རྨ་རྒྱལ་སྤོམ་རའི་གསོལ་བསྡུས་བཞུགས།།
ཀྱཻ། མདུན་དུ་བྷྲཱུྃ་ལས་རིན་ཆེན་གཞལ་ཡས་ཁང་། །སྣ་ཚོགས་པདྨ་ཉི་མ་ཟླ་བའི་སྟེང་། །སྐུ་ལྷ་རྨ་རྒྱལ་སྤོམ་ར་གསེར་གྱི་མདོག །ཞལ་གཅིག་ཕྱག་གཉིས་ཕྱག་གཡས་མདའ་དར་བསྣམས། །གཡོན་པས་གསེར་གྱི་ནོར་འཛིན་ནེའུ་ལེ་བསྣམས། །སྐུ་ལ་བེར་ཆེན་གསེར་ཁྲབ་ལྷབ་ལྷུབ་གསོལ། །ཞབས་ལ་སྭག་ལྷམ་འཇའ་རིས་འཁྱིལ་བ་གསོལ། །འཁོར་དུ་རྩེ་ལྷ་བཅུ་གསུམ་རྨ་སྲས་དགུ། །སྲིང་གཅིག་རྡོ་རྗེ་དྲག་མོ་རྨ་སྨན་ཚོགས། །རྨ་འཁོར་འབུམ་དང་ལྷ་ཀླུ་གཉན་གྱི་དམག །གནམ་ས་བར་སྣང་ཁྱོན་ཀུན་གང་བའི་ཚོགས། །སྤྱན་འདྲེན་འདིར་གཤེགས་དགྱེས་པར་བཞུགས་སུ་གསོལ། །དྭངས་བསིལ་རྙོག་མེད་ཨརྒྷཾ་བདུད་རྩིའི་རྒྱུན། །དག་བྱེད་ཞབས་བསིལ་དྲི་ལྡན་རྒྱ་མཚོར་བསྐྱིལ། །རབ་མཛེས་རྣམ་བཀྲའི་མེ་ཏོག་ལྟ་ན་སྡུག །ལྷན་ཅིག་སྐྱེས་དང་སྦྱར་བའི་བདུག་པའི་སྤྲིན། །སྣང་གསལ་མར་མེ་འོད་ཟེར་ཕྱོགས་བཅུར་འཕྲོ། །དྲི་ཞིམ་སྨན་གྱིས་སྦྱར་བའི་བྱུག་པའི་མཚོ། །སྣ་ཚོགས་རོལ་མོ་སྙན་པའི་སྒྲ་དང་བཅས། །སྨན་གཏོར་རཀྟ་ཚོགས་ཀྱི་ལོངས་སྤྱོད་དང་། །རིན་ཆེན་བདུན་དང་ཉེ་བའི་རིན་ཆེན་བདུན། །ཁྲུས་ཀྱི་རྫིང་བུ་མ་རྨོས་ལོ་ཏོག་དང་། །བུམ་བཟང་དཔག་བསམ་ཤིང་དང་འདོད་འཇོའི་བ། །ཕོ་ཆས་མོ་ཆས་ཀ་ཆ་དཀོར་ཆ་སོགས། །སྲིད་ཞི་དངོས་པོའི་ཡོ་བྱད་ཇི་སྙེད་པ། །ཕུལ་བས་བདག་ལ་ནོར་གྱི་ལོངས་སྤྱོད་དང་། །ཚེ་གཡང་དཔལ་གྱི་དངོས་གྲུབ་སྩལ་དུ་གསོལ། །རྫོགས་སྤྲུལ་ལྔ་པས་སོ། །