རྨ་རྒྱལ་སྤོམ་རའི་བསྐང་བ་རྒྱས་པ་རྨ་གཡང་དངོས་གྲུབ་ཆར་འབེབས་ཞེས་བྱ་བ་བཞུགས་སོ།།

ཧཱུྃ། རང་བཞིན་ཆོས་ཀྱི་དབྱིངས་ལས་མ་གཡོས་ཀྱང་། །རང་བྱུང་རང་ཤར་རྣམ་རོལ་ཅིར་ཡང་སྣང་། །རང་སྣང་མ་འགགས་འཇའ་ཚོན་ལྟ་བུ་མཛེས། །རང་བྱུང་ལྷུན་གྲུབ་ཞིང་ཁམས་ཆེན་པོའི་དབུས། །བསམ་མི་ཁྱབ་པའི་ཕོ་བྲང་ལྟ་ན་སྡུག །བསམ་ལས་འདས་པའི་རྒྱན་བཀོད་ཕུན་སུམ་ཚོགས། །བསམ་མེད་བློ་འདས་རང་བྱུང་རང་ཤར་བ། །བསམ་བརྗོད་བྲལ་བའི་ཕོ་བྲང་ལྷུན་གྱིས་གྲུབ། །ཕོ་བྲང་ཕྱི་རོལ་འཁོར་ཡུག་ཐམས་ཅད་ན། །རིན་ཆེན་བཻཌཱུརྱ་ཡི་ས་གཞི་ལ། །གསེར་གྱི་བ་གམ་མིག་མང་རིས་སུ་བྲིས། །རྣམ་མང་རིན་ཆེན་སྣ་ཚོགས་ལས་གྲུབ་པའི། །རབ་མཛེས་ཨུཏྤལ་པདྨ་ཚར་དུ་དངར། །ཁ་དོག་ལྔ་ལྡན་ཡིད་འོང་རྫིང་བུ་དང་། །ཡན་ལག་བརྒྱད་ལྡན་ཆུ་བོ་དལ་གྱི་འབབས། །གསང་བ་སྔགས་ཀྱི་སྙན་པའི་སྒྲ་དབྱངས་སྒྲོག །ཡིད་འཕྲོག་ལྷ་བྱ་གསུང་སྙན་སྣ་ཚོགས་ནི། །རྣམ་འགྱུར་དགའ་བའི་ཟློས་གར་ཅིར་ཡང་བསྒྱུར། །ཤིན་ཏུ་མཛེས་པའི་རི་དྭགས་སྣ་ཚོགས་ནི། །རྩེད་འཇོ་དགའ་བའི་གར་བྱེད་ལམས་སེ་ལམ། །མ་རུང་གདུག་པའི་གཅན་གཟན་གཏུམ་པོའི་ཚོགས། །ཕྱོགས་བཅུར་རྒྱུག་ཅིང་རྔམས་པའི་ང་རོ་སྒྲོག །མར་གད་ཨིནྡྲ་ནི་ལ་མུ་ཏིག་དང་། །གསེར་དངུལ་བྱུ་རུ་མུ་མེན་སྤོས་ཤེལ་ཚོགས། །སྣ་ཚོགས་རིན་ཆེན་ལས་གྲུབ་དཔག་བསམ་ཤིང་། །ཡིད་འོང་ལྗོན་པའི་ཚལ་གྱིས་ཀུན་ནས་མཛེས། །རབ་དཀར་གངས་ཀྱི་རི་བོ་ལྟ་ན་སྡུག །བརྗིད་ཆགས་བཀོད་ལེགས་ལྷུན་སྟུག་བྲག་རི་ཡི། །འཁོར་ཡུག་བར་མཚམས་མེད་པར་ཀུན་ནས་མཛེས། །ཕོ་བྲང་ཆེན་པོའི་དབུས་ཀྱི་ལྟེ་བ་ལ། །ལྷ་ཡི་སྲས་པོ་རྨ་རྒྱལ་སྤོམ་ར་ནི། །ཁྱོད་ནི་ཞི་རྒྱས་དབང་དང་དྲག་པོ་ཡི། །ཕྲིན་ལས་རྣམ་བཞིའི་དངོས་གྲུབ་སྟེར་མཛད་པའི། །རྣམ་འགྱུར་སྤྲུལ་པ་ཅིར་ཡང་སྟོན་པའི་ལྷ། །རེས་འགའ་རྒྱས་པའི་ཕྲིན་ལས་སྒྲུབ་མཛད་པའི། །གསེར་མདོག་སྒེག་ཅིང་བརྗིད་པའི་ཉམས་ལྡན་པ། །ཞལ་གཅིག་ཕྱག་གཉིས་ཕྱག་གཡས་མདའ་དར་དང་། །གཡོན་པས་ནོར་འཛིན་གསེར་གྱི་ནེའུ་ལེ་བཙིར། །ཁ་ནས་ཡིད་བཞིན་ནོར་བུ་སྣ་ཚོགས་སྐྱུག །གསང་གོས་དབང་མདོག་མཐའ་འཇགས་རྒྱས་པའི་མདོག །རིན་ཐང་བརྗོད་དུ་མེད་པའི་པཉྩ་ལི། །ཟབ་བེར་གསེར་མདོག་ཁ་དོག་སྣ་ཚོགས་ལ། །རབ་མཛེས་རིན་ཆེན་མེ་ཏོག་རི་མོ་བཀྲ། །གསེར་ཁྲབ་གསེར་རྨོག་རུ་དར་རྒོད་འཕྲུ་ཅན། །མགུལ་རྒྱན་གསེར་གབ་བེེཌཱུརྱ་ཡི་སྤྲས། །གཟི་དང་གཡུ་བྱུར་མུ་ཏིག་ཕྲེང་བས་རྒྱན། །ཐབས་ཀྱི་དཔའ་བོའི་མདའ་དོང་གཡས་སུ་བཏགས། །ཤེས་རབ་མཆོག་དཀར་གཟིག་ཤུབས་འབར་བ་གཡོན། །ཕ་རོལ་འཇོམས་པའི་རལ་གྲི་རྐེད་ལ་བཏགས། །ཆིབས་སུ་རྟ་མཆོག་གསེར་གྱི་མདོག་ཅན་ལ། །རྫུ་འཕྲུལ་ལྡན་པ་རླུང་གི་གཤོག་པ་ཅན། །རིན་ཆེན་གསེར་གྱི་གཡེར་ཁས་མགྲིན་པ་སྤྲས། །སྲབ་འཇམ་ཡང་བའི་ལེ་བརྒན་དར་སྟན་ལ། །རིན་ཆེན་གསེར་ལ་དངུལ་གྱིས་སྤྲས་པའི་སྒ། །རབ་མཛེས་ཟ་འོག་སྣ་ལྔའི་ཡོབ་སྟན་ལ། །བེེཌཱུརྱ་ཡི་ཡོབ་ཆེན་མཛེས་པ་ཅན། །གོང་སྨེད་རིན་ཆེན་མར་གད་ཞུན་མ་ལ། །ཡིད་འོང་རིན་ཆེན་པདྨ་རཱ་གའི་གདོག །གཡུ་མཐུར་གསེར་སྲབ་དར་དམར་སྲབ་སྐྱོགས་ལ། །མུ་ཏིག་ཐུར་མདའ་དུང་གི་ལན་ཚར་ཅན། །ཕུན་ཚོགས་དཔལ་འབྱོར་དངོས་གྲུབ་སྟེར་མཛད་པའི། །འདོད་རྒུའི་ཆར་འབེབས་ནོར་ལྷ་ཡོངས་ཀྱི་གཙོ། །འགྲོ་བའི་དབུལ་ཕོངས་སྡུག་བསྔལ་སེལ་བར་བྱེད། །བཙུན་མོ་སྲས་དང་ཕྱི་ནང་བློན་པོ་དང་། །འཁོར་དུ་རྩེ་ལྷ་བཅུ་གསུམ་རྨ་སྲས་དགུ། །སྲིང་གཅིག་རྡོ་རྗེ་དྲག་མོ་མོ་སྨན་ཚོགས། །ལྷ་ཀླུ་གཉེན་གྱི་དམག་ཚོགས་བསམ་མི་ཁྱབ། །རྨ་འཁོར་འབུམ་ཕྲག་ཡངས་པའི་ཚོགས་དང་བཅས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །ཧཱུྃ་ཧྲཱིཿ ཐུགས་དམ་གཉན་པོ་སྐོང་བའི་དམ་རྫས་ནི། །ཡན་ལག་བརྒྱད་ལྡན་མཆོད་ཡོན་ཞབས་བསིལ་དང་། །རྣམ་བཀྲའི་མེ་ཏོག་དྲི་ཞིམ་བདུག་སྤོས་སྤྲིན། །སྣང་གསལ་མར་མེ་དྲི་ཆབ་བྱུག་པའི་མཚོ། །རོ་བརྒྱའི་ཞལ་ཟས་སྙན་བརྗིད་རོལ་མོའི་སྒྲ། །ལྷ་རྫས་ཕྱི་ཡི་མཆོད་པ་སྤྲིན་ལྟར་གཏིབས། །རྨ་རྒྱལ་སྤོམ་ར་འཁོར་བཅས་ཐུགས་དམ་བསྐང་། །དམར་ཆེན་ཨརྒྷཾ་དུག་ཆུའི་ཞབས་བསིལ་དང་། །དབང་ལྔའི་མེ་ཏོག་གསུར་ཆེན་དུད་པའི་སྤྲིན། །ཞུན་ཆེན་མར་མེ་མཁྲིས་པའི་དྲི་ཆབ་དང་། །ཤ་རུས་ཞལ་ཟས་རྐང་གླིང་ཐོད་རྔའི་སྒྲ། །རང་བྱུང་ཡེ་ཤེས་ནང་གི་མཆོད་པའི་སྤྲིན། །རྨ་རྒྱལ་སྤོམ་ར་འཁོར་བཅས་ཐུགས་དམ་བསྐང་། །སྨན་དང་རཀྟ་དཔལ་གྱི་གཏོར་མ་དང་། །ཚོགས་ཀྱི་འཁོར་ལོའི་ལོངས་སྤྱོད་སྐར་ལྟར་བཀྲམ། །མ་རིག་གཉིས་འཛིན་རུ་ཏྲ་དབྱིངས་སུ་བསྒྲལ། །ཐབས་ཤེས་ཡབ་ཡུམ་མཉམ་སྦྱོར་བདུད་རྩིའི་སྤྲིན། །དམ་རྫས་གསང་བའི་མཆོད་པ་བླ་ན་མེད། །རྨ་རྒྱལ་སྤོམ་ར་འཁོར་བཅས་ཐུགས་དམ་བསྐང་། །རྡོ་རྗེ་སྒེག་མོ་དཀར་མོ་ལྟ་ན་སྡུག །ཕྲེང་བ་སེར་མོ་ནོར་བུའི་དོ་ཤལ་ཅན། །གླུ་མ་དམར་མོ་རིན་ཆེན་པི་ཝཾ་སྒྲོག །གར་མ་ལྗང་གུ་གར་གྱི་ཕྱག་རྒྱ་ཅན། །ལྟ་ན་སྡུག་པ་ཕྱི་ཡི་ལྷ་མོའི་ཚོགས། །རྨ་རྒྱལ་སྤོམ་ར་འཁོར་བཅས་ཐུགས་དམ་བསྐང་། །བདུག་སྤོས་སེར་མོ་དྲི་ཞིམ་སྤོས་ཕོར་ཐོགས། །མེ་ཏོག་དཀར་མོས་མེ་ཏོག་སྣ་ཚོགས་འཐོར། །མར་མེ་དམར་སེར་ཉི་ཟླའི་སྒྲོན་མེ་ཐོགས། །དྲི་མ་ལྗང་གུས་དྲི་ཡི་དུད་ཕོར་བསྣམས། །འཇམ་མཉེན་ཡིད་འོང་ནང་གི་རིགས་མའི་ཚོགས། །རྨ་རྒྱལ་སྤོམ་ར་འཁོར་བཅས་ཐུགས་དམ་བསྐང་། །མེ་ལོང་དཀར་མོས་དངུལ་དཀར་མེ་ལོང་བསྣམས། །རྔ་ཟླུམ་སེར་མོའི་རྔ་ཟླུམ་སྙན་པ་འཁྲོལ། །རྡོ་རྗེ་པི་ཝཾ་དམར་མོས་པི་ཝཾ་འཁྲོལ། །རྡོ་རྗེ་གླིང་བུ་སྔོན་མོས་གླིང་བུ་བསྣམས། །གཟུགས་མཛེས་གསང་བའི་ལྷ་མོ་རྣམ་པ་བཞིས། །རྨ་རྒྱལ་སྤོམ་ར་འཁོར་བཅས་ཐུགས་དམ་བསྐང་། །རྫ་རྔ་དཀར་མོས་ཕྱག་གཉིས་རྫ་རྔ་རྡུང་། །རེག་བྱ་སེར་མོས་ན་བཟའ་སྣ་ཚོགས་འབུལ། །རོ་མ་དམར་མོས་ཕྱག་གཉིས་ཞལ་ཟས་ཐོགས། །ཆོས་མ་མཐིང་གས་ཆོས་ཀྱི་ཕྱག་རྒྱ་མཛད། །རྨད་བྱུང་འདོད་ཡོན་ལྷ་མོའི་ཚོགས་རྣམས་ཀྱིས། །རྨ་རྒྱལ་སྤོམ་ར་འཁོར་བཅས་ཐུགས་དམ་བསྐང་། །གསེར་གྱི་ཙཀྲ་ཡིད་བཞིན་ནོར་བུ་མཆོག །ཡིད་འོང་བཙུན་མོ་ཁྱིམ་བདག་རིན་པོ་ཆེ། །རབ་བརྟན་གླང་པོ་ཅང་ཤེས་རྟ་ཡི་མཆོག །ཕ་རོལ་རྒོལ་འཇོམས་དམག་དཔོན་རིན་པོ་ཆེ། །བསོད་ནམས་སྟོབས་ལས་བྱུང་བའི་རྒྱལ་སྲིད་བདུན། །རྨ་རྒྱལ་སྤོམ་ར་འཁོར་བཅས་ཐུགས་དམ་བསྐང་། །རིན་ཆེན་གདུགས་མཛེས་གསེར་གྱི་ཉ་མོ་དང་། དགོས་འདོད་གཏེར་གྱི་བུམ་པ་པདྨ་བཟང་། །དྲི་མེད་དུང་དཀར་འདོད་འབྱུང་དཔལ་བེའུ། །མི་ནུབ་རྒྱལ་མཚན་གསེར་གྱི་འཁོར་ལོ་སོགས། །དགེ་ལེགས་གཏེར་མཛོད་བཀྲ་ཤིས་རྟགས་བརྒྱད་ཀྱིས། །རྨ་རྒྱལ་སྤོམ་ར་འཁོར་བཅས་ཐུགས་དམ་བསྐང་། །དངུལ་དཀར་མེ་ལོང་འཆི་མེད་བདུད་རྩིའི་ཞོ། །ཉོན་མོངས་ནད་སེལ་གི་ཝཾ་བིར་བ་དང་། །ཚེ་འཕེལ་དུརྦ་དུང་དཀར་གཡས་འཁྱིལ་བ། །དབང་རྫས་ལི་ཁྲི་བགེགས་འཇོམས་ཡུངས་དཀར་རྫས། །ཡིད་འཕྲོག་བཀྲ་ཤིས་རྫས་མཆོག་བརྒྱད་པོ་ཡིས། །རྨ་རྒྱལ་སྤོམ་ར་འཁོར་བཅས་ཐུགས་དམ་བསྐང་། །ལྷུན་སྟུག་ནགས་ཚལ་རྣོ་བའི་རལ་གྲི་དང་། །རིན་ཆེན་སྣ་ཚོགས་ལས་གྲུབ་གཞལ་ཡས་ཁང་། །མལ་ཆ་ལྷ་ཡི་གོས་དང་སྦྲུལ་གྱི་ལྤགས། །རིན་ཆེན་སྣ་ཚོགས་ལས་གྲུབ་མཆིལ་ལྷམ་སོགས། །དགེ་ལེགས་གཏེར་མཛོད་ཉེ་བའི་རིན་ཆེན་བདུན། །རྨ་རྒྱལ་སྤོམ་ར་འཁོར་བཅས་ཐུགས་དམ་བསྐང་། །མ་རྨོས་ལོ་ཏོག་རིན་ཆེན་གཏེར་གྱི་བུམ། །འདོད་འབྱུང་བ་མོ་ནོར་འཛིན་ནེའུ་ལེ། །ཡན་ལག་བརྒྱད་ལྡན་རྫིང་བུ་སྣ་ཚོགས་དང་། །མཐིང་རིལ་ཁྲུང་ཁྲུང་ངང་པ་དཀར་སེར་མཛེས། །རིན་ཆེན་ལས་གྲུབ་ཁྲུས་ཀྱི་ཁང་པ་སོགས། །རྨ་རྒྱལ་སྤོམ་ར་འཁོར་བཅས་ཐུགས་དམ་བསྐང་། །ཨིནྡྲ་ནི་ལ་མར་གད་བེེཌཱུརྱ། །རྡོ་རྗེ་ཕ་ལམ་པདྨ་རཱ་ག་གཡུ། །གཟི་དང་བྱུ་རུ་སྦུར་ལེན་ཨིནྜ་སྙིལ། །གསེར་སྤུག་སྤོས་ཤེལ་གཡུ་དམར་མུ་མེན་དང་། །མེ་ཤེལ་ཆུ་ཤེལ་དུང་དང་མུ་ཏིག་སོགས། །རྨ་རྒྱལ་སྤོམ་ར་འཁོར་བཅས་ཐུགས་དམ་བསྐང་། །རལ་གྲི་མདུང་དང་ཐོང་གཤོལ་དགྲ་སྟ་དང་། །རྡོ་རྗེ་ལྕགས་ཀྱུ་ཞགས་པ་ལྕགས་སྒྲོག་དྲིལ། །མདའ་གཞུ་རྩེ་གསུམ་ཟངས་ལྕགས་འཁོར་ལོ་དང་། །ཐོ་བ་གཏུན་དང་གསལ་ཤིང་ཆུ་གྲི་མདུང་། །གོ་ཁྲབ་ཕུབ་རྨོག་མཚོན་ཆའི་ཚོགས་རྣམས་ཀྱིས། །རྨ་རྒྱལ་སྤོམ་ར་འཁོར་བཅས་ཐུགས་དམ་བསྐང་། །ཡོལ་བ་བླ་བྲེ་འཕན་གདུགས་རྒྱལ་མཚན་དང་། །སྣ་ཚོགས་དར་གྱི་གཡབ་མོ་སྤྲིན་ལྟར་གཏིབས། །ཟ་འོག་གུར་དང་དར་གྱི་ལྡ་ལྡིའི་ཚོགས། །རབ་མཛེས་རྔ་ཡབ་ནོར་བུའི་ཡུ་བ་ཅན། །སྣ་ཚོགས་ནོར་བུའི་དྲྭ་བ་དྲྭ་ཕྱེད་ཀྱིས། །རྨ་རྒྱལ་སྤོམ་ར་འཁོར་བཅས་ཐུགས་དམ་བསྐང་། །གླང་ཆེན་མ་ཧེ་བསེ་རུ་བ་མེན་ཚོགས། །ཤ་རྐྱང་རྣ་བ་རྒོ་བ་འབྲོང་བུ་སྙན། །རྟ་དྲེལ་བོང་བུ་མཛོ་འབྲི་ཙ་ར་ལུག །གངས་རིའི་མདངས་ལྡན་ལྷ་གཡག་ཞོལ་ཆེན་དང་། །རི་དྭགས་གཡང་དྭགས་རྐང་བཞིའི་ཚོགས་རྣམས་ཀྱིས། །རྨ་རྒྱལ་སྤོམ་ར་འཁོར་བཅས་ཐུགས་དམ་བསྐང་། །སྟོབས་ལྡན་གངས་ཀྱི་སེང་གེ་དཔའ་བརྟུལ་སྟག །མི་བཟད་གདུག་པ་གཟིག་དང་གཏུམ་པོ་དོམ། །རྔམས་བརྗིད་དྲེད་མོང་མ་རུང་སྤྱང་ཀི་འོབ། །རབ་མྱུར་འཕར་བ་ཟ་བྱེད་ཝ་མོ་དང་། །གུང་གཡི་ལ་སོགས་གཅན་ཟན་ཚོགས་རྣམས་ཀྱིས། །རྨ་རྒྱལ་སྤོམ་ར་འཁོར་བཅས་ཐུགས་དམ་བསྐང་། །ཆུ་སྲིན་རྒྱལ་པོ་དུང་དང་རུས་སྦལ་སྲམ། །ཉ་སྦྲུལ་སྦལ་ལྕོང་འཛིན་བྱེད་ཆུ་སྲིན་སྤིར། །ཆུ་རྟ་ཆུ་གླང་ཆུ་ལུག་ཆུ་ཡི་མི། །ཀླུ་ལ་དབང་བའི་ཀླུ་ནོར་ཉེར་གཅིག་དང་། །རླན་གཤེར་ཆུ་ལ་གནས་པའི་རིགས་གྱུར་སོགས། །རྨ་རྒྱལ་སྤོམ་ར་འཁོར་བཅས་ཐུགས་དམ་བསྐང་། །ཤང་ཤང་ནེ་ཚོ་རྨ་བྱ་ཀ་ཏ་རི། །ལྷ་བྱ་དྲིལ་བུའི་སྒྲ་ཅན་གཟེ་མོའི་སྒྲ། །ཀ་ལ་པིང་ཀ་ཁུ་བྱུག་རི་སྐེགས་དང་། །གསེར་གྱི་རྡོ་རྗེའི་གཟུགས་ཅན་ཀྲི་ཏ་པ། །ཁྱུང་ཆེན་ལ་སོགས་འདབ་ཆགས་སྣ་ཚོགས་ཀྱིས། །རྨ་རྒྱལ་སྤོམ་ར་འཁོར་བཅས་ཐུགས་དམ་བསྐང་། །ཛ་ཏི་ཕ་ལ་སུག་སྨེལ་ཀ་ཀོ་ལ། །ཅུ་གང་ལི་ཤི་ལ་སོགས་བཟང་པོ་དྲུག །ཨ་བར་སྐྱུར་གསུམ་ལ་སོགས་འབྲས་བུ་གསུམ། །གེ་སར་གསུམ་དང་ཞོ་ཤ་རྣམ་པ་གསུམ། །ག་བུར་ལ་སོགས་སྨན་གྱི་རིགས་རྣམས་ཀྱིས། །རྨ་རྒྱལ་སྤོམ་ར་འཁོར་བཅས་ཐུགས་དམ་བསྐང་། །ཕོ་ཆས་མོ་ཆས་བརྒྱན་ཆ་སྣ་ཚོགས་དང་། །ཀ་ཆ་དཀོར་ཆ་ལོངས་སྤྱོད་བསམ་མི་ཁྱབ། །ཏིང་འཛིན་སྔགས་དང་ཕྱག་རྒྱའི་མཆོད་པ་དང་། །བཟའ་བ་སྣ་ཚོགས་ལྷུན་པོའི་སྤོ་དང་མཉམ། །བཏུང་བའི་རིགས་བྱེད་རྒྱ་མཚོ་ལྟ་བུར་བསྐྱིལ། །རྨ་རྒྱལ་སྤོམ་ར་འཁོར་བཅས་ཐུགས་དམ་བསྐང་། །གཞན་ཡང་མདོར་ན་ཕྱི་ནང་གསང་བ་ཡི། །དངོས་པོ་ཡོ་བྱད་ཇི་སྙེད་ཡོད་པ་ཀུན། །དངོས་སུ་འབྱོར་དང་ཡིད་ཀྱིས་སྤྲུལ་པ་ཡི། །ཕུན་ཚོགས་དཔལ་འབྱོར་ལོངས་སྤྱོད་བསམ་མི་ཁྱབ། །གུས་པའི་སེམས་ཀྱིས་རབ་ཏུ་འབུལ་ལགས་ན། །ཟས་ནོར་ལོངས་སྤྱོད་ཅི་འདོད་དངོས་གྲུབ་ཀུན། །ལྷ་ཆེན་འཕྲུལ་དགའི་ལོངས་སྤྱོད་ཇི་བཞིན་དུ། །དངོས་གྲུབ་མ་ལུས་ཡིད་བཞིན་སྩོལ་བ་དང་། །དགྱེས་པ་ཆེན་པོའི་ཚུལ་གྱིས་བཞེས་ནས་ཀྱང་། །བདག་ཅག་དཔོན་སློབ་འཁོར་དང་བཅས་པ་ལ། །ཕྲིན་ལས་རྣམ་བཞི་ལྷུན་གྱིས་གྲུབ་པར་མཛོད། །ཅེས་རྨ་རྒྱལ་སྤོམ་རའི་བསྐང་བ་རྒྱས་པ་འདི་ཉིད་རྫོགས་སྤྲུལ་ལྔ་བ་ཐུབ་བསྟན་ཆོས་ཀྱི་རྡོ་རྗེས་ལྕགས་མོ་བྱ་ལོའི་ཟླ་བ་དང་པོའི་ཚེས་ཉེར་ལྔ་ལ་སྡེ་དགེ་ལྷུན་གྲུབ་སྟེང་གི་རྒྱལ་ཁམས་ནས་བསྟན་འགྲོར་ཕན་པའི་ལྷག་པའི་བསམ་པ་བཟང་པོས་བྲིས་པ་དགེ་ལེགས་སུ་གྱུར་ཅིག དགེའོ། །དགེའོ། །དགེའོ། །