སྔོན་གཏོར།
སྔོན་འགྲོའི་གཏོར་མ་བཤམས་ལ། རཾ་ཡཾ་ཁཾ་གིས་བསངས། སྭ་བྷ་ཝས་སྦྱངས། སྟོང་པའི་ངང་ལས་བྷྲུཾ་འོད་དུ་ཞུ་བ་ལས་བྱུང་བའི་རིན་པོ་ཆེའི་སྣོད་ཡངས་ཤིང་རྒྱ་ཆེ་བར་ཨོཾ་ལས་གཏོར་མ་འདོད་དགུ་འབྱུང་བའི་བདུད་རྩིའི་རྒྱ་མཚོ་ཆེན་པོར་གྱུར་བར་བསམ་ལ། ཨོཾ་ཨཱཿཧཱུྃ་ལན་གསུམ་གྱིས་བྱིན་གྱིས་བརླབས་ནས། ཨོཾ་བྷུ་མི་པཱ་ཏི་སརྦ་ས་པཱ་རི་ཝ་ར་བཛྲ་ས་མཱ་ཛཿ ལྷ་མོ་བརྟན་མ་ལ་སོགས་ས་ཡི་བདག་པོ་རྣམས་སྤྱན་དྲངས་ལ། ཨོཾ་བྷུ་མི་པཱ་ཏི་སརྦ་ས་པཱ་རི་ཝ་ར་བྷྱཿན་མཿསརྦ་ཏ་ཐ་ག་ཏ་སོགས། ཁཾ་སྭཱ་ཧཱ། ལན་གསུམ་གྱིས་ཕུལ་ལ། ཧྲཱིཿ གང་དག་ཕྱོགས་འདིར་གནས་པ་ཡི། །ལྷ་ཀླུ་གནོད་སྦྱིན་འབྱུང་པོའི་ཚོགས། །ལྷ་མོ་བརྟན་མ་ལ་སོགས་པའི། །ས་ལ་གནས་ཤིང་དབང་མཛད་རྣམས། །མཆོད་སྦྱིན་གཏོར་མ་འདི་བཞེས་ལ། །འགྲོ་བ་ཀུན་ལ་སྨན་སླད་དུ། །སྐུ་གསུམ་རྣལ་འབྱོར་བསྒྲུབ་པའི་ཕྱིར། །ས་འདི་ལེགས་པར་སྩལ་དུ་གསོལ། །ཞེས་གཏོར་མ་ཕུལ་ལོ།། དེ་ནས་བགེགས་གཏོར་བསངས་སྦྱངས། སྟོང་པའི་ངང་ལས་རིན་པོ་ཆེའི་སྣོད་ཡངས་པར་བགེགས་ཚོགས་རྣམས་ཚིམ་པར་བྱེད་པའི་གཏོར་མ་ཁ་ཏོག་དྲི་རོ་བཅུད་དང་ནུས་པ་ཕུན་སུམ་ཚོགས་པར་གྱུར་བར་བསམ། ཨོཾ་ཨཱཿཧཱུྃ། ལན་གསུམ། ཨོཾ་སརྦ་བྷུ་ཏ་ཨ་ཀརྴ་ཡ་ཛཿབཀུགས། ཨོཾ་སརྦ་བིགྣན་ན་མཿསོགས། བྷ་ལེནྟ་ཡེ་སྭཱ་ཧཱ། གསུམ་གྱིས་བསྔོས་ལ། རང་ཉིད་སྐད་ཅིག་གིས་ཆེ་མཆོག་པདྨ་དྲག་པོ་ཁྲོ་གཏུམ་གར་དགུ་རྫོགས་པ་དཔལ་དང་དུར་ཁྲོད་ཀྱི་ཆས་ཀྱིས་བརྒྱན་པ་རྡོ་རྗེ་དང་ལྕགས་སྡིག་བསྣམས་ཤིང་ཡེ་ཤེས་ཀྱི་མེ་དཔུང་ཆེན་པོའི་ཀློང་དུ་བརྐྱང་བསྐུམ་གྱད་ཀྱི་དོར་སྟབས་སུ་བཞེངས་པར་བསྒོམ་ལ། ཨོཾ་ཨཱཿཧཱུྃ་ཨརྩིག་ནིརྩིག་ན་མོ་བྷ་ག་ཝ་ཏེ་ཧཱུྃ་ཧཱུྃ་ཕཊ༔ ཨཱཿཧཱུྃ་ཧཱུྃ་ཕཊ༔