གསུང་གི་བློན་པོ་རྡོ་རྗེ་གྲགས་ལྡན་གྱི་ཕྲིན་ལས་དོན་གྲུབ་དགེ་ལེགས་ཀུན་འབྱུང་ཞེས་བྱ་བ་བཞུགས་སོ།།

ཧྲཱིཿ རང་མདུན་ཁྲག་ཞག་རྒྱ་མཚོ་འཁྱིལ་བའི་ཀློང་། །མི་རོ་རྟ་རོ་སྣ་ཚོགས་ལང་ལིང་གཡོ། །དམར་ནག་ཁྲག་ཞག་རྦ་རླབས་འཁྲུགས་པ་ལ། །ཆུ་གནས་སེམས་ཅན་སྣ་ཚོགས་ཁྱུགས་སེ་ཁྱུག །ཀེང་རུས་རུས་པའི་ཚོགས་ནི་རི་ལྟར་སྤུངས། །གསུར་ཆེན་དུད་པའི་ཚོགས་ནི་སྤྲིན་ལྟར་གཏིབས། །ལས་བྱེད་ཤན་པ་ཕོ་མོ་རེངས་སེ་རེང་། །འདབ་ཆགས་བྱ་རིགས་ཚོགས་ནི་བསམ་མི་ཁྱབ། །འཇིགས་ཤིང་སྐྱི་གཡའི་གནས་མཆོག་དམ་པ་འདིར། །དམར་ནག་གྲུ་གསུམ་འབར་བའི་དཀྱིལ་འཁོར་དབུས། །དགྲ་བགེགས་ཕོ་མོ་བསྣོལ་བའི་གདན་གྱི་སྟེང་། །སྣང་སྲིད་དྲེགས་པ་ཡོངས་ཀྱི་གཙུག་གི་རྒྱན། །དབང་ཆེན་རྟ་མཆོག་པདྨ་ཧེ་རུ་ཀའི། །ཐུགས་ཉིད་ཞི་བའི་ངང་ལས་མ་གཡོས་ཀྱང་། །མ་རུང་ལོག་འདྲེན་འདུལ་བའི་ལྷ་གཅིག་པུ། །གསུང་གི་བློན་པོ་རྡོ་རྗེ་གྲགས་ལྡན་ནི། །སྐུ་མདོག་དམར་པོ་པདྨ་རཱ་གའི་མདོག །ཉི་མ་འབུམ་གྱི་འོད་ཟེར་འཁྱུད་པ་ལྟར། །མི་བཟད་བཟོད་པར་དཀའ་བའི་ལང་ཚོ་ཅན། །འབར་བའི་སྐུ་མཆོག་དབང་ཕྱུག་ཧེ་རུ་ཀ །ཞལ་གཅིག་ཕྱག་གཉིས་ཞི་མ་ཁྲོ་ཡི་ཚུལ། །ཕྱག་གཡས་བསེ་ཡི་རུ་མཚོན་འཁའ་ལ་འཕྱར། །བདུད་བཞིའི་གཡུལ་ལས་རྒྱལ་བའི་བ་དན་བཏགས། །བསྟན་པའི་ཉི་མ་ཕྱོགས་བཅུར་རྒྱས་པར་མཛོད། །གཡོན་པས་བཙན་ཞགས་དམར་པོ་དགྲ་ལ་འདེབས། །མ་རུང་གནོད་བྱེད་བདུད་དཔུང་ཐལ་བར་བརླག །ཞལ་གདངས་གློག་དམར་ལྟ་བའི་ལྗགས་འདྲིལ་བ། །རྣོ་དབལ་མཆེ་བ་རྣམ་བཞི་གངས་ལྟར་གཙིགས། །འབར་བའི་ཁྲོ་གཉེར་ཆུ་ཡི་རླབས་བཞིན་འཁྲུགས། །སྡང་མིག་སྤྱན་ལས་འོད་ཟེར་སྐར་མདའ་འཕྲོ། །སྨ་ར་སྨིན་མ་ཨག་ཚོམ་མེ་ལྟར་འབར། །ཤངས་ནས་རྡོ་རྗེའི་རླུང་འཚུབས་ཐོག་ཆར་འབེབས། །དབུ་སྐྲ་དམར་སེར་གྱེན་དུ་བརྫེས་པ་ལ། །དམར་ནག་མེ་ཡི་ཚྭ་ཚྭ་སྐར་ལྟར་འཁྲུགས། །དབུ་ལ་བསེ་རྨོག་གསེར་གྱི་འོད་འཕྲོ་ཅན། །ཐོད་པ་སྐམ་པོ་ལྔ་ཡི་དབུ་བརྒྱན་ལ། །སྣ་ཚོགས་རིན་པོ་ཆེ་ཡི་རྒྱན་གྱིས་སྤྲས། །རབ་མཛེས་རིན་ཆེན་ཐོད་པའི་ཁང་བུའི་ནང་། །འབར་བ་ཁྲག་འཐུང་རིགས་ལྔའི་ལྷ་ཚོགས་བཞུགས། །རྡོ་རྗེ་ཕ་ལམ་གསེར་དངུལ་བཻཌཱུརྱ། །པདྨ་ར་ག་མར་གད་མུ་མེན་དང་། །ཨིནྡྲ་ནི་ལ་དུང་དང་བྱུ་རུ་གཡུ། །མུ་ཏིག་ཤེལ་སོགས་རིན་ཆེན་ཁྲ་ཚོམ་སྤྲས། །རྨོག་གི་དབུས་སུ་རྒྱལ་མཚན་བཙུགས་པ་ལ། །འདོད་འབྱུང་ཡིད་བཞིན་ནོར་བུའི་ཏོག་གིས་མཛེས། །ཕྱོགས་བཞིར་ཟ་འོག་སྣ་ལྔའི་རུ་དར་ལ། །རྒོད་ཆུང་ཐིལ་ཆུང་ལྔ་ལྔ་དག་གིས་བརྒྱན། །རྨོག་གི་མདུན་དུ་མིག་སྨན་མདོག་ཅན་ལ། །འོད་སྟོང་འཕྲོ་བའི་གསེར་གྱི་རལ་གྲིས་བརྒྱན། །གསང་གོས་ལྗང་གུ་རྒྱས་པའི་མདངས་ལྡན་མནབས། །ཟ་འོག་དམར་ཁྲའི་རྩེ་བེར་གཉིས་བརྩེགས་ལ། །རིན་ཆེན་གསེར་གྱི་རི་མོ་ཅིར་ཡང་བཀྲ། །དེ་སྟེང་གསེར་གྱི་རྡོ་རྗེ་གྲངས་མེད་ཀྱིས། །གཏམ་པའི་གོ་ཁྲབ་འོད་འབར་སྐུ་ལ་གསོལ། །རིན་ཆེན་སྣ་ཚོགས་རུས་པའི་རྒྱན་གྱིས་སྤྲས། །སྐུ་ཡི་རྒྱབ་ཏུ་རྒྱལ་མཚན་རྣམ་དགུ་ལ། །འདོད་འབྱུང་རིན་ཆེན་ནོར་བུའི་ཏོག་གིས་མཛེས། །མཚམས་སུ་ཟ་འོག་རྣམ་ལྔའི་རུ་དར་བཅས། །ཐུགས་རྒྱན་མེ་ལོང་ཐུགས་སྲོག་ཧྲཱིཿཡིས་མཚན། །ཞབས་གཉིས་གཡས་བརྐྱང་གཡོན་བསྐུམ་དོར་སྟབས་ཅན། །སྭག་ལྷམ་ཡུ་རིང་འཇའ་རིས་འཁྱིལ་བ་གསོལ། །གཡོན་དུ་ཡུམ་ཆེན་གཟི་བརྗིད་ཆེན་མོ་ནི། །བཅོ་ལྔའི་ཟླ་ལྟར་གཞོན་ནུའི་ལང་ཚོ་ཅན། །རེག་ན་བདེ་བའི་དཔལ་སྟེར་ཡིད་འོང་མ། །མཐིང་ནག་བེར་ཆེན་གསེར་གྱི་ཧ་རིས་ཅན། །དེ་སྟེང་དར་དཀར་གོ་ཟུ་གཡང་ལུག་གསོལ། །སྣ་ཚོགས་རིན་པོ་ཆེ་ཡི་དོ་ཤལ་ཅན། །མནྡ་ར་དང་ཨུཏྤལ་པདྨ་དང་། །ཀུ་མུཏྟ་དང་ཨུ་དུམ་ཝ་ར་ཡི། །ཁ་དོག་སྣ་ལྔའི་མེ་ཏོག་ཕྲེང་བས་བརྒྱན། །དབུ་སྐྲ་སིལ་མ་བུང་བ་ལྟ་བུར་གནག །གཡུ་དང་བྱུ་རུ་མུ་ཏིག་ལན་ཚར་ཅན། །ཡིད་འོང་ལྷ་ཡི་མེ་ཏོག་ཐོད་དུ་བཅིངས། །ཕྱག་གཡས་རིན་ཆེན་གསེར་གྱི་རྩེ་གསུམ་དང་། །གཡོན་པས་ཐོད་པ་བདུད་རྩིས་བཀང་བ་བསྣམས། །རྟག་ཏུ་ཡབ་ལ་རྗེས་སུ་ཆགས་པའི་ཚུལ། །ཞབས་གཉིས་མཉམ་པའི་སྟབས་ཀྱི་བཞེངས་ཏེ་བཞུགས། །གཡས་སུ་སྤྲུལ་པ་རབ་བྱུང་ཆ་བྱད་ཅན། །ཟ་འོག་སྟོད་འགགས་དར་སྔོན་ཤམ་ཐབས་ཅན། །ཆོས་གོས་ངུར་སྨྲིག་དར་ཞུ་སེར་པོ་གསོལ། །ཕྱག་གཉིས་ཙན་དན་བེང་ཆེན་མཁའ་ལ་འཕྱར། །ལྕགས་ཀྱི་ཕྲེང་བས་དགྲ་བོ་རྩིས་ལ་འདེབས། །ཞབས་གཉིས་དོར་སྟབས་ཕག་ནག་སྟེང་དུ་འགྱེང་། །མདུན་དུ་བློན་པོ་བདུད་ནག་མི་སྡུག་པ། །མི་བཟད་རལ་པ་དམར་སེར་གྱེན་དུ་བརྫེས། །སྐུ་ལ་དམར་ནག་དར་གྱི་བེར་ཆེན་གསོལ། །ཕྱག་གཡས་མདུང་དར་ནག་པོ་མཁའ་ལ་འཕྱར། །གཡོན་པས་རྒྱུ་ཞགས་དམ་ཉམས་འཆིང་བར་བྱེད། །གཡས་ཀྱི་རུ་འདྲེན་དཔའ་བོ་སྟག་ཆས་བརྒྱ། །གཡོན་གྱི་རུ་འདྲེན་བུད་མེད་ནག་མོ་འབུམ། །སྔོན་གྱི་ཤུལ་མཚོན་དགེ་སློང་དགྲ་བཅོམ་སྟོང་། །ཕྱི་ཡི་རྗེས་ཉུལ་སྟག་ཆས་འབུམ་ཕྲག་སྟོང་། །སྐུ་ཡི་སྐྱོ་བསང་གར་མཁན་བརྒྱ་ཡི་ཚོགས། །གཞན་ཡང་སྣང་སྲིད་ལྷ་སྲིན་སྡེ་བརྒྱད་ཚོགས། །དམ་ཅན་རྒྱ་མཚོའི་དམག་དཔུང་སྤྲིན་ལྟར་གཏིབས། །ལྷ་ཚོགས་རྣམས་ཀྱི་གནས་གསུམ་ཡི་གེ་གསུམ། །དེ་ལས་འོད་འཕྲོས་བེ་ཧར་དཀོར་མཛོད་གླིང་། །བྷ་ཏ་ཧོར་གྱི་སྒོམ་གྲྭ་ལ་སོགས་པ། །རང་བཞིན་གར་བཞུགས་གནས་མཆོག་དམ་པ་ནས། །མཐུ་ཆེན་རྡོ་རྗེ་གྲགས་ལྡན་འཁོར་དང་བཅས། །སྐད་ཅིག་དབང་གིས་གནས་འདིར་གཤེགས་སུ་གསོལ། །སྤྱན་འདྲེན་ནི། ཧྲཱིཿ ཀ་དག་སྐྱེ་འགགས་འཕོ་འགྱུར་བྲལ་བ་ལ། །ཁ་དོག་སྣ་ཚོགས་ཅིར་ཡང་མ་ངེས་ཞིང་། །ག་ལ་བ་དེར་སྣང་བའི་ཆོས་རྒྱལ་ཆེ། །ང་ཡིས་འབོད་ཚེ་གནས་འདིར་གཤེགས་སུ་གསོལ། །ཅ་ག་རིན་ཆེན་རྒྱན་ལྡན་ཟབ་བེར་གོས། །ཆ་ལུགས་ལས་བཞིའི་རྣམ་འགྱུར་ཅིར་ཡང་སྟོན། །ཇ་རིལ་ཐོད་མཁར་མེ་རླུང་འཚུབས་མ་འདིར། །ཉ་རྒྱས་ཇི་བཞིན་དགྱེས་པའི་ཚུལ་གྱིས་གཤེགས། །ཏ་ཐཱ་ག་ཏ་པདྨ་ཀ་རཱ་ཡི། །ཐ་ཚིག་རྡོ་རྗེའི་གཡར་དམ་རྗེས་དགོངས་ཏེ། །ད་ལྟ་རིག་འཛིན་རྣལ་འབྱོར་བདག་ཅག་ལ། །ན་མར་བརྩེ་བས་དགོངས་ཏེ་གཤེགས་སུ་གསོལ། །པ་སངས་ལ་སོགས་དྲེགས་པ་ཀུན་གྱི་གཙོ། །ཕ་རོལ་ཤིན་ཏུ་བརྣག་པའི་བདུད་སྡེའི་ཚོགས། །བ་མོ་འོད་སྟོང་བརྒྱ་བས་བཞུས་པ་ལྟར། །མ་ལུས་ལྷག་མེད་གཞོམ་ཕྱིར་གཤེགས་སུ་གསོལ། །ཙ་སད་སེར་གསུམ་ཆོ་འཕྲུལ་སྣ་ཚོགས་དང་། །ཚ་གྲང་རྒྱུ་གཟེར་གཏོང་བའི་མཐུ་བོ་ཆེ། །ཛ་ཡའི་བསྟན་ལ་བླང་དོར་ལེགས་ཉེས་ནི། །ཝ་ལེར་མཁྱེན་པའི་མངའ་བདག་གཤེགས་སུ་གསོལ། །ཞ་ལྟར་ཀུན་གྱིས་གཙུག་ཏུ་བཀུར་བ་ཡི། །ཟ་བྱེད་དཔའ་བར་རྔམས་པའི་ཁྲོ་བོའི་རྒྱལ། །འུ་འུར་དྲག་པོའི་རླུང་ནག་འཚུབས་མ་བཅས། །ཡ་མཚན་ལྡན་པའི་ལྷ་མཆོག་གཤེགས་སུ་གསོལ། །རཱ་ཛ་རྒྱལ་འགོང་དམ་སྲི་ཤི་འདྲེའི་ཚོགས། །ལ་ལུང་མེད་པར་ཁྱབ་པའི་བདུད་སྡེའི་ཚོགས། །ཤ་ཟ་ཁྲག་འཐུང་ཁྱོད་ཀྱིས་འདུལ་བའི་ཕྱིར། །ས་དང་བར་སྣང་ཁྱོན་ཀུན་གང་བར་གཤེགས། །ཧ་ཡ་གྲཱྀ་ཝའི་བཀའ་སྡོད་མཐུ་བོ་ཆེ། །ཨ་ཧོ་ངོ་མཚར་རྣམ་འགྱུར་མཐའ་ཡས་པ། །ཁྲོ་རྒྱལ་འབར་བའི་རྡོ་རྗེའི་སྟངས་སྟབས་ཀྱིས། །སྐད་ཅིག་དབང་གི་གནས་འདིར་གཤེགས་སུ་གསོལ། །ཧྲཱིཿ དབང་ཆེན་རྟ་གདོང་པདྨ་ཧེ་རུ་ཀའི། །ཡང་སྤྲུལ་རྔམས་བརྗིད་འབར་བའི་སྐུར་སྟོན་པ། །སྤྲུལ་པའི་ཆོས་རྒྱལ་བསྟན་སྲུང་དབང་པོའི་ཚོགས། །བསྐལ་ངན་དུས་ཀྱི་སྙིགས་མའི་ཡང་མཐའ་འདིར། །མ་རུང་གདུག་པའི་ཚོགས་རྣམས་འདུལ་བའི་ཕྱིར། །གདོད་ནས་སྙིང་རྗེ་ཆེན་པོའི་རང་བཞིན་ལ། །ཤིན་ཏུ་མི་བཟད་གཏུམ་ཆེན་ཁྲོས་པའི་སྐུ། །གསང་ཡུམ་སྤྲུལ་པ་བློན་པོ་རུ་འདྲེན་དང་། །སྣང་སྲིད་དྲེགས་པའི་དམག་དཔུང་ཚོགས་དང་བཅས། །རྣལ་འབྱོར་བདག་གི་དད་པས་སྤྱན་འདྲེན་ན། །ལེ་བརྒན་དར་གྱི་གཡབ་མོ་འཚུབས་སེ་འཚུབ། །མི་རྐང་གླིང་བུའི་ཚོགས་ནི་དི་རི་རི་།དཔལ་གྱི་བྲོ་བརྡུངས་གར་སྟབས་ཤིགས་སེ་ཤིག །རྔམས་པའི་ང་རོ་འབྲུག་སྟོང་འུ་རུ་རུ། །རབ་ཏུ་དགྱེས་པའི་གད་རྒྱངས་ཡ་ལ་ལ། །མ་སྲིང་བཤུག་པའི་གླུ་ལེན་ཀྱུ་རུ་རུ་། །དམར་ནག་མེ་ཡི་ཚྭ་ཚྭ་ཐོ་རོ་རོ། །བསྐལ་བའི་གློག་དམར་ཞགས་པ་ཁྱུགས་སེ་ཁྱུག །རླུང་ནག་འཚུབས་མ་མང་པོ་འུ་རུ་རུ། །གནམ་ལྕགས་ཐོག་གི་བུ་ཡུག་ཤ་ར་ར། །བྱ་ནག་འདབ་ཆགས་ཚོགས་ནི་ཐིབས་སེ་ཐིབ། །ཟ་བྱེད་གཅན་གཟན་ཚོགས་ནི་འདུ་རུ་རུ། །ཤན་པ་ཕོ་མོའི་དམག་ཚོགས་སྤུངས་སེ་སྤུང་། །དད་དང་དམ་ཚིག་དབང་གིས་སྤྱན་འདྲེན་ན། །དབུ་རྩེ་རིམ་གསུམ་དཀོར་མཛོད་གླིང་གསུམ་དང་། །བྷ་ཏ་ཧོར་གྱི་སྒོམ་གྲྭའི་གནས་མཆོག་ནས། །མ་ཐོགས་མྱུར་དུ་གནས་འདིར་གཤེགས་སུ་གསོལ། །བཛྲ་ས་མ་ཡ་ཛཿ བཞུགས་ནི། ཧྲཱིཿ ཀ་དག་སྐྱེ་མེད་དབྱིངས་ལས་མ་གཡོས་ཀྱང་། །ཁ་བ་ཅན་གྱི་བསྟན་སྲུང་ཚུལ་འཛིན་པ། །ག་རུ་བཞུགས་ཀྱང་བསྟན་པ་བསྲུང་བའི་ཕྱིར། །ང་ཅག་སྒྲུབ་ལ་དགོངས་ཏེ་བཞུགས་སུ་གསོལ། །ཅ་ཅོ་ཨ་ར་ལི་ཡི་སྒྲ་དང་བཅས། །ཆ་ལུགས་ཁྲོ་རྒྱལ་འབར་བའི་རྣམ་འགྱུར་གྱི། །ཇ་རིལ་མི་མགོ་བརྩེགས་པའི་ཕོ་བྲང་ཆེར། །ཉ་ཤ་ཁྲག་ཞག་རྒྱ་མཚོར་བཞུགས་སུ་གསོལ། །ཏ་ཐཱ་ག་ཏའི་བསྟན་སྲུང་མཐུ་བོ་ཆེས། །ཐ་བ་ལྟ་བུ་མ་རུང་བདུད་སྡེའི་ཚོགས། །ད་ལྟ་ཉིད་དུ་མངོན་སྤྱོད་ཕྲིན་ལས་ཀྱིས། །ན་ཚ་སྡུག་བསྔལ་སྦྱངས་ཕྱིར་བཞུགས་སུ་གསོལ། །པ་སངས་ལྟ་བུ་སྙིང་རྗེ་ཆེན་པོ་ཡིས། །ཕ་མས་བུ་ལ་བརྩེ་བ་ཇི་བཞིན་དུ། །བ་མཆོག་དཔག་བསམ་ཤིང་ལས་དངོས་གྲུབ་རྒྱུན། །མ་ལུས་ལྷག་མེད་སྩོལ་ཕྱིར་བཞུགས་སུ་གསོལ། །ཙ་སད་སེར་གསུམ་ལྟས་ངན་ཆོ་འཕྲུལ་བདག །ཚ་གྲང་གདུང་བ་མཐའ་དག་སེལ་མཛད་ཅིང་། །ཛ་ཡའི་བསྟན་ལ་ཉིན་མཚན་དུས་དྲུག་ཏུ། །ཝ་ལེར་སྐྱོང་མཛད་མཐུ་ཆེན་བཞུགས་སུ་གསོལ། །ཞྭ་དམར་བསྟན་དང་བསྟན་འཛིན་སྐྱོང་བ་དང་། །ཟ་འཐུང་དཔལ་འབྱོར་ལོངས་སྤྱོད་རྒྱས་མཛད་པའི། །འ་ཅག་ལྷ་མཆོག་ཁྱོད་ཉིད་བསྒྲུབ་ལགས་ན། །ཡ་མཚན་ལྡན་པའི་ལྷ་མཆོག་བཞུགས་སུ་གསོལ། །རཱ་ཛ་སྤྲུལ་པའི་ཆོས་རྒྱལ་འཁོར་དང་བཅས། །ལ་ལ་ཞི་དང་ལ་ལ་ཁྲོ་བོའི་ཚུལ། །ཤ་ཟ་ཁྲག་འཐུང་ཡོངས་ཀྱི་མངའ་བདག་པོ། །ས་བཅུའི་དབང་ཕྱུག་ཁྱོད་ཉིད་བཞུགས་སུ་གསོལ། །ཧ་ལ་ཉོན་མོངས་དུག་ལྔས་གཟིར་བ་ཡི། །འགྲོ་རྣམས་ཡེ་ཤེས་ལྔ་ཡི་ངོ་བོ་རུ། །སྨིན་ཅིང་གྲོལ་བའི་དངོས་གྲུབ་སྩོལ་བ་དང་། །ཨ་ལ་ལ་ཡི་ངོ་མཚར་རྨད་པོ་ཆེ། །ཕྲིན་ལས་ས་གསུམ་ཁྱབ་ཕྱིར་བཞུགས་སུ་གསོལ། །ཕྱག་འཚལ་བ་ནི། ཀ་ཡེ་གསོན་ཅིག་དགོངས་ཤིག་ཆོས་རྒྱལ་ཚོགས། །ཁ་འཇམ་སྙིང་རྩུབ་མི་དང་མི་མིན་རྣམས། །ག་རུ་གནས་ཀྱང་ཐལ་བར་བརླག་མཛད་པའི། །ང་ཅག་དགྲ་ལྷའི་ཚོགས་ལ་གུས་པས་འདུད། །ཅ་ཅོ་གླུ་དང་བསྭོ་ལ་དགྱེས་པར་བྱེད། །ཆ་ལུགས་དགྲ་བླའི་རྒྱལ་པོའི་ཚུལ་སྟོན་པ། །ཇ་དར་གསེར་དངུལ་ཀུན་བདག་ནོར་ལྷའི་གཙོ། །ཉ་རྒྱས་ཇི་བཞིན་དགྲ་བླ་ཁྱོད་ལ་འདུད། །ཏ་ཐཱ་ག་ཏ་པདྨ་ཐོད་ཕྲེང་གི །ཐ་ཚིག་རྡོ་རྗེའི་ཡལ་གམ་ཕོག་པ་ཡི། །ད་ལྟ་སྙིགས་མ་ལྔ་ཡི་ཡང་མཐའ་འདིར། །ན་མར་རྟག་ཏུ་སྐྱོང་མཛད་ཁྱོད་ལ་འདུད། །པ་ར་མི་ཏའི་སྙིང་རྗེའི་རོལ་གར་ལས། །ཕ་རོལ་རྒོལ་འཇོམས་དགྲ་ལྷའི་སྐུར་བཞེངས་བ། །བ་ལང་བཞིན་དུ་རྨོངས་བའི་འགྲོ་བ་རྣམས། །མ་ཡིས་བུ་བཞིན་སྐྱོང་མཛད་ཁྱོད་ལ་འདུད། །ཙཱརྱ་སྤྱོད་པ་རྩུབ་མོའི་བདུད་སྡེའི་ཚོགས། །ཚ་གྲང་གདུག་པའི་དབལ་གྱིས་འཇོམས་མཛད་པ། །ཛ་ཧུའི་བུ་མོའི་རྒྱུན་བཞིན་ཕྲིན་ལས་ཀྱིས། །ཝ་ལེར་རྟག་ཏུ་མགོན་མཛད་ཁྱོད་ལ་འདུད། །ཞ་ཉེ་མི་མཐུན་ཚོགས་རྣམས་རིང་དུ་བསྐྲད། །ཟ་བྱེད་དཔའ་བར་རྔམས་པའི་དགྲ་བླའི་རྒྱལ། །འ་འུར་རྔམས་པའི་གད་རྒྱངས་ཡ་ལ་ལ། །ཡ་མཚན་རྫུ་འཕྲུལ་ཀུན་བདག་ཁྱོད་ལ་འདུད། །རཱ་ཛ་རྒྱལ་འགོང་དམ་སྲི་ཤི་འདྲེའི་ཚོགས། །ལ་ལ་ཙམ་མིན་མ་ལུས་ལྷག་མེད་ཀུན། །ཤ་སྟག་ཁྱོད་ཀྱིས་མིང་ཙམ་མེད་པར་མཛོད། །ས་གསུམ་དབང་མཛད་ཁྱོད་ལ་ཕྱག་འཚལ་ལོ། །ཧ་ཧ་གད་མོའི་ས་གསུམ་གཡོ་ཞིང་འདར། །བདུད་སྡེ་འཇོམས་པའི་དཔའ་བོ་ཁྱོད་ཉིད་ཀྱི། །བདག་ཅག་དུས་འདི་ནས་བཟུང་བྱང་ཆུབ་བར། །ཨ་མས་བུ་ལ་བརྩེ་བ་ཇི་བཞིན་དུ། །རྟག་ཏུ་མགོན་མཛད་ཁྱོད་ལ་ཕྱག་འཚལ་ལོ། །ཨ་ཏི་པཱུ་ཧོ། པྲ་ཏིཙྪ་ཧོ། མཆོད་པ་ནི། ཧྲཱིཿ ཀ་པཱ་ལ་ཡི་བྷནྡྷའི་སྣོད་ཡངས་སུ། །ཁ་དོག་དྲི་རོའི་ངད་ལྡན་ཨ་མྲྀ་ཏ། །ག་ཤལ་མགོ་བོ་རློན་པའི་སྣོད་ཡངས་སུ། །ང་བདག་གཟུང་འཛིན་བསྒྲུབ་བའི་རཀྟའི་མཚོ། །ཅ་ག་རོ་བརྒྱ་ལྡན་པའི་བ་ལིངྟ། །ཆ་ལུགས་དཔལ་གཏོར་བརྗིད་ལྡན་རི་ལྟར་སྤུངས། །ཇ་ཆང་གསེར་སྐྱེམས་གཡུ་སྐྱེམས་ཕུད་ཀྱི་མཚོ། །ཉ་རྒྱས་ཟླ་བ་ལྟ་བུར་ཁྱོད་ལ་འབུལ། །ཏ་ཐཱ་ག་ཏའི་རྗེས་འཇུག་བདག་ཅག་གིས། །ཐ་དད་མཐུན་རྫས་རྣམ་མང་བྱེ་བྲག་ཚོགས། །ད་ལྟ་དངོས་འབྱོར་ཡིད་སྤྲུལ་མཆོད་པའི་སྤྲིན། །ན་མར་མཐུ་སྟོབས་དབང་ཕྱུག་ཁྱོད་ལ་འབུལ། །པ་ནའི་རྒྱུན་བཞིན་མི་ཟད་རྒྱུན་རིང་པོ། །ཕ་མཐའ་ཡས་པའི་ཀུན་བཟང་མཆོད་པའི་སྤྲིན། །བ་ལང་སྤྱོད་སོགས་གླིང་བཞིའི་མགོན་ཁྱོད་ལ། །མ་ཚང་མེད་པར་ཕུལ་བའི་བྱིན་རླབས་ཀྱིས། །ཙ་རི་ལ་སོགས་རྐང་བཞི་རྒྱས་པ་དང་། །ཚ་གྲང་འདུ་བའི་ནད་རྣམས་ཀུན་ཞི་ནས། །ཛ་ཡི་བསྟན་ལ་འཁུ་བར་བྱེད་པ་རྣམས། །ཝ་ལྟར་ཞུམ་ཅིང་རིགས་རྒྱུད་རྩད་ནས་ཆོད། །ཞྭ་ལྟར་སྡེ་བརྒྱད་ཀུན་གྱི་གཙུག་གི་རྒྱན། །ཟ་བྱེད་དཔའ་བར་རྔམས་པ་ཁྱོད་ཉིད་ཀྱིས། །འ་ཅག་སྒྲུབ་པའི་རིག་འཛིན་བདག་ཅག་ལ། །ཡ་མཚན་ལྡན་པའི་དངོས་གྲུབ་སྩལ་དུ་གསོལ། །ར་ཛ་ཆེན་པོ་དགྲ་བླ་ཁྱོད་ཉིད་ཀྱིས། །ལ་ཆུ་འཕྲང་སོགས་བདག་ཅག་བགྲོད་པའི་ཚེ། །ཤ་སྟག་ཁྱོད་ཀྱི་ཐ་ཚིག་མ་གཡེལ་ཅིག །ས་ཕྱོགས་གང་དུ་གནས་ཀྱང་སྡོང་གྲོགས་མཛོད། །ཧ་ཅང་བྱང་ཆུབ་སྙིང་པོ་མ་ཐོབ་བར། །ཨ་ཏིའི་བསྟན་ལ་བདག་ཅག་ཞུགས་ནས་ཀྱང་། །ཀ་དག་གདོད་མའི་རྒྱལ་ས་མ་ཟིན་བར། །སྡོང་གྲོགས་ཕྲིན་ལས་རྣམ་བཞི་མ་གཡེལ་ཅིག །ཨོཾ་བཛྲ་ཨརྒྷཾ་སོགས་ནས་ཤབྟ་ཨ་མྲྀ་ཏ་རཀྟ་བ་ལིང་ཏ་ཁ་ཧི། གཏོར་འབུལ་ནི། དགྲ་ལྷའི་རྒྱལ་པོ་རྡོ་རྗེ་གྲགས་ལྡན་འཁོར་དང་བཅས་པའི་ལྗགས་ཧཱུྃ་ལས་བྱུང་བའི་རྡོ་རྗེ་རྩེ་ལྔ་པའི་འོད་ཀྱི་སྦུ་གུ་ཅན་གྱི་གཏོར་མའི་བཅུད་དྲངས་ཏེ་གསོལ་བར་གྱུར། ཨོཾ་རཀྴ་རཱ་ཛ་དུམ་བུ་ཤིག་ཙིཏྟ་ཟུང་སོད། མ་ལེ་ཐུན། མ་ལེ་རཱ་ཛ་བྷྱོཿས་པ་རི་ཝ་ར་ཨེ་དཾ་སོགས་ལན་གསུམ།བསྟོད་པ་ནི། ཧྲཱིཿ ཀ་དག་ངང་ལས་སྙིང་རྗེ་ཁྲོས་པའི་སྐུ། །ཁ་དོག་དུས་མཐའི་མེ་ཡི་ཕུང་པོ་འདྲ། །ག་བུར་མདངས་འཛིན་གསང་བའི་ཡུམ་ཆེན་མ། །ང་ཅག་དང་བའི་ཡིད་ཀྱིས་བསྟོད་པར་བགྱི། །ཅ་ཅོ་གདུང་བའི་ང་རོས་འབོད་པའི་ཚེ། །ཆ་ལུགས་ཕྲིན་ལས་རྣམ་བཞིའི་རོལ་གར་གྱིས། །ཇ་རིལ་ཐོད་པའི་སྐུ་མཁར་སྐྱི་གཡའི་ནང་། །ཉ་རྒྱས་བཞིན་དུ་བཞུགས་མཛད་ཁྱོད་ལ་བསྟོད། །ཏ་བ་ན་ལྟར་ཚ་བའི་མེ་དབལ་གྱིས། །ཐ་མལ་མི་དང་མི་མིན་འབྱུང་པོའི་ཚོགས། །ད་ལྟ་ཉིད་དུ་མངོན་སྤྱོད་ཕྲིན་ལས་ཀྱིས། །ན་ཚ་དྲག་པོས་ཚར་གཅོད་མཛད་ལ་བསྟོད། །པ་རི་དཱེ་ཝ་ན་ཞེས་ཁྱོད་འབོད་ན། །ཕ་རོལ་རི་རབ་ལྟ་བུའི་དགྲ་སྡེའི་ཚོགས། །བ་མོ་རྟ་བདུན་བདག་པོས་བཞུས་པ་བཞིན། །མ་ལུས་ལྷག་མེད་དབྱིངས་སུ་སྒྲོལ་ལ་བསྟོད། །ཙཱརྱ་ལས་བཞིའི་སྤྱོད་པའི་རོལ་གར་གྱིས། །ཚ་གྲང་སྡུག་བསྔལ་དྲག་པོ་ཁྱད་བསད་ནས། །ཛ་ཡའི་བསྟན་པ་རྟག་ཏུ་སྐྱོང་མཛད་པ། །ཝ་ལེར་སྒྲིབ་མེད་མཁྱེན་པ་ཁྱོད་ལ་བསྟོད། །ཞྭ་ལྟར་གཙུག་རྒྱན་མཚོ་སྐྱེས་རྡོ་རྗེ་ལ། །ཟ་བྱེད་དྲེགས་པ་ཁྱོད་ཀྱིས་མངོན་བསྟོད་པ། །འ་ཅག་མ་ཡིས་བུ་བཞིན་སྐྱོང་མཛད་པ། །ཡ་མཚན་ལྡན་པའི་དབང་ཕྱུག་ཁྱོད་ལ་བསྟོད། །རཱ་ཛ་ཆོས་འཁོར་སྐྱོང་བའི་མངའ་བདག་པོ། །ལ་ལ་ཙམ་མིན་སྲིད་གསུམ་ཡོངས་ཀྱི་བདག །ཤ་ཟ་དྲེགས་པ་ཀུན་གྱི་གཙུག་གི་རྒྱན། །ས་གསུམ་སྐྱེ་དགུའི་ལྷ་མཆོག་ཁྱོད་ལ་བསྟོད། །ཧྱ་གྷྲི་ཝའི་བཀའ་སྡོད་མཐུ་བོ་ཆེ། །ཡུན་རིང་དུས་ནས་བསྙེན་ཅིང་བསྒྲུབ་པའི་ལྷ། །རྩེ་གཅིག་མོས་པས་ཁྱོད་ཉིད་སྒྲུབ་ལགས་ན། །ཨ་ནནྷ་ཞེས་དངོས་གྲུབ་སྩལ་དུ་གསོལ། །སྔགས་འཁོར་ནི། བདག་ཉིད་ལྷར་གསལ་བའི་ཐུགས་ཀའི་འོད་ཀྱིས་བསྐུལ་བས། དགྲ་བླའི་རྒྱལ་པོ་རྡོ་རྗེ་གྲགས་ལྡན་གྱི་སྔོན་གྱི་ཐུགས་དམ་གཉན་པོ་རྗེས་སུ་དགོངས་ཏེ་ཕྲིན་ལས་རྣམ་བཞིའི་ལས་ཐོགས་མེད་དུ་བསྒྲུབས་པར་གྱུར། ཨོཾ་རཀྴ་ར་ཛཿ་དུམ་བུ་ཤིག་ཙིཏྟ་ཟུང་སོད།མ་ལེ་ཐུན་མ་ལེ་ར་ཛཿ་བྷྱོ། ལན་གསུམ། བཛྲ་པུཥྤེ་སོགས་ཤབྟ་ཨ་མྲྀ་ཏ་རཀྟ་བ་ལིངྟ་མ་ཧཱ་སརྦ་པཱ་ཛ་ས་མ་ཡ་ཁ་ཁ་ཁཱ་ཧི་ཁཱ་ཧི། ཁམས་གསུམ་ཀུན་ལས་རྒྱལ་བའི་སྟོབས་ལྡན་སྐུ། །དྲག་སྔགས་ཚ་ཟེར་ཐོག་འབེབས་དབྱར་རྔའི་གསུང་། །ཆོས་དབྱིངས་ལྷན་སྐྱེས་བདེ་ཆེན་རོ་གཅིག་ཐུགས། །བསྟན་སྲུང་དགྲ་བླའི་གཙོ་ལ་ཕྱག་འཚལ་བསྟོད། །ཕྲིན་བཅོལ་ནི། ཀི་བསྭོ་ཆ་ཡིས་དགྲ་ལྷ་རབ་དགྱེས་ཤིང་། །ཁུ་འཕང་གནམ་ལྕགས་ཐོག་གི་བུ་ཡུག་འཚུབས། །གེ་སར་ལས་འཁྲུངས་པདྨ་ཀ་ར་ཡིས། །ངོ་མཚར་དགྲ་ལྷའི་རྒྱལ་པོར་མངའ་གསོལ་བ། །ཅི་ནས་རྣལ་འབྱོར་རྟོག་པའི་རོལ་མོའི་ཚོགས། །ཆུ་ལས་ཆུ་བུར་རྡོལ་བ་ཇི་བཞིན་དུ། །རེ་ཞིག་མ་ཡིན་རང་བྱུང་རང་ཤར་དུ། །ཉོ་ཚོང་མེད་པར་དབྱིངས་སུ་གྲོལ་བར་མཛོད། །ཏི་ལ་ཨ་ཏིའི་བསྟན་པ་རིན་པོ་ཆེ། །ཐུ་བོ་རྒྱལ་དང་རྒྱལ་སྲས་འཕགས་པའི་ཚོགས། །དེ་དག་དུས་དྲུག་སྐྱོང་ཞིང་བསྲུང་བ་དང་། །ནོ་པི་ཀ་ཡི་མགོན་དུ་བཞུགས་པར་མཛོད། །པི་ཝང་སྒྲ་ལྟར་སྙན་གྲགས་རྒྱས་པ་དང་། །ཕུ་ཆུ་ལྟ་བུར་གསེར་དངུལ་དར་ཟབ་འབྲུ། །དེ་ལུག་རྟ་དྲེལ་ལ་སོགས་ཕྱུགས་ཀྱི་རིགས། །མོ་ཧར་བྱེད་པའི་རྫས་ལྟར་སྤེལ་བར་མཛོད། །ཙིཏྟ་སྲོག་ལ་རབ་ཏུ་རྔམས་བྱེད་ཅིང་། །ཚུལ་རོལ་ཤཱཀྱའི་བསྟན་ལ་སྨན་མཛད་ཅིང་། ཛེ་ཏའི་ཚལ་སོགས་གླིང་བཞིར་དབང་བསྒྱུར་བས། །ཝོ་ཛི་ཧའི་སོགས་ཀུན་གྱི་མངོན་བསྟོད་པ། །ཞི་དང་ཁྲོ་བོ་ཞི་མ་ཁྲོ་ཡི་ཚུལ། །ཟུ་ར་རྭ་སྐྱེས་ལ་སོགས་སྡེ་བརྒྱད་གཙོ། །འེ་ཞེས་ཐུགས་དམ་གནད་ནས་བསྐུལ་ལགས་ན། །ཡོ་གའི་དགྲ་རྣམས་མ་ལུས་འདུལ་བར་མཛོད། །རི་རབ་ལྟ་བུར་དཔལ་གྱི་གཏོར་མ་དང་། །ལུ་མའི་རྒྱུན་བཞིན་སྨན་དང་རཀྟའི་མཚོ། །ཤེ་མུན་ཉམས་ང་མེད་པར་མཆོད་པའི་སྤྲིན། །སོ་སོར་དགྱེས་པའི་མཆོད་པ་འབུལ་ལགས་ན། །ཧི་ཧི་རྡོ་རྗེ་ངོ་མཚར་གླུ་དང་བཅས། །མ་ལུས་ལྷག་མ་མེད་པར་བཞེས་ནས་ཀྱང་། །ཨུ་ད་དྷི་ལྟར་ཚེ་བསོད་དཔལ་འབྱོར་སོགས། །རབ་ཏུ་རྒྱས་པའི་ཕྲིན་ལས་མཛད་དུ་གསོལ། །ཅེས་པ་འདི་ཡང་ལྕགས་མོ་བྱ་ལོའི་འབུམ་འགྱུར་ཟླ་བའི་ཚེས་བཅོ་ལྔའི་ཉིན་རང་ཁང་འཆི་མེད་གྲུབ་པའི་དགའ་ཚལ་ནས། རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེས་བྲིས་པ་དགེའོ། །