བརྟན་མ་བཅུ་གཉིས་གསོལ་བསྡུས།།
ཀྱཻ། རང་མདུན་འཇའ་ཟེར་འཁྲིགས་པའི་ཀློང་དཀྱིལ་དུ། །བོད་ཁམས་སྐྱོང་བའི་མ་ཡམས་བརྟན་མའི་ཚོགས། །བདག་ཉིད་ཆེན་མོ་རྡོ་རྗེ་ཀུན་གྲགས་མ། །དཔལ་ལྡན་ཧ་རི་རྡོ་རྗེ་གཡའ་མ་སྐྱོང་། །གངས་ཀྱི་ཡུམ་ཆེན་རྡོ་རྗེ་ཀུན་ཏུ་བཟང་། །འབྲོག་ཆེན་འཁོར་འདུལ་རྡོ་རྗེ་བགེགས་ཀྱི་གཙོ། །གངས་དཀར་ཤ་མེད་རྡོ་རྗེ་སྤྱན་གཅིག་མ། །ཁ་རག་ཁྱུང་བཙུན་རྡོ་རྗེ་དཔལ་གྱི་ཡུམ། །རྨ་རི་རབ་འབྱམས་རྡོ་རྗེ་དྲག་མོ་རྒྱལ། །གསེར་ཆེན་མཁའ་ལྡིང་རྡོ་རྗེ་ཀླུ་མོ་རྒྱལ། །ཀོང་བཙུན་དེ་མོ་རྡོ་རྗེ་བོད་ཁམས་སྐྱོང་། །བཙན་ལ་རོལ་བའི་རྡོ་རྗེ་སྨན་གཅིག་མ། །སྨན་བཙུན་ཨུག་ཆོས་རྡོ་རྗེ་གཡར་མོ་བསིལ། །གཡུ་ཡི་དྲིལ་བུ་རྡོ་རྗེ་ཟུ་ལེ་སྨན། །རང་རང་བྲན་དང་གཡོག་འཁོར་མང་པོའི་ཚོགས། །བརྩེ་བའི་ཚུལ་གྱིས་གནས་འདིར་གཤེགས་སུ་གསོལ། །མཆོད་ཡོན་ཞབས་བསིལ་མེ་ཏོག་བདུག་སྤོས་དང་། །མར་མེ་དྲི་ཆབ་ཞལ་ཟས་རོལ་མོའི་སྒྲ། །ཤ་ཁྲག་རུས་གསུམ་དོན་སྙིང་ནང་རོལ་ཚོགས། །སྨན་རཀ་གཏོར་མ་གསེར་སྐྱེམས་ཇ་ཆང་ཕུད། །གཟུགས་སྒྲ་དྲི་རོ་བཀྲ་ཤིས་རྫས་རྟགས་བརྒྱད། །དང་བའི་བློ་ཡིས་འབུལ་ལོ་དགྱེས་པར་བཞེས། །རྣམ་བཞིའི་ཕྲིན་ལས་ཡིད་བཞིན་འགྲུབ་པར་མཛོད། །རྫོགས་སྤྲུལ་ལྔ་པས་སོ། །