སྨན་སྲུང་ལྷ་སྨན་གྱི་བསྐང་བསྡུས་མུ་ཏིག་ཕྲེང་བ་ཞེས་བྱ་བ་བཞུགས་སོ།།
ཧཱུྃ། ནམ་མཁའ་དབྱིངས་ཀྱི་དཀྱིལ་འཁོར་ཆེན་པོ་ནས། །ཡེ་ཤེས་ཁྱེའུ་ཆུང་སྨན་གྱི་ལྷ་མོའི་ཚོགས། །ལྷ་ཀླུ་སྨན་གསུམ་མངོན་ཤེས་ཅན་གྱི་བདག །གྲངས་མེད་འཁོར་བཅས་ཆར་སྤྲིན་གཏིབ་པ་བཞིན། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །སྣ་ལྔས་བརྒྱན་པའི་མདའ་དར་བཟང་པོ་དང་། །རོ་བརྒྱའི་བཟའ་བཏུང་རྣམ་བཀྲའི་མེ་ཏོག་ཚལ། །གཡུ་ཤུག་སྤོས་དཀར་བསྲེགས་པའི་དུད་པའི་སྤྲིན། །འདོད་ཡོན་ལྔ་དང་རིན་ཆེན་སྣ་བདུན་དང་། །བཀྲ་ཤིས་རྟགས་རྫས་རྒྱལ་སྲིད་རིན་ཆེན་བདུན། །དཀར་གསུམ་མངར་གསུམ་སྨན་སྣ་ཕྱེ་མར་ཕུད། །སྨན་བཤོས་རྩེ་རྒྱལ་འབྲུ་སྣ་རིན་ཆེན་སོགས། །མི་ཟད་ནམ་མཁའ་མཛོད་ཀྱི་འཁོར་ལོའི་སྤྲིན། །མ་ཚང་མེད་པར་གུས་པས་འབུལ་ལགས་ན། །ཐུགས་དམ་གཉན་པོ་དབྱིངས་སུ་བསྐང་གྱུར་ཅིག །དམ་ཚིག་འགལ་བ་མ་ལུས་སོ་སོར་བཤགས། །མཆོག་ཐུན་དངོས་གྲུབ་མ་ལུས་སྩལ་དུ་གསོལ། །ཞེས་རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེའི་བྲིས་པ་དགེའོ། །