རྒྱལ་ཆེན་རྡོ་རྗེ་གྲགས་ལྡན་གྱི་བསྐང་གསོལ་འདོད་རྒུའི་སྤྲིན་ཕུང་ཞེས་བྱ་བ་བཞུགས་སོ།།

རྒྱལ་ཆེན་རྡོ་རྗེ་གྲགས་ལྡན་གྱི་བསྐང་གསོལ་འདོད་རྒུའི་སྤྲིན་ཕུང་ནི། སྐྱེ་འགག་སྤྲོས་བྲལ་ཆོས་དབྱིངས་ཀློང་ཡངས་ལས། །ཁྲོ་རྒྱལ་ཡོངས་ཀྱི་རྗེ་བཙུན་རྟ་མཆོག་དཔལ། །གང་དང་དབྱེར་མེད་དྲིན་ཆེན་རྡོ་རྗེ་འཆང་། །འཇམ་མགོན་བླ་མ་སྤྱི་བོའི་རྒྱན་དུ་ཤར། །དེ་ལ་འདིར་དགྲ་ལྷ་ཆེན་པོ་རྡོ་རྗེ་གྲགས་ལྡན་གྱི་གསོལ་མཆོད་འདོད་པས། རང་མཐུན་གྱི་གནས་སུ་ཅི་འབྱོར་པའི་མཐུན་རྫས་མཆོད་གཏོར་སྤྱན་གཟིགས་ཕྱི་ནང་གསང་བའི་བླ་རྡོ་བརྟེན་རྫས་སྣ་ཚོགས་པ་བཤམས་ལ། སྔགས་དྲུག་ཕྱག་དྲུག་གིས་བྱིན་གྱིས་བརླབས། རང་ཉིད་ཡི་དམ་ལྷ་མཆོག་ཧེ་རུ་ཀར་གསལ་བཞིན་པའི་ངང་ནས། ཧྲཱིཿ རྒྱལ་ཀུན་གསུང་གི་ཕྲིན་ལས་གཅིག་བསྡུས་པ། །དབང་ཆེན་རྟ་མཆོག་པདྨ་ཧེ་རུ་ཀའི། །ཡེ་ཤེས་ཐུགས་རྗེའི་རྣམ་རོལ་ལས་བྱུང་བ། །དགྲ་ལྷའི་རྒྱལ་པོ་རྡོ་རྗེ་གྲགས་ལྡན་རྩལ། །གསང་བའི་ཡུམ་ཆེན་གཟི་བརྗིད་ཆེན་མོ་དང་། །སྤྲུལ་པ་བཀའ་ཡི་བློན་པོ་རུ་འདྲེན་ཚོགས། །སྣང་སྲིད་ལྷ་སྲིན་སྡེ་བརྒྱད་ཚོགས་དང་བཅས། །སྒྲུབ་པའི་རིག་འཛིན་རྣལ་འབྱོར་བདག་ཅག་གིས། །རྩེ་གཅིག་མོས་པའི་ཡིད་ཀྱིས་བསྐུལ་བའི་ཕྱིར། །མཚམས་སྤྲིན་མདངས་འཛིན་དར་གྱི་གཡབ་མོ་དང་། །སྤོས་དཀར་བསྲེགས་པའི་དུད་སྤྲིན་ཕྱོགས་བཅུར་འཕྲོ། །རྐང་གླིང་བཤུག་པའི་བརྡ་ཡིས་བསྐུལ་བའི་ཚེ། །སྔོན་གྱི་དམ་ཚིག་གཉན་པོ་ཉེར་དགོངས་ལ། །རྡོ་རྗེ་གདན་དང་བལ་ཡུལ་ཡང་ལེ་ཤོད། །བྷ་ཏ་ཧོར་གྱི་སྒོམ་གྲྭ་ཆེན་པོ་དང་། །དཀོར་མཛོད་གླིང་སོགས་གར་བཞུགས་གནས་མཆོག་ནས། །རྒྱལ་ཆེན་འཁོར་དང་བཅས་པ་མ་ལུས་ཀུན། །སྐད་ཅིག་དབང་གིས་གནས་འདིར་གཤེགས་སུ་གསོལ། །ཡིད་འོང་རིན་ཆེན་ཕོ་བྲང་མཛེས་པའི་ནང་། །ཁྲག་ཞག་རྒྱ་མཚོ་པདྨ་ཉི་ཟླའི་སྟེང་། །དགྲ་བགེགས་ཕོ་མོ་བསྣོལ་བའི་གདན་ཁྲི་ལ། །དགྱེས་ཤིང་གཡོ་མེད་བརྟན་པར་བཞུགས་སུ་གསོལ། །རྒྱལ་བའི་བསྟན་དང་དེར་འཛིན་སྐྱོང་བ་ལ། །ལོག་པར་ལྟ་བའི་དམ་སྲི་འབྱུང་པོའི་ཚོགས། །འདུལ་ཕྱིར་སྲིན་པོ་ཁྲོས་པའི་ཚུལ་སྟོན་པའི། །གནོད་སྦྱིན་དགྲ་ལྷའི་གཙོ་ལ་ཕྱག་འཚལ་ལོ། །ཁྱེད་ཀྱི་ཐུགས་དམ་བསྐང་བའི་དམ་རྫས་ནི། །ཁྲག་ཞག་མཆོད་ཡོན་རྦ་རླབས་དྲག་ཏུ་འཁྲུགས། །དམ་ཉམས་བསྒྲལ་བའི་དབང་ལྔའི་མེ་ཏོག་བཀྲ། །ཤ་ཆེན་སྤོས་དཀར་དུད་སྤྲིན་མཁའ་དང་མཉམ། །ཞུན་ཆེན་སྒྲོན་མེ་དུས་མཐའི་མེ་ལྟར་འབར། །མཁྲིས་པའི་དྲི་ཆབ་རྒྱ་མཚོ་མེ་རེ་རེ། །ཤ་ཁྲག་རུས་པའི་ཞལ་ཟས་ལྷུན་པོར་སྤུངས། །རྐང་གླིང་ཐོད་རྔའི་རོལ་མོའི་མཆོད་སྤྲིན་གྱིས། །རྡོ་རྗེ་གྲགས་ལྡན་འཁོར་བཅས་ཐུགས་དམ་བསྐང་། །ཅང་ཤེས་རྟ་མཆོག་སྤྲིན་གྱི་ཤུགས་ཅན་དང་། །གནམ་ལྕགས་འབར་བའི་རྭ་གདེང་གཡག་རོག་ཞོལ། །རིན་ཆེན་རྒྱན་ལྡན་ཤེལ་སྒོང་ནག་པོའི་མདངས། །འདོད་འཇོའི་བ་མོ་སེང་གེ་གླང་ཆེན་དོམ། །སྟག་གཟིག་དྲེད་དང་བོང་བུ་སྤྲ་སྤྲེལ་ཚོགས། །བྱ་རིགས་སྣ་ཚོགས་ཟློས་གར་ཅིར་ཡང་བསྒྱུར། །གར་མཁན་རུ་འདྲེན་སྣང་བརྙན་སྤྲིན་ལྟར་གཏིབ། །ཉི་ཟླ་རི་རབ་གླིང་བཞི་གླིང་ཕྲན་དང་། །རིན་ཆེན་སྣ་བདུན་བཀྲ་ཤིས་རྫས་རྟགས་བརྒྱད། །དགྱེས་བྱེད་མཆོད་སྤྲིན་རྒྱ་མཚོའི་ཚོགས་རྣམས་ཀྱིས། །རྡོ་རྗེ་གྲགས་ལྡན་འཁོར་བཅས་ཐུགས་དམ་བསྐང་། །ཁྱད་པར་ཁྱོད་དང་མཐུན་པའི་དམ་རྫས་ནི། །བགེགས་དཔུང་ཐལ་བར་བརླག་བྱེད་རུ་མཚོན་བརྗིད། །དམ་ཉམས་འཆིང་བར་བྱེད་པའི་བཙན་གྱི་ཞགས། །བསེ་ཁྲབ་བསེ་རྨོག་རིན་ཆེན་རུས་པའི་རྒྱན། །དགྲ་བཅོམ་སྣམ་སྦྱར་སྟག་ཤམ་གོ་རྨོག་ཁྲབ། །དྲི་མེད་པཉྩ་ལི་ཀའི་འཇོལ་བེར་དང་། །ཡིད་འཕྲོག་ཟ་འོག་ལྡིང་གུར་སྣ་ཚོགས་པ། །གཞན་ཡང་རྨ་བྱ་སེང་གེ་སྟག་དང་དོམ། །དྲེད་གཟིག་གཅན་གཟན་རྒྱལ་མཚན་མཛེས་པ་ལ། །འདོད་རྒུའི་བསམ་འཕེལ་ནོར་བུའི་ཏོག་གིས་སྤྲས། །རིན་ཆེན་གདུགས་མཛེས་བླ་བྲེ་བ་དན་གཡོ། །ཡོ་བྱད་མཁོ་དགུ་མཐུན་པའི་དམ་རྫས་ཀྱིས། །རྡོ་རྗེ་གྲགས་ལྡན་འཁོར་བཅས་ཐུགས་དམ་བསྐང་། །འབྲུ་ནག་ཕྱེ་མར་རིན་ཆེན་སྣ་ཚོགས་སྐྱེམས། །ཁྲག་ཆང་བདུད་རྩི་སྦྱར་བའི་དཔལ་བཤོས་དང་། །ལྷ་ཡི་ཕོ་བྲང་རྣམ་པར་རྒྱལ་བྱེད་ལ། །འགྲན་པའི་ཁང་བརྩེགས་ཡིད་འོང་ལྟ་ན་སྡུག །རྣམ་དག་རྩ་བརྒྱད་སྟོང་སྦྱར་ཨ་མྲྀ་ཏ། །ཞིང་བཅུ་བསྒྲལ་བའི་རཀྟའི་ཞམ་ཆུ་འབེབ། །གཙང་སྦྱར་གསེར་སྐྱེམས་ཕུད་རྒོད་བཏུང་བའི་རིགས། །ཇི་སྙེད་རྒྱ་མཚོ་ཆེན་པོ་ལྟ་བུ་བསྐྱིལ། །མདོར་ན་ཁྱེད་དང་མཐུན་པའི་དམ་རྫས་ནི། །དངོས་བཤམས་ཡིད་ཀྱིས་རྣམ་རོལ་ལས་བྱུང་བ། །ངོ་མཚར་ཀུན་ཏུ་བཟང་པོའི་མཆོད་སྤྲིན་ལྟར། །ནམ་མཁའ་གང་བར་སྤྲུལ་ཏེ་འབུལ་ལགས་ན། །དགྱེས་པའི་ཚུལ་གྱིས་མཆོད་པ་འདི་བཞེས་ལ། །རྡོ་རྗེ་གྲགས་ལྡན་འཁོར་བཅས་ཐུགས་དམ་བསྐང་། །དེ་ལྟར་ཐུགས་དམ་བསྐང་བའི་བྱིན་བརླབས་ཀྱིས། །སྒྲུབ་པའི་རིག་འཛིན་རྣལ་འབྱོར་བདག་ཅག་གིས། །སོ་ཐར་བྱང་སེམས་རིག་པ་འཛིན་པ་ཡི། །སྡོམ་དང་དམ་ཚིག་བསླབ་བྱ་ཡལ་བ་རྣམས། །དམིགས་མེད་ཆོས་དབྱིངས་ངང་དུ་བཤགས་པར་བགྱི། །ཁྱད་པར་དགྲ་ལྷའི་རྒྱལ་པོ་འཁོར་བཅས་ཀྱིས། །སངས་རྒྱས་གཉིས་པ་པདྨ་ཐོད་ཕྲེང་གི །བསྟན་དང་དེ་འཛིན་སྐྱོང་བའི་གང་ཟག་ལ། །མི་མཐུན་གནོད་པའི་ཚོགས་རྣམས་མཐའ་དག་ཀུན། །མིང་ཙམ་མེད་པར་ཞི་བའི་ཕྲིན་ལས་མཛོད། །རྣལ་འབྱོར་བདག་གི་བརྒྱུད་འཛིན་བུ་སློབ་དང་། །དཀོར་ཆ་ལོངས་སྤྱོད་ཇི་སྙེད་ཡོད་པ་ཀུན། །དགྲ་ལྷའི་རྒྱལ་པོ་ཁྱོད་ལ་གཉེར་གཏད་པས། །རྣམ་ཀུན་རྟག་ཏུ་མ་གཡེལ་མེལ་ཚེ་གྱིས། །མདོར་ན་བདག་གི་ཡིད་ལ་གང་འདོད་པ། །འབད་མེད་ལྷུན་གྱིས་གྲུབ་པའི་ཕྲིན་ལས་མཛོད། །ཅེས་བརྗོད་ཅིང་མཆོད་གཏོར་གཙང་སར་བསྐྱལ་ལོ། །ཞེས་པ་འདི་ནི་གནོད་སྦྱིན་དགྲ་ལྷའི་རྒྱལ་པོ་རྡོ་རྗེ་གྲགས་ལྡན་འདི་ཉིད་རྣལ་འབྱོར་བདག་ལ་ལུས་དང་གྲིབ་མ་བཞིན་དུ་འགྲོགས་ཏེ་རྟག་ཏུ་དགའ་ཞིང་བརྩེ་བའི་རྣམ་འགྱུར་དངོས་ཉམས་རྨི་ལམ་མཐའ་དག་ཏུ་ཡང་ཡང་སྟོན་པའི་རྒྱལ་ཆེན་འདི་ཉིད་ཀྱི་བསྐང་གསོལ་འདོད་རྒུའི་སྤྲིན་ཕུང་ཞེས་བྱ་བ་འདི་ནི། རུ་དམ་ཨོ་རྒྱན་བསམ་གཏན་གླིང་གི་ཕོ་བྲང་འཆི་མེད་གྲུབ་པའི་དགའ་ཚལ་དུ་ཤིང་ཕོ་རྟ་ལོའི་ཟླ་ཚེས་དགེ་བར་རྫོགས་སྤྲུལ་ལྔ་པའི་མིང་འཛིན་པ་པདྨ་ཐེག་མཆོག་བསྟན་འཛིན་གྱིས་བྲིས་པའོ། །