གནོད་སྦྱིན་ཙིའུ་དམར་པོའི་གསོལ་མཆོད་གློག་གི་ཕྲེང་བ་ཞེས་བྱ་བ་བཞུགས་སོ།།
ཧཱུྃ་ཧྲཱིཿ དབང་དྲག་རོལ་པའི་ཞིང་ཁམས་ཆེན་པོ་ནས། །བཅོམ་ལྡན་རྟ་མཆོག་པདྨ་ཧེ་རུ་ཀའི། །བཀའ་ཡི་འཁོར་དུ་གཏོགས་པའི་མཐུ་བོ་ཆེ། །དྲེགས་པའི་ཡོངས་རྗེ་དྲེགས་པ་ཀུན་གྱི་གཤེད། །ལྷ་ཡི་ལྷ་མཆོག་སྟོབས་ལྡན་ཧེ་རུ་ཀ །འབར་བའི་རྒྱལ་པོ་དབང་དྲག་ཁྲོས་པའི་སྐུ། །ཤིན་ཏུ་མི་བཟད་གཏུམ་ཆེན་ཧ་ལའི་མདོག །ཉི་མ་འབུམ་གྱི་འོད་ཟེར་ཕྱོགས་བཅུར་འཕྲོ། །གར་དགུའི་ཉམས་ལྡན་ཁྲོ་གཉེར་གློག་ལྟར་འཁྱུག །རྔམས་བརྗིད་ཁྲོས་པའི་ངར་སྐད་འབྲུག་སྟོང་ལྡིར། །ཤངས་ནས་དྲག་པོའི་རླུང་འཚུབས་ཐོག་ལྟར་འབེབས། །དབྱིངས་ཀྱི་ངང་ལ་ཁྲོ་འཁྲུགས་མི་མངའ་ཡང་། །ཆུ་ཟླའི་ཚུལ་དུ་ལོག་འདྲེན་གཤེད་པོ་ཆེ། །ཁམས་གསུམ་ཀུན་ལས་རྒྱལ་བའི་སྟོབས་ལྡན་སྐུ། །ཁྲོ་རྒྱལ་ཡོངས་ཀྱི་རྗེ་བཙན་ཁྱོད་གཅིག་པུ། །ཁྱོད་ཀྱི་གནས་ལ་ངེས་པར་མ་མཆིས་ཀྱང་། །ཁྱད་པར་ཤམ་བྷ་ལ་དང་དཀོར་མཛོད་གླིང་། །བྱང་ཕྱོགས་ལི་ཡུལ་ལྕང་ར་སྨུག་པོ་སོགས། །དྲག་ཤུལ་སྟོབས་ལྡན་ཁྱོད་ཉིད་གར་བཞུགས་ཀྱང་། །རྣལ་འབྱོར་གདུང་བའི་ང་རོས་འབོད་པའི་ཚེ། །མཁའ་ལས་གློག་དམར་འཁྱུག་པ་ཇི་བཞིན་དུ། །དམར་ནག་གྲུ་གསུམ་འབར་བའི་དཀྱིལ་འཁོར་དུ། །ཤ་ཁྲག་རྒྱ་མཚོ་འཁྱིལ་བའི་ཀློང་ཡངས་ན། །རྟོག་མེད་བམ་རོ་ཕོ་མོ་བསྣོལ་བའི་སྟེང་། །དགྱེས་ཤིང་མི་གཡོ་བརྟན་པར་བཞུགས་སུ་གསོལ། །དད་དང་གུས་པའི་ཚུལ་གྱིས་ཁྱོད་ལ་འདུད། །ཁྲོ་རྒྱལ་ཁྱེད་དང་མཐུན་པའི་དམ་རྫས་ནི། །རབ་འབྱམས་ཞིང་གི་ཁྱོན་རྣམས་ཡོངས་བཀང་ཏེ། །བྷ་ལིང་གཏོར་མའི་ཚོགས་ནི་རི་ལྟར་སྤུངས། །སྨན་རཀ་ཕུད་རྒོད་ཚོགས་ནི་མཚོ་ལྟར་བསྐྱིལ། །ཞིང་ཆེན་གསར་རྙིང་ཚོགས་ནི་གྲམ་ལྟར་བརྡལ། །སྤྱན་གཟིགས་སྣ་ཚོགས་རྫ་ལྟར་བཀྲམ་ལགས་ན། །རྣམ་མང་ནམ་མཁའ་མཛོད་ཀྱི་འཁོར་ལོ་འདི། །རྣམ་པ་སྤྱན་གཟིགས་མཐུན་རྫས་རྟེན་རྫས་སོགས། །རྣམ་དག་ཀུན་བཟང་མཆོད་པའི་སྤྲིན་ལྟ་བུ། །རྣམ་པ་ཀུན་ཏུ་དགྱེས་པ་ཆེན་པོར་བཞེས། །གང་སྐུ་སྟོབས་ལྡན་དབང་པོ་ཁྱོད་ཉིད་ཀྱིས། །གང་ལ་བར་དུ་གཅོད་པའི་དགྲ་བགེགས་རྣམས། །གང་ལ་གང་འཚམས་དྲག་པོའི་ཕྲིན་ལས་ཀྱིས། །གང་ཞིག་ཕ་རོལ་དགྲ་དཔུང་འཇོམས་པར་མཛོད། །མ་གྱུར་བདག་སོགས་རིག་པ་འཛིན་རྣམས་ལ། །མ་ཡིས་བུ་བཞིན་སྐྱོང་བར་ཞལ་བཞེས་པའི། །མ་ལུས་ཕྲིན་ལས་རྣམ་བཞིའི་དངོས་གྲུབ་ནི། །མ་འབད་བཞིན་དུ་ལྷུན་གྱིས་འགྲུབ་པར་ཤོག །དགེ་ལེགས་ཡོན་ཏན་བྱེ་བའི་གཏེར་མཛོད་མཆོག །དགེ་ལེགས་འདོད་རྒུའི་བསམ་འཕེལ་འབྱུང་བའི་གནས། །དགེ་ལེགས་ཕྲིན་ལས་རྣམ་བཞིའི་ཆར་འབེབས་པའི། །དགེ་ལེགས་སྣང་བས་ས་གསུམ་ཁྱབ་གྱུར་ཅིག །ཅེས་པ་འདི་ཡང་རང་གི་ཉེ་གནས་རིག་འཛིན་རྒྱ་མཚོས་བསྐུལ་བའི་ངོར་རྫོགས་སྤྲུལ་ལྔ་བའི་མིང་འཛིན་ཐུབ་བསྟན་ཆོས་ཀྱི་རྡོ་རྗེས་བྲིས་པ་དགེ་ལེགས་སུ་གྱུར་ཅིག །