སྦྱོར་བའི་ཆོས་རྣམས་མདོར་བསྡུས་སུ་བྱ་བ།
དམ་ཆོས་སྐུ་གསུམ་དགོངས་མཛོད་ཀྱི་རྩ་བའི་ཐུགས་སྒྲུབ་སྐུ་གསུམ་ཡོངས་འདུས་སོགས་འགའ་
ཞིག་གི་སྐབས་སུ་སྦྱོར་བའི་ཆོས་རྣམས་མདོར་བསྡུས་སུ་བྱ་བ་ལ།
སྐྱབས་འགྲོ་ནི། རང་གི་སྙིང་གི་ཧཱུྃ་གི་འོད་ཟེར་གྱིས་རང་སྣང་དག་པ་མཁའ་སྤྱོད་དཔལ་གྱི་རི་བོ་ནས་སྐུ་གསུམ་ཡོངས་འདུས་མ་ཧཱ་གུ་རུ་ལ་བདེ་གཤེགས་ཞི་ཁྲོ་རབ་འབྱམས་སྐྱབས་གྱུར་མ་ལུས་པས་བསྐོར་བ་ཨོཾ་བཛྲ་ས་མཱ་ཛཿ སྤྱན་དྲངས་བར་མོས་ལ། ན་མོ། བདག་སོགས་འགྲོ་ཀུན་བྱང་ཆུབ་སྙིང་པོའི་བར། །སྐུ་གསུམ་འདུས་པ་འགྲོ་མགོན་པདྨ་འབྱུང་། །རང་བྱུང་རིག་པ་དོན་གྱི་བླ་མ་ལ། །འདུ་འབྲལ་མེད་པའི་ངང་ནས་སྐྱབས་སུ་མཆི། །ཞེས་ཅི་ནུས་བརྗོད། སེམས་བསྐྱེད་ནི། ཀྱཻ་མ། བཟོད་དཀའ་འཇིགས་རུང་འཁོར་བའི་གྲོང་ཁྱེར་དུ། །འཁྲུལ་རྟོག་སྒྱུ་མས་བསླུས་པའི་འགྲོ་བ་ཀུན། །སྐུ་གསུམ་དབྱེར་མེད་བླ་མའི་གོ་འཕང་ལ། །འགོད་ཕྱིར་དོན་དམ་རྡོ་རྗེའི་སེམས་བསྐྱེད་དོ། །ལན་གསུམ། ཚོགས་བསགས་ནི། ཧཱུྃ་ཧྲཱིཿ སྐུ་གསུམ་ཡོངས་འདུས་ཆོས་ཉིད་གདོད་མའི་ལྷར། །མངོན་སུམ་རང་ཞལ་མཇལ་བས་ཕྱག་འཚལ་ལོ། །ཉམས་སྣང་ཡོན་ཏན་གོང་འཕེལ་མཆོད་པ་འབུལ། །རིག་པ་ཚད་ཕེབས་དགོངས་པའི་ཀློང་དུ་བཤགས། །ཆོས་ཟད་བློ་འདས་ཆེན་པོར་ཡི་རང་ངོ་། །དོན་དམ་རྡོ་རྗེ་སྙིང་པོའི་ཆོས་འཁོར་བསྐོར། །འཁོར་འདས་དབྱེར་མེད་ངང་དུ་བཞུགས་གསོལ་འདེབས། །འཁོར་གསུམ་དམིགས་མེད་ཆོས་དབྱིངས་ཀློང་དུ་བསྔོ། །ཚད་མེད་བཞི་ནི། །མཁའ་མཉམ་འགྲོ་ཀུན་བདེ་དང་དེ་རྒྱུར་སྤྱོད། །སྡུག་བསྔལ་སྒྱུ་དང་བཅས་ལས་རྣམ་པར་གྲོལ། །བདེ་དགའི་དཔལ་ཡོན་ཕུན་ཚོགས་འབྲལ་མེད་ལྡན། །ཕྱོགས་རིས་སྡང་ཞེན་མཉམ་ཉིད་ཀློང་གྲོལ་ཤོག །ཛཿཧཱུྃ་བཾ་ཧོཿ སྐྱབས་ཡུལ་རྣམས་རང་ལ་ཐིམ་པར་བསམ་མོ། །