གནོད་སྦྱིན་ཙིའུ་དམར་པོའི་བསྟོད་ཆེན་གདུག་པ་ཀུན་སྒྲོལ་ཞེས་བྱ་བ་བཞུགས་སོ།།

ཧྲཱི༔ སྟོང་པའི་ངང་ལས་སྐད་ཅིག་དྲན་རྫོགས་སུ། །རང་ཉིད་དབང་ཆེན་པདྨ་ཧེ་རུ་ཀཿ ཡབ་ཡུམ་མཉམ་པར་སྦྱོར་བའི་ཆོ་འཕྲུལ་ལས། །འོད་ཀྱི་འཕྲོ་འདུས་དོན་གཉིས་བྱས་པའི་མཐར། །རང་མདུན་རླུང་སེམས་དག་པའི་ཆོ་འཕྲུལ་ལས། །ཤར་བའི་གནས་མཆོག་དམ་ཅན་འདུ་བའི་ཞིང་། །བཙན་གྱི་བྲག་དམར་མེ་ལྟར་འབར་བའི་ངོས། །རཀྟ་ཁྲག་གི་ཞམ་ཆུ་མེ་རེ་རེ། །འདབ་ཆགས་ཤ་ཟན་གཅན་གཟན་སྣ་ཚོགས་ནི། །མི་རོ་གསར་རྙིང་བམ་པའི་ཚོགས་ལ་རྔམས། །སྨན་བཙུན་ཚོགས་ཀྱིས་གླུ་བྲོ་ཁྲིགས་སེ་ཁྲིག །བཙན་གྱི་བཤུགས་པའི་ཚོགས་ནི་ཀྱུ་རུ་རུ། །རྒྱལ་པོའི་འདུ་ཚོགས་རྒྱུན་མི་ཆད་པ་དེར། །རིན་ཆེན་ཟངས་ཀྱི་སྐུ་མཁར་རྩེ་དགུ་པ། །རྔམ་བརྗིད་འབར་བ་དགུང་ལ་བསྙེགས་པ་འདྲ། །བྱེ་རུའི་ཁ་བད་གསེར་དངུལ་ཟངས་ལྕགས་མཆོང་། །མར་གད་ཨིནྜ་ནི་ལའི་རང་བཞིན་ཅན། །སྟག་གཟིག་དོམ་དྲེད་གཅན་གཟན་རྒྱལ་མཚན་ལ། །མི་མགོ་ཙིཏྟ་རློན་པའི་ཏོག་གི་མཛེས། །ཟ་འོག་སྣ་ཚོགས་གོས་ཀྱི་འཕན་འཕུར་དང་། །ཡོལ་བ་བླ་བྲེ་ལྡ་ལྡི་ཕྱོགས་བཅུར་འཕྲོ། །དཀོར་མཛོད་སྣ་ཚོགས་དཔག་མེད་ཕྱུར་བུར་བཀང་། །དེ་མདུན་བཙན་ཡུལ་ཟངས་ཐང་དམར་པོ་ན། །དབང་ཆེན་བཀའ་སྡོད་བསྟན་སྲུང་དྲེགས་པའི་གཙོ། །ཤིན་ཏུ་གཏུམ་པ་མ་རུང་གདུལ་དཀའི་གཤེད། །གནོད་སྦྱིན་རྒྱལ་པོ་ཙིའུ་དམར་པོ་ཞེས། །ཁྲོས་པའི་རྒྱལ་པོ་པདྨ་ཧེ་རུ་ཀའི། །ཁྲོ་བ་བྲལ་བའི་ཡེ་ཤེས་རོལ་བའི་རྩལ། །ཁྲོས་པའི་གར་མཛད་དབང་གི་བཀའ་སྡོད་ཆེ། །ཁྲོས་པའི་དཔལ་འབར་ཁྱོད་ལ་བདག་བསྟོད་དོ། །གང་སྐུ་ཁམས་གསུམ་ཀུན་ལས་རྒྱལ་བའི་སྐུ། །གང་དག་སྒྲུབ་ལ་བརྣག་པའི་རྒྱལ་འགོང་ཚོགས། །གང་ལ་གང་འཚམས་དྲག་པོའི་ཕྲིན་ལས་ཀྱི། །གང་ཞིག་ཕ་རོལ་འཇོམས་མཛད་ཁྱོད་ལ་བསྟོད། །རབ་གསུང་དབྱར་གྱི་རྔ་ཆེན་ལྡིར་བ་ལས། །རབ་འཇིགས་ཧཱུྃ་ཕཊ་རུ་ལུའི་སྒྲ་སྒྲོག་ཚེ། །རབ་ཏུ་བརྣག་པའི་དགྲ་སྡེ་ཉམས་པའི་སྙིང་། །རབ་ཏུ་འགས་མཛད་ཁྱོད་ལ་བདག་བསྟོད་དོ། །གང་ཐུགས་བདེ་བ་ཆེན་པོའི་རང་བཞིན་ལ། །སྙིང་རྗེ་ཆེན་པོའི་ཤུགས་དང་མ་བྲལ་ཡང་། །གདུལ་དཀའ་འདུལ་བའི་གཤེད་དུ་ཁྲོས་པའི་ཚུལ། །སྐྱེ་འགྲོའི་སྲོག་གི་བདག་པོ་ཁྱོད་ལ་བསྟོད། །ཧྲཱིཿ སྐུ་མདོག་བསྐལ་བའི་མེ་ལྟར་འབར་བ་ནི། །དབང་ཆེན་རྒྱལ་པོའི་བཀའ་ཉན་ལས་བྱེད་རྟགས། །རལ་བ་དམར་པོ་མེ་འོད་འཁྲིགས་པ་ནི། །སྟེང་གི་ལྷ་རྣམས་དབང་དུ་སྡུད་པའི་རྟགས། །སྤྱན་ནས་མེ་ཡི་སྐར་མདའ་འཁྲུག་པ་ནི། །བར་སྣང་གཉན་རྣམས་དབང་དུ་སྡུད་པའི་རྟགས། །ཞལ་ནས་ཁྲག་གི་སེར་ཆེན་འབེབས་པ་ནི། །དགྲ་བོར་ཁྲག་ནད་དམར་ཡམས་གཏོང་བའི་རྟགས། །ཤངས་ནས་ཁྲག་གི་འཐོར་རླུང་འཚུབ་པ་ནི། །དགྲ་བོའི་ཡུལ་དུ་ཐོག་སེར་འབེབས་པའི་རྟགས། །མཆེ་བ་གངས་རི་ལྟར་བུར་གཙིགས་པ་ནི། །དགྲ་བགེགས་མ་ལུས་ཟ་བར་བྱེད་པའི་རྟགས། །ལྗགས་ནི་གློག་དམར་ལྟ་བུར་འཁྱུག་པ་ནི། །དགྲ་བོའི་གསོན་སྙིང་དམར་པོ་འབྱིན་པའི་རྟགས། །ཁྲོས་ཤིང་འཇིགས་ལ་རྔམ་པར་བསྟན་པ་ནི། །ཕ་རོལ་དཔུང་ཚོགས་རྡུལ་དུ་བརླག་པའི་རྟགས། །སྐུ་ལ་དར་དམར་བེར་ཆེན་གསོལ་བ་ནི། །དབང་གི་ལས་ལ་ཐོགས་པ་མེད་པའི་རྟགས། །ཟ་འོག་སྔོ་བཀྲའི་གང་ལག་བརྒྱན་པ་ནི། །དྲག་པོའི་ཕྲིན་ལས་ཐོགས་པ་མེད་པའི་རྟགས། །རིན་ཆེན་གསེར་གྱི་སྐ་རགས་བཅིང་པ་ནི། །རྒྱས་པའི་ཕྲིན་ལས་མཐའ་རུ་ཕྱིན་པའི་རྟགས། །དབུ་ལ་དར་དམར་འགྱིང་ཐོད་བཅིང་པ་ནི། །རིགས་བདག་དབང་ཆེན་རྒྱལ་པོ་བཞུགས་པའི་རྟགས། །ཐབས་ཀྱི་སྟག་དོང་གཡས་སུ་འཕྱང་བ་ནི། །ཕོ་རྒྱུད་དཔའ་བོ་དབང་དུ་སྡུད་པའི་རྟགས། །ཤེས་རབ་གཟིག་ཤུབས་གཡོན་དུ་འཕྱང་བ་ནི། །མོ་རྒྱུད་ཚོགས་རྣམས་ཟིལ་གྱིས་གནོན་པའི་རྟགས། །བསེ་ཕུབ་དམར་པོ་རྒྱབ་ཏུ་འཁྱིལ་བ་ནི། །ཕ་རོལ་དམག་དཔུང་གཡུལ་ངོ་བཟློག་པའི་རྟགས། །ཕྱག་གཡས་བཙན་ཞགས་དགྲ་ལ་འཕེན་པ་ནི། །དམིགས་པའི་དགྲ་བོ་མྱུར་དུ་འགུགས་པའི་རྟགས། །ཕྱག་གཡོན་ཟངས་མདུང་དགྲ་ལ་བསྣུན་པ་ནི། །དགྲ་སྲོག་སྐད་ཅིག་ཉིད་ལ་གཅོད་པའི་རྟགས། །ཅང་ཤེས་བྲ་བོ་རྒབ་ནག་ཆིབས་པ་ནི། །སྟོང་གསུམ་སྐད་ཅིག་ཉིད་ལ་བསྐོར་བའི་རྟགས། །དེ་ལ་དར་སྟན་དམར་པོ་བསྟད་པ་ནི། །ཉོན་མོངས་འདོད་ཆགས་དབྱིངས་སུ་དག་པའི་རྟགས། །མཛེས་པའི་རྟ་སྒ་ཁྲ་བོ་བསྟད་པ་ནི། །ཆོས་ཉིད་དབྱིངས་སུ་འགྱུར་བ་མེད་པའི་རྟགས། །རིན་ཆེན་དངུལ་གྱི་ཡོབ་ཐག་ཁྱུགས་སེ་ཁྱུག །གཏི་མུག་མ་སྤང་མཉམ་ཉིད་རང་གྲོལ་རྟགས། །རིན་ཆེན་ཟངས་ཀྱི་ཡོབ་ཆེན་ཁྲོ་ལོ་ལོ། །འདོད་ཆགས་མ་སྤང་མཉམ་ཉིད་རང་གྲོལ་རྟགས། །རིན་ཆེན་གསེར་སྲབ་སིལ་བུར་ཁྲོལ་བ་ནི། །ང་རྒྱལ་མ་སྤང་མཉམ་ཉིད་རང་གྲོལ་རྟགས། །རིན་ཆེན་གཡུ་མཐུར་སྔོན་མོ་ཤ་ར་ར། །ཕྲག་དོག་མ་སྤང་མཉམ་ཉིད་རང་གྲོལ་རྟགས། །ལེ་བརྒན་འབར་བའི་སྲབ་སྐྱོག་འཕྱང་བ་ནི། །རྣལ་འབྱོར་སྙན་པ་ཕྱོགས་བཅུར་རྒྱས་པའི་རྟགས། །སྦྲུལ་ནག་ཆུན་པོའི་གོང་སྨེད་བྱས་བ་ནི། །ཞེ་སྡང་མ་སྤང་མཉམ་ཉིད་རང་གྲོལ་རྟགས། །ཧཱུྃ་ཧྲཱིཿ རང་གི་ལུས་ལས་བྱུང་བའི་བཙན་དྲུག་ནི། །ཀུན་ཀྱང་ཁྲོ་གཏུམ་མི་བཟད་འབར་བའི་སྐུ། །དྲག་པོའི་ཕྲིན་ལས་སྒྲུབ་པའི་མངའ་བདག་པོ། །དམ་ཉམས་དགྲ་བགེགས་འཇོམས་པའི་གཤེད་པོ་ཆེ། །གཏི་མུག་མ་སྤང་ཆོས་དབྱིངས་ཡེ་ཤེས་ལས། །རང་ལས་རང་ཤར་བཙན་རྒོད་མཐུ་བོ་ཆེ། །བརྗིད་པའི་སྟོབས་ཀྱིས་དགྲ་བགེགས་ཕམ་མཛད་པ། །སྐུ་མདོག་དཀར་སེར་འོད་ཟེར་ཕྱོགས་བཅུར་འཕྲོ། །ཟ་འོག་དམར་ཁྲའི་བེར་ཆེན་སྐུ་ལ་གསོལ། །བསེ་མདའ་བསེ་གཞུ་དགྲ་བོའི་སྙིང་ལ་བརྡེག །ཆིབས་སུ་སྨུག་པོ་ཤྭ་གདོང་ཅན་ལ་ཆིབས། །སྐུ་ལྷ་ཞལ་གྱི་ལྷ་བཙན་ཆེན་པོར་བསྟོད། །ཞེ་སྡང་མ་སྤང་མེ་ལོང་ཡེ་ཤེས་ལས། །རང་ལས་རང་ཤར་བཙན་རྒོད་མཐུ་བོ་ཆེ། །ཁྲོས་པའི་སྟོབས་ཀྱིས་དགྲ་བགེགས་བརླག་མཛད་པ། །པད་རག་ལྷུན་པོར་ཉིན་བྱེད་འོད་ཟེར་གྱིས། །འཁྱུད་པའི་གར་གྱིས་སྲིད་པ་གསུམ་ཡང་གཡོ། །ལེ་བརྒན་གོས་གསོལ་ཟངས་ཞགས་དགྲ་ལ་འདེབས། །གཡས་ཀྱི་ཤང་ལང་བརྡེག་པས་དགྲ་བགེགས་བསྒྲལ། །ཆིབས་སུ་མཚལ་བུ་རྟིང་དཀར་ཅན་ལ་ཆིབས། །གྲོ་ཤོད་བོད་ཀྱི་རྒང་དམག་རྗེ་ལ་བསྟོད། །ང་རྒྱལ་མ་སྤང་མཉམ་ཉིད་ཡེ་ཤེས་ལས། །རང་ལས་རང་ཤར་བཙན་རྒོད་མཐུ་བོ་ཆེ། །རྔམ་པའི་སྟོབས་ཀྱིས་དགྲ་བགེགས་འཇོམས་མཛད་པ། །སྐུ་མདོག་དམར་པོ་བསྐལ་བའི་མེ་ལྟར་འབར། །ཆུ་དར་སྔོན་པོའི་རལ་གའི་མཛེས་པར་ཀླུབ། །ལྕགས་མདུང་བསྣམས་ཤིང་སྦྲུལ་ཞགས་དགྲ་ལ་འཕེན། །གསེར་གྱི་མདོག་ཅན་ཅང་ཤེས་རྩལ་ལྡན་ཆིབས། །ར་ཙ་གོས་སྔོན་ཀླུ་བཙན་ཆེན་པོར་བསྟོད། །འདོད་ཆགས་མ་སྤང་སོར་རྟོགས་ཡེ་ཤེས་ལས། །རང་ལས་རང་ཤར་བཙན་རྒོད་མཐུ་བོ་ཆེ། །འཁྲུག་པའི་སྟོབས་ཀྱིས་དགྲ་བགེགས་བརླག་མཛད་པ། །བྱེ་རུའི་ལྷུན་པོ་ལྟ་བུར་བརྗིད་པའི་སྐུ། །ཉི་མ་འབུམ་གྱིས་འཁྱུད་པའི་གཟི་བརྗིད་ཅན། །སྐུ་ལ་ཟ་འོག་དམར་ཁྲའི་གོས་གསོལ་བ། །ཕྱག་གཉིས་བསེ་མདུང་བཙན་གྱི་རྒྱུ་ཞགས་བསྣམས། །རྐྱང་དམར་དབོ་དཀར་མྱུར་མགྱོགས་ཅན་ལ་ཆིབས། །རྡོ་རིང་དམར་པོའི་གྲི་བཙན་ཆེན་པོར་བསྟོད། །ཕྲག་དོག་མ་སྤང་བྱ་གྲུབ་ཡེ་ཤེས་ལས། །རང་ལས་རང་ཤར་བཙན་རྒོད་མཐུ་བོ་ཆེ། །ཕྲིན་ལས་སྟོབས་ཀྱི་དགྲ་བགེགས་འདུལ་མཛད་པ། །མར་གད་ལྷུན་པོ་ལྟ་བུའི་རི་བོ་ལ། །ཉི་མ་སྟོང་གི་འོད་ཀྱི་འཁྱུད་པ་བཞིན། །མིག་སྨན་མདོག་ཅན་འཇོལ་བེར་སྐུ་ལ་གསོལ། །དར་ནག་རུ་མཚོན་འབྲིང་ཞགས་བླ་ལ་འདེབས། །ཅང་ཤེས་རག་པ་གཞུང་ནག་རྩལ་ལྡན་ཆིབས། །ཀཾ་ཀ་ཐོད་ནག་བདུད་བཙན་ཆེན་པོར་བསྟོད། །ཡོང་འདུས་དཀྱིལ་འཁོར་ཆེན་པོའི་ཀློང་ཡངས་ནས། །རང་ལས་རང་ཤར་བཙན་རྒོད་མཐུ་བོ་ཆེ། །དྲག་འཁྲུག་རྔམས་བའི་དགྲ་བགེགས་བརླག་མཛད་པ། །དམར་ནག་ཁྲག་གི་མདོག་ཅན་ཁྲོས་པའི་སྐུ། །སྡང་མིག་སྤྱན་ལས་ཉི་ཟླའི་འོད་ཟེར་འཕྲོ། །སྐུ་ལ་ཟངས་ཁྲབ་འོད་ལྡན་མཛེས་པ་གསོལ། །ཕྱག་གཡས་བསེ་མདུང་མེ་འོད་འཕྲོ་བ་བསྣམས། །གཡོན་པས་ཟངས་ཀྱི་རལ་གྲིས་དགྲ་སྲོག་གཅོད། །ཆིབས་སུ་རྟ་མཆོག་རླུང་གཤོག་ཅན་ལ་ཆིབས། །རྩལ་ཐོགས་རྒྱུག་གི་གྲི་བཙན་ཁྱོད་ལ་བསྟོད། །ཀུན་ཀྱང་སྟག་རལ་གཡས་ལ་གཟིག་ཤུབས་གཡོན། །རང་རང་དཔུང་གི་དམག་ཚོགས་བསམ་མི་ཁྱབ། །དྲག་པོའི་ཀི་བསྭོ་ཆ་སྒྲ་དི་རི་རི། །གཡས་ཀྱི་རུ་འདྲེན་དཔའ་བོ་སྟག་ཆས་བརྒྱ། །དཔའ་བོའི་མདའ་འཕེན་ལེན་མོ་ཤ་ར་ར། །གཡོན་གྱི་རུ་འདྲེན་ཉན་ཐོས་དགྲ་བཅོམ་བརྒྱ། །ཕྱག་ན་གསེར་ཤང་སྡང་བའི་དགྲ་ལ་ཡ། །སྔོན་གྱི་ཤུལ་མཚོན་བུད་མེད་ནག་མོ་བརྒྱ། །དར་ནག་གཡབ་མོའི་ཚོགས་ནི་ལེངས་སེ་ལེང་། །སླད་ཀྱི་རྗེས་འབྲང་བནྡེ་སྔགས་ནག་བརྒྱ། །ཁ་ནས་དམོད་པའི་ངན་སྔགས་ཤ་ར་ར། །སྐུ་ཡི་སྐྱོ་བསང་ན་ཆུང་མཛེས་མ་བརྒྱ། །སྙན་པའི་གླུ་ལེན་ཚོགས་ནི་ཀྱུ་རུ་རུ། །གཞན་ཡང་ལྷ་དང་གཤིན་རྗེ་གནོད་སྦྱིན་ཚོགས། །བདུད་དང་མ་མོ་གཟའ་དང་བཙན་གྱི་རིགས། །མདོག་ནི་སྣ་ཚོགས་ཆོ་འཕྲུལ་ཅིར་ཡང་སྟོན། །རབ་འཇིགས་བཙན་གྱི་ཤྭ་བསྐོར་སྒ་ར་ར། །བཤུག་པའི་གླུ་ལེན་ཚོགས་ནི་ཀྱུ་རུ་རུ། །འཐོར་རླུང་འཚུབ་མ་དམར་པོ་རྗེས་སུ་ཁྲིད། །གྲི་རྔམ་བླ་ཚེའི་སྟེང་ནས་འདེད་པར་བྱེད། །གྲི་ཐབས་ཆོ་འཕྲུལ་སྣ་ཚོགས་དགྲ་ལ་ཐོང་། །རི་ཁྱི་སྤྱང་ཀིའི་ཚོགས་ནི་རོལ་དུ་ཁྲིད། །རི་བྱ་ཕོ་རོག་འབུམ་ནི་གླད་ན་ལྡིང་། །སྲིན་བྱ་འུག་པའི་ཚོགས་ནི་ཧ་ཧ་རྒོད། །འདབ་ཆགས་བྱ་རིགས་སྣ་ཚོགས་ཁྲ་ལ་ལ། །སྟག་གཟིག་དོམ་དྲེད་ཚོགས་ནི་འཕྱོ་ཞིང་རྒྱུགས། །ཤ་ཟ་རོ་ལངས་ཚོགས་ནི་དཔག་ཏུ་མེད། །སྤྲུལ་པ་ཡང་སྤྲུལ་ས་དང་བར་སྣང་གང་། །ཀེང་རུས་གསར་རྙིང་ཚོགས་ནི་སྤྲིན་ལྟར་གཏིབ། །ལས་བྱེད་ཤན་པའི་ཚོགས་ནི་ཁྱུགས་སེ་ཁྱུག །དེ་ཕྱིར་སོ་སོར་རྟོགས་པའི་ཡེ་ཤེས་ལས། །ཤར་བའི་གནོད་སྦྱིན་ཆེན་པོ་ཙིའུ་དམར། །སྐྱེ་གནས་བཞི་ཡི་སེམས་ཅན་མ་ཟད་བར། །ལས་ཀྱི་ཆོ་འཕྲུལ་སྣ་ཚོགས་བསམ་མི་ཁྱབ། །དྲེགས་པའི་གཙོ་བོ་གནོད་སྦྱིན་ཁྱོད་ཉིད་ནི། །ཕྲིན་ལས་བཞི་ཡིས་འདུལ་བར་མཆོག་ཏུ་བསྔགས། །ཁྱད་པར་སྒྲུབ་པའི་རྣལ་འབྱོར་བདག་ཅག་ལ། །གཡུལ་ཤོམས་དུག་མཚོན་བྱད་མ་མཁན་པོ་རྣམས། །དུས་མཐའི་མེ་ཡིས་རྩ་སྦུར་བསྲེགས་པ་བཞིན། །སྐད་ཅིག་ཉིད་ལ་བརླག་པའི་ཕྲིན་ལས་མཛོད། །དེང་ནས་བཟུང་ཏེ་བྱང་ཆུབ་སྙིང་པོའི་བར། །ལྷ་མཆོག་ཁྱོད་ཉིད་དྲན་པ་ཙམ་གྱིས་ཀྱང་། །ཕྱི་ནང་བར་ཆད་བདུད་ལས་རབ་རྒྱལ་ཏེ། །བསམ་པའི་དོན་ཀུན་ཡིད་བཞིན་འགྲུབ་པར་མཛོད། །ཅེས་པ་གནོད་སྦྱིན་ཙིའུ་དམར་པོའི་བསྟོད་ཆེན་གདུག་པ་ཀུན་སྒྲོལ་ཞེས་བྱ་བ་འདི་ནི་གནས་དུས་ཀྱི་རྟེན་འབྲེལ་བཟང་པོའི་གནད་མ་འཆུག་ནས་གནོད་སྦྱིན་ཙིའུ་དམར་པོ་འདི་ཉིད་ཕག་ལོ་ཕན་མི་ཕྱི་བར་རང་གཟུགས་དངོས་སུ་བསྟན་པའི་ཉམས་དང་རྨི་ལམ་གྱི་སྐབས་སུ་མཚན་ལྟས་བཟང་པོ་ཡང་ཡང་དུ་ཤར་བའི་དུས་ན་ཆོས་སྐྱོང་སྐུ་ཕེབས་པའི་སྐབས་སུ་འདོན་རྒྱུའི་ཆེད་དུ་བྱས་ནས་ལྕགས་ཕོ་ཁྱིའི་ལོ་དགུན་ཟླ་དང་པོའི་དམར་ཕྱོགས་མཁའ་འགྲོ་འདུ་བའི་དུས་ཆེན་ཉིན་རྫོགས་སྤྲུལ་ལྔ་པའི་སྐྱེ་མིང་སྒྲོ་བཏགས་པ་པདྨ་ཐེག་མཆོག་བསྟན་འཛིན་ནམ་མིང་གཞན་ཐུབ་བསྟན་ཆོས་ཀྱི་རྡོ་རྗེས་རང་ལོ་སུམ་ཅུ་སོ་དགུའི་སྐབས་སུ་མགོན་ཁང་དབང་དྲག་རོལ་བའི་ཞིང་ཁམས་ཆེན་པོ་ནས་ཤར་མར་སྦྱར་བ་འདིས་ཀྱང་དགེ་ལེགས་ཀྱི་སྣང་བ་ཆེན་པོས་ས་གསུམ་ཁྱབ་བའི་རྒྱུར་གྱུར་ཅིག །སརྦ་མངྒལཾ། །དགེའོ། །བཀྲ་ཤིས་ཤོག །