ལས་གཤིན་གྱི་གསོལ་བསྡུས་བཞུགས།།

ཨཻ། རང་མདུན་ཐོད་མཁར་ལྕགས་ཀྱི་གྲོང་ཁྱེར་དབུས། །པདྨ་ཉི་ཟླ་དགྲ་བགེགས་གདུགས་པ་ཅན། །དེ་སྟེང་སྲིན་གྱི་མ་ཧེ་སེར་ནག་སྟེང་། །ཡ་ཡིག་གནས་འགྱུར་ལས་ཀྱི་གཤིན་རྗེ་གཤེད། །སྨུག་ནག་བཟོད་པར་དཀའ་བའི་ལང་ཚོ་ཅན། །ཞལ་གདངས་ལྗགས་འདྲིལ་སྤྱན་གསུམ་སྡང་མིག་བསྒྲད། །སྨིན་མ་ཨག་ཚོམ་དམར་པོ་མེ་འབར་ཞིང་། །རལ་བའི་གསེབ་ནས་གཤིན་རྗེའི་ཕོ་ཉ་སྤྲོ། །ཕྱག་གཡས་ཐོད་དབྱུག་གཡོན་པས་ཐོད་ཁྲག་བསྣམས། །མི་ལྤགས་སྟོད་གཡོག་སྟག་ལྤགས་ཤམ་ཐབས་ཅན། །མགོ་རློན་དོ་ཤལ་རུས་པའི་ཕྲེང་བས་བརྒྱན། །དཔལ་དང་དུར་ཁྲོད་རོལ་པའི་ཆས་ཀྱིས་བརྒྱན། །ཞབས་གཉིས་གཡས་བརྐྱངས་གཡོན་བསྐུམས་སྟབས་ཀྱིས་བཞེངས། །གཡོན་དུ་ཡུམ་ཆེན་གཏུམ་མོ་དུག་ཧྲུལ་མ། །མི་ལྤགས་གོས་གྱོན་འཁོར་ལོ་ཐུན་ཁྲག་འཛིན། །འཁོར་དུ་ཡ་བ་མིག་དམར་ཆོས་རྒྱལ་དང་། །ཕྱྭ་གསང་ཏེལ་པ་རྨིག་པ་གླང་མགོ་ཅན། །རལ་བ་ཚར་དགུ་གཤིན་རྗེའི་སྡེ་དཔོན་བརྒྱད། །རང་རང་ཆུང་མ་དང་བཅས་ཕྱོགས་མཚམས་འཁོད། །ཡབ་རྣམས་ཐོད་དབྱུག་གཡས་དང་གཡོན་ཞིང་དབྱུག །ཡུམ་རྣམས་སྤུ་གྲི་ཐོད་པ་ཁྲག་བཀང་བསྣམས། །ལོ་ཟླ་ཞག་གཤེད་གཤིན་རྗེའི་དམག་ཚོགས་ནི། །གཏུམ་དྲག་འཇིགས་པའི་ཚོགས་དང་བཅས་པ་རྣམས། །ཚུར་བྱོན་ཚུར་བྱོན་གནས་འདིར་གཤེགས་སུ་གསོལ། །ཉམས་པ་བསྒྲལ་བའི་ཁྲག་དང་དབང་པོ་ལྔ། །ཚིལ་ཆེན་དུད་པ་ཞུན་ཆེན་མར་མེ་དང་། །མཁྲིས་ཆེན་བདུད་རྩི་སྨན་དང་རཀྟའི་སྐྱེམས། །ཤ་རུས་གཏོར་མ་སྦྱོར་སྒྲོལ་མཆོད་པ་དང་། །རྟ་ནག་ཁྱི་ནག་ལུག་ནག་གཡག་རྒོད་དང་། །གནམ་ལ་འཕུར་དགུ་ས་ལ་འཛུལ་དགུ་སོགས། །སྲིད་ཞིའི་འབྱོར་ཚོགས་དཔག་མེད་ནམ་མཁའ་མཛོད། །ཕུལ་བས་དགྱེས་པར་བཞེས་ཏེ་བདག་ཅག་ལ། །གནོད་པར་བྱེད་པའི་དགྲ་བགེགས་ཀུན་སྒྲོལ་ནས། །དུས་མིན་འཆི་བའི་འཇིགས་པ་བཟློག་ཏུ་གསོལ། །རྫོགས་སྤྲུལ་ལྔ་པས་སོ། །