རྒྱལ་ཆེན་སྐུ་ལྔའི་ཕྲིན་ལས་ཚོགས་གཉིས་གཏེར་གྱི་འབྱུང་གནས་བཞུགས་སོ།།

ཨོཾ་སྭ་སྟི། ཆོས་དབྱིངས་སྐྱེ་བ་མེད་པའི་ངང་ཉིད་ལས། །སྐྱེ་བའི་ཆོ་འཕྲུལ་འབར་བའི་སྐུར་སྟོན་པ། །ཁྲོ་རྒྱལ་ཡོངས་ཀྱི་སྤྱི་མེས་ཧེ་རུ་ཀ །བཅོམ་ལྡན་དཔལ་ཆེན་རྡོ་རྗེ་གཞོན་ནུར་འདུད། །དེ་ལ་འདིར་ཆོས་རྒྱལ་སྐུ་ལྔའི་གཟུགས་བྲིས་འབུར་གང་རུང་ངམ་ཡང་ན་མཆོད་གཏོར་དང་། སྨན་དང་རཀྟ་ཚོགས་ཀྱི་ཡོ་བྱད་ཆུ་གཉིས་ཉེར་སྤྱོད་སོགས་འདུ་བྱས་ལ། སྤོས་དཀར་གྱི་དུད་པ་བཏང་སྟེ། རང་ཉིད་རྟ་མཆོག་ཧེ་རུ་ཀའི་ང་རྒྱལ་དང་ལྡན་པའི་ངང་ནས་རོལ་མོ་སྣ་ཚོགས་ཀྱི་སྒྲ་དང་། གདུང་བའི་དབྱངས་སྙན་པོས་འདི་སྐད་དོ། །ཧཱུྃ་ཧྲཱིཿ བདག་ཉིད་དབང་ཆེན་པདྨ་ཧེ་རུ་ཀ །སྐུ་མདོག་དམར་པོ་ཞལ་གཅིག་ཕྱག་བཞི་པ། །གཡས་གཉིས་གྲི་གུག་འགུགས་བྱེད་ལྕགས་ཀྱུ་དང་། །གཡོན་གཉིས་ཞགས་པ་བྷནྡྷ་ཁྲག་བསྐང་བསྣམས། །གར་དགའི་ཉམས་ལྡན་དུར་ཁྲོད་ཆས་ཀྱིས་བརྒྱན། །རྟ་དབུ་དཀར་དམར་ལྗང་གསུམ་གཙུག་ནས་འཚེར། །ཡུམ་ཆེན་རྡོ་རྗེ་ཕག་མོ་སྐུ་མདོག་དམར། །སྤྱི་གཙུག་ཕག་ཞལ་མཐིང་ནག་ངུར་སྒྲ་འབྱིན། །བདེ་བ་ཆེན་པོས་ཡབ་ལ་དགྱེས་པར་འཁྲིལ། །མདུན་དུ་རིན་ཆེན་ལས་གྲུབ་གཞལ་ཡས་ཁང་། །དབུས་དང་ཕྱོགས་བཞིར་པདྨ་ཉི་ཟླའི་སྟེང་། །མ་ཏྲཾ་རུ་ཏྲ་བསྣོལ་བའི་གདན་སྟེང་དུ། །དབུས་ཕྱོགས་བཅོམ་ལྡན་རྡོ་རྗེ་མི་བསྐྱོད་པ། །ཉོན་མོངས་ཞེ་སྡང་འཇོམས་པའི་ལྷ་གཅིག་པུ། །བདེ་གཤེགས་ཀུན་གྱི་ཐུགས་ཀྱི་མཆོག་མངའ་བ། །མེ་ལོང་ལྟ་བུའི་ཡེ་ཤེས་རང་མདངས་ལས། །སྙིང་རྗེ་ཆེན་པོའི་དབྱིངས་ལས་མ་གཡོས་ཀྱང་། །ལོག་འདྲེན་འདུལ་བའི་གཤེད་དུ་སྐུར་སྟོན་པ། །ཐུགས་ཀྱི་རྒྱལ་པོ་བརྒྱ་བྱིན་ཆེན་པོ་ནི། །མཐིང་ནག་གནམ་སྔོན་བཞུས་པའི་མདོག་ལྟ་བུ། །དར་ནག་གོས་དང་དོམ་གྱི་སློག་པ་གསོལ། །ཕྱག་གཡས་བདུད་ཞགས་གཡོན་པས་སྤུ་གྲི་བསྣམས། །ཞལ་ནས་མ་རུང་གདུག་པའི་ངན་སྔགས་སྒྲོག །དབུ་ལ་མིག་སྨན་མདོག་ཅན་ཐིབ་ཞུ་གསོལ། །ཆིབས་སུ་མི་བཟང་གླང་ཆེན་སྣ་རིང་ཆིབས། །སྣ་བཟུང་མོན་བུ་པུ་ཏྲ་མཐིང་ནག་རྔམས། །ཕོ་ཉ་བདུད་བྱ་ཀྱུང་ཀ་ཁྲ་ཐབ་འགྱེད། །རོལ་དུ་མ་རུང་རླུང་ནག་འཚུབ་མ་ཁྲིད། །གསང་བའི་ཡུམ་གཅིག་ཤནྟིང་རོ་ཟན་མ། །ལྕགས་ཀྱུ་ཞགས་པ་བསྣམས་ནས་གཡོན་དུ་འདུད། །གཡོན་དུ་བློན་པོ་སྲོག་བདག་བྱ་ར་བ། །སྐུ་ལ་ཟ་འོག་སྨུག་ཁྲའི་བེར་སྨུག་གསོལ། །དར་ནག་རུ་མཚོན་ཕྱར་ཞིང་སེང་གེ་ཆིབས། །མདུན་དུ་སྤྲུལ་པ་དགེ་བསྙེན་གཞོན་ནུའི་ཚུལ། །དར་དམར་བེར་གསོལ་ཤེལ་གྱི་ཕྲེང་བ་གསོལ། །གཡས་པས་སྡིག་འཛུབས་གཡོན་པས་ཟངས་གྲི་བསྣམས། །ཤར་ཕྱོགས་བཅོམ་ལྡན་རྣམ་པར་སྣང་མཛད་ནི། །ཉོན་མོངས་གཏི་མུག་འཇོམས་པའི་ལྷ་གཅིག་པུ། །བདེ་གཤེགས་ཀུན་གྱི་ཡོན་ཏན་མཆོག་མངའ་བ། །མཉམ་པ་ཉིད་ཀྱི་ཡེ་ཤེས་རང་མདངས་ལས། །ཐུགས་ནི་སྙིང་རྗེའི་དབྱིངས་ལས་མ་གཡོས་ཀྱང་། །གདུལ་དཀའ་འདུལ་བའི་གཤེད་དུ་ཁྲོས་པའི་སྐུ། །སྐུ་ཡི་རྒྱལ་པོ་མོན་བུ་པུ་ཊ་ཏེ། །མིག་སྨན་མདོག་ཅན་མི་བཟད་གཏུམ་པའི་སྐུ། །མན་ཏྲི་ནག་པོའི་ན་བཟའ་སྐུ་ལ་གསོལ། །གཡས་པས་རྡོ་རྗེ་གཡོན་པས་གསེག་ཤིང་བསྣམས། །རོལ་དུ་གཏུམ་ཆེན་དོམ་ནག་སྨྱོན་པ་ཁྲིད། །ཕོ་ཉ་གཅན་སྤྱང་སྟག་གཟིག་དོམ་དྲེད་འགྱེད། །གཡོན་དུ་ཡུམ་ཆེན་བདུད་མོ་རོ་ལངས་མ། །དར་དཀར་གོས་གསོལ་དམ་ཤིང་བྷནྡྷ་བསྣམས། །གཡས་སུ་བློན་པོ་བྱ་ཁྲི་མིག་གཅིག་པ། །མཐིང་ནག་བེར་གསོལ་སྤྲུལ་ནག་ཐོད་དུ་བཅིངས། །ཕྱག་གཉིས་རྡོ་རྗེ་འཕེན་ཤིང་རྟ་སྔོན་ཆིབས། །མདུན་དུ་སྤྲུལ་པ་དགྲ་བཅོམ་གཞོན་ནུའི་ཚུལ། །སྐུ་ལ་ཆོས་གོས་ངུར་སྨྲིག་མདོག་ཅན་གསོལ། །ཕྱག་གཡས་གསེག་ཤང་གསེར་གྱི་སྤུ་གྲི་བསྣམས། །ལྷོ་ཕྱོགས་བཅོམ་ལྡན་རིན་ཆེན་འབྱུང་ལྡན་ནི། །ཉོན་མོངས་ང་རྒྱལ་འཇོམས་པའི་ལྷ་གཅིག་པུ། །རྒྱལ་ཀུན་ཡོན་ཏན་ཀུན་གྱི་མཛོད་འཛིན་པ། །མཉམ་པ་ཉིད་ཀྱི་ཡེ་ཤེས་རང་མདངས་ལས། །སྙིང་རྗེ་ཆེན་པོའི་དབང་ཕྱུག་སྐུར་སྟོན་པ། །མ་རུང་འདུལ་བའི་གཤེད་དུ་ཁྲོས་པའི་སྐུ། །ཡོན་ཏན་རྒྱལ་པོ་གནོད་སྦྱིན་ཤིང་བྱ་ཅན། །ཤིན་ཏུ་མི་བཟད་དུག་ཆེན་ཧ་ལའི་མདོག །སྐུ་ལ་སྤྲུལ་དང་སྟག་གི་གཡང་གཞིས་བརྒྱན། །ཕྱག་གཡས་དགྲ་སྟ་གཡོན་པས་སྦྲུལ་ཞགས་བསྣམས། །དབུ་ཡི་ཁྱུང་མགོའི་ལྷ་སྲིན་དབང་དུ་སྡུད། །རོལ་དུ་སྲིད་པའི་གཡུ་འབྲུག་སྔོན་མོ་འཁྲིད། །ཕོ་ཉ་སྤྲ་སྤྲེལ་བྱི་བའི་ཚོགས་རྣམས་གཏོང་། །གཡོན་དུ་ཡུམ་ཆེན་གསེར་གྱི་སྤུ་གྲི་མ། །ནག་མོ་ཕྱག་བཞི་རལ་གྲི་མདུང་ཤཀྟི། །ཏྲི་ཤུལ་བ་དན་ཕྱར་ནས་བོང་བུ་ཆིབས། །གཡས་སུ་བློན་པོ་བྱ་རྒོད་ཐང་ནག་ནི། །དར་ནག་གོས་གསོལ་ཕྱག་ན་གྲི་ཁུག་བསྣམས། །ཆིབས་སུ་མིག་སྨན་མདོག་ཅན་དྲེལ་རྟ་ཆིབས། །མདུན་དུ་སྤྲུལ་པ་སྐུ་མདོག་སྔོ་སྐྱ་ཅན། །སྐུ་ལ་མན་ཏྲི་དམར་པོའི་ག་ཤ་ཅན། །ཕྱག་ན་རབ་མཛེས་སྦ་གུག་མཆུ་རིང་བསྣམས། །ནུབ་ཕྱོགས་བཅོམ་ལྡན་སྣང་བ་མཐའ་ཡས་ནི། །ཉོན་མོངས་འདོད་ཆགས་འཇོམས་པའི་ལྷ་གཅིག་པུ། །རྒྱལ་བ་ཀུན་གྱི་གསུང་གི་རྡོ་རྗེ་འཛིན། །སོ་སོར་རྟོག་པའི་ཡེ་ཤེས་རང་མདངས་ལས། །སྙིང་རྗེ་ཆེན་པོའི་དབྱིངས་ལས་མ་གཡོས་ཀྱང་། །གདུལ་དཀའི་གཤེད་གྱུར་རྔམས་བརྗིད་འབར་བའི་སྐུ། །གསུང་གི་རྒྱལ་པོ་དགྲ་ལྷ་སྐྱེས་གཅིག་པུ། །སྐུ་མདོག་དམར་པོ་དུས་མཐའི་མེ་ལྟར་འབར། །དར་ནག་འཇོལ་བེར་ལྷབ་ལྷུབ་སྐུ་ལ་གསོལ། །ཕྱག་གཡས་སྦ་འཁར་གཡོན་ན་ཙནྡན་བིང་། །ཆིབས་སུ་ཤུགས་ལྡན་དྲེལ་ནག་རྐང་དཀར་ཆིབས། །རོལ་དུ་ལྕགས་ཀྱི་སྤྱང་མོ་འདུར་བ་ཁྲིད། །ཕོ་ཉ་ལྕགས་ཀྱི་བྱ་ཁྲ་མང་པོ་འགྱེད། །གཡོན་དུ་ཡུམ་ཆེན་འཛིན་བྱེད་པདྨ་སྐྱེས། །དར་ནག་བེར་གསོལ་དམ་ཤིང་བྷནྡྷ་བསྣམས། །གཡས་སུ་བློན་པོ་རྡོ་རྗེ་གྲགས་ལྡན་ནི། །སྐུ་མདོག་དམར་ནག་དར་དམར་ཆོས་གོས་གསོལ། །ཕྱག་གཡས་གསེར་ཤིང་གཡོན་པས་གསེག་ཤང་བསྣབས། །ཆིབས་སུ་ཤུགས་ལྡན་རྔ་མོང་གྭ་བ་ཆིབས། །མདུན་དུ་སྤྲུལ་པ་མཐིང་ནག་ཁྲོས་པའི་སྐུ། །ཉོན་མོངས་ཕྲག་དོག་འཇོམས་པའི་ལྷ་གཅིག་པུ། །རྒྱལ་ཀུན་ཕྲིན་ལས་ཡོན་ཏན་རྫོགས་པའི་ལྷ། །བྱ་བ་གྲུབ་པའི་ཡེ་ཤེས་རང་མདངས་ལས། །ཐུགས་ནི་སྙིང་རྗེ་ཆེན་པོའི་བདག་ཉིད་ཅན། །བདུད་དཔུང་མ་ལུས་འདུལ་བའི་གཤེད་པོ་ཆེ། །ཕྲིན་ལས་རྒྱལ་ཆེན་ཞལ་གསུམ་མི་བོ་ཆེ། །ཞལ་གསུམ་གཡས་ནག་གཡོན་དམར་དབུས་དཀར་བ། །ཐོད་ཆེན་སྟེང་ན་སག་ཞུ་གདུགས་སྟབས་གསོལ། །ཕྱག་དྲུག་གཡས་ན་ལྕགས་ཀྱུ་མདའ་རལ་གྲི། །གཡོན་ན་སྤུ་གྲི་གཞུ་དང་བེར་ག་བསྣམས། །སྐུ་སྟོད་དར་གྱི་རལ་ཀ་དཀར་པོ་གསོལ། །སྐུ་སྨད་ཞིང་ལྤགས་སྟག་གི་ཤམ་ཐབས་ཅན། །ཆིབས་སུ་གངས་ཀྱི་སེང་གེ་དཀར་མོ་ཆིབས། །སྣ་བཟུང་མོན་བུ་མཎ་ཏྲིའི་ག་ཤ་ཅན། །རོལ་དུ་སྲིད་པའི་རླུང་ནག་འཚུབས་མ་ཁྲིད། །ཕོ་ཉ་བདུད་བྱ་མ་རུང་ལྕུང་ཀ་གཏོང་། །གཡོན་དུ་ཡུམ་ཆེན་བདུད་བཟའ་སྨིན་དཀར་མ། །སྐུ་མདོག་མཐིང་ནག་བདུད་ཀྱི་སློག་པ་གསོལ། །ཕྱག་གཡས་དམ་ཤིང་གཡོན་པས་བྷནྡྷ་བསྣམས། །གཡས་སུ་བློན་པོ་པུ་ཊ་ནག་པོ་ནི། །སྐུ་མདོག་མིག་སྨིན་མདོག་ཅན་རལ་ག་གསོལ། །གྲི་གུག་བསྣམས་ཤིང་དྲེལ་རྟ་ནག་པོ་ཆིབས། །མདུན་དུ་སྤྲུལ་པ་མདོག་ནག་མི་སྡུག་པ། །ཞིང་ལྤགས་གཡང་གཞི་སྦྲུལ་གྱི་ཆུན་པོས་བརྒྱན། །ཕྱག་ན་སྟག་དང་སྤྱང་ཀིའི་རྒྱལ་མཚན་འཕྱར། །གཞན་ཡང་ཕྱོགས་དང་ཕྱོགས་མཚམས་ཐམས་ཅད་དུ། །གནམ་གྱི་ཡར་བླར་བྱིས་པ་ལོ་བརྒྱད་པ། །གནོད་སྦྱིན་རྡོ་རྗེ་ཐོག་འབེབས་མཐུ་བོ་ཆེ། །རྡོ་རྗེ་ཁྱུང་ཆེན་ཀླུ་འབྲུག་འདུལ་བ་པོ། །ལྷ་ཡི་དགེ་བསྙེན་མ་ཧཱ་ཀ་ལ་དཔལ། །མགོན་པོ་ནག་པོ་བྱ་རྒོད་ཐང་ནག་དང་། །སྲོག་བདག་རྔམས་པ་དམག་དཔོན་ཆེན་པོའི་ཚོགས། །ཟ་འོག་སྟག་དང་སེང་གེ་རྨ་བྱ་དོམ། །སྤྱང་ཀི་བྱ་རྒོད་སྤྲེའུ་བྱི་ལ་ཡི། །རྒྱལ་མཚན་ཕྱར་ཞིང་ལས་བྱེད་དྲེགས་པའི་དམག །གཡས་ཀྱི་རུ་འདྲེན་དགེ་སློང་སྟོང་སྡེའི་ཚོགས། །གཡོན་གྱི་རུ་འདྲེན་བནྡེ་ནག་པོའི་ཚོགས། །སྔོན་གྱི་ཤུལ་མཚོན་ཤནྟིང་བདུད་མོ་འབུམ། །ཁོལ་པོ་སྟག་ཆས་གཟིག་ཆས་འབུམ་ཕྲག་སྟོང་། །སྐུ་ཡི་སྐྱོ་བསང་འབག་སེང་གར་མཁན་འབུམ། །སེང་ལྟར་མཆོང་བ་སྟག་ལྟར་རྔམས་པ་དང་། །ཁྱུང་ལྟར་ལྡིང་བ་ཁྲ་ལྟར་འཛུལ་བའི་ཚོགས། །སྤྱང་ལྟར་རྒྱུག་པའི་ལས་བྱེད་མཁའ་དང་མཉམ། །སྤུ་གྲི་མཆེད་ལྔ་སྟོང་དཔོན་མཆེད་བདུན་སོགས། །གཞན་ཡང་རྒྱལ་པོ་ཆེན་པོའི་དཀའ་འཁོར་ནི། །གནས་པའི་ལྷ་སྲིན་འཇིག་རྟེན་དྲེགས་པའི་ཚོགས། །ཉི་ཟེར་རྡུལ་ལྟར་བསམ་གྱི་མི་ཁྱབ་པ། །ས་དང་བར་སྣང་ཁྱོན་ཀུན་གང་བར་གྱུར། །སྤྱན་འདྲེན་པ་ནི། ཧཱུྃ། ནམ་མཁའི་དབྱིངས་ཀྱི་ད་ལ་ཆེན་པོ་ནས། །དབུས་ཕྱོགས་ཐུགས་ཀྱི་རྒྱལ་པོ་ཆེན་པོ་དང་། །གསང་བའི་ཡུམ་ཆེན་ཤིནྟང་རོ་ཟན་མ། །བཀའ་ཡི་བློན་པོ་སྲོག་བདག་བྱ་ར་བ། །འཁོར་དང་བཅས་པ་གནས་འདིར་གཤེགས་སུ་གསོལ། །ཤར་ཕྱོགས་དུང་གི་སྐུ་མཁར་རྩེ་དགུ་ནས། །སྐུ་ཡི་རྒྱལ་པོ་མོན་བུ་པུ་ཏྲ་ཏེ། །གསང་བའི་ཡུམ་ཆེན་བདུད་མོ་རོ་ལངས་མ། །བཀའ་ཡི་བློན་པོ་བྱ་ཁྲི་མིག་གཅིག་པུ། །འཁོར་དང་བཅས་པ་གནས་འདིར་གཤེགས་སུ་གསོལ། །ལྷོ་ཕྱོགས་རིན་ཆེན་གསེར་གྱི་གཞལ་ཡས་ནས། །ཡོན་ཏན་རྒྱལ་པོ་གནོད་སྦྱིན་ཤིང་བྱ་ཅན། །གསང་བའི་ཡུམ་ཆེན་གསེར་གྱི་སྤུ་གྲི་མ། །བཀའ་ཡི་བློན་པོ་བྱ་རྒོད་ཐང་ནག་སྟེ། །འཁོར་དང་བཅས་པ་གནས་འདིར་གཤེགས་སུ་གསོལ། །ནུབ་ཕྱོགས་བྱེ་རུ་དམར་པོའི་གཞལ་ཡས་ནས། །གསུང་གི་རྒྱལ་པོ་དགྲ་ལྷ་སྐྱེས་གཅིག་པུ། །གསང་བའི་ཡུམ་ཆེན་འཛིན་བྱེད་པདྨ་སྐྱེས། །བཀའ་ཡི་བློན་པོ་རྡོ་རྗེ་གྲགས་ལྡན་ཏེ། །འཁོར་དང་བཅས་པ་གནས་འདིར་གཤེགས་སུ་གསོལ། །བྱང་ཕྱོགས་ལྕགས་ཀྱི་ཕོ་བྲང་རྩེ་དགུ་ནས། །ཕྲིན་ལས་རྒྱལ་ཆེན་ཞལ་གསུམ་མི་བོ་ཆེ། །གསང་བའི་ཡུམ་ཆེན་བདུད་བཟའ་སྨིན་དཀར་མ། །བཀའ་ཡི་བློན་པོ་པུ་ཏྲ་ནག་པོའི་དཔལ། །འཁོར་དང་བཅས་པ་གནས་འདིར་གཤེགས་སུ་གསོལ། །གཞན་ཡང་གར་བཞུགས་གནས་མཆོག་དམ་པ་ནས། །རང་རང་སྤྲུལ་པ་ཡང་སྤྲུལ་འཁོར་དང་བཅས། །རུ་འདྲེན་སྡེ་བཞི་ལྷ་སྲིན་འབུམ་གྱི་ཚོགས། །གནམ་ས་རི་ལུང་བར་སྣང་ཁྱོན་ཀུན་གང་། །ཉི་ཟེར་རྡུལ་ལྟར་བསམ་གྱིས་མི་ཁྱབ་པ། །བདག་ཅག་དང་བའི་ཡིད་ཀྱིས་འབོད་ལགས་ན། །རྒྱལ་ཆེན་འཁོར་དང་བཅས་པ་མ་ལུས་ཀུན། །བཤུག་པའི་གླུ་ལེན་ཀི་བསོའི་སྒྲ་དང་བཅས། །ཁ་ཆར་བུ་ཡུག་འཚུབས་པ་ཇི་བཞིན་དུ། །སྐད་ཅིག་ཙམ་གྱིས་གནས་འདིར་གཤེགས་སུ་གསོལ། །བཛྲ་ས་མ་ཛཿ བཞུགས་གསོལ་ནི། ཧཱུྃ། སངས་རྒྱས་བསྟན་པ་གཉན་པོ་སྲུང་བ་དང་། །གདུག་པའི་དགྲ་བགེགས་མ་ལུས་འདུལ་བའི་ཕྱིར། །རབ་འཇིགས་ཕོ་བྲང་ཆེན་པོའི་དཀྱིལ་འཁོར་དུ། །དགྲ་དགེགས་ཕོ་མོ་བསྣོལ་བའི་གདན་སྟེང་དུ། །སྤྲུལ་པའི་ཆོས་རྒྱལ་ཆེན་པོ་འཁོར་དང་བཅས། །རང་རང་དགྱེས་པའི་གདན་ཁྲི་ཡངས་པའི་སྟེང་། །གཉིས་མེད་དགྱེས་པ་ཆེན་པོར་བཞུགས་སུ་གསོལ། །ས་མ་ཡ་ཏིཥྛ་ལྷན། ཕྱག་འཚལ་བ་ནི། ཧྲཱིཿ མཐུ་སྟོབས་དབང་ཕྱུག་དྲེགས་པ་ཡོངས་ཀྱི་གཙོ། །སྤྲུལ་པའི་ཆོས་རྒྱལ་ཆེན་པོ་སྐུ་ལྔ་པོ། །མི་བཟད་གར་དགུའི་ཉམས་ལྡན་འཇིགས་པའི་སྐུ། །ཡབ་ཡུམ་སྲས་དང་སྤྲུལ་པ་བློན་པོ་དང་། །རུ་འདྲེན་སྡེ་བཞི་ཡང་སྤྲུལ་དམ་ཅན་ཚོགས། །སྣང་ཞིང་སྲིད་པའི་ལྷ་སྲིན་དྲེགས་པའི་དམག །འབུམ་ཕྲག་ཡངས་པའི་འཁོར་ཚོགས་རྒྱ་མཚོ་ལ། །བདག་ཅག་དང་བའི་ཡིད་ཀྱིས་ཕྱག་འཚལ་ལོ། །ཨ་ཏི་པུ་ཧོ། པྲ་ཏི་ཙ་ཧོ། མཆོད་པ་ནི། ཧྲཱིཿ སྟོང་གསུམ་འདིའམ་སྟོང་གསུམ་གཞན་དག་ནི། །གཙང་སྦྱར་མཆོད་ཡོན་དག་བྱེད་ཞབས་བསིལ་དང་། །རྣམ་བཀྲའི་མེ་ཏོག་བདུག་པའི་སྤྲིན་ཕུང་འཕྲོ། །སྣང་གསལ་འོད་ལྡན་དྲི་ཆབ་བྱུག་པའི་མཚོ། །རོ་བརྒྱའི་ཞལ་ཟས་སྙན་བརྗིད་རོལ་མོའི་སྒྲ། །གཟུགས་སྒྲ་དྲི་རོ་རེག་བྱ་ཆོས་རྡོ་རྗེ། །ཡིད་འོང་ལྷ་ཡི་འཆི་མེད་བདུད་རྩིའི་མཚོ། །བཀྲ་ཤིས་རྫས་རྟགས་རྒྱལ་སྲིད་རིན་ཆེན་བདུན། །ཨ་མྲྀ་ཏ་དང་རཀྟ་དམར་གྱི་མཚོ། །དམ་རྫས་བདུད་རྩི་སྦྱར་བའི་བྷ་ལིངྟ། །དམར་ཆེན་མཆོད་ཡོན་དུག་ཆུའི་ཞབས་བསིལ་དང་། །དབང་ལྔའི་མེ་ཏོག་ཚིལ་ཆེན་དུད་པའི་སྤྲིན། །ཞུན་ཆེན་མར་མེ་མཁྲིས་པའི་དྲི་ཆབ་དང་། །ཤ་ཁྲག་རུས་པའི་ཞལ་ཟས་རི་ལྟར་སྤུང་། །རྐང་གླིང་ཐོད་རྔའི་སྒྲ་དབྱངས་ལ་སོགས་པའི། །རབ་འབྱམས་ནམ་མཁའ་གང་བ་མཆོད་པ་འབུལ། །བཞེས་ནས་འདོད་པའི་དངོས་གྲུབ་སྩལ་དུ་གསོལ། །ཨོཾ་བཛྲ་ཨརྒྷཾ་པདྱཾ་པུཥྤེ་དྷུ་པེ་ཨ་ལོ་ཀེ་གྷནྡྷེ་ནཻ་ཝིདྱ་ཤབྟ་མ་ཧཱ་པཉྩ་ཨ་མྲྀ་ཏ་རཀྟ་བྷ་ལིངྟ་ཁ་ཁ་ཁཱ་ཧི་ཁཱ་ཧི། བསྟོད་པ་ནི། ཧཱུྃ། ཆོས་དབྱིངས་སྐྱེ་བ་མེད་པའི་ངང་ཉིད་ལས། །གདོད་ནས་རྣམ་དག་རྒྱལ་བ་རིགས་ལྔ་སྟེ། །སྙིང་རྗེ་ཆེན་པོའི་དབྱིངས་ལས་མ་གཡོས་ཀྱང་། །སྤྲུལ་པའི་ཆོས་རྒྱལ་ཆེན་པོ་སྐུ་ལྔ་ཤར། །མཐིང་ནག་མི་སྲུན་ནམ་མཁའ་ཞུན་མའི་མདོག །དར་ནག་གོས་དང་དོམ་གྱི་སློག་པ་གསོལ། །བདུད་ཞགས་སྤུ་གྲི་བསྣམས་ཤིང་གླང་ཆེན་ཆིབས། །དབུས་ཕྱོགས་ཐུགས་ཀྱི་རྒྱལ་པོ་ཁྱོད་ལ་བསྟོད། །མིག་སྨན་མདོག་ཅན་ཤིན་ཏུ་ཁྲོས་པའི་སྐུ། །མཎ་ཏྲི་ནག་པོའི་བེར་ཆེན་སྐུ་ལ་གསོལ། །རྡོ་རྗེ་གསེག་ཤང་བསྣམས་ནས་དོམ་ནག་ཁྲིད། །ཤར་ཕྱོགས་སྐུ་ཡི་རྒྱལ་ཆེན་ཁྱོད་ལ་བསྟོད། །མི་བཟད་གཏུམ་ཆེན་དུག་ཆེན་ཧ་ལའི་མདོག །སྦྲུལ་ནག་ཆུན་པོ་སྟག་གི་གཡང་གཞི་གསོལ། །དགྲ་སྟ་སྦྲུལ་ཞགས་བསྣམས་ནས་གཡུ་འབྲུག་ཁྲིད། །ལྷོ་ཕྱོགས་ཡོན་ཏན་རྒྱལ་པོ་ཁྱོད་ལ་བསྟོད། །རབ་འཇིགས་སྐུ་ནི་བསྐལ་བའི་མེ་ལྟར་འབར། །མིག་སྨན་མདོག་ཅན་འཇོལ་བེར་སྐུ་ལ་གསོལ། །སྦ་འཁར་ཞིང་དབྱུག་བསྣམས་ནས་དྲེལ་ནག་ཆིབས། །ནུབ་ཕྱོགས་གསུང་གི་རྒྱལ་པོ་ཁྱོད་ལ་བསྟོད། །དགྲ་ལྷའི་རྒྱལ་པོ་ཞལ་གསུམ་མི་བོ་ཆེ། །དར་དཀར་རལ་ག་ཞིང་དང་སྟག་ཤམ་དཀྲིས། །ལྕགས་ཀྱུ་མདའ་རལ་སྤུ་གྲི་འབར་བ་དང་། །གཞུ་དང་བེར་ག་བསྣམས་ནས་སེང་གེ་ཆིབས། །བྱང་ཕྱོགས་ཕྲིན་ལས་རྒྱལ་ཆེན་ཁྱོད་ལ་བསྟོད། །ཨིནྡ་ནི་ལའི་མདོག་འདྲ་ཁྲོ་མོའི་སྐུ། །མཐིང་ནག་བེར་དང་ཞིང་ཆེན་གཡང་གཞི་གསོལ། །ལྕགས་ཀྱུ་ཞགས་པ་བསྣམས་ནས་ཡབ་ལ་འདུད། །ཡུམ་ཆེན་ཤནྟིང་རོ་ཟན་མ་ལ་བསྟོད། །ཤིན་ཏུ་མི་བཟད་དབྱར་གྱི་ཆར་སྤྲིན་མདོག །གངས་རིའི་མདོག་ཅན་འཇོལ་བེར་སྐུ་ལ་གསོལ། །དམ་ཤིང་བྷནྡྷ་ཁྲག་གི་བཀང་བ་བསྣམས། །ཡུམ་ཆེན་བདུད་མོ་རོ་ལངས་མ་ལ་བསྟོད། །ནག་མོ་མི་སྲུན་ཤིན་ཏུ་ཁྲོ་བོའི་སྐུ། །རལ་གྲི་མདུང་དང་ཤིནྟི་ཏྲི་ཤུལ་བསྣམས། །མཐིང་ནག་བེར་གསོལ་བོང་བུ་གྭ་བ་ཆིབས། །ཡུམ་ཆེན་གསེར་གྱི་སྤུ་གྲི་མ་ལ་བསྟོད། །པདྨ་ར་གའི་མདོག་ཅན་ཁྲོ་མོའི་སྐུ། །ལེ་བརྒན་མདངས་འཛིན་འཇོལ་བེར་སྐུ་ལ་གསོལ། །དམ་ཤིང་དུང་དམར་ཁྲག་གི་བཀང་བ་བསྣམས། །ཡུམ་ཆེན་འཛིན་བྱེད་པདྨ་སྐྱེས་ལ་བསྟོད། །ཆར་སྤྲིན་མདོན་ཅན་ཁྲོ་མོའི་ཚུལ་འཆང་མ། །མཐིང་ནག་བདུད་ཀྱི་སློག་པ་སྐུ་ལ་གསོལ། །དམ་ཤིང་བྷནྡྷ་ཁྲག་གིས་བཀང་བ་བསྣམས། །ཡུམ་ཆེན་བདུད་བཟའ་སྨིན་དཀར་མ་ལ་བསྟོད། །བཻཌཱུར་མདོག་ཅན་རབ་ཏུ་གཏུམ་པའི་སྐུ། །ལྗང་ནག་དར་གྱི་བེར་ཆེན་སྐུ་ལ་གསོལ། །དར་ནག་རུ་མཚོན་ཕྱར་ཞིང་སེང་གེ་ཆིབས། །ཐུགས་ཀྱི་བློན་པོ་སྲོག་བདག་བྱ་ར་བསྟོད། །ནམ་མཁའི་མདོག་ཅན་ཤིན་ཏུ་ཁྲོས་པའི་སྐུ། །མཐིང་ནག་དར་གྱི་བེར་ཆེན་སྐུ་ལ་གསོལ། །གནམ་ལྕགས་འབར་བའི་རྡོ་རྗེ་དགྲ་ལ་འཕེན། །སྐུ་ཡི་བློན་པོ་བྱ་ཁྲི་མིག་གཅིག་བསྟོད། །ཆར་སྤྲིན་མདོག་ཅན་མི་བསྲུན་ཁྲོ་བོའི་སྐུ། །དར་ནག་བེར་གསོལ་གྲི་གུག་ཐོད་ཁྲག་བསྣམས། །མིག་སྨན་མདོག་ཅན་ཤུགས་ལྡན་དྲེལ་ནག་ཆིབས། །ཡོན་ཏན་བློན་པོ་བྱ་རྒོད་ཐང་ནག་བསྟོད། །རབ་འཇིགས་དུས་མཐའི་མེ་ཡི་ཕུང་པོ་འདྲ། །དར་དམར་ཆོས་གོས་གསོལ་ཞིང་གསེར་ཤིང་དང་། །གསེག་ཤང་བསྣམས་ནས་རྔ་མོ་གྭ་བ་ཆིབས། །གསུང་གི་བློན་པོ་རྡོ་རྗེ་གྲགས་ལྡན་བསྟོད། །དུས་ཀྱི་མུན་པ་ལྟ་བུར་གནག་པའི་སྐུ། །མཐིང་ནག་དར་གྱི་རལ་ག་སྐུ་ལ་གསོལ། །གྲི་གུག་བསྣམས་ཤིང་ཤུགས་ལྡན་དྲེལ་ནག་ཆིབས། །ཕྲིན་ལས་བློན་པོ་པུ་ཏྲ་ནག་པོ་བསྟོད། །པད་དཀར་མདོག་ཅན་ཡིད་འོང་གཞོན་ནུའི་སྐུ། །དར་དམར་བེར་དང་ཤེལ་གྱི་ཕྲེང་བ་གསོལ། །ཕྱག་གཉིས་སྡིག་འཛུབ་ཟངས་གྲི་འདེབས་པའི་ཚུལ། །ཐུགས་ཀྱི་སྤྲུལ་པ་ཆེན་པོ་ཁྱོད་ལ་བསྟོད། །དུང་མདོག་དགྲ་བཅོམ་གཞོན་ནུ་མཛེས་པའི་སྐུ། །མཚམས་སྤྲིན་ཞུན་མའི་མདངས་འཛིན་ཆོས་གོས་གསོལ། །གསེག་ཤང་གསེར་གྱི་སྤུ་གྲི་འབར་བ་བསྣམས། །སྐུ་ཡི་སྤྲུལ་པ་ཆེན་པོ་ཁྱོད་ལ་བསྟོད། །མཐིང་ནག་རབ་ཁྲོས་གར་དགུའི་ཉམས་དང་ལྡན། །དཔའ་བརྟུལ་ཆེན་པོ་སྟག་གི་སློག་པ་གསོལ། །ཞིང་དང་སྤྱང་ཀིའི་རྒྱལ་མཚན་དགྲ་ལ་ཕྱར། །གསུང་གི་སྤྲུལ་པ་ཆེན་པོ་ཁྱོད་ལ་བསྟོད། །མིག་སྨན་མདོག་ཅན་མི་སྡུག་ཁྲོ་བོའི་སྐུ། །སྐུ་ལ་ཞིང་དང་སྦྲུལ་གྱི་ཆུན་པོས་བརྒྱན། །ཟ་བྱེད་སྤྱང་ཀི་སྟག་གི་རྒྱལ་མཚན་ཕྱར། །ཕྲིན་ལས་སྤྲུལ་པ་ཆེན་པོ་ཁྱོད་ལ་བསྟོད། །རྡོ་རྗེ་ཐོག་འབེབས་ཁྱུང་ཆེན་ཀླུ་འབྲུག་འདུལ། །ལྷ་ཡི་དགེ་བསྙེན་མ་ཧཱ་ཀ་ལ་དཔལ། །མགོན་པོ་ནག་པོ་བྱ་རྒོད་ཐང་ནག་དང་། །སྲོག་བདག་རྔམས་པ་དམག་དཔོན་ཚོགས་ལ་བསྟོད། །རྒྱལ་མཚན་རྣམ་དགུ་ཕྱར་བའི་ལས་བྱེད་དང་། །གཡས་གཡོན་མདུན་རྒྱབ་རུ་འདྲེན་རྣམ་པ་བཞི། །གར་མཁན་སྟག་ཆས་གཟིག་ཆས་ཚོགས་རྣམས་དང་། །ལས་བྱེད་དྲེགས་པའི་འཁོར་ཚོགས་བཅས་ལ་བསྟོད། །ནམ་མཁའ་ས་དང་བར་སྣང་ཁྱབ་པ་ཡི། །འཁོར་ཚོགས་རྒྱ་མཚོའི་ཚོགས་ལ་བསྟོད་པར་བགྱི། །ཕྲིན་ལས་བཅོལ་བ་ནི། ཧཱུྃ། དཀྱིལ་འཁོར་རྒྱ་མཚོའི་ཁྱབ་བདག་པདྨ་འབྱུང་། །སྔོན་བྱོན་རིག་འཛིག་གྲུབ་པའི་ཚོགས་རྣམས་ཀྱིས། །དབང་བསྐུར་དམ་བཞག་གསང་བའི་གཉེར་གཏད་པ། །ཇི་ལྟར་ཞལ་བཞེས་ཐུགས་དམ་རྗེས་དགོངས་ཏེ། །སྔ་འགྱུར་རྒྱལ་བའི་བསྟན་པ་རིན་པོ་ཆེ། །ཕྱོགས་དུས་ཀུན་ཏུ་དར་ཞིང་རྒྱས་པ་དང་། །དེར་འཛིན་ལུང་རྟོགས་བསྟན་འཛིན་ཚོགས་རྣམས་ཀྱང་། །ཟླ་བ་ཡར་གྱི་ངོ་ལྟར་འཕེལ་བར་མཛོད། །མཁའ་མཉམ་མ་གྱུར་འགྲོ་བ་མཐའ་དག་ཀུན། །ཕྱི་ནང་ཉེར་འཚེའི་རིགས་རྣམས་ཀུན་ཞི་ཞིང་། །དགེ་བཅུའི་འབྱོར་བ་རྒྱ་མཚོས་ཀུན་ཕྱུག་ཅིང་། །འཇིག་རྟེན་ཁམས་ཀྱི་རྒུད་པ་ཀུན་ཞི་ནས། །སྣོད་བཅུད་ལེགས་ཚོགས་ཐམས་ཅད་རབ་འཕེལ་ཤིང་། །རྫོགས་ལྡན་དཔལ་གྱིས་མངོན་པར་མཐོ་བར་མཛོད། །ཁྱད་པར་བདག་ཅག་འཁོར་དང་བཅས་པ་ཀུན། །ཕྱི་ནང་མི་མཐུན་རྐྱེན་ངན་ཀུན་ཞི་ཞིང་། །ཚེ་དང་བསོད་ནམས་སྟོབས་དཔལ་ལོངས་སྤྱོད་དང་། །ཉམས་དང་རྟོགས་པའི་རྩལ་ཤུགས་རྒྱས་པར་མཛོད། །ས་གསུམ་སྐྱེ་རྒུའི་ཚོགས་དང་དེ་དག་གི །འབྱོར་བ་རྒྱ་མཚོ་དབང་དུ་འདུ་བ་དང་། །བདག་ལ་གནག་པའི་ནག་ཕྱོགས་བདུད་སྡེའི་ཚོགས། །རྒོལ་ངན་མཐའ་དག་རབ་ཏུ་ཞི་བར་མཛོད། །སྣ་ཚོགས་ཕྲིན་ལས་རྣམ་བཞིའི་རོལ་གར་གྱིས། །མཁའ་མཉམ་འགྲོ་བའི་སེམས་ཅན་མ་ལུས་པ། །ཇི་སྲིད་བྱང་ཆུབ་སྙིང་པོ་མ་ཐོབ་པར། །སྡོང་གྲོགས་ཕྲིན་ལས་གཡེལ་བ་མེད་པར་མཛོད། །ཅེས་རྒྱལ་ཆེན་སྐུ་ལྔའི་ཕྲིན་ལས་འདི་ཉིད་ལྕགས་ཕོ་སྤྲེལ་ལོའི་ཟླ་བ་གསུམ་པའི་ཡར་ཚེ་བཟང་པོར་རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེས་འདན་སེང་གེ་གནམ་རྫོང་གི་ཉེ་ཞོལ་དུ་བྲིས་པ་དགེའོ།། །།