རཏ་གླིང་མགོན་པོ་མ་ནིང་གསོལ་བསྡུས་བཞུགས།།
ཧཱུྃཿ རང་མདུན་པད་ཉི་དགྲ་བགེགས་བསྣོལ་བའི་སྟེང་། །དཔལ་མགོན་མ་ནིང་མཐིང་ནག་ཆར་སྤྲིན་མདོག །ཁྲོ་གཏུམ་ཞལ་གཅིག་ཕྱག་གཉིས་སྤྱན་གསུམ་པ། །ཕྱག་གཡས་རུ་མཚོན་གཡོན་པས་སྙིང་ཞགས་བསྣམས། །དར་ནག་བེར་གསོལ་སྙིང་སྦྲུལ་དོ་ཤལ་འཆང་། །ཙནྡན་བིང་ཆེན་སྐེད་གཙུགས་ལྷ་དམག་འགྱེད། །གཡས་སུ་སྲོག་བདུད་ནག་པོ་རྟ་ནག་ཞོན། །ཁ་ཊྭཱྃ་གྲི་གུག་ལྕགས་ཀྱི་སྤར་བུ་བསྣམས། །གཡོན་དུ་ཡུམ་ཆེན་ལྷ་མོ་དཔལ་འབར་མ། །སྐུ་མདོག་དམར་མོ་རལ་གྲི་ཐོད་ཁྲག་བསྣམས། །མི་ལྤགས་གོས་དང་སྟག་ཤམ་ཉི་ཟླས་བརྒྱན། །དྲེགས་པ་སྡེ་བརྒྱད་འཁོར་བཅས་གཤེགས་སུ་གསོལ། །དགྱེས་པར་བཞུགས་ལ་གུས་པས་ཕྱག་འཚལ་ལོ། །དངོས་འབྱོར་ཡིད་སྤྲུལ་སྤྱི་ཡི་མཆོད་པ་དང་། །ཁྱད་པར་ཁྱེད་དང་མཐུན་པའི་དམ་རྫས་ནི། །བཤོས་བུ་ནག་པོ་སྙིང་གི་རྒྱལ་མཚན་དང་། །དམ་ཉམས་དགྲ་བགེགས་བསྒྲལ་བའི་ཤ་ཁྲག་རུས། །རྨད་བྱུང་གཏོར་མ་སྨན་རཀ་བདུད་རྩིའི་མཚོ། །ཁྱི་ནག་དུང་དཀར་ཅང་ཤེས་གཡག་ལུག་ནག །སྤྱི་དང་ཁྱད་པར་ལྷག་པའི་དམ་རྫས་ནི། །དངོས་བཤམས་ཡིད་ཀྱིས་སྤྲུལ་ཏེ་འབུལ་ལགས་ན། །བཞེས་ནས་རྣལ་འབྱོར་བདག་ལ་དངོས་གྲུབ་སྩོལ། །རྫོགས་སྤྲུལ་ལྔ་པས་སོ། །