སྡེ་དཔོན་སུམ་ཅུའི་ཕྲིན་ལས་རྒྱས་པ་དངོས་གྲུབ་འདོད་རྒུའི་གཏེར་མཛོད་ཞེས་བྱ་བ་བཞུགས་སོ།།

བླ་མ་དང་གཉིས་སུ་མེད་པ་དཔལ་ཆེན་ཧེ་རུ་ཀ་ལ་ཕྱག་འཚལ་ལོ། །མདུན་དུ་སྨན་རཀ་གཏོར་གསུམ་དང་། ཆུ་གཉིས་ཉེར་སྤྱོད་སོགས་མཁོ་བའི་ཡོ་བྱད་རྣམས་འདུ་བྱས་ལ། །རང་ཡི་དམ་གྱི་ང་རྒྱལ་དང་ལྡན་པའི་ངང་ནས། ཧཱུྃ་ཧྲཱིཿ སྟོང་པའི་ངང་ལས་སྐད་ཅིག་དྲན་རྫོགས་སུ། །དུར་ཁྲོད་རབ་འཇིགས་རྔམས་པའི་གཞལ་ཡས་དབུས། །གྲུ་གསུམ་མཐིང་ནག་འབར་བའི་དཀྱིལ་འཁོར་དུ། །དྲེགས་པ་ཕོ་མོ་བསྣོལ་བའི་གདན་སྟེང་ན། །བཅོམ་ལྡན་དཔལ་ཆེན་དྲེགས་པ་ཀུན་འདུལ་མཐིང་། །ཞལ་གསུམ་ཕྱག་དྲུག་གཡས་སེར་གཡོན་སྨུག་ཞལ། །ཕྱག་དྲུག་རྡོ་རྗེ་ལྷ་བརྒྱད་མགོ་བོ་གཡས། །བྷན་དམར་ཀླུ་བརྒྱད་མགོ་བོ་གཡོན་ན་བསྣམས། །དཔལ་དང་དུར་ཁྲོད་རོལ་བའི་ཆས་ཀྱིས་བརྒྱན། །གསང་བའི་ཡུམ་ཆེན་ཁམས་གསུམ་སྤྱི་འདུལ་མ། །སྐུ་མདོག་མཐིང་ནག་ཁ་ཊཱཾ་ཐོད་འཛིན་འཁྱུད། །བཅོམ་ལྡན་དཔལ་ཆེན་སྐུ་ཡི་གཡས་ཟུར་ན། །དབང་ཕྱུག་ཆེན་པོ་མ་ཧཱ་དེ་ཝ་ནི། །སྐུ་མདོག་མཐིང་ནག་དར་ནག་བེར་ཆེན་གསོལ། །གཡས་པས་གྲི་གུག་གཡོན་པས་ཙིཏྟ་བསྣམས། །ཐམས་ཅད་ཟིལ་གནོན་སེང་གེ་དཀར་མོ་ཆིབས། །ལྷ་མཆོག་དྲེགས་པ་ཀུན་འདུལ་གཡོན་ཟུར་ནས། །ཡུམ་ཆེན་རྒྱལ་མོ་ཨུ་མ་དཱེ་ཝ་ནི། །སྐུ་མདོག་མཐིང་ག་ལྗང་ནག་བེར་ཆེན་གསོལ། །ཁ་ཊཱཾ་གཡས་ལ་ཐོད་པ་ཁྲག་བཀང་གཡོན། །སྟོབས་ཀྱི་རྒྱལ་པོ་རབ་བརྟན་གླང་ཆེན་ཆིབས། །ཤར་ཕྱོགས་གཤིན་རྗེ་ཡ་མ་རཱ་ཛ་ནི། །མདོག་ནག་གཅན་གཟན་པགས་པ་རློན་པ་གསོལ། །ཕྱག་གཡས་བེ་ཅོན་གཡོན་པས་ཐོད་དབྱུག་བསྣམས། །ཆིབས་སུ་མ་ཧེ་ནམ་མཁའི་མདོག་ཅན་ཆིབས། །སྦྱོར་བའི་ཡུམ་ཆེན་གཤིན་རྗེ་ཟ་བྱེད་མ། །ནག་མོ་སྐུ་ལ་དར་ནག་གོ་ཟུ་ཅན། །ཕྱག་གཡས་འཁོར་ལོ་གཡོན་པས་ཐོད་ཁྲག་ཐོགས། །ཆིབས་སུ་ཆུ་གླང་བེེཌཱུར་མདོག་ཅན་ཆིབས། །ལྷོ་ཕྱོགས་བདུད་པོ་སྐོས་རྗེ་བྲང་དཀར་ནི། །༼མཆན། ཕྱག་ན་སྲིད་པའི་འཁོར་ལོ་བསྣམས༽སྐུ་མདོག་ནག་པོ་བེར་ནག་སྐུ་ལ་གསོལ། །གཡས་པས་ཁྲམ་ཤིང་གཡོན་པས་དགྲ་སྟ་བསྣམས། །ཆིབས་སུ་བདུད་རྟ་མིག་སྨན་མདོག་ཅན་ཆིབས། །སྦྱོར་བའི་ཡུམ་ཆེན་བདུད་མོ་རེ་མ་ཏི། །སྐུ་མདོག་ནག་མོ་དར་ནག་གོ་ཟུ་ཅན། །གཡས་པས་ཁྲམ་ཤིང་གཡོན་པས་ནད་རྐྱལ་བསྣམས། །ཆིབས་སུ་བོང་བུ་དམར་གྭ་གློག་འདྲ་ཆིབས། །ནུབ་ཕྱོགས་སྲིན་པོ་ནག་པོ་གློག་ཕྲེང་ཅན། །སྐུ་མདོག་དུད་ཁ་གློག་གི་ཐུལ་བ་གསོལ། །ཕྱག་གཡས་ཐོ་བ་གཡོན་པས་གློག་ཞགས་བསྣམས། །ཆིབས་སུ་རྔམ་བརྗིད་འབྲུག་དང་གློག་ལ་ཆིབས། །སྦྱོར་བའི་ཡུམ་ཆེན་སྦལ་མགོ་ཁྲག་མིག་མ། །མདོག་དམར་ཁྲག་གི་ལྭ་བ་ནག་པོ་གསོལ། །ཕྱག་གཡས་ཁྲག་ཕུར་གཡོན་པས་ཁྲག་ཕོར་བསྣམས། །ཆིབས་སུ་ཤུགས་ལྡན་རྔ་མོང་གྭ་པ་ཆིབས། །བྱང་དུ་གནོད་སྦྱིན་ཡཀྵ་མེ་དབལ་ནི། །སྐུ་མདོག་མཐིང་ནག་སེང་གེའི་སློག་པ་གསོལ། །ཕྱག་གཡས་རིན་ཆེན་གཡོན་པས་རལ་གྲི་བསྣམས། །ཆིབས་སུ་མི་བཟད་སྟག་མོ་རི་བཀྲ་ཆིབས། །སྦྱོར་བའི་ཡུམ་ཆེན་གནོད་སྦྱིན་མོན་མོ་ནག །སྐུ་མདོག་ནག་མོ་དར་ནག་གོ་ཟུ་ཅན། །ཕྱག་གཡས་སྤུ་གྲི་གཡོན་པས་སྤྱང་མོ་བསྣམས། །ཆིབས་སུ་མིག་སྨན་མདོག་ཅན་ཕག་རྒོད་ཆིབས། །སྟེང་ཕྱོགས་གཟའ་བདུད་ཆེན་པོ་རཱ་ཧུ་ལ། །དུད་ཁ་དབུ་དགུ་སྐུ་སྨད་སྦྲུལ་དུ་འཁྱིལ། །ཕྱག་གཡས་མདའ་གཞུ་གཡོན་པས་སྦྲུལ་ཞགས་བསྣམས། །འབྲུག་གི་སློག་པ་གསོལ་ཞིང་གཡུ་འབྲུག་ཞོན། །ཡུམ་ཆེན་གནམ་སྨན་ཐོག་གི་བུ་ཡུག་མ། །སྐུ་མདོག་དམར་མོ་གསེར་གྱི་གོ་ཟུ་གསོལ། །ཕྱག་གཡས་ཐོག་འཕེན་གཡོན་པས་སེར་བ་འབེབས། །སྟོང་གསུམ་སྒྲ་ཡི་བཀང་བའི་གཡུ་འབྲུག་ཆིབས། །འོག་ཕྱོགས་ཀླུ་བདུད་ནག་པོ་མགོ་དགུ་བ། །སྐུ་མདོག་དུད་ཁ་སྦྲུལ་གྱི་སློག་པ་གསོལ། །གཡས་པས་སྦྲུལ་ཞགས་གཡོན་པས་ནད་རྐྱལ་བསྣམས། །ཆིབས་སུ་འཛིན་པ་ཆུ་སྲིན་ནག་པོ་ཆིབས། །སྦྱོར་བའི་ཡུམ་ཆེན་ཡཀྵ་ནག་མོ་ནི། །སྐུ་མདོག་དུད་ཁ་སྦྲུལ་གྱི་རལ་བ་ཅན། །གཡས་པས་སྦྲུལ་ཞགས་གཡོན་པས་ནད་རྐྱལ་བསྣམས། །ཆིབས་སུ་རུས་སྦལ་མིག་སྨན་མདོག་ཅན་ཆིབས། །དཀྱིལ་འཁོར་ཆེན་པོའི་བར་འཁྱམ་ལ་གནས་པའི། །ཤར་སྟོད་མཐུ་ཆེན་ཡར་ལྷ་ཤམ་པོ་ནི། །སྐུ་མདོག་དཀར་པོ་དར་དཀར་རལ་ག་གསོལ། །ཕྱག་གཡས་རལ་གྲི་གཡོན་པས་མདུང་དར་དཀར། །ཆིབས་སུ་ལྷ་གཡག་གངས་རིའི་མདངས་ལྡན་ཆིབས། །ཤར་གྱི་དབུས་སུ་གནམ་ཐེ་དཀར་པོ་ནི། །སྐུ་ལ་ཟ་འོག་སྔོ་ཁྲའི་བེར་ཆེན་གསོལ། །ཤེལ་གྱི་བ་དན་ཤེལ་གྱི་རལ་གྲི་བསྣམས། །ཆིབས་སུ་རྟ་དཀར་ཅང་ཤེས་འཕུར་མ་ཆིབས། །ཤར་སྨད་སྤྱི་བདུད་རྒྱལ་པོ་གུ་རུམ་རྩེ། །རྒྱ་བྱེའུ་ཁྲབ་ཆེན་དཀར་པོ་སྐུ་ལ་གསོལ། །གཡས་པས་མདུང་དར་གཡོན་པས་ཤེལ་གྲི་བསྣམས། །ཆིབས་སུ་རྡོ་རྟ་གྲོ་བོ་འཕུར་ཤེས་ཆིབས། །ལྷོ་སྟོད་མ་མོ་སྲིད་པའི་རྒྱལ་མོ་ནི། །སྐུ་མདོག་ནག་མོ་དར་ནག་གོ་ཟུ་ཅན། །ཕྱག་གཡས་འཁོར་ལོ་གཡོན་པས་མེ་ལོང་བསྣམས། །ཆིབས་སུ་མགྱོགས་བྱེད་གཡུ་འབྲུག་སྔོན་མོ་ཆིབས། །ལྷོ་དབུས་སྔགས་སྲུང་ཨེ་ཀ་ཙ་ཏི་ནི། །སྐུ་མདོག་མཐིང་ནག་དར་དཀར་གོ་ཟུ་ཅན། །གཡས་པས་ཙིཏྟ་གཡོན་པས་གཡུ་སྤྱང་འགྱེད། །ཆིབས་སུ་ཤུགས་ལྡན་དྲེལ་རྟ་ནག་པོ་ཆིབས། །ལྷོ་སྨད་དཔལ་ལྡན་ནག་མོ་མགྱོགས་བྱེད་མ། །སྐུ་མདོག་ནག་མོ་དར་ནག་གོ་ཟུ་གསོལ། །སྦྲུལ་ཞགས་དང་ནི་ཚོན་གྱི་གྲུ་གུ་བསྣམས། །ཆིབས་སུ་མཁའ་ལྡིང་སོ་བྱ་ནག་པོ་ཆིབས། །ནུབ་སྟོད་བན་ཆེན་རྡོ་རྗེ་བདུད་འདུལ་ནི། །སྐུ་མདོག་དམར་ནག་བེར་ཆེན་མཐིང་ནག་གསོལ། །གཡས་པས་ཁྲག་ཐུན་གཡོན་པས་ཡུངས་ཐུན་བསྣམས། །ཆིབས་སུ་དྲེལ་རྟ་མིག་སྨན་མདོག་ཅན་ཆིབས། །ནུབ་དབུས་བྲག་བཙན་སྲོག་ཟན་དམར་པོ་ནི། །པད་རག་མདོག་ཅན་དར་དམར་རལ་ག་གསོལ། །གཡས་པས་བསེ་མདུང་གཡོན་པས་མདའ་གཞུ་བསྣམས། །ཆིབས་སུ་བཙན་རྟ་དམར་པོ་གློག་འདྲ་ཆིབས། །ནུབ་སྨད་བཙན་འགོང་ཡམ་ཤུད་དམར་པོ་ནི། །སྐུ་མདོག་དམར་པོ་དར་དམར་བེར་གསོལ་བ། །གཡས་པས་ཤང་ལང་གཡོན་པས་བཙན་ཞགས་དམར། །ཆིབས་སུ་མྱུར་མགྱོགས་ཟངས་རྟ་དམར་པོ་ཆིབས། །བྱང་སྟོད་བགེགས་རྒྱལ་བི་ན་ཡ་ག་ནི། །མིག་སྨན་མདོག་ཅན་དར་ནག་བེར་གསོལ་བ། །གཡས་པས་ཁ་ཊཱཾ་གཡོན་པས་ཐོད་ཁྲག་བསྣམས། །ཆིབས་སུ་བདུད་རྟ་ནག་པོ་རྟིང་དཀར་ཆིབས། །དབུས་སུ་མུ་སྟེགས་ཀ་ལ་ནག་པོ་ནི། །མདོག་ནག་དར་ནག་བེར་ཆེན་སྐུ་ལ་གསོལ། །གཡས་པས་རྩེ་གསུམ་གཡོན་པས་ཐོད་ཁྲག་བསྣམས། །ཆིབས་སུ་སྟོབས་ལྡན་སེང་གེ་དཀར་མོ་ཆིབས། །བྱང་སྨད་དམུ་བདུད་ནག་པོ་བཀྲག་མེད་ནི། །སྐུ་མདོག་ནག་པོ་དར་ནག་བེར་གསོལ་བ། །གཡས་པས་ཤང་ལང་གཡོན་པས་མདའ་གཞུ་བསྣམས། །ཆིབས་སུ་བདུད་རྟ་རླུང་གི་ཤུགས་ཅན་ཆིབས། །ཤར་སྒོར་ལྷ་ཆེན་ཚངས་པ་དཀར་པོ་ནི། །སྐུ་ལ་བྱ་རྒྱལ་རྒོད་ཀྱི་ཐུལ་བ་གསོལ། །གཡས་པས་ཤེལ་གྲི་གཡོན་པས་ཉི་ཞགས་འཕེན། །ཆིབས་སུ་གངས་ཀྱི་སེང་གེ་དཀར་མོ་ཆིབས། །ལྷོ་སྒོར་རྒྱལ་པོ་ཆེན་པོ་བེེ་ཧ་ར། །སྐུ་མདོག་དཀར་པོ་དོམ་གྱི་སློག་པ་གསོལ། །ཕྱག་གཡས་བདུད་ཞགས་གཡོན་པས་སྤུ་གྲི་བསྣམས། །ཆིབས་སུ་སྟོབས་ལྡན་བ་གླང་སྣ་རིང་ཆིབས། །ནུབ་སྒོར་ཀུ་ལ་ཆེན་པོ་གསང་བ་ནི། །དཀར་གསལ་སྐྱིན་དཀར་སྟོད་ཀྱི་སློག་པ་གསོལ། །གཡས་པས་རྡོ་རྗེ་གཡོན་པས་རུ་མཚོན་བསྣམས། །ཆིབས་སུ་ར་སྐྱེས་ཁམ་པ་རླུང་གཤོག་ཆིབས། །བྱང་སྒོར་མགོན་པོ་མ་ཧཱ་ཀ་ལ་ནི། །སྐུ་མདོག་མཐིང་ནག་ལྗང་ནག་བེར་གསོལ་བ། །ཕྱག་གཡས་བེ་ཅོན་གཡོན་པས་གྲི་གུག་བསྣམས། །ཆིབས་སུ་བདུད་རྟ་ནག་པོ་རླུང་གཤོག་ཆིབས། །གཞན་ཡང་སྡེ་དཔོན་སུམ་ཅུའི་བཀའ་འཁོར་ནི། །རང་རང་འཁོར་དང་བྲན་གཡོག་བསམ་མི་ཁྱབ། །ཉི་ཟེར་རྡུལ་ལྟར་འཁྲིགས་པ་ཅི་བཞིན་དུ། །ནམ་མཁའི་ཁམས་ཀུན་མ་ལུས་གང་བར་གྱུར། །ཀུན་གྱི་གནས་གསུམ་ཨོཾ་ཨཱཿ་ཧཱུྃ་གིས་མཚན། །འོག་མིན་གནས་དང་རང་བཞིན་གར་བཞུགས་ནས། །དབྱིངས་ལས་ཡེ་ཤེས་སེམས་དཔའ་སྤྱན་དྲངས་གྱུར། །སྤྱན་འདྲེན་ནི། ཧཱུྃ། འོག་མིན་ཆོས་དབྱིངས་གནས་མཆོག་དམ་པ་ནས། །ལྷ་མཆོག་དྲེགས་པ་ཀུན་འདུལ་ཡབ་དང་ཡུམ། །དབང་ཕྱུག་ཨུ་མ་གཤིན་རྗེ་ཟ་བྱེད་མ། །རྐོས་རྗེ་བྲང་དཀར་རེ་ཏི་གློག་ཕྲེང་ཅན། །སྦལ་མགོ་ཁྲག་མིག་ཡཀྵ་མེ་དབལ་ནག །མོན་མོ་གཟའ་བདུད་ཐོག་གི་བུ་ཡུག་མ། །ཀླུ་བདུད་མགོ་དགུ་ཡཀྴ་ནག་མོ་དང་། །ཤམ་པོ་གནམ་ཐེའུ་དཀར་པོ་གུ་རུམ་རྩེ། །སྲིད་རྒྱལ་ཨེ་ཀ་ཙ་ཏི་མགྱོགས་བྱེད་མ། །རྡོ་རྗེ་བདུད་འདུལ་བྲག་བཙན་ཡམ་ཤུད་དམར། །བི་ན་ཡ་ག་མུ་སྟེགས་ཀ་ལ་ནག །ནག་པོ་བཀྲག་མེད་ལྷ་ཆེན་ཚངས་པ་དཀར། །རྒྱལ་ཆེན་བེེ་ཧར་ཀུ་ལ་གསང་བ་དང་། །དཔལ་ལྡན་མགོན་པོ་མ་ཧཱ་ཀ་ལ་བཅས། །སྡེ་དཔོན་སུམ་ཅུ་རང་རང་ཕོ་ཉར་བཅས། །བསྐལ་ངན་དུས་ཀྱི་སྙིགས་མའི་ཡང་མཐའ་འདིར། །གཤེགས་དང་བཞུགས་པའི་མཚན་མ་མི་དམིགས་ཀྱང་། །སྔོན་གྱི་ཐུགས་དམ་ཞལ་བཞེས་ཇི་བཞིན་དུ། །སྒྲུབ་ལ་དངོས་གྲུབ་སྩོལ་ཕྱིར་གཤེགས་སུ་གསོལ། །བཛྲ་ས་མ་ཡ་ཛཿ བཞུགས་གསོལ་ནི། ཧཱུྃ། བསྐལ་བ་མེ་ལྟར་འབར་བའི་ཀློང་དཀྱིལ་དུ། །གྲུ་གསུམ་མཐིང་ནག་འབར་བའི་དཀྱིལ་འཁོར་དབུས། །དྲེགས་པ་ཕོ་མོ་བསྣོལ་བའི་གདན་སྟེང་དུ། །ལྷ་མཆོག་དྲེགས་པ་ཀུན་འདུལ་ཡབ་དང་ཡུམ། །རང་རང་དགྱེས་པའི་གདན་ཁྲི་ཡངས་པའི་སྟེང་། །སྡེ་དཔོན་སུམ་ཅུ་སོ་སོའི་འཁོར་གཡོག་བཅས། །སྒྲུབ་ལ་དངོས་གྲུབ་མ་ལུས་སྩོལ་བའི་ཕྱིར། །འདིར་བྱོན་དགྱེས་པ་ཆེན་པོར་བཞུགས་སུ་གསོལ། །ས་མ་ཡ་ཏིཥྛ་ལྷན། ཕྱག་འཚལ་བ་ནི། ཧཱུྃ། ཁྲོ་ལ་ཁྲོས་པའི་རྒྱལ་པོ་ཧེ་རུ་ཀ །ཁྲོས་པའི་དཔལ་འབར་མ་རུང་གདུལ་དཀའི་གཤེད། །གཏུམ་ཆེན་ཨ་ར་ལི་ཡི་སྒྲ་དང་བཅས། །སྣ་ཚོགས་ཐབས་ཀྱི་ལོག་འདྲེན་འདུལ་བར་མཛད། །མི་བཟད་གར་དགུའི་ཉམས་ལྡན་རྔམས་པའི་སྐུ། །ཕྲིན་ལས་རྣམ་བཞིའི་དངོས་གྲུབ་སྩལ་དུ་གསོལ། །དྲེགས་པ་ཀུན་འདུལ་ཡབ་ཡུམ་ཕྱག་འཚལ་ལོ། །དབང་ཕྱུག་ཆེན་པོ་ཨུ་མ་དེ་ཝ་དང་། །ཕྱོགས་བཞིར་གནས་པའི་གཤིན་རྗེ་ཟ་བྱེད་ནག །བདུད་པོ་རེ་ཏི་གློག་ཕྲེང་ཁྲག་མིག་མ། །ཡཀྴ་མེ་དབལ་ཡབ་ཡུམ་ཕྱག་འཚལ་ལོ། །སྟེང་འོག་སྐྱོང་བའི་སྡེ་དཔོན་ཆེན་པོ་ནི། །མོན་མོ་གཟའ་བདུད་ཐོག་གི་བུ་ཡུག་མ། །ཀླུ་བདུད་མགོ་དགུ་ཡཀྴ་ནག་མོ་བཅས། །སྟེང་འོག་སྐྱོང་བའི་ཚོགས་ལ་ཕྱག་འཚལ་ལོ། །དཀྱིལ་འཁོར་ཆེན་པོའི་བར་ཁྱམས་སྐྱོང་མཛད་པའི། །ཡར་ལྷ་ཤམ་པོ་གནམ་ཐེའུ་དཀར་པོ་དང་། །སྤྱི་བདུད་གུ་རུམ་རྩེ་དང་སྲིད་པའི་རྒྱལ། །སྔགས་སྲུང་མགྱོག་བྱེད་ཚོགས་ལ་ཕྱག་འཚལ་ལོ། །རྡོ་རྗེ་བདུད་འདུལ་བྲག་བཙན་སྲོག་ཟན་དང་། །ཡམ་ཤུད་དམར་པོ་བགེགས་རྒྱལ་བི་ན་ཡ། །མུ་སྟེགས་ཀ་ལ་ནག་པོ་བཀྲག་མེད་བཅས། །དཀྱིལ་འཁོར་སྐྱོང་བ་རྣམས་ལ་ཕྱག་འཚལ་ལོ། །ཤར་ལྷོ་ནུབ་བྱང་སྒོ་བཞི་སྐྱོང་མཛད་པའི། །ཚངས་པ་དཀར་པོ་རྒྱལ་ཆེན་བེེ་ཧ་ར། །སྐུ་ལ་གསང་བ་མ་ཧཱ་ཀ་ལ་བཅས། །སྒོ་བཞི་སྐྱོང་བའི་ཚོགས་ལ་ཕྱག་འཚལ་ལོ། །གཞན་ཡང་སྡེ་དཔོན་སུམ་ཅུ་རང་རང་གི །འཁོར་དུ་གཏོགས་པའི་བྲན་དང་གཡོག་འཁོར་བཅས། །གནམ་ས་བར་སྣང་ཁྱོན་ཀུན་གང་བ་ཡི། །བཀའ་སྡོད་དྲེགས་པའི་ཚོགས་ལ་ཕྱག་འཚལ་ལོ། །ཨ་ཏི་པུ་ཧོཿ པྲ་ཏི་ཙྪ་ཧོཿ མཆོད་པ་ནི། ཧཱུྃ། ཕྱོགས་བཅུ་ནམ་མཁའ་ཡངས་བའི་ཞིང་ཁམས་ནས། །རབ་གཙང་ལྷ་ཡི་ཆུ་བོ་གང་གཱའི་རྒྱུན། །ཡིད་འོང་ཞབས་བསིལ་དག་བྱེད་དྲི་ལྡན་མཚོ། །མཛེས་སྡུག་ཡིད་འོང་མེ་ཏོག་ཚར་དུ་དངར། །ལྷན་ཅིག་སྐྱེས་དང་ཡོངས་སྦྱར་བདུག་སྤོས་སྤྲིན། །ཉིན་མོ་བྱེད་པའི་སྣང་གསལ་འོད་དུ་བརྡལ། །ཙན་དན་ག་བུར་དྲི་ཆབ་བྱུག་པའི་མཚོ། །རོ་བརྒྱ་ལྡན་པའི་ཞལ་ཟས་ལྷུན་པོ་སྤུངས། །སྣ་ཚོགས་རོལ་མོའི་སྒྲ་ཡི་མཆོད་པའི་སྤྲིན། །ཉེར་སྤྱོད་ལྔ་སོགས་ཕྱི་ཡི་མཆོད་པ་དང་། །དམར་ཆེན་ཁྲག་གི་ཨརྒྷཾ་མཆོད་ཡོན་སྦྲེང་། །དུག་ཆུའི་ཞབས་བསིལ་མིག་སྨན་མདོག་ཅན་དང་། །རབ་མཛེས་དབང་ལྔའི་མེ་ཏོག་མཆོག་དུ་མཛེས། །ཚིལ་ཆེན་དུད་པ་མི་ཟད་མུན་ལྟར་གཏིབས། །དྲི་ཆབ་བྱུག་པ་ལྦུ་ཕྲེང་ཞག་ཏུ་བསྐྱིལ། །ཞུན་ཆེན་མར་མེ་དུས་མཐའི་མེ་ལྟར་འབར། །རྔམས་བརྗིད་ཤ་རུས་ཞལ་ཟས་རི་ལྟར་སྤུངས། །ཐོད་རྔ་རྐང་གླིང་རོལ་མོའི་སྒྲ་དབྱངས་ཀྱི། །དུར་ཁྲོད་ཆེན་པོའི་རྫས་མཆོག་དམ་པ་འབུལ། །སྨན་དང་རཀྟ་ཛ་གད་ཕུད་ཀྱི་མཚོ། །ཤ་ལྔ་བདུད་རྩི་ལྔ་དང་སྦྱོར་སྒྲོལ་རྫས། །ཚོགས་ཀྱི་འཁོར་ལོའི་ལོངས་སྤྱོད་བསམ་མི་ཁྱབ། །དངོས་སུ་འབྱོར་དང་ཡིད་ཀྱིས་རྣམ་སྤྲུལ་པའི། །ནམ་མཁའ་གང་བའི་འཁོར་ལོར་འབུལ་ལགས་ན། །དགྱེས་པར་བཞེས་ལ་དངོས་གྲུབ་སྩལ་དུ་གསོལ། །ཨོཾ་བཛྲ་ཨརྒྷཾ་སོགས་ནས་ཤབྟ་མ་ཧཱ་པཉྩ་ཨ་མྲྀ་ཏ་རཀྟ་བྷ་ལིངྟ་ཁ་ཁ་ཁཱ་ཧི་ཁཱ་ཧིཿ བསྟོད་པ་ནི། ཧཱུྃ། སྒེག་པ་དཔའ་བ་མི་བཟད་འཇིགས་པའི་སྐུ། །རྒོད་གཤེ་དྲག་ཤུལ་རྡོ་རྗེ་གད་མོའི་སྒྲ། །སྙིང་རྗེ་རྔམ་ཞིང་ཡེ་ཤེས་ཉམས་དང་ལྡན། །དྲེགས་པ་ཀུན་འདུལ་ཡབ་ཡུམ་ཕྱག་འཚལ་བསྟོད། །མི་བཟད་སྐུ་ནི་དུས་མཐའི་མེ་ལྟར་འབར། །འོད་ཟེར་ཉི་མ་བྱེ་བའི་དཔལ་མངའ་བ། །ཁྲོ་གཉེར་ཆུ་ཡི་རླབས་ལྟར་གཡོ་བར་བྱེད། །ལྷ་མཆོག་དྲེགས་པ་ཀུན་འདུལ་སྐུ་ལ་བསྟོད། །རབ་འཇིགས་གསུང་ནི་རྔམས་སྒྲ་འབྲུག་ལྟར་སྒྲོག །ཕེཾ་དང་ཨ་ར་ལི་ཡི་སྒྲ་དང་བཅས། །བཤུག་པའི་གླུ་ལེན་རྔམས་པའི་གད་རྒྱངས་ཅན། །དྲེགས་པ་ཀུན་འདུལ་གསུང་ལ་ཕྱག་འཚལ་བསྟོད། །གདོད་ནས་སྤྲོས་དང་བྲལ་བའི་རང་བཞིན་ལ། །ལོག་རྟོག་མཚན་མའི་རྟོག་པ་མི་མངའ་ཡང་། །གདུལ་བྱ་འདུལ་ཕྱིར་སྙིང་རྗེ་རྔམས་པའི་ཚུལ། །དྲེགས་པ་ཀུན་འདུལ་ཐུགས་ལ་ཕྱག་འཚལ་བསྟོད། །སྐུ་མདོག་མཐིང་ནག་ཞལ་གཅིག་ཕྱག་གཉིས་པ། །ཕྱག་གཡས་གྲི་གུག་གཡོན་པས་ཙིཏྟ་བསྣམས། །ཆིབས་སུ་གངས་ཀྱི་སེང་གེ་དཀར་མོ་ཆིབས། །དབང་ཕྱུག་མ་ཧཱ་དེ་ཝར་ཕྱག་འཚལ་བསྟོད། །མཐིང་ནག་མི་སྲུན་ཁྲོ་མོའི་ཚུལ་འཆང་བ། །ཕྱག་གཡས་ཁ་ཊཱཾ་གཡོན་པས་ཐོད་ཁྲག་བསྣམས། །གངས་རིའི་མདངས་འཛིན་གླང་ཆེན་ཐལ་དཀར་ཆིབས། །ཡུམ་ཆེན་ཨུ་མ་དེ་ཝར་ཕྱག་འཚལ་བསྟོད། །མིག་སྨན་མདོག་ཅན་ཤིན་ཏུ་ཁྲོས་པའི་སྐུ། །ཞལ་གཅིག་ཕྱག་གཉིས་བེ་ཅོན་ཐོད་དབྱུག་བསྣམས། །ཆིབས་སུ་མ་ཧེ་ནམ་མཁའི་མདོག་ཅན་ཆིབས། །གཤིན་རྗེ་ཡ་མ་རཱ་ཛར་ཕྱག་འཚལ་བསྟོད། །ནག་མོ་མི་བསྲུན་ཁྲོ་མོའི་ཚུལ་འཆང་བ། །ཕྱག་གཡས་སྲིད་པའི་འཁོར་ལོ་གཡོན་ཐོད་ཁྲག །ཆིབས་སུ་ཆུ་གླང་སྔོན་པོ་རུ་རིང་ཆིབས། །སྦྱོར་ཡུམ་གཤིན་རྗེ་ཟ་བྱེད་མ་ལ་བསྟོད། །སྐུ་མདོག་ནག་པོ་ཁྲོས་པའི་ཚུལ་འཆང་བ། །ཕྱག་གཡས་ཁྲམ་ཤིང་གཡོན་པས་དགྲ་སྟ་བསྣམས། །བདུད་རྟ་ནག་པོ་རླུང་གི་གཤོག་ཅན་ཆིབས། །བདུད་པོ་སྐོས་རྗེ་བྲང་དཀར་ཕྱག་འཚལ་སྟོད། །ནག་མོ་ཆེན་མོ་རབ་ཏུ་གཏུམ་པའི་སྐུ། །ཕྱག་གཡས་ཁྲམ་ཤིང་གཡོན་པས་ནད་རྐྱལ་བསྣམས། །ཆིབས་སུ་བོང་བུ་གློག་གི་མདངས་ལྡན་ཆིབས། །བདུད་མོ་རེ་མ་ཏི་ལ་ཕྱག་འཚལ་བསྟོད། །སྐུ་མདོག་དུད་ཁ་ཁྲོ་བོའི་ཚུལ་འཆང་བ། །ཕྱག་གཡས་ཐོ་བ་གཡོན་པས་གློག་ཞགས་བསྣམས། །ཆིབས་སུ་གཡུ་འབྲུག་སྔོན་མོ་གློག་ཅན་ཆིབས། །སྲིན་པོ་གློག་ཕྲེང་ཅན་ལ་ཕྱག་འཚལ་བསྟོད། །ཁྲག་གི་མདོག་ཅན་གཏུམ་ཆེན་ཁྲོ་མོའི་ཚུལ། །ཕྱག་ན་ཁྲག་གི་ཕུར་བ་ཁྲག་ཕོར་བསྣམས། །ཆིབས་སུ་ཤུགས་ལྡན་རྔ་མོང་གྭ་བ་ཆིབས། །སྦལ་མགོ་ཁྲག་མིག་མ་ལ་ཕྱག་འཚལ་བསྟོད། །མཐིང་ནག་མི་བསྲུན་སེང་གེའི་སློག་པ་གསོལ། །ཕྱག་གཡས་རིན་ཆེན་རལ་གྲི་འབར་བ་བསྣམས། །ཆིབས་སུ་མི་བཟད་དཔའ་བརྟུལ་སྟག་ལ་ཆིབས། །གནོད་སྦྱིན་ཡཀྴ་མེ་དབལ་ཕྱག་འཚལ་བསྟོད། །མིག་སྨན་མདོག་ཅན་ཞལ་གཅིག་ཕྱག་གཉིས་པ། །ཕྱག་གཡས་སྤུ་གྲི་གཡོན་པས་སྤྱང་མོ་བསྣམས། །ཆར་སྤྲིན་མདོག་ཅན་གདུག་པ་ཕག་རྒོད་ཆིབས། །གནོད་སྦྱིན་མོན་མོ་ནག་མོར་ཕྱག་འཚལ་བསྟོད། །དུད་ཁ་དབུ་དགུ་བྱ་རོག་སྦྲུལ་དུ་འཁྱིལ། །གཡས་པས་མདའ་གཞུ་གཡོན་པས་སྤྲུལ་ཞགས་བསྣམས། །གཡུ་འབྲུག་ཆིབས་ནས་སྟོང་གསུམ་བྱ་ར་མཛད། །གཟའ་བདུད་རཱ་ཧུ་ལ་ལ་ཕྱག་འཚལ་བསྟོད། །དམར་ནག་རིན་ཆེན་གསེར་གྱི་གོ་ཁྲབ་གསོལ། །ཕྱག་གཡས་ཐོག་འཕེན་ཕྱག་གཡོན་སེར་བ་འབེབས། །སྲིད་གསུམ་སྲོག་དབུགས་སྡུད་ཅིང་གཡུ་འབྲུག་ཆིབས། །གནམ་སྨན་ཐོག་གི་བུ་ཡུག་མ་ལ་བསྟོད། །སྐུ་མདོག་དུད་ཁ་ཀླུ་ཡི་ཚུལ་འཛིན་པ། །གཡས་པས་སྦྲུལ་ཞགས་གཡོན་པས་ནད་རྐྱལ་བསྣམས། །ཆིབས་སུ་ཆུ་སྲིན་རྔམས་པོ་ཆེ་ལ་ཆིབས། །ཀླུ་བདུད་ནག་པོ་མགོ་དགུ་ཕྱག་འཚལ་བསྟོད། །དུད་ཁ་སྦྲུལ་གྱི་རལ་བ་སྤྲིན་ལྟར་གཏིབས། །སྦྲུལ་ཞགས་འཕེན་ཅིང་ནད་ཀྱི་རྐྱལ་བ་བསྣམས། །ཆིབས་སུ་རབ་འཇིགས་རུས་སྦལ་ནག་པོ་ཆིབས། །ཁྲོ་མོ་ཡཀྴ་ནག་མོར་ཕྱག་འཚལ་བསྟོད། །སྐུ་མདོག་དཀར་པོ་ལྷ་ཡི་དགེ་བསྙེན་ཚུལ། །ཕྱག་གཡས་རལ་གྲི་གཡོན་པས་མདུང་དར་དཀར། །གངས་རིའི་མདངས་ལྡན་ལྷ་གཡག་ཞོལ་ཆེན་ཆིབས། །མཐུ་ཆེན་ཡར་ལྷ་ཤམ་པོར་ཕྱག་འཚལ་བསྟོད། །སྐུ་མདོག་དཀར་པོ་རབ་ཏུ་ཁྲོས་པའི་ཚུལ། །ཕྱག་ན་བ་དན་ཤེལ་གྱི་རལ་གྲི་བསྣམས། །ཆིབས་སུ་རྟ་དཀར་སྤྲིན་གྱི་ཤུགས་ལྡན་ཆིབས། །མཐུ་ཆེན་གནམ་ཐེའུ་དཀར་པོར་ཕྱག་འཚལ་བསྟོད། །མདོག་དཀར་རབ་ཁྲོས་ཤིན་ཏུ་གཏུམ་པའི་སྐུ། །ཕྱག་ན་མདུང་དར་ཤེལ་གྱི་གྲི་རིང་བསྣམས། །ཆིབས་སུ་རྡོ་རྟ་གངས་རིའི་མདངས་ལྡན་ཆིབས། །སྤྱི་བདུད་གུ་རུམ་རྩེ་ལ་ཕྱག་འཚལ་བསྟོད། །ནག་མོ་མི་སྡུག་ཁྲོ་མོའི་ཚུལ་འཆང་བ། །གཡས་པས་འཁོར་ལོ་གཡོན་པས་མེ་ལོང་བསྣམས། །ངར་སྐད་ལྡན་པའི་གཡུ་འབྲག་སྔོན་མོ་ཆིབས། །མ་མོ་སྲིད་པའི་རྒྱལ་མོར་ཕྱག་འཚལ་བསྟོད། །མཐིང་ནག་མི་སྲུན་ཁྲོ་མོའི་ཚུལ་འཆང་བ། །གཡས་པས་ཙིཏྟ་གཡོན་པས་གཡུ་སྤྱང་འགྱེད། །ཆིབས་སུ་དྲེལ་རྟ་མིག་སྨན་མདོག་ཅན་ཆིབས། །སྔགས་སྲུང་ཨེ་ཀ་ཛ་ཊཱིར་ཕྱག་འཚལ་བསྟོད། །ནག་མོ་སྐུ་ལ་དར་ནག་གོ་ཟུ་གསོལ། །གཡས་པས་སྦྲུལ་ཞགས་གཡོན་པས་ཚོན་གྲུ་བསྣམས། །འདབ་ཆགས་རྒྱལ་པོ་སོ་བྱ་ནག་པོ་ཆིབས། །དཔལ་ལྡན་ལྷ་མོ་མགྱོགས་བྱེད་མ་ལ་བསྟོད། །སྐུ་མདོག་དམར་ནག་ཤིན་ཏུ་ཁྲོས་པའི་སྐུ། །གཡས་པས་ཁྲག་ཐུན་གཡོན་པས་ཡུངས་ཐུན་བསྣམས། །ཆིབས་སུ་མུན་པའི་མདོག་ཅན་དྲེལ་ནག་ཆིབས། །བན་ཆེན་རྡོ་རྗེ་བདུད་འདུལ་ཕྱག་འཚལ་བསྟོད། །མདོག་དམར་བསྐལ་བའི་མེ་ལྟར་འབར་བའི་སྐུ། །ཕྱག་གཡས་བསེ་མདུང་གཡོན་པས་མདའ་གཞུ་བསྣམས། །ཅང་ཤེས་དམར་པོ་གློག་གི་རྩལ་ལྡན་ཆིབས། །བྲག་བཙན་སྲོག་ཟན་དམར་པོ་ཕྱག་འཚལ་བསྟོད། །པད་རག་མདོག་ཅན་འོད་ཟེར་ཕྱོགས་བཅུར་འཕྲོ། །གཡས་པས་ཤང་ལང་གཡོན་པས་བཙན་ཞགས་དམར། །མྱུར་མགྱོགས་ཤུགས་ལྡན་བཙན་རྟ་དམར་པོ་ཆིབས། །བཙན་རྒོད་ཡམ་ཤུད་དམར་པོར་ཕྱག་འཚལ་བསྟོད། །མིག་སྨན་མདོག་ཅན་ཞལ་གཅིག་ཕྱག་གཉིས་པ། །གཡས་པས་ཁ་ཊཱཾ་གཡོན་པས་ཐོད་ཁྲག་བསྣམས། །ཆིབས་སུ་བདུད་རྟ་ནག་པོ་རྟིང་དཀར་ཆིབས། །བགེགས་རྒྱལ་བི་ན་ཡ་ཀར་ཕྱག་འཚལ་བསྟོད། །མུན་པ་བྱེ་བའི་མདོག་ཅན་ཁྲོས་པའི་སྐུ། །གཡས་པས་རྩེ་གསུམ་གཡོན་པས་ཐོད་ཁྲག་བསྣམས། །ཆིབས་སུ་གངས་ཀྱི་སེང་གེ་དཀར་མོ་ཆིབས། །མུ་སྟེགས་ཀ་ལ་ནག་པོར་ཕྱག་འཚལ་བསྟོད། །སྐུ་མདོག་ནག་པོ་མི་བསྲུན་ཁྲོ་མོའི་སྐུ། །གཡས་པས་ཤང་ལང་གཡོན་པས་མདའ་གཞུ་བསྣམས། །ཆིབས་སུ་བདུད་རྟ་རླུང་ནག་འཚུབས་འདྲ་ཆིབས། །དམུ་བདུད་ནག་པོ་བཀྲག་མེད་ཕྱག་འཚལ་བསྟོད། །སྐུ་མདོག་དཀར་པོ་ལྷ་ཆེན་ཁྲོས་པའི་སྐུ། །གཡས་པས་ཤེལ་གྲི་གཡོན་པས་ཉི་ཞགས་འཕེན། །ཆིབས་སུ་སྟོབས་ལྡན་སེང་གེ་དཀར་མོ་ཆིབས། །ལྷ་ཆེན་ཚངས་པ་དཀར་པོར་ཕྱག་འཚལ་བསྟོད། །སྐུ་མདོག་དཀར་ལ་འཚེར་ཞིང་ཁྲོས་པའི་སྐུ། །བདུད་ཞགས་འཕེན་ཅིང་སྤུ་གྲི་འབར་བ་བསྣམས། །ཆིབས་སུ་གཏུམ་ཆེན་བ་གླང་སྣ་རིང་ཆིབས། །རྒྱལ་པོ་ཆེན་པོ་བི་ཧ་ར་ལ་བསྟོད། །དཀར་གསལ་ཁྲོ་འཛུམ་སྒེག་ཅིང་བརྗིད་པའི་ཉམས། །གསེར་གྱི་རྡོ་རྗེ་འབར་བའི་རུ་མཚོན་བསྣམས། །ཆིབས་སུ་ར་སྐྱེས་མཚམས་སྤྲིན་མདངས་འཛིན་ཆིབས། །ཀུ་ལ་ཆེན་པོ་གསང་བར་ཕྱག་འཚལ་བསྟོད། །མཐིང་ནག་མི་སྲུན་ཤིན་ཏུ་ཁྲོས་བའི་ཉམས། །གཡས་པས་བེ་ཅོན་གཡོན་པས་གྲི་གུག་བསྣམས། །ཆིབས་སུ་རྟ་མཆོག་མིག་སྨན་མདོག་ཅན་ཆིབས། །མགོན་པོ་མ་ཧཱ་ཀཱ་ལར་ཕྱག་འཚལ་བསྟོད། །གཏོར་འབུལ་ནི། དྲེགས་པའི་སྡེ་དཔོན་སུམ་ཅུ་འཁོར་དང་བཅས་པ་རྣམས་ཀྱི་ལྗགས་ཧཱུྃ་ལས་སྐྱེས་པའི་རྡོ་རྗེའི་སྦུ་གུ་ཅན་གྱི་འོད་ཟེར་གྱིས་གཏོར་མའི་བཅུད་དྲངས་ཏེ་གསོལ་བར་གྱུར།ཨོཾ་བཛྲ་སརྦ་དུཥྛན་ཨེ་ཛཿ་བྷྱོ་ས་པཱ་རི་ཝཱ་ར་ཨེ་དམ་བྷ་ལིངྟ་སོགས། ལན་གསུམ། མཐུ་སྟོབས་ཀྱི་དབང་ཕྱུག་དྲེགས་པའི་སྡེ་དཔོན་སུམ་ཅུ་འཁོར་དང་བཅས་པ་རྣམས་ཀྱིས་མཆོད་སྦྱིན་གྱི་གཏོར་མ་རྒྱ་ཆེན་པོ་འདི་བཞེས་ལ་སངས་རྒྱས་ཀྱི་བསྟན་པ་སྲུངས། དཀོན་མཆོག་གི་སོགས། ཕྲིན་ལས་བཅོལ་བ་ནི། ཧཱུྃ་ཧྲཱིཿ ཆོས་ཀྱི་དབྱིངས་ཀྱི་ཕོ་བྲང་དམ་པ་ནས། །མཐུ་སྟོབས་དབང་ཕྱུག་སྤྱི་མེས་ཧེ་རུ་ཀ །སྔགས་བདག་དྲེགས་པའི་སྡེ་དཔོན་སུམ་ཅུ་པོ། །ལྕམ་དྲལ་བཀའ་སྡོད་དམ་ཅན་རྒྱ་མཚོའི་ཚོགས། །འཁོར་བཅས་སྔོན་གྱི་ཐུགས་དམ་རྗེས་དགོངས་ལ། །བཞེངས་ཤིག་བཞེངས་ཤིག་དབྱིངས་ནས་སྐུར་བཞེངས་ཤིག །བསྐུལ་ལོ་བསྐུལ་ལོ་འགྲོ་ལ་རྗེས་དགོངས་ཏེ། །མ་གཡེལ་མ་གཡེལ་མྱུར་དུ་སྐུ་བསྐྱོད་ལ། །ཤིན་ཏུ་ཁྲོ་གཏུམ་རྔམས་བརྗིད་འབར་བའི་སྐུ། །མངོན་སྤྱོད་དྲག་པོས་འདུལ་བའི་དུས་ལ་བབ། །དམ་ལྡན་རིག་འཛིན་རྣལ་འབྱོར་བདག་ཅག་གི །དངོས་སུ་བཤམས་དང་ཡིད་ལས་སྤྲུལ་པ་ཡི། །ཕྱི་ནང་གསང་བ་རྟེན་པའི་དམ་རྫས་དང་། །དངོས་གྲུབ་རྫས་མཆོག་པཉྩ་ཨ་མྲྀ་ཏ། །དམར་ཆེན་རཀྟའི་རྒྱ་མཚོ་ཆེན་པོ་བསྐྱིལ། །ཛ་གད་གསེར་སྐྱེམས་ཕུད་རྒོད་བཏུང་བའི་རིགས། །བྷ་ལིང་གཏོར་མའི་ཚོགས་ནི་རི་ལྟར་སྤུངས། །དམ་ཉམས་དགྲ་བགེགས་བསྒྲལ་བའི་ཤ་ཁྲག་སོགས། །མཁོ་རྒུའི་ལོངས་སྤྱོད་ཇི་སྙེད་ཡོད་པ་ཀུན། །སོ་སོའི་ཐུགས་ལ་ཇི་ལྟར་འདོད་པ་བཞིན། །རྨད་བྱུང་ཀུན་ཏུ་བཟང་པོའི་མཆོད་སྤྲིན་འདི། །སྔར་མཛད་ལས་ཀྱི་གཏང་རག་གཉན་པོ་དང་། །སླད་ནས་གཡེལ་མེད་ཕྲིན་ལས་འགྲུབ་པའི་ཕྱིར། །རབ་འབྱམས་མཆོད་སྤྲིན་རྒྱ་མཚོ་འདི་འབུལ་བས། །རྔམས་པའི་སྟོབས་ཀྱིས་དགྱེས་པར་བཞེས་ནས་ཀྱང་། །འགྲོ་ལ་བདེ་ལེགས་མཐའ་དག་འབྱུང་བའི་གཞི། །ཀུན་མཁྱེན་རྒྱལ་བའི་བསྟན་པ་རིན་པོ་ཆེ། །ཡངས་པའི་རྒྱལ་ཁམས་ཀུན་ཏུ་རྒྱས་པ་དང་། །ལུང་རྟོགས་བསྟན་པ་འཛིན་པའི་སྐྱེས་བུ་རྣམས། །ཟླ་བ་ཡར་གྱི་ངོ་ལྟར་འཕེལ་བར་མཛོད། །མར་གྱུར་མཁའ་མཉམ་སེམས་ཅན་ཐམས་ཅད་ཀུན། །ཕྱི་ནང་ཉེར་འཚེའི་རིགས་རྣམས་ཀུན་ཞི་ཞིང་། །ཚེ་དཔལ་འབྱོར་བ་ལ་སོགས་རྒྱས་པ་དང་། །རྟག་ཏུ་དགེ་བཅུའི་དཔལ་ལ་སྤྱོད་པར་ཤོག །ཕྱི་སྣོད་འཇིག་རྟེན་ཁམས་ཀྱི་རིགས་མཐའ་དག །འབྱུང་བ་སྒང་གཤོང་དམག་འཁྲུགས་མུ་གེ་དང་། །དུས་ཀྱི་འཁྲུགས་པ་མ་ལུས་ཀུན་ཞི་ནས། །རྫོགས་ལྡན་དཔལ་གྱིས་མངོན་པར་མཐོ་བར་མཛོད། །ཁྱད་པར་བདག་ཅག་དཔོན་སློབ་འཁོར་བཅས་རྣམས། །ནད་གདོན་བགེགས་དང་རྐྱེན་ངན་བར་ཆད་དང་། །བྱང་ཕུར་རྦོད་གཏོང་བར་དུ་གཅོད་པ་སོགས། །ཞི་ཞིང་བདེ་དགའི་དཔལ་ལ་སྤྱོད་པར་ཤོག །ཚེ་དང་བསོད་ནམས་གཟི་བརྗིད་རིགས་བརྒྱུད་དང་། །ཁ་རྗེ་དབང་ཐང་དཔལ་འབྱོར་ལོངས་སྤྱོད་སྟོབས། །ཐོས་བསམ་སྒོམ་པའི་ཉམས་རྟོགས་རབ་འཕེལ་ཤིང་། །སྙན་གྲགས་རླུང་རྟ་ཕྱོགས་བཅུར་རྒྱས་པར་མཛོད། །ས་འོག་ས་སྟེང་ས་བླར་གནས་པ་ཡི། །རྒྱལ་བློན་རྗེ་འབངས་བན་བཙུན་ཕོ་མོ་དང་། །མཁས་དང་གྲུབ་པའི་ཉམས་དང་རྟོགས་པའི་རྩལ། །གང་དག་དབང་དུ་འདུ་བའི་ཕྲིན་ལས་མཛོད། །ནག་ཕྱོགས་བདུད་སྡེའི་རྩ་ལག་དཔུང་དང་བཅས། །མ་རུང་གདུག་ཅིང་གཏུམ་པའི་སེམས་འཆང་ཚོགས། །བསྟན་པའི་སྤྱི་དགྲ་རྣལ་འབྱོར་སྒོས་དགྲ་རྣམས། །ཡེ་ཤེས་དབྱིངས་སུ་སྒྲོལ་བའི་ཕྲིན་ལས་མཛོད། །ཚེ་རབས་སྔོན་ནས་ད་ལྟ་ཡན་ཆད་དུ། །མཐུ་ཆེན་སྲུང་མའི་དབང་པོ་ཁྱེད་ཅག་རྣམས། །དུས་རྣམས་རྟག་ཏུ་བསྟེན་ཅིང་སྒྲུབ་ལགས་ན། །རྟག་ཏུ་སྡོང་གྲོགས་ཕྲིན་ལས་མ་གཡེལ་བར། །བྱང་ཆུབ་བར་དུ་མི་འབྲལ་འགྲོགས་པར་མཛོད། །ཅེས་པ་འདི་ནི་ལྕགས་མོ་བྱ་ལོའི་ས་ག་ཟླ་བའི་ཚེས་བཟང་པོར་མགོན་ཁང་དབང་དྲག་རོལ་པ་ནས་རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེས་བསྟན་འགྲོར་ཕན་པའི་ལྷག་བསམ་དག་པས་བྲིས་པ་འདི་ནི་ཉེས་འགལ་མཆིས་ན་ཡེ་ཤེས་ཀྱི་སྤྱན་དང་ལྡན་པ་རྣམས་ཀྱི་མདུན་དུ་མཐོལ་ལོ་བཤགས་སོ། །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །སརྦ་མདྒ་ལཾ། དགེའོ། །