གསུང་གི་བློན་པོ་རྡོ་རྗེ་གྲགས་ལྡན་གྱི་གསོལ་མཆོད་འདོད་འབྱུང་ནོར་བུའི་ཕྲེང་བ་ཞེས་བྱ་བ་བཞུགས་སོ།།

ཨོཾ་སྭ་སྟི། ཆོས་ཉིད་ཞི་ལས་མ་གཡོས་ཀྱང་། །ལོག་པར་འདྲེན་པའི་དམ་སྲིའི་ཚོགས། །མ་རུང་འདུལ་བའི་གཤེད་པོ་ཆེ། །རྟ་མཆོག་དཔལ་ལ་ཕྱག་འཚལ་བསྟོད། །དེ་ལ་འདིར་ལྷ་མཆོག་དགྲ་ལྷའི་རྒྱལ་པོ་རྡོ་རྗེ་གྲགས་ལྡན་འདི་ཉིད་ཀྱི་མཁོ་བའི་ཡོ་བྱད་རྣམས་འདུ་བྱས་ལ། རང་ཉིད་རྟ་མཆོག་རོལ་པའི་ང་རྒྱལ་དང་མ་བྲལ་བའི་ངང་ནས། ཧྲཱིཿ དབང་ཆེན་པདྨ་ཧེ་རུ་ཀའི། །བཀའ་ཡི་ལས་མཁན་མཐུ་བོ་ཆེ། །མཐུ་ཆེན་དགྲ་ལྷ་ཡོངས་ཀྱི་གཙོ། །གསུང་བློན་རྡོ་རྗེ་གྲགས་ལྡན་ནི། །དུས་མཐའི་མེ་ཡི་ཕུང་པོ་འདྲ། །འོད་ཟེར་ཉི་མ་འབུམ་གྱི་གཟི། །མི་བཟད་གར་དགུའི་ཉམས་དང་ལྡན། །ཛཿབྷྱོ་རུ་ལུའི་གད་རྒྱངས་ཅན། །ཐུགས་ནི་སྙིང་རྗེའི་ཉམས་དང་ལྡན། །སྒྲུབ་ལ་རྗེས་སུ་ཆགས་པ་དང་། །སྡང་བའི་དགྲ་བོ་མཐའ་དག་ལ། །མི་བཟད་ཁྲོ་གཏུམ་རྔམ་པའི་ཚུལ། །དབང་དྲག་ཁྲོས་པའི་ཧེ་རུ་ཀ །བརྗིད་ལྡན་ཟ་འོག་དམར་ཁྲའི་བེར། །རིན་ཆེན་རུས་པའི་རྒྱན་གྱིས་སྤྲས། །བསེ་ཁྲབ་བསེ་རྨོག་རུ་དར་ཅན། །རྒྱལ་མཚན་རྣམ་དགུའི་སྐུ་ལ་བརྒྱན། །ཞབས་ལ་སག་ལྷམ་ཡུ་རིང་གསོལ། །དགྲ་བགེགས་འགུག་ཅིང་བསྒྲལ་བའི་ཕྱིར། །ཕྱག་ན་རུ་མཚོན་བཙན་ཞགས་བསྣམས། །ཞབས་གཉིས་གཡས་བརྐྱང་གཡོན་བསྐུམ་གྱིས། །མེ་དཔུང་འབར་བའི་ཀློང་ན་བཞུགས། །ཡུམ་ཆེན་གཟི་བརྗིད་ཆེན་མོ་ནི། །དཀར་གསལ་ཡིད་འོང་མཛེས་མའི་ལུས། །རྩེ་བེར་ཉིས་བརྩེགས་སྐུ་ལ་གསོལ། །མེ་ཏོག་སྣ་ཚོགས་ཐོད་དུ་བཅིངས། །རིན་ཆེན་སྣ་ལྔའི་རྒྱན་གྱིས་སྤྲས། །ཕྱག་ན་ཁ་ཊྭཱྃ་རྩེ་གསུམ་དང་། །ཐོད་པ་བདུད་རྩིས་བཀང་བ་བསྣམས། །ཡབ་ལ་རྗེས་སུ་ཆགས་པའི་ཚུལ། །རོལ་དུ་འཕར་སྤྱང་བྱ་འུག་ཁྲིད། །ཕོ་ཉ་རླུང་ནག་འཚུབས་མ་དང་། །ལྷ་སྲིན་སྡེ་བརྒྱད་ཕོ་ཉར་འགྱེད། །གནམ་ལྕགས་ཐོག་མདའ་ཤ་ར་ར། །སྤྲུལ་པ་རབ་བྱུང་ཆ་བྱད་ཅན། །ཆོས་གོས་དར་ཞུ་སེར་པོ་གསོལ། །ཕྱག་ན་བིང་དབྱུག་ལྕགས་ཕྲེང་བསྣམས། །རྔམ་བརྗིད་ཕག་ནག་སྟེང་ན་འགྱིང་། །བློན་པོ་བདུད་ནག་མི་སྡུག་པ། །མི་བཟད་རལ་པ་གྱེན་དུ་བརྫེས། །ཕྱག་ན་དར་མདུང་རྒྱུ་ཞགས་བསྣམས། །དར་དམར་བེར་ཆེན་སྐུ་ལ་གསོལ། །བཀའ་ཉན་ལས་བྱེད་ཚུལ་དུ་བཞུགས། །རུ་འདྲེན་སྡེ་བཞིའི་ཚོགས་རྣམས་བཅས། །ལྷ་སྲིན་སྡེ་བརྒྱད་དམག་དཔུང་ནི། །ཇི་ལྟར་ལྷ་མིའི་ཁྲོམ་ཚོགས་ལྟར། །ཉི་མའི་ཟེར་གྱི་རྡུལ་འཁྲིགས་བཞིན། །ནམ་མཁའི་ཁམས་ཀུན་གང་ནས་ཀྱང་། །མཁའ་ལ་གློག་ཕྲེང་ཇི་བཞིན་དུ། །སྐད་ཅིག་ཙམ་གྱིས་འདིར་གཤེགས་ལ། །དུར་ཁྲོད་རོལ་པའི་གཞལ་ཡས་ནས། །པད་ཉི་དགྲ་བགེགས་བསྣོལ་བའི་སྟེང་། །དགྱེས་ཤིང་བརྟན་པར་བཞུགས་སུ་གསོལ། །དང་བའི་ཡིད་ཀྱིས་ཕྱག་འཚལ་ལོ། །ཁྱེད་དང་མཐུན་པའི་དམ་རྫས་ནི། །དངོས་འབྱོར་ཡིད་སྤྲུལ་ལས་བྱུང་བའི། །ངོ་མཚར་ཀུན་བཟང་མཆོད་པའི་སྤྲིན། །རབ་འབྱམས་ནམ་མཁའི་ཁམས་བཀང་ནས། །གུས་པའི་བློ་ཡི་འབུལ་ལགས་ན། །དགྱེས་པའི་ཚུལ་གྱིས་བཞེས་སུ་གསོལ། །ཁམས་གསུམ་ཀུན་ལས་རྒྱལ་བ་དང་། །དྲག་སྔགས་འབྲུག་སྟོང་ལྡིར་བ་བཞིན། །ཆོས་དབྱིངས་ངང་ལས་སྐུར་བཞེངས་པའི། །རྣམ་པ་ཀུན་ཏུ་ཁྱོད་ལ་བསྟོད། །ཁྱོད་ལ་གསོལ་དང་མཆོད་པའི་མཐུས། །སྔར་བཅོལ་ལས་ཀྱི་གཏང་རག་དང་། །ད་བཅོལ་ལས་ཀྱི་འཕྲིན་ལས་ནི། །སྔོན་ལས་འཕྲལ་རྐྱེན་ནད་གདོན་བགེགས། །མེ་ཆུ་དུག་མཚོན་གནོད་སྦྱིན་དང་། །རྒྱལ་པོའི་ཆད་པ་འབྱུང་བཞིའི་དགྲ། །འཇིགས་བརྒྱད་ཞི་བའི་ཕྲིན་ལས་མཛོད། །ཚེ་དཔལ་བསོད་ནམས་སྙན་གྲགས་རྒྱས། །དབང་ཐང་རླུང་རྟ་དགུང་དུ་བསྐྱེད། །རྒྱན་དང་རྩོད་པ་ཀུན་ལས་རྒྱལ། །ཡར་ངོའི་ཟླ་བ་ལྟ་བུར་མཛོད། །རང་རང་ཡིད་ལ་གང་འདོད་དང་། །མདོར་ན་ཁམས་གསུམ་སྲིད་གསུམ་ཀུན། །ཡིད་ལ་དྲན་པ་ཙམ་གྱིས་ཀྱང་། །ཐམས་ཅད་དབང་དུ་སྡུད་པར་མཛོད། །སྔོན་གྱི་ལས་དང་འཕྲལ་གྱི་རྐྱེན། །བདག་ལ་བརྣག་པའི་བསམ་སྦྱོར་གྱིས། །མི་ཁ་བྲ་མཆུ་བྱུར་ངན་དང་། །ཀེག་དང་ཐན་ལྟས་ངན་པ་སོགས། །བྱད་ཕུར་རྦོད་གཏོང་ཕྲ་མེན་མཐུ། །ལོག་པར་འདྲེན་པའི་བདུད་སྡེའི་ཚོགས། །གཟུགས་ཅན་དགྲ་དང་གཟུགས་མེད་བགེགས། །བཀྲ་མི་ཤིས་པའི་དངོས་པོ་ཀུན། །མདོར་ན་མི་མཐུན་མཐའ་དག་རྣམས། །ཐལ་བར་བརླག་པའི་ཕྲིན་ལས་མཛོད། །དེང་ནས་བྱང་ཆུབ་མ་ཐོབ་བར། །དགྲ་ལྷའི་རྒྱལ་པོ་ཁྱོད་ཉིད་ནི། །སྒྲུབ་པའི་རིག་འཛིན་བདག་ཅག་ལ། །དུས་དང་གནས་སྐབས་ཐམས་ཅད་དུ། །ལུས་དང་གྲིབ་མར་འགྲོགས་ནས་ཀྱང་། །ཉིན་གྱི་དུས་སུ་བྱ་ར་གྱིས། །མཚན་གྱི་དུས་སུ་མེལ་ཚེ་མཛོད། །བཅོལ་བའི་ལས་རྣམས་མཐའ་དག་ཀུན། །ཅི་བསམ་ཡིད་བཞིན་འགྲུབ་པ་དང་། །ཕན་བདེའི་དཔལ་ལ་སྤྱོད་པར་ཤོག །ཅེས་པ་འདི་ནི་ཡིག་ཐུབ་བསྟན་ནོར་བུ་དང་གད་ཐུབ་བསྟན་ནོར་འཕེལ་གཉིས་ནས་བསྐུལ་ངོར། ལྷ་མཆོག་འདི་ཉིད་ཀྱི་རྟགས་མཚན་མངོན་དུ་བྱུང་བ་རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེས་མགོན་ཁང་དབང་དྲག་རོལ་པ་ནས་མེ་སྦྲུལ་ཟླ་ཚེས་ལ་བྲིས་པ་དགེ་ལེགས་སུ་གྱུར་ཅིག །

་#div1 རྡོར་གྲགས་གསོལ་མཆོད།།

ཧཱུྃ། འཇིག་རྟེན་མཆོད་བསྟོད་དཀྱིལ་འཁོར་གྲུ་འཛིན་པའི། །དྲེགས་པའི་སྡེ་དཔོན་སུམ་ཅུའི་ནང་ཚན་ལས། །བེ་ཧར་རྒྱལ་པོ་སྐུ་ལྔ་གསང་ཡུམ་བཅས། །བློན་པོ་འཁོར་དང་བཅས་པ་ད་ཚུར་བྱོན། །ཁྱད་པར་དགྲ་ལྷ་སྐྱེས་གཅིག་གསུང་གི་རྒྱལ། །བློན་པོ་རྡོ་རྗེ་གྲགས་ལྡན་མཐུ་རྩལ་ཅན། །སྐུ་ལྔའི་རྣམ་རོལ་གཅིག་ཏུ་མ་ངེས་པར། །སྟོན་མཛད་སྤྲུལ་པའི་ཆོས་རྒྱལ་གནས་འདིར་གཤེགས། །ཁྲག་གི་སྒོ་ང་བདུན་ལས་ཉེར་བརྡོལ་བའི། །བཙན་རྒོད་དམག་དཔོན་འབར་བ་སྤུན་བདུན་དང་། །ཁྱད་པར་ཙིའུ་དམར་པོ་ཡང་ལེ་བེར། །ཕོ་ཉ་མངགས་བཞུགས་འཁོར་བཅས་གནས་འདིར་བྱོན། །དམར་ཆེན་གཏོར་མའི་རི་བོ་མཁའ་ལ་བསྙེགས། །ཁྲག་ཆང་བཏུང་བ་རྒྱ་མཚོ་ལྟ་བུར་འཁྱིལ། །ཕྱི་ནང་གསང་བའི་མཆོད་པ་འབུལ་ལགས་ན། །རོལ་གཅིག་ཁ་རཾ་ཁཱ་ཧི་ཞལ་དུ་བཞེས། །པདྨ་ཐོད་ཕྲེང་སོ་ཟུར་གནུབ་ཉང་སོགས། །སྔགས་འཆང་རྣམས་ཀྱི་ཁྲག་འཐུང་དཀྱིལ་འཁོར་དུ། །དབང་བསྐུར་དམ་ཚིག་གཉན་པོ་ཉེར་ཕབ་ནས། །ཐུབ་བསྟན་སྐྱོང་བའི་སྲུང་མར་བཀའ་བསྒོས་བཞིན། །མ་གཡེལ་མ་གཡེལ་སྔོན་གྱི་དམ་ཚིག་དགོངས། །གསང་བ་སྔགས་ཀྱི་དམ་ཚིག་རྒྱ་མ་དྲལ། །རྡོ་རྗེའི་རི་མོ་སྤྱི་བོའི་གཙུག་མ་ཡལ། །ལྕེ་ལ་བདུད་རྩིའི་རོ་མཆོག་མ་ཉམས་པར། །བཤད་སྒྲུབ་བསྟན་པ་ཡར་ངོའི་ཟླ་ལྟར་སྤེལ། །བསྟན་འཛིན་སྐྱེས་བུ་བླ་མཆོད་སྡེ་གཉིས་སྤེལ། །གངས་ལྗོངས་ཡུལ་འདིར་འཐབ་རྩོད་མུ་གེ་དང་། །དུས་ཀྱི་འཁྲུགས་པ་མ་ལུས་ཞི་བར་མཛོད། །དགེ་བཅུའི་དཔལ་ལྡན་བསམ་གཏན་ཆོས་གླིང་འདིའི། །ཆོས་སྲིད་ཟུང་དུ་འཕེལ་བའི་མངའ་ཐང་རྒྱས། །ཆབ་སྲིད་བརྟན་ཅིང་དབུ་འཕང་བཙན་པ་སོགས། །ཞི་རྒྱས་དབང་དྲག་ཕྲིན་ལས་མ་ལུས་སྒྲུབ། །