ནཱ་ག་རཀྴའི་གསོལ་བསྡུས་བཞུགས།།
ཧཱུྃ། ཀླུ་གཉན་ས་བདག་འདུལ་བའི་གཤེད་པོ་ཆེ། །དུག་གི་རི་རབ་འབར་བའི་ངོས་ཡངས་ལ། །དུག་གི་རྒྱ་མཚོ་འཁྱིལ་བའི་ཀློང་དཀྱིལ་དུ། །ཤིན་ཏུ་ཁྲོས་པ་ནཱ་ག་རཀྴ་ནི། །སྐུ་མདོག་སྨུག་ནག་དབུ་དགུ་ཕྱག་བཅྭོ་བརྒྱད། །བཅྭོ་བརྒྱད་ཕྱག་གི་གཡས་དགུ་གྲི་གུག་དང་། །གཡོན་པ་དགུ་ན་སྦྲུལ་གྱི་ཞགས་པ་བསྣམས། །སྐུ་སྨད་སྦྲུལ་མཇུག་རྒྱ་མཚོའི་ནང་དུ་འཁྱིལ། །ཀླུ་གཉན་ས་བདག་ཕོ་མོ་འབུ་ཁྲིའི་ཚོགས། །ལྷ་མཆོག་ཆེན་པོའི་བཀའ་ཉན་གུས་པས་འདུད། །གནས་མཆོག་དམ་པ་གང་དུ་བཞུགས་གྱུར་ཀྱང་། །བདག་ཅག་གདུང་བའི་དབྱངས་ཀྱི་འབོད་པའི་ཚེ། །ཇི་ལྟར་མཁའ་ལས་གློག་ཕྲེང་གཡོ་བ་བཞིན། །སྐད་ཅིག་ཙམ་གྱིས་གནས་འདིར་གཤེགས་སུ་གསོལ། །ཤ་ཁྲག་དམར་གྱི་བྷ་ལིང་གཏོར་མ་དང་། །ཉམས་པ་བསྒྲལ་བའི་སྙིང་གི་ཁྲག་གི་རྒྱུན། །མྱོས་བྱེད་ཆང་གིས་སྦྱར་བའི་ཨ་མྲྀ་ཏ། །ཕྱི་ནང་གསང་བའི་མཆོད་པ་བླ་ན་མེད། །ཁྱད་པར་ཁྱེད་དང་མཐུན་པའི་དམ་ཚིག་རྫས། །འཁོར་ལོ་ལ་སོགས་རྒྱལ་སྲིད་རིན་ཆེན་བདུན། །རིན་ཆེན་གདུགས་སོགས་བཀྲ་ཤིས་རྟགས་བརྒྱད་དང་། །ལི་ཁྲི་དུང་དཀར་ཞོ་སོགས་བཀྲ་ཤིས་རྫས། །རིན་ཆེན་བདུན་དང་ཉེ་བའི་རིན་ཆེན་བདུན། །ཨིནྡྲ་ནི་ལ་མར་གད་སྤོས་ཤེལ་དང་། །རྡོ་རྗེ་ཕ་ལམ་མུ་ཏིག་བཻཌཱུརྱ། །གསེར་དངུལ་ཟངས་ལྕགས་ལ་སོགས་རིན་ཆེན་རིགས། །འདོད་འཇོའི་བ་མོ་དཔག་བསམ་ལྗོན་པའི་ཤིང་། །གཏེར་གྱི་བུམ་པ་ཁྲུས་རྫིང་སྐྱེད་མོའི་ཚལ། །ངང་པ་དཀར་སེར་ཁྲུང་ཁྲུང་མཐིང་རིལ་སོགས། །འདབ་ཆགས་བྱ་རིགས་ཚོགས་ནི་སྤྲིན་ལྟར་གཏིབས། །རྟ་གླང་མ་ཧེ་ཤ་རྐྱང་དྲེལ་ལ་སོགས། །རྐང་བཞི་དུད་འགྲོའི་ཚོགས་ནི་ཁྱུགས་སེ་ཁྱུག །ཀླུ་ལ་དབང་བའི་ཀླུ་ནོར་ཉེར་གཅིག་སོགས། །ཆུ་གནས་དུད་འགྲོའི་ཚོགས་ནི་ལྡེམས་སེ་ལྡེམ། །རྒྱ་མཚོའི་སྦུ་བ་ཞོ་ཤ་རྣམ་པ་གསུམ། །ཨ་བར་སྐྱུར་གསུམ་རྨ་བྱའི་མདོངས་ལ་སོགས། །སྨན་གྱི་རིགས་སུ་གྱུར་པ་ཐམས་ཅད་དང་། །ཟོ་འོག་དར་ཟབ་གོས་ཀྱི་རིགས་བྱེད་སོགས། །རབ་འབྱམས་རྒྱ་མཚོའི་མཆོད་པ་དཔག་མེད་པ། །དངོས་སུ་འབྱོར་དང་ཡིད་ཀྱིས་སྤྲུལ་པ་ཡིས། །ཁྱེད་ལ་མཆོད་ཅིང་ཕུལ་བའི་བྱིན་རླབས་ཀྱིས། །བདག་ཅག་དཔོན་སློབ་འཁོར་དང་བཅས་པ་ཡིས། །ས་གཉན་བརྐོས་དང་ཤིང་གཉན་བཅད་པ་དང་། །རྡོ་གཉན་བསློགས་དང་མཚོ་གཉན་དཀྲུགས་པ་སོགས། །མདོར་ན་ཀླུ་གཉན་ས་བདག་ཐམས་ཅད་ལ། །ཕོག་ཐུག་འགལ་འཁྲུལ་གྱུར་བ་ཅི་མཆིས་པ། །མྱུར་དུ་བྱང་ཞིང་དག་པར་མཛད་དུ་གསོལ། །བདག་ཅག་ཀླུ་ཡི་ནད་ལས་རབ་གྲོལ་ཞིང་། །ཚེ་དང་བསོད་ནམས་དཔལ་འབྱོར་རྒྱས་པ་དང་། །རྟག་ཏུ་བདེ་སྐྱིད་དཔལ་ལ་སྤྱོད་པར་ཤོག །རྫོགས་སྤྲུལ་ལྔ་པས་སོ། །