ཉི་གྲགས་རྒྱལ་པོའི་གསོལ་བསྡུས་བཞུགས།།

ཧཱུྃ། བདག་ཉིད་ལྷར་གསལ་མདུན་དུ་སྐད་ཅིག་གིས། །རིན་ཆེན་ལས་གྲུབ་གྲུ་བཞི་སྒོ་བཞི་པ། །སྐུ་ཡི་རྒྱལ་ཆེན་དགྲ་བཅོམ་གཞོན་ནུའི་ཚུལ། །སྐུ་མདོག་དཀར་གསལ་བཞིན་བཟང་མཛེས་འཛུམ་ཅན། །ཕྱག་གཡས་འཁར་བསིལ་གཡོན་པས་ལྷུང་བཟེད་བསྣམས། །རྒྱས་པའི་མདངས་ལྡན་ཆོས་གོས་གསེར་རིས་ཅན། །སྐུ་སྨད་མཐང་གོས་ནམ་མཁའི་མདོག་ཅན་གསོལ། །གླང་ཆེན་ཐལ་དཀར་མཆེ་བ་དྲུག་པ་ལ། །རིན་ཆེན་སྣ་ཚོགས་རྒྱན་གྱིས་བརྒྱན་པ་ཆིབས། །རེས་འགའ་མངོན་སྤྱོད་དྲག་པོའི་ཚུལ་སྟོན་པ། །ཆོས་རྒྱལ་ཚངས་པ་དུང་གི་ཐོར་ཚུགས་ཅན། །ཤར་ཕྱོགས་ཐུགས་ཀྱི་རྒྱལ་ཆེན་བརྒྱ་བྱིན་དང་། །ལྷོ་ཕྱོགས་ཡོན་ཏན་གནོད་སྦྱིན་ཤིང་བྱ་ཅན། །ནུབ་ཕྱོགས་རྒྱལ་ཆེན་དགྲ་བླ་སྐྱེས་གཅིག་པུ། །བྱང་ཕྱོགས་ཕྲིན་ལས་རྒྱལ་ཆེན་བཻ་ཧ་ར། །ཤར་ལྷོར་ཡུམ་ཆེན་ཤན་ཏིང་རོ་ཟན་མ། །ལྷོ་ནུབ་ཡུམ་ཆེན་གསེར་གྱི་སྤུ་གྲི་མ། །ནུབ་བྱང་ཡུམ་ཆེན་འཛིན་བྱེད་པདྨ་སྐྱེས། །བྱང་ཤར་ཡུམ་ཆེན་དམ་ཤིང་བྷན་ཛཱ་ཅན། །སྐུ་གསུང་ཐུགས་དང་ཡོན་ཏན་ཕྲིན་ལས་ཀྱི། །བཀའ་ཡི་བློན་པོ་ཆེན་པོ་རྣམ་པ་ལྔ། །གཡས་ཀྱི་རུ་འདྲེན་བནྡེ་ནག་པོའི་ཚོགས། །གཡོན་གྱི་རུ་འདྲེན་བུད་མེད་ནག་མོའི་ཚོགས། །སྔོན་གྱི་ཤུལ་མཚོན་ཤན་ཏི་བདུད་མོ་འབུམ། །སླད་ཀྱི་རྗེས་འབྲང་ཨ་ཙར་ཚོགས་དང་བཅས། །ཁོལ་བོ་སྟག་ཆས་གཟིག་ཆས་འབུམ་ཕྲག་སྟོང་། །སྐུ་ཡི་སྐྱོ་རོགས་འབག་སེང་གར་མཁན་ཚོགས། །རྒྱལ་པོ་ཆེན་པོའི་ཕྱི་ཡི་འཁོར་ཡུག་ན། །ཕྱི་ནང་ལྷ་སྲིན་དྲེགས་པ་མ་ལུས་ཚོགས། །ཉི་མའི་ཟེར་གྱི་རྡུལ་ལྟར་བསམ་མི་ཁྱབ། །ལས་བཞིའི་ཕྲིན་ལས་སྒྲུབ་ཕྱིར་གཤེགས་སུ་གསོལ། །ཁྱེད་ལ་དགྱེས་པའི་མཆོད་པ་འབུལ་བ་ནི། །ཕྱི་ནང་མཆོད་ཚོགས་སྨན་རཀ་བ་ལིངྟ། །དམ་ཤིང་དགྲ་སྟ་ཤེལ་དཀར་ཕྲེང་བ་དང་། །དགྲ་བཅོམ་ལྷུང་བཟེད་འཁར་བསིལ་ཀ་པཱ་ལ། །སྤྲ་སྤྲེའུ་བྱི་ལ་སྤྱན་གཟིགས་སྣ་ཚོགས་སོགས། །སྤྱི་དང་ཁྱད་པར་ལྷག་པའི་དམ་ཚིག་རྫས། །འབུལ་གྱིས་བཞེས་ལ་རྣམ་བཞིའི་ཕྲིན་ལས་ཀུན། །ཐོགས་མེད་ཡིད་བཞིན་འགྲུབ་པའི་ཕྲིན་ལས་མཛོད། །རྫོགས་སྤྲུལ་ལྔ་པས་སོ། །

གསུང་གི་བློན་པོ་རྡོ་རྗེ་གྲགས་ལྡན་གསོལ་བསྡུས་བཞུགས།།

ཧཱུྃ་ཧྲཱིཿ དབང་ཆེན་རྟ་མཆོག་ཧྱ་གྷྲི་ཝ་ཡིས། །དབང་དྲག་ཁྲོས་པའི་རྣམ་རོལ་ལས་བྱུང་བ། །དབང་གི་ལྷ་མཆོག་རྡོ་རྗེ་གྲགས་ལྡན་ནི། །དབང་མདོག་ཟ་འོག་དམར་ཁྲའི་བེར་ཆེན་ལ། །རྣམ་མང་རིན་ཆེན་རུས་པའི་རྒྱན་གྱིས་སྤྲས། །རྣམ་མཛེས་བསེ་ཁྲབ་བསེ་རྨོག་རུ་དར་ལྔ། །རྣམ་འཕྲུལ་བཀོད་ལེགས་རིན་ཆེན་རྒྱལ་མཚན་ལ། །རྣམ་མང་འདོད་འབྱུང་ནོར་བུའི་ཏོག་གིས་མཛེས། །འབར་བའི་སྐུ་ལ་རྒྱལ་མཚན་རྣམ་དགུའི་བརྒྱན། །འབར་བ་ཆེན་པོའི་དགྲ་བགེགས་གདན་དུ་བཏིངས། །འབར་བའི་རུ་མཚོན་འཆིང་བྱེད་ཞགས་པ་བསྣམས། །འབར་བྱེད་དམར་ནག་མེ་ཡི་ཀློང་ན་བཞུགས། །གསང་བའི་ཡུམ་ཆེན་གཟི་བརྗིད་ཆེན་མོ་ནི། །གསང་བ་དགའ་བཞིའི་ཡེ་ཤེས་སྟེར་བྱེད་ཅིང་། །གསང་གོས་དཀར་པོ་གསོལ་ཞིང་རྩེ་གསུམ་དང་། །གསང་རྫས་བདུད་རྩིའི་ཐོད་པ་ཡབ་ལ་སྟོབ། །བཀའ་ཉན་སྤྲུལ་པ་རབ་བྱུང་ཆ་ལུགས་ཅན། །བཀའ་ཡི་བློན་པོ་བདུད་ནག་མི་སྡུག་པ། །བཀའ་བཞིན་སྒྲུབ་པའི་རུ་འདྲེན་སྡེ་བཞིའི་ཚོགས། །བཀའ་འཁོར་སྐྱོང་བའི་དྲེགས་པའི་དམག་དཔུང་བཅས། །ཉི་མའི་ཟེར་གྱི་རྡུལ་ལྟར་འདི་གཤེགས་ལ། །ཉིན་བྱེད་སྣང་བའི་དཔལ་ལ་འགྲན་ནུས་པ། །ཉི་མ་འཆར་ཁའི་མདངས་འཛིན་གཡབ་མོ་དང་། །ཉི་ཟླ་རྒྱུ་སྐར་གླིང་བཞི་གླིང་ཕྲན་སོགས། །འདོད་རྒུའི་ཆར་འབེབས་ཡིད་བཞིན་ནོར་བུ་དང་། །འདོད་འབྱུང་དཔལ་གཏོར་སྨན་དང་རཀྟའི་མཚོ། །འདོད་ཡོན་ལྔ་དང་བཀྲ་ཤིས་རྫས་རྟགས་བརྒྱད། །འདོད་འཇོའི་བ་དང་བུམ་བཟང་དཔག་བསམ་ཤིང་། །རབ་མཛེས་རི་དྭགས་གཡུང་དྭགས་ཆུ་གནས་རིགས། །རབ་མྱུར་ཅང་ཤེས་དྲེལ་དང་འདབ་ཆགས་བྱ། །རབ་འཇིགས་མི་བཟད་གཅན་གཟན་རོ་ལ་རྔམས། །རབ་ཏུ་རྣོ་བའི་མདའ་མདུང་མཚོན་ཆའི་རིགས། །དྲི་མེད་ནམ་མཁའི་ལྷ་ལམ་ཡངས་པ་རུ། །དྲི་བྲལ་མཆོད་པའི་སྤྲིན་ཕུང་མཐའ་ཀླས་པ། །དྲི་བསུང་ངད་ལྡན་ཕྱོགས་བཅུར་འཕྲོ་བ་འདི། །དྲི་མ་མེད་པའི་བློ་ཡིས་འབུལ་བར་བགྱི། །གང་དག་བདག་ལ་སྡང་བའི་དགྲ་བགེགས་རྣམས། །གང་ཞིག་རྟག་ཏུ་བསམ་སྦྱོར་ངན་པའི་རིགས། །གང་ལ་གང་འཚམས་མངོན་སྤྱོད་ཕྲིན་ལས་ཀྱིས། །གང་གི་མིང་ཙམ་མེད་པར་བརླག་པར་མཛོད། །བདག་སོགས་འདི་ནས་བྱང་ཆུབ་མ་ཐོབ་པར། །བདག་མེད་རྟོགས་པའི་ལྷ་མཆོག་ཁྱོད་ཉིད་ཀྱིས། །བདག་ཅག་ངར་འཛིན་དབྱིངས་སུ་བསྒྲལ་བ་དང་། །བདག་ལ་སྲུང་སྐྱོབ་ཕྲིན་ལས་མ་གཡེལ་བར། །རྒྱལ་བའི་དབང་པོ་སངས་རྒྱས་གཉིས་པ་ཡིས། །རྒྱལ་བསྟན་སྐྱོང་བར་བཀའ་བསྒོས་ཇི་བཞིན་དུ། །རྒྱལ་གསུང་ལུང་དང་རྟོགས་པའི་དམ་པའི་ཆོས། །རྒྱལ་བའི་ཕྲིན་ལས་ཕྱོགས་བཅུར་རྒྱས་པར་མཛོད། །རྫོགས་སྤྲུལ་ལྔ་པས་སོ། །