གུ་རུའི་ཐུགས་སྒྲུབ་སྐུ་གསུམ་ཡོངས་འདུས།

དམ་ཆོས་སྐུ་གསུམ་དགོངས་མཛོད་ལསཿ གུ་རུའི་ཐུགས་སྒྲུབ་སྐུ་གསུམ་ཡོངས་འདུས་ཞེས་བྱ་བ་བཞུགསཿ

མཆོག་གི་དང་པོ་སྐུ་གསུམ་འཆངཿ སངས་རྒྱས་སྐུ་ལྔའི་བདག་ཉིད་ཅནཿ ཁྱབ་བདག་ཡེ་ཤེས་ལྔ་ཡི་བདགཿ མཚོ་སྐྱེས་འགྲོ་བའི་བླ་མར་འདུདཿ དཔལ་ལྡན་སངས་རྒྱས་པདྨ་སྐྱེས། །ཀུན་མཁྱེན་ཡེ་ཤེས་མཛོད་འཛིན་པ། །རྒྱལ་པོ་སྒྱུ་འཕྲུལ་སྣ་ཚོགས་འཆང་། །ཆེ་བ་སངས་རྒྱས་རིགས་སྔགས་འཆང་། །བསྒྲུབ་པའི་རྣམ་གྲངས་མཐའ་ཡས་ཀྱང་། །ཀུན་གྱི་སྙིང་པོ་དགོངས་པའི་བཅུད། །ཐུགས་སྒྲུབ་སྐུ་གསུམ་ཡོངས་འདུས་ཉིད། །སེམས་ཅན་ཀུན་ལ་ཕན་པ་དང་། །བླ་མེད་འབྲས་བུ་འཐོབ་པའི་ཕྱིར། །ཚིག་ཉུང་དོན་ཟབ་གནད་དུ་འདྲིལ། །དབེན་པའི་གནས་སུ་ཡོ་བྱད་བསགས། །སྦྱོར་བའི་ལས་རིམ་སྔོན་སོང་ནས། །བཅོམ་ལྡན་འདས་ཀྱི་ཡེ་ཤེས་སྐུ། །རྡོ་རྗེ་འཆང་ཆེན་གསང་སྔགས་འཆང་། །སྒྲུབ་པའི་ཕྲིན་ལས་རང་གཞུང་དངོས། །སྤྱི་དོན་བཞི་རུ་བསྟན་པ་ལས། །དང་པོ་ལ་ཡང་རྣམ་གྲངས་བརྒྱད། །དེ་ཡི་དང་པོ་བཀའ་བསྒོ་ནི། །བགེགས་ཚོགས་གཏོར་མས་ཚིམ་བྱས་ལ། །དབང་དྲག་རོལ་པའི་ས་མ་དྷིས། ཧཱུྃ་ཧྲཱིཿ སྐུ་གསུམ་ཡོངས་འདུས་དཀྱིལ་འཁོར་འདིར། །འདུས་པའི་དམ་ལྡན་མ་གཏོགས་པ། །དམ་མེད་བདུད་བགེགས་ལོག་འདྲེན་ཚོགས། །གནས་འདིར་མ་འདུག་གཞན་དུ་དེངས། །གལ་ཏེ་མི་འགྲོ་འཚེ་བྱེད་ན། །ཧེ་རུ་ཀ་དཔལ་ཐུགས་ཁྲོས་ནས། །ལྷ་སྔགས་ཏིང་འཛིན་རོལ་པ་ཡིས། །རྡུལ་དུ་བརླགས་པར་གདོན་མི་ཟ། །ཧཱུྃ་ཧཱུྃ་ཧཱུྃ་བི་ཤྭ་བཛྲ་ཀྲོ་དྷ་ཛྭ་ལ་མཎྚ་ལ་ཕཊ་ཕཊ་ཕཊ་ཧ་ལ་ཧ་ལ་ཧ་ལ་ཧཱུྃ། ཧཱུྃ་བཞིའི་སྔགས་བརྗོད་འདྲེ་འཇིགས་བདུག །ཡུངས་ཐུན་བྲབ་ཅིང་དྲག་རོལ་བྱ། །གཉིས་པ་མཚམས་གཅོད་བསྲུང་འཁོར་ནི། ཧཱུྃ་ཧྲཱིཿ ང་ནི་ཡེ་ནས་ངང་གིས་ཁྲོ། །མཚམས་གཅོད་ཁྲོ་བོས་ནམ་མཁའ་གང་། །བགེགས་འདུལ་ཁྲོ་བོའི་རོལ་མཚམས་ལས། །སུ་ཡང་འདའ་བའི་གོ་སྐབས་མེད། །ང་ནི་རབ་འཇིགས་དབང་དྲག་སྐུ། །ཁྲོ་ཚོགས་མི་བཟད་སྤྲིན་ལྟར་གཏིབས། །མཚོན་ཆ་མེ་དཔུང་གློག་ལྟར་འགྱུ། །འདའ་བར་སེམས་པ་རྡུལ་དུ་རློགས། །ང་ནི་ཆེ་མཆོག་ཧེ་རུ་ཀ། །གསང་གསུམ་ཡེ་ནས་མཁའ་དང་མཉམ། །རང་བཞིན་ལྷུན་གྲུབ་བསྲུང་འཁོར་ལ། །འཁྲུལ་རྟོག་བདུད་ཀྱིས་གླགས་མི་རྙེད། །ཨོཾ་བཛྲ་ཀྲོ་དྷ་ཏིཀྵྞ་ཛྭ་ལ་རཾ་ཛྙ་ན་ཙཀྲ་ཧཱུྃ་བྷྲུྃ། གསུམ་པ་དམ་བཅའ་འབུལ་བ་ནི། ཧཱུྃ་ཧྲཱིཿ སྐུ་གསུམ་ཡོངས་འདུས་བདེ་བར་གཤེགས། །དུས་གསུམ་འདུ་འབྲལ་མེད་པའི་དལ། །སེམས་ཉིད་ངང་དུ་ཡེ་རྫོགས་ཕྱིར། །མི་གཏོང་རྩེ་གཅིག་སྒྲུབ་པར་བྱ། །ཙིཏྟ་བཛྲ་ས་མ་ཡ་ཨ་ཏི༔ བཞི་པ་བྱིན་ཆེན་འབེབས་པ་ནི། སྤོས་དུད་རོལ་མོ་དབྱངས་དང་བཅས། ཧཱུྃ་ཨ་ལ་ལ་ཧོཿ བྷ་ག་ཝན་ས་མ་ཡ་ཧོཿ ས་མ་ཡ་སྟྭཾཿ ཧཱུྃ་ཧྲཱིཿ འཕགས་མཆོག་ཐུགས་རྗེའི་དུས་ལ་བབས། །ཁྱད་པར་བསྟན་པའི་དུས་ལ་བབས། །མཐུ་རྩལ་དབྱུང་བའི་དུས་ལ་བབས། །བྱིན་གྱིས་བརླབས་པའི་དུས་ལ་བབས། །དབང་མཆོག་བསྐུར་བའི་དུས་ལ་བབས། །དངོས་གྲུབ་སྩོལ་བའི་དུས་ལ་བབས། །མཐུ་ཆེན་མཐུ་སྩོལ་བཅོམ་ལྡན་འདས། །བྱིན་ཆེན་བྱིན་ཕོབ་བཅོམ་ལྡན་འདས། །དབང་ཆེན་དབང་བསྐུར་བཅོམ་ལྡན་འདས། །དངོས་གྲུབ་མཆོག་སྩོལ་བཅོམ་ལྡན་འདས། །གྲུབ་པའི་རྟགས་མཚན་མྱུར་དུ་སྟོན། །བདག་ཅག་ལས་འབྲས་མཆིས་པར་མཛོད། །ཨེ་ཨ་རལླི་ཕེཾ་ཕེཾ་ཧྲིཾ་ཧྲིཾ་ཛ་ཛཿ ཛཿཧཱུྃ་བཾ་ཧོཿ ཨ་བེ་ཤ་ཡ་ཨ་ཨཱཿ ཞེས་བརྗོད་དར་ཚོན་སྣ་ལྔས་གཡབ། མོས་གུས་གདུང་ཤུགས་བསྐྱེད་པར་བྱ། །ལྔ་པ་མཆོད་རྫས་བྱིན་རླབས་ནི། ཧཱུྃ་ཧྲཱིཿ སྐུ་གསུམ་བདེ་གཤེགས་ཡོངས་རྫོགས་ཀྱི། །གསང་ཆེན་བླ་མེད་དཀྱིལ་འཁོར་འདིར། །མཉམ་རྫོགས་ཡེ་ཤེས་ཆེན་པོའི་ཀློང་། །སྣང་སྲིད་གཞིར་བཞེངས་མཆོད་པའི་སྤྲིན། །ཕྱི་ནང་གསང་བའི་དམ་རྫས་རྣམས། །རྟོག་གཉིས་ཡུལ་སྣང་རྣམ་དག་རྫས། །དུས་གསུམ་རྒྱལ་ཀུན་མཉེས་བྱེད་སྤྲིན། །རབ་འབྱམས་ནམ་མཁའ་མཛོད་དུ་སྤེལ། །ཨོཾ་ཨཱཿཧཱུྃ་མ་ཧཱ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋ། །ཨོཾ་ཨཱཿཧཱུྃ་མ་ཧཱ་རཀྟ་ཛྭ་ལ་མཎྚ་ལ་ཧཱུྃ་ཧྲཱིཿཋ། །ཨོཾ་ཨཱཿཧཱུྃ་མ་ཧཱ་བྷ་ལིང་ཏ་ཏེ་ཛོ་བྷ་ལིང་ཏ་བྷ་ལ་བ་ཏེ་གུ་ཧྱ་ས་མ་ཡེ་ཧཱུྃ་ཧྲཱིཿཋ། །ཨོཾ་ཨཱཿཧཱུྃ་བོ་དྷི་ཙིཏྟ་ཏ་ན་གྷ་ཎ་གུ་ཧྱ་སརྦ་པཱུ་ཛ་ཧོཿ ཨོཾ་ཨཱཿཧཱུྃ་བཛྲ་ཨརྒྷཾ་པ་དྱཾ༴སོགས། ཤཔྟ་པཱུ་ཛ་ཧོཿ ཞེས་དང་མཆོད་པའི་སྤྲིན་གཟུངས་འདོན། སྙན་པའི་རོལ་མོ་འཁྲོལ་བར་བྱ། །དྲུག་པ་བརྡ་སྒོ་དབྱེ་བ་ནི། །ཧཱུྃ་ཧྲཱིཿ འཁོར་འདས་གཉིས་མེད་རྣམ་དག་ཞིང་། །སྒོ་གསུམ་ལྷ་སྔགས་ཆོས་སྐུའི་ངང་། །གློ་བུར་འཁྲུལ་བས་བསྒྲིབ་ལགས་ཀྱང་། །རང་གསལ་ཐབས་ཀྱིས་བརྡ་སྒོ་དབྱེ། །བྷྲུཾ་པྲ་ཝེ་ཤ་ཡ་ཕཊཿ བདུན་པ་རྟེན་འབྲེལ་བརྡ་ཕྱག་ནི། །ཧཱུྃ་ཧྲཱིཿ མ་རིག་གཉིས་འཛིན་རྐྱེན་དབང་གིས། །རང་རིག་སྐུ་གསུམ་ཞལ་མ་མཇལ། །ད་ནི་སྙིང་པོ་དོན་གྱི་ལྷར། །གཉིས་མེད་རང་ཞལ་མཇལ་ཕྱག་འཚལ། །ས་མ་ཡ་ན་མོ། །བརྒྱད་པ་བཤགས་པ་བྱ་བ་ནི། །ཧཱུྃ་ཧྲཱིཿ སྐུ་གསུམ་ཡོངས་རྫོགས་བདེ་བར་གཤེགས། །སྤྲོས་བྲལ་མཁའ་ལྟར་རྣམ་དག་ཀྱང་། །མ་རིག་དབང་གྱུར་སྒྲིབ་ཚོགས་ཀུན། །དག་མཉམ་དགོངས་པའི་ཀློང་དུ་བཤགས། །བཛྲ་ས་མ་ཡ་ཤུདྡྷེ་ཨཿ ཐུགས་སྒྲུབ་སྐུ་གསུམ་ཡོངས་འདུས་ལས། །སྔོན་དུ་འགྲོ་བའི་ལེའུ་འོ། །སྤྱི་དོན་གཉིས་པ་བསྐྱེད་རིམ་ལ། །རྣམ་གྲངས་བརྒྱད་ལས་དང་པོ་ནི། །དེ་བཞིན་ཉིད་ཀྱི་ཏིང་ངེ་འཛིན། །བློ་ལས་འདས་པའི་སྟོང་ཉིད་བསྒོམ། །ཨོཾ། ཆོས་རྣམས་སྨྲ་བསམ་བརྗོད་ལས་འདས། །མ་བཅོས་མཐའ་བྲལ་གདོད་མ་ནས། །འཁོར་འདས་མཉམ་བརྡལ་དེ་བཞིན་ཉིད། །ཆོས་སྐུ་མི་འགྱུར་རྫོགས་པ་ཆེ། །ཨོཾ་མ་ཧཱ་ཤུདྡྷ་སྭཱ་བྷ་ཝ་དྷརྨ་དྷརྟུ་ཨོཾ། །གཉིས་པ་ཀུན་ཏུ་སྣང་བ་ཡི། །ཏིང་འཛིན་སྙིང་རྗེ་ཆེན་པོ་ནི། །ཨཱཿ ཆོས་རྣམས་ཡེ་ཤེས་སྙིང་པོ་ཅན། །ཡེ་ནས་སྐུ་གསུམ་རང་བཞིན་ཡང་། །མཐའ་ཡས་སྒྱུ་མའི་འཁོར་བ་ལ། །དམིགས་མེད་སྙིང་རྗེ་མཁའ་ལྟར་ཁྱབ། །ཨཱཿམ་ཧཱ་ཀཱ་རུ་ཎི་ཀ་ཛྙཱ་ན་ཨཱཿ གསུམ་པ་རྒྱུ་ཡི་ཏིང་ངེ་འཛིན། །རང་བྱུང་ས་བོན་བསྒོམ་པ་ནི། །ཧཱུྃ། ཆོས་རྣམས་རྟེན་འབྲེལ་རྒྱུ་ལས་བྱུང་། །རིག་པ་ཧཱུྃ༔མཐིང་འོད་ལྔ་ལྡན། །དབྱིངས་ནས་རང་བྱུང་རང་ཤར་བ། །སྐུ་གསུམ་དཀྱིལ་འཁོར་རྒྱུ་ཡིན་ནོ། །ཧཱུྃ་མ་ཧཱ་རཏྣ་གུ་ཧྱ་ཙིཏྟ་བཛྲ་ཧཱུྃ། བཞི་པ་རྟེན་གྱི་དཀྱིལ་འཁོར་ལས། །འབྱུང་བ་རིམ་བརྩེགས་བསྐྱེད་པ་ནི། །ཧཱུྃ་ཧྲཱིཿ ཆོས་ཀུན་མི་དམིགས་བློ་འདས་དབྱིངས། །སྟོང་ཆེན་ནམ་མཁའི་རང་བཞིན་ལ། །ཧཱུྃ་ལས་བསྐྱེད་བྱེད་ཡི་གེ་བདུན། །ཨེ་ཡཾ་ར་སུཾ་ཀེཾ་རཾ་བྷྲུཾ། །རིམ་པར་འཕྲོས་ཤིང་འོད་ཞུ་བས། །ཆོས་འབྱུང་མཁའ་ལ་སྟོབས་ཆེན་རླུང་། །རཀྟའི་རྒྱ་མཚོ་གསེར་གྱི་གཞི། །ཀེང་རུས་རི་རབ་བསྐལ་མེ་འབར། །དེ་སྟེང་བྲག་ཆེན་མེ་དཔུང་དང་། །རྡོ་རྗེ་པདྨའི་ར་གུར་ནང་། །ཁོར་ཡུག་དུར་ཁྲོད་ཆེན་པོ་བརྒྱད། །མི་ཟན་རཀྴའི་ཡུལ་གླིང་དགུ། །ཟངས་མདོག་དཔལ་གྱི་རི་བོར་བཅས། །རྒྱ་ཁྱོན་མཁའ་དང་མཉམ་པར་གསལ། །ཨེ་ཀ་ཤ་མཎྚ་ལ། །ཡཾ་བ་ཡུ་མཎྚ་ལ། །ར་རུ་དྷི་ར་མཎྚ་ལ། །སུཾ་སུ་བརྞ་མཎྚ་ལ། ཀེཾ་ནེ་རི་ཏི་མཎྚ་ལ། རཾ་ཛྭ་ལ་མཎྚ་ལ། བྷྲུཾ་བི་ཤྭ་མཎྚ་ལ། སྥ་ར་ཎ་ཕཊ། སཾ་ཧ་ར་ཎ་ཧཱུྃ། ལྔ་པ་ཕྱི་སྣོད་གཟུང་བའི་ཡུལ། །གཞལ་ཡས་ཁང་དུ་བསྐྱེད་པ་ནི།། ཧཱུྃ་ཧྲཱིཿ ཆོས་རྣམས་ཡེ་ཤེས་རོལ་པའི་རྒྱན། །ཆོས་ཉིད་ཀློང་དུ་གཉིས་མེད་ཕྱིར། །སླར་ཡང་ནམ་མཁའི་ཧཱུྃ་ཡིག་ལས། །ལྔ་ལྡན་བྷྲུཾ་འཕྲོས་དཔལ་རིའི་རྩེར། །ཡོངས་གྱུར་ཕོ་བྲང་པདྨ་འོད། །ལྷུན་པོའི་ནང་ཐད་འོད་ཕུང་དབུས། །འོག་ཁང་ཁྲོ་བོ་རོལ་པའི་གནས། །ཚར་གསུམ་བྷནྡྷ་སྤེལ་མར་བརྩེགས། །གནམ་ལྕགས་འབར་བའི་འཛེར་གྱིས་བསྡམས། །གཟའ་དང་རྒྱུ་སྐར་ལྷ་ཀླུ་ཡི། །གདུང་དང་དྲལ་ཕྱམ་ཀ་བ་དང་། །ཀ་ཞུ་ཡ་ཐེམ་མ་ཐེམ་བྱས། །ཉི་ཟླའི་སྐར་ཁང་རྡོ་རྗེའི་སྒོ། །གཡང་གཞིའི་བླ་རེ་ཞིང་ཆེན་ཐོག །ཁྲག་ཞག་མི་རྟའི་བམ་ལ་སོགས། །རབ་འཇིགས་དུར་ཁྲོད་རྒྱན་ཆས་རྫོགས། །ལྷུན་པོའི་སྟེང་ནས་བར་ཁང་རྨངས། །རྡོ་རྗེ་ཕ་ལམ་བརྟན་པ་ལ། །སྤྲུལ་པའི་རང་བཞིན་གཞལ་མེད་ཁང་། །གསུམ་ཐོག་བང་རིམ་ལྟ་བུར་མཛེས། །ཀུན་ཀྱང་ཤར་ཤེལ་ལྷོ་བཻ་ཌཱུར། །ནུབ་ཏུ་པད་རཀ་བྱང་གི་ཕྱོགས། །ཨིནྟྲ་ནི་ལའི་རང་མདོག་འོད། །ཕྱི་ནང་ཀུན་ཏུ་གསལ་ཞིང་འབར། །རྩིགས་པ་འདོད་སྣམ་ཕ་གུ་དང་། །ཀ་བ་ཀ་ཞུ་དྲལ་ཕྱམ་གདུང་། །མདའ་ཡབ་པུ་ཤུ་ཟ་ར་ཚགས། །དྲ་བ་དྲ་ཕྱེད་བླ་རེ་འཕན། །སྐར་ཁུང་བསིལ་ཁང་རྟ་བབས་སྒོ། །རི་དྭགས་ཆོས་འཁོར་རྒྱལ་མཚན་གདུགས། །རྒྱ་ཕེབས་ཟླ་ཉི་ཏོག་ལ་སོགས། །སྣ་ཚོགས་རིན་པོ་ཆེ་རྣམས་དང་། །ལྷ་རྫས་གོས་ཀྱི་བྱེ་བྲག་ལས། །ལེགས་འཁྲུངས་ཚད་དང་མཚན་ཉིད་རྫོགས། །ཕྱི་ནང་བར་མེད་ཟངས་ཐལ་ཀློང་། །འཇའ་ཚོན་འོད་ཟེར་འབར་ཞིང་འཕྲོ། །ཉེར་སྤྱོད་འདོད་ཡོན་སྒེག་སོགས་དང་། །རྒྱལ་སྲིད་རིན་ཆེན་རྫས་རྟགས་སོགས། །སྲིད་ཞིའི་ཕུན་ཚོགས་གང་མཆིས་རྣམས། །མ་ཚངས་མེད་པས་ལེགས་བརྒྱན་ཅིང་། །སྐུ་གསུམ་ཞི་ཁྲོའི་ལྷ་ཚོགས་རྣམས། །སོ་སོའི་གདན་ཁྲི་བཅས་པས་མཛེས། །མདོར་ན་སྐུ་གསུམ་ཞིང་སོ་སོའི། །དཔལ་ཡོན་བཀོད་པ་ཡོངས་རྫོགས་པའི། །རང་བྱུང་རྟེན་གྱི་དཀྱིལ་འཁོར་མཆོག །མ་བཅོས་ལྷུན་གྱིས་གྲུབ་པར་བསྒོམ། །བྷྲུཾ་བྷི་ཤྭ་བི་ཤུདྡྷེ་ཛྙཱ་ན་ཙཀྲ་མཎྚ་ལ་བྷྲུཾ། རཱུ་ཊ་ཀྲོ་ཏི་ཏི་ར་བཾ། པཾ་པདྨ་མཎྚ་ལ། མ་སུརྱ་མཎྚ་ལ། ཨ་ཙནྡྲ་མཎྚ་ལ། བྷྲུཾ་ཧཱུྃ་སྥ་ར་ཎ་ཕཊ། སཾ་ཧ་ར་ཎ་ཧཱུྃ། ཞེས་པས་གདན་དང་བཅས་པ་གསལ། དྲུག་པ་བརྟེན་པའི་ལྷ་བསྐྱེད་ནི། ཧཱུྃ་ཧྲཱིཿ ཆོས་རྣམས་ངོ་བོ་ཀ་དག་ཀྱང་། རང་བཞིན་སྐུ་གསུམ་ལྷུན་གྱིས་གྲུབ། །ཐུགས་རྗེས་སྤྲུལ་བསྒྱུར་ཅིར་ཡང་སྟོན། །རང་སྣང་རྣམ་དག་སྤྲུལ་སྐུའི་ཞིང་། །ཕུན་ཚོགས་ལྔ་ལྡན་དཀྱིལ་འཁོར་དབུས། །སྣ་ཚོགས་རིན་པོ་ཆེ་ཡི་ཁྲི། །པདྨ་ཉི་ཟླའི་གདན་གྱི་སྟེང་། །ནམ་མཁའི་ཧཱུྃ་ཆེན་བབས་པ་ལས། །འོད་ཟེར་སྣ་ཚོགས་ཕྱོགས་བཅུར་འཕྲོས། །དོན་གཉིས་བྱས་ཤིང་སླར་འདུས་པས། །སྐུ་གསུམ་ཡོངས་རྫོགས་བྱིན་རླབས་བསྡུས། །ཐུགས་སྲོག་སྙིང་པོ་ཧཱུྃ་ལ་ཐིམ། །དེ་ཉིད་ཡོངས་སུ་གྱུར་པ་ལས། །འཁོར་འདས་ཀུན་གྱི་སྤྱི་དཔལ་ཆེ། །རང་རིག་དོན་གྱི་པདྨ་འབྱུང་། །སངས་རྒྱས་ཀུན་གྱི་ཡེ་ཤེས་སྐུ། །ཨ་ཙར་གཞོན་ཚུལ་དཀར་གསལ་འཛུམ། །ཐེག་གསུམ་རྫོགས་པའི་བརྡ་རྟགས་སུ། །གསང་གོས་ཕོད་ཁ་དཀར་སྔོན་དང་། །ངུར་སྨྲིག་ཆོས་གོས་རྣམ་པ་གསུམ། །ཟ་འོག་བེར་སྨུག་དང་བཅས་གསོལ། །སངས་རྒྱས་སྐུ་ལྔའི་དབང་རྫོགས་བརྡར། །འདབ་ལྡན་པདྨ་མཐོང་གྲོལ་ལ། །རིགས་ལྔའི་ཕྱག་མཚན་རྟགས་ཀྱིས་བརྒྱན། །ཐེག་དགུའི་ཡང་རྩེར་ཕེབས་པའི་རྟགས། །ཉི་ཟླ་སྒྲོ་དར་མེ་ལོང་མཛེས། །ས་ལམ་ཡོན་ཏན་ཀུན་རྫོགས་བརྡར། །བྱང་ཆུབ་ཕྱོགས་ཀྱི་ཆོས་མཚོན་པའི། །དར་དང་རིན་ཆེན་རྒྱན་གྱིས་སྤྲས། །དབྱིངས་དང་ཡེ་ཤེས་དབྱེར་མེད་ཅིང་། །དུག་ལྔ་གདོན་ལྔའི་གཡུལ་འཇོམས་ཕྱིར། །གསེར་རྡོར་རྩེ་ལྔ་ཐུགས་ཀར་གསོར། །གཙང་སྨེའི་འཁྲུལ་རྟོག་ལས་ཉོན་ནད། །སེལ་ཕྱིར་བདེ་སྐྱོང་ཛ་གད་དང་། །འཆི་མེད་ཚེ་ཡི་བུམ་པ་བསྣམས། །མཆན་གཡོན་གསང་ཆེན་རྒྱུད་ཀུན་གྱི། །མཛོད་འཛིན་རྒྱལ་ཡུམ་མཁར་ཆེན་བཟའ། །ཁ་ཊཱཾ་རྣམ་པས་དཀུ་ལ་བརྟེན། །ཞབས་གཉིས་ཐབས་ཤེས་ལྷྭམ་ཟུང་གསོལ། །སྲིད་ཞིར་མི་གནས་སྐྱིལ་ཀྲུང་བཞུགས། །འགྲོ་རྣམས་ཐུགས་རྗེས་རྗེས་འཛིན་བརྡར། །སྤྱན་གཉིས་གདུལ་བྱ་ཡོངས་ལ་གཟིགས། །མཚན་བཟང་དཔེ་བྱད་འབར་བའི་སྐུ། །བལྟ་བས་ཆོག་མི་ཤེས་པར་གསལ། །སྤྱི་བོར་རིག་འཛིན་རྡོ་རྗེ་ཆོས། །མགྲིན་པར་འཕགས་མཆོག་སྤྱན་རས་གཟིགས། །ཐུགས་ཀར་ཚེ་མཐའ་ཡས་པ་རྣམས། །སྟངས་དཔྱལ་རྒྱན་དང་ཆ་ལུགས་རྫོགས། །ཡིད་ཤེས་བདེ་ཆེན་ཀུན་ཏུ་བཟང་། །ཆོས་ཁམས་སྟོང་གསལ་རྒྱལ་བའི་ཡུམ། །ཕུང་པོ་སངས་རྒྱས་ལྔའི་བདག་ཉིད། །འབྱུང་ཁམས་དབྱིངས་ཀྱི་གཤེགས་མ་ལྔ། །དབང་ཚོགས་ཉེ་བའི་སེམས་དཔའ་བརྒྱད། །ཡུལ་དུས་སྒེག་སོགས་ལྷ་མོ་བརྒྱད། །ཉོན་དྲུག་འགྲོ་འདུལ་ཐུབ་པ་དྲུག །ལུས་ཀྱི་རྣམ་ཤེས་དབང་པོ་དང་། །རེག་དང་དེར་ཤེས་སྒོ་སྲུང་ཡབ། །རྟག་ཆད་བདག་མཚན་ལྟ་བ་བཞི། །སྒོ་བཞིའི་ཕྱག་རྒྱའི་རྣམ་པར་གནས། །གཞན་ཡང་རྩ་རླུང་ཐིག་ལེ་རྡུལ། །སྐྲ་སེན་བ་སྤུ་ཕྲ་རབ་ཆར། །གདན་གསུམ་དཀྱིལ་འཁོར་རབ་འབྱམས་ཀྱི། །རྣམ་པར་ཡེ་ནས་ལྷུན་རྫོགས་གསལ། །མཐའ་བསྐོར་སྣ་ཚོགས་འདབ་བརྒྱད་ལ། །མདུན་དུ་དྲིན་ཆེན་བླ་མ་རྗེ། །དཀར་དམར་ཧེ་རུ་ཀ་པའི་ཆས། །ཁྲོ་འཛུམ་འགྱིང་བག་རྡོ་རྗེ་གསོར། །དྲིལ་བུ་དཀུར་བརྟེན་ཁ་ཊཱྃ་བསྒྲེང་། །ཕྱེད་ཀྲུང་པད་ཉི་ཟླ་སྟེང་བཞུགས། །གཡས་སུ་མཁན་ཆེན་ཞི་བ་འཚོ། །དཀར་དམར་པཎྚི་ཏ་ཡི་ཆས། །ཆོས་འཆད་མཉམ་བཞག་གླེགས་བམ་ཅན། །པད་ཟླར་མཉམ་པའི་སྐྱིལ་ཀྲུང་མཛེས། །རྒྱབ་ཏུ་སྦ་མི་ཁྲི་གཞེར་ནི། །དཀར་འཛུམ་བོད་ཀྱི་བཙུན་པའི་ཆས། །ཕྱག་གཉིས་གླེགས་བམ་ཕྱེ་བའི་ཚུལ། །པད་ཟླར་སེམས་དཔའི་སྐྱིལ་ཀྲུང་མཛད། །གཡོན་དུ་མངའ་བདག་ཁྲི་སྲོང་རྗེ། །རྒྱལ་པོའི་ཆ་ལུགས་དཀར་དམར་མདངས། །མཉམ་བཞག་ཕྱག་རྒྱས་ཆོས་འཁོར་བསྣམས། །པད་ཟླར་ཟ་འོག་འབོལ་སྟེང་རོལ། །མཚམས་བཞིར་ལྷ་གཅིག་འོད་འཆང་མ། །ཤཱཀྱ་དེ་ཝི་བལ་གྱི་ལྕམ། །ཀཱ་ལ་སིདྡྷི་བལ་འབངས་མཆོག །བཀྲ་ཤིས་ཁྱེ་འདྲེན་མོན་གྱི་རིགས། །ཀུན་ཀྱང་རང་ཕྱོགས་གོས་རྒྱན་གསོལ། །དཀར་དམར་ཞི་འཛུམ་ལང་ཚོས་སྒེག །མཐེབ་སྲིན་བྷནྡྷའི་བདུད་རྩི་འཐོར། །པད་ཟླར་སེམས་མའི་འདུག་སྟངས་མཛེས། །ཕྱི་རིམ་པད་འདབ་བཅུ་དྲུག་ལ། །ཤར་དུ་མཚོ་སྐྱེས་རྡོ་རྗེ་མཐིང་། །གཅེར་བུ་རུས་རྒྱན་རྡོར་དྲིལ་བསྣོལ། །ལྷ་ལྕམ་དཀར་མོ་གྲི་ཐོད་འཁྱུད། །རྡོ་རྗེ་པདྨའི་སྐྱིལ་ཀྲུང་སྦྱོར། །སྣ་ཚོགས་པད་ཉི་ཟླ་སྟེང་གསལ། །ལྷོ་རུ་ཤཱཀྱ་སེང་གེ་སེར། །མཚན་དཔེའི་རྒྱན་རྫོགས་སྤྲུལ་པའི་སྐུ། །ས་གནོན་མཉམ་བཞག་ཕྱག་རྒྱ་ཅན། །པད་ཟླར་རྡོ་རྗེའི་སྐྱིལ་ཀྲུང་བཞུགས། །ནུབ་ཏུ་པདྨ་རྒྱལ་པོ་དམར། །ཕྱག་ན་ཊཱ་རུ་མེ་ལོང་བསྣམས། །འཁོར་ལོས་བསྒྱུར་བའི་ཆ་བྱད་ཅན། །པད་ཟླར་རྒྱལ་པོ་རོལ་སྟབས་མཛེས། །བྱང་དུ་སེང་གེ་སྒྲ་སྒྲོགས་ཁྲོ། །ལྗང་སྔོན་རྡོ་རྗེ་བྷནྡྷ་བསྣམས། །སེང་ལྤགས་དུར་ཁྲོད་ཆས་ཀྱིས་བརྒྱན། །པད་ཉི་བམ་སྟེང་གཡོན་བརྐྱང་རོལ། །ཤར་ལྷོར་པདྨ་སམ་བྷ་དཀར། །པད་ཕོར་གཡས་ལ་སྐྱབས་སྦྱིན་གཡོན། །ཞི་འཛུམ་པཎྚི་ཏ་ཡི་ཆས། །སྐྱིལ་ཀྲུང་པད་ཟླའི་གདན་ལ་བཞུགས། །ལྷོ་ནུབ་བློ་ལྡན་མཆོག་སྲེད་ནི། །དཀར་དམར་ཁྲོ་འཛུམ་སྔགས་ཆས་བརྗིད། །ཕྱག་གཉིས་ཊ་རུ་པད་ཕོར་བསྣམས། །གཡོན་རོལ་པདྨ་ཟླ་སྟེང་གསལ། །ནུབ་བྱང་ཉི་མ་འོད་ཟེར་ནི། །དམར་སེར་སྤྱན་གསུམ་ཞི་མ་ཁྲོ། །ཁ་ཊཱཾ་གཡས་ལ་ཉི་ཟེར་གཡོན། །རྣལ་འབྱོར་བརྟུལ་ཞུགས་པད་ཉིར་རོལ། །བྱང་ཤར་རྡོ་རྗེ་གྲོ་ལོད་སྨུག །ཁྲོ་གཉེར་ཨམ་གཙིགས་འཆོལ་བའི་ཆས། །རྡོ་རྗེ་གསོར་ཞིང་ཕུར་བ་གདེངས། །པད་ཉིར་གཡས་རོལ་དམ་སྲི་གནོན། །བར་མཚམས་བརྒྱད་ཀྱི་འདབ་མ་ལ། །ལྷུན་གྲུབ་ལ་སོགས་རིག་འཛིན་བཞི། །མཆོག་གི་རྡོ་རྗེ་སློབ་དཔོན་བཞི། །ཀུན་ཀྱང་སྟངས་དཔྱལ་གྲི་ཐོད་ཅན། །ཧེ་རུ་ཀ་པ་ལས་བཞིའི་མདོག །པད་ཉི་བམ་སྟེང་རོལ་སྟབས་བཞུགས། །དེ་རྒྱབ་པད་འདབ་སོ་གཉིས་ལ། །འཕགས་ཡུལ་རིག་འཛིན་མཆོག་བརྒྱད་དང་། །བྷོ་ཊའི་བཀའ་བབས་བརྒྱད་ལ་སོགས། །གྲུབ་བརྙེས་འབངས་མཆོག་ཉེར་བཞིར་བཅས། །ཕྱི་སྐོར་དྲུག་ཅུ་རྩ་བཞི་སོགས། །འབུམ་ཕྲག་གྲངས་འདས་འདབ་མ་ལ། །མཆོག་གྱུར་གླིང་པ་བརྒྱ་རྩ་སོགས། །གཏེར་ཆེན་གཏེར་ཕྲན་ཡང་གཏེར་ཚོགས། །རྒྱ་བོད་རིག་འཛིན་གྲུབ་ཐོབ་དང་། །ལོ་པཎ་ཆོས་ཀྱི་རྒྱལ་པོའི་རིགས། །ཤིང་རྟའི་སྲོལ་འབྱེད་ཆེན་པོ་རྣམས། །སོ་སོའི་བརྒྱུད་འཛིན་ཚོགས་དང་བཅས། །ཁྱམས་ལ་ཕྱོགས་བཅུའི་སངས་རྒྱས་དང་། །རིགས་དྲུག་དོང་སྤྲུག་ཐུབ་པ་དྲུག །སྐལ་བཟང་འདྲེན་མཆོག་སྟོང་རྩ་སོགས། །སོ་སོའི་འཁོར་དང་བཅས་པ་གསལ། །དེ་ཡི་ཕྱི་རིམ་འདོད་སྣམ་ལ། །རྡོ་རྗེའི་ལྷ་མོ་བཅུ་དྲུག་སོགས། །མཆོད་པའི་ལྷ་དང་ལྷ་མོའི་ཚོགས། །ཀུན་བཟང་མཆོད་སྤྲིན་རྒྱ་མཚོར་བཅས། །ཕྱི་ཁྱམས་མཁའ་འགྲོ་ཤུགས་འགྲོ་གིང་། །དཔའ་བོ་དཔའ་མོ་དབང་ཕྱུག་མ། །གཙང་རིགས་དཔལ་མགོན་དམ་ཅན་ཚོགས། །སྒོ་ཡི་ནང་གཡས་མཐར་བྱེད་བཞི། །ནང་གཡོན་སྒོ་སྲུང་མགྱོགས་མ་བཞི། །ཕྱི་སྒོར་གིང་ཆེན་སྡེ་བཞིར་བཅས། །དེ་སྟེང་ངེས་པ་ལྔ་ལྡན་ཞིང་། །ལོངས་སྤྱོད་རྫོགས་སྐུའི་དཀྱིལ་འཁོར་དབུས། །བདེ་གཤེགས་རིགས་ལྔའི་སྒྱུ་འཕྲུལ་གར། །གུ་རུ་ཐོད་ཕྲེང་རིགས་ལྔ་ལ། །རང་རང་རིགས་ཀྱི་སྤྲུལ་འཁོར་ཚོགས། །ཏིལ་གོང་ཁ་ཕྱེས་ལྟ་བུར་གསལ། །དེ་སྟེང་ཆོས་སྐུའི་གཞལ་ཡས་ནང་། །མི་ཤིགས་འོད་ལྔའི་གུར་ཁྱིམ་དབུས། །རང་རིག་དོན་གྱི་རྡོ་རྗེ་འཆང་། །ཀུན་བཟང་འོད་མི་འགྱུར་བ་གསལ། །གུ་རུའི་ཐུགས་རྗེའི་རང་རྩལ་ལས། །རང་བྱུང་དྲག་པོའི་གཞལ་ཡས་སུ། །ཆེ་མཆོག་དྲག་པོ་ཐོད་ཕྲེང་རྩལ། །གཙོ་འཁོར་སྤྲུལ་པར་བཅས་རྣམས་དང་། །ཡང་སྤྲུལ་དཔལ་ཆེན་སྒྲུབ་སྡེ་དགུའི། །ལྷ་ཚོགས་བདུན་བརྒྱ་ཉེར་ལྔ་དང་། །རྟ་ཕག་ཡབ་ཡུམ་སྲས་གསུམ་སོགས། །རྒྱུད་སྡེ་བཞི་དྲུག་ཐེག་པ་དགུའི། །ལྷ་ཚོགས་འཁོར་བཅས་མ་ལུས་ཀུན། །མ་འདྲེས་མཁའ་ལ་འཇའ་ལྟར་གསལ། །ལྷུན་པོའི་ཕྱི་རོལ་གྲོང་ཁྱེར་དགུའི། །གཙོ་བོ་ལང་ཀ་པུ་རིའི་དབུས། །ཁྲག་འཐུང་རཀྴ་ཐོད་ཕྲེང་རྩལ། །ཕྱོགས་མཚམས་བརྒྱད་ཀྱི་གྲོང་ཁྱེར་ན། །རིག་འཛིན་སྤྲུལ་པའི་སྲིན་རྒྱལ་བརྒྱད། །སོ་སོའི་བཙུན་མོ་སྲས་དང་བློན། །བཀའ་སྡོད་སྤྲུལ་པའི་འཁོར་བཅས་རྣམས། །སྦྱོར་སྒྲོལ་འདྲེན་པའི་ཕྲིན་ལས་མཛད། །ཀུན་ཀྱང་ཡེ་ཤེས་སྙིང་པོའི་དལ། །རང་རིག་དཀྱིལ་འཁོར་གཙོ་བོ་ལ། །རང་མདངས་འཁོར་གྱི་རྣམ་པ་རུ། །མ་བཅོས་ལྷུན་གྱིས་གྲུབ་པའོ། །ཨོཾ་ཨཱཿཧཱུྃ་མ་ཧཱ་གུ་རུ་དྷརྨ་ཀཱ་ཡ་མཎྚ་ལ། སམ་བྷོ་ཀཱ་ཡ་མཎྚ་ལ། ནིརྨ་ཀཱ་ཡ་ཤནྟ་དཱེ་བ་མཎྚ་ལ། མ་ཧཱ་ཀྲོ་དྷ་ཤྲཱི་ཧེ་རུ་ཀ་མཎྚ་ལ། རཀྴ་ཨཥྚ་མཎྚ་ལ་ཧྲཱིཿཧཱུྃ་བྷྲུཾཿ བདུན་པ་སྒོ་གསུམ་ཡེ་ཤེས་ལྷའི། །གསང་བ་གསུམ་དུ་བྱིན་རླབས་ནི། །ཧཱུྃ་ཧྲཱིཿ སྐུ་གསུམ་ཡོངས་འདུས་དཀྱིལ་འཁོར་འདིར། །ཞི་ཁྲོའི་ལྷ་ཚོགས་ཐམས་ཅད་ཀྱིས། །གནས་གསུམ་ཨོཾ་དཀར་ཨཱཿདམར་དང་། །ཧཱུྃ་མཐིང་རྣམས་ཀྱིས་མཚན་པ་ལས། །འོད་ཟེར་སྣ་ཚོགས་ཕྱོགས་བཅུར་འཕྲོས། །སྐུ་གསུམ་བདེ་གཤེགས་སྲས་བཅས་ཀྱི། །གསང་གསུམ་བྱིན་རླབས་མ་ལུས་པ། །འོད་ཟེར་དཀར་དམར་མཐིང་གསུམ་གྱི། །རྣམ་པར་བསྡུས་ཏེ་ཐིམ་པ་ཡིས། །སྒོ་གསུམ་སྒྲིབ་དག་སྨིན་ཅིང་གྲོལ། །རྡོ་རྗེ་གསུམ་གྱི་རང་བཞིན་དུ། །གནས་འགྱུར་གསང་གསུམ་དཔལ་ཡོན་ཐོབ། །ཨོཾ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་ཝཀྐ་ཙིཏྟ་བཛྲ་སྭ་བྷ་ཝ་ཨཏྨ་ཀོ྅ཧཾཿ རྡོ་རྗེ་རྩེ་ལྔའི་ཕྱག་རྒྱ་ནི། །གནས་གསུམ་གཏུག་ཅིང་བྱིན་གྱིས་བརླབས། །བརྒྱད་པ་ཏིང་འཛིན་དབང་བསྐུར་ནི། །རིན་ཆེན་སྨན་འབྲུའི་མེ་ཏོག་བཅས། །ཧཱུྃ་ཧྲཱིཿ སྐུ་གསུམ་ལྷུན་རྫོགས་བཅོམ་ལྡན་འདས། །ཡེ་ཤེས་ལྔ་ལྡན་བདེ་བར་གཤེགས། །རིགས་བདག་སྟོན་མཆོག་རྣམ་ལྔ་ཡིས། །ལྔ་ལྡན་རྟགས་ཀྱིས་དབང་བསྐུར་སྩོལ། །སྐུ་དང་ཡེ་ཤེས་མཉམ་སྦྱོར་བའི། །གསང་ཆེན་སྙིང་པོའི་དཀྱིལ་འཁོར་འདིར། །སྐུ་གསུང་ཐུགས་ཡོན་ཕྲིན་ལས་ཀྱི། །དབང་བསྐུར་བྱིན་རློབས་དངོས་གྲུབ་སྩོལ། །ཧཱུྃ་ཨོཾ་སྭ་ཨཾ་ཧཱཿ པཉྩ་ཛྙཱ་ན་ཨ་བྷི་ཥིཉྩ་ཧཱུྃ་ཨོཾ་ཏྲཱཾ་ཧྲཱིཿཨཱཿ མཱུཾ་ལཱཾ་མཱཾ་པཱཾ་ཏཱཾ་པཱཉྩ་པྲ་ཛྙཱ་ཨ་བྷི་ཥིཉྩ་ཨོཾ་ཨཱཿཧཱུྃ་སྭཱ་ཧཱཿ རིགས་ལྔའི་ཕྱག་རྒྱ་གནས་ལྔར་གཏུགས། །ཞི་ཁྲོ་ཡབ་ལ་ཡབ་དང་ནི། །ཡུམ་ལ་ཡུམ་གྱིས་དབང་བསྐུར་ཞིང་། །རྒྱས་གདབ་རང་རིགས་དབུ་བརྒྱན་བསམ། །ཞེས་པས། སྐུ་གསུམ་ཞི་ཁྲོའི་ལྷ་ཚོགས་ཡབ་རྣམས་ལ་རིགས་ཀྱི་ཡབ་ལྔ་དང་། ཡུམ་རྣམས་ལ་བདེ་གཤེགས་ཡུམ་ལྔས་དབང་བསྐུར་ཞིང་རྒྱས་བཏབ་པས་རང་རང་གི་རིགས་བདག་གཙོ་བོར་གྱུར་པའི་རིགས་ལྔ་སྤྲུལ་སྐུའི་ཆ་བྱད་ ཅན་གྱིས་དབུ་བརྒྱན་པར་གྱུར། རང་གི་སྙིང་གའི་འོད་ཟེར་གྱིས་རབ་འབྱམས་ཕྱོགས་བཅུའི་ཞིང་ན་བཞུགས་པའི་རྒྱལ་བ་སྲས་དང་བཅས་པ་ཐམས་ཅད་སྐུ་གསུམ་ཡོངས་འདུས་མ་ཧཱ་གུ་རུའི་དཀྱིལ་འཁོར་གྱི་ལྷ་ཚོགས་ཀྱི་རྣམ་པར་ཨོཾ་བཛྲ་ས་མཱ་ཛཿ སྤྱི་དོན་གསུམ་པ་ལས་རིམ་གཞུང་། །རྣམ་གྲངས་བརྒྱད་ཀྱི་དང་པོ་ནི། །ཡེ་ཤེས་ལྷ་ཚོགས་སྤྱན་འདྲེན་ཕྱིར། །སྤོས་དར་རོལ་མོ་དབྱངས་དང་བཅས། །ཧཱུྃ་ཧྲཱིཿ སྔོན་གྱི་བསྐལ་པའི་དང་པོ་ལ། །ཨོ་རྒྱན་ཡུལ་གྱི་ནུབ་བྱང་མཚམས། །དྷ་ན་ཀོ་ཤའི་མཚོ་གླིང་དུ། །པདྨ་གེ་སར་སྡོང་པོ་ལ། །ཡ་མཚན་མཆོག་གི་དངོས་གྲུབ་བརྙེས། །རྒྱལ་སྲས་པདྨ་འབྱུང་གནས་སམ། །མཚོ་སྐྱེས་རྡོ་རྗེ་ཞེས་སུ་གྲགས། །འཁོར་དུ་མཁའ་འགྲོ་མང་པོས་བསྐོར། །སངས་རྒྱས་ཀུན་དང་གཉིས་སུ་མེད། །གང་འདུལ་ཕྲིན་ལས་སྣ་ཚོགས་སྟོན། །ཁྱེད་ཀྱི་རྗེས་སུ་བདག་སྒྲུབ་ཀྱི། །བྱིན་གྱིས་རློབས་ཕྱིར་གཤེགས་སུ་གསོལ། །དོན་ལ་ཐ་དད་མ་གྲུབ་ཀྱང་། །གང་ལ་གང་འདུལ་སྐུར་བཞེངས་ནས། །དུར་ཁྲོད་བརྒྱད་དུ་སྒྲུབ་པ་མཛད། །སྒྲུབ་སྡེ་བརྒྱད་ཀྱི་ལྷ་ཚོགས་དང་། །གཉིས་སུ་མེད་པའི་དངོས་གྲུབ་བརྙེས། །མ་ཧཱ་གུ་རུ་མཚན་མཆོག་བརྒྱད། །ཁྱེད་ཀྱི་རྗེས་སུ་བདག་སྒྲུབ་ཀྱི། །བྱིན་གྱིས་རློབས་ཕྱིར་གཤེགས་སུ་གསོལ། །ཡེ་ཤེས་རང་སྣང་སྒྱུ་འཕྲུལ་གར། །མ་འདྲེས་ཅིར་ཡང་འཆར་བའི་སྐུ། །གཙོ་དང་འཁོར་གྱི་ཚུལ་བསྟན་པ། །སྤྲུལ་པའི་མཁན་སློབ་རྗེ་འབངས་གྲོགས། །རིག་འཛིན་སློབ་དཔོན་བརྒྱུད་པར་བཅས། །འགྲོ་དོན་མཛད་པ་བསམ་མི་ཁྱབ། །ཁྱེད་ཀྱི་རྗེས་སུ་བདག་སྒྲུབ་ཀྱི། །བྱིན་གྱིས་རློབས་ཕྱིར་གཤེགས་སུ་གསོལ། །ཐུགས་རྗེ་ཕྲིན་ལས་དཔག་མེད་ཕྱིར། །ཐབས་ཀྱིས་སྣ་ཚོགས་སྐུར་སྤྲུལ་པ། །འཕགས་ཡུལ་རིག་འཛིན་མཆོག་རྣམས་དང་། །བོད་ཀྱི་རྗེ་འབངས་ལོ་པཎ་ཚོགས། །སྐུ་གསུམ་ཡོངས་འདུས་དཀྱིལ་འཁོར་ལྷ། །ཞི་ཁྲོ་རབ་འབྱམས་མ་ལུས་རྣམས། །རང་དང་དབྱེར་མེད་སྒྲུབ་ལགས་ཀྱིས། །དངོས་གྲུབ་སྩལ་ཕྱིར་གཤེགས་སུ་གསོལ། །སྐུ་གསུམ་འོད་ཕུང་ཁྱུགས་སེ་ཁྱུག། །རྩ་གསུམ་ཟེར་མདངས་ལྷགས་སེ་ལྷག །དཔའ་བོ་མཁའ་འགྲོ་ཁྲིགས་སེ་ཁྲིག །ཕོ་ཉ་ལས་བྱེད་ཉི་ལི་ལི། །དབུ་སྐྲ་ཐོར་ཚུགས་ལྡེམས་སེ་ལྡེམ། །དར་གྱི་ཅོད་པན་པུ་རུ་རུ། །རྒྱན་ཆ་སྣ་ཚོགས་ཁྲ་ལ་ལ། །མཛེས་པའི་བྲོ་གར་ཤིགས་སེ་ཤིག །སྙན་པའི་གླུ་དབྱངས་ཀྱུ་རུ་རུ། །བརྡ་སྐད་བཤུགས་གླུ་ཏི་རི་རི། །སིལ་སྙན་རོལ་མོ་འུ་རུ་རུ། །བྱིན་གྱིས་རློབས་ཕྱིར་གཤེགས་སུ་གསོལ། །གནས་མཆོག་འདི་རུ་བྱིན་ཕོབས་ལ། །སྒྲུབ་མཆོག་བདག་ལ་དབང་བཞི་བསྐུར། །བགེགས་དང་ལོག་འདྲེན་བར་ཆད་སོལ། །མཆོག་དང་ཐུན་མོང་དངོས་གྲུབ་སྩོལ། །ཨོཾ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛ་ཛཿ ཧྲཱིཿམ་ཧ་རི་ནི་ས་ར་ཙ་ཧྲཱི་ཡ་སརྦ་ཀརྨ་ཙིཏྟ་ཧྲིཾ་ཧྲིཾཿ དྷརྨ་ནིརྨ་སམ་བྷོ་ཀཱ་ཡ་ཨ་ཝེ་ཤ་ཡ་ཕེཾ་ཕེཾཿ གཉིས་པ་བཞུགས་སུ་གསོལ་བ་ནི། ཧཱུྃ་ཧྲཱིཿ བདེ་གཤེགས་ཀུན་དངོས་གུ་རུ་རྗེ། །སྐུ་གསུམ་ཡོངས་འདུས་དཀྱིལ་འཁོར་ལྷ། །རྩ་གསུམ་དམ་ཅན་སྤྲུལ་འཁོར་བཅས། །མོས་པའི་བུ་ལ་ཞལ་སྟོན་འཚལ། །གསུང་གིས་གདམས་པའི་གནད་བསྒྲག་འཚལ། །ཐུགས་རྗེས་དགོངས་ཤིང་བྱིན་རློབས་འཚལ། །གདོད་ནས་དམ་ཡེ་དབྱེར་མེད་ཀྱང་། །འགྲོ་བའི་དོན་ལ་འདིར་བཞུགས་འཚལ། །རིན་ཆེན་ཕོ་བྲང་ཉམས་རེ་དགའ། །འབུམ་བརྡལ་པདྨ་མདངས་རེ་ཆེ། །ཉི་ཟླའི་དཀྱིལ་འཁོར་འོད་རེ་གསལ། །དུར་ཁྲོད་གཞལ་ཡས་བྱིན་རེ་ཆེ། །རྟོག་མེད་རོ་གདན་བག་རེ་དྲོ། །བཞུགས་པའི་གནས་མཆོག་དངས་རེ་སྤྲོ། །སྐུ་གསུམ་ཡོངས་འདུས་ཞི་ཁྲོའི་ལྷ། །འཁོར་དང་བཅས་རྣམས་མ་ལུས་ཀུན། །མོས་ཤིང་བསྒྲུབ་པའི་གང་ཟག་ལ། །དགྱེས་ཤིང་བྱིན་གྱིས་བརླབས་པའི་ཕྱིར། །བསྐྱེད་པའི་ལྷ་དང་མི་གཉིས་པར། །མི་གཡོ་བརྟན་པར་བཞུགས་སུ་གསོལ། །བཛྲ་ས་མ་ཡ་ཏིཥྛ་ལྷན། ཛཿཧཱུྃ་བཾ་ཧོཿ གསུམ་པ་གུས་འདུད་ཕྱག་འཚལ་ནི། ཧཱུྃ་ཧྲཱིཿ སྐྱེ་འགགས་འགྱུར་མེད་ཕྲིན་ལས་རྫོགས། །རང་བྱུང་ཐུགས་རྗེས་འགྲོ་རྣམས་སྒྲོལ། །ཡིད་བཞིན་དངོས་གྲུབ་ཆར་འབེབས་པའི། །སྐུ་གསུམ་ཡོངས་འདུས་བླ་མ་ལྷར། །མི་ལྡོག་རྩེ་གཅིག་དད་གུས་ཀྱིས། །སྙན་འགྱུར་གདུང་བའི་དབྱངས་དང་བཅས། །ལུས་སྨད་ཐལ་མོ་རྩེ་སྦྱར་ནས། །ཞབས་བརྟན་ཅོད་པཎ་རྩེ་མོར་མཆོད། །ཨོཾ་གུ་རུ་སརྦ་ཏ་ཐཱ་ག་ཏ་ཀཱ་ཡ་ཝཱཀྐ་ཙིཏྟ་པྲ་ཎ་མེ་ན་བཛྲ་བྷནྡྷ་ནཾ་ཀ་རོ་མི། བཞི་པ་ཕྱི་ཡི་མཆོད་འབུལ་ནི། །ཧཱུྃ་ཧྲཱིཿ དུས་གསུམ་ཕྱོགས་བཅུའི་ཞིང་རྣམས་ནས། །སྐུ་གསུམ་བདེ་གཤེགས་མཆོད་འོས་པའི། །ཁྱད་པར་རྨད་བྱུང་ལོངས་སྤྱོད་སྤྲིན། །བགྱིས་སམ་ལྷུན་གྱིས་གྲུབ་པ་ཀུན། །སྔགས་དང་ཕྱག་རྒྱ་ཏིང་འཛིན་གྱིས། །རབ་འབྱམས་ནམ་མཁའི་མཛོད་ཆེན་པོར། །ཀུན་བཟང་རྣམ་འཕྲུལ་དང་མཉམ་པར། །སྤྲུལ་ཏེ་སྐུ་གསུམ་ལྷ་ལ་འབུལ། །རྣམ་དག་ཡོན་ཆབ་ཞལ་ལ་འབུལ། །ཡན་ལག་བརྒྱད་ལྡན་ཞབས་བསིལ་འབུལ། །མཛེས་སྡུག་མེ་ཏོག་དབུ་ལ་འབུལ། །དྲི་ཞིམ་བདུག་སྤོས་ཤངས་ལ་འབུལ། །ཀུན་གསལ་སྒྲོན་མེ་སྤྱན་ལ་འབུལ། །ཡིད་འོང་དྲི་ཆབ་སྐུ་ལ་འབུལ། །རོ་ལྡན་ཞལ་ཟས་ལྗགས་ལ་འབུལ། །གླུ་དབྱངས་རོལ་མོ་སྙན་ལ་འབུལ། །མཛེས་སྡུག་གཟུགས་དང་སྙན་པའི་སྒྲ། །ངད་ལྡན་དྲི་དང་ཞིམ་པའི་རོ། །སྲབ་འཇམ་རེག་བྱ་ལ་སོགས་པ། །འདོད་ཡོན་མ་སྤང་ཕྱི་མཆོད་ཚོགས། །མ་ལུས་སྐུ་གསུམ་ཡོངས་འདུས་ཀྱི། །ལྷ་ཚོགས་སྤྲུལ་འཁོར་བཅས་རྣམས་ལ། །མོས་པའི་སྟོབས་ཀྱིས་འབུལ་བར་བགྱི། །ཐུགས་རྗེས་དགོངས་ལ་བཞེས་སུ་གསོལ། །ཨོཾ་བཛྲ་གུ་རུ་ཏྲི་ཀཱ་ཡ་ཤནྟ་ཀྲོ་དྷ་མཎྚ་ལ་སརྦ་ས་པ་རི་ཝ་ར་ཨརྒྷཾ་པ་དྱཾ༴སོགས། ཤཔྟ་རཱུ་པ་ཤཔྟ་གྷནྡྷེ་ར་ས་སྤརྴེ་མ་ཧཱ་སརྦ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། ལྔ་པ་ནང་མཆོད་འབུལ་བ་ནི། ཧཱུྃ་ཧྲཱིཿ རང་བྱུང་ཡེ་ནས་རྣམ་པར་དག །རྩ་བརྒྱད་ཡན་ལག་སྟོང་སྦྱར་སྨན། །རིགས་ལྔ་དམ་ཚིག་ལྔ་ཡི་དངོས། །ཡེ་ཤེས་ལྔ་རྫོགས་གྲུབ་པའི་རྫས། །རྒྱུད་ལྔའི་བག་ཆགས་ཀུན་སྦྱོངས་ཤིང་། །དུག་ལྔ་སེལ་བའི་བདུད་རྩི་ཆེ། །འཆི་མེད་གསང་བའི་ཨ་མྲྀ་ཏ། །ཐུགས་རྗེས་བརྩེར་དགོངས་བཞེས་སུ་གསོལ། །ཨོཾ་སརྦ་པཉྩ་ཨ་མྲྀ་ཏ་ཁཱ་ཧི། སྨན་མཆོད་ནི། གདོད་མའི་མགོན་པོ་ཀུན་བཟང་སྣང་མཐའ་ཡས། །ཐུགས་རྗེའི་མངའ་བདག་འཕགས་མཆོག་སྤྱན་རས་གཟིགས། །མཐའ་ཡས་འགྲོ་བའི་འདྲེན་མཆོག་པདྨ་འབྱུང་། །སྨན་མཆོད་འབུལ་ལོ་མཆོག་ཐུན་དངོས་གྲུབ་སྩོལ། །ཨོཾ་སརྦ་པཉྩ་ཨ་མྲྀ་ཏ་ཁཱ་ཧི། གསང་གསུམ་མཛོད་འཛིན་བཀའ་བབས་རྗེ་འབངས་གྲོགས། །དག་སྣང་ཆོས་ལ་དབང་བ་དྷརྨའི་མཚན། །ཆོས་བདག་རྩ་རྒྱུད་བླ་མའི་ཚོགས་བཅས་ལ། །སྨན་མཆོད་འབུལ་ལོ་མཆོག་ཐུན་དངོས་གྲུབ་སྩོལ། །ཨོཾ་སརྦ་པཉྩ་ཨ་མྲྀ་ཏ་ཁཱ་ཧི། །རབ་འབྱམས་སྐུ་གསུམ་ཡོངས་འདུས་ལྷག་པའི་ལྷ། །མཆོག་གསུམ་རྩ་གསུམ་དམ་ཅན་བསྲུང་མར་བཅས། །མ་ལུས་ལུས་པ་མེད་པ་ཐམས་ཅད་ལ། །སྨན་མཆོད་འབུལ་ལོ་མཆོག་ཐུན་དངོས་གྲུབ་སྩོལ། །ཨོཾ་སརྦ་པཉྩ་ཨ་མྲྀ་ཏ་ཁཱ་ཧི། ། ༈ ལྕེ་ཡི་དམ་ཚིག་པདྨོ་ལ། །རྡོ་རྗེ་ཅན་གྱི་ཧཱུྃ་བསྒོམ་ཏེ། །མཐེབ་སྲིན་ཐབས་ཤེས་ཕྱག་རྒྱ་ཡིས། །མྱང་ནས་དངོས་གྲུབ་མཆོག་སྩོལ་ཤོག །ཀཱ་ཡ་ཝཱཀྐ་ཙིཏྟ་སརྦ་སིདྡྷི་ཧཱུྃ། གདོད་ནས་རྣམ་དག་དབང་གི་རྫས། །གློ་བུར་འཁོར་བའི་རྒྱུར་སྣང་བ། །མ་རིག་རྒྱུ་རྐྱེན་ལས་བྱུང་བའི། །གདུག་པ་ཀུན་བསྒྲལ་སྲོག་གི་ཁྲག །འཚོ་བྱེད་དྭངས་མ་རྩ་བའི་ཁྲག །རྩི་བཅུད་དམར་པོ་འབྱུང་བའི་ཁྲག །མཁའ་ལས་རང་བྱུང་སྦྱོར་བའི་ཁྲག །ཐམས་ཅད་མཉམ་པའི་རྒྱུན་ཆེན་པོ། །འཁོར་འདས་མཉམ་ཉིད་བྷནྡྷར་བསྐྱིལ། །མ་ཆགས་ཆགས་བྲལ་ཆགས་པ་ཆེ། །གཉིས་མེད་འཛིན་བྲལ་དམ་རྫས་མཆོག །བདེ་ཆེན་རཀྟའི་མཆོད་པ་འབུལ། །མ་ཧཱ་རཀྟ་པཱུ་ཛ་ཁཱ་ཧི། །ཡིད་ཅན་འགྲོ་རྣམས་གསོ་བའི་ཟས། །ཟག་མེད་ཡེ་ཤེས་བསྐྱེད་པའི་རྒྱུ། །དངོས་གྲུབ་དེ་ཉིད་ལྕགས་ཀྱུ་ལྔ། །བདེ་གཤེགས་དམ་ཚིག་སྒྲོན་མ་ལྔ། །མྱོས་ལྡན་དམ་རྫས་ལྔ་ལ་སོགས། །ཁ་ཏོག་དྲི་རོ་ནུས་ལྡན་པའི། །རྩི་བཅུད་འབྲུ་སྨན་སྦྱར་བའི་བཤོས། །སྣ་ཚོགས་རྒྱན་གྱིས་རབ་མཛེས་ཤིང་། །འདོད་ཡོན་ལོངས་སྤྱོད་སྤྲིན་འཕྲོ་བའི། །རྨད་བྱུང་གཏོར་མའི་མཆོད་པ་འབུལ། །མ་ཧཱ་བྷ་ལིངྟ་པཱུ་ཛ་ཁཱ་ཧི། །སྲིད་ཞིའི་འཁྲུལ་གྲོལ་མི་དམིགས་ཀྱང་། །རྟག་ཁྱབ་འགྲོ་འོང་མེད་པའི་ལྷར། །དུག་གསུམ་སྐུ་གསུང་ཐུགས་སུ་མཆོད། །དུག་ལྔ་ཡེ་ཤེས་ལྔ་རུ་མཆོད། །སྣང་སྲིད་ཕྱག་རྒྱ་བཞི་རུ་མཆོད། །དྲན་རྟོག་ཆོས་ཉིད་ཀློང་དུ་མཆོད། །ཉོན་མོངས་མ་སྤངས་རང་གྲོལ་བ། །ནང་གི་མཆོད་འབུལ་བཞེས་སུ་གསོལ། །ཨོཾ་གུ་རུ་ཏྲི་ཀཱ་ཡ་མཎྚ་ལ་མ་ཧཱ་སརྦ་པཱུ་ཛ་ས་མ་ཡཱ་ཨཱཿཧཱུྃ། དྲུག་པ་གསང་བའི་མཆོད་འབུལ་ནི། །ཧཱུྃ་ཧྲཱིཿ དབྱིངས་རིག་ཐབས་ཤེས་ཟུང་དུ་འཇུག །རྡོ་རྗེ་པདྨ་མཉམ་སྦྱོར་ཞིང་། །དགའ་བ་བཞི་བཞིའི་བྱེད་ལས་ཅན། །དབབ་བསྐྱིལ་བཟློག་དང་དགྲམ་པ་ཡི། །ཞུ་བདེ་བྱང་ཆུབ་སེམས་ཀྱི་སྤྲིན། །དབང་བཞིའི་དམ་ཚིག་རྨད་པོ་ཆེ། །མཁའ་དང་མཉམ་པའི་ཏིང་ངེ་འཛིན། །བླང་དོར་མེད་པའི་མཉེས་མཆོད་འབུལ། །མ་ཧཱ་སུ་ཁ་ཛྙཱ་ན་གུ་ཧྱ་པཱུ་ཛ་ཧོ། །འདོད་ཆགས་བྲལ་བའི་བརྟན་པ་ཡང་། །འཕྲོག་པར་བྱེད་འདྲའི་ལང་ཚོ་ཅན། །རྡོ་རྗེ་ལྷ་མོ་བཅུ་དྲུག་སོགས། །ཞིང་སྔགས་ལྷན་སྐྱེས་ཕྱག་རྒྱའི་སྤྲིན། །འདུ་འབྲལ་མེད་པའི་དགྱེས་མཆོད་འབུལ། །མ་ཧཱ་མུ་ཏྲ་གྷ་ན་གུ་ཧྱ་པཱུ་ཛ་ཧོཿ བདག་གཉིས་རྟོགས་གོམ་བསྒྲལ་བ་ཡིས། །ཐུགས་རྗེས་འགྲོ་རྣམས་རྗེས་བཟུང་ནས། །དྲག་ཤུལ་མངོན་སྤྱོད་བཅུ་གཉིས་ཀྱིས། །སྲིད་གསུམ་གདུག་པ་ཚར་གཅོད་ཅིང་། །གཉིས་མེད་དབྱིངས་སུ་རབ་བསྒྲལ་བས། །བློ་ངན་འཁོར་བའི་རྒྱུན་གཅོད་པ། །སྒྲོལ་བ་ལས་ཀྱི་མཆོད་པ་ཆེ། །གཉིས་འཛིན་རྟོག་པ་འཇོམས་ཕྱིར་འབུལ། །མ་ཧཱ་ཀརྨཱ་ཏ་ན་གུ་ཧྱ་པཱུ་ཛ་ཧོ། །ཁྱད་པར་རྨད་བྱུང་མཆོད་པའི་མཆོག །འདུས་བྱས་འདུས་མ་བྱས་པའི་དགེ། །ཟག་བཅས་ཟག་མེད་དགའ་བདེའི་ཉམས། །ཀུན་རྫོབ་བློ་དང་ཅིག་ཤོས་རྟོགས། །དམིགས་དང་དམིགས་བྲལ་ཏིང་འཛིན་གྱིས། །རྒྱལ་བ་རྒྱ་མཚོ་མཉེས་གྱུར་ཅིག །མཉེས་ནས་རྣལ་འབྱོར་བདག་ཅག་ལ། །མཆོག་དང་ཐུན་མོང་དངོས་གྲུབ་སྩོལ། །ཨོཾ་མ་ཧཱ་གུ་རུ་ཏྲི་ཀཱ་ཡ་མཎྚ་ལ་མ་ཧཱ་གུ་ཧྱ་སརྦ་པཱུ་ཛ་ཨཱཿཧཱུྃ། བདུན་པ་བསྟོད་པ་སྒྲོག་པ་ནི། ཧཱུྃ་ཧྲཱིཿ ཀ་དག་བློ་འདས་ཆོས་ཀྱི་སྐུ། །བདེ་ཆེན་ལྷུན་གྲུབ་ལོངས་སྤྱོད་རྫོགས། །ཐུགས་རྗེ་རྨད་བྱུང་སྤྲུལ་པའི་སྐུ། །སྐུ་གསུམ་ཡོངས་འདུས་རྗེ་ལ་བསྟོད། །དུས་གསུམ་རྒྱལ་ཀུན་འདུས་པའི་ཐུགས། །རིམ་གསུམ་དམ་ཆོས་འདུས་པའི་གསུང་། །ཐེག་གསུམ་དགེ་འདུན་འདུས་པའི་སྐུ། །གུ་རུའི་གསང་བ་གསུམ་ལ་བསྟོད། །གྲུབ་མཆོག་རིག་འཛིན་ཡོངས་ཀྱི་རྗེ། །རབ་འབྱམས་དཀྱིལ་འཁོར་རྒྱ་མཚོའི་གཙོ། །ཡེ་ཤེས་མཁའ་འགྲོ་ཀུན་གྱི་དཔལ། །འགྲོ་བའི་མགོན་པོ་ཁྱོད་ལ་བསྟོད། །མཁྱེན་པས་ཆོས་ཀུན་ཐུགས་སུ་ཆུད། །བརྩེ་བས་འགྲོ་ཀུན་བུ་བཞིན་སྐྱོངས། །ནུས་པས་སྣང་སྲིད་ཟིལ་གྱིས་གནོན། །མཚུངས་མེད་སྤྲུལ་པའི་སྐུ་ལ་བསྟོད། །ལས་སྨོན་ཐུགས་རྗེའི་རྟེན་འབྲེལ་གྱིས། །དག་པའི་ཚོམ་བུར་གཅིག་བསྡོམས་ཚུལ། །རིག་འཛིན་མཁན་སློབ་རྗེ་འབངས་གྲོགས། །གཙོ་འཁོར་གཉིས་སུ་མེད་ལ་བསྟོད། །དུར་ཁྲོད་གནས་བརྒྱད་སོ་སོ་ནས། །སྒྲུབ་ཆེན་བཀའ་བརྒྱད་ལྷ་ཚོགས་དང་། །གཉིས་མེད་མཆོག་ཐུན་དངོས་གྲུབ་བརྙེས། །སྐུ་གཅིག་མཚན་བརྒྱད་མངའ་ལ་བསྟོད། །ཧྲཱིཿ མ་ཆགས་སྐྱོན་གྱིས་མ་གོས་པའི། །པདྨ་འབྱུང་གནས་སྐུ་ལ་བསྟོད། །ཡོན་ཏན་ཐམས་ཅད་རབ་ཏུ་རྫོགས། །པདྨ་སམ་བྷའི་སྐུ་ལ་བསྟོད། །སྤངས་རྟོགས་མ་ལུས་མཐར་ཕྱིན་པའི། །ཤཱཀྱ་སེང་གེའི་སྐུ་ལ་བསྟོད། །ཤེས་བྱའི་གནས་ཀུན་ཐུགས་སུ་ཆུད། །བློ་ལྡན་མཆོག་སྲེད་སྐུ་ལ་བསྟོད། །བདེ་བ་ཐམས་ཅད་རྫོགས་པའི་དཔལ། །པདྨ་རྒྱལ་པོའི་སྐུ་ལ་བསྟོད། །རྨོངས་པའི་མུན་པ་མཐའ་དག་སེལ། །ཉི་མ་འོད་ཟེར་སྐུ་ལ་བསྟོད། །བདུད་དང་མུ་སྟེགས་འདུལ་མཛད་ལྷ། །སེང་གེ་སྒྲ་སྒྲོག་སྐུ་ལ་བསྟོད། །ལོག་འདྲེན་དམ་སྲི་ཚར་གཅོད་པའི། །རྡོ་རྗེ་གྲོ་ལོད་སྐུ་ལ་བསྟོད། །གྲུབ་པའི་རིག་འཛིན་སློབ་དཔོན་དང་། །འཕགས་ཡུལ་མཆོག་བརྒྱད་པཎ་གྲུབ་ཚོགས། །བོད་ཀྱི་བཀའ་བབས་ལོ་ཆེན་འབངས། །རྒྱལ་བསྟན་སྣང་བྱེད་ཚོགས་བཅས་བསྟོད། །འགྲོ་དྲུག་འདྲེན་མཛད་ཐུབ་པ་དྲུག །སྲས་བཅས་སངས་རྒྱས་མཆོད་པའི་ལྷ། །ཕྱི་ནང་སྒོ་སྲུང་དབང་ཕྱུག་གིང་། །ལྷ་ཚོགས་ཡོངས་སུ་རྫོགས་ལ་བསྟོད། །བརྒྱད་པ་ཉེས་ལྟུང་བཤགས་བསྡམས་ནི། །ཧཱུྃ་ཧྲཱིཿ སྐུ་གསུམ་ཡོངས་འདུས་གུ་རུ་རྗེ། །བརྩེ་བ་ཆེན་པོས་དགོངས་སུ་གསོལ། །རྣལ་འབྱོར་ཐེག་མཆོག་ལ་ཞུགས་ཀྱང་། །རྨོངས་འཁྲུལ་བག་མེད་ལེ་ལོ་ཡིས། །སོ་སོར་ཐར་པའི་བསྲུང་སྡོམ་དང་། །བྱང་ཆུབ་སེམས་དཔའི་བསླབ་པ་དང་། །གོང་མ་སྔགས་ཀྱི་དམ་ཚིག་ལ། །ཉམས་ཆགས་ཉེས་ལྟུང་བྱུང་བ་བཤགས། །གསང་ཆེན་ངེས་པའི་ལམ་མཆོག་གི། །རྩ་བ་བླ་མའི་དམ་ཚིག་དང་། །ཡན་ལག་དེ་གཞན་ཁས་བླངས་རྣམས། །བླ་མེད་ཐབས་མཆོག་གཉེན་པོ་བཞི། །སྟོབས་ཆེན་རྨད་དུ་བྱུང་བའི་མཐུས། །འགལ་བ་བཤགས་ལ་ཉམས་ལ་བསྐངས། །འདས་རལ་གསོས་ཤིང་སོར་ཆུད་ནས། །དག་ཚངས་མཆོག་གི་དངོས་གྲུབ་སྩོལ། །རྡོ་རྗེ་སེམས་དཔའི་ཡིག་བརྒྱ་བརྗོད། །ཉམས་ཆགས་རྟོག་སྒྲིབ་རང་གྲོལ་འགྱུར། །ཐུགས་སྒྲུབ་སྐུ་གསུམ་ཡོངས་འདུས་ལས། །བསྐྱེད་རིམ་དངོས་གཞིའི་ལེའུ་འོ།། ༧ བཞི་པ་ཛཔ྄་ལའང་རྣམ་གྲངས་བརྒྱད། །དང་པོ་ཛཔ྄་ཁང་དབྱེ་བ་ནི། །ཧཱུྃ་ཧྲཱིཿ སྐུ་གསུམ་ཡོངས་རྫོགས་བཅོམ་ལྡན་འདས། །དུས་གསུམ་སྒྲུབ་པའི་བདེ་གཤེགས་རྣམས། །སྔོན་གྱི་ཐུགས་དམ་བསྐུལ་ཕྱིར་དང་། །བྱིན་རླབས་དངོས་གྲུབ་ཞུ་བའི་དཔང་། །དམ་ཚིག་བསྐྱེད་པའི་འཁོར་ལོ་ལས། །མ་བསྐྱེད་རང་བྱུང་ཡེ་ཤེས་སེམས། །རྟེན་དང་བརྟེན་པར་བཅས་པ་རྣམས། །ལྗོན་པ་ལས་ནི་མེ་ཏོག་བཞིན། །སོ་སོར་མ་འདྲེས་གསལ་བར་དབྱེ། །འོད་དང་ཟེར་གྱི་ཕྲེང་བ་ཡིས། །སྦྲེལ་ཏེ་མདུན་གྱི་ནམ་མཁའ་ལ། །དགྱེས་ཤིང་བརྟན་པར་བཞུགས་སུ་གསོལ། །ཨོཾ་ཨཱཿཧཱུྃ་བྷྲུྃ་བི་ཤྭ་བི་ཤུདྡྷེ་བཛྲ་ཛྙཱ་ན་ཙཀྲ་མཎྚ་ལ་ཧཱུྃ་ཕཊ་ཛཿ གཉིས་པ་ཛཔ྄་བསྐུལ་བྱ་བ་ནི། ཧཱུྃ་ཧྲཱིཿ རང་སྣང་རྣམ་དག་རྔ་ཡབ་གླིང་། །རང་བྱུང་སྤྲུལ་པའི་ཕོ་བྲང་འདིར། །དུས་གསུམ་བདེ་གཤེགས་རྒྱལ་བ་རྣམས། །བསྙེན་བསྒྲུབ་ཛཔ྄་ཀྱིས་ཐུགས་རྒྱུད་བསྐུལ། །ཐུགས་དམ་ཐུགས་རྗེའི་དབང་གིས་དགོངས། །མི་མངོན་དབྱིངས་ནས་སྐུར་བཞེངས་ལ། །རྣལ་འབྱོར་སྒོ་གསུམ་བྱིན་གྱིས་རློབས། །སྒྲུབ་པ་མཐར་ཕྱིན་དངོས་གྲུབ་སྩོལ། །གསང་ཆེན་སྙིང་པོའི་དཀྱིལ་འཁོར་འདིར། །རྡོ་རྗེ་བླ་མ་འགྲོ་བའི་མགོན། །སྐུ་གསུམ་ཡོངས་འདུས་ལྷ་ཚོགས་ཀྱི། །ཐུགས་རྗེ་ཕྲིན་ལས་དཔག་མེད་ན། །ཐུགས་དམ་དུས་ལས་མི་ཡོལ་བར། །ནུས་བྱིན་མཐུ་སྟོབས་རྩལ་ཤུགས་བསྐྱེད། །མ་དག་སྒོ་གསུམ་གནས་བསྒྱུར་ལ། །སྒྲུབ་འབྲས་གསང་གསུམ་མངོན་གྱུར་མཛོད། །ནུས་བྱིན་མཐུ་སྟོབས་རྩལ་ཤུགས་བསྐྱེད། །མ་དག་སྒོ་གསུམ་གནས་བསྒྱུར་ལ། །སྒྲུབ་འབྲས་གསང་གསུམ་མངོན་གྱུར་མཛོད། །ཏིང་འཛིན་གནད་ཀྱི་ལྡེ་མིག་གིས། །ཡེ་ཤེས་གསང་བའི་སྒོ་ཕྱེས་ལ། །སྐུ་གསུམ་དགོངས་མཛོད་དབང་བསྒྱུར་བའི། །སྙིང་པོ་དོན་གྱི་དངོས་གྲུབ་ཞུ། །གསུམ་པ་དམ་བཅའ་བཟུང་བ་ནི། །ཧཱུྃ་ཧྲཱིཿ སྐུ་གསུམ་ཡེ་ཤེས་བླ་མའི་ཚོགས། །མདུན་མཁར་བཞུགས་རྣམས་དགོངས་སུ་གསོལ། །ངེས་པར་སྒྲུབ་པའི་རྣལ་འབྱོར་བདག །རྟོག་འཁྲུལ་སྒྱུ་མའི་མཚང་རིག་ནས། །འཁྲུལ་མེད་སྐུ་གསུམ་གཏན་བདེའི་སྲིད། །ཐོབ་ཕྱིར་བླ་མའི་གསང་གསུམ་བསྒྲུབ། །མ་གསལ་བར་དུ་བསྐྱེད་ཅིང་བསྒོམ། །མ་འགྲུབ་བར་དུ་བསྙེན་ཅིང་བསྒྲུབ། །དགོངས་ཀློང་གཅིག་ཏུ་མ་གྲོལ་བར། །ཞི་ལྷག་དབྱེར་མེད་ཏིང་འཛིན་སྒོམ། །བདེ་སྟོང་ཟུང་འཇུག་བྱང་ཆུབ་སེམས། །དྲན་དང་ཤེས་བཞིན་འཁྱེར་སོ་གསུམ། །སྲོག་གི་ཕྱིར་ཡང་མི་གཏོང་ན། །རྡོ་རྗེ་རྒྱལ་པོས་བྱིན་རླབས་མཛོད། །འཇུག་དཀའི་གསང་བསྟན་སྒོར་ཞུགས་ཏེ། །འདའ་དཀའི་དམ་ལས་མི་འདའ་བར། །སྤྱད་དཀའི་བྱང་ཆུབ་ལམ་མཆོག་སྤྱོད། །སྒྲུབ་དཀའ་ཚེ་འདིར་སངས་རྒྱས་བསྒྲུབ། །གདུལ་བྱ་འདུལ་བའི་ཐབས་ལམ་མཆོག །རང་བྱུང་རང་གྲོལ་རྫོགས་པ་ཆེ། །བླ་མེད་བླ་མའི་དཀྱིལ་འཁོར་འདིར། །དངོས་གྲུབ་མྱུར་དུ་འགྲུབ་གྱུར་ཅིག །བཞི་པ་བསྙེན་པའི་ཛཔ྄་དགོངས་ནི། །ཧཱུྃ་ཧྲཱིཿ སྐུ་གསུམ་དམ་ཚིག་དཀྱིལ་འཁོར་གཙོ། །རིག་འཛིན་རྒྱལ་པོའི་ཐུགས་ཀ་རུ། །ཡེ་ཤེས་སེམས་དཔའ་ཚེ་མཐའ་ཡས། །དམར་གསལ་མཉམ་བཞག་ཚེ་བུམ་བསྣམས། །ཚོན་གང་ཞི་ཚུལ་ལོངས་སྤྱོད་རྫོགས། །སྐྱིལ་ཀྲུང་པད་ཟླའི་གདན་ལ་བཞུགས། །ལྷ་ལྕམ་མནྡ་ར་བ་དང་། །གཉིས་མེད་ཡུམ་མཆོག་གོས་དཀར་མོ། །དཀར་གསལ་མདའ་དར་ཚེ་བུམ་འཁྱུད། །རྒྱན་རྫོགས་པདྨའི་འདུག་སྟངས་སྦྱོར། །ཚེ་བདག་དཔལ་གྱི་ཐུགས་ཀ་རུ། །ཉི་སྟེང་ཏིང་འཛིན་སེམས་དཔའ་ནི། །གསེར་རྡོར་རྩེ་ལྔ་ནས་ཙམ་དབུས། །ཡུངས་འབྲུ་ཕྱེད་ཙམ་ཟླ་བ་ལ། །ཧཱུྃ་མཐིང་སྤུ་ཡིས་བྲིས་ལྟ་བུར། །གསལ་འཚེར་འོད་ལྔ་ལྡན་པའི་མཐར། །ཤིན་ཏུ་ཕྲ་བའི་སྔགས་གཡས་འཁོར། །དུས་གསུམ་བདེ་གཤེགས་ཐུགས་ཀྱི་བཅུད། །སྐུ་གསུམ་ཡོངས་འདུས་དགོངས་པའི་སྲོག །གསང་ཆེན་སྔགས་ཀྱི་སྙིང་པོ་མཆོག །དེ་ངང་ཤེས་པ་ཆམ་མེར་བཞག །མ་ཡེངས་མི་བསྒོམ་ངང་ནས་བསྙེན། །ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། སྟོང་ཉིད་སྙིང་རྗེ་ཟུང་འཇུག་ངང་། །རེས་འགའ་རྟེན་གྱི་དཀྱིལ་འཁོར་དང་། །རེས་འགའ་བརྟེན་པ་གཙོ་དང་འཁོར། །ཡེ་ཤེས་སེམས་དཔའ་ཏིང་འཛིན་སྔགས། །རེས་འགའ་ཡོངས་རྫོགས་དཀྱིལ་འཁོར་གྱི། །གསལ་སྣང་མངོན་སུམ་ལྟ་བུ་ལ། །ཡིད་ཤེས་དྭངས་སང་ཝལ་ལེ་བལྟ། །སྐབས་འགར་བལྟ་བྱ་བལྟ་བྱེད་དང་། །བལྟ་ཡུལ་གང་ཞིག་ཇི་ལྟ་བུ། །དངོས་སམ་དེ་མིན་བདག་གམ་གཞན། །སྐྱེ་འགགས་ལ་སོགས་གཟུང་འཛིན་སེམས། །རང་ཐོག་ཚོལ་ཞིང་རང་ངོར་བརྟགས། །གང་ཡང་ཡོད་མེད་རྟག་ཆད་སོགས། །མཐའ་གཅིག་ཉིད་བཟུང་ཉམས་ལེན་གོལ། །སྟོང་དྭངས་སྒྲིབ་མེད་མཁའ་འདྲ་ཡང་། །བདེ་གསལ་སྣང་ཆ་མ་འགགས་པ། །བློ་འདས་རྒྱ་ཆད་ཕྱོགས་ལྷུང་བྲལ། །གཉིས་སུ་མེད་ཉིད་གནད་ཀྱི་མཆོག །སྐབས་འགར་སྙིང་པོ་སྔགས་ཀྱིས་བསྙེན། །དེ་ཡང་རེ་འགའ་ཡིད་ཀྱིས་བཟླས། །རེས་འགའ་འབྱུང་འཇུག་འགོགས་པས་བཟླ། །རེས་འགའ་སྙན་པའི་ཛཔ྄་དབྱངས་གྱེར། །སྐབས་སྐབས་ཤུབ་བུར་བསྙེན་པ་ཡིས། །སྐུ་གསུམ་ཡོངས་རྫོགས་ཐུགས་དམ་བསྐུལ། །དགོངས་ཤིང་ཐུགས་རྗེས་འཛིན་པར་འགྱུར། །བྱིན་གྱིས་རློབས་ཤིང་དངོས་གྲུབ་འཐོབ། །ཕྱི་མ་རྔ་ཡབ་དཔལ་རིར་སྐྱེ། །དེ་ཕྱིར་འདི་ལ་བརྩོན་པར་གྱིས།། ༈ ལྔ་པ་ཉེ་བར་བསྙེན་པ་ནི། །བྱ་སྤྱོད་བསྐྱུར་ནས་ལུས་གནད་བརྩམ། །སྨྲ་བརྗོད་མི་བྱ་རླུང་སྔགས་བགྲང་། །རྣམ་རྟོག་འཕྲོ་བཅད་ཏིང་འཛིན་བསྒོམ། །ཨོཾ་ཨཱཿཧཱུྃ། ཐུགས་སྲོག་གསེར་གྱི་རྡོ་རྗེའི་དབུས། །ཧཱུྃ་མཐིང་ནམ་མཁའི་མདོག་ཅན་ལས། །འོད་ལྔ་ཟེར་དང་བཅས་པའི་ཚོགས། །ཨོཾ་ཡིག་དཀར་པོས་སྣ་དྲངས་ཏེ། །ནང་འབྱུང་རླུང་གི་འཕོ་བ་དང་། །འགྲོགས་ནས་ཕྱོགས་བཅུ་གང་བར་སྤྲོས། །སྐུ་གསུམ་བདེ་གཤེགས་སྲས་བཅས་མཆོད། །མཁའ་ཁྱབ་འགྲོ་དྲུག་སྨིན་ཅིང་གྲོལ། །དབང་དང་བྱིན་རླབས་དངོས་གྲུབ་རྣམས། །ཨཱཿཡིག་དམར་པོས་དྲངས་ཤིང་བསྡུས། །ནང་ལྡོག་རླུང་དང་བཅས་ཏེ་ཞུགས། །ཧཱུྃ་ལ་གཉིས་སུ་མེད་པར་ཐིམ། །གནས་པ་ཧཱུྃ་ལ་མཉམ་པར་བཞག །སྣོད་བཅུད་སྣང་གྲགས་རྟོག་ཚོགས་ཀུན། །རྡོ་རྗེ་གསུམ་གྱི་རོལ་པར་བལྟ། །འདི་ནི་ཉེ་བར་བསྙེན་པའི་མཆོག །ཨོཾ་ཨཱཿཧཱུྃ། འབྱུང་འཇུག་གནས་གསུམ་རླུང་དང་སྦྲག །འབུམ་ཕྲག་གྲངས་ཀྱིས་ངེས་པར་བསྙེན། །དེ་ལ་རྒྱལ་བ་ཀུན་གྱིས་དགོངས། །སྒོ་གསུམ་ཉེས་སྐྱོན་བར་ཆད་ཞི། །འགྲུབ་ཐག་ཉེ་ཞིང་བྱིན་རླབས་མྱུར། །མཐར་ཐུག་རྡོ་རྗེ་གསུམ་འགྲུབ་འགྱུར། །དྲུག་པ་བསྒྲུབ་པའི་ཛཔ྄་དགོངས་ནི། །ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ སྐུ་གསུམ་ཡོངས་འདུས་དགོངས་པའི་སྲོག །སྙིང་པོ་ངག་ཏུ་བགྲང་བའི་མཐུས། །ཕྲ་བའི་སྔགས་ལས་དཔག་མེད་འོད། །མཁའ་དབྱིངས་གང་བའི་ཟེར་དུ་འཕྲོས། །ཡེ་ཤེས་ལྷ་ཚོགས་ཐུགས་རྒྱུད་བསྐུལ། །ཐུགས་ལས་འོད་ཟེར་གྲངས་མེད་འཕྲོས། །འོད་ཟེར་དེ་དག་རེ་རེའི་རྩེར། །མཆོད་པའི་ལྷ་མོ་གྲངས་མེད་སྤྲུལ། །སྤྲུལ་པའི་ལྷ་མོ་རེ་རེས་ཀྱང་། །ཀུན་བཟང་མཆོད་སྤྲིན་མཐའ་ཡས་ཀྱིས། །སྐུ་གསུམ་བདེ་གཤེགས་སྲས་བཅས་མཆོད། །སོ་སོའི་ཐུགས་དམ་རྒྱུད་བསྐུལ་ནས། །བྱིན་རླབས་དངོས་གྲུབ་མ་ལུས་པ། །སོ་སོའི་ཐུགས་དམ་རྒྱུད་བསྐུལ་ནས། །བྱིན་རླབས་དངོས་གྲུབ་མ་ལུས་པ། །འོད་ལྔའི་རྣམ་པར་བསྡུས་ཤིང་ཐིམ། །སླར་འཕྲོས་མཁའ་མཉམ་འགྲོ་ལ་ཕོག །རིགས་དྲུག་སོ་སོའི་སྡུག་བསྔལ་དང་། །ལས་ཉོན་སྡིག་སྒྲིབ་ལྷག་མེད་སྦྱངས། །ཀུན་ཀྱང་སྐུ་གསུམ་ས་ལ་བཀོད། །འོད་ཟེར་ཚུར་འདུས་སྔགས་ལ་ཐིམ། །མཆོག་ཐུན་དངོས་གྲུབ་ཐོབ་པར་གྱུར། །ཞེས་བསམ་ཆུ་བོའི་རྒྱུན་བཞིན་བཟླས། །ཆོས་ཀུན་འདུས་པའི་སྙིང་པོ་མཆོག །རྩ་སྔགས་ཡི་གེ་བཅུ་གཉིས་པ། །འབུམ་ཕྲག་བཅུ་གཉིས་གྲངས་ཐེམ་ན། །སྐུ་གསུམ་ཡོངས་རྫོགས་ཐུགས་རྗེས་དགོངས། །མ་ཧཱ་གུ་རུས་བྱིན་གྱིས་རློབས། །རང་རང་དབང་པོ་སྐལ་བ་དང་། །མཐུན་པའི་དངོས་གྲུབ་རྟགས་མཚན་རྙེད། །འདི་བས་ཟབ་པའི་གསང་སྔགས་མེད། །བརྒྱ་ཕྲག་ཙམ་ཞིག་བརྗོད་པ་ཡང་། །ཕན་པའི་ཡོན་ཏན་གཟུགས་མཆིས་ན། །འཇིག་རྟེན་ཁམས་འདི་སྣོད་དུ་ཆུང་། །གནད་ལྡན་ཡུན་རིང་བརྩོན་གྱུར་ན། །འཇིགས་བརྒྱད་ཞི་ཞིང་ཚེ་བསོད་འཕེལ། །སྲིད་ཁམས་དབང་འདུས་ཟིལ་གྱིས་གནོན། །དྲེགས་པའི་ཚོགས་རྣམས་བྲན་དུ་འོང་། །ནད་མུག་མཚོན་འཁྲུགས་བཟློག་ནུས་ཤིང་། །གང་བརྩམས་ཕྲིན་ལས་ཐོག་མེད་འགྲུབ། །རབ་ཀྱིས་དངོས་དང་འབྲིང་ཉམས་སྣང་། །ཐ་མས་ཉིང་འཁྲུལ་སྐབས་སུ་ཡང་། །འདི་འམ་འཆི་ཁ་བར་མ་དོར། །མ་ཧཱ་གུ་རུའི་ཞལ་མཐོང་ཞིང་། །རྗེས་འཛིན་དབུགས་དབྱུང་ལུང་བསྟན་འཐོབ། །མི་འཁྱམས་མི་ལྟུང་ལམ་སྣ་ཟིན། །མཁའ་སྤྱོད་རྔ་ཡབ་ཨོ་རྒྱན་གླིང་། །རིག་འཛིན་ཕོ་མོའི་གྲལ་དུ་ཚུད། །བདུན་པ་ཉེ་བར་བསྒྲུབ་པ་ནི།། ཧཱུྃ་ཧཱུྃ་ཧཱུྃ༔ སྐུ་གསུམ་གཙོ་མཆོག་སྟངས་དཔྱལ་རྣམས། །ཟག་མེད་བདེ་སྟོང་མཉམ་སྦྱོར་བས། །དགྱེས་ཤིང་ཡེ་ཤེས་མཆོག་གིས་མྱོས། །དགའ་བ་ཆེན་པོས་ཧཱུྃ་བརྗོད་པས། །ཞལ་ནས་སྣ་ཚོགས་འོད་འབར་བའི། །ཧཱུྃ་འཕྲོས་སྐུ་གསུམ་ལྷ་ལ་ཕོག །ཀུན་ཀྱང་ཡེ་ཤེས་ཉམས་ཀྱིས་འུར། །ཧཱུྃ་ཆེན་སྔགས་ཀྱི་སྒྲ་དབྱངས་སྒྲོགས། །གཙོ་དང་འཁོར་བཅས་ཐམས་ཅད་ཀྱི། །ཐུགས་སྲོག་ཧཱུྃ་དང་ཞལ་རྣམས་ནས། །བདེ་ཆེན་བྱང་ཆུབ་སེམས་ཀྱི་སྤྲིན། །ཧཱུྃ་གི་རྣམ་པར་ཕྱོགས་བཅུར་སྤྲོས། །ཕྱོགས་བཅུའི་སངས་རྒྱས་སྲས་བཅས་ཀུན། །ཡི་གེ་ཧཱུྃ་གི་རྣམ་པར་བཞུས། །འགྲོ་བ་ཀུན་ཀྱང་ཧཱུྃ་དུ་གྲོལ། །ནམ་མཁའི་ཁྱོན་ཀུན་ཧཱུྃ་གིས་གང་། །ཀུན་ཀྱང་མཚོ་ལ་ཆར་བབས་བཞིན། །ཏིང་འཛིན་ཧཱུྃ་ལ་སིབ་སིབ་ཐིམ། །སྐུ་གསུམ་ལྷ་ཚོགས་གཙོ་འཁོར་ཀུན། །བདེ་སྟོང་ཡེ་ཤེས་ཆེན་པོའི་ཉམས། །མཐའ་ཡས་བརྗོད་དུ་མེད་པར་འབར། །སྐུ་ཡི་རྣམ་འགྱུར་ཤིགས་སེ་ཤིག །ཧཱུྃ་གི་གླུ་དབྱངས་འུ་རུ་རུ། །བརྗོད་མེད་ཡེ་ཤེས་ས་ལ་ལ། །ཧཱུྃ་ཆེན་འོད་ཀྱི་སྤྲོ་བསྡུ་ཡིས། །མ་དག་སྣོད་བཅུད་བཙན་ཐབས་སུ། །དག་པ་སྐུ་གསུམ་ཞིང་དུ་བསྒྱུར། །གཟུང་འཛིན་མཚན་མ་རང་སར་གྲོལ། །ཐམས་ཅད་ཧཱུྃ་དུ་ལྟེམ་གྱིས་ཞུ། །རང་གི་ཐུགས་སྲོག་ཧཱུྃ་ལ་ཐིམ། །སྐུ་གསུམ་བླ་མའི་ཐུགས་གསང་དང་། །དབྱེར་མེད་ཧཱུྃ་དུ་གྲོལ་བར་བསམ། །ཧཱུྃ་ཧཱུྃ་ཧཱུྃ༔ ཧཱུྃ་ཧཱུྃ་ཧཱུྃ༔ ཧཱུྃ་ཧཱུྃ་ཧཱུྃ༔ ཧཱུྃ༔ གསལ་དག་འཇམ་ལ་ལྡིར་བའི་ཧཱུྃ། །བུང་བ་ཚང་ཞིག་ལྟ་བུར་བཟླ། །གྲངས་ནི་འབུམ་ཕྲག་གཅིག་ཡིན་ཏེ། །དུས་ཀྱི་དབང་གིས་དེའི་བཞི་འགྱུར། །འོན་ཀྱང་རྟགས་མཐོང་བར་དུ་འོ། །འདིས་ནི་སྐུ་གསུམ་ཡོངས་རྫོགས་འགྲུབ། །ལས་སྒྲིབ་བག་ཆགས་ཀུན་ཀྱང་འདག །མ་རིག་ཉོན་མོངས་རྟོག་ཚོགས་བྲལ། །གཟུང་འཛིན་ཐམས་ཅད་དབྱིངས་སུ་གྲོལ། །མཆོག་ཐུན་དངོས་གྲུབ་མྱུར་ཐོབ་བྱེད། །ཟབ་མོའི་སྒྲུབ་ཐབས་བགྲང་ཡས་ཀྱང་། །འདི་ལས་རྣོ་མྱུར་ཆེ་བ་མེད། །འདི་ཉིད་ཁོ་ནར་བརྩོན་པས་ཀྱང་། །ཚེ་འདིར་སྐུ་གསུམ་ས་ལ་རེག །བརྒྱད་པ་ལས་ལ་སྦྱོར་བ་ནི། །ཧཱུྃ་ཧྲཱིཿ རིགས་འདུས་མ་ཧཱ་གུ་རུ་རྗེ། །སྐུ་གསུམ་ཡོངས་འདུས་ཚེ་ཡི་ལྷ། །གཙོ་དང་འཁོར་བཅས་ཐམས་ཅད་ཀྱི། །ཐུགས་ལས་རང་མདོག་འོད་ཟེར་འཕྲོས། །ཕྱོགས་བཅུའི་བདེ་གཤེགས་སྲས་བཅས་མཆོད། །སྐུ་གསུང་ཐུགས་ཡོན་ཕྲིན་ལས་ཀྱི། །ཚེ་དབང་བྱིན་རླབས་དངོས་གྲུབ་ཀུན། །ཕྱག་མཚན་ཡི་གེའི་རྣམ་པར་བྱོན། །ཕྱི་སྣོད་འབྱུང་ལྔའི་དངས་མ་བཅུད། །འོད་ཟེར་སྣ་ལྔའི་རྣམ་པར་བསྡུས། །ནང་བཅུད་འགྲོ་བའི་ཚེ་བསོད་དཔལ། །ཨ་ནྲྀ་ཧཱུྃ་གི་རྣམ་པ་རུ། །གནོད་ཅིང་ཉམས་པ་མེད་པར་བླངས། །ཐམས་ཅད་བདག་གི་ལུས་ཀྱི་གནས། །བ་སྤུའི་བུ་ག་ཀུན་ནས་ཞུགས། །ཐུགས་སྲོག་སྔགས་ལ་ཐིམ་པ་ཡིས། །རང་གི་ལུས་ཀྱི་ཕྱི་ནང་ཀུན། །མཚན་དཔེ་ཡོན་ཏན་ཀུན་རྫོགས་པའི། །ཨོ་རྒྱན་ཚེ་མཐའ་ཡས་པའི་སྐུ། །རྡུལ་ལྟར་ཕྲ་བ་གྲངས་མེད་པས། །ཏིལ་གོང་བཞིན་དུ་ཐེམ་གྱིས་གང་། །ཐམས་ཅད་སྔགས་སྒྲ་ཏིར་ཏིར་སྒྲོགས། །མི་ཉམས་བླ་དང་རྟག་པའི་ཚེ། །སྐྱེ་འཆི་འཕོ་འགྱུར་མེད་པའི་སྲོག །བགྲེས་རྒུད་བྲལ་བའི་ལང་ཚོ་དང་། །བཀྲག་མདངས་སྟོབས་རྩལ་རྫོགས་ཤིང་ཐོབ། །སྲིད་ཞིའི་ཕུན་ཚོགས་དཔལ་ཡོན་ལ། །དབང་འབྱོར་བསྟན་འགྲོའི་དཔལ་དུ་གྱུར། །ཨོཾ་ཨཱཿཧཱུྃ་བཛྲ་གུ་རུ་པདྨ་ཨ་ཡུ་ཥེ་བྷྲུཾ་ནྲྀ་ཛཿཔུཎྱཻ་ཛྙཱ་ན་གུརྞ་ཀརྨ་སརྦ་སིདྡྷི་ཧཱུྃ༔ སྔགས་འདི་ཡེངས་མེད་ཏིང་འཛིན་གྱིས། །འབུམ་ཕྲག་གསུམ་གྱི་གྲངས་ཐེམས་ན། །དུས་མིན་ཚེ་ཡི་བར་ཆད་ཞི། །ཚེ་བདུད་བགེགས་ཚོགས་རིང་དུ་འབྲོས། །དེ་ལས་ལྷག་པར་བརྩོན་ནུས་ན། །སྔོན་བསགས་ལས་ཀྱི་རྣམ་སྨིན་གྱིས། །དུས་བབས་འཆི་བར་ངེས་པ་ཡང་། །ཞག་ཟླ་ལོ་ཡི་གྲངས་བཤོལ་ན། །གློ་བུར་ཚེ་གེགས་སྨོས་ཅི་དགོས། །རིག་འཛིན་ཚེ་ཡི་དངོས་གྲུབ་ཀྱང་། །འདི་ཉིད་ཁོ་ནས་འགྲུབ་པར་ནུས། །མངོན་མཐོའི་གནས་ཀྱི་ཡོན་ཏན་བདུན། །སྡེ་བཞིའི་དཔལ་དང་ཕྲིན་ལས་བཞི། །ཐུན་མོངས་གྲུབ་པ་བརྒྱད་སོགས་ཀྱང་། །དཀའ་མིན་དེ་ཡི་དྲུང་ན་གནས། །དེ་ཕྱིར་འབད་ཅིང་བརྩོན་པར་གྱིས། །ས་མ་ཡཱཿ ཐུགས་སྒྲུབ་སྐུ་གསུམ་ཡོངས་འདུས་ལས། །ཛཔ྄་ཀྱི་ལེའུ་རྫོགས་པ་འོ།། ཨེ་མ་ཧོ། ཀུན་མྱུལ་མུ་ཏོ་དྷཱརྨ་ངས། །ཉིང་འཁྲུལ་རྩུབ་མོས་ཟིན་སྐབས་ཤིག །དཔལ་གྱི་རི་བོའི་རྩེར་སོན་ནས། །ཕོ་བྲང་ལ་སོགས་རྒྱན་བཀོད་རྣམས། །ཤིན་ཏུ་གསལ་བར་མི་མངོན་ཀྱང་། །བློ་དང་འཚམས་པའི་གནས་ཤིག་ཏུ། །པདྨ་འབྱུང་གནས་སྤྲུལ་པའི་སྐུ། །རྣམ་འགྱུར་འདྲ་འབག་ཇི་བཞིན་ལས། །ཆེ་ཞིང་གཟི་བརྗིད་འོད་འབར་བ། །དབུ་ལ་པཎ་ཞུ་གསོལ་བ་ཞིག །དབང་པོས་མངོན་སུམ་ཉིད་དུ་མཇལ། །ཡུས་ཀྱིས་ངུས་ཤིང་གསོལ་བཏབ་ཚེ། །བརྡ་ཆོས་ཡི་གེ་བསྟར་མ་གཉིས། །གནང་ཞིང་གསུང་གི་དབུགས་དབྱུང་དང་། །བཅས་ཏེ་བྱིན་རླབས་མཛད་སྣང་ཤར། །དེ་ཕྱིན་སྐུ་གསུམ་དགོངས་མཛོད་ཅེས། །འདི་སྐོར་ཡིག་སྣ་ཕྲན་ཚེགས་རྣམས། །རྩོམ་འདོད་སྙིང་ནས་བྱུང་བཞིན་བྲིས། །འདི་ནི་འབྱུང་བཞིའི་བཅུད་མིན་ཞིང་། །གནས་དུས་ཇི་ལྟར་གདམས་ཚུལ་སོགས། །སྔོན་རབས་དྲན་པས་མ་ཡིན་ཕྱིར། །གཏེར་ཆོས་ཡིན་སྙམ་རེ་བ་མེད། །དག་པ་ཉམས་ཀྱི་སྣང་བ་རུ། །བཏགས་པར་ཆོག་གམ་སྙམ་པ་ལས། །ཚུལ་འདིར་མོས་པས་བརྩོན་རྣམས་ལ། །སྒྲུབ་འབྲས་འབྱུང་མིན་དོགས་པའང་མེད། །བསྒམ་ཕྱིར་ཞུགས་ཀྱང་ངལ་བའི་རྒྱུ། །མོས་པས་ཞུགས་རྣམས་དོན་ཡོད་འགྱུར། །འདི་བྲིས་དགེ་བས་འགྲོ་བ་ཀུན། །པད་འབྱུང་གོ་འཕང་མངོན་གྱུར་ཤོག །ཅེས་པའང་མགོ་སྤྲུལ་གྱིས་བྲིས་པས་བསྟན་འགྲོའི་དོན་ཆེན་འགྲུབ་པའི་རྒྱུར་གྱུར་ཅིག །དགེའོ།། དགེའོ།། དགེའོ།།

ཐུན་མཐར་མཆོད་བསྟོད་དངོས་གྲུབ་བླངས་རྗེས། ཛཿཧཱུྃ་བཾ་ཧོཿས་ཛཔ྄་ཁང་བསྡུ་ཞིང་། ཡིག་བརྒྱས་བརྟན་པར་བྱ་དགོས་སོ།། མཆན།