ལྡང་ལྷའི་གསོལ་མཆོད་ཀུནྡའི་པད་ཚལ་ཞེས་བྱ་བ་བཞུགས་སོ།།

རང་ཉིད་རྡོ་རྗེ་གཞོན་ནུའི་ང་རྒྱལ་དང་ལྡན་པའི་ངང་ནས། ཧཱུྃཿ རང་ཉིད་རྡོ་རྗེ་གཞོན་ནུ་གསལ་བའི་མདུན། །འཇའ་ཟེར་འོད་ཕུང་འཁྲིགས་པའི་ཀློང་དཀྱིལ་ན། །རིན་ཆེན་བྲག་རིས་གཏམས་པའི་ཕོ་བྲང་དུ། །འཇིག་རྟེན་དྲེགས་པ་ཀུན་གྱི་གཙུག་གི་རྒྱལ། །རྡོ་རྗེ་ཕུར་བའི་ཟབ་གཏེར་སྐྱོང་མཛད་པའི། །འགྱུར་མེད་དབྱིངས་ལ་ཤར་བའི་དཔལ་འབར་ཆེ། །ལྷ་ཡི་དགེ་བསྙེན་རྡོ་རྗེ་དྲག་པོ་རྩལ། །སྐུ་མདོག་གངས་ལ་ཉི་མ་ཤར་བ་ལྟར། །ཉི་མ་འབུམ་ལས་ལྷག་པའི་འོད་ཟེར་འཕྲོ། །ཞལ་གཅིག་ཕྱག་གཉིས་ཁྲོ་འཛུམ་བརྗིད་པའི་སྐུ། །སྐུ་ལ་ཟ་འོག་དར་དཀར་རལ་དགུར་གསོལ། །ཆིབས་སུ་ལྷ་རྟ་ངང་དཀར་རྣ་སྔོན་ཆིབས། །འཇིགས་པའི་སྐུ་ལ་མངོན་སྤྱོད་དྲག་པོའི་སྐུ། །ཕྱག་གཡས་དར་དཀར་རུ་མཚོན་མཁའ་ལ་ཕྱར། །གཡོན་པས་དགྲ་བོའི་ཙིཏྟ་ཞལ་དུ་གསོལ། །དགེ་བསྙེན་ཆེན་པོའི་བཀའ་ཡི་ལས་མཁན་ཚོགས། །ཅི་བགྱིས་བཀའ་ཉན་ལས་རྣམས་སྒྲུབ་མཛད་པའི། །བཙན་རྒོད་བྱ་ར་སྟོང་གི་ཚོགས་དང་བཅས། །མཐུ་སྟོབས་རྫུ་འཕྲུལ་ནམ་མཁའི་མཐའ་དང་མཉམ། །གནམ་ས་བར་སྣང་ས་གཞི་ཐམས་ཅད་ཁེང་། །ཏིལ་གྱི་གོང་བུ་ལྟ་བུ་བཞུགས་པར་གྱུར། །བདག་ཉིད་ལྷར་གསལ་ཐུགས་ཀའི་ས་བོན་ལས། །འོད་འཕྲོའི་རང་བཞིན་གནས་ནས་སྤྱན་དྲངས་གྱུར། །སྤྱན་འདྲེན་ནི། ཧཱུྃ། རང་བཞིན་ཆོས་དབྱིངས་ཕོ་བྲང་དམ་པ་དང་། །གཏེར་གནས་ཕྲ་མོ་བྲག་གི་ཕོ་བྲང་ནས། །ལྷ་ཡི་དགེ་བསྙེན་རྡོ་རྗེ་དྲག་པོ་རྩལ། །བཙན་རྒོད་བྱ་ར་སྟོང་གི་ཚོགས་དང་བཅས། །དོན་ལ་གཤེགས་བཞུགས་མཚན་མ་མི་དམིགས་ཀྱང་། །འོན་ཀྱང་ཀུན་རྫོབ་སྒྱུ་མའི་ཚུལ་གྱིས་ནི ། །བསྟན་པ་སྲུང་ཞིང་བསྟན་འཛིན་སྐྱོང་བ་དང་། །སྒྲུབ་ལ་ཕྲིན་ལས་རྣམ་བཞི་སྩོལ་བའི་ཕྱིར། །དགེ་བསྙེན་ཆེན་པོ་འཁོར་དང་བཅས་པ་རྣམས། །དམ་ཚིག་དབང་གི་གནས་འདིར་གཤེགས་སུ་གསོལ། །བཞུགས་གསོལ་ནི། ཧཱུྃ། ཡིད་འོང་རིན་ཆེན་ཕོ་བྲང་ཉམས་དགའ་བར། །ཐབས་ཤེས་ཉི་ཟླ་པདྨ་བརྩེགས་པའི་སྟེང་། །དགེ་བསྙེན་ཆེན་པོ་འཁོར་དང་བཅས་པ་རྣམས། །དགྱེས་ཤིང་མི་གཡོ་བརྟན་པར་བཞུགས་སུ་གསོལ། །ཕྱག་འཚལ་ནི། ཧཱུྃ། ལོག་རྟོག་འཁོར་བར་འཁྱམས་པའི་སེམས་ཅན་རྣམས། །རང་རིག་ཡེ་ནས་རྣམ་པར་དག་པ་ལ། །མཚན་མར་འཛིན་པའི་དྲི་མ་ཀུན་བྲལ་ན། །དོན་གྱི་དགེ་བསྙེན་ཆེན་པོ་ཁྱོད་ལ་འདུད། །མཆོད་པ་ནི། ཧཱུྃ། ཕྱོགས་བཅུ་རབ་འབྱམས་རྒྱ་མཚོའི་ཞིང་ཁམས་ན། །ཡན་ལག་བརྒྱད་ལྡན་མཆོད་ཡོན་མཚོ་ལྟར་བསྐྱིལ། །དག་བྱེད་གཙང་མའི་ཞབས་བསིལ་ཛ་ཧུའི་རྒྱུན། །མཛེས་སྡུག་རྣམ་བཀྲའི་མེ་ཏོག་ཚར་དུ་དངར། །བདུག་པའི་སྤྲིན་ཚོགས་ཕྱོགས་བཅུ་ཀུན་ཏུ་འཕྲོ། །སྣང་གསལ་མར་མེའི་འོད་ཀྱིས་སྟོང་ཁམས་གང་། །ག་བུར་ཙནྡན་དྲི་ཞིམ་བྱུགས་པའི་མཚོ། །རོ་བརྒྱ་ལྡན་པའི་ཞལ་ཟས་ལྷུན་པོ་སྤུང་། །ཡན་ལག་རྒྱ་མཚོའི་སྒྲ་སྙན་དཔག་མེད་ལྡན། །བྷནྡྷ་འཁོར་ཡུག་མཛེས་པའི་སྣོད་ཡངས་སུ། །ར་ས་ཡ་ནའི་རྒྱ་མཚོ་མེ་རེ་རེ། །དུང་ཆེན་ལྕང་ལོར་བཅས་པའི་སྣོད་ཡངས་སུ། །དམར་ཆེན་རཀྟའི་རྒྱ་མཚོ་ཆི་ལི་ལི། །སྣ་ཚོགས་རིན་པོ་ཆེ་ཡི་གཏོར་གཞོང་དུ། །རོ་བཅུད་དཔལ་གྱི་གཏོར་མ་སྤུངས་སེ་སྤུང་། །སྤྱི་དང་ཁྱད་པར་མཐུན་པའི་དམ་རྫས་ནི། །ངོ་མཚར་མཆོད་པའི་སྤྲིན་ཕུང་མཐའ་ཡས་པ། །བསམ་ཡས་སྒྱུ་འཕྲུལ་དྲྭ་བའི་འཁོར་ལོར་མཆོད། །ཨོཾ་བཛྲ་ཨརྒྷཾ་སོགས་ནས་ཤབྟ་མ་ཧཱ་པུཉྩ་རཀྟ་བྷ་ལིངྟ་པུ་ཙ་ཁ་ཁ་ཁཱ་ཧི་ཁཱ་ཧི། བསྟོད་པ་ནི། ཧཱུྃ། རྡོ་རྗེ་གཞོན་ནུའི་བཀའ་ཉན་ལས་བྱེད་གཙོ། །རྡོ་རྗེའི་ཐ་ཚིག་ལ་གནས་མཐུ་ཆེན་པོ། །རྡོ་རྗེ་ཕུར་བའི་ཟབ་གཏེར་སྐྱོང་བའི་བདག །རྡོ་རྗེ་དྲག་པོ་རྩལ་ལ་ཕྱག་འཚལ་བསྟོད། །གདོད་ནས་རང་བཞིན་རྣམ་པར་དག་པ་ལ། །གདོད་མ་ཉིད་ནས་མངོན་པར་བྱང་ཆུབ་ཀྱང་། །གདོད་མའི་རང་མདངས་རྩལ་ལས་ཤར་བའི་སྐུ། །གདོད་ནས་གཡོ་མེད་དགེ་བསྙེན་ཁྱོད་ལ་བསྟོད། །རང་བཞིན་གདོད་ནས་རྣམ་པར་དག་པ་ལ། །རང་གཞན་མཚན་མ་གཅིག་ཏུ་འཛིན་པའི་བློ། །རང་རིག་སྐྱེ་བ་མེད་པའི་ཤེས་རབ་ཀྱིས། །རང་བཞིན་དབྱིངས་ཀྱི་ངང་དུ་གྲོལ་ལ་བསྟོད། །ལྷ་ཡི་དགེ་བསྙེན་རྡོ་རྗེ་དྲག་པོ་རྩལ། །རང་རིག་སྐྱེ་མེད་དབྱིངས་ཀྱི་ཡེ་ཤེས་དེ། །རང་ཞལ་མཇལ་བ་དོན་གྱི་ཆོས་སྐྱོང་ལ། །དུས་རྣམ་ཀུན་ཏུ་ཁྱོད་ལ་བསྟོད་པར་བགྱི། །གང་ཐུགས་བདེ་བ་ཆེན་པོའི་རང་བཞིན་ལ། །སྙིང་རྗེ་ཆེན་པོའི་དབྱིངས་ལས་མ་གཡོས་ཀྱང་། །མི་བསྲུན་ལོག་པར་འདྲེན་པའི་བདུད་སྡེའི་ཚོགས། །མངོན་སྤྱོད་དྲག་པོའི་ཤུགས་ཀྱིས་སྒྲོལ་ལ་བསྟོད། །འཁྲུལ་སྣང་འཁོར་བར་འཁྱམས་པའི་འགྲོ་བ་རྣམས། །རང་བཞིན་གདོད་ནས་རྣམ་པར་དག་པ་ལ། །མཚན་མར་འཛིན་པའི་དྲི་མ་ཀུན་བྲལ་ནས། །དོན་གྱི་དགེ་བསྙེན་ཆེན་པོ་ཁྱོད་ལ་འདུད། །འཕྲིན་བཅོལ་ནི། ཧཱུྃ། འཇིག་རྟེན་འདི་ན་དྲེགས་པ་ཀུན་གྱི་གཙོ། །མཐུ་སྟོབས་རྫུ་འཕྲུལ་ནམ་མཁའི་མཐའ་དང་མཉམ། །ཞི་བའི་ངང་ལས་སྙིང་རྗེ་ཁྲོས་པའི་དཔལ། །གཏུམ་ལ་འཇིགས་པ་ཁྲོས་པའི་དཔལ་འབར་ཆེ། །རིག་འཛིན་སྒྲུབ་པའི་རྣལ་འབྱོར་བདག་ཅག་གིས། །རྟག་ཏུ་དགེ་བསྙེན་ཆེན་པོ་ཁྱོད་སྒྲུབ་ན། །དེང་ནས་བྱང་ཆུབ་སྙིང་བོ་མ་ཐོབ་པར། །ཉི་མཚན་ཀུན་ཏུ་མེལ་ཚེ་བྱ་ར་མཛོད། །ཆོས་དང་སྲིད་ཀྱི་བྱ་བ་མཐའ་དག་ལ། །ཕྱི་ནང་མི་མཐུན་བར་ཆད་མཐའ་དག་ཀུན། །དུས་རྣམས་རྟག་ཏུ་ཁྱོད་ཀྱི་ཕྲིན་ལས་ཀྱིས། །འཁྲུལ་བ་ཀ་ནས་དག་པའི་ཕྲིན་ལས་མཛོད། །ཅེས་པ་འདི་ཡང་ནི་་རང་གི་གྲྭ་འཁོར་འདན་ཐུབ་བསྟན་སེངྒེ་ནས་བསྐུལ་བའི་ངོར་རྫོགས་སྤྲུལ་ལྔ་བ་ཐུབ་བསྟན་ཆོས་ཀྱི་རྡོ་རྗེས་རུ་དམ་ཨོ་རྒྱན་བསམ་བསྟན་ཆོས་གླིང་གི་ཕོ་བྲང་ཆེན་པོའི་ཡང་རྩེ་འཆི་མེད་གྲུབ་པའི་དགའ་ཚལ་དུ་བསྟན་ལ་ཕན་པའི་ལྷག་བསམ་དག་པས་བྲིས་པ་དགེ་ལེགས་སུ་གྱུར་ཅིག །