ཕུར་སྲུང་ལྕམ་དྲལ་བསྐུལ་བ་ནི།
ཧཱུྃ། མཐིང་ནག་གྲུ་གསུམ་འབར་བའི་དཀྱིལ་འཁོར་ནས། །བཅོམ་ལྡན་དཔལ་ཆེན་རྡོ་རྗེ་གཞོན་ནུ་ཡི། །དཀྱིལ་འཁོར་ཆེན་པོའི་བར་ཁྱམ་ཡངས་པ་རུ། །ལེགས་ཉེས་སྟངས་འཛིན་དམ་ཚིག་རྗེས་གཅོད་པའི། །རྡོ་རྗེ་ཕུར་བའི་སྲུང་མ་མཐུ་རྩལ་ཅན། །དཔལ་གྱི་བཀའ་ཉན་ཤྭ་ན་མཆེད་སྡེ་བཞི། །ས་བདག་ཆེན་མོ་བསེ་ཡི་ལྷ་མོ་བཞི། །བདག་ཉིད་ཆེན་མོ་དཔལ་ལྡན་མཆེད་སྡེ་བཞི། །མིང་པོ་གིང་བཞི་དབང་ཕྱུག་ཚོགས་དང་བཅས། །ཤ་ཁྲག་བརྒྱན་པའི་གཏོར་མ་འདི་བཞེས་ལ། །སངས་རྒྱས་བསྟན་པ་གཉན་པོ་བཤིགས་པ་དང་། །བླ་མའི་སྐུ་དགྲ་རྣལ་འབྱོར་སྒོས་དགྲ་དང་། །ཆོས་སྡེ་དཀྲུགས་དང་གསང་སྔགས་ཆོས་ལ་སྨོད། །ཁྱད་པར་སྡེ་དགོན་ཡོ་བྱད་རྐུ་བའི་རིགས། །མཐུ་ཆེན་སྲུང་མའི་དབང་པོ་ཁྱེད་རྣམས་ཀྱིས། །དྲག་རྩལ་ཐོགས་མེད་ལས་ལ་ཆས་རེ་རན། །ལོ་ཟླ་ཙམ་ཡང་བཞག་པའི་ལོང་མེད་པས། །ད་ལྟ་ཉིད་དུ་སྒྲོལ་བའི་ཕྲིན་ལས་མཛོད། །དམ་ཚིག་དུས་ལ་བབ་བོ་ས་མ་ཡ། །དམ་ལྡན་སྒྲུབ་པ་པོ་ཡི་གང་ཟག་ལ། །ཕྱི་ནང་ཉེར་འཚེའི་མི་མཐུན་རིགས་རྣམས་ཀུན། །མ་ལུས་ལྷག་མེད་དབྱིངས་སུ་ཞི་བ་དང་། །སྔོན་ཚེ་དཔལ་ཆེན་སྤྱན་སྔར་ཁས་བླངས་པའི། །ཅི་ལྟར་བཅོལ་བའི་ཕྲིན་ལས་འགྲུབ་པར་མཛོད། །ཅེས་པ་འདི་ཡང་རྫོགས་སྤྲུལ་ལྔ་པས་བསྟན་ལ་ཕན་པའི་ལྷག་བསམ་དག་པས་བྲིས་པ་དགེ ། ། །