ཟིལ་ཁྲོམ་རྡོ་རྗེ་གཡུང་དྲུང་གི་ཕྲིན་ལས་དངོས་གྲུབ་འབྱུང་གནས་བཞུགས་སོ།།

ཨོཾ་སྭ་སྟི། རིགས་བརྒྱའི་ཁྱབ་བདག་དཔལ་པདྨ་ཐོད་ཕྲེང་ལ་ཕྱག་འཚལ་ལོ། །ལྷ་མཆོག་ཆེན་པོ་རྡོ་རྗེ་གཡུང་དྲུང་རྩལ་མཆོད་པར་འདོད་ན།ཕྱི་ནང་གི་དམ་རྫས་དང་།མཆོད་པའི་ཡོ་བྱད་རྣམས་ཚོགས་པར་བྱས་ནས། །ཧྲཱི བདག་ཉིད་སངས་རྒྱས་ཀུན་འདུས་པདྨ་འབྱུང་། །དཀར་དམར་མདངས་ལྡན་ཞི་འཛུམ་ཆགས་པའི་ཉམས། །ཞལ་གཅིག་ཕྱག་གཉིས་རྒྱལ་པོ་རོལ་བའི་སྟབས། །ཕྱག་གཡས་གསེར་གྱི་རྡོ་རྗེ་ཐུགས་ཀར་བསྣམས། །གཡོན་པས་མཉམ་བཞག་བདེ་སྐྱོང་ཀཱ་པ་ལར། །འཆི་མེད་ཡེ་ཤེས་ཚེ་ཡི་བུམ་པས་བརྒྱན། །དབུ་ལ་འདབ་ལྡན་པདྨའི་སྙན་ཞུ་གསོལ། །གསང་སྔགས་རིག་སྔགས་ནུས་པ་རྫོགས་པའི་ཕྱིར། །ཕོད་ཀ་མཐིང་ནག་ཟ་འོག་བེར་ཕྱམ་གསོལ། །སངས་རྒྱས་ཀུན་དང་ངོ་བོ་གཅིག་པའི་ཕྱིར། །ཆོས་གོས་དམར་པོ་གསེར་གྱི་ཧ་རིས་ཅན། །གྲུ་མོ་གཡོན་ན་ལྷ་ལྕམ་མནྡ་ར། །སྦས་པའི་ཚུལ་གྱི་ཁ་ཊཱཾ་རྩེ་གསུམ་བསྣམས། །སྣང་སྟོང་འཇའ་ཟེར་ཐིག་ལེའི་ཀློང་དུ་བཞུགས། །མདུན་དུ་འཁོར་ཡུག་གངས་རིའི་ཕྲེང་བ་ཅན། །སྐྱེད་ཚལ་ཡིད་འོང་ནེའུ་སེང་ལྗོན་ཤིང་དང་། །རྫིང་བུ་ཆུ་མིག་ལྟེང་ཀ་མཚོ་མོ་བརྒྱ། །ཀ་ལ་པིངྐ་མཐིང་རིལ་ཀ་རནྟ། །ངང་པ་ངུར་པ་རི་སྐེག་ཁྲུང་ཁྲུང་བཞད། །ཆུ་བྱ་སྣ་ཚོགས་གླུ་ལེན་ཟློས་གར་བསྒྱུར། །གླང་ཆེན་འདོད་འཇོའི་བ་མོ་ལ་སོགས་པ། །རི་དྭགས་གཡུང་དྭགས་མང་པོ་རྩེ་གར་བསྒྱུར། །ལྷ་ཆེན་འཕྲུལ་དགའི་ལོངས་སྤྱོད་འགྲན་ནུས་པ། །ངོ་མཚར་བཀོད་པ་ཡིད་འཕྲོག་བསམ་ལས་འདས། །དེ་དབུས་འཇའ་ཟེར་འོད་ཕུང་འཁྲིག་པའི་ཀློང་། །རིན་ཆེན་དུང་གི་སྐུ་མཁར་དགུ་བརྩེགས་ལ། །ཁ་བད་ཐམས་ཅད་རིན་ཆེན་དངུལ་ལས་བྱས། །བ་གམ་དྭངས་གསལ་ཤེལ་གྱི་རང་བཞིན་ལ། །མུ་ཏིག་དཀར་དམར་ཕྲེང་བས་ལན་ཚར་བྱས། །གཡུ་ཡི་གདུང་མ་གདུང་སྣམ་གསེར་ལས་བྱས། །ཀ་ཞུ་རིན་ཆེན་བཻཌཱུརྱ་ལས་གྲུབ། །པདྨ་རཱ་གའི་ཀ་ཆེན་སྟོང་ཕྲག་གཅིག །ཀ་ཕྲན་སྟོང་ཕྲག་བརྒྱད་བརྒྱས་བཀོད་ལེགས་ཤིང་། །ཀ་ཁྲབ་རིན་ཆེན་ཨནྡ་རྙིལ་ལས་བྱས། །ཀ་གདན་རྡོ་རྗེ་ཕ་ལམ་རང་བཞིན་ལ། །སྣ་ཚོགས་རིན་པོ་ཆེ་ཡི་གྲལ་ཕྱམ་མཛེས། །མུ་མེན་བྱུ་རི་ཤར་བུ་མདའ་ཡབ་མཛེས། །ས་གཞི་ཐམས་ཅད་མར་གད་ཉིད་ལས་གྲུབ། །རིན་ཆེན་ཨིནྡྲ་ནི་ལའི་ཐེམ་སྐས་ཅན། །དགོས་འདོད་ཀུན་འབྱུང་ནོར་བུ་བསམ་འཕེལ་ནི། །ཉི་མ་སྟོང་ལས་ལྷག་པའི་འོད་ཟེར་ཅན། །རྟག་ཏུ་ཉིན་མོའི་དཔལ་ལ་སྤྱོད་ནུས་པ། །ཕོ་བྲང་ཆེན་པོའི་རྩེ་མོར་ཏོག་གིས་སྤྲས། །མཆོང་གི་སྒོ་མོ་དངུལ་གྱི་ཏྲ་བས་བརྒྱན། །ཕྱོགས་དང་ཕྱོགས་མཚམས་འཁོར་ཡུག་ཐམས་ཅད་དུ། །ལྷབ་ལྷུབ་དར་གྱི་ལྡ་ལྡིས་ཀུན་ནས་སྤྲས། །འཕན་གདུགས་རྒྱལ་མཚན་བླ་རེ་བ་དན་དང་། །རིན་ཆེན་སྣ་ཚོགས་ནོར་བུའི་དྲྭ་ཕྱེད་ཀྱིས། །ཡོ་བྱད་སྣ་ཚོགས་ཕུན་སུམ་ཚོགས་པས་བརྒྱན། །རིན་ཆེན་སྐུ་མཁར་དགུང་ལ་སྙེགས་པ་འདྲ། །ཐད་ནས་ཉི་མ་ཟླ་བ་ཤར་བ་ལ། །ཕོ་བྲང་མགུལ་དུ་ལྷོ་སྤྲིན་ཕྱུག་མོ་འཁྲིགས། །ཞོལ་དུ་རྩི་ཤིང་མེ་ཏོག་སྣ་ཚོགས་པ། །ཨུཏྤལ་པདྨ་དཀར་དམར་ཀུ་མུ་ཏ། །མནྡ་ར་དང་ཨུ་དུམ་ཝ་ར་སོགས་། །སྨན་གྱི་དྲི་བསུང་ཕྱོགས་བཅུ་ཀུན་ཏུ་འཕྲོ། །རིན་ཆེན་སྣ་ཚོགས་ར་བ་སུམ་རིམ་ན། །མ་རྨོས་ལོ་ཏོག་དཔག་བསམ་ཤིང་ཆེན་མཛེས། །ཡན་ལག་བརྒྱད་ལྡན་ཁྲུས་གྱི་རྫིང་བུ་དང་། །གཏེར་གྱི་ཁང་ཆེན་གཏེར་བུམ་བྱེ་བའི་ཚོགས། །རྣམ་མང་ནམ་མཁའི་མཛོད་ཀྱི་ལོངས་སྤྱོད་ནི། །འཁོར་དགུའི་ལོངས་སྤྱོད་ཕུན་སུན་ཚོགས་པའི་དཔལ། །བསམ་གྱིས་མི་ཁྱབ་ཉི་ཟེར་རྡུལ་ལྟར་འཁྲིགས། །གཞལ་ཡས་ཆེན་པོའི་དབུས་ཀྱི་ལྟེ་བ་ལ། །རིན་ཆེན་ཆུ་སྐྱེས་ཉི་ཟླ་བརྩེགས་པའི་སྟེང་། །ལྷ་ཡི་སྲས་པོ་ཟིལ་ཁྲོམ་ཟོ་དོར་གཙོ། །སྐུ་མདོག་དཀར་པོ་ཟླ་བ་ཞུན་མའི་མདོག །ཞི་འཛུམ་ཅུང་ཟད་ཆགས་པའི་ཉམས་དང་ལྡན། །སྐུ་ལ་དར་དཀར་བེར་ཆེན་ལྷབ་ལྷུབ་གསོལ། །དུང་གི་གོ་ཁྲབ་རྡོ་རྗེའི་རི་མོ་ཅན། །རྣམ་མང་རིན་ཆེན་སྣ་ཚོགས་རྒྱན་གྱིས་སྤྲས། །དུང་གི་རྨོག་ཞུ་རིན་ཆེན་སྣ་ལྔས་བརྒྱན། །དར་སྣ་ལྔ་ཡི་ཅོད་པན་འཕུར་བ་ལ། །རུ་དར་སྣ་ཚོགས་རྒྱལ་མཚན་རྒོད་འཕྲུ་ཅན། །སྐྱེས་བུ་ཆེན་པོའི་གཡས་ཀྱི་སྟག་དོང་ལ། །ཤེས་རབ་ལྷ་མདའ་མང་པོ་སྐར་ལྟར་འཁྲུག །གཡོན་གྱི་གཟིག་ཤུབས་འཇའ་ཚོན་འོད་འཕྲོ་བར། །ཐབས་ཀྱི་རིན་ཆེན་གཞུ་མོ་ཅོགས་སེ་ཅོག །དེ་མཆན་དངུལ་ཤུབས་གཡུ་འབྲུག་བཀྲ་བ་ལ། །ཡ་ཚ་ཀར་ཕྲན་འོད་ཟེར་གློག་སྟོང་འཁྱུག །ཕྱག་གཡས་དར་དཀར་བ་དན་བསྣམས་པ་ཡིས། །ཕ་རོལ་བདུད་དཔུང་གཡུལ་ལས་རྒྱལ་བར་བྱེད། །གཡོན་པས་སྦ་ལྕག་དཀར་པོ་ཀླད་ལ་གཡུག །སྨྱོ་འདྲེ་རྒྱལ་འགོང་ཚོགས་རྣམས་རྡུལ་དུ་བརླག །ཆིབས་སུ་ཅང་ཤེས་ངང་བ་གཡུ་རྔོག་ཆིབས། །སྟོང་གསུམ་སྐད་ཅིག་ཉིད་ལ་བགྲོད་པར་བྱེད། །དེ་ལ་གསེར་སྒ་གཡུ་ཡི་ཨ་འཇོག་ཅན། །སྔ་རུ་མེ་ཤེལ་ལས་གྲུབ་ཉི་མ་རིས། །ཕྱི་རུ་ཆུ་ཤེལ་ལས་གྲུབ་ཟླ་བ་རིས། །དབང་པོའི་གཞུ་ཡི་གོང་སྨེད་ཁྱུགས་སེ་ཁྱུག །རིན་ཆེན་དངུལ་གྱི་ཡོབ་ཆེན་ཁྲོ་ལོ་ལོ། །བརྗིད་པའི་སྟག་གཟར་གཟིག་གཟར་ལྷབས་སེ་ལྷབ། །དར་གྱི་འཕྲུལ་ལྕེ་སྣ་ཚོགས་པུ་རུ་རུ། །རོལ་དུ་ཅང་ཤེས་ཁམ་པ་ཤེལ་མིག་ཁྲིད། །སྐྱེས་བུ་ཁྱེད་ཀྱི་སྐུ་ཡི་གཡོན་ཟུར་ན། །ཡིད་འོང་བཙུན་མོ་མུ་ཏིག་ཤེལ་རུ་སྨན། །རྒོད་ལྕམ་ཁ་རག་དཔལ་ལྡན་མི་མོའི་ཚུལ། །དཀོར་བདག་ཆེན་མོ་ཁམས་གསུམ་དབང་མོ་ཆེ། །ཟླ་ལྟར་དཀར་བའི་ཞལ་མདངས་ཡ་ལ་ལ། །མཚར་སྡུག་འོད་ཆགས་འཛུམ་མདངས་ཤིགས་སེ་ཤིག །དམར་སེར་མཐིང་ཀའི་ན་བཟའ་ལྷུབས་སེ་ལྷུབ། །དེ་ལ་གསེར་གྱི་རི་མོ་ཁྱུགས་སེ་ཁྱུག །གསེར་གཡུ་མུ་ཏིག་ལན་ཚར་ཤ་ར་ར། །ཕྱག་གཉིས་མདའ་དར་རིན་ཆེན་ཟས་གཞོང་བསྣམས། །སྐབས་རེར་རི་དྭགས་རྭ་ཅན་ཤྭ་བ་ཞོན། །ས་ཡི་ལྷ་མོ་བརྟན་མའི་ཚུལ་འཛིན་པ། །སྐབས་རེར་ཀླུ་ཡི་བུ་མོའི་ཚུལ་འཛིན་ཞིང་། །རུས་སྦལ་དུང་མདོག་ཞོན་ནས་སྟོང་གསུམ་ཉུལ། །སྐྱེས་བུ་ཆེན་པོའི་སྐུ་ཡི་མདུན་ཕྱོགས་ན། །ང་འདྲ་མུ་ནམ་གཙང་དཀར་ལ་སོགས་པའི། །བཀའ་ཉན་བློན་པོ་ཆེན་པོའི་ཚོགས་རྣམས་བཞུགས། །སྐྱེས་མཆོག་ཁྱོད་ཀྱི་སྐུ་ཡི་གཡས་ཕྱོགས་ན། །སྐྱེས་ཕྲན་རྟ་བ་སྟོང་ཕྲག་ཚོགས་རྣམས་ནི། །གོ་ཁྲབ་གྱོན་ཞིང་ཕྱག་ན་མདུང་དར་བསྣམས། །ལྷ་གཉན་ཁྱོད་ཀྱི་སྐུ་ཡི་གཡོན་ཕྱོགས་ན། །དཔའ་བོ་སྐྱེས་ཕྲན་བེར་གྱོན་སྟོང་ཕྲག་གཅིག །ཀུན་ཀྱང་ཕྱག་གཉིས་མདའ་འཕེན་ཤ་ར་ར། །སྐྱེས་བུ་ཆེན་པོ་ཁྱོད་ཀྱི་མདུན་ཕྱོགས་ན། །མི་དཀར་རྟ་དཀར་ཞོན་པ་སྟོང་ཕྲག་གཅིག །སྣ་ཚོགས་བ་དན་ལྕེ་བརྒྱད་པུ་རུ་རུ། །ལྷ་མཆོག་ཁྱོད་ཀྱི་རྒྱབ་ཀྱི་ཕྱོགས་མཚམས་ན། །ལྷ་དམག་གཉན་དམག་བྱེ་བ་སྤུངས་སེ་སྤུང་། །སྟེང་ཕྱོགས་ནམ་མཁའ་སྟོང་པའི་དབྱིངས་རུམ་ན། །བྱ་ཁྲ་བྱ་རྒོད་ཚོགས་ནི་སྤྲིན་ལྟར་གཏིབས། །མཚམས་སུ་དུང་སེང་སྟག་གཟིག་དོམ་དྲེད་ཚོགས། །མི་བཟད་གཅན་གཟན་ཚོགས་ནི་མཆོང་ཞིང་རྒྱུག །ལྷ་གཡག་ཚོགས་ནི་ངུར་གདངས་ཆེམས་སེ་ཆེམ། །ལྷ་རྟ་མང་པོ་སྒ་བཅས་སི་ལི་ལི། །མ་སྲིང་ལྕམ་དྲལ་བཙུན་མོའི་ཚོགས་རྣམས་ནི། །ཆིབས་སུ་ཤྭ་རྐྱང་གཙོད་དང་རྒོ་བ་ཆིབས། །ཕྱག་ན་མདའ་དར་མེ་ལོང་བུམ་པ་འཛིན། །གཞན་ཡང་ལྷ་ཀླུ་གཉན་དང་བདུད་ཀྱི་ཚོགས། །བྱེ་བ་འབུམ་གྱི་ཚོགས་ནི་སྤྲིན་ལྟར་གཏིབས། །གནམ་ས་རི་ལུང་ས་གཞི་བར་སྣང་ཀུན། །ཉི་མའི་ཟེར་གྱི་རྡུལ་ལྟར་གྲངས་ལས་འདས། །བསམ་ཡས་སྒྱུ་འཕྲུལ་དྲྭ་བའི་འཁོར་ལོར་གྱུར། །སྤྱན་འདྲེན་པ་ནི། ཧཱུྃ། རང་བཞིན་ལྷུན་གྱིས་གྲུབ་པའི་གནས་མཆོག་ནས། །གྲངས་མེད་བསྐལ་བ་མང་པོའི་སྔོན་རོལ་དུ། །འཕགས་པའི་ཞལ་མཐོང་སར་གནས་སེམས་དཔའ་ཆེ། །ལྷ་ཡི་སྡེ་དཔོན་ཟིལ་ཁྲོམ་ཟོ་དོར་གཙོ། །སྔོན་ཚེ་པདྨ་འབྱུང་གནས་སྤྱན་སྔ་རུ། །བསྟན་པ་སྲུང་བར་ཁས་བླངས་ཐ་ཚིག་ཅན། །སྔོན་གྱི་གཡར་དམ་གཉེན་པོ་རྗེས་དགོངས་ལ། །སྐད་ཅིག་ཙམ་གྱིས་གནས་འདེར་གཤེགས་སུ་གསོལ། །བསྟན་པ་སྲུང་ཞིང་བསྟན་འཛིན་སྐྱོང་བའི་ཕྱིར། །སྐུ་ཡི་གཟི་བརྗིད་འོད་ཕུང་ལམས་སེ་ལམ། །གསུང་ནི་འགག་མེད་གླུ་དབྱངས་དི་རི་རི། །ཐུགས་ནི་སྙིང་རྗེའི་དབྱིངས་ལས་མ་གཡོས་ཀྱང་། །ལོག་པར་འདྲེན་པའི་བདུད་དཔུང་འདུལ་བ་དང་། །བསྟན་པ་སྲུང་ཕྱིར་གནས་འདིར་གཤེགས་སུ་གསོལ། །བཞུགས་གསོལ་ནི། ཧཱུྃ།གདོད་ནས་ལྷུན་འགྲུབ་ཕོ་བྲང་ཆེན་པོ་འདིར། །ཆུ་སྐྱེས་ཉི་ཟླ་བརྩེགས་པའི་གདན་སྟེངས་སུ། །སྐྱེ་མེད་ཀློང་ལས་ཆོ་འཕྲུལ་ཤར་བའི་སྐུ། །སྐྱེས་མཆོག་རྒྱལ་ཆེན་འཁོར་བཅས་བཞུགས་སུ་གསོལ། །ཕྱག་འཚལ་བ་ནི། ཧཱུྃ། སྐྱེ་མེད་གཉུག་མའི་རང་བྱུང་རང་ཤར་ལྷ། །རང་དང་རྟག་ཏུ་འགྲོགས་ཀྱང་ཞལ་མ་མཇལ། །རིག་པའི་རྒྱལ་པོ་ཟོ་དོར་ཡོངས་ཀྱི་གཙོ། །རང་གྲོལ་དོན་གྱིས་མཇལ་བས་ཕྱག་འཚལ་ལོ། །ཨ་ཏི་པུ་ཧོཿ པྲ་ཏིཙྪ་ཧོཿ མཆོད་པ་འབུལ་བ་ནི། ཧཱུྃ། མཆོད་ཡོན་ཞབས་བསིལ་མེ་ཏོག་བདུག་སྤོས་དང་། །མར་མེ་དྲི་ཆབ་ཞལ་ཟས་རོལ་མོའི་སྒྲ། །གཟུགས་སྒྲ་དྲི་རོ་རེག་བྱ་རྡོ་རྗེ་ཆོས། །ཨ་མྲྀ་ཏ་དང་རཀྟ་དམར་གྱི་མཚོ། །དམ་རྫས་གཏོར་ཆེན་འདོད་ཡོན་ཚོགས་ཀྱིས་བསྐང་། །བདེ་སྟོང་སྦྱོར་སྒྲོལ་རྨད་བྱུང་མཆོད་པའི་སྤྲིན། །མཛེས་པའི་རྡོ་རྗེའི་ལྷ་མོ་བཅུ་དྲུག་གིས། །ས་གཞི་ཁྱབ་པའི་རྫུ་འཕྲུལ་གར་བྱེད་ཅིང་། །ནམ་མཁའ་རབ་འབྱམས་གང་བའི་མཆོད་པའི་སྤྲིན། །མཆོད་པ་འབུལ་ལོ་དགྱེས་པར་བཞེས་ནས་ཀྱང་། །ཕྲིན་ལས་རྣམ་བཞིའི་དངོས་གྲུབ་སྩལ་དུ་གསོལ། །ཨོཾ་བཛྲ་ཨརྒྷཾ་ནས་ཤབྟ་མ་ཧཱ་པཉྩ་ཨ་མྲྀ་ཏ་རཀྟ་བ་ལིངྟ་སརྦ་པཱུ་ཛ་ཁ་ཁ་ཁཱ་ཧི་ཁཱ་ཧི། །བསྟོད་པ་ནི། ཧཱུྃ། ཆོས་ཀྱི་དབྱིངས་ཀྱི་ཕོ་བྲང་དམ་པ་ནས། །ཆོས་སྐུའི་རང་བཞིན་མཚན་མ་མི་མངའ་ཡང་། །ཆོས་ཅན་བག་ཆགས་དྲི་མ་སྦྱང་བའི་ཕྱིར། །ཆོས་སྐྱོང་གཙོ་བོ་སྐུར་བཞེངས་ཁྱོད་ལ་བསྟོད། །ཆོས་དབྱིངས་རྣམ་པར་དག་པའི་ཀློང་ཡངས་ནས། །ཆོས་ཅན་སྣང་བ་གཟུགས་ཀྱི་སྐུར་སྟོན་པ། །ཆོས་ལྡན་རྣལ་འབྱོར་ཡོངས་ལ་སྙིང་ཉེ་བ། །ཆོས་སྐྱོང་དགྲ་བླའི་གཙོ་བོ་ཁྱོད་ལ་བསྟོད། །ཞི་བའི་སྐུ་མཆོག་ལྷ་ཡི་སྲས་པོ་ནི། །བསྐལ་མང་སྔོན་ནས་ཐུགས་བསྐྱེད་མཐར་ཕྱིར་ཞིང་། །ད་ལྟ་བསྟན་པ་སྲུང་བའི་ཚུལ་འཛིན་པ། །རྡོ་རྗེ་གཡུང་དྲུང་ཁྱོད་ལ་ཕྱག་འཚལ་བསྟོད། །ཁྱོད་ནི་སྔོན་ཚེ་པདྨ་འབྱུང་གནས་ཀྱི། །བསིལ་ལྡན་ལྗོངས་འདི་སྐྱོང་བའི་བཀའ་བསྒོས་ལྟར། །ད་ལྟ་སྙིགས་མའི་གདུལ་བྱ་སྐྱོང་མཛད་པ། །སྟོབས་ལྡན་རྒྱལ་ཆེན་ཁྱོད་ལ་ཕྱག་འཚལ་བསྟོད། །གདུལ་དཀའ་འདུལ་བའི་གཙོ་མཆོག་ལྷ་ཡི་སྲས། །འགྲོ་བའི་བདེ་སྐྱིད་བསོད་ནམས་ཕུང་པོ་ནི། །མི་ཉམས་གོང་དུ་སྤེལ་བའི་ལྷ་གཅིག་པུ། །སར་གནས་སེམས་དཔའ་ཁྱོད་ལ་ཕྱག་འཚལ་བསྟོད། །ཞལ་མཐོང་ཙམ་གྱིས་སྐྱེ་དགུའི་ཡིད་འཕྲོག་པ། །མཚན་ཙམ་ཐོས་པས་བདུད་དཔུང་ཕྱེ་མར་བརླག །དྲན་པ་ཙམ་གྱིས་འགྲོ་ཀུན་དགེ་ལ་སྦྱོར། །ལྷག་པའི་ལྷ་མཆོག་ཁྱོད་ལ་ཕྱག་འཚལ་བསྟོད། །མགོན་ཁྱོད་འགྲོ་བ་ཡོངས་ཀྱི་དེད་དཔོན་ཆེ། །ཐུགས་རྗེ་ཆེན་པོའི་སྒྲུབ་ལ་བུ་བཞིན་སྐྱོང་། །མ་རིག་མུན་པའི་སྨག་རུམ་སེལ་མཛད་པ། །ཡེ་ཤེས་སྒྲོན་མེ་ཁྱོད་ལ་ཕྱག་འཚལ་བསྟོད། །བསྐུལ་ཞིང་ཕྲིན་ལས་བཅོལ་བ་ནི། ཧཱུྃ་ཧྲཱིཿ ཆོས་སྐུ་ཞི་བའི་ངང་ལས་མ་གཡོས་ཀྱང་། །གཟུགས་སྐུ་མངོན་སྤྱོད་དྲག་པོའི་སྐུར་བཞེངས་པ། །སྣང་སྲིད་དབང་སྡུད་རྡོ་རྗེ་གཡུང་དྲུང་རྩལ། །དེང་འདིར་མངོན་སྤྱོད་དྲག་པོའི་དུས་ལ་བབ། །གཡུལ་ལས་རྣམ་པར་རྒྱལ་བའི་དཔའ་བོ་ཆེ། །རྒྱལ་ཆེན་ཁྱོད་ཀྱི་སྐུ་ཡི་སྤྲུལ་པ་ནི། །གང་ལ་གང་འདུལ་ཉི་ཟེར་རྡུལ་ལྟར་འཚུབས། །དྲག་སྔགས་འབྲུག་སྟོང་ལྡིར་བ་འུ་རུ་རུ། །རྔམས་བརྗིད་ཁྲོས་པའི་མདངས་ལྡན་ཡ་ལ་ལ། །ལས་བྱེད་དྲེགས་པའི་ཚོགས་ནི་ཤ་ར་ར། །སྤྲུལ་པ་ཕོ་ཉའི་ཚོགས་ནི་ཐོག་ལྟར་འབེབས། །ཁྲོ་གཏུམ་དྲག་སྔགས་རྔམས་པའི་ཕྲིན་ལས་ཀྱིས། །སྡང་ཞིང་གདུག་པའི་སེམས་འཆང་མི་བསྲུན་སྡེ། །རྦོད་གཏོང་གཏད་ཁྲམ་སྟོན་པའི་བོན་སྔགས་ཚོགས། །ཉི་ཟླའི་ར་བ་གླིང་བཞི་གླིང་ཕྲན་དང་། །ཆོས་བོན་སྲུང་མའི་སྐྱབས་གནས་གང་ཡོད་ཀྱང་། །ད་ལྟ་ཉིད་དུ་སྒྲོལ་བའི་ཕྲིན་ལས་མཛོད། །ངན་སྨྲས་མི་ཁ་བྲ་མཆུ་དབྱེ་ཤགས་དང་། །དུག་སྦྱོར་གཡུལ་ཤོམས་བྱེད་པའི་དགྲ་བོའི་ཚོགས། །ཚེ་བསོད་དབང་ཐང་དཔལ་ལ་འཚེ་བ་རྣམས། །མ་བསྐུལ་པར་ཡང་བརླག་པའི་ཕྲིན་ལས་མཛོད། །མི་འདོད་ཕུང་ཁྲོལ་བྱེད་པའི་དམ་སྲིའི་ཚོགས། །ནད་ཡམས་སྣ་འདྲེན་གདོན་བགེགས་འབྱུང་པོ་རྣམས། །ལྷ་མཆོག་ཁྱོད་ཀྱི་སྐུ་ཡི་གཟི་བརྗིད་ཀྱིས། །མིང་ཙམ་མེད་པར་གཏན་ནས་བརླག་པར་མཛོད། །མདོར་ན་བྱང་ཆུབ་སྒྲུབ་པའི་གང་ཟག་རྣམས། །བསྟན་འགྲོར་ཕན་པའི་དོན་ཆེན་སྒྲུབ་པ་ལ། །ཁྱོད་ཀྱིས་སྔོན་གྱི་ཐུགས་དམ་མ་གཡེལ་བར། །དུས་རྣམ་ཀུན་ཏུ་བསྲུང་ཞིང་སྐྱོབ་པར་མཛོད། །ཅེས་པ་འདི་ནི་རྫོང་སར་བཀྲ་ཤིས་ལྷ་རྩེའི་དགེ་བཤེས་དྲུང་ཡིག་ངག་དབང་བཟོད་པ་ནས་ལྷ་རྫས་ཟླ་བའི་མདངས་ལྡན་བཅས་བསྐུལ་བའི་ངོར་ས་ཕོ་རྟ་ལོའི་ཟླ་ཚེས་ཉིན་རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེས་རང་སྤྱིལ་འཆི་མེད་གྲུབ་པའི་དགའ་ཚལ་ནས་བྲིས་པ་དགེ་ལེགས་སུ་གྱུར་ཅིག །