དམ་ཅན་ར་ཞོན་རྟགས་བསྟོད་དམ་ཉམས་སྙིང་འབྱིན་ཞེས་བྱ་བ་བཞུགས་སོ།།
ཧཱུྃ། གསང་བདག་ཐུགས་སྤྲུལ་བཀའ་སྡོད་དཔའ་བོ་ཆེ། །བདུད་ལས་རྣམ་རྒྱལ་འཇིགས་བྱེད་ཧེ་རུ་ཀ །ཆེ་བའི་ཆེ་མཆོག་སྟོབས་ལྡན་ནག་པོ་ནི། །ཤིན་ཏུ་རྔམ་པ་མགར་བ་ནག་པོའི་ཚུལ། །ཁྲོས་པའི་ཞལ་གཅིག་རྔམ་པར་བསྟན་པ་ནི། །དོན་དམ་ཆོས་སྐུ་ཐིག་ལེ་ཉག་གཅིག་རྟགས། །སྐུ་མདོག་སྨུག་ནག་འོད་དུ་འཚེར་བ་ནི། །ཆོས་སྐུའི་དབྱིངས་ལས་འགྱུར་བ་མེད་པའི་རྟགས། །སྤྱན་གསུམ་སྡང་མིག་ཕྱོགས་བཅུར་གཟིགས་པ་ནི། །སྐུ་གསུམ་ཡེ་ནས་ལྷུན་གྱིས་གྲུབ་པའི་རྟགས། །ཞལ་གྱི་མཆེ་བ་རྣམ་བཞི་གཙིགས་པ་ནི། །བདུད་བཞི་མ་ལུས་རྩད་ནས་གཅོད་པའི་རྟགས། །སྨ་ར་ཁ་སྤུ་མེ་ལྟར་འཕྲོ་བ་ནི། །སྤྲུལ་པ་སྣ་ཚོགས་ལས་ལ་འགྱེད་པའི་རྟགས། །སྙན་ལ་དུང་གི་ཨ་ལུང་འཁྲོལ་བ་ནི། །ཐབས་དང་ཤེས་རབ་དབྱེར་བ་མེད་པའི་རྟགས། །གཡས་པས་རྡོ་རྗེ་མདུང་དར་བསྣམས་པ་ནི། །དགྲ་བགེགས་མ་ལུས་རྩད་ནས་གཅོད་པའི་རྟགས། །མགར་གྱི་སྦུད་པ་གཡོན་དུ་བསྣམས་པ་ནི། །ཉམས་པ་དབང་མེད་ལྷ་དབྱེ་བླ་འགུགས་རྟགས། །སྨུག་བེར་ཟ་འོག་སྔོ་ཁྲ་གསོལ་བ་ནི། །སྣང་སྲིད་ཆོས་རྣམས་དབང་དུ་སྡུད་པའི་རྟགས། །དབུ་ལ་སྭག་ཞུ་སྨུག་པོ་གསོལ་བ་ནི། །བདེ་གཤེགས་རྒྱལ་བ་རྣམས་ཀྱི་དབང་བསྐུར་རྟགས། །ཞབས་གཉིས་སག་ལྷམ་སྨུག་པོ་གསོལ་བ་ནི། །འགྲོ་བའི་དོན་ལ་སྐྱོ་དུབ་མེད་པའི་རྟགས། །ཆིབས་སུ་ར་སྐྱེས་ཁམ་པ་ཆིབས་པ་ནི། །གར་རྦད་ལས་ལ་ཐོགས་པ་མེད་པའི་རྟགས། །མདའ་གཞུ་འཁོར་གསུམ་ལུས་ལ་བརྒྱན་པ་ནི། །རྟག་ཏུ་རྣལ་འབྱོར་བུ་བཞིན་སྐྱོང་བའི་རྟགས། །མེ་དཔུང་འབར་བའི་ཀློང་དུ་བཞུགས་པ་ནི། །ཕྱོགས་བཅུར་སྤྲུལ་པ་སྣ་ཚོགས་འགྱེད་པའི་རྟགས། །འཁོར་དུ་སྡེ་བརྒྱད་ཕོ་ཉ་འགྱེད་པ་ནི། །གདུག་པའི་དགྲ་བགེགས་མ་ལུས་སྒྲོལ་བའི་རྟགས། །ཤར་གྱི་ཕྱོགས་ནས་གནམ་ས་ཕྱེད་ཀྱི་བདག །ཨ་ལས་སྐྱེས་པའི་ཚངས་པ་སྲོག་བདག་ནི། །སྐུ་མདོག་དཀར་པོ་དགྲ་སྙིང་ཞལ་དུ་གསོལ། །ཆིབས་སུ་རྔམ་བྱེད་གཡུ་འབྲུག་སྔོན་པོ་ཆིབས། །ལྷ་རྣམས་ཡོངས་ཀྱི་སྡེ་དཔོན་ཆེ་ལ་བསྟོད། །ཡ་ལས་སྐྱེས་པའི་ཡ་མ་རཱ་ཙ་ནི། །སྐུ་མདོག་སེར་ནག་ལག་ན་ཁྲམ་ཤིང་ཐོགས། །ཆིབས་སུ་མ་ཧེ་སྔོན་པོ་རུ་རིང་ཆིབས། །གཤིན་རྗེ་ཡོངས་ཀྱི་སྡེ་དཔོན་ཆེ་ལ་བསྟོད། །ནཱ་ལས་སྐྱེས་པའི་ཀླུ་བདུད་ནག་པོ་ནི། །སྐུ་མདོག་སྔོ་ནག་སྦྲུལ་གྱི་ཞགས་པ་ཐོགས། །ཆིབས་སུ་ཞེ་སྡང་གདུག་པ་སྦྲུལ་ལ་ཆིབས། །ཀླུ་རྣམས་ཡོངས་ཀྱི་སྡེ་དཔོན་ཆེ་ལ་བསྟོད། །དུ་ལས་སྐྱེས་པའི་རལ་བ་ཚར་དགུ་ནི། །ནག་པོ་བཀྲག་མེད་བདུད་ཀྱི་ཞགས་པ་ཐོགས། །ཆིབས་སུ་མུན་པ་ནག་པོ་འཚུབས་མར་ཆིབས། །བདུད་རྣམས་ཡོངས་ཀྱི་གཙོ་ལ་ཕྱག་འཚལ་བསྟོད། །ཙ་ལས་སྐྱེས་པའི་ཡམ་ཤུད་དམར་པོ་ནི། །དམར་པོ་བསེ་མདུང་ལག་ན་རྩེ་གསུམ་ཐོགས། །ཆིབས་སུ་བཙན་ར་གློག་དམར་འཁྱུགས་འདྲར་ཆིབས། །བཙན་རྣམས་ཡོངས་ཀྱི་གཙོ་ལ་ཕྱག་འཚལ་བསྟོད། །རུ་ལས་སྐྱེས་པའི་དྲང་སྲོང་རཱ་ཧུ་ལ། །སྐུ་མདོག་ལྗང་གུ་ར་ཡི་མདའ་གཞུ་ཐོགས། །ཆིབས་སུ་ཆུ་སྲིན་རྔམ་པོ་ཆེ་ལ་ཆིབས། །གཟའ་རྣམས་ཡོངས་ཀྱི་གཙོ་ལ་ཕྱག་འཚལ་བསྟོད། །ཤ་ལས་སྐྱེས་པའི་སྲིན་པོ་རོ་ཏི་ནི། །སྐུ་མདོག་སྨུག་ནག་རྒྱུ་མའི་ཞགས་པ་ཐོགས། །ཆིབས་སུ་གློག་དམར་མེ་འོད་འཁྱུགས་པ་ཆིབས། །སྲིན་པོ་ཡོངས་ཀྱི་གཙོ་ལ་ཕྱག་འཚལ་བསྟོད། །མ་ལས་སྐྱེས་པའི་མ་མོ་ཁྲག་འཛག་མ། །ནག་མོ་ཆེན་མོ་དྲག་རྩལ་མཐུ་ཆེན་མོ། །མཚོན་གྱི་གྲུ་གུ་ནད་རྐྱལ་སྣ་ཚོགས་བསྣམས། །ཆིབས་སུ་མགྱོགས་བྱེད་དྲེལ་རྟ་ནག་པོ་ཆིབས། །སྤྲུལ་པའི་བྱ་ཚོགས་མང་པོ་ལིངས་སེ་ལིང་། །མཆེ་ཅན་སྟག་གཟིག་འབུམ་ནི་ཉི་ལི་ལི། །ཁྱི་སྤྱང་དོམ་དྲེད་འབུམ་ནི་ཟངས་སེ་ཟང་། །ཟངས་ཀྱི་འཕར་བ་འབུམ་ནི་གློག་ལྟར་འཁྱུགས། །སྤྲུལ་པ་སྡེ་བརྒྱད་གཙོ་འཁོར་འབུམ་གྱི་ཚོགས། །ལ་ལས་ཉི་ཟླ་ཐོགས་ཏེ་ཆ་ལང་སྡེབ། །ལ་ལས་གློག་ཕྲེང་འཛིན་ཅིང་གཡུག་པར་བྱེད། །ལ་ལས་རི་རབ་གླད་ལ་བསྐོར་བར་བྱེད། །ལ་ལས་རྒྱུ་ཞགས་བཟློག་ཅིང་འཕེན་པར་བྱེད། །རྡོ་རྗེ་ལེགས་པ་དགྱེས་སྡེ་བརྟན་མར་བཅས། །སྡེ་བརྒྱད་དྲེགས་པའི་གཙོ་བོ་ཆེ་རྣམས་དང་། །མཆེད་ཟླ་སུམ་བརྒྱ་དྲུག་ཅུའི་འཁོར་ཚོགས་བཅས། །རྣལ་འབྱོར་སྒྲུབ་པོའི་རེ་འདོད་བསྐང་ལ་བསྟོད། །དམ་ཅན་ར་ཞོན་རྟགས་བསྟོད་དམ་ཉམས་སྙིང་འབྱིན་ཞེས་བྱ་བ་འདི་ནི་རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེས་བྲིས་པ་དགེ །