བཤགས་ཆུང་ཉེས་ལྟུང་དབྱིངས་གྲོལ།
དམ་ཆོས་སྐུ་གསུམ་དགོངས་མཛོད་ལས། །བཤགས་ཆུང་ཉེས་ལྟུང་དབྱིངས་གྲོལ་བཞུགས། སྐུ་གསུམ་ཡོངས་འདུས་གུ་རུ་རྗེ། །རང་རིག་ངོ་བོར་ཤེས་པས་འདུད། །ཐེག་ཆེན་ལམ་ཞུགས་རྣལ་འབྱོར་གྱི། །ཉེས་ལྟུང་དབྱིངས་གྲོལ་གདམས་པ་སྟོན། །དཔལ་རིའི་རྟེན་དང་བརྟེན་པ་ཀུན། །དཔང་དུ་མངོན་སུམ་བཞུགས་པར་མོས། །ལུས་སྨད་ཐལ་སྦྱར་གདུང་དབྱངས་ཀྱིས། །སྟོབས་བཞིའི་བཤགས་ཚིག་འདི་ལྟར་བརྗོད།། ཧཱུྃ་ཧྲཱིཿ སྐུ་གསུམ་ཡོངས་འདུས་ལྷ་ཚོགས་རྣམས། །སྡིག་ལྡན་བདག་ལ་དགོངས་སུ་གསོལ། །བདག་གིས་ཐུབ་བསྟན་སྒོར་ཞུགས་ཀྱང་། །མ་རིག་བག་མེད་ཉོན་མོངས་པས། །སོ་ཐར་བྱང་སེམས་གསང་སྔགས་ཀྱི། །བསྲུང་སྡོམ་བསླབ་བྱ་དམ་ཚིག་ལ། །ཕམ་ལྟུང་ཉེས་བྱས་བྱུང་བ་དང་། །འགལ་ཉམས་འདས་རལ་གྱུར་པ་བཤགས། །ཁྱད་པར་དཔལ་ལྡན་བླ་མ་ཡི། །ཐུགས་དཀྲུགས་བཀའ་ལས་འདས་པ་དང་། །སྤུན་ལ་གཤེ་བསྐུར་བྱམས་པ་སྤངས། །བྱང་ཆུབ་སེམས་བསྐྱེད་ཉམས་པ་བཤགས། །གྲུབ་མཐའ་སྨད་དང་གསང་བ་བསྒྲགས། །ཕུང་པོར་བརྙས་བསྐུར་ཐེ་ཚོམ་ལྡན། །ལོག་སྤྱོད་བསྙེན་བཀུར་དོན་མིན་རྟོག །དད་ལྡན་སུན་འབྱིན་གྱུར་པ་བཤགས། །དམ་རྫས་མ་བརྟེན་བུད་མེད་སྨད། །མ་སྨིན་རྒྱ་བརྟེན་བདུད་རྩི་ཕྲོག །དམ་རྫས་མ་གསང་ཚོགས་སུ་རྩོད། །སྣོད་ལྡན་ཐེག་དམན་ལ་བྲིད་བཤགས། །དམན་འགྲོགས་རྫུན་གྱི་བསླུ་བྲིད་དང་། །མ་དད་པ་ལ་ཆོས་བཤད་པས། །རྩ་ལྟུང་ཡན་ལག་སྦོམ་པོར་བཅས། །ཉམས་ཤིང་ཉེས་པར་བགྱིས་ཀུན་བཤགས། །སློབ་དཔོན་རྡོ་རྗེ་འཛིན་པ་དང་། །ལྷ་དང་ཕྱག་རྒྱ་མཆེད་ལྕམ་ལ། །ལོག་ལྟ་ངན་སྨྲས་གནོད་སྦྱོར་གྱིས། །སྐུ་ཡི་དམ་ཚིག་ཉམས་པ་བཤགས། །བསྐྱེད་དང་བསྒོམ་པའི་ཏིང་འཛིན་གཡེལ། །ཕྱག་རྒྱ་རྣམ་བཞི་མ་གསལ་ཞིང་། །འཛབ་དང་བཟླས་བརྗོད་མ་དག་ཆད། །གསུང་གི་དམ་ཚིག་ཉམས་པ་བཤགས། །གསང་བཅུ་ལ་སོགས་གཉེར་གཏད་པ། །ཉམས་ལ་སྨྲས་ཤིང་གསང་མཚམས་དང་། །བག་མེད་སྤྱོད་པ་རྩིངས་པ་ཡིས། །ཐུགས་ཀྱི་དམ་ཚིག་ཉམས་པ་བཤགས། །ཕུང་ཁམས་དབང་ཤེས་ཁ་ཏོག་ཡུལ། །ཡེ་ཤེས་རིགས་ལྔ་ཡབ་ཡུམ་ལྔར། །རྨོངས་ཤིང་གཡེང་བས་སྦྱོར་མ་འཚལ། །ཤེས་བྱའི་དམ་ཚིག་ཉམས་པ་བཤགས། །བསྒྲུབ་བྱ་རིགས་ལྔའི་སངས་རྒྱས་ལྔ། །ཡེ་ནས་རང་ལས་མི་གཞན་ཀྱང་། །བསྒོམ་བསྒྲུབ་ཏིང་འཛིན་ཡུན་ཐུང་བས། །འབྲས་བུ་མ་ཐོབ་ཉམས་པ་བཤགས། །ཚུལ་བཞིན་བསྒྲལ་དང་ཐབས་ཤེས་སྦྱོར། །མ་བྱིན་ཐབས་བླངས་གསང་ཕྱིར་རྫུན། །ཞིང་བཅུར་ཚིག་བརླང་རྔོ་མ་ཐོགས། །སྤྱད་བྱའི་དམ་ཚིག་ཉམས་པ་བཤགས། །འདོད་ཆགས་ཞེ་སྡང་གཏི་མུག་དང་། །ང་རྒྱལ་ཕྲག་ཏོག་མི་སྤང་ལྔ། །རིགས་ལྔ་ཡེ་ཤེས་ལྔའི་རང་བཞིན། །མ་རྟོགས་རང་དགར་སྤྱད་པ་བཤགས། །ཡེ་ནས་དངོས་གྲུབ་སྒྲུབ་པའི་རྫས། །དྲི་ཆེན་དྲི་ཆུ་དམར་ཆེན་ཟིལ། །མཾ་ས་བདུད་རྩི་ལྔའི་རང་བཞིན། །མ་རྟོགས་གཙང་སྨེར་བལྟས་པ་བཤགས། །སྨོན་འཇུག་ཁྲིམས་གསུམ་རྡོ་དྲིལ་རྒྱ། །སྦྱིན་པ་བཞི་སྤངས་ཆོས་མ་བསྟན། །འགྲོ་དོན་མ་ནུས་དཀྱིལ་འཁོར་དྲལ། །རིགས་ལྔའི་དམ་ཚིག་ཉམས་པ་བཤགས། །སྣོད་བཅུད་ལྷ་དང་གཞལ་ཡས་ཁང་། །སྒྲ་གྲགས་གསུང་ལ་དྲན་བསམ་ཐུགས། །མ་རྟོགས་སྒོ་གསུམ་ཐ་མལ་ཤོར། །བུམ་དབང་དམ་ཚིག་ཉམས་པ་བཤགས། །དོན་དམ་རྡོ་རྗེའི་བཟླས་པ་མཆོག །བདེ་སྟོང་རླུང་གི་རྫོགས་རིམ་ལ། །མ་བརྩོན་རླུང་སེམས་རང་གར་ཡན། །གསང་དབང་དམ་ཚིག་ཉམས་པ་བཤགས། །ཕྱག་རྒྱ་ལ་བརྟེན་ཐབས་ལམ་གྱིས། །དབང་བཟློག་དགའ་བཞིའི་ཡེ་ཤེས་མཆོག །མ་བཙལ་རྩ་ཐིག་ལོག་ལམ་ཤོར། །ཤེར་དབང་དམ་ཚིག་ཉམས་པ་བཤགས། །ཚེ་འདིར་སྐུ་གསུམ་གོ་འཕང་མཆོག །ཐོབ་བྱེད་ཕྱག་རྫོགས་ཉམས་ལེན་ལ། །མ་བརྩོན་འཁྲུལ་རྟོག་རྒྱ་འབྱམས་སོང་། །ཚིག་དབང་དམ་ཚིག་ཉམས་པ་བཤགས། །གཞན་ཡང་བརྟུལ་ཞུགས་ཉེར་ལྔ་དང་། །མ་བསྙེན་རབ་གནས་དབང་ལ་སོགས། །ཐེག་དགུ་གོང་འོག་སོ་སོ་ནས། །གང་གསུང་དམ་ཚིག་ཉམས་པ་བཤགས། །མེད་པ་དམ་ཚིག་བསྲུང་མཚམས་དྲལ། །ཕྱལ་བ་གཟུང་འཛིན་དམིགས་མེད་སྟོང་། །གཅིག་པུ་ཐམས་ཅད་སེམས་སུ་འདུས། །ལྷུན་གྲུབ་ཀུན་རྫོགས་ཆེན་པོར་བཤགས། །མདོར་ན་རིག་འཛིན་རྣལ་འབྱོར་གྱིས། །འདའ་དཀའ་རྡོ་རྗེའི་དམ་ཚིག་ལ། །ཉམས་གྲིབ་སྐྱོན་གྱིས་གོས་སོ་ཅོག །དག་མཉམ་དགོངས་པའི་ཀློང་དུ་བཤགས། །འཁོར་འདས་མཉམ་པ་ཆེན་པོ་ལ། །བཤགས་བྱ་བཤགས་བྱེད་བཤགས་པའི་ཡུལ། །ཡེ་ནས་དམིགས་མེད་སྤྲོས་བྲལ་ངང་། །བློ་འདས་ཆོས་ཉིད་ཀློང་དུ་ཨ།། རྡོ་རྗེ་སེམས་དཔའི་ཡིག་བརྒྱ་བརྗོད། །ཉམ་ཆགས་རྟོག་སྒྲིབ་རང་སར་གྲོལ། །མ་འོངས་འདིར་འཇུག་ལས་ལྡན་རྣམས། །བཤགས་པའི་ཐབས་འདིར་བརྩོན་པར་རིགས། །གུ་ཧྱ། ཞེས་བཤགས་ཆུང་ཉེས་ལྟུང་དབྱིངས་གྲོལ་འདི་ཡང་ཁོ་བོ་གར་དབང་འཇིགས་མེད་རྣམ་རྒྱལ་གྱིས་དམ་ཆོས་སྐུ་གསུམ་དགོངས་མཛོད་ཀྱི་ཆ་ལག་ཏུ་བྲིས་པ་དུས་ཀུན་ཏུ་དགེ་ཞིང་ཉམས་ཆགས་གསོ་ཞིང་སྐོངས་པའི་རྒྱུར་གྱུར་ཅིག །