དྲེགས་པའི་སྡེ་དཔོན་སུམ་ཅུའི་གསེར་སྐྱེམས་ཁྲག་ཞག་བདུད་རྩིའི་བརླབ་ཕྲེང་ཞེས་བྱ་བ་བཞུགས་སོ།།
ཧཱུྃ། སྟོང་པའི་ངང་ལས་སྐད་ཅིག་དྲན་རྫོགས་སུ། །དུག་ལྔ་མེ་ལྟར་འབར་བའི་དཀྱིལ་འཁོར་ན། །མདུན་གྱི་ནམ་མཁའ་མེ་རླུང་འཁྲུགས་པའི་དབུས། །དྲེགས་པ་རུ་ཏྲ་བསྣོལ་བའི་གདན་སྟེང་དུ། །བཅོམ་ལྡན་དཔལ་ཆེན་དྲེགས་པ་ཀུན་འདུལ་ནི། །སྐུ་མདོག་མཐིང་ནག་གཡས་སེར་གཡོན་སྨུག་ཞལ། །ཕྱག་དྲུག་རྡོ་རྗེ་ལྷ་བརྒྱད་མགོ་བོ་གཡས། །བྷན་དམར་ཀླུ་བརྒྱད་མགོ་བོ་གཡོན་ན་བསྣམས། །སྦྱོར་བའི་ཡུམ་ཆེན་ཁམས་གསུམ་སྤྱི་འདུལ་མ། །མཐིང་ནག་ཁ་ཊྃ་ཐོད་འཛིན་ཡབ་ལ་འཁྱུད། །དྲེགས་པའི་སྡེ་དཔོན་ཆེན་པོ་སུམ་ཅུ་པོ། །འཇིག་རྟེན་མཆོད་བསྟོད་དཀྱིལ་འཁོར་ཆེན་པོ་ཡི། །ད་ལ་ཆེན་པོའི་བར་ཁྱམ་ཡངས་པ་ནི། །ལེགས་ཉེས་སྟངས་འཛིན་དམ་ཚིག་རྗེས་གཅོད་པའི། །དྲེགས་པའི་སྡེ་དཔོན་ཆེན་པོ་སུམ་ཅུ་པོ། །དབང་ཕྱུག་ཆེན་པོ་ཨུ་མ་དེ་ཝ་དང་། །ཡ་མ་ར་ཛ་སྦྱོར་ཡུམ་སྒྲོལ་བྱེད་ནག །སྐོས་རྗེ་བྲང་དཀར་བདུད་མོ་རེ་མ་ཏི། །སྲིན་མོ་གློག་ཕྲེང་སྦལ་མགོ་ཁྲག་མིག་མ། །ཡཀྵ་མེ་དཔལ་ཡུམ་ཆེན་མོན་མོ་ནག །སྲིད་པའི་རྒྱལ་མོ་ཨེ་ཀ་ཙ་ཏྲི་དང་། །དཔལ་ལྡན་ནག་མོ་དགྲ་ལྷ་བེ་ཧ་ར། །སྲོག་བདག་ཚངས་པ་སྐྱེས་བུ་སྐུ་ལྷ་དང་། །མ་ཧཱ་ཀ་ལ་རྡོ་རྗེ་བདུད་འདུལ་ཆེ། །ནག་པོ་སྐྲག་མེད་མུ་སྟེགས་གུ་ལུང་ནག །ཤམ་པོ་གནམ་སྨན་ཐོག་གི་བུ་ཡུག་དང་། །སྤྱི་བདུད་གུ་རུམ་རྩེ་དང་བྲག་བཙན་དམར། །རྣམ་ཐེའུ་དཀར་པོ་ཡམ་ཤུད་དམར་པོ་དང་། །བྷི་ན་ཡ་ག་གཟའ་བདུད་ར་ཧུ་ལ། །ཀླུ་བདུད་མགོ་དགུ་ཡཀྵ་ནག་མོ་སོགས། །སྲིད་གསུམ་དྲེགས་པ་ཡོངས་ཀྱི་གཙུག་གི་རྒྱན། །དྲེགས་པའི་སྡེ་དཔོན་ཆེན་པོ་སུམ་ཅུ་ནི། །མཐུ་སྟོབས་རྫུ་འཕྲུལ་ནམ་མཁའི་མཐའ་དང་མཉམ། །རང་རང་གཡོག་འཁོར་ལྷ་སྲིན་སྤྲིན་ལྟར་གཏིབས། །ཕོ་ཉ་ལས་མཁན་ཚོགས་རྣམས་ཤ་ར་ར། །གདུག་པའི་མེ་དཔལ་སྣ་ཚོགས་གློག་ལྟར་འཁྱུག །རྔམ་པའི་གད་མོ་འབྲུག་སྟོང་ལྡིར་བ་བཞིན། །རྣམ་བཞིའི་ཕྲིན་ལས་དངོས་གྲུབ་ཆར་ལྟར་འབེབས། །ས་དང་བར་སྣང་ཁྱོན་རྣམས་ཡོངས་གང་སྟེ། །བསྟན་པ་སྲུང་ཞིང་བསྟན་འཛིན་སྐྱོང་བའི་ཕྱིར། །སྐད་ཅིག་ཙམ་གྱི་གནས་འདིར་གཤེགས་སུ་གསོལ། །གསེར་སྐྱེམས་གཡུ་སྐྱེམས་རཀྟ་ཁྲག་གི་སྐྱེམས། །ཇ་ཆང་བདུད་རྩིའི་བཏུང་བའི་ཞལ་སྐྱེམས་འདི། །རིན་ཆེན་སྣ་ལྔའི་རླབས་ཀྱི་འཕྲེང་བ་ཅན། །སྔགས་བདག་དྲེགས་པའི་སྡེ་དཔོན་སུམ་ཅུ་པོས། །རྔམ་པའི་ཚུལ་གྱིས་དགྱེས་པར་བཞེས་སུ་གསོལ། །བཞེས་ནས་བསྟན་ལ་འཚེ་བའི་དགྲ་བགེགས་རྣམས། །རྒྱལ་འགོང་དམ་སྲི་ཤི་འདྲེ་འབྱུང་པོའི་ཚོགས། །ཁྱད་པར་བྱད་ཕུར་རྦོད་གཏོང་མཁན་རྣམས་ཀུན། །རྡུལ་ཕྲན་ཙམ་ཡང་མ་བཞག་ཟས་སྐལ་གྱིས། །བསྟན་པ་འཛིན་པའི་སྐྱེས་བུ་དམ་པ་རྣམས། །མཛད་པ་ཕྲིན་ལས་ནམ་མཁའི་མཐའ་དང་མཉམ། །དེང་སང་སྙིགས་མའི་སྐྱེ་འགྲོའི་ཚོགས་རྣམས་ཀུན། །གཉེན་པོ་གཞན་གྱི་འདུལ་བར་དཀའ་བའི་ཚེ། །ཐེག་པའི་ཡང་རྩེ་ཨ་ཏི་རྫོགས་ཆེན་གྱི། །བསྟན་པའི་ཉི་མ་ཕྱོགས་བཅུར་སྣང་བར་མཛོད། །ཅེས་འདི་ཡང་ས་ཕོ་རྟ་ལོའི་ཟླ་ཚེས་རང་ལོ་༤༧སྐབས་འཆི་མེད་གྲུབ་པའི་དགའ་ཚལ་ནས་རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེས་བྲིས་པ་དགེ །