ཉང་གི་ཁྲོས་ནག་གཏེར་སྲུང་མཁའ་འགྲོ་སྤྱང་ཞོན་མཆེད་གསུམ་གྱི་གསོལ་བསྡུས་བཞུགས་སོ།།
བྷྱོ། རང་ཉིད་ཁྲོས་མ་ནག་མོ་གསལ་བའི་མདུན། །ཐོད་པའི་སྐུ་མཁར་ཟུར་གསུམ་མེ་རླུང་འཚུབས། །དེ་དབུས་མི་རོ་བམ་གྱི་ཁྲི་སྟེང་ནས། །ཉི་དཀྱིལ་སྟེང་དུ་མ་ཡིག་ཡོངས་གྱུར་ལས། །མཁའ་འགྲོ་ཆེན་མོ་སྤྱང་ཞོན་གཅེར་བུ་ནག །ཕྱག་གཉིས་གྲི་གུག་ཐོད་ཁྲག་སྙིང་བཅས་འཛིན། །རལ་བ་གྱེན་འཁྱིལ་ལྷག་མ་ཐུར་དུ་འཕྱང་། །སྦྲུལ་དང་ཐོད་སྐམ་ལྔ་ཡིས་དབུ་ལ་བརྒྱན། །སྐུ་སྟོད་ཞིང་ཆེན་གཡང་གཞི་སྟག་ཤམ་གསོལ། །ཤིན་ཏུ་མི་བཟད་ལྕགས་སྤྱང་མགོ་དགུ་ཆིབས། །དེ་ཡི་གཡས་སུ་བྷྱོ་ཡིག་ཡོངས་གྱུར་ལས། །བཙན་མོ་དམར་མོ་གཅེར་བུ་སྟག་ཤམ་ཅན། །ཕྱག་གཡས་གྲི་གུག་གཡོན་པས་བཙན་ཞགས་འཛིན། །ཤིན་ཏུ་རྔམ་པའི་མཚལ་སྟག་མགོ་དགུ་ཆིབས། །གཡོན་དུ་ཛཿ་ཡིག་ཡོངས་གྱུར་བདུད་མོ་ནི། །སྔོན་མོ་གཅེར་བུ་གཟིག་གི་ཤམ་ཐབས་ཅན། །ཕྱག་གཡས་གྲི་གུག་གཡོན་པས་བདུད་ཞགས་བསྣམས། །འཇིགས་རུང་འཇིགས་བྱེད་ཟངས་འཕར་མགོ་དགུ་ཆིབས། །གཞན་ཡང་གཡས་སུ་མི་ནག་འབུམ་སྡེ་དང་། །གཡོན་ཏུ་བྲོ་བརྡུང་མོན་མོ་ནག་མོ་འབུམ། །མདུན་དུ་ཨ་ཙར་གླུ་ལེན་གར་བྱེད་འབུམ། །ཤ་ཟ་འབུམ་གྱི་ཚོགས་ནི་རྐན་སྒྲ་སྒྲོག །མ་མོ་མཁའ་འགྲོ་འཁོར་བཅས་གཤེགས་སུ་གསོལ། །ལྷ་རྫས་ཕྱི་ཡི་མཆོད་པ་ཉེར་སྤྱོད་བདུན། །རང་བྱུང་ནང་གི་མཆོད་པ་དྲག་པོའི་རྫས། །གཉིས་མེད་གསང་བའི་མཆོད་པ་བླ་ན་མེད། །གཞན་ཡང་མཐུན་རྫས་མ་ཚང་མེད་པ་ཀུན། །ཕུལ་བས་བདག་ཅག་དཔོན་སློབ་འཁོར་བཅས་ལ། །མ་དང་མཁའ་འགྲོའི་བཀའ་ཆད་བཟློག་པ་དང་། །བཅོལ་བའི་ཕྲིན་ལས་ཡིད་བཞིན་འགྲུབ་པར་མཛོད། །ཅེས་རྫོགས་སྤྲུལ་ལྔ་པས་སོ། །