གཏེར་སྲུང་བཙན་རྒོད་ཆེན་པོའི་གསེར་སྐྱེམས་ཁྲག་ཞག་རྒྱ་མཚོའི་ཟེར་ཕྲེང་ཞེས་བྱ་བ་བཞུགས་སོ།།
ཧྲཱིཿ སྔོན་ཚེ་པདྨ་དབང་གི་བཀའ་ཉན་པ། །ཁམས་གསུམ་སྐྱེས་འགྲོའི་སྲོག་གི་བདག་པོ་ནི། །སྣང་སྲིད་དྲེགས་པ་ཡོངས་ཀྱི་གཙུག་གི་རྒྱལ། །མ་རུང་གདུལ་དཀའ་འདུལ་བའི་གཤེད་པོ་ཆེ། །དམ་ཉམས་གདུག་པ་འདུལ་བའི་ལྷ་གཅིག་པུ། །སངས་རྒྱས་བསྟན་པ་སྲུང་བའི་མཐུ་རྩལ་ཅན། །ཕྱི་ལྟར་ཀླུ་བཙན་འབར་བ་སྤུན་བདུན་པོ། །དམ་ཉམས་དགྲ་བོའི་སྲོག་ལ་རྔམ་མཛད་པའི། །མཆིམས་ཕུ་བྲག་བཙན་གཡུ་ལུང་གངས་བཙན་དང་། །སྦ་རི་རྦ་བཙན་རྐང་དམར་གྲི་བཙན་མཆོག །ཕུ་རི་ཕུག་བཙན་བྲག་དམར་རྫོང་བཙན་རྗེ། །སྟག་མ་རོང་བཙན་སྤྲུལ་པའི་བཙན་རྒོད་ཚོགས། །གཏེར་བདག་ས་ཡ་འབུམ་སྡེ་ཚོགས་བཅས་ལ། །དམ་ཚིག་ཡེ་ཤེས་བདུད་རྩི་དྲི་མ་མེད། །རིན་ཆེན་སྣ་ལྔ་བརྡར་བའི་ཞལ་སྐྱེམས་འདི། །འདོད་ཡོན་རྒྱ་མཚོའི་མཆོད་སྤྲིན་ལང་ལིང་གཡོ། །ཕུལ་བས་དམ་ཉམས་དགྲ་བགེགས་ཀུན་སྒྲོལ་ཞིང་། །ནང་ལྟར་རཱ་ཙ་དགེ་བསྙེན་ཆེན་པོ་སྟེ། །ཆོས་འཁོར་སྐྱོང་བ་ཡོངས་ཀྱི་མངའ་བདག་པོ། །རྡོ་རྗེ་དྲག་རྩལ་རྡོ་རྗེ་དབང་བཙན་རྩལ། །རྡོ་རྗེ་ཡེ་ཤེས་རྡོ་རྗེ་མཆོག་རྒོད་རྩལ། །རྡོ་རྗེ་སྲུང་མ་རྡོ་རྗེ་དགྲ་འཇོམས་རྩལ། །དམ་ཚིག་ཡེ་ཤེས་བདུད་རྩི་དྲི་མ་མེད། །རིན་ཆེན་སྣ་ལྔ་བརྡར་བའི་ཞལ་སྐྱེམས་འདི། །འདོད་ཡོན་རྒྱ་མཚོའི་མཆོད་སྤྲིན་ལང་ལིང་གཡོ། །ཕུལ་བས་བདེ་དགའི་དཔལ་ལ་སྤྱོད་པར་ཤོག །གསང་བ་གནོད་སྦྱིན་ནོར་བདག་རྒྱལ་པོ་ནི། །ལོངས་སྤྱོད་རིན་ཆེན་གཏེར་ལ་མངའ་མཛད་པ། །གང་བ་བཟང་པོ་འབྲོག་གནས་ཆེན་པོ་དང་། །ཡཀྴ་ཀ་ལ་གནོད་སྦྱིན་ཁྱུང་གདོང་ཆེ། །གནོད་སྦྱིན་ཆུ་འབེབ་གནོད་སྦྱིན་གངས་དཀར་དང་། །གནོད་སྦྱིན་བདུད་འཇོམས་ལ་སོགས་གནོད་སྦྱིན་ཚོགས། །བྱེ་བ་འབུམ་གྱི་འཁོར་དང་བཅས་པ་ལ། །དམ་ཚིག་ཡེ་ཤེས་བདུད་རྩི་དྲི་མ་མེད། །རིན་ཆེན་སྣ་ལྔ་བརྡར་བའི་ཞལ་སྐྱེམས་འདི། །འདོད་ཡོན་སྣ་ལྔའི་མཆོད་སྤྲིན་ལང་ལིང་གཡོ། །ཕུལ་བས་ལོངས་སྤྱོད་གཏེར་ལ་སྤྱོད་པར་ཤོག །བཙན་རྒོད་དགེ་བསྙེན་གནོད་སྦྱིན་འཁོར་བཅས་ལ། །བདུད་རྩི་གསེར་སྐྱེམས་ཕུལ་བའི་བྱིན་རླབས་ཀྱིས། །མི་མཐུན་གནོད་པའི་འགལ་རྐྱེན་ཀུན་ཞི་ནས། །མཐུན་རྐྱེན་འདོད་པའི་ལེགས་ཚོགས་ཇི་སྙེད་ཀུན། །ཇི་ལྟར་དཔག་བསམ་ཤིང་དང་ཡིད་བཞིན་ནོར། །བུམ་པ་བཟང་ལས་ཅི་འདོད་འབྱུང་བ་བཞིན། །གནས་སྐབས་མཐར་ཐུག་ལེགས་པའི་ཡོན་ཏན་ཚོགས། །ཡར་ངོའི་ཟླ་བ་ཇི་བཞིན་འཕེལ་གྱུར་ཅིག །ཅེས་པ་འདི་ཡང་འབྲུག་སྐལ་བཟང་ནས་ཡང་ཡང་བསྐུལ་བའི་ངོར་རྫོགས་སྤྲུལ་ལྔ་པས་བྲིས་དགེའོ། །