གཏེར་སྲུང་ལྡང་ལྷའི་བསྐང་བ་ལྷ་ཡི་རྔ་བོ་ཆེ་ཞེས་བྱ་བ་བཞུགས་སོ།།
ཀི་ལ་ཡ་ཡི་བཀའ་སྡོད་དྲེགས་པའི་གཙོ། །ཁུ་འཕང་ཐོག་སེར་ཡོངས་ཀྱི་མངའ་བདག་པོ། །གེ་སར་ལས་འཁྲུང་པདྨ་ཐོད་ཕྲེང་གིས། །ངོ་མཚར་རྡོ་རྗེའི་ཐ་ཚིག་ཉེར་བཞག་པ། །ཅི་ནས་སྔོན་གྱི་དམ་ཚིག་ཉེར་དགོངས་ལ། །ཆུ་ལས་ཆུ་བུར་རྡོལ་བ་ཇི་བཞིན་དུ། །ཇེ་ཞིག་མ་ཡིན་ནམ་མཁའི་གློག་ཕྲེང་བཞིན། །ཉོ་ཚང་དགྱེས་པའི་འཛུམ་དཀར་གཤེགས་སུ་གསོལ། །ཏི་ར་ཞིང་སྐྱོང་ཡོངས་ཀྱི་མངའ་བདག་པོ། །ཐུ་མ་ར་སོགས་བརླག་པའི་འཕྲིན་ལས་མཛོད། །དེ་བཞིན་གཤེགས་པའི་ཐ་ཚིག་ལ་གནས་པ། །ནོ་པི་ཀ་ཡི་མགོན་གྱུར་ཁྱོད་གཅིག་པུ། །པི་ཝཾ་དབྱར་རྔ་ཡན་ལག་དྲུག་ཅུའི་གསུངས། །ཕུ་ཆུ་ལྟ་བུའི་ཐུགས་རྗེ་རྒྱུན་རིང་པོ། །བེ་ལུག་ལ་སོགས་ནོར་རྣམས་ཀུན་གྱི་བདག །མོ་ཧར་བྱེད་པའི་འདོད་པའི་འཕྲིན་ལས་མཛོད། །ཙི་ནའི་ཡུལ་དང་མོན་དང་བལ་བོའི་ཡུལ། །ཚུ་རོལ་བོད་ཡུལ་རུ་བཞི་ལ་སོགས་པའི། །ཛེ་ཏའི་ཚལ་སོགས་ཡུལ་རྣམས་ཀུན་གྱི་བདག །ཝོ་ཛི་ཧས་ཀྱང་བསྔགས་པའི་ལྷ་གཅིག་པུ། །ཞི་དང་ཁྲོ་བོ་ཞི་མ་ཁྲོ་ཡི་ཚུལ། །ཟུ་ར་ར་སྐྱེས་ལ་སོགས་དྲེགས་པའི་རྗེ། །འེ་འུར་རྟོག་པའི་ཐོར་རླུང་དང་འགྲོགས་པའི། །ཡོ་གའི་དགྲ་ལྷ་ཆེན་པོ་ཁྱོད་གཅིག་པུ། །རི་རབ་ལྟ་བུ་བརྗིད་པའི་དགྲ་ལྷ་ཆེ། །ལུ་མའི་ཆུ་རྒྱུན་ལྟ་བུའི་དངོས་གྲུབ་ནི། །ཤེ་མུན་ཉམ་ང་མེད་པར་དུས་རྟག་ཏུ། །སོ་སོར་གང་ལ་ཅི་འདོད་དངོས་གྲུབ་སྩོལ། །ཧི་ཧིའི་དགྱེས་པའི་རྡོ་རྗེ་གླུ་དབྱངས་ཀྱིས། །ཨུ་པ་ལ་སོགས་ཐེག་དགུའི་བསྟན་པ་ནི། །མི་ནུབ་སྲིད་པའི་རྩེ་མོར་དགུང་དུ་ཕྱར། །སྙན་པའི་དར་ཆེན་ཕྱོགས་བཅུར་རྒྱས་པར་མཛོད། །ཀ་པ་ལ་ཡི་གཏོར་སྣོད་ཡངས་པའི་ནང་། །ཁ་དོག་རོ་བཅུད་ལྡན་པའི་བ་ལིངྟ། །ག་ཤལ་ལྕང་ལོར་བཅས་པའི་བྷནྡྷ་རུ། །ང་བདག་བསྒྲལ་བའི་རཀྟའི་ཐུགས་དམ་བསྐང་། །ཅ་ག་རིན་ཆེན་སྣ་ལྔའི་སྣོད་ནང་དུ། །ཆ་ཤས་མ་ཡིན་བདུད་རྩིའི་རྒྱ་མཚོར་བསྐྱིལ། །ཇ་ཆང་འོ་སྐོལ་བཏུང་བའི་རིགས་བྱེད་ཚོགས། །ཉ་རྒྱས་ཟླ་བཞིན་འདོད་དོན་ཡོངས་གང་མཛོད། །ཏ་ར་ཎ་སོགས་ཉེར་སྦྱོད་སྣ་ཚོགས་པ། །ཐ་དད་མ་གྲུབ་ཆུ་ཟླའི་གཟུགས་བརྙན་བཞིན། །ད་ལྟ་དངོས་འབྱོར་ཡིད་སྤྲུལ་མཆོད་པའི་ཚོགས། །ན་མར་ཇི་བཞིན་རྟག་པར་ཐུགས་དམ་བསྐང་། །པ་ཏྲའི་འཁྱུད་ཀློང་སྣ་ཚོགས་དབང་གཞུའི་རྩེར། །ཕ་མཐའ་ཡས་པའི་འདོད་ཡོན་ལྷ་མོའི་རིགས། །བ་མཆོག་གཏེར་བུམ་ཡིད་བཞིན་དབང་གི་རྒྱལ། །མ་རྨོས་ལོ་ཏོག་རྣམས་ཀྱིས་ཐུགས་དམ་བསྐང་། །ཙ་སད་སེར་གསུམ་གློ་གོར་ཧོན་གསུམ་དང་། །ཚ་གྲང་ཞ་གྲུམ་སྨྱོ་འབོག་བརྒྱལ་ནད་དང་། །ཛ་ལང་བསམ་སྦྱོར་ངན་པའི་བདུད་སྡེའི་ཚོགས། །ཝ་ལྟར་ཞུམ་པའི་དགྲ་བོ་སྒྲོལ་ལ་བསྟོད། །ཞྭ་ཡི་གཙུག་ལྟར་བརྟེན་པ་ཁྱོད་ཉིད་ནི། །ཟ་བྱེད་སྣང་སྲིད་ལྷ་འདྲེ་ཡོངས་ཀྱི་གཙོ། །འ་རའི་དབྱངས་ཀྱི་ཁྱོད་ཉིད་བསྐུལ་བའི་ཚེ། །ཡ་མཚན་ལྷ་མཆོག་ཁྱོད་ཀྱིས་སྡོང་གྲོགས་མཛོད། །རྭ་ཅན་ལ་སོགས་ཕྱུགས་ཀྱི་རིགས་རྣམས་ནི། །ལ་ལ་ཙམ་མིན་འབུམ་ཕྲག་ཡངས་བའི་ཚོགས། །ཤ་རྟ་རྐང་བཞི་དུད་འགྲོའི་ཚོགས་རྣམས་ནི། །ས་སྟེང་ཀུན་ཏུ་གང་བའི་དངོས་གྲུབ་སྩོལ། །ཧ་ལའི་དུག་གི་སྦྱོར་བ་མཐའ་དག་ཀུན། །ཨ་ཧོ་ངོ་མཚར་དགའ་བའི་དཔལ་སྟེར་གྱིས། །མིང་ཙམ་མེད་པར་ཞི་བའི་ཕྲིན་ལས་མཛོད། །ལྷ་མཆོག་ཁྱེད་ཀྱི་ཐུགས་རྗེའི་འོད་ཟེར་ཀྱིས། །སྔོན་ལས་འཕྲལ་རྐྱེན་མི་མཐུན་བགེགས་ཀྱི་ཚོགས། །མི་དང་མི་མིན་གནོད་བྱེད་འབྱུང་པོའི་རིགས། །རྡུལ་ཕྲན་ཙམ་དུ་བརླག་པའི་ཕྲིན་ལས་མཛོད། །ཅེས་ལྡང་ལྷའི་བསྐང་བ་འདི་ནི་ཡིག་ཐུབ་བསྟན་ནོར་བུ་ནས་བསྐུལ་བའི་ངོར་མེ་སྦྲུལ་ཟླ་༤ཚེས་༢༥ལ་མགོན་ཁང་དབང་དྲག་རོལ་བ་ནས་རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེས་བྲིས་པ་དགེའོ། །