རྒྱལ་ཆེན་རྣམ་མང་སྲས་ཀྱི་གསེར་སྐྱེམས་ཡིད་བཞིན་ནོར་བུའི་ཆར་འབེབས་བཞུགས།།
བཻ། སྔོན་ཚེ་དེ་བཞིན་གཤེགས་པ་ཐབས་ཅད་ཀྱི། །མཐུ་སྟོབས་གཅིག་ཏུ་བསྡུས་པ་ཁྲོ་བོའི་རྒྱལ། །བྱང་ཕྱོགས་ལྕང་ལོ་ཅན་གྱི་ཕོ་བྲང་ནས། །གནོད་སྦྱིན་ཡོངས་ཀྱི་དེད་དཔོན་མཐུ་རྩལ་ཅན། །གསང་བའི་བདག་པོ་ཕྱག་ན་རྡོ་རྗེ་ལ། །གུས་པས་ཕྱག་འཚལ་མཆོད་ཅིང་བསྟོད་པར་བགྱི། །འགྲོ་བའི་དབུལ་ཕོངས་སྡུག་བསྔལ་སེལ་མཛད་པའི། །བྱང་ཕྱོགས་གནོད་སྦྱིན་རྒྱལ་ཆེན་ཚུལ་བཟུང་པ། །སྔོན་ཚེ་བསྐལ་བ་བརྒྱད་ཁྲིའི་གོང་རོལ་ན། །ས་བརྒྱད་དབང་ཕྱུག་སེམས་དཔའ་རིན་ཆེན་མང་། །བསྐལ་བ་སྔོན་ནས་མངོན་པར་བྱང་ཆུབ་ཀྱང་། །ལྷ་མི་ཀུན་གྱི་དབུལ་ཕོངས་སེལ་བའི་ཕྱིར། །གནོད་སྦྱིན་རྒྱལ་པོ་ཆེན་པོའི་སྐུར་བཞེངས་པ། །མཐུ་རྩལ་ནུས་པ་བསམ་གྱིས་མི་ཁྱབ་པ། །སངས་རྒྱས་བསྟན་པ་གཉན་པོ་སྲུང་བ་དང་། །ཐུགས་རྗེ་ཆེན་པོའི་ཕྲིན་ལས་སྣ་ཚོགས་ཀྱིས། །བསྟན་འཛིན་ཚོགས་རྣམས་བུ་བཞིན་སྐྱོང་བ་དང་། །མ་ཆགས་ཆུ་སྐྱེས་ཉི་ཟླའི་གདན་སྟེང་དུ། །མཐིང་ནག་འོད་ཟེར་བྱེ་བ་འབུམ་གྱི་གཟི། །ཞབས་གཉིས་ཕྱེད་སྐྱིལ་རྒྱལ་པོ་རོལ་བའི་སྟབས། །རིག་བདག་བཛྲ་པ་ཎིས་སྤྱི་གཙུག་བརྒྱན། །པཉྩ་ལི་ཀའི་བེར་ཆེན་དགུ་བརྩེགས་གསོལ། །ཡོན་ཏན་བྱེ་བ་ཕྲག་བརྒྱའི་མངའ་བདག་པོ། །སྐུ་ཡི་གཟི་བརྗིད་འོད་ཟེར་ཕྱོགས་བཅུར་འཕྲོ། །གསུང་དབྱངས་ཡན་ལག་དྲུག་ཅུའི་སྒྲ་དབྱངས་ཀྱི། །བརྒྱད་ཁྲི་བཞི་སྟོང་ཆོས་ཀྱིས་འགྲོ་བ་ཡི། །གདུལ་བྱའི་ལས་ཉོན་སྡུག་བསྔལ་སྦྱོང་མཛད་པ། །གསུང་གི་དབང་ཕྱུག་རྒྱལ་ཆེན་རྣམ་ཐོས་སྲས། །ཁྱོད་ཐུགས་ཡེ་ཤེས་ཉི་མའི་དཀྱིལ་འཁོར་གྱིས། །འགྲོ་བའི་བློ་གྲོས་པདྨོ་རྒྱས་པ་ལ། །འཁོར་བའི་སྡུག་བསྔལ་མུན་པ་སེལ་བར་མཛད། །འགྲོ་བ་ཡོངས་ཀྱི་ཉི་མའི་གཉེན་གཅིག་པུ། །ཐུགས་རྗེ་ཆེན་པོའི་ཕ་མ་ལྟ་བུར་གཟིགས། །ལྷ་རྣམས་ཡོངས་ཀྱི་སྡེ་དཔོན་ཆེན་པོ་དང་། །རྒྱལ་ཆེན་སྡེ་བཞི་ལྷ་ཡི་ཚོགས་རྣམས་ཀྱིས། །སྲིད་གསུམ་ཡོངས་ཀྱི་རྒྱལ་པོ་མངའ་གསོལ་བ། །འགྲོ་བའི་མགོན་པོ་རྒྱལ་ཆེན་རྣམ་ཐོས་སྲས། །རྟག་ཏུ་ཐུགས་ཀྱི་དགྱེས་པ་སྐོང་མཛད་པ། །གསང་བའི་ཡུལ་ཆེན་ལྷ་མོ་རྣམ་པ་བཞི། །ཕྱི་རོལ་ཕྱོགས་མཚམས་སྐྱོང་བའི་ནོར་ལྷའི་ཚོགས། །རྣམ་སྲས་སྡེ་བཞི་ཛམ་ལྷ་རིགས་བཞི་དང་། །རྟ་བདག་བརྒྱད་དང་ཀླུ་ཆེན་རྣམ་པ་བརྒྱད། །སྒོ་སྐྱོང་བཞི་དང་ལྷ་ཀླུ་གནོད་སྦྱིན་དང་། །ནོར་ལྷ་བྱེ་བ་འབུམ་གྱི་ཚོགས་དང་བཅས། །འགྲོ་བའི་དཔལ་མགོན་ལྷ་མཆོག་ཁྱོད་ཉིད་ལ། །བདག་ཅག་བཀྲེས་ཕོངས་སྡུག་བསྔལ་བསལ་བའི་ཕྱིར། །དབུལ་ཞིང་ཕོངས་པའི་ཉམ་ཐག་ང་རོ་ཡིས། །ལྷ་མཆོག་ཁྱོད་རྣམས་སྙིང་ནས་འབོད་ལགས་ན། །སྐྱབས་དང་མགོན་བྲལ་ཡིད་ཆད་བདག་ཅག་ལ། །བརྩེ་བའི་མ་ཡིས་བུ་ལ་བྱམས་པ་བཞིན། །སྐད་ཅིག་ཙམ་གྱིས་གནས་འདིར་གཤེགས་སུ་གསོལ། །རིན་ཆེན་གཞལ་ཡས་ཕོ་བྲང་ཉམས་དགའ་བ། །པདྨ་ཉི་ཟླ་བརྩེགས་པའི་གདན་སྟེང་དུ། །དགྱེས་པ་ཆེན་པོའི་ཚུལ་དུ་བཞུགས་སུ་གསོལ། །ཡེ་ཤེས་བདུད་རྩི་འབྲུ་བཅུད་སྟོང་སྦྱར་བ། །བཅུད་ལྡན་མི་ཟད་ཡིད་བཞིན་རྒྱ་མཚོའི་གཏེར། །རཏྣ་ལྔ་ཡི་ཕྱེ་མ་བརྡལ་བ་ལ། །མཛེས་ཤིང་རྣམ་པར་བཀྲ་བའི་མཆོད་སྤྲིན་གྱི། །ངོ་མཚར་བསམ་མི་ཁྱབ་པའི་རོལ་གར་གྱི། །རྣམ་མང་ནམ་མཁའ་མཛོད་ཀྱི་འཁོར་ལོའི་སྤྲིན། །རྨད་བྱུང་དགྱེས་པའི་མཆོད་སྤྲིན་ཞལ་སྐྱེམས་འདི། །རྣམ་མང་ཐོས་སྲས་འཁོར་དང་བཅས་ལ་མཆོད། །དེ་ལྟར་གསེར་སྐྱེམས་ཕུལ་བའི་བྱིན་བརླབས་ཀྱིས། །ཚེ་འདིར་བསོད་ནམས་སྙན་གྲགས་རྒྱས་པ་དང་། །དཔལ་འབྱོར་ཚེ་དབང་ཁ་རྗེ་དབང་ཐང་དཔལ། །ཟས་ནོར་ལོངས་སྤྱོད་གཞན་འཕྲུལ་དབང་བྱེད་ལྟར། །ཡིད་ལ་ཅི་འདོད་དྲན་པ་ཙམ་གྱིས་ཀྱང་། །འཛད་མེད་དབྱར་གྱི་མཚོ་ལྟར་རྒྱས་པར་མཛོད། །ཅིར་སྣང་དག་པ་ལྷ་ཡི་འཁོར་ལོ་དང་། །སྒྲ་གྲགས་ཐམས་ཅད་སྔགས་ཀྱི་རང་སྒྲ་སྟེ། །དྲན་རྟོགས་ཐམས་ཅད་ཆོས་སྐུར་མངོན་གྱུར་ནས། །བྱང་ཆུབ་མཆོག་གི་གོ་འཕང་ཐོབ་པར་ཤོག །ཅེས་རྒྱལ་ཆེན་རྣམ་མང་ཐོས་སྲས་ཀྱི་གསེར་སྐྱེམས་ནོར་བུའི་ཆར་འབེབས་ཞེས་བྱ་བ་འདི་ཉིད་རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེས་རུ་དམ་ཨོ་རྒྱན་བསམ་བསྟན་ཆོས་གླིང་གི་ཕོ་བྲང་ཆེན་པོའི་ཡང་རྩེ་ནས་ས་ཕོ་རྟ་ལོའི་ཟླ་ཚེས་ལ་བསྟན་ལ་ཕན་པའི་ལྷག་བསམ་རྣམ་པར་དག་པས་བྲིས་པ་དགེ་ལེགས་སུ་གྱུར་ཅིག །