ཙིའུ་དམར་པོའི་རླུང་རྟ་སྙན་པའི་སྒྲ་དབྱངས་ཞེས་བྱ་བ་བཞུགས་སོ།།

ཧྲཱིཿ དབང་དྲག་རོལ་བའི་ཞིང་ཁམས་ཆེན་པོ་ནས། །དབང་ཆེན་རྟ་མཆོག་པདྨ་ཧེ་རུ་ཀ །དབང་གི་ལྷ་མཆོག་བཀའ་སྡོད་དཔའ་བོ་ཆེ། །དབང་ཕྱུག་དྲེགས་པ་ཡོངས་ཀྱི་གཙུག་གི་རྒྱན། །བདུད་ལས་རྣམ་རྒྱལ་འཇིགས་བྱེད་ཁྲག་འཐུང་གཙོ། །བདུད་དཔུང་འདུལ་བའི་མཆོག་ལ་མངའ་བརྙེས་པ། །བདུད་སྡེ་ནག་ཕྱོགས་ཡོངས་ཀྱི་གཤེད་མ་ཆེ། །བདུད་བཞིའི་གཡུལ་ལས་རྒྱལ་བའི་ལྷ་གཅིག་པུ། །སྲིད་འདིར་ཆེ་བཙན་འགྲན་ཟླ་བྲལ་བའི་ལྷ། །སྲིད་པ་གསུམ་གྱི་ཞིང་ལ་དབང་བསྒྱུར་བ། །སྲིད་ན་གནས་པའི་སྐྱེ་འགྲོའི་སྲོག་གི་བདག །སྲིད་གསུམ་དབང་ཕྱུག་དགྲ་ལྷ་ཀུན་གྱི་རྗེ། །ཆོས་དབྱིངས་བདེ་བ་ཆེན་པོའི་ངང་ཉིད་ལས། །ཆོས་ཅན་མ་འགགས་ཆུ་ཟླའི་རོལ་གར་བཞིན། །ཆོས་སྐྱོང་ཡོངས་ཀྱི་རྗེ་བོར་མངའ་གསོལ་བས། །ཆོས་བཞིན་སྐྱོང་ལ་མ་ཡིས་བུ་ལྟར་བརྩེ། །བསྟན་པ་རིན་ཆེན་རྟག་ཏུ་སྐྱོང་བ་དང་། །བསྟན་འཛིན་སྐྱེས་བུའི་ཚོགས་ལ་མགོན་མཛད་ཅིང་། །བསྟན་དགྲ་མ་ལུས་ཆམ་ལ་འབེབས་པར་མཛད། །བསྟན་སྲུང་དགྲ་ལྷའི་རྒྱལ་པོ་མཐུ་བོ་ཆེ། །གནོད་སྦྱིན་རྒྱལ་པོ་ཆེན་པོ་ཙིའུ་དམར། །རང་སེམས་ཆོས་སྐུའི་དབྱིངས་ཀྱི་རང་བཞིན་ལ། །ཡེ་ནས་མཉམ་བརྡལ་དམ་ཚིག་དབྱེར་མེད་ཀྱང་། །བདག་ཅག་དད་གུས་གདུང་བས་འབོད་ལགས་ན། །ཕྲིན་ལས་འགྲོ་འདུལ་རྣམ་བཞིའི་རོལ་གར་གྱིས། །བརྩེ་བའི་ཐུགས་རྗེས་འདོད་པའི་དོན་རྣམས་ཀུན། །ཡིད་ལ་ཅི་འདོད་དངོས་གྲུབ་སྩོལ་བའི་ཕྱིར། །དགྲ་ལྷའི་རྒྱལ་པོ་འཁོར་དང་བཅས་པ་ཀུན། །ཇི་ལྟར་མཁའ་ལམ་གློག་ཕྲེང་གཡོ་བ་བཞིན། །སྐད་ཅིག་ཙམ་གྱིས་གནས་འདིར་གཤེགས་ནས་ཀྱང་། །བདག་ཅག་རླུང་རྟ་བསྐྱེད་པའི་གྲོགས་མཛོད་ཅིག །མཐུ་ཆེན་སྲུང་མའི་དབང་པོའི་ཚོགས་རྣམས་ཀུན། །མཁའ་ལ་ཆར་སྤྲིན་གཏིབས་པ་ཇི་བཞིན་དུ། །གནམ་ས་རི་ཀླུང་བར་སྣང་ཀུན་གང་ནས། །ཀི་དང་བསྭོ་ཡི་ཆ་སྒྲ་འབྲུག་ལྟར་སྒྲོག །དགེ་མཚན་སྙན་པའི་བ་དན་ཕྱོགས་བཅུར་བསྒྲེངས། །ཕྱོགས་ལས་རྣམ་པར་རྒྱལ་བའི་རླུང་རྟ་སྐྱེད། །རླུང་གི་རྩལ་ལྡན་རྟ་མཆོག་བ་ལ་ཧ། །རྫུ་འཕྲུལ་རྐང་པ་བཞི་ལ་མངའ་བརྙེས་ཤིང་། །ཞི་བ་རིན་ཆེན་གླིང་དུ་བགྲོད་མཛད་པ། །ནམ་མཁའི་མདོག་ཅན་ཐོགས་མེད་མཁའ་ལ་འགྲོ། །ཡིད་འོང་ཆུ་འཛིན་དཀར་པོའི་ཀློང་ནས་བཞེངས། །རླུང་གི་རྒྱལ་མཚན་སྲིད་པའི་རྩེ་མོར་བསྒྲེངས། །ཕ་རོལ་རྒོལ་བ་ཀུན་ལས་རྣམ་པར་རྒྱལ། །ཕུན་ཚོགས་ཕན་བདེའི་དཔལ་ལ་སྤྱོད་པ་དང་། །ཆོས་སྲིད་སྙན་གྲགས་རླུང་རྟ་ཡར་ལ་སྐྱེད། །ཁྱད་པར་ས་ཁམས་རླུང་རྟ་དར་བར་མཛོད། །དྲག་པོའི་མེ་ཡི་ཚྭ་ཚྭ་ཕྱོགས་བཅུར་འཕྲོ། །འཛུམ་དྲུག་རྒྱས་ཤིང་དཔའ་བའི་སྙིང་སྟོབས་ལྡན། །དྲག་པོའི་ང་རོས་སྲིད་གསུམ་གཡོ་ཞིང་འདར། །ཕ་རོལ་རྒོལ་བ་ངན་པ་འཇོམས་པར་བྱེད། །དམར་ནག་མེ་དཔུང་དྲག་པོའི་ཀློང་ནས་བཞེངས། །དཔའ་བརྗིད་སྟོབས་ལྡན་རླུང་རྟ་ཡར་ལ་སྐྱེད། །ཁྱད་པར་མེ་ཁམས་རླུང་རྟ་དར་བར་མཛོད། །ཕ་རོལ་སྟོབས་འཕྲོག་མི་མཐུན་རྒོལ་བ་རྣམས། །རྔམས་བརྗིད་སྟོབས་ལྡན་མ་རུང་ཟིལ་གྱིས་གནོན། །ཕྱྭ་གཡང་འདོད་དགུའི་དངོས་གྲུབ་འབྱུང་གནས་ཆེ། །དུང་གི་སེངྒེ་གཡུ་ཡི་རལ་བ་ཅན། །གནམ་ལྕགས་རི་བོའི་ཟོམ་ནས་སྐུར་བཞེངས་ལ། །ཡིད་འོང་མཛེས་བརྗིད་རླུང་རྟ་ཡར་ལ་སྐྱེད། །ཁྱད་པར་ལྕགས་ཁམས་རླུང་རྟ་དར་བར་མཛོད། །འདོད་འབྱུང་ཕུན་ཚོགས་གཏེར་ལ་མངའ་བརྙེས་ཤིང་། །མར་གད་མདངས་ལྡན་རླུང་གི་ཤུགས་ལྡན་ཁྱུང་། །ཐོགས་མེད་ཁྱུར་མཛད་མཁའ་ལ་ལྡིང་ཞིང་འགྱིངས། །རྣལ་འབྱོར་ཡིད་ལ་ཡོན་ཏན་སྟེར་བའི་ལྷ། །དཔག་བསམ་ལྗོན་པའི་རྩེ་ནས་སྐུར་བསྐྱོད་ལ། །འཛངས་འཕྲུལ་ཕུན་སུམ་ཚོགས་པའི་རླུང་རྟ་སྐྱེད། །ཁྱད་པར་རླུང་ཁམས་རླུང་རྟ་དར་བར་མཛོད། །སྙན་གྲགས་ཕྱོགས་བཅུར་ཀུན་ཏུ་ཁྱབ་བྱེད་རྟེན། །དྲག་པོའི་ང་རོས་སྟོང་གསུམ་གཡོ་ཞིང་འདར། །གློག་གི་ཕྲེང་བས་སྲིད་གསུམ་གསལ་བར་བྱེད། །སྙན་གྲགས་དབྱར་གྱི་རྔ་ཆེན་ལྡིར་བ་ལས། །མི་ཁ་གླེང་གཞི་རྒོལ་ངན་ཟིལ་གྱིས་གནོན། །ཆུ་ལྡན་ཆར་སྤྲིན་འཁྲིགས་པའི་ཀློང་ནས་བཞེངས། །དགེ་མཚན་སྙན་གྲགས་རླུང་རྟ་ཡར་ལ་སྐྱེད། །ཁྱད་པར་ཆུ་ཁམས་རླུང་རྟ་དར་བར་མཛོད། །རླུང་རྟ་བསྐྱེད་པའི་ལྷ་ཚོགས་ཐམས་ཅད་ཀྱིས། །ས་དང་བར་སྣང་ཁྱོན་ཀུན་ཡོངས་གང་ནས། །ཀུན་ཀྱང་རླུང་རྟ་བསྐྱེད་པའི་གྲོགས་མཛད་དེ། །དགེ་མཚན་སྙན་པའི་བ་དན་ཕྱོགས་བཅུར་བསྒྲེངས། །རླུང་རྟ་ཆག་ཉམས་འཐོར་ཞིག་རལ་བ་དང་། །བུག་རལ་གས་ཆག་འབྱུང་ཁམས་མི་མཐུན་པ། །གཅིག་གུད་གཅིག་བཅད་ནང་འཁྲུགས་དགྲར་འགྱུར་སོགས། །མི་མཐུན་ལོག་པ་ཀུན་ལས་སྲུང་སྐྱོབས་མཛོད། །བཀྲ་ཤིས་དཔལ་ཡོན་ལེགས་ཚོགས་མ་ལུས་ཀུན། །འདོད་འབྱུང་གཏེར་བཞིན་དངོས་གྲུབ་ཀུན་སྩོལ་ནས། །མདོར་ན་ལེགས་པར་སྨོན་པའི་དཔལ་ཡོན་ཀུན། །སྐྱེས་བུའི་ཡིད་ལ་ཇི་ལྟར་འདོད་པ་བཞིན། །དཔག་བསམ་ཤིང་དང་ཡིད་བཞིན་ནོར་བུའི་ཚུལ། །དངོས་གྲུབ་མ་ལུས་མྱུར་དུ་བསྩལ་ནས་ཀྱང་། །བདག་ཅག་བྱུང་ཆུབ་སྙིང་པོ་མ་ཐོབ་བར། །ཕྱི་ནང་གསང་བའི་བར་ཆད་ཀུན་སོལ་ལ། །སྲུང་སྐྱོབ་ཕྲིན་ལས་རྟག་ཏུ་མ་གཡེལ་བར། །ཇི་ལྟར་བཅོལ་བའི་ཕྲིན་ལས་སྒྲུབ་པར་མཛོད། །ཅེས་ཙིའུ་དམར་པོའི་རླུང་རྟ་སྙན་པའི་སྒྲ་དབྱངས་ཞེས་བྱ་བ་འདི་ནི་འབའ་ཕུག་སྤྲུལ་སྐུ་སྐུ་ཆེན་ནས་ཡང་ཡང་བསྐུལ་བའི་ངོར་རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེས་བྲིས་པ་དགེའོ།། །།