གནོད་སྦྱིན་ཆེན་པོའི་སྒོ་ནས་རླུང་རྟ་བསྐྱེད་གསོལ་སྙན་པའི་འབྲུག་སྒྲ་བཞུགས་སོ།།
བླ་མ་དང་ལྷག་པའི་ལྷ་ལ་ཕྱག་འཚལ་ལོ། །ཚུལ་འདི་ལ་དམར་གཏོར་བདུན་པ་བཏེགས། སྤོས་དཀར་དང་བསྲེས་པའི་དཀར་དམར་གསུར་དུད་བྱ། རུ་མཚོན་དང་དར་གྱི་བ་དན་དམར་པོ་ཕྱར། སྟག་སེང་ཁྱུང་འབྲུག་རྟ་མཆོག་རྣམས་བྲིས་པའི་རླུང་རྟ་བཅྭོ་བརྒྱད། ཆང་ཕུད་གསེར་སྐྱེམས་འཐོར་ཞིང་། ཀྱཻ། པདྨ་དབང་ཆེན་རྡོ་རྗེ་ཐོད་ཕྲེང་གིས། །ཆོས་རྒྱལ་སྐུ་ལྷར་བསྔགས་པའི་མཐུ་བོ་ཆེ། །བསྟན་སྲུང་དགྲ་ལྷའི་རྒྱལ་པོ་ཙིའུ་དམར་གྱིས། །རྣལ་འབྱོར་རླུང་རྟ་བསྐྱེད་པའི་ཕྲིན་ལས་མཛོད། །དགེ་ཚོགས་མ་ལ་ཡ་ཡི་ནགས་ཀླུང་ལས། །རིམ་གཉིས་ནུས་པའི་རི་མོ་ལེགས་པར་འབར། །ཕྲིན་ལས་རྣམ་བཞིའི་སྟོབས་ཤུགས་རྒྱས་པ་ཡིས། །སྟག་ཤར་འཕྱོ་བའི་རླུང་རྟ་བསྐྱེད་པར་མཛོད། །རིམ་དགུའི་ཐེག་པའི་ཀེ་ལ་ཤ་རིའི་རྩེར། །ས་ལམ་མངོན་རྟོགས་གཡུ་རལ་ཕྱོགས་བརྒྱར་གཡོ། །རྒོལ་ངན་འཇོམས་པའི་མི་བཟད་མཆེ་སྡེར་བསྒྲད། །སེང་ལྟར་འགྱིང་བའི་རླུང་རྟ་བསྐྱེད་དུ་གསོལ། །མཐའ་བྲལ་ལྟ་བའི་གཤོག་རྩལ་རབ་ཏུ་རྒྱས། །རབ་འབྱམས་ཤེས་བྱ་མཁྱེན་པའི་གསེར་མིག་འཁྱིལ། །རྒྱལ་ཀུན་དགོངས་པའི་མཁའ་ལ་རྟག་འཕྱོ་ཡང་། །ལས་བཞི་ཁྱུང་ལྟར་ལྡིང་བའི་རླུང་རྟ་བསྐྱེད། །རྗེས་བརྩེ་སྤྲིན་ཆེན་འཁྲིགས་པར་གནས་བཅས་ཤིང་། །གང་འདུལ་ཐབས་ཀྱིས་གློག་ཕྲེང་ཅིར་ཡང་འཕྱོ། །ཕན་བདེ་བདུད་རྩིའི་ཆར་དང་ལྷན་ཅིག་ཏུ། །སྙན་གྲགས་འབྲུག་ལྟར་ལྡིར་བའི་རླུང་རྟ་བསྐྱེད། །མཐའ་ཀླས་འགྲོ་ཁམས་གསེར་ལྡན་ཐ་གྲུ་ལ། །རྒྱལ་སྲས་སྤྱོད་པའི་འགྲོས་ཀྱི་རང་དབང་བསྒྱུར། །ཕྱོགས་ལས་རྣམ་པར་རྒྱལ་བའི་རྩལ་ཤུགས་འཆང་། །གཞན་དོན་རྟ་མཆོག་ལས་མྱུར་རླུང་རྟ་བསྐྱེད། །འཇམ་དཔལ་བཤེས་གཉེན་བཀའ་བརྒྱུད་སྙིང་ཐིག་གི །བསྟན་པའི་གཟུགས་བཟང་སྲིད་རྩེར་མཐོ་བ་ལ། །མི་མཐུན་གཡུལ་ལས་རྒྱལ་བའི་དགེ་མཚན་གྱིས། །རུ་མཚོན་ནུབ་མེད་འབར་བའི་རླུང་རྟ་བསྐྱེད། །བསྟན་གཞི་བསླབ་པ་གསུམ་གྱི་རྩ་བ་བརྟན། །བསྟན་སྙིང་བྱང་ཆུབ་སེམས་ཀྱི་ཡལ་ག་ཕྱུག །བསྟན་རྩེ་ཀློང་ཆེན་དགོངས་པའི་འབྲས་བུ་སྨིན། །བསྟན་པ་ཡོངས་རྫོགས་འཛིན་པའི་རླུང་རྟ་བསྐྱེད། །གསང་ཆེན་བསྟན་ལ་འཁུ་བའི་གདུག་སེམས་འཆང་། །ཕྲག་དོག་ལྕེ་གཉིས་བརྐྱངས་བའི་ལྟོ་འགྲོའི་དགྲ། །དྲག་རྩལ་མཁའ་ལྡིང་ཁྲོས་པའི་སྡེར་རྣོན་གྱིས། །འཇོམས་མཛད་མངོན་སྤྱོད་ནུས་པའི་རླུང་རྟ་བསྐྱེད། །མངའ་ཐང་ཆོས་སྲིད་ལྷུན་པོའི་སྤོ་བཞིན་མཐོ། །འདོད་དགུའི་ལོངས་སྤྱོད་མི་ཟད་གཏེར་བཞིན་བརྟན། །ཆོས་དང་རིགས་བརྒྱུད་གངྒཱའི་རྒྱུན་བཞིན་རིང་། །བཀྲ་ཤིས་དགེ་ལེགས་རླུང་རྟ་ཡར་ལ་བསྐྱེད། ། ༈ བསྡུས་ན། ཀྱཻ། བསྟན་སྲུང་དགྲ་བླའི་རྒྱལ་པོ་འཁོར་བཅས་ཀྱིས། །རྣལ་འབྱོར་བདག་ཅག་འཁོར་དང་བཅས་པ་ཡི། །རིག་འཛིན་ཚེ་ཡི་རླུང་རྟ་ཡར་ལ་བསྐྱེད། །འཆི་མེད་རྡོ་རྗེ་སྲོག་གི་དངོས་གྲུབ་སྩོལ། །བསོད་ནམས་ནོར་གྱི་རླུང་རྟ་ཡར་ལ་བསྐྱེད། །འཛད་མེད་ནམ་མཁའ་མཛོད་ཀྱི་དངོས་གྲུབ་སྩོལ། །བཀྲག་ལྡན་ལུས་ཀྱི་རླུང་རྟ་ཡར་ལ་བསྐྱེད། །རྒས་མེད་ལང་ཚོ་འབར་བའི་དངོས་གྲུབ་སྩོལ། །དབང་ཐང་རྒྱུད་ཀྱི་རླུང་རྟ་ཡར་ལ་བསྐྱེད། །སྡེ་བཞིའི་དཔལ་ལ་རོལ་བའི་དངོས་གྲུབ་སྩོལ། །སྙན་གྲགས་གཏམ་གྱི་རླུང་རྟ་ཡར་ལ་བསྐྱེད། །ལས་ལམ་ངོ་སོ་མཐོ་བའི་དངོས་གྲུབ་སྩོལ། །ཁེ་གྲགས་སྟོབས་ཀྱི་རླུང་རྟ་ཡར་ལ་བསྐྱེད། །དགྲ་དཔུང་ཆམ་ལ་འབེབས་པའི་དངོས་གྲུབ་སྩོལ། །རྨད་བྱུང་དགེ་ཚོགས་རླུང་རྟ་ཡར་ལ་བསྐྱེད། །ལུང་རྟོགས་ཡོན་ཏན་རྒྱས་པའི་དངོས་གྲུབ་སྩོལ། །རླུང་རྟ་ཡར་ལ་བསྐྱེད་པའི་རྟེན་འབྲེལ་གྱིས། །བསམ་རྒུའི་ཆོས་བཞིན་འགྲུབ་པའི་བཀྲ་ཤིས་ཤོག །ཅེས་པ་འདི་ནི་སྔགས་འཆང་ཆོས་སྐྱོང་རྒྱལ་མཚན་གྱིས་ལྷ་རྫས་ཁྱད་པར་ཅན་གྱི་སྐྱེས་བཅས་བསྐུལ་ངོར་རྣལ་འབྱོར་པ་དཔལ་གྱི་རྡོ་རྗེས་གསོལ་བ་བཏབ་པ་ཛ་ཡནྟུ། དགེའོ། ། དགེའོ། །མངྒ་ལཾ། །