གཉན་ཆེན་ཐང་ལྷའི་གསོལ་མཆོད་བཻཌཱུརྱའི་རྒྱུད་མངས་ཞེས་བྱ་བ་བཞུགས་སོ།།

ཧཱུྃ། འཛམ་གླིང་བྱང་ཕྱོགས་ཁ་བ་ཅན་གྱི་ཡུལ། །མེ་ཏོག་པདྨ་སྣ་ཚོགས་གཅལ་དུ་བཀྲམ། །གངས་རིའི་ཕྲེང་བ་ཡིད་འོང་མཚོ་ཆེན་ལྡན། །རིན་ཆེན་ཤེལ་གྱི་སྐུ་མཁར་གྲུ་བཞི་པ། །རྩེ་མོ་མཐོན་པོ་དགུང་ལ་བསྙེགས་པ་འདྲ། །ཉི་མ་ཟླ་བ་ཐད་ནས་ཤར་བ་ལས། །རྩ་བ་ཡིད་བཞིན་གཡུ་ཡི་རྒྱ་མཚོ་འཁྱིལ། །རྩེ་མོར་ཆུ་འཛིན་དཀར་པོའི་ཕྲེང་བ་ལས། །རིན་ཆེན་ཆར་འབེབས་གཡུ་འབྲུག་སྒྲ་བསྒྲགས་ཤིང་། །སྐེད་པར་འཇའ་ཚོན་སྣ་ཚོགས་ཀུན་ནས་མཛེས། །རིན་ཆེན་གཡུ་ཡི་ན་བུན་འཁྲིགས་པ་ལ། །ཤེལ་གྱི་སྐུ་མཁར་རྔམ་བརྗིད་འབར་བའི་ནང་། །རིན་ཆེན་སྣ་ཚོགས་དྲྭ་བ་དྲྭ་ཕྱེད་ཀྱི། །ཕྱོགས་བཅུར་ཀུན་ཏུ་རྒྱན་གྱིས་མཛེས་པར་སྤྲས། །གཞལ་ཡས་ཆེན་པོ་དེ་ཡི་ལྟེ་བ་ལ། །མ་ཆགས་སྐྱོན་བྲལ་པདྨ་ཉི་ཟླའི་གདན། །གསེར་གྱི་རྟ་མཆོག་སྣ་ཚོགས་རྒྱན་སྤྲས་སྟེང་། །བྱང་ཆུབ་སེམས་དཔའ་ནམ་མཁའི་སྙིང་པོ་ཡི། །སྤྲུལ་པ་ལྷ་ཆེན་རྡོ་རྗེ་འབར་བ་རྩལ། །གཉན་ཆེན་ཐང་ལྷ་ཡར་ཞུར་མཚན་གསོལ་བ། །སྐུ་མདོག་དཀར་པོ་ཟླ་བ་ཞུན་མའི་མདོག །ཡིད་འོང་མཛེས་པ་ཅུང་ཟད་ཁྲོ་འཛུམ་ཚུལ། །སྐུ་ལ་དར་དཀར་གསེར་གྱི་རི་མོ་ཅན། །བེར་ཆེན་སུམ་བརྩེགས་གསོལ་ཞིང་རྒྱལ་པོའི་ཚུལ། །ཕྱག་ན་རྦ་ལྕག་ཤེལ་གྱི་ཕྲེང་བ་བསྣམས། །དབུ་ལ་དར་གྱི་ལ་ཐོད་དཀར་པོ་གསོལ། །ཞབས་ལ་སག་ལྷམ་འཇའ་རིས་འཁྱིལ་བ་མནབས། །ཡིད་བཞིན་ནོར་བུ་དབང་གི་རྒྱལ་པོས་བརྒྱན། །འོད་ཟེར་སྣ་ཚོགས་ཕྱོགས་བཅུར་ཀུན་ཏུ་འཕྲོ། །མཐུ་ཆེན་མཆེད་འཁོར་སུམ་བརྒྱ་དྲུག་ཅུ་དང་། །དམག་དཔུང་བྱེ་བ་འབུམ་སྡེའི་འཁོར་གྱིས་བསྐོར། །ཀུན་ཀྱང་ཁྲོ་གཏུམ་རྔམ་བརྗིད་འབར་བར་བཞུགས། །རང་ཉིད་ལྷར་གསལ་ཐུགས་ཀའི་ས་བོན་ལས། །འོད་འཕྲོས་རང་བཞིན་གནས་ནས་སྤྱན་དྲངས་གྱུར། །སྤྱན་འདྲེན་ནི། ཧཱུྃ། རང་བཞིན་ཆོས་ཀྱི་དབྱིངས་ཀྱི་ཕོ་བྲང་ནས། །མི་མཇེད་འཇིག་རྟེན་ཀུན་ལ་དབང་བསྒྱུར་བའི། །མཐུ་ཆེན་ཚངས་པའི་རྒྱལ་པོ་མཐུ་བོ་ཆེ། །དྲི་ཟའི་རྒྱལ་པོ་ཟུར་ཕུད་ལྔ་པ་ནི། །གསང་བའི་ཡུམ་ཆེན་རྡོ་རྗེ་གཡུ་སྒྲོན་མ། །མཆེད་འཁོར་སུམ་བརྒྱ་དྲུག་ཅུའི་ཚོགས་དང་བཅས། །དམག་དཔུང་བྱེ་བ་འབུམ་སྡེ་འཁོར་གྱིས་བསྐོར། །དམ་ཚིག་དབང་གིས་གནས་འདིར་གཤེགས་སུ་གསོལ། །བཞུགས་གསོལ་ནི། ཧཱུྃ། བདེ་གཤེགས་སྟོང་གི་བསྟན་པ་སྲུང་བ་དང་། །དབུས་གཙང་རུ་བཞིའི་ཡུལ་ལྷའི་ཚུལ་འཛིན་པ། །ལྷ་ཆེན་ཡོངས་ཀྱི་རྒྱལ་པོ་འཁོར་དང་བཅས། །པདྨ་ཉི་ཟླའི་གདན་ལ་བཞུགས་སུ་གསོལ། །ས་མ་ཡཱ་ཏིཥྛ་ལྷན། ཕྱག་འཚལ་བ་ནི། ཧཱུྃ། ཡེ་ཤེས་གསང་བའི་ལྷ་མཆོག་ཁྱོད་ཉིད་ནི། །གཟི་བརྗིད་ཉི་མ་འབུམ་ལས་ལྷག་པའི་སྐུ། །སྨྱོ་འདྲེ་རྒྱལ་འགོང་འདུལ་བའི་ལྷ་གཅིག་པུ། །འཁོར་དང་བཅས་ལ་རྩེ་གཅིག་གུས་པས་འདུད། །ཨ་ཏི་པུ་ཧོ། པྲ་ཏི་ཙ་ཧོ། མཆོད་པ་ནི། ཧཱུྃཿ སྟོང་གསུམ་རབ་འབྱམས་རྒྱ་མཚོའི་ཞིང་ཁམས་ན། །ཕྱི་མཆོད་འདོད་ཡོན་རྒྱ་མཚོ་མཁའ་ལྟར་ཁྱབ། །ནང་མཆོད་སྨན་རཀ་གཏོར་གསུམ་སྤྲིན་ལྟར་གཏིབ། །གསང་མཆོད་བདེ་སྟོང་ཡེ་ཤེས་བླ་ན་མེད། །ཁྱད་པར་མཐུན་རྫས་མན་ཤེལ་འོད་འཕྲོ་སོགས། །དངོས་འབྱོར་ཡིད་སྤྲུལ་རྣམ་རོལ་ལས་བྱུང་བ། །རབ་འབྱམས་ནམ་མཁའ་གང་བའི་འཁོར་ལོ་འབུལ། །ཨོཾ་བཛྲ་ཨརྒྷཾ་སོགས་ནས་ཨ་ཧཱུྃ། བསྟོད་པ་ནི། ཧཱུྃ་ཧྲཱིཿ སྔོན་ཚེ་གདོད་ནས་མངོན་པར་བྱང་ཆུབ་ཀྱང་། །སྨྱོ་འདྲེ་རྒྱལ་པོ་འདུལ་བའི་ལྷ་གཅིག་པུ། །མཐུ་སྟོབས་རྫུ་འཕྲུལ་ཕྲིན་ལས་མཆོག་མངའ་བ། །དྲི་ཟའི་རྒྱལ་པོ་ཟུར་ཕུད་ལྔ་པར་བསྟོད། །སྟོང་གསུམ་མི་མཇེད་འཇིག་རྟེན་ཀུན་གྱིས་བདག །དངོས་གྲུབ་མཆོག་སྩོལ་བདུད་དཔུང་ཟིལ་གྱིས་མནན། །དཔའ་བོ་སྟོབས་ལྡན་སྙིང་རྗེ་འབྱུང་གནས་ཆེ། །ཤེལ་གྱི་གནམ་ལྷ་དཀར་པོ་ཁྱོད་ལ་བསྟོད། །གང་སྐུ་ཉི་མ་འབུམ་གྱི་འོད་ཟེར་ཅན། །དགྱེས་པའི་གསུང་སྙན་གད་རྒྱངས་དི་རི་རི། །སངས་རྒྱས་བསྟན་པ་གཉན་པོ་སྲུང་མཛད་པ། །གཉན་ཆེན་ཐང་ལྷ་ཡར་ཞུར་ཁྱོད་ལ་བསྟོད། །ཕྲིན་བཅོལ་ནི། ཧཱུྃ་ཧྲཱིཿ སྔོན་ཚེ་འོག་མིན་ཀ་དག་རྡོ་རྗེའི་དབྱིངས། །བྱང་ཆུབ་སེམས་དཔའ་ནམ་མཁའི་སྙིང་པོ་ནི། །འཇིག་རྟེན་དྲེགས་པའི་མངའ་བདག་ཚུལ་འཛིན་པ། །སྤྲུལ་པ་ལྷ་མཆོག་རྡོ་རྗེ་འབར་བ་རྩལ། །གསང་བའི་ཡུམ་ཆེན་རྡོ་རྗེ་གཡུ་སྒྲོན་མ། །མཆེད་འཁོར་བཀའ་སྡོད་དྲེགས་པ་འཁོར་དང་བཅས། །མཐུ་སྟོབས་རྫུ་འཕྲུལ་ནམ་མཁའི་མཐའ་དང་མཉམ། །སྒྲུབ་པའི་རིག་འཛིན་རྣལ་འབྱོར་བདག་ཅག་ལ། །སྔོན་གྱི་ཞལ་བཞེས་ཐུགས་དམ་རྗེས་དགོངས་ཏེ། །ནད་གདོན་བར་ཆད་མི་མཐུན་གནོད་པའི་ཚོགས། །མ་ལུས་མཐའ་དག་ཞི་བའི་ཕྲིན་ལས་མཛོད། །ཚེ་བསོད་དཔལ་འབྱོར་ཡེ་ཤེས་ཡོན་ཏན་ཚོགས། །ཡར་ངོའི་ཟླ་བ་ཇི་བཞིན་འཕེལ་བར་མཛོད། །སྣོད་བཅུད་འཁོར་དང་ལོངས་སྤྱོད་དམིགས་བྱའི་ཚོགས། །ཁམས་གསུམ་དབང་དུ་སྡུད་པའི་ཕྲིན་ལས་མཛོད། །ལོག་ལྟ་གནོད་བྱེད་དམ་ཉམས་དགྲ་བགེགས་རྣམས། །མངོན་སྤྱོད་དྲག་པོའི་འཕྲིན་ལས་འགྲུབ་པར་མཛོད། །མདོར་ན་བདག་གི་ཡིད་ལ་གང་འདོད་པ། །འབད་མེད་ལྷུན་གྱིས་འགྲུབ་པའི་ཕྲིན་ལས་མཛོད། །ཅེས་པ་འདི་ནི་ཡིག་ཐུབ་བསྟན་ནོར་བུ་ནས་འདི་ལྟར་དགོས་ཞེས་བསྐུལ་བ་ལ་བརྟེན་ནས་རུ་དམ་ཨོ་རྒྱན་བསམ་གཏན་ཆོས་གླིང་གི་ཕོ་བྲང་ཆེན་པོའི་ཡང་རྩེ་འཆི་མེད་གྲུབ་པའི་དགའ་ཚལ་དུ་རྫོགས་སྤྲུལ་ལྔ་པ་༧ཐུབ་བསྟན་ཆོས་ཀྱི་རྡོ་རྗེས་མེ་སྦྲུལ་ཟླ་བ་དྲུག་པའི་ཚེས་བཅུ་གསུམ་ལ་བྲིས་པ་དགེའོ། །