ཙིའུ་དམར་ཕྲིན་བཅོལ་གློག་གི་ཕྲེང་བ་བཞུགས་སོ།།
ཧོ། དགོངས་སུ་གསོལ་ལོ་གནོད་སྦྱིན་ཙིའུ་དམར། །གསན་དུ་གསོལ་ལོ་མཐུ་ཆེན་ཡང་ལེ་བེར། །རྩོད་ལྡན་སྙིགས་མ་ལྔ་བདོའི་ཡང་མཐར་འདིར། །དཀར་ཕྱོགས་ལྷ་རྣམས་དབུ་འཕང་སྨད་པ་དང་། །རི་རབ་ཆེན་པོའི་ཟོམ་ལ་ཞལ་ཕྱོགས་པ། །ནག་ཕྱོགས་བགེགས་རིགས་ལན་ཆགས་འབྱུང་པོ་དང་། །རྒྱལ་འགོང་ཤི་འདྲེའི་ཚོགས་རྣམས་ཁ་དར་ཚེ། །སྒྲུབ་པའི་རིག་འཛིན་རྣལ་འབྱོར་བདག་ཅག་གི །ཐུབ་བསྟན་སྲུང་མའི་དབང་པོ་ཁྱོད་ཉིད་ལས། །སྐྱབས་དང་རེ་ས་གཞན་ན་མ་མཆིས་པས། །སྔོན་ཚེ་བར་ཁང་གཡུ་ཞལ་འབར་བ་རུ། །རིག་འཛིན་སློབ་དཔོན་པདྨ་འབྱུང་གནས་ཀྱིས། །བདེ་གཤེགས་འདུས་པའི་དཀྱིལ་འཁོར་ཞལ་ཕྱེས་ཚེ། །འཇིག་རྟེན་མཆོད་བསྟོད་དཀྱིལ་འཁོར་ཆེན་པོ་ཡིས། །གྲལ་དུ་བཞག་ནས་རང་རང་སྲོག་སྙིང་ཕུལ། །དབང་བསྐུར་དམ་བཞག་གསང་བའི་མཚན་ཡང་བཏགས། །ཇི་ལྟར་ཁས་བླངས་དམ་ལས་མ་གཡེལ་བར། །སྔོན་གྱི་ཐ་ཚིག་གཉན་པོ་རྗེས་དགོངས་ལ། །བདག་གིས་ཁྱོད་བསྟེན་ཁྱོད་མཆོད་ཁྱོད་སྒྲུབ་ན། །ཉིན་མཚན་དུས་དྲུག་རྟག་ཏུ་མ་གཡེལ་བར། །བདག་ལ་ལུས་དང་གྲིབ་བཞིན་འགྲོགས་ནས་ཀྱང་། །བདག་ཅག་དྲང་པོའི་ལམ་ལ་ཞུགས་ན་ཡང་། །རྒྱལ་འགོང་དམ་སྲི་འབྱུང་པོའི་ཚོགས་རྣམས་ཀྱིས། །ཤེས་རྒྱུད་བརླམས་པར་བྱས་པའི་གང་ཟག་ཚོགས། །བསམ་ངན་སྦྱོར་རྩུབ་ཤོམས་པའི་ཚོགས་རྣམས་ཀྱིས། །དབྱེན་དང་ཕྲ་མས་འབྱེད་པར་བྱེད་པ་དང་། །བསྟན་སེལ་སྡེ་འཁྲུགས་སློང་བར་བྱེད་པའི་རིགས། །བྱད་ཕུར་རྦོད་གཏོང་བྱེད་པའི་ཚོགས་རྣམས་དང་། །སྔ་དགྲ་ལག་བརྡར་ཕྱི་དགྲ་ཡིད་ལ་སེམས། །ད་དགྲ་ཐད་དུ་འཛུགས་པའི་དགྲ་བོ་རྣམས། །སྐྱེ་འགྲོའི་སྲོག་གི་བདག་པོ་ཁྱོད་ཉིད་ཀྱིས། །ལོ་ཟླ་ཞག་དང་ཟ་མར་མ་བཞག་ལ། །ཤ་ཁྲག་དམར་གྱི་གཏོར་མ་འདི་བཞེས་ཏེ། །ད་ལྟ་ཉིད་དུ་སྒྲོལ་བའི་དུས་ལ་བབ། །སྲིད་གསུམ་འདི་ན་དྲག་ཤུལ་ཆེ་བཙན་དང་། །ལྷ་ཀླུ་མི་ཡི་ལོངས་སྤྱོད་མཐའ་དག་ཀུན། །ལྷ་ཆེན་འཕྲུལ་དགའི་ལོངས་སྤྱོད་ཇི་ལྟར་བཞིན། །མདོར་ན་སྲིད་པ་གསུམ་གྱི་བརྟན་གཡོ་ཀུན། །རང་དབང་མེད་པར་དབང་དུ་འདུ་བར་མཛོད། །ཚེ་དང་བསོད་ནམས་དཔལ་འབྱོར་ཕུན་སུམ་ཚོགས། །ཁ་རྗེ་དབང་ཐང་སྙན་གྲགས་རྒྱས་པ་དང་། །འཁོར་དང་བུ་སློབ་མངའ་ཐང་རབ་རྒྱས་ཤིང་། །བཤད་སྒྲུབ་དགེ་འདུན་འདུས་པའི་སྡེ་ཚོགས་ཀུན། །ཡར་ངོའི་ཟླ་བ་ལྟ་བུ་འཕེལ་བར་མཛོད། །རྒྱལ་ཁམས་ཀུན་ཏུ་ནད་མུག་མཚོན་འཁྲུགས་དང་། །དུས་ཀྱི་རྒུད་པ་མ་ལུས་ཀུན་ཞི་ནས། །དུས་མིན་འཆི་བའི་འཇིགས་པ་མེད་པ་དང་། །མདོར་ན་མི་མཐུན་རྐྱེན་ངན་ཀུན་སོལ་ལ། །ལས་བཞིའི་ཕྲིན་ལས་རབ་འབྱམས་མཐའ་དག་ཀུན། །ཐོགས་མེད་ཡིད་བཞིན་མྱུར་དུ་འགྲུབ་པར་མཛོད། །ཅེས་པ་འདི་ནི་འབའ་ཕུག་སྤྲུལ་སྐུ་ཆེ་བ་ནས་ཡང་ཡང་བསྐུལ་བའི་ངོར་རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེས་བྲིས་པ་དགེ།