཏུ་མ་ལས་ལྗང་སྔོན་ཆེན་པོ་ནི། །སྐུ་མདོག་ལྗང་ནག་མགོ་དགུ་ཕྱག་གཉིས་པ། །ཞགས་པ་དང་ནི་སྡོམ་བྱེད་ལྕགས་སྒྲོག་འཛིན། །མ་མོའི་དམག་ཚོགས་འཁོར་གྱིས་བསྐོར་ལ་བསྟོད། །ཤར་ལྷོ་ཙ་ལས་དྲང་སྲོང་དཀར་སེར་ནི། །སྐུ་མདོག་དཀར་སེར་མགོ་དགུ་ཕྱག་གཉིས་པ། །སྦྲུལ་ཞགས་དང་ནི་ཏྲི་ཤུལ་རྩེ་གསུམ་འཛིན། །དགྲ་ལྷའི་དམག་ཚོགས་འཁོར་གྱིས་བསྐོར་ལ་བསྟོད། །བྱང་དུ་དུཿ་ལས་བདུད་པོ་རོག་ཏི་ནི། །སྐུ་མདོག་མཐིང་ནག་མགོ་དགུ་ཕྱག་གཉིས་པ། །སྦྲུལ་དང་བདུད་ཀྱི་ཞགས་པ་ནག་པོ་འཛིན། །བདུད་ཀྱི་དམག་ཚོགས་འཁོར་གྱིས་བསྐོར་ལ་བསྟོད། །ལྷོ་ནུབ་རུ་ལས་བེཥྚུ་པ་ཏྲ་ནི། །སྐུ་མདོག་དམར་པོ་མགོ་དགུ་ཕྱག་གཉིས་པ། །སྦྲུལ་དང་རྣོ་ངར་སྤུ་གྲི་འབར་བ་བསྣམས། །སྲིད་པོའི་དམག་ཚོགས་འཁོར་གྱིས་བསྐོར་ལ་བསྟོད། །ཤར་དུ་ཨ་ལས་བྷི་ནུ་རཱ་ཛ་ནི། །སྐུ་མདོག་དུད་ཁ་མགོ་དགུ་ཕྱག་གཉིས་པ། །འཛིན་པ་ཆུ་སྲིན་དང་ནི་སྟག་མགོ་འཛིན། །དམུ་བདུད་དམག་ཚོགས་འཁོར་གྱིས་བསྐོར་ལ་བསྟོད། །ནུབ་བྱང་ཡཿ་ལས་དུ་བ་མཇུག་རིང་ནི། །སྐུ་མདོག་མཐིང་ནག་མགོ་དགུ་ཕྱག་གཉིས་པ། །སྤུ་གྲི་དང་ནི་ཐོད་ཁྲག་འབར་བ་བསྣམས། །གཤིན་རྗེའི་དམག་ཚོགས་འཁོར་གྱིས་བསྐོར་ལ་བསྟོད། །ལྷོ་རུ་ནཿ་ལས་ཁྱབ་འཇུག་ཆེན་པོ་ནི། །སྐུ་མདོག་སེར་ནག་མགོ་དགུ་ཕྱག་གཉིས་པ། །སྦྲུལ་གྱི་ཞགས་པ་དང་ནི་ཆུ་སྲིན་འཛིན། །ཀླུ་བདུད་དམག་ཚོགས་འཁོར་གྱིས་བསྐོར་ལ་བསྟོད། །བྱང་ཤར་ཤཿ་ལས་སྒྲ་གཅན་ཆེན་པོ་ནི། །སྐུ་མདོག་དུད་ཁ་མགོ་དགུ་ཕྱག་གཉིས་པ། །ཆུ་སྲིན་དང་ནི་ཁྲམ་ཤིང་སྣ་ཚོགས་འཛིན། །སྡེ་བརྒྱད་དམག་ཚོགས་འཁོར་གྱིས་བསྐོར་ལ་བསྟོད། །ཤར་གྱི་ཕྱོགས་ནས་སྟག་སྲིན་ཟོར་བའི་གདོང་། །སྐུ་མདོག་དཀར་སེར་ལྕགས་ཀྱུ་ཞགས་པ་འཛིན། །མི་བཟད་སྲིན་པོ་ཁྲོས་པའི་ཆ་ལུགས་ཅན། །རྟོག་མེད་བམ་གྱི་གདན་ལ་འགྱིང་བར་བསྟོད། །ལྷོ་ཡི་ཕྱོགས་ནས་བམ་སྲིན་དྲེད་གདོང་ཅན། །སྐུ་མདོག་སེར་ནག་སྦྲུལ་གྱི་ཞགས་པ་འཛིན། །མི་བཟད་སྲིན་མོ་ཁྲོས་པའི་ཆ་ལུགས་ཅན། །རྟོག་མེད་རོ་ཡི་གདན་ལ་འགྱིང་བར་བསྟོད། །ནུབ་ཀྱི་ཕྱོགས་ནས་ཀོང་སྲིན་བ་ལང་གདོང་། །སྐུ་མདོག་དམར་ནག་དགྲ་སྟ་ཞགས་པ་འཛིན། །མི་བཟད་སྲིན་མོ་ཁྲོས་པའི་ཆ་ལུགས་ཅན། །ཞིང་ཆེན་གདན་ལ་གར་སྟབས་འགྱིང་བར་བསྟོད། །བྱང་གི་ཕྱོགས་ནས་འབྲོག་སྲིན་ཆུ་སྲིན་གདོང་། །སྐུ་མདོག་ལྗང་ནག་རི་རབ་ཀླད་ལ་བསྐོར། །མི་བཟད་སྲིན་མོ་ཁྲོས་པའི་ཆ་ལུགས་ཅན། །རྟོག་མེད་ཞིང་གི་གདན་ལ་འགྱིང་བར་བསྟོད། །གཞན་ཡང་མཐུ་ཆེན་ཁྱོད་ཀྱི་ཕྱི་རོལ་དུ། །འཁོར་དུ་གཏོགས་པའི་ལྷ་སྲིན་སྡེ་བརྒྱད་དང་། །ཕོ་ཉ་སྤྲུལ་དང་ཡང་སྤྲུལ་བཅས་པ་རྣམས། །གཙང་རིགས་མགོན་པོ་བདུན་ཅུ་རྩ་ལྔ་སོགས། །སྲིད་གསུམ་འབྱུང་པོའི་འཁོར་ཚོགས་བསམ་མི་ཁྱབ། །ཀུན་ཀྱང་ཁྲོ་གཏུམ་མི་བཟད་འཇིགས་པའི་སྐུ། །ཟ་བར་རྔམ་དང་མཆོང་ཞིང་རྒྱུགས་པར་བྱེད། །མྱུར་མགྱོགས་རྫུ་འཕྲུལ་དྲག་རྩལ་རྔམས་པའི་ཚུལ། །ཉི་ཟེར་རྡུལ་ལྟར་འཁོར་ཚོགས་བཅས་ལ་བསྟོད། །མཐུ་ཆེན་དྲེགས་པའི་སྡེད་དཔོན་འཁོར་བཅས་ཀྱིས། །བདག་ཅག་བྱང་ཆུབ་སྒྲུབ་ལ་བར་གཅོད་པའི། །ཕྱི་ནང་མི་མཐུན་ཉེར་འཚེ་ཀུན་ཞི་ཞིང་། །རྣམ་མང་ཕྲིན་ལས་ཡིད་བཞིན་འགྲུབ་པ་དང་། །གྲགས་དང་འབྱོར་བ་རྒྱ་མཚོས་མངོན་མཐོ་བ། །ཕྱོགས་ལས་རྣམ་པར་རྒྱལ་བའི་ཕྲིན་ལས་མཛོད། །ཅེས་གཟའི་རྟགས་བསྟོད་མེ་རླུང་འཚུབས་མ་ཞེས་བྱ་བ་འདི་ནི་རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེས་བྲིས་པ་དགེ །