གནོད་སྦྱིན་ཙིའུ་དམར་པོའི་ཕྲིན་བཅོལ་བཞུགས།།

ཧྲཱིཿ གསུང་གི་དབང་ཕྱུག་པདྨ་རིགས་ཀྱི་ལྷ། །སྣང་བ་མཐའ་ཡས་ཡེ་ཤེས་རོལ་བ་ལས། །དབང་ཆེན་རྟ་མཆོག་པདྨ་ཧེ་རུ་ཀཿ རང་འོད་ཡུམ་མཆོག་རྡོ་རྗེ་ཕག་མོར་འཁྲིལ། །མདུན་དུ་མེ་རླུང་འཚུབ་མའི་ཀློང་དཀྱིལ་ན། །དམར་ཆེན་ཁྲག་མཚོ་ཁོལ་ཞིང་འཁྱམས་པའི་དབུས། །རྔམས་བརྗིད་ཟངས་ཀྱི་སྐུ་འཁར་སྐྱི་གཡའི་གནས། །རབ་འཇིགས་དགྲ་ལྷའི་རྒྱལ་པོ་ཙིའུ་དམར། །སྐུ་མདོག་དམར་ལྗང་དབང་དྲག་ལྡན་པའི་སྐུ། །ལེགས་ཉེས་མ་འདྲེས་ས་ལེར་གཟིགས་པ་ཡི། །སྤྱན་གསུམ་བསྒྲད་པས་བསྐལ་བའི་མེ་དཔུང་འབར། །ཤངས་ནས་གདུག་པའི་འཐོར་རླུང་ཕྱོགས་བཅུར་འཚུབས། །མཆེ་བ་དཀར་པོ་གངས་རི་ལྟ་བུར་གཙིགས། །ཁྲག་ལྕེ་དམར་པོ་གློག་ལྟར་ཁྱུགས་སེ་ཁྱུག །ཞལ་ནས་གདུག་པའི་ངན་སྔགས་འབྲུག་ལྟར་སྒྲོགས། །སྐུ་ལ་དབང་གི་མདོག་ཅན་བེར་ཆེན་གསོལ། །ཞབས་ལ་སག་ཏིའི་ལྷམ་ཆེན་ཡུ་རིང་མནབས། །ཕྱག་གཡས་བཙན་ཞགས་དགྲ་བོའི་རྐེ་ནས་འཆིང་། །གཡོན་པས་ཟངས་མདུང་དགྲ་བོའི་སྙིང་ལ་བསྣུན། །སྟག་རལ་གཡས་ལ་གཟིག་ཤུབས་གཡོན་དུ་འཕྱང་། །ཆིབས་སུ་རྟ་ནག་རླུང་གཤོག་ཅན་ལ་ཆིབས། །སྐུ་ལྷ་ཞལ་གྱི་ལྷ་བཙན་ཆེན་པོ་ནི། །ཆིབས་སུ་སྨུག་པོ་ཤ་གདོང་ཅན་ལ་ཆིབས། །གྲོ་ཤོད་བོད་ཀྱི་སྒང་དམག་ཆེན་པོ་ནི། །ཆིབས་སུ་མཚལ་ལུ་རྟིང་དཀར་ཅན་ལ་ཆིབས། །རཱ་ཙ་གོས་སྔོན་ཀླུ་བཙན་ཆེན་པོ་ནི། །ཅང་ཤེས་གསེར་མདོག་རླུང་གཤོག་ཅན་ལ་ཆིབས། །རྡོ་རིང་དམར་པོའི་གྲི་བཙན་ཆེན་པོ་ནི། །རྐྱང་དམར་དབོ་དཀར་མྱུར་མགྱོགས་ལྡན་པར་ཆིབས། །ཀང་ཀ་ཐོད་ནག་བདུད་བཙན་ཆེན་པོ་ནི། །ཅང་ཤེས་རག་པ་གཞུང་ནག་ཅན་ལ་ཆིབས། །རྩལ་ཐོགས་རྒྱུག་གི་གྲི་བཙན་ཆེན་པོ་ནི། །ཅང་ཤེས་རྟ་མཆོག་རླུང་གཤོག་ཅན་ལ་ཆིབས། །ཀུན་ཀྱང་སྟག་རལ་གཡས་ལ་གཟིག་ཤུབས་གཡོན། །གཡས་ཀྱི་རི་འདྲེན་དཔའ་བོ་སྟག་ཆས་བརྒྱ། །གཡོན་གྱི་རུ་འདྲེན་ཉན་ཐོས་དགྲ་བཅོམ་བརྒྱ། །སྔོན་གྱི་ཤུལ་མཚོན་ཤན་ཏི་བདུད་མོ་བརྒྱ། །སླད་ཀྱི་རྗེས་འབྲང་བནྡེ་ནག་མོ་བརྒྱ། །སྐུ་ཡི་སྐྱོ་བསང་ན་ཆུང་མཛེས་མ་བརྒྱ། །ཕྱི་བློན་ནང་བློན་དགྱེས་སྡེ་བཙུན་མོའི་ཚོགས། །དྲེགས་པ་སྡེ་བརྒྱད་དམག་གི་དཔུང་ཚོགས་བཅས། །ས་དང་བར་སྣང་ཁྱོན་རྣམས་ཡོངས་གང་ནས། །རྣལ་འབྱོར་གདུང་བ་དྲག་པོས་འབོད་ལགས་ན། །མཁའ་ལ་གློག་དམར་འཁྱུགས་པ་ཇི་བཞིན་བྱོན། །ཅི་བགྱིས་བཀའ་ཉན་དགྱེས་པར་བཞུགས་ནས་ཀྱང་། །རང་སེམས་ཆོས་སྐྱོང་ལོགས་སུ་མ་གྲུབ་པས། །གཉིས་མེད་ཁྱབ་བརྡལ་ཆེན་པོར་ཕྱག་འཚལ་ལོ། །ཉམས་པའི་སྙིང་ཁྲག་དྲོན་མོའི་མཆོད་ཡོན་དང་། །མུན་པ་ལྟར་གནག་དུག་ཆུའི་ཞབས་བསིལ་རྒྱུན། །དགྲ་བགེགས་བསྒྲལ་བའི་དབང་པོའི་མེ་ཏོག་བཀྲ། །དགྲ་ཚིལ་དྲོན་མོ་བཞུས་པའི་ཞུན་མེ་མཆོག །གསེར་གྱི་མདོག་ཅན་དྲི་ཆབ་མཚོ་ལྟར་བསྐྱིལ། །ཤ་རུས་ཞལ་ཟས་དོན་སྙིང་རི་ལྟར་སྤུངས། །དམར་སེར་མདངས་ལྡན་རྒྱ་ཇ་ངད་ལྡན་རྒྱུན། །མྱོས་བྱེད་ཁྲག་ཆང་རྦ་རླབས་རབ་ཏུ་གཡོ། །གསེར་སྐྱེམས་གཡུ་སྐྱེམས་ཕུད་རྒོད་མཚོ་ལྟར་བསྐྱིལ། །ལྷ་མཆོག་ཁྱེད་ཀྱི་ཕྱི་ནང་གསང་བའི་རྟེན། །མ་ཚང་མེད་པ་གུས་པས་འབུལ་ལགས་ན། །དགྱེས་པར་བཞེས་ལ་ཐུགས་དམ་བསྐང་གྱུར་ཅིག །ཁྱེད་ལ་ཕྲིན་ལས་གཉན་པོ་བཅོལ་བ་ནི། །སྔོན་ཚེ་སློབ་དཔོན་པདྨ་འབྱུང་གནས་ཀྱིས། །བསམ་ཡས་བར་ཁང་གཡུ་ཞལ་འབར་བ་ནས། །འཇིག་རྟེན་མཆོད་བསྟོད་དཀྱིལ་འཁོར་ཞལ་ཕྱེས་ཚེ། །དཀྱིལ་འཁོར་གཉན་པོའི་གྲལ་དུ་བཞག་ནས་ཀྱང་། །སྲུང་མར་བསྐོས་ནས་དམ་ལ་བཞག་པའི་ཚེ། །ཇི་ལྟར་ཁས་བླངས་དམ་ཚིག་རྗེས་དགོངས་ལ། །ད་ལྟ་སྙིགས་མ་ལྔ་ཡི་ཡང་མཐའ་འདིར། །རྒྱལ་བསྟན་སྤྱི་དང་ཁྱད་པར་སྔ་འགྱུར་གྱི། །བསྟན་པའི་ཉི་མ་ཕྱོགས་བཅུར་རྒྱས་པ་དང་། །དགེ་འདུན་སྡེ་ཚོགས་དབྱར་གྱི་མཚོ་ལྟར་རྒྱས། །བཤད་སྒྲུབ་བསྟན་པ་ཕྱོགས་བཅུར་རྒྱས་པར་མཛོད། །རྣམ་དག་བསླབ་པ་གསུམ་གྱིས་རྒྱུད་ཕྱུག་ཅིང་། །སྙན་གྲགས་དབྱར་རྔ་ཕྱོགས་བཅུར་རྒྱས་པ་དང་། །བསྐྱེད་རྫོགས་ཟབ་མོའི་ལམ་ལ་རབ་ཞུགས་ནས། །བཞེད་དོན་ཕྲིན་ལས་ལྷུན་གྱིས་གྲུབ་པར་མཛོད། །ལུང་དང་རྟོགས་པའི་བསྟན་པ་རིན་པོ་ཆེ། །བསྒྲུབ་ཅིང་བརྩོན་པར་བྱེད་པའི་གང་ཟག་ལ། །མི་དང་མི་མིན་འབྱུང་པོའི་ཚོགས་རྣམས་ཀུན། །སྙིང་ཁྲག་དམར་པོ་ཧུབ་ཀྱིས་བཞེས་ལ་སྒྲོལ། །གཞི་བྱེས་ལམ་གསུམ་གང་དུ་འདུག་གྱུར་ཀྱང་། །ཉིན་མཚན་དུས་དྲུག་ཀུན་ཏུ་མ་གཡེལ་བར། །རྟག་ཏུ་མགོན་སྐྱབས་སྡོང་གྲོགས་མཛད་པ་དང་། །ལམ་སྲང་འཇིགས་པའི་འཕྲང་ལས་སྒྲོལ་བར་མཛོད། །བསྟན་ལ་འཁུ་ཞིང་བདག་ལ་སྡང་བ་ཡི། །ལོག་ལྟ་བསམ་སྦྱོར་ངན་པའི་སྡེ་རིས་ཚོགས། །ལྟས་ངན་ཆོ་འཕྲུལ་སྣ་ཚོགས་ཅིར་ཡང་སྟོན། །མིང་ཙམ་མེད་པར་བརླག་པའི་ཕྲིན་ལས་མཛོད། །དྲག་ཤུལ་ཆེ་བཙན་རྒྱལ་བློན་རྗེ་འབངས་དང་། །ལྷ་ཀླུ་མི་ཡི་ཟས་ནོར་ལོངས་སྤྱོད་སོགས། །ཁམས་གསུམ་སྲིད་གསུམ་དབང་དུ་འདུ་བ་དང་། །མདོར་ན་ཡིད་ལ་ཅི་འདོད་འགྲུབ་པར་མཛོད། །རྒྱན་དང་རྩོད་པ་ཀུན་ལས་རབ་རྒྱལ་ཞིང་། །གཤེད་མའི་དམག་གིས་གནོད་ཅིང་འཚེ་བ་ན། །ཕ་རོལ་དཔུང་ཚོགས་གཡུལ་ལས་རྒྱལ་བ་དང་། །ལྟས་ངན་ཆོ་འཕྲུལ་གཏོང་བའི་ཕྲིན་ལས་མཛོད། །དགྲ་ཇག་ཆོམ་རྐུན་གཤེད་མས་མི་འཚེ་ཞིང་། །རྟ་ཕྱུགས་གནག་ལུག་རིགས་རྣམས་འཕེལ་བ་དང་། །གོད་ཁ་ཞི་ཞིང་ཕྱུགས་ཀྱིས་ས་སྟེང་ཁྱབ། །དགྲ་ཇག་ཆོམ་རྐུན་གཅན་སྤྱང་འཚེ་བ་སོགས། །མི་མཐུན་གནོད་པའི་རིགས་ཀུན་ཞི་བར་མཛོད། །བདག་ཅག་བྱང་ཆུབ་སྒྲུབ་པའི་གང་ཟག་ལ། །འགལ་རྐྱེན་བར་ཆད་མཐའ་དག་རབ་ཞི་ནས། །མཐུན་པའི་འདོད་དོན་མ་ལུས་འགྲུབ་པ་དང་། །ལེགས་ཚོགས་ཡར་ངོའི་ཟླ་བ་ཇི་ལྟར་བཞིན། །གོང་ནས་གོང་དུ་འཕེལ་བའི་སྡོང་གྲོགས་མཛོད། །ཅེས་ཧོར་སྤྱི་ཁྱབ་ཀྱི་དྲུང་ཡིག་ཚེ་རིང་ཕུན་ཚོགས་ནས་གནོད་སྦྱིན་ཙིའུ་དམར་པོའི་འཕྲིན་བཅོལ་འདི་འདྲ་ཞིག་དགོས་ཞེས་ཡང་ཡང་བསྐུལ་བའི་ངོར་ལྕགས་མོ་ལུག་ལོའི་ཟླ་དགུ་པའི་ཚེས་ཉེར་གཅིག་ལ་རྫོགས་ཆེན་སྐྱེ་ཕྲེང་ལྔ་པ་ཐུབ་བསྟན་ཆོས་ཀྱི་རྡོ་རྗེས་རུ་དམ་ཨོ་རྒྱན་བསམ་གཏན་ཆོས་གླིང་གི་ཡང་རྩེ་འཆི་མེད་གྲུབ་པའི་དགའ་ཚལ་ནས་བྲིས་པ་བསྟན་འགྲོར་སྨན་པའི་རྒྱུར་གྱུར་ཅིག །སརྦ་མངྒ་ལཾ།། །།