གཉན་ཆེན་ཐང་ལྷའི་གསེར་སྐྱེམས་ཨུ་དུམ་ཝ་རའི་ཆུན་འཕྱང་ཞེས་བྱ་བ་བཞུགས་སོ།།

ཧཱུྃ། བསྐལ་བ་གྲངས་མེད་མང་པོའི་གོང་རོལ་ནས། །སྔོན་ཚེ་བྱང་ཆུབ་སེམས་དཔའ་ནམ་མཁའི་སྙིང་། །བསྟན་པ་སྲུང་ཞིང་བསྟན་འཛིན་སྐྱོང་བ་དང་། །ཕྲིན་ལས་རྣམ་བཞིའི་ལས་རྣམས་བསྒྲུབ་པའི་ཕྱིར། །དྲེགས་པ་ཀུན་གྱི་རྒྱལ་པོའི་ཚུལ་བསྟན་པ། །སྤྲུལ་པ་ལྷ་ཆེན་རྡོ་རྗེ་འབར་བ་རྩལ། །ཡབ་ནི་དགེ་བསྙེན་འོ་དེ་གུང་རྒྱལ་དང་། །ཡུམ་ནི་སྲིད་རྒྱལ་གཡུ་བྱ་གཤོག་གཅིག་ལགས། །ལྷ་སྲིད་རྣམ་གཉིས་སྲིད་ཅིང་བཤོས་པ་ལས། །སྐུ་ལྷ་ལྷ་ཆེན་རྡོ་རྗེ་འབར་བ་རྩལ། །སྐུ་གཅིག་མཚན་གྱི་རྣམ་གྲངས་དྲུག་ཏུ་གྲགས། །ཤེལ་གིང་དཀར་པོ་གནམ་ཐེ་དཀར་པོ་གྲགས། །གནམ་ལྷ་བྱང་ཆུབ་དུང་གི་ཐོར་ཚུགས་ཅན། །གནམ་མཚོའི་རྒྱལ་པོ་ཟུར་ཕུད་ལྔ་པ་ཞེས། །གཞན་ཡང་སྡེ་བརྒྱད་སྤྲུལ་པ་སྤྲོ་བའི་ཚེ། །སྐུ་ལྷ་མཁའ་རི་སྨྱོན་ཁ་ཟླ་བའི་གདོང་། །ཟུ་ར་ར་སྐྱེས་གཉན་ཆེན་མཁར་ནག་དང་། །ནེའུ་ལེ་ཐོད་དཀར་གཟི་ཅན་འབར་བ་སོགས། །སྡེ་བརྒྱད་དུ་མར་སྤྲུལ་པ་ཕྱོགས་བཅུར་འགྱེད། །འདམ་ཤོད་སྣར་མོའི་ཡུལ་དུ་བཞུགས་པའི་ཚེ། །ཞི་བ་ཆེན་པོའི་ཕྲིན་ལས་སྒྲུབ་པའི་ཕྱིར། །ཞི་མཛད་ལྷ་ཆེན་རྡོ་རྗེ་འབར་བ་རྩལ། །རྒྱས་པ་ཆེན་པོའི་ཕྲིན་ལས་སྒྲུབ་པའི་ཕྱིར། །རྒྱས་མཛད་ལྷ་ཆེན་རྡོ་རྗེ་འབར་བ་རྩལ། །དབང་གི་ལས་ཀྱི་ཕྲིན་ལས་སྒྲུབ་པའི་ཕྱིར། །དབང་གི་ལྷ་མཆོག་རྡོ་རྗེ་འབར་བ་རྩལ། །དྲག་པོ་ཆེན་པོའི་ཕྲིན་ལས་སྒྲུབ་པའི་ཕྱིར། །ལྷ་ཆེན་ཀརྨ་རྡོ་རྗེ་འབར་བ་རྩལ། །སྐྱེས་བུ་བཞིན་བཟང་འབྲོང་གཡག་ཞོལ་ཆེན་དང་། །ལྷ་མཆོག་དཔའ་བོ་རྡོ་རྗེ་འབར་བ་རྩལ། །སྲིད་གསུམ་བདག་པོ་ཚངས་པ་ཆེན་པོ་སྟེ། །ངོ་བོ་གཅིག་ལ་རྣམ་པ་དགུ་རུ་ཤར། །དམ་ཉམས་གཤེད་མ་དམ་ལྡན་ཀུན་གྱི་གྲོགས། །སྨྱོ་འདྲེ་རྒྱལ་འགོང་འདུལ་བའི་ལྷ་གཅིག་པུ། །བྱང་ཐང་གནམ་མཚོ་ཡོངས་ཀྱི་བདག་མོ་ནི། །གསང་བའི་ཡུམ་ཆེན་རྡོ་རྗེ་གཡུ་སྒྲོན་མ། །ལྷ་གཉན་ཆེན་པོའི་སྟེང་གི་ནམ་མཁའ་ལ། །ཡེ་ཤེས་སྤྲུལ་པའི་ཁྱུང་ནག་དབུ་དགུ་པ། །ས་བདག་ཀླུ་གཉན་གདོན་རྣམས་འཇོམས་པར་བྱེད། །གཡས་ཕྱོགས་སྤྲུལ་པ་དུང་ཁྲ་དཀར་པོ་དང་། །གཡོན་དུ་དུང་སྤྱང་ཕག་མོ་གློག་ལྟར་འཁྱུག །རྒྱབ་ཀྱི་ཕྱོགས་ནས་ལྕགས་སྡིག་ནག་པོ་ཡིས། །རྒབ་འདྲེ་འབྱུང་པོའི་ཚོགས་རྣམས་རྡུལ་དུ་རློག །མཆེད་འཁོར་སུམ་བརྒྱ་དྲུག་ཅུའི་འཁོར་གྱིས་བསྐོར། །གཟི་བརྗིད་འོད་ཟེར་ཉི་མ་འབུམ་བཞིན་རྒྱས། །རབ་འཇིགས་དཔུང་ཚོགས་ཆར་སྤྲིན་གཏིབ་པ་བཞིན། །དགྱེས་པའི་གད་རྒྱང་བཞད་སྒྲ་དི་རི་རི། །རྗེས་སུ་འཇུག་པའི་རྣལ་འབྱོར་བདག་ཅག་ལ། །ཐུགས་རྗེ་ཆེན་པོས་ཡལ་བར་མི་དོར་བའི། །ཕྲིན་ལས་རྣམ་བཞིའི་ལས་རྣམས་སྒྲུབ་པའི་ཕྱིར། །དགྱེས་པའི་ཚུལ་གྱི་གནས་འདིར་གཤེགས་སུ་གསོལ། །ཁྱེད་ལ་དགྱེས་པའི་མཆོད་པ་འབུལ་བ་ནི། །ཉོན་མོངས་དུག་ལྔ་རྣམ་པར་དག་པའི་རྫས། །མ་དཱ་ན་ཡི་བདུད་རྩི་དག་པའི་ཆང་། །ཚེ་གཅིག་སངས་རྒྱས་མངོན་དུ་བྱེད་པའི་རྫས། །དཀར་གསུམ་མངར་གསུམ་འོ་ཞོའི་མཆོད་པའི་སྤྲིན། །འཆི་མེད་ལྷ་ལས་བབས་པའི་བདུད་རྩི་ཆེ། །འབྲུ་བཅུད་སྟོང་སྦྱར་རྒྱ་ཇ་ངད་ལྡན་ལ། །རིན་ཆེན་སྣ་ལྔ་བརྡར་བའི་ཞལ་སྐྱེམས་འདི། །སྐུ་ལྷ་ལྷ་ཆེན་རྡོ་རྗེ་འབར་བ་མཆོད། །ལྷ་ཡི་དགེ་བསྙེན་འོ་དེ་གུང་རྒྱལ་མཆོད། །སྲིད་པའི་རྒྱལ་མོ་གཡུ་བྱ་གཤོག་གཅིག་མཆོད། །དགྱེས་སྡེ་ཡུམ་ཆེན་རྡོ་རྗེ་གཡུ་སྒྲོན་མཆོད། །སྲས་དང་བློན་པོ་སྤྲུལ་པ་ཡང་སྤྲུལ་མཆོད། །མཆེད་འཁོར་སུམ་བརྒྱ་དྲུག་ཅུར་མཆོད་པ་འབུལ། །དེ་ལྟར་གསེར་སྐྱེམས་ཕུལ་བའི་བྱིན་རླབས་ཀྱིས། །སྔོན་ཚེ་འདས་དུས་བསྐལ་བའི་དང་པོ་ལ། །ཡུལ་གྱི་མིང་ནི་བྱང་ལམ་བར་མ་རུ། །གསང་བའི་བདག་པོ་ཕྱག་ན་རྡོ་རྗེ་ཡིས། །དམ་ཚིག་བསྒྲགས་ནས་དམ་ལ་བཞག་པར་མཛད། །སློབ་དཔོན་ཆེན་པོ་པདྨ་འབྱུང་གནས་ལ། །ལྷ་གཉན་ཁྱོད་ཀྱི་བར་ཆད་བརྩམས་པ་ན། །སྦྲུལ་དཀར་ཞིག་གིས་ལམ་འཕྲང་བཅད་པའི་ཚེ། །མགོ་བོ་གྲུ་གུའི་ཡུལ་དུ་སླེབས་པ་ལ། །མཇུག་མ་ཁམས་ཀྱི་སོག་ཆུ་གཡེར་ཐང་བརྐྱང་། །སློབ་དཔོན་ཆེན་པོའི་དམ་ཚིག་བསྒྲགས་པའི་ཚེ། །ཐང་ལྷ་གངས་ལ་བྲོས་པའི་གངས་ཞུ་ནས། །རྩེ་མོ་ནག་ཟང་གཡའ་སྔོན་ཉིལ་གྱིས་བྱུང་། །མ་བཟོད་ཞལ་ཟས་སྣ་ཚོགས་ཚོགས་འཁོར་དྲངས། །རང་གི་གཟུགས་མཆོག་དངོས་སུ་བསྟན་ནས་ཀྱང་། །རང་རྟགས་སྲོག་གི་སྙིང་པོ་མངོན་དུ་ཕུལ། །གསང་མཚན་རྡོ་རྗེ་མཆོག་རབ་རྩལ་དུ་གསོལ། །དེ་འོག་བསྐལ་བ་བར་མའི་དུས་ཀྱི་ཚེ། །བསམ་ཡས་ཧས་པོ་རི་ཡི་རྩེ་མོ་ན། །དབང་ཆེན་རྟ་མཆོག་པདྨ་ཧེ་རུ་ཀས། །དབང་ཆེན་རྔམ་པའི་སྒྲ་ཡིས་བཏུལ་བའི་ཚེ། །ཅི་བགྱིའི་བཀའ་ཉན་སྒྲུབ་པར་ཁས་བླངས་པ། །ཤར་ཕྱོགས་རི་བོ་བཀྲ་བཟང་རྩེ་མོ་ན། །བཅོམ་ལྡན་དཔལ་ཆེན་རྡོ་རྗེ་གཞོན་ནུ་ཡིས། །རྡོ་རྗེ་སྲིན་པོའི་སྒྲ་ཡིས་བཏུལ་བའི་ཚེ། །ཁས་བླངས་དམ་བཅས་རང་སྲོག་མངོན་དུ་ཕུལ། །དེ་ལྟར་སྔོན་གྱི་གཡར་དམ་རྗེས་དགོངས་ལ། །བདག་ཅག་བྱང་ཆུབ་སྒྲུབ་པའི་གང་ཟག་རྣམས། །ཚེ་རིང་ནད་མེད་ལོངས་སྤྱོད་ལྡན་པ་དང་། །སྙན་གྲགས་ནམ་མཁའ་ལྟ་བུར་རབ་རྒྱས་པ། །དཔལ་འབྱོར་བསོད་ནམས་གངྒཱའི་རྒྱུན་བཞིན་དུ། །འཛད་མེད་དབྱར་གྱི་མཚོ་ལྟར་རྒྱས་གྱུར་ཅིག །མདོར་ན་བྱང་ཆུབ་སྒྲུབ་པའི་གང་ཟག་རྣམས། །ཚེ་འདིའི་བར་ཆད་བདུད་ལས་རྣམ་རྒྱལ་ཞིང་། །དོན་གཉིས་ལྷུན་གྱིས་འགྲུབ་པའི་ཕྲིན་ལས་མཛོད། །ཅེས་པ་འདི་ཡང་ཡིག་ཐུབ་བསྟན་ནོར་བུ་ནས་བསྐུལ་བའི་ངོར་རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེས་རུ་དམ་ཨོ་རྒྱན་བསམ་བསྟན་ཆོས་གླིང་གི་འཆི་མེད་གྲུབ་པའི་དགའ་ཚལ་དུ་ས་ཕོ་རྟ་ལོའི་ཟླ༢ཚེས་༢༩ལ་བྲིས་པ་དགེ