རྨ་རྒྱལ་སྤོམ་རའི་གསང་སྒྲུབ་གཡང་གི་འབྱུང་གནས་ཞེས་བྱ་བ་བཞུགས་སོ།།

ཨོཾ་སྭ་སྟི། རྡོ་རྗེ་འཛིན་པ་གསང་བའི་བདག །རྒྱལ་བའི་མཐུ་སྟོབས་གཅིག་བསྡུས་པ། །ལོག་འདྲེན་འདུལ་བའི་ལྷ་གཅིག་པུ། །དེ་ལ་བཏུད་ནས་ཕྱག་འཚལ་ལོ། །དེ་ལ་འདིར་རྨ་རྒྱལ་སྤོམ་རའི་གསང་སྒྲུབ་ནོར་ལྷ་ལྟར་སྒྲུབ་པའི་ཚུལ་ལ། སྦྱོར་བ་ཡོ་བྱད་ཀྱི་བཤམས་དང་། དངོས་གཞི་སྒྲུབ་པའི་ཐབས་གཉིས་ལས། །དང་པོ་ནི། སྨན་རཀ་གཏོར་གསུམ་དང་མཆོད་པའི་ཡོ་བྱད་རྣམས་འདུ་བྱས་ལ། གཉིས་པ་ནི། རང་ཉིད་ཡི་དམ་གྱི་ང་རྒྱལ་དང་ལྡན་པའི་ངང་ནས། ཨོཾ་སྭ་བྷ་ཝ་སོགས། སྟོང་པའི་ངང་ལས་རང་ཉིད་ཡི་དམ་གྱི་ལྷར་གསལ་བའི་མདུན་དུ། ནེའུ་སེང་སྨན་ལྗོངས་ཉམས་དགའ་བར་རི་བོ་ནགས་ཚལ། བྲག་རི་དཀར་དམར་གཡའ་གངས་སྣ་ཚོགས་ཀྱིས་བསྐོར་བའི་དབུས་སུ། གངས་རི་དཀར་པོ་རྩེ་རྒྱལ་རྩེ་མོ་མཐོན་པོ་དགུང་ལ་བསྙེགས་པ། ཐད་ནས་ཉི་མ་ཟླ་བ་འཆར་བ། སྟེང་དུ་ལྷོ་སྤྲིན་ཕྱུག་མོ་འཁྲིགས་པ། གཡུ་འབྲུག་སྔོན་མོའི་ངར་སྐད་ལྡིར་བ། མགུལ་དུ་གཡུ་ཡི་ན་བུན་འཁྲིགས་པ། བར་སྣང་སྦྲང་ཆར་བདུད་རྩི་སིལ་སིལ་འབེབས་པ། གཡས་ཀྱི་གངས་རི་ཟླུམ་པོ་ལ། ལྷ་བྲན་མང་པོས་གར་སྟབས་བྱེད་པ། མདུན་གྱི་བྲག་ཟུར་དཀར་པོ་ལ། བྱ་རྒོད་ཐང་དཀར་རྒོད་པོ་འཕུར་ལྡིང་གཡོ་བ། མདུན་གྱི་ཀླུ་མཚོ་སྔོན་མོ་ལས་ཀླུ་མོ་མང་པོས་མཆོད་པ་འབུལ་བ། བདུད་རྩི་སྨན་གྱི་དྲི་བཟང་ཕྱོགས་བཅུར་འཕྲོ་བ། ལྷ་བྱ་སྣ་ཚོགས་ཀྱིས་གསུང་སྙན་ལྷང་ལྷང་དུ་སྒྲོག་པ། འཇའ་ཟེར་འོད་ཕུང་འཁྲིགས་པའི་ཀློང་ན། ཡེ་ཤེས་རང་སྣང་ལས་གྲུབ་པའི་རིན་ཆེན་ཤེལ་ཀྱི་སྐུ་མཁར་གྲུ་བཞི་སྒོ་བཞི་རྟ་བབས་དང་ལྡན་པ། ཕྱོགས་བཞིར་ཀ་བ་ཉིས་སྟོང་ལྔ་བརྒྱས་བཏེགས་པའི་ཁང་བཟང་སུམ་བརྩེགས་སུ་ཡོད་པ། དབྱིབས་ལེགས་ཤིང་ལྟ་ན་སྡུག་པ། རྒྱན་དང་བཀོད་པ་ཕུན་སུམ་ཚོགས་པ་དུ་མས་སྤྲས་པ། ས་འོག་ཏུ་གཏེར་གྱི་ཁང་པ་དུ་མས་གཏམས་པ། འཁོར་ཡུག་རིམ་པ་གསུམ་གྱིས་བསྐོར་བའི་འཁོར་ཡུག་དང་པོའི་ཕྱོགས་མཚམས་བརྒྱད་དུ། གཏེར་གྱིས་གཏམས་པའི་རིན་ཆེན་སྣ་བདུན་གྱི་རང་བཞིན་ཅན་གྱི་ཁང་བཟང་བརྒྱད་ཀྱིས་མཛེས་པ། འཁོར་ཡུག་གཉིས་པ། རྒྱལ་སྲིད་སྣ་བདུན། བཀྲ་ཤིས་རྫས་རྟགས། ཉེ་བའི་རིན་ཆེན་བདུན། རྡོ་རྗེའི་ལྷ་མོ་བཅུ་དྲུག་གིས་བརྒྱན་པ། འཁོར་ཡུག་གསུམ་པ། དཔག་བསམ་གྱི་ཤིང་། འདོད་འཇོའི་བ། མ་རྨོས་ལོ་ཏོག །གཏེར་ཆེན་པོའི་བུམ་པ། ཡན་ལག་བརྒྱད་ལྡན་གྱི་ཁྲུས་ཀྱི་རྫིང་བུ། ཆུ་བྱ་སྣ་ཚོགས་པའི་སྐད་སྙན་པ་སྒྲོག་པ་རིན་པོ་ཆེ་སྣ་ཚོགས་ལས་གྲུབ་པའི་མེ་ཏོག་སྣ་ཚོགས་ཀྱིས་ཀུན་ནས་སྤྲས་པ། གཞལ་ཡས་ཁང་དབུས་མའི་ལྟེ་བ་ལ། སྣ་ཚོགས་པདྨ་དང་ཉི་མའི་གདན་གྱི་སྟེང་དུ། ཁམས་གསུམ་སྐད་ཅིག་ཉིད་ལ་བགྲོད་པར་བྱེད་པའི་ཅང་ཤེས་གསེར་མདོག་རླུང་གི་གཤོག་པ་ཅན། རྔ་རྔོག་དུང་ལས་གྲུབ་པ། དར་དམར་གྱི་སྟན། རིན་ཆེན་གསེར་གྱི་སྒ་སྲབ་སྤྲས་པ། གཡུ་ཡི་ཡོབ་ཆེན། མུ་མེན་གྱི་གོང་སྨེད་བྱས་པ། མུ་ཏིག་གི་རྒྱན་ཆས་སིལ་སིལ་འཁྲོལ་བ་དེའི་སྟེང་དུ་སྐྱེ་རྒུ་རྣམས་ཕོངས་པ་ཀུན་ལས་སྒྲོལ་བར་བྱེད་པའི་ནོར་ལྷའི་ཚུལ་དུ་བཞུགས་པ། ཞལ་གཅིག་ཕྱག་གཉིས་པ། ཕྱག་གཡས་སྲིད་ཞིའི་ཕྱྭ་གཡང་མ་ལུས་པ་ཐམས་ཅད་འགུགས་པར་བྱེད་པའི་མདའ་དར་བསྣམས་པ། གཡོན་པས་འགྲོ་བའི་དབུལ་ཕོངས་ཀྱི་སྡུག་བསྔལ་མཐའ་དག་སེལ་བར་བྱེད་པའི་གསེར་གྱི་ནེའུ་ལེ་སེར་པོ་ཁ་ནས་ཡིད་བཞིན་ནོར་བུ་སྐྱུག་པ་འཛིན། འཛུམ་ཞིང་བརྗིད་པའི་ཚུལ་ཅན། སྐུ་ལ་ཟ་འོག་སེར་ཁྲའི་འཇོལ་བེར་ལྷབ་ལྷུབ་གསོལ་བ། ཞབས་ལ་སྭག་ལྷམ་ཡུ་རིང་གསོལ་བ། ཁམས་གསུམ་དབང་དུ་སྡུད་ཅིང་སྲིད་གསུམ་ཟིལ་གྱིས་གནོན་པར་བཞུགས་པ། དེའི་འཁོར་དུ་རྩེ་ལྷ་བཅུ་གསུམ། རྨ་སྲས་དགུ། སྲིང་གཅིག་རྡོ་རྗེ་དྲག་མོ་རྨ་སྨན་གྱི་ཚོགས་རྨ་འཁོར་འབུམ་དང་བཅས་པ་དང་། གཡས་ཕྱོགས་སུ་ལྷ་དམག་གྱི་ཚོགས་དང་། གཡོན་ཕྱོགས་ནས་གཉན་དམག་གྱི་ཚོགས་ཐམས་ཅད་ཀི་བསྭོ་ཆ་སྒྲ་དི་རི་རི་སྒྲོག་པ། ནམ་མཁའ་དང་ས་གཞི་བར་སྣང་ཐམས་ཅད་ཉི་མའི་ཟེར་གྱི་རྡུལ་ལྟར་འཁྲིགས་པ་བསམ་གྱིས་མི་ཁྱབ་པར་གང་བར་བཞུགས་པའོ། །དེའི་སྤྱི་བོར་ཨོཾ་དཀར་པོ། མགྲིན་པར་ཨཱཿ་དམར་པོ། སྙིང་གར་ཧཱུྃ་སྔོན་པོས་མཚན་པར་གྱུར། དེ་ལས་འོད་ཟེར་འཕྲོས་པས། གང་དཀར་ཤེལ་གྱི་སྐུ་མཁར་རྨ་ཡུལ་མཐོང་བ་ཀུན་སྨོན་ནས། སྐད་ཅིག་གི་མཁའ་ལས་གློག་ཕྲེང་གཡོ་བ་བཞིན་དུ་སྤྱན་དྲངས་པར་གྱུར། སྤྱན་འདྲེན་པ་ནི། ཧཱུྃ། ཕྱོགས་ཕྱོགས་ཉི་མ་ཤར་གྱི་ཕྱོགས་རོལ་ན། །ཤར་ཕྱོགས་རྨ་གཡང་ཐམས་ཅད་ཆགས་པའི་ཡུལ། །གངས་དཀར་རིན་ཆེན་ཤེལ་གྱི་སྐུ་མཁར་ནས། །སྐུ་ལྷ་རྨ་གཉན་སྤོམ་ར་ལྷ་ཡི་སྲས། །ཁྱོད་ནི་སྔོན་ནས་མངོན་པར་བྱང་ཆུབ་ཀྱང་། །རྩོད་ལྡན་སྙིགས་མ་ལྔ་བརྒྱའི་ཡང་མཐའ་འདིར། །འགྲོ་བའི་དོན་དུ་སྤྲུལ་པའི་སྐུར་སྟོན་པ། །ནོར་ལྷ་ཡོངས་ཀྱི་རྒྱལ་པོའི་ཚུལ་འཛིན་པ། །མཐུ་ཆེན་རྩེ་ལྷ་བཅུ་གསུམ་རྨ་སྲས་དགུ། །སྲིང་གཅིག་རྡོ་རྗེ་གྲགས་མོ་རྨ་སྨན་ཚོགས། །ལྷ་དམག་ཀླུ་དམག་རྨ་འཁོར་འབུམ་དང་བཅས། །འཁོར་བཅས་མ་ལུས་སྤྱན་འདྲེན་གཤེགས་སུ་གསོལ། །བཛྲ་ས་མ་ཡ་ཛཿ བཞུགས་གསོལ་ནི། ཧཱུྃ། དྭངས་གསལ་ཤེལ་གྱི་གཞལ་མེད་ཉམས་དགའ་བར། །སྣ་ཚོགས་པདྨ་ཉི་ཟླའི་གདན་སྟེང་དུ། །འགྲོ་བའི་དབུལ་ཕོངས་སེལ་བའི་ལྷ་གཅིག་བུ། །མི་གཡོ་དགྱེས་ཤིང་བརྟན་པར་བཞུགས་སུ་གསོལ། །ས་མ་ཡ་ཏིཥྛ་ལྷན། །ཕྱག་འཚལ་བ་ནི། ཧཱུྃ། ཐུགས་རྗེས་ཕོངས་པ་ཀུན་ལས་སྒྲོལ་མཛད་པ། །སྐུ་ལྷ་རྨ་གཉན་སྤོམ་ར་འཁོར་བཅས་ལ། །གཉིས་སུ་མེད་པ་དང་བའི་ཚུལ་གྱིས་ནི། །རྩེ་གཅིག་གུས་པའི་ཚུལ་གྱིས་ཕྱག་འཚལ་ལོ། །ཨ་ཏི་པུ་ཧོཿ པྲ་ཏི་ཙྪ་ཧོཿ མཆོད་པ་ནི། ཧཱུྃ། རབ་འབྱམས་ཞིང་ཀུན་གང་བའི་མཆོད་པའི་སྤྲིན། །རབ་མང་ནམ་མཁའ་མཛོད་ཀྱི་འཁོར་ལོ་འདི། །རབ་ཏུ་དང་བའི་ཡིད་ཀྱིས་འབུལ་ལགས་ན། །རབ་མཆོག་ལྷ་ཡི་ལྷ་མཆོག་ཁྱོད་ལ་འབུལ།ཨོཾ་བཛྲ་ཨརྒྷྃ་སོགས་ནས་ཤབྡ་མ་ཧཱ་པཉྩ་རཀྟ་བྷ་ལིང་ཏ་ཁ་ཁ་ཁཱ་ཧི་ཁཱ་ཧིཿ བསྟོད་པ་ནི། ཧྲཱིཿ གངས་ཅན་ཤར་ཕྱོགས་རྨ་གཡང་ཆགས་པའི་ཡུལ། །སྐུ་ལྷ་ལྷ་ཆེན་རྨ་རྒྱལ་སྤོམ་ར་ནི། །ནང་ལྟར་ངོ་བོ་རྒྱལ་ཆེན་རྣམ་ཐོས་སྲས། །ས་བརྒྱད་ཐོབ་པའི་གནོད་སྦྱིན་ཡོངས་ཀྱི་རྒྱལ། །སྐུ་མདོག་རིན་ཆེན་གསེར་གྱི་རི་བོ་འདྲ། །སྐུ་ལ་ཟ་འོག་གསེར་མདོག་བེར་ཆེན་གསོལ། །དབུ་ལ་རིན་ཆེན་སྣ་ལྔའི་པྲོག་ཞུས་བརྒྱན། །ཕྱག་གཡས་མདའ་དར་གཡོན་པས་ནེའུ་ལེ་བསྣམས། །ཕོངས་པ་ཀུན་ལས་སྒྲོལ་བའི་ལྷ་གཅིག་པུ། །རྣམ་མང་ནམ་མཁའ་མཛོད་ལ་མངའ་བརྙེས་པ། །ཆེ་བའི་ཡོན་ཏན་ནམ་མཁའི་མཐའ་དང་མཉམ། །གང་ལ་ཅི་འདོད་དངོས་གྲུབ་རྩོལ་བའི་ལྷ། །ལྷ་རྣམས་དབུག་འབྱིན་ལྷ་མིན་ཕམ་པར་མཛད། །སྲིང་གཅིག་རྡོ་རྗེ་དྲག་མོ་རྨ་སྨན་ཚོགས། །ལྷ་དམག་ཀླུ་དམག་རྨ་འཁོར་འབུམ་དང་བཅས། །འཁོར་དང་བཅས་ལ་གུས་པས་ཕྱག་འཚལ་བསྟོད། །ཕྲིན་བཅོལ་ནི། ཧཱུྃ་བྷྱོཿ སྔོན་ཚེ་གནས་མཆོག་འོག་མིན་ཞིང་ཁམས་ནས། །བཅོམ་ལྡན་དཔལ་ཆེན་ཆེ་མཆོག་ཧེ་རུ་ཀས། །ཐ་ཚིག་གསུམ་གྱིས་དམ་ལ་བཏགས་པའི་ཚེ། །ཅི་བགྱིས་བཀའ་ཉན་སྒྲུབ་པར་ཁས་བླངས་ཤིང་། །བར་དུ་སློབ་དཔོན་པདྨ་འབྱུང་གནས་ཀྱིས། །བྲག་དམར་དཔལ་གྱི་བསམ་ཡས་བཞེངས་པའི་ཚེ། །རྒྱལ་ཀུན་སྤྱི་གཟུགས་པདྨ་ཐོད་ཕྲེང་གིས། །བསམ་ཡས་ཧས་པོ་རི་ཡི་ཡང་རྩེ་ནས། །བརྟུལ་ཞུགས་སྤྱོད་པའི་རྡོ་རྗེའི་གར་སྟབས་ཀྱིས། །བོད་ཁམས་ལྷ་འདྲེ་ཆེ་དགུ་ཐམས་ཅད་ཀུན། །རང་དབང་མེད་པར་དབང་དུ་བསྡུས་ནས་ཀྱང་། །ལྷ་སྲིན་ཐམས་ཅད་དམ་ལ་བཏགས་པའི་ཚེ། །ལྷ་གཉན་ཆེན་པོས་རང་གཟུགས་བསྟན་ནས་ཀྱང་། །ཇི་ལྟར་ཞལ་བཞེས་དམ་ལས་མ་འདའ་ཞིག །ད་ལྟ་སྒྲུབ་པའི་རིག་འཛིན་བདག་ཅག་གིས། །མ་དང་མཁའ་འགྲོ་འདུ་བའི་གནས་མཆོག་འདིར། །ཚེ་འདིར་བསམ་པ་ཐམས་ཅད་འགྲུབ་པ་དང་། །མཐར་ཐུག་ཆོས་སྐུ་མངོན་དུ་བྱེད་པ་ལ། །བར་ཆད་སྣ་ཚོགས་རླུང་ལྟར་འཚུབས་པའི་ཚེ། །ཁྱོད་ནི་སྔོན་ཚེ་བསྐལ་མང་གོང་རོལ་ནས། །ས་བརྒྱད་ཐོབ་པའི་བྱང་ཆུབ་སེམས་དཔའ་ལ། །དྲག་པོ་ཆེན་པོའི་རྟོག་པ་མི་འཚལ་ཡང་། །འོན་ཀྱང་རྩོད་ལྡན་སྙིགས་མའི་ཡང་མཐའ་འདིར། །སློབ་དཔོན་ཆེན་པོའི་བཀའ་བསྒོས་ཐ་ཚིག་ལྟར། །གཟུགས་ཅན་གཟུགས་མེད་མི་དང་མི་མིན་གྱི། །བར་ཆད་རྩོམ་པའི་མི་བསྲུན་ལོག་སྤྱོད་མཁན། །རང་གཤེད་རང་ལ་དབབ་བའི་ཕྲིན་ལས་མཛོད། །དེང་ནས་སྐྱེ་བ་ཚེ་རབས་ཐམས་ཅད་དུ། །ལྷ་མཆོག་ཁྱོད་དང་མི་འབྲལ་འགྲོགས་ནས་ཀྱང་། །འགོ་ཞིང་དཔུང་གཉེན་སྡོང་གྲོགས་མཛད་པ་དང་། །ཕྱོགས་ལས་རྣམ་པར་རྒྱལ་བའི་ཕྲིན་ལས་མཛོད། །ཅེས་པ་འདི་ཡང་ཟླ༨ཚེས་ལ་ཡིག་ཐུབ་བསྟན་ནོར་བུ་ནས་བསྐུལ་བའི་ངོར་འཆི་མེད་གྲུབ་པའི་དགའ་ཚལ་ནས་རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེས་བྲིས་པ་དགེ་ལེགས་སུ་གྱུར་ཅིག
ཧཱུྃ། ཕྱོགས་ཕྱོགས་དག་ཀྱང་ཕ་ཀི་ན། །ཤར་ཕྱོགས་རྨ་གཡང་ཆགས་པའི་ཡུལ། །གངས་དཀར་ཤེལ་གྱི་གུར་ཁང་དང་། །རྨ་ཡུལ་མཐོང་བ་ཀུན་སྨོན་ནས། །སྐུ་ལྷ་རྨ་གཉན་སྤོམ་ར་དང་། །བརྩེ་ལྷ་བཅུ་གསུམ་རྨ་སྲས་དགུ། །རྡོ་རྗེ་དྲག་མོ་རྨ་སྨན་ཚོགས། །རྨ་འཁོར་འབུམ་དང་བཅས་པ་ཀུན། །སྤྱན་འདྲེན་གནས་འདིར་གཤེགས་པའི་ཚེ། །གཡས་ནས་ལྷ་དམག་སྤུངས་སེ་སྤུང་། །གཡོན་ནས་གཉན་དམག་འཚུབས་སེ་འཚུབ། །ཀི་བསྭོ་ཆ་སྒྲ་དི་རི་རི། །འདིར་གཤེགས་དགྱེས་པའི་གདན་ལ་བཞུགས། །སྲིད་པའི་འདོད་ཡོན་སྣ་ཚོགས་དང་། །བཀྲ་ཤིས་རྫས་རྟགས་རྒྱལ་སྲིད་བདུན། །ཕྱི་ནང་གསང་བའི་མཆོད་པ་འབུལ། །བསམ་པ་སྒྲུབས་ལ་རེ་བ་བསྐོངས། །ལྷ་ཡི་ཚེ་དང་ཀླུ་ཡི་ནོར། །གཉན་གྱི་གཡང་དང་མི་ཡི་དཔལ། །བཅུད་ལྡན་ཟས་དང་བཀྲག་ཅན་གོས། །འཛམ་གླིང་ཟས་ནོར་བདག་ལ་སྩོལ། །ལྷ་འདྲེ་མི་གསུམ་དབང་དུ་བསྡུས། །དགྲ་འདྲེ་གདོན་གསུམ་ཚར་ཆོད་ལ། །བཅོལ་བའི་ཕྲིན་ལས་གྲུབ་པར་མཛོད། །ཅེས་བརྗོད་ཕུད་དང་གཏོར་མ་མཆོད། །འདི་ཡང་རྫོགས་ཆེན་སྤྲུལ་མིང་པ། །ཐུབ་བསྟན་ཆོས་ཀྱི་རྡོ་རྗེ་ཡིས། །གང་ཤར་དེ་མ་ཐག་ཏུ་བྲིས། །མངྒ་ལམ། དགེའོ། །