གཉན་ཆེན་རྒྱལ་བ་ཐོད་དཀར་གསོལ་བསྡུས་ཁྱེར་བདེ་བཞུགས་སོ།།
ཧཱུྃ། རིན་ཆེན་ལས་གྲུབ་གཞལ་ཡས་ལྟ་ན་སྡུག །རིན་ཆེན་དྲྭ་ཕྱེད་འཕན་གདུགས་བླ་བྲེས་བརྒྱན། །རིན་ཆེན་སྣ་བདུན་བཀྲ་ཤིས་རྫས་རྟགས་བརྒྱད། །རིན་ཆེན་སྣ་ཚོགས་ཕྱུར་བུར་བཀང་པའི་དབུས། །པདྨའི་ཞལ་མཐོང་ཡུལ་ལྷའི་ཚུལ་འཛིན་པ། །གཉན་ཆེན་རྒྱལ་ཐོད་སྐུ་མདོག་དཀར་དམར་མདངས། །ཞལ་གཅིག་སྤྱན་གསུམ་ཨམ་གཙིགས་རབ་ཏུ་བསྡམས། །དར་དཀར་ལ་ཐོད་རྒོད་འཕྲུ་བེར་དམར་གསོལ། །གཡས་པས་མདུང་དར་གཡོན་པས་ཞགས་པ་བསྣམས། །འཁོར་གསུམ་སྟག་རལ་གཡས་ལ་གཟིག་ཤུབས་གཡོན། །ཅང་ཤེས་རྐྱང་ཞུར་གློག་ལས་རབ་མྱུར་བ། །ཆིབས་ནས་རྡོ་རྗེའི་ཡལ་གམ་རྗེས་དགོངས་ཏེ། །རླུང་ལས་མྱུར་བའི་ཚུལ་གྱིས་འདིར་གཤེགས་ལ། །དགྱེས་པར་བཞུགས་ལ་དངོས་གྲུབ་སྩལ་དུ་གསོལ། །སྲིད་ན་མཆོད་པར་འོས་པའི་རྫས་རྣམས་ནི། །རབ་འབྱམས་རྒྱ་མཚོའི་ཞིང་ཀུན་བཀང་བ་ཡི། །རྒྱུ་བཟང་བཀོད་ལེགས་ཡིད་འོང་ལྟ་ན་སྡུག །གུས་པས་འབུལ་ལོ་དགྱེས་པར་བཞེས་སུ་གསོལ། །རྒྱལ་བའི་བསྟན་པ་སྤྱི་དང་ཁྱད་པར་དུ། །གསང་སྔགས་རྡོ་རྗེ་ཐེག་པའི་བསྟན་པ་ནི། །ཕྱོགས་བཅུ་མཐའ་དབུས་ཀུན་ལ་ཁྱབ་གྱུར་ཅིག །བསམ་དོན་ཡིད་བཞིན་འགྲུབ་པའི་ཕྲིན་ལས་མཛོད །རྫོགས་སྤྲུལ་ལྔ་པས་སོ། །