ཚེ་འགུགས་མཚམས་སྦྱོར།

༄༅། སླར་ཡང་བདག་མདུན་སྐུ་གསུམ་ཡོངས་འདུས་རྒྱལ་བའི་དབང་པོར་གསལ་བའི་སྐུའི་གནས་གསུམ་ནས་འཕྲོས་པའི་འོད་ཟེར་གྱིས་རབ་འབྱམས་ཕྱོགས་བཅུའི་ཞིང་ཁམས་མཐའ་ཡས་ཤིང་མུ་མེད་པ་ན་བཞུགས་པའི་རྒྱལ་བ་སྲས་དང་བཅས་པ་ཐམས་ཅད་ཀྱི་མཁྱེན་བརྩེ་ནུས་གསུམ་གྱི་བྱིན་རླབས་དང་དངོས་གྲུབ་ཐམས་ཅད་སྐུ་གསུམ་ཡོངས་འདུས་རིག་འཛིན་བླ་མའི་ལྷ་ཚོགས་རྣམས་ཀྱི་གསང་གསུམ་མི་ཟད་པ་རྒྱན་གྱི་འཁོར་ལོའི་དཔལ་དང་ཡོན་ཏན། ཕྱི་སྣོད་འབྱུང་ལྔའི་དྭངས་བཅུད། ནང་བཅུད་འགྲོ་བའི་ཚེ་བསོད་བཀྲག་མདངས། རིག་འཛིན་དྲང་སྲོང་རྣལ་འབྱོར་གྲུབ་པ་རྣམས་ཀྱི་ཡེ་ཤེས་དང་ཡོན་ཏན་ཐམས་ཅད་འུབ་ཀྱིས་བསྡུས་ཏེ་བསྟིམ་པས་སྒྲུབ་རྫས་རྣམས་བྱིན་གྱིས་བརླབས་ཤིང་སྐུ་གསུམ་ཡོངས་འདུས་མ་ཧཱ་གུ་རུའི་ལྷ་ཚོགས་རྣམས་ཀྱི་གསང་བ་གསུམ་དང་དབྱེར་མེད་དུ་གྱུར་བར་མོས་ལ།