ཞིང་སྐྱོང་དུར་ཁྲོད་ལྷ་མོའི་རྟགས་བསྟོད་ཡོངས་འདུའི་གྲིབ་བསིལ་ཞེས་བྱ་བ་བཞུགས་སོ།།
བྷྱོཿ བདེ་ཆེན་ཀུན་ཏུ་བཟང་མོའི་མཁའ་ཀློང་ནས། །ཆོས་དབྱིངས་ངང་ལས་སྙིང་རྗེ་ཁྲོས་པའི་ཡུམ། །གནས་ཡུལ་དུར་ཁྲོད་ཀུན་ལ་དབང་བསྒྱུར་ཞིང་། །མ་གཅིག་སྲིད་གསུམ་ཀུན་གྱི་བདག་མོ་ནི། །ཞིང་སྐྱོང་དུར་ཁྲོད་མ་མོ་ངན་ནེ་མ། །རྣལ་འབྱོར་གདུང་བ་དྲག་པོས་འབོད་ལགས་ན། །དུར་ཁྲོད་བརྒྱད་དང་གནས་ཡུལ་ཉེར་བཞི་ནས། །བརྩེ་བའི་ཐུགས་རྗེའི་གནས་འདིར་གཤེགས་སུ་གསོལ། །དུར་ཁྲོད་རོལ་བའི་གཞལ་ཡས་ཆེན་པོ་འདིར། །པདྨ་ཉི་ཟླ་བམ་རོ་བརྩེགས་པའི་ཁྲིར། །མ་གཅིག་ལྷ་མོ་འཁོར་བཅས་བཞུགས་སུ་གསོལ། །དཔལ་འབར་དབང་ཕྱུག་མ་མོ་ངན་ནེ་མར། །སྒོ་གསུམ་གུས་པའི་ཚུལ་གྱིས་ཕྱག་འཚལ་ལོ། །དམར་ཆེན་མཆོད་ཡོན་དབང་ལྔའི་མེ་ཏོག་བཞད། །ཚིལ་ཆེན་གསུར་དུད་ཞུན་མེ་མཁྲིས་པའི་ཆབ། །ཤ་རུས་ཞལ་ཟས་རྐང་གླིང་ཐོད་རྔའི་སྒྲ། །སྨན་རག་གཏོར་མའི་ཚོགས་ཀྱི་ལོངས་སྤྱོད་སོགས། །རབ་འབྱམས་ནམ་མཁའ་གང་བར་འབུལ་ལགས་ན། །དགྱེས་པའི་ཚུལ་གྱིས་མཆོད་པ་བཞེས་སུ་གསོལ། །ཞིང་སྐྱོང་དུར་ཁྲོད་མ་མོ་གནས་ཉུལ་མ། །ཁྱོད་ཀྱི་སྐུ་མདོག་སྨུག་ནག་བརྗིད་པ་ནི། །འགྱུར་མེད་ཆོས་ཀྱི་དབྱིངས་ལ་མངའ་བརྙེས་རྟགས། །ཁྲོ་མོ་འབར་བའི་ཆ་ལུགས་བསྟན་པ་ནི། །ཞིང་བཅུའི་དགྲ་བོའི་གཤེད་མ་མཛད་པའི་རྟགས། །ཞལ་ནས་ཧཱུྃ་བྷྱོཿ་ང་རོ་སྒྲོག་པ་ནི། །དམ་ཉམས་དགྲ་བོ་རིང་དུ་བསྐྲད་པའི་རྟགས། །རྣ་བར་དུང་གི་ཨ་ལུང་འཁྲོལ་བ་ནི། །ལེགས་ཉེས་གཉིས་ཀྱི་གདར་ཤ་བཅད་པའི་རྟགས། །སྤྱན་གསུམ་སྡང་མིག་ཕྱོགས་བཅུར་གཟིགས་པ་ནི། །སྒྲུབ་པོ་རྟག་ཏུ་བུ་བཞིན་སྐྱོང་བའི་རྟགས། །རལ་བ་ཁམ་ནག་ཐུར་དུ་འཕྱང་བ་ནི། །དུག་ལྔ་མ་སྤངས་ཡེ་ནས་ལྷུན་གྲུབ་རྟགས། །ཐོད་སྐམ་ལྔ་ཡི་དབུ་བརྒྱན་བྱས་པ་ནི། །རིགས་ལྔའི་སངས་རྒྱས་དབུ་ལ་བཞུགས་པའི་རྟགས། །མགོ་བོ་རློན་པས་དོ་ཤལ་བྱས་པ་ནི། །འཁོར་བའི་སྡུག་བསྔལ་རྩད་ནས་གཅོད་པའི་རྟགས། །སེ་རལ་ཁ་དང་རུས་ཕྲེང་བརྒྱན་པ་ནི། །འགྲོ་བའི་དོན་ལ་ངལ་དུབ་མེད་པའི་རྟགས། །གཡས་པས་དགྲ་སྙིང་དྲོན་མོར་ཟ་བ་ནི། །སྒྲུབ་ལ་བར་ཆད་རྡུལ་དུ་བརླག་པའི་རྟགས། །གཡོན་ན་གསལ་བའི་མེ་ལོང་བསྣམས་པ་ནི། །ཆོས་རྣམས་མ་འདྲེས་སོ་སོར་འབྱེད་པའི་རྟགས། །རབ་དཀར་དར་གྱི་སྟོད་གཡོག་བྱས་པ་ནི། །མཁའ་སྤྱོད་ཞིང་གི་གཙོ་མོ་མཛད་པའི་རྟགས། །མི་ལྤགས་གཡང་གཞི་ལྡིང་སྟབས་གྱོན་བ་ནི། །ཤ་ཟ་ཌཱ་ཀཱིའི་ཚོགས་ལ་དབང་བསྒྱུར་རྟགས། །སྟག་གི་པགས་པའི་ཤམས་ཐབས་བྱས་བ་ནི། །ས་སྤྱོད་ཚོགས་རྣམས་དབང་དུ་སྡུད་པའི་རྟགས། །ཞབས་གཉིས་གཡས་བརྐྱང་གཡོན་སྐུམ་བྱས་པ་ནི། །རྒྱུ་འབྲས་ལོག་ལྟ་ཟིལ་གྱིས་གནོན་པའི་རྟགས། །དབུགས་བྲལ་ཕོ་མོ་གདན་དུ་བརྩེགས་པ་ནི། །ཆོས་ཀྱི་དབྱིངས་ལ་སྤྲོས་པ་མེད་པའི་རྟགས། །འཁོར་གྱི་མ་མོ་རྣམ་བཞི་ཤར་བ་ནི། །ལས་བཞི་ཕྲིན་ལས་ཐོགས་པ་མེད་པའི་རྟགས། །གཞན་ཡང་མ་མོ་ཆེན་མོའི་བཀའ་འཁོར་ན། །ཤྭ་ན་ཝ་སྤྱང་དྲེད་སོགས་མ་རུང་པ། །མི་བཟད་གདུག་ཅིང་གཏུམ་པའི་འཁོར་གྱི་ཚོགས། །ཉི་མ་ལས་ནི་འོད་ཟེར་ཇི་བཞིན་དུ། །ནམ་མཁའི་མཐའ་ཀླས་བསམ་མི་ཁྱབ་པའི་འཁོར། །བདག་ཅག་བྱང་ཆུབ་སྒྲུབ་པའི་ཚོགས་རྣམས་ལ། །བར་དུ་གཅོད་པའི་དགྲ་བགེགས་མཐའ་དག་ཀུན། །དུས་མཐའི་མེ་ཡིས་རྩ་སྦུར་བསྲེགས་པ་བཞིན། །མིང་ཙམ་མེད་པར་བརླག་པའི་ཕྲིན་ལས་མཛོད། །མདོར་ན་བྱང་ཆུབ་སྙིང་པོ་མ་ཐོབ་བར། །མ་གཅིག་ལྷ་མོ་ཁྱོད་དང་མི་འབྲལ་ཞིང་། །རྟག་ཏུ་རྣལ་འབྱོར་བུ་བཞིན་སྐྱོང་པ་དང་། །རྣམ་ཀུན་སྒྲུབ་པོའི་རེ་འདོད་བསྐོང་བར་མཛོད། །ཅེས་པ་འདི་ནི་གཏོ་རུ་ཡེ་ཤེས་དང་འཇུ་ཚ་བསོད་དབང་གཉིས་ནས་འདི་ལྟར་དགོས་ཞེས་ཡང་ཡང་བསྐུལ་བ་ལ་བརྟེན་ནས། རྫོགས་སྤྲུལ་ལྔ་བ་ཐུབ་བསྟན་ཆོས་ཀྱི་རྡོ་རྗེས་བྲིས་པ་འདིས་ཀྱང་བསྟན་འགྲོར་ཕན་པའི་རྒྱུར་གྱུར་ཅིག མདྒ་ལཾ། དགེ་ལེགས་སུ་གྱུར་ཅིག