གནོད་སྦྱིན་ཙིའུ་དམར་པོའི་ཕྲིན་བཅོལ་དཔག་བསམ་སྙེ་མ་ཞེས་བྱ་བ་བཞུགས་སོ།།

ཀ་དག་དབྱིངས་ལས་སྙིང་རྗེ་ཁྲོས་པའི་གནོད་སྦྱིན་ཆེན་པོ་ཡང་ལེ་བེར། །ཁ་དོག་མི་བཟད་པད་རག་ལྷུན་པོར་འོད་སྟོང་བརྒྱ་བས་འཁྱུད་པ་བཞིན། །ག་རུ་བཞུགས་ཀྱང་རྣལ་འབྱོར་བདག་གི་ཁྱོད་ཉིད་དྲན་པ་ཙམ་གྱིས་ཀྱང་། །ང་རོ་གད་མོའི་ནོར་འཛིན་གཡོ་ཞིང་གློག་ཕྲེང་འཁྱུག་པ་ཇི་བཞིན་བྱོན། །ཅ་ག་སྤྱན་གཟིགས་དངོས་འབྱོར་ཡིད་སྤྲུལ་ནམ་མཁའ་མཛོད་ཀྱི་མཆོད་སྤྲིན་ལྟར། །ཆ་ཤས་མ་ཡིན་མཐུན་རྫས་སྣ་ཚོགས་རྫ་ལྟར་བཀྲམ་ཏེ་བཤམ་ལགས་ན། །ཇ་རིལ་མི་མགོ་བརྩེགས་པའི་ཕོ་བྲང་འཇིགས་ཤིང་སྐྱི་གཡའི་སྐུ་མཁར་ནང་། །ཉ་རྒྱས་ཟླ་བ་ཇི་བཞིན་འདོད་དོན་ཡོངས་བསྐང་ཁྱོད་ཉིད་དགྱེས་པར་བཞུགས། །ཏ་ཐཱ་ག་ཏའི་སྲུང་མ་ཁྱོད་ནི་ཁྲོས་པའི་རྒྱལ་པོ་རྟ་མགྲིན་དང་། །ཐ་དད་མ་གྲུབ་ཆུ་ཟླའི་གར་བཞིན་དགྲ་ལྷའི་རྒྱལ་པོ་ཁྱོད་ཉིད་ཤར། །ད་ལྟ་སྣང་སྲིད་དྲེགས་པ་ཀུན་གྱི་སྤྱི་དཔལ་ཆེན་པོ་མཆོག་ཏུ་བསྔགས། །ན་མར་བསྟན་སྲུང་དབང་པོ་ཁྱོད་ཉིད་རྟག་ཏུ་བསྒྲུབ་ཅིང་མཆོད་པའི་མཐུས། །པ་སངས་ལྟ་བུའི་ལྷག་བསམ་དཀར་པོས་གང་ལ་གང་འདོད་དངོས་གྲུབ་སྩོལ། །ཕ་རོལ་མི་མཐུན་བསམ་ངན་འཆང་བའི་ཁྱད་པར་བྱད་མ་མཁན་གྱི་ཚོགས། །བ་མོ་ཚ་ཟེར་བརྒྱ་བས་བཞུས་ལྟར་གནོད་སྦྱིན་ཁྱོད་ཀྱིས་ཕྲིན་ལས་མཛོད། །མ་ལུས་ལྷག་མེད་སྐད་ཅིག་ཙམ་གྱི་མི་དམིགས་དབྱིངས་སུ་གཞོམ་པར་མཛད། །ཙ་ར་ཤེལ་སྒོང་གྲོ་དམར་ལུག་དང་བྱ་རིགས་སྣ་ཚོགས་ཟློས་གར་བསྒྱུར། །ཚ་ཊཾ་ཀ་དང་བླ་བྲེ་ལྡ་ལྡི་རྒྱལ་མཚན་སྣ་ཚོགས་འཕན་འཕུར་གཡོ། །ཛ་ཧུའི་རྒྱུན་བཞིན་སྨན་དང་རཀྟ་གསེར་སྐྱེམས་གཡུ་སྐྱེམས་མཚོ་ལྟར་བསྐྱིལ། །ཝ་སྤྱང་སྟག་གཟིག་གཅན་གཟན་སྣ་ཚོགས་རྟ་མཆོག་རླུང་གི་ཤུགས་ཅན་ཚོགས། །ཞྭ་ལྷམ་ཁྲབ་རྨོག་སྲོག་འཁོར་ཕ་ཝཾ་ལོང་བུ་ཏྲི་ཡིག་སྙིང་པོ་ཅན། །ཟ་འོག་ལྡིང་གུར་རིན་ཆེན་རྣམ་མང་བང་མཛོད་དར་གོས་སྣ་ཚོགས་བཀྲ། ། འ་འུར ་འཐོར་རླུང་འཚུབ་མ་དམར་པོ་བཙན་གྱི་ཁྱི་དམར་སྤྱང་ཀིའི་ཚོགས། །ཡ་མཚན་དངོས་བཤམས་ཡིད་སྤྲུལ་མཆོད་པ་རྒྱ་མཚོས་ཐུགས་དམ་བསྐང་གྱུར་ཅིག །ར་མ་ཎ་ལྟར་དམ་བཅའ་བརྟན་པོའི་ཕྲིན་ལས་སྒྲུབ་པའི་སྡོང་གྲོགས་ནི། །ལ་ལ་ཙམ་མིན་ཉིན་མཚན་ཀུན་ཏུ་སྒྲུབ་པའི་རེ་འདོད་སྐོང་ལ་བསྟོད། །ཤ་སྟག་བདག་སོགས་སྒྲུབ་པའི་ཚོགས་ཀྱིས་ཁྱོད་ཉིད་སྒྲུབ་ཅིང་ཁྱོད་བརྟེན་ན། །ས་ཕྱོགས་གང་དུ་འགྲོའམ་སྡོད་ཀྱང་ཙིའུ་དམར་པོ་ཁྱོད་ཉིད་ནི། །ཧྱ་གྷྲྀ་ཝ་པདྨ་ཀ་ར་སྔོན་བྱོན་རིག་འཛིན་ཚོགས་རྣམས་ཀྱིས། །ཨ་མྲྀཏ་ལྕེར་བཞག་གསང་བའི་མཚན་བཏགས་རྡོ་རྗེ་སྤྱི་བོར་བཞག་ནས་ཀྱང་། །རྒྱལ་བའི་བསྟན་པ་གཉན་པོ་སྲུང་ཞིང་བསྟན་པ་འཛིན་པའི་ཚོགས་རྣམས་ལ། །སྔོན་གྱི་ཐ་ཚིག་རྗེས་སུ་དགོངས་ཏེ་ལས་བཞིའི་ཕྲིན་ལས་མཚོ་ལྟར་རྒྱས། །གང་ལ་གང་འདོད་དངོས་གྲུབ་ཇི་ལྟར་འདོད་པ་སྩོལ་བར་ཞལ་བཞེས་ལྟར། །གང་བཅོལ་ཕྲིན་ལས་ཐོགས་པ་མེད་པར་མྱུར་དུ་འགྲུབ་པའི་སྡོང་གྲོགས་མཛོད། །ཅེས་གནོད་སྦྱིན་ཙིའུ་དམར་པོའི་ཕྲིན་བཅོལ་དཔག་བསམ་སྙེ་མ་ཞེས་བྱ་བ་འདི་ནི་རྫོགས་སྤྲུལ་ལྔ་བ་ཐུབ་བསྟན་ཆོས་ཀྱི་རྡོ་རྗེས་བྲིས་པ་དགེ་ལེགས་སུ་གྱུར་ཅིག། །།