རཏ་ཕུར་གཏེར་སྲུང་ལྡང་ལྷའི་གསོལ་བསྡུས་བཞུགས།།
ཧཱུྃ། བདག་ཉིད་ལྷར་གསལ་མདུན་དུ་སྐད་ཅིག་གིས། །ལྷ་ཡི་དགེ་བསྙེན་རྡོ་རྗེ་དྲག་པོ་རྩལ། །མདོག་དཀར་ཞལ་གཅིག་ཕྱག་གཉིས་ཁྲོ་འཛུམ་བརྗིད། །ཕྱག་གཉིས་དུང་མདོག་རུ་མཚོན་ཙིཏྟ་བསྣམས། །སྐུ་ལ་ཟ་འོག་དར་དཀར་རལ་ཀ་གསོལ། །ཆིབས་སུ་ལྷ་རྟ་ངང་དཀར་རྣ་སྔོན་ཆིབས། །འཁོར་དུ་བཙན་རྒོད་བྱ་ར་སྟོང་གིས་བསྐོར། །གནམ་ས་བར་སྣང་ས་གཞིའི་ཁྱོན་ཀུན་གང་། །བོས་པ་ཙམ་གྱིས་འདིར་གཤེགས་བརྟན་པར་བཞུགས། །མཆོད་ཡོན་ཞབས་བསིལ་མེ་ཏོག་བདུག་པའི་སྤྲིན། །མར་མེ་བྱུག་པ་ཞལ་ཟས་རོལ་མོའི་སྒྲ། །ཁྲག་ཆང་ཨརྒྷཾ་དུག་ཆུའི་ཞབས་བསིལ་དང་། །དབང་ལྔའི་མེ་ཏོག་ཚིལ་ཆེན་དུད་པའི་སྤྲིན། །ཞུན་ཆེན་མར་མེ་མཁྲིས་ཆེན་བྱུག་པའི་མཚོ། །ཤ་རུས་ཞལ་ཟས་རྐང་གླིང་ཐོད་རྔའི་སྒྲ། །སྨན་དང་རཀྟ་གསེར་སྐྱེམས་གཡུ་སྐྱེམས་དང་། །ཇ་ཆང་འོ་སྐོལ་མྱོས་བྱེད་མ་ད་ན། །བ་ལིང་གཏོར་མ་ཚོགས་ཀྱི་ཡོ་བྱད་སོགས། །སྤྱི་དང་ཁྱད་པར་མཆོག་གི་མཆོད་པའི་སྤྲིན། །འཁོར་ཡུག་བཅས་པའི་འཇིག་རྟེན་ཁྱོན་གང་བ། །ལྷ་ཆེན་འཕྲུལ་དགའི་ལོངས་སྤྱོད་ཇི་བཞིན་དུ། །ཕུལ་བས་བདག་ཅག་ནད་གདོན་ཀུན་ཞི་ཞིང་། །ཚེ་བསོད་རྒྱས་ཤིང་ཁམས་གསུམ་དབང་དུ་སྡུད། །བར་ཆད་རྐྱེན་གྱི་རྣམ་སྨིན་ཅི་བྱུང་ཡང་། །མངོན་སྤྱོད་ཤུགས་ཀྱིས་སྒྲོལ་བའི་ཕྲིན་ལས་མཛོད། །རྫོགས་སྤྲུལ་ལྔ་པས་སོ། །