ཚེ་དབང་འཁོར་འདས་བཅུད་དྲིལ་མཚམས་སྦྱོར་དང་བཅས་པ།

དམ་ཆོས་སྐུ་གསུམ་དགོངས་མཛོད་ཀྱི་ཚེ་དབང་འཁོར་འདས་བཅུད་དྲིལ་མཚམས་སྦྱོར་དང་བཅས་པ་བཞུགསཿ

སྐུ་གསུམ་ཚེ་ཡི་ལྷ་ལ་འདུད། །ཡང་དག་དོན་སྒྲུབ་རྣལ་འབྱོར་པས། །ཚེ་ཡི་བར་ཆད་སེལ་བའི་ཕྱིར། །ཚེ་དབང་འཁོར་འདས་བཅུད་དྲིལ་བསྟན། །བཀྲ་ཤིས་དགེ་བའི་གནས་གཙང་བྱ། །དཀྱིལ་འཁོར་མདའ་གང་མཛེས་པ་ལ། །ཚེ་བུམ་དབུས་བཀོད་ཚེ་རིལ་གཡས། །ཚེ་མདའ་རྒྱབ་ལ་ཚེ་ཆང་གཡོན། །ཚེ་གཏོར་མདུན་བཞག་ཚོགས་མཆོད་བཀྲམ། །གཞན་ཡང་བྱིན་རླབས་མཐའ་རྟེན་རྫས། །ལས་བུམ་ལ་སོགས་ཡོ་བྱད་བསགས། །སྐུ་གསུམ་ཡོངས་འདུས་ལས་རིམ་བཞིན། །ཚེ་བསྒྲུབ་དམིགས་བཟླས་གནད་སྨིན་བྱ། །དེ་ནས་བུམ་པ་བསྒྲུབ་པ་ནི།། ཧཱུྃ་ཧྲཱིཿ བུམ་པ་མཚན་ཉིད་ཀུན་རྫོགས་ནང་། །པདྨ་འོད་ཀྱི་གཞལ་ཡས་ཁང་། །དཔལ་ཡོན་ཕུན་སུམ་ཚོགས་པའི་དབུས། །སྣ་ཚོགས་མཛེས་པའི་གདན་ཁྲི་ལ། །སྐུ་གསུམ་ཡོངས་འདུས་བཅོམ་ལྡན་འདས། །ཚེ་མཐའ་ཡས་པ་པདྨ་འབྱུང་། །སྐུ་གསུམ་བདེ་གཤེགས་ཞི་ཁྲོའི་ཚོགས། །མ་ལུས་གཙོ་འཁོར་སྤྲུལ་པར་བཅས། །སྐུ་མདོག་ཕྱག་མཚན་རྒྱན་ཆ་ལུགས། །མ་འདྲེས་ཡོངས་རྫོགས་གསལ་བར་བསྒོམ། །ཀུན་གྱི་གནས་གསུམ་འབྲུ་གསུམ་མཚན། །ཐུགས་ཀའི་ཧཱུྃ་གི་འོད་ཟེར་གྱིས། །རང་བྱུང་སྐུ་གསུམ་དག་པའི་ཞིང་། །མཁའ་ཁྱབ་དཔལ་གྱི་རི་བོ་ནས། །སྐུ་གསུམ་ཡེ་ཤེས་ལྷ་ཚོགས་རྣམས། །སྤྱན་དྲངས་བུམ་པའི་ལྷ་ལ་ཐིམ། །བདག་གི་ཐུགས་སྲོག་སྔགས་ཕྲེང་ལས། །འོད་འཕྲོས་བུམ་ལྷའི་ཐུགས་རྒྱུད་བསྐུལ། །སྐུ་ལས་འཆི་མེད་བདུད་རྩིའི་རྒྱུན། །བབས་པས་བུམ་པ་ཡོངས་གང་བསམ། །ཚེ་བསྙེན་བརྒྱའམ་སྟོང་སོགས་བཟླ། །ཚེ་རྫས་གཞན་རྣམས་བསྒྲུབ་པ་ནི། །ཧཱུྃ་ཧྲཱིཿ སྐུ་གསུམ་ཚེ་ཡི་ལྷ་ཚོགས་ཀྱི། །ཐུགས་སྲོག་སྔགས་ལས་འོད་ཟེར་འཕྲོས། །འཁོར་འདས་ཀུན་གྱི་ཚེ་ཡི་བཅུད། །བྱིན་རླབས་དབང་དང་དངོས་གྲུབ་རྣམས། །དཀར་དམར་འོད་ཀྱི་རྣམ་པར་བསྡུས། །ཚེ་ཡི་རྫས་རྣམས་སོ་སོར་བསྟིམ། །འཆི་མེད་ཡེ་ཤེས་བདུད་རྩི་དང་། །ཚེ་མཆོག་འགྲུབ་པའི་རྫས་སུ་གྱུར། །ཞེས་བསམ་ཚེ་ཡི་སྙིང་པོ་བཟླ། །སྐབས་སུ་ཚེ་བསྐུལ་རྒྱས་གདབ་བྱ། །ལས་ཀྱི་བུམ་པ་བསྒྲུབ་པ་ནི།། ཧཱུྃ་ཧྲཱིཿ ལས་བུམ་མཚན་ཉིད་རྒྱན་རྫོགས་དབུས། །པད་ཉིའི་གདན་ལ་ཧྲཱིཿདམར་པོ། །འཕྲོ་འདུས་ཡོངས་སུ་གྱུར་པ་ལས། །དབང་ཆེན་རྟ་མགྲིན་སྐུ་མདོག་དམར། །གར་དགུའི་ཉམས་ལྡན་ཁྲོ་ཆས་རྫོགས། །རལ་གྲི་གཡས་ལ་སྦྲུལ་ཞགས་གཡོན། །ཡེ་ཤེས་མེ་ཀློང་བརྐྱང་བསྐུམ་བཞུགས། །དམ་ཡེ་གཉིས་སུ་མེད་པར་གསལ། །ཐུགས་སྲོག་ཧྲཱིཿཡི་འོད་ཟེར་གྱིས། །ཁྲོ་བོ་ཀུན་གྱི་བྱིན་རླབས་བསྡུས། །དྲེགས་ཚོགས་དབང་བྱས་བྲན་དུ་བཀོལ། །གནོད་བྱེད་མ་ལུས་མཐར་བྱས་ཏེ། །སྐུ་ལས་དག་བྱེད་བདུད་རྩིའི་རྒྱུན། །བབས་པས་བུམ་པ་གང་བར་གྱུར། །ཞེས་བསམ་སྔགས་འདི་བརྒྱ་རྩ་བཟླས།། ཧྲཱིཿཔདྨ་ཀྲོ་དྷ་ཧྱ་གྷྲྀ་ཝ་ཧཱུྃ་ཕཊཿ བཛྲ་ཨརྒྷཾ༴སོགས་དང་། ཆགས་མེད་སྐྱོན་བྲལ༴སོགས། བསྟོད། མཆོད་བསྟོད་བྱ་ཞིང་དུང་ཞལ་འབུལ། །ལྷ་ཉིད་འོད་ཞུ་དག་བྱེད་ཆུ། །ནུས་པ་ཀུན་དང་ལྡན་པར་གྱུར། །ཞེས་བསམ་ཡིག་བརྒྱས་བརྟན་པར་བྱ། །སླར་ཡང་ཚེ་ཡི་དབང་བསྐུར་ཕྱིར། །ཁྲུས་བྱས་བགེགས་བསྐྲད་བསྲུང་འཁོར་བསྒོམ། །དེ་ལ་ཁྲུས་ནི། ཇི་ལྟར་བལྟམས་པ༴སོགས་ནས། ཁྲུས་བགྱིའོ།། ཡི་གེ་བརྒྱ་པའི་མཐར། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡཱ་ཤྲི་ཡེ་ཧཱུཾ། ཞེས་བརྗོད་ལས་བུམ་གྱིས་ཁྲུས་བྱ། །དེ་ནས་བགེགས་གཏོར་ཧྱ་གྷྲྀ་ཝའི་སྔགས་ཀྱིས་བསངས། སྭཱ་བྷ་ཝས་སྦྱངས་། སྟོང་པའི་ངང་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བར་ཨོཾ་ལས་བྱུང་བའི་བགེགས་ཀྱི་གཏོར་མ་ཁ་ཏོག་དྲི་རོ་ནུས་པ་ཕུན་སུམ་ཚོགས་པ་འདོད་ཡོན་ལོངས་སྤྱོད་ཀྱི་སྤྲིན་བསམ་གྱིས་མི་ཁྱབ་པ་འཕྲོ་བར་གྱུར་བར་བསམ་ལ། ཨོཾ་ཨཱཿཧཱུྃ། ལན་གསུམ་གྱིས་བྱིན་གྱིས་བརླབས། ན་མོ་དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་གྱི་བཀའ་བདེན་པ་དང་། ཆོས་ཉིད་རང་བཞིན་གྱིས་རྣམ་པར་དག་པ་དང་། ཆོས་ཅན་རྒྱུ་འབྲས་བསླུ་བ་མེད་པའི་བཀའ་བདེན་པ་དང་། ཁྱད་པར་དུ་སྐུ་གསུམ་ཡོངས་འདུས་ཨོ་རྒྱན་ཚེ་མཐའ་ཡས་པའི་དཀྱིལ་འཁོར་གྱི་ལྷ་ཚོགས་རྣམས་ཀྱི་བཀའ་བདེན་པ་དང་། བདེན་པ་ཆེན་པོའི་མཐུས། གནོད་བྱེད་ལོག་འདྲེན་འབྱུང་པོའི་རིགས་སུ་གྱུར་པ་ཐམས་ཅད་འདོད་ཡོན་གླུད་གཏོར་ལེན་པའི་ཕྱིར་དུ་འདིར་མཆིས་པར་གྱུར་ཅིག ཨོཾ་སརྦ་བྷུ་ཏ་ཨ་ཀརྴ་ཡ་ཛ་ཛཿ ལན་གསུམ་གྱིས་བགེགས་བཀུག་ལ། ཨོཾ་སརྦ་བྷིགྷྣན་ན་མཿསརྦ་ཏ་ཐཱ་ག་ཏ་བྷྱོ༴སོགས། ཁཾ་གྲྀ་ཧྞ་དཾ་བ་ལིངྟ་ཡེ་སྭཱཧཱ། ལན་གསུམ་གྱིས་བསྔོས་ནས། ཧཱུྃ་ཧྲཱིཿ སྐུ་གསུམ་ཡོངས་འདུས༴སོགས་ནས། གདོན་མི་ཟ། ན་མོ་དཀོན་མཆོག་གསུམ་ལ༴སོགས་ནས། མཐུས། དེང་འདིར་བསྲུང་བྱ་རྣམས་ཀྱི་ལུས་སྲོག་ཚེ་ལ་གནོད་ཅིང་། སྐུ་གསུམ་ཡོངས་འདུས་ཚེ་དང་ཡེ་ཤེས་དཔག་ཏུ་མེད་པའི་དཀྱིལ་འཁོར་དུ་འཆི་མེད་ཚེ་ཡི་དབང་མཆོག་ཟབ་མོ་བསྐུར་བ་ལ་བར་དུ་གཅོད་པར་བྱེད་པའི་བགེགས་ཚོགས་ལོག་པར་འདྲེན་པ་ཐམས་ཅད་གླུད་གཏོར་འདིས་ཚིམ་པར་གྱིས་ལ་སོ་སོ་རང་རང་གི་གནས་སུ་བདེ་བར་དེངས་ཤིག གལ་ཏེ་མི་འགྲོ་ན་ཁྲོ་མཚོན་མེ་དཔུང་འབར་བའི་དབལ་ཟེར་གྱིས་རྡུལ་ཕྲན་བཞིན་དུ་བརླག་པར་གདོན་མི་ཟའོ།། དྲག་སྔགས་བརྗོད་ཅིང་ཐུན་གྱིས་བྲབ་བོ།། བསྲུང་འཁོར་ནི། ཧཱུྃ་ཧྲཱིཿ ང་ནི༴སོགས། རཀྵ་ཧཱུྃ། ཞེས་བརྗོད་པས་བགེགས་ཚོགས་ཐམས་ཅད་བསྐྲད་ཅིང་ཚར་བཅད་ནས། བསྲུང་བའི་གུར་ཁང་ཆེན་པོའི་ནང་དུ་ཁྱེད་རང་རྣམས་ཚུད་ནས་བསྐལ་པའི་བར་དུ་ཡང་རྐྱེན་གང་གིས་ཀྱང་མི་ཚུགས་པར་གྱུར་བར་མོས། དེ་ནས་མེ་ཏོག་བཀྱེ་བསྡུ་བྱས་ལ། ནམ་མཁའ་དང་མཉམ་པའི་སེམས་ཅན་ཐམས་ཅད་སྐུ་གསུམ་བདེ་གཤེགས་ཡོངས་འདུས་ཨོ་རྒྱན་ཚེ་མཁའ་ཡས་པའི་གོ་འཕང་ལ་འགོད་པར་བྱ། དེའི་ཆེད་དུ་སྨིན་བྱེད་ཚེ་ཡི་དབང་བསྐུར་ཟབ་མོ་ཞུ་སྙམ་པའི་བསམ་པ་བྱང་ཆུབ་མཆོག་ཏུ་སེམས་བསྐྱེད་པ་དང་བཅས་པས་ཉན་འཚལ། གང་གསན་བྱའི་ཆོས་དེ་ཡང་སྒྲོན་མེའི་བསྐལ་པ་བཟང་པོ་འདི་ཉིད་ལ་མི་མཇེད་ཚེ་ལོ་བརྒྱ་པའི་དུས་སུ་འགྲོ་བའི་འདྲེན་མཆོག་བཞི་པ་ཀུན་མཁྱེན་ཤཱཀྱའི་དབང་པོ་དོན་ཐམས་ཅད་གྲུབ་པ་དེ་ཉིད་ལྷོ་རྒྱལ་འཛམ་བུའི་གླིང་གི་ཡུལ་དབུས་རྒྱ་གར་རྡོ་རྗེ་གདན་དུ་མངོན་པར་སངས་རྒྱས་ཏེ། རིགས་ཅན་གསུམ་གྱི་གདུལ་བྱ་སོ་སོའི་ཁམས་དང་། བསམ་པའི་བྱེ་བྲག་ཇི་བཞིན་དྲང་ངེས་ཀྱི་ཆོས་སྒོ་དཔག་ཏུ་མེད་པ་ཞིག་བསྟན་པ་རྣམས་ཀྱང་། མདོར་བསྡུས་ན་གསུང་རབ་ཡན་ལག་བཅུ་གཉིས་སུ་འདུས། དེ་ཡང་བསྡུ་ན་ཐེག་པ་ཆེ་ཆུང་གཉིས་སུ་འདུས་པ་ལས། འདི་ནི་ཐེག་པ་ཆེན་པོ་ཡིན་ཞིང་། དེ་ལ་རྒྱུ་མཚན་ཉིད་ཕ་རོལ་དུ་ཕྱིན་པའི་ཐེག་པ་དང་། འབྲས་བུ་གསང་སྔགས་རྡོ་རྗེའི་ཐེག་པ་གཉིས་སུ་ཡོད་པ་ལས། འདི་ཉིད་ཟབ་པ་ལས་ཀྱང་ཆེས་ཟབ་པ་འབྲས་བུའི་ཐེག་པ་ཡིན། དེ་ལ་ཡང་བོད་འདིར་དར་ཚུལ་གྱིས་གསར་རྙིང་གཉིས་སུ་ཡོད་པ་ལས། འདི་ཉིད་སྔགས་གསར་མ་ལས་ཆེ་བ་དྲུག་གིས་འཕགས་པ་གསང་ཆེན་སྔ་འགྱུར་རྙིང་མའི་ཆོས་ཀྱི་ཕྱོགས་སུ་གཏོགས་པ་ཡིན། དེ་ལའང་ཞལ་ནས་གསུངས་པའི་བཀའ་མ། རྗེས་སུ་གནང་བའི་གཏེར་མ། བྱིན་གྱིས་བརླབས་པའི་དག་སྣང་མ་སྟེ་སྐོར་ཚོ་གསུམ་ལས། འདི་ཉིད་དག་སྣང་གི་སྡེར་གཏོགས་ལ། དག་སྣང་ལ་ཡང་བརྒྱུད་པའི་བཀའ་སྲོལ་བསམ་གྱིས་མི་ཁྱབ་པ་ཞིག་ཡོད་ཀྱང་། འདིར་རིག་འཛིན་གསང་སྔགས་གླིང་པའི་གཏེར་བྱོན་རྒྱལ་ཁམས་སྤྱི་ལུང་ལས། རྒྱལ་བ་བྱང་ཆུབ་སྤྲུལ་པ་ལྕགས་མོའི་ཕྱོགས༔ དྷརྨཱའི་མིང་ཅན་སྔགས་ལ་མོས་པ་འབྱུང་༔ ཞེས་དང་། དེ་དང་མཐུན་པར་འགྲོ་མགོན་ལུང་རིག་གླིང་པའི་ཐུགས་གཏེར་ཆོས་བདག་ལུང་བསྟན་ནོར་བུའི་བང་མཛོད་ལས། ཡན་ལག་གི་ཆོས་བདག་རྣམས་ཀྱིནང་ཚན་དུ། དེ་བཞིན་རྒྱལ་བ་བྱང་ཆུབ་དྷརྨཱ་ཤར༔ ཞེས་སོགས་ཀྱིས་གྲུབ་བརྙེས་རྗེ་འབངས་ཉེར་ལྔའི་ནང་ཚན་རྣལ་འབྱོར་གྱི་དབང་ཕྱུག་ཆེན་པོ་རྒྱལ་བ་བྱང་ཆུབ་ཀྱི་སྤྲུལ་པའི་ཆ་ཤས་སུ་རྡོ་རྗེའི་ལུང་གིས་བསྔགས་པའི་ཟབ་གསང་སྔགས་ཀྱི་རྣལ་འབྱོར་ཞིག་པོ་ཡན་པ་བློ་བདེ་ཆོས་དབྱིངས་ཀུན་གསལ་རྒྱ་མཚོའམ། མིང་གཞན་གར་དབང་འཇིགས་མེད་རྣམ་རྒྱལ་ལ་སྔ་ཕྱིར་དག་སྣང་བན་བུན་ཤར་བ་རྣམས་རྩལ་དུ་བཏོན། ཁྱད་པར་ཉིང་འཁྲུལ་གསལ་བའི་ཆ་ལ་མཁའ་སྤྱོད་དཔལ་རི་སྤྲུལ་པའི་ཕོ་བྲང་དུ་ཕྱིན་ནས། གུ་རུ་རིན་པོ་ཆེ་པཎྚི་ཏའི་ཆ་ལུགས་ཅན་གྱིས་དབང་བསྐུར་བྱིན་གྱིས་བརླབས། ཆོས་ཀྱི་བདག་པོར་མངའ་གསོལ་བ་ཉིད་གཞིར་བྱས་ཏེ་ལེགས་པར་བཀྲལ་བའི་དག་སྣང་གི་ཆོས་སྐོར་འདི་རྣམས་ལ་སྐུ་གསུམ་སྟོན་འཁོར་ཡོངས་ཀྱི་ཐུགས་རྒྱུད་དགོངས་པའི་བྱིན་རླབས་རྫོགས་ཤིང་བརྒྱུད་ཐག་ཉེ་བ་ཡིན། སྒོས་སུ་འཆི་མེད་ཚེ་ཡི་དབང་མཆོག་ཟབ་མོ་འདི་ཉིད་ཐོབ་པའི་ཕན་ཡོན་ནི། རང་གཞུང་ལས། ཡང་དག་དབང་ལྡན་སློབ་དཔོན་གྱིས། །དམ་ཚིག་སེལ་མ་ཞུགས་པ་ལ། །ཚེ་ཡི་དབང་མཆོག་འདི་བྱིན་པས། །དུས་མིན་འཆི་བ་བཟློག་པར་འགྱུར། །ནང་རྒྱས་བྱད་མ་རྦོད་གཏོང་སེལ། །སྔགས་བཟློག་དྲེགས་པའི་ཟ་ཁ་ལྡོག །ནད་མཚོན་དུག་སོགས་མི་མཐུན་ཕྱོགས། །ཐམས་ཅད་འདི་ཡིས་སེལ་བར་ནུས། །གནད་གསང་ཐབས་ལ་བརྩོན་གྱུར་ན། །འཆི་བདག་བདུད་ཀྱང་བྱམས་ཤིང་གདུང་། །དུས་ལ་བབས་ཀྱང་རིང་དུ་བཤོལ། །འཆི་མེད་དངོས་གྲུབ་དེ་དྲུང་གནས། ཞེས་གསུངས་པ་ལྟར་བྱིན་རླབས་མྱུར་ཞིང་ནུས་མཐུ་ཆེ་བའི་སྨིན་བྱེད་ཚེ་ཡི་དབང་བསྐུར་ཟབ་མོ་འདི་ཉིད་ཞུ་བ་ལ། །བདག་རྡོ་རྗེ་སློབ་དཔོན་གྱི་བྱ་བ་རྣམས་ལེགས་པར་གྲུབ་ཟིན། ད་ཁྱེད་རང་སློབ་མ་རྣམས་ཀྱིས་ཀྱང་བླ་མ་དང་དཀྱིལ་འཁོར་གྱི་གཙོ་བོ་སྐུ་གསུམ་ཡོངས་འདུས་གུ་རུ་རིན་པོ་ཆེ་དབྱེར་མ་མཆིས་པའི་དྲུང་དུ་མཎྚལ་ཕུལ། ཞེས་མཎྚལ་ཕུལ་ལ་འདི་ལྟར་གསོལ། དེ་ལྟར་མཎྚལ་ཕུལ་ནས་གསོལ་བ་འདེབས་པ་འདི་བཞིན་རྗེས་ཟློས་གྱིས། བྱས་ལ། ཨེ་མ་ཧོ། སྐྱེ་འགགས་འགྱུར་མེད་བཅོམ་ལྡན་འདས། །སྐུ་གསུམ་ཡོངས་འདུས་པདྨ་འབྱུང་། །ཐུགས་རྗེ་ཆེན་པོས་ཉེར་དགོངས་ལ། །འཆི་མེད་ཚེ་ཡི་དབང་བསྐུར་སྩོལ། །གསུམ་བརྗོད་བླ་མས་ལན་དྲི་བ། ཞེས་གསོལ་བ་བཏབ་པའི་ལན་དུ་བདག་གིས་དྲི་བ་བྱ་བ་འདི་ལ་ལེགས་པར་དགོངས་འཚལ། ཀྱེ་ཧོ་ལས་ལྡན་རིགས་ཀྱི་བུ། །ལས་དང་བྱ་བ་གང་གི་ཕྱིར། །བསམ་པའི་ཁྱད་པར་ཇི་ལྟ་བུས། །ཚེ་ཡི་དབང་མཆོག་འདོད་པ་སྨྲོས།། ཞེས་བརྗོད་སློབ་མས་འདི་ལྟར་ཞུ།། ཀྱེ་ཧུད་ལྔ་བདོའི་མར་གཤམ་འདིར། །མི་ཚེ་ཡུན་ཐུང་འཆི་རྐྱེན་མང་། །གཏན་བདེ་སྒྲུབ་པའི་ལོངས་མ་མཆིས། །དེ་ཕྱིར་ཚེ་ལ་དབང་བྱས་ཏེ། །མ་ནོར་ཡང་དག་ལམ་ཞུགས་ནས། །རང་གཞན་དོན་སྒྲུབ་འདོད་པ་ལགས།། སླར་ཡང་བླ་མས་ལན་བསྩལ་བ།། ཞེས་ཞུས་པའི་ལན་བྱིན་པ་འདི་ལ་ཉན་པས་ཁྱབ་པར་གདའ། ཀྱེ་ཧོ་ལས་ལྡན་སྙིང་གི་བུ། །ཁྱོད་འདོད་པ་ནི་རབ་ཏུ་ལེགས། །རང་དོན་ཡིད་བྱེད་བྱིས་པའི་བློ། །མི་ཚེ་རིང་ཡང་དགོས་གལ་དབེན། །གཞན་ཕན་དོན་གཉེར་ལྷག་བསམ་ཅན། །ཚེ་གེགས་དབང་འགྲོ་ངེས་པར་ཕངས། །དེ་ཕྱིར་འཆི་བའི་འཇིགས་འཕྲོག་པའི། །ཚེ་ཡི་དབང་བསྐུར་སྦྱིན་པར་བྱ།། ཞེས་བརྗོད་སྐྱབས་སེམས་ཚོགས་བསགས་ཀྱིས། །རང་རྒྱུད་ཡོངས་སུ་དག་བྱས་ལ། །ཞེས་པས། ཁྱེད་རང་རྣམས་ཀྱི་མདུན་གྱི་ནམ་མཁར་སྐུ་གསུམ་བདེ་གཤེགས་ཡོངས་འདུས་མ་ཧཱ་གུ་རུའི་དཀྱིལ་འཁོར་གྱི་ལྷ་ཚོགས་ལ་སྐྱབས་གནས་མ་ལུས་པས་བསྐོར་ནས་བཞུགས་པའི་སྤྱན་སྔར་དུས་འདི་ནས་བཟུང་སྟེ་ཇི་སྲིད་སྐུ་གསུམ་ཡོངས་འདུས་རྫོགས་པའི་སངས་རྒྱས་ཀྱི་གོ་འཕང་མཆོག་གི་བར་དུ་སྐྱབས་སུ་འགྲོ་སྙམ་པས་འདིའི་རྗེས་ཟློས་མཛོད། བྱས་ལ། སྐྱབས་འགྲོ་ནི། ན་མོ་བདག་སོགས༴སོགས། ལན་གསུམ། ཕྱོགས་བཅུ་ནམ་མཁའི་མཐས་གཏུག་པའི་སེམས་ཅན་ཐམས་ཅད་ལ་ཚེ་རབས་ཐོག་མ་མེད་པ་ནས་ཕ་མར་མ་གྱུར་བ་གཅིག་ཀྱང་མེད་ལ་དེ་རྣམས་ཐམས་ཅད་བདེ་བ་འདོད་པར་མཉམ་ཞིང་སྡུག་བསྔལ་མི་འདོད་པར་མཉམ་ཀྱང་། ཞེ་འདོད་དང་ལག་ལེན་འཛོལ་བས་སྡུག་བསྔལ་གྱི་རྒྱུ་འབྲས་ལ་རྟག་ཏུ་སྤྱོད་པ་འདི་རྣམས་སྙིང་རེ་རྗེ། བདག་གིས་དེ་རྣམས་སངས་རྒྱས་ཐོབ་པའི་དོན་ཁོ་ནར་དམིགས་ཏེ་འཆི་མེད་ཚེ་ཡི་དབང་ཞུས་ཤིང་། ཐབས་ཀྱི་ལམ་མཆོག་ཟབ་མོ་སྐུ་གསུམ་དགོངས་པའི་གསང་མཛོད་ཀྱི་གནད་གསང་ལ་བརྟེན་ནས་ཚེ་ཡི་རིག་འཛིན་དངོས་སུ་གྲུབ་པར་བྱས་ཏེ། སེམས་ཅན་ཐམས་ཅད་གཅིག་ཀྱང་མ་ལུས་པར་སྐུ་གསུམ་ཡོངས་འདུས་གདོད་མའི་མགོན་པོའི་གོ་འཕང་ལ་འགོད་པར་བགྱིའོ་སྙམས་པས་འདིའི་རྗེས་ཟློས་གྱིས། སེམས་བསྐྱེད། ཀྱེ་མ་བཟོད་དཀའ༴སོགས། ལན་གསུམ། སླར་ཡང་ཚོགས་ཀྱི་ཞིང་མཆོག་མཁའ་ཁྱབ་ཏུ་སད་པའི་སྤྱན་སྔར་སྒོ་གསུམ་གུས་པས་ཕྱག་འཚལ་བ། ཕྱི་ནང་གསང་བའི་མཆོད་པ་འབུལ་བ། དུས་གསུམ་གྱི་ཉེས་ལྟུང་བཤགས་པ། དགེ་ཚོགས་ལ་རྗེས་སུ་ཡི་རང་བ། ཆོས་ཀྱི་འཁོར་ལོ་བསྐོར་བར་བསྐུལ་བ། མྱ་ངན་ལས་མི་འདའ་བར་གསོལ་བ། དགེ་བ་རྫོགས་བྱང་དུ་བསྔོ་བ་རྣམས་ཚིག་ཕྱིར་སེམས་གཞོལ་བས་འདི་བཞིན་རྗེས་ཟློས་མཛོད། ཡན་ལག་བདུན་པ། ཧཱུྃ་ཧྲིཿ སྐུ་གསུམ༴སོགས། ལན་གསུམ། དེ་ལྟར་རྒྱུད་དག་པར་བྱས་ནས་བྱིན་རླབས་ཐམས་ཅད་ཀྱི་གཞི་རྟེན་ཡེ་ཤེས་དབབ་པའི་སླད་དུ་དམིགས་པ་འདི་ལྟར་མཛད་པར་ཞུ། ཨོཾ་སྭཱ་བྷ་ཝས་སྦྱངས། གཟུང་འཛིན་འཁྲུལ་བའི་སྣང་སེམས་མི་དམིགས་པ་སྟོང་པ་ཉིད་དུ་གྱུར། སྟོང་པའི་ངང་ལས་དབྱིངས་སྣང་ཡེ་ཤེས་སྒྱུ་འཕྲུལ་ཀྱི་རྣམ་རོལ་དག་པ་རབ་འབྱམས་མཁའ་ཁྱབ་དཔལ་གྱི་རི་བོ་བཀོད་པ་ཕུན་སུམ་ཚོགས་པའི་དབུས་སུ་སྐུ་གསུམ་ལྷུན་གྱིས་གྲུབ་པའི་ཕོ་བྲང་པདྨ་འོད་ཀྱི་གཞལ་ཡས་ཁང་ཆེན་པོ་ཚད་དང་མཚན་ཉིད་ཐམས་ཅད་ཡོངས་སུ་རྫོགས་པའི་ནང་ཁོངས་སུ་སྣ་ཚོགས་པདྨ་ཉི་ཟླའི་གདན་ལ་ཁྱེད་རང་རྣམས་སོ་སོ་ནས་རྒྱལ་བ་ཐམས་ཅད་ཀྱི་སྤྱི་གཟུགས། སྐུ་གསུམ་ཡོངས་འདུས་པདྨ་འབྱུང་གནས་སུ་གསལ་བའི་སྐུའི་གནས་གསུམ་དུ་ཨོཾ་ཨཱཿཧཱུྃ་གསུམ་གྱིས་མཚན་པར་གྱུར་པའི་ཐུགས་སྲོག་ཧཱུྃ་ལས་འཕྲོས་པའི་འོད་ཟེར་གྱིས་ཞིང་མཆོག་བདེ་བ་ཅན་དང་། རྔ་ཡབ་དཔལ་གྱི་རི་བོ་ལ་སོགས་པ་རབ་འབྱམས་དག་པའི་ཞིང་ཁམས་རྒྱ་མཚོ་དཔག་ཏུ་མེད་པ་ན་བཞུགས་པའི་རྒྱལ་བ་སྲས་དང་སློབ་མར་བཅས་པ་ཐམས་ཅད་སྐུ་གསུམ་ཀུན་འདུས་མ་ཧཱ་གུ་རུའི་དཀྱིལ་འཁོར་གྱི་ལྷ་ཚོགས་མ་ལུས་པའི་སྐུ་ཕྱག་རྒྱ། གསུང་ཡིག་འབྲུ། ཐུགས་ཕྱག་མཚན་གྱི་ཚོགས་བསམ་གྱིས་མི་ཁྱབ་པའི་རྣམ་པར་སྤྱན་དྲངས་ཏེ་རྒྱ་མཚོ་ལ་ཁ་ཆར་བབས་པ་བཞིན་ཁྱེད་རང་རྣམས་ཀྱི་ལུས་ངག་ཡིད་གསུམ་ལ་སིབ་སིབ་ཐིམ་པའི་མོས་པ་གྱིས་ཤིག །ཧཱུྃ་ཨ་ལ་ལ་ཧོ༴སོགས་ནས། མཆིས་པར་མཛོད། །ཅེས་ལན་གསུམ་སོགས་དང་། ཨོཾ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་སརྦ་ཤནྟིཾ་ཀྲོ་ཏ་ཏྲི་ཀཱ་ཡ་དེ་བཱ་མཎྚ་ལ་ས་པཱ་རི་ཝ་ར་བཛྲ་ས་མ་ཡ་ཛ་ཛཿ ཨ་ཝེ་ཤ་ཡ་ཕེཾ་ཕེཾཿ སྤོས་དུད་རོལ་མོ་དབྱངས་དང་བཅས། །སྤྱན་འདྲེན་སྔགས་བརྗོད་བརྟན་པར་བྱ།། དེ་ལྟར་བྱིན་ཕབ་པའི་ཡེ་ཤེས་པ་རྣམས་ཇི་སྲིད་བྱང་ཆུབ་མཆོག་གི་གོ་འཕང་ཐོབ་པ་དེ་སྲིད་དུ་མི་ཉམས་ཤིང་བརྟན་པར་གྱུར་ཅིག ཨོཾ་སུ་པྲ་ཏིཥྛ་བཛྲ་ཡེ་སྭཱཧཱ། ལན་གསུམ་བརྗོད་ཅིང་མེ་ཏོག་འཐོར། དེ་ནས་ཚེ་འགུག་ཅིང་རྒྱས་གདབ་པར་བྱ་བའི་ཕྱིར་སེམས་གཞན་དུ་མ་ཡེངས་པར་དམིགས་པ་བརྟན་པོ་འདི་བཞིན་དུ་མཛད་འཚལ།། བདག་མདུན་བུམ་པའི་ལྷ་ཚོགས་ཀྱི། །སྐུ་ལས་འོད་ཟེར་ཕྱོགས་བཅུར་འཕྲོས། །འཁོར་འདས་ཀུན་གྱི་ཚེ་བཅུད་བསྡུས། །འཆི་མེད་རྡོ་རྗེའི་སྲོག་ཐོབ་དམིགས། །དེ་ནས་ཚེ་འགུགས་དངོས་ནི། ཧཱུྃ་ཧྲཱིཿ རང་སྣང་དག་པ་རྔ་ཡབ༴སོགས་ནས། རཀྵ་རཀྵ་བྷྲཱུཾ། ཞེས་ཚེ་བསྐུལ་བླ་འགུག་རྒྱས་གདབ་བྱ། །དེ་རྗེས་ཚེ་ཡི་དབང་བསྐུར་དངོས། །བཅུད་ལྡན་བུམ་པ་སྐུ་ཡི་དབང་། །བདེ་སྐྱོང་བདུད་རྩི་གསུང་གི་དབང་། །མྱོང་གྲོལ་རིལ་བུ་ཐུགས་ཀྱི་དབང་། །ཐམས་ཅད་རྫོགས་པ་གཏོར་མའི་དབང་། །མཐའ་རྟེན་བྱིན་རླབས་བཀའ་ཡི་དབང་། །རིམ་པར་བླང་ལ་བསྐུར་བར་བྱ། ཞེས་པའི་བུམ་དབང་ནི། བུམ་པ་འདི་ཉིད་ཕྱི་རིན་པོ་ཆེ་བུམ་པའི་དབྱིབས་ལ་ནང་དཔལ་རི་པདྨ་འོད་ཀྱི་གཞལ་ཡས་ཁང་ཆེན་པོ་རྒྱ་ཁྱོན་ཚད་དང་མཚན་ཉིད་བཀོད་པ་ཕུན་སུམ་ཚོགས་པའི་དབུས་སུ་སྐུ་གསུམ་ཡོངས་འདུས་མ་ཧཱ་གུ་རུའི་ལྷ་ཚོགས་རྣམས་མཁའ་ལ་གཟའ་སྐར་བཀྲ་བ་ལྟར་གསལ་བའི་སྐུ་ལས་བདུད་རྩིའི་རྒྱུན་བྱུང་བས་ཁྱེད་རང་རྣམས་ཀྱི་ལུས་ཀུན་ཡོངས་སུ་གང་ཞིང་ལུས་ལ་འཕོ་འགྱུར་མེད་པ་བུམ་པ་སྐུའི་དབང་ཐོབ་བྱུང་སྙམ་དུ་མོས་ཤིག་བྱས་ལ་བུམ་པ་ཐོགས་ཏེ། ཧཱུྃ་ཧྲཱིཿ ཀུན་ཟླུམ་རིན་ཆེན་བུམ་པའི་བཅུད། །སྐུ་གསུམ་ཡོངས་འདུས་ལྷ་ཚོགས་ཀྱིས། །བྱིན་རླབས་ཡེ་ཤེས་བདུད་རྩིའི་ཆུས། རིགས་ཀྱི་བུ་ལ་དབང་བསྐུར་བས། །སྐྱེ་འཆི་བྲལ་བའི་ཚེ་ལ་དབང་། །བགྲེས་རྒུད་མེད་པའི་ལུས་ཐོབ་ཅིང་། །སྐུ་ཡི་དབང་དང་དངོས་གྲུབ་རྣམས། །དུས་འདིར་ཡོངས་རྫོགས་ཐོབ་བྱིན་རློབས། །ཨོཾ་ཨཱཿཧཱུྃ་བཛྲ་གུ་རུ་པདྨ་ཨ་ཡུ་ཥེ་བྷྲུཾ་ནྲྀ་ཛཿསརྦ་སིདྡྷི་ཕ་ལ་ཧཱུྃ། ཞེས་ཚེ་བསྙེན་དང་། ཀཱ་ཡ་ཨ་བྷི་ཥིཉྩ་ཨོཾ། ཞེས་བུམ་ཆུ་བླུད། ཚེ་དབང་དུ་གྱུར་ཅིག སོགས་དང་། མ་བཅོས་སྤྲོས་བྲལ་བླ་མ༴སོགས་ནས། རྡོ་རྗེ་འཆང་གི་བཀྲ་ཤིས་ཤོག དེས་བུམ་པ་སྐུ་ཡི་དབང་ཐོབ། དུས་མིན་འཆི་བ་ལས་གྲོལ། ལུས་ཀྱི་སྡིག་སྒྲིབ་དག ལུས་ལྷ་བསྒོམ་པ་ལ་དབང་། འབྲས་བུ་སྤྲུལ་སྐུ་འགྲུབ་པའི་སྐལ་བ་ཅན་དུ་བྱས་པ་ཡིན་ནོ།། བདུད་རྩིའི་དབང་ནི་ཚེ་ཆང་ཐོགས་ཏེ། ཐོད་ཆང་འདི་ཉིད་སྐུ་གསུམ་ཡོངས་འདུས་འཆི་མེད་མགོན་པོ་སྟངས་དཔྱལ་གཉིས་སུ་མེད་པར་སྦྱོར་བའི་ཀུནྡ་བྱང་ཆུབ་ཀྱི་སེམས་མཚན་ལྡན་བདེ་སྐྱོང་གི་སྣོད་དུ་བསྐྱིལ་བ་ཁྱོད་རང་གི་མགྲིན་པར་བསྟིམ་པས་ངག་ལ་འགགས་པ་མེད་པ་རྡོ་རྗེའི་གསུང་གི་དབང་ཐོབ་བྱུང་སྙམ་དུ་མོས་མཛོད། ཧཱུྃ་ཧྲཱིཿ སྐུ་གསུམ་བདེ་གཤེགས་བྱིན་རླབས་ལས། །ལེགས་འོང་འཆི་མེད་ཨ་མྲྀ་ཏ། །མཚན་ལྡན་བདེ་སྐྱོང་སྣོད་དུ་བསྐྱིལ། །རིགས་ཀྱི་བུ་ལ་དབང་བསྐུར་བས། །ངག་སྒྲིབ་ཉེས་སྐྱོན་ཀུན་བྱང་ཞིང་། །བཟླས་བརྗོད་སྔགས་ཀྱི་ནུས་སྟོབས་འཕེལ། །གསུང་གི་བྱིན་རླབས་དབང་དངོས་གྲུབ། །མ་ལུས་དེང་འདིར་སྩལ་དུ་གསོལ། ཚེ་བསྙེན་དང་། ཝཀྐ་ཨ་བྷི་ཥིཉྩ་ཨཱཿ ཞེས་བླུད། ཚེ་དབང་དུ༴སོགས་དང་། ཐུགས་རྗེ་ཆེན་པོས་འགྲོ་དྲུག་ཀུན༴སོགས་ནས། སྤྱན་རས་གཟིགས་ཀྱི་བཀྲ་ཤིས་ཤོག དེས་གསུང་གི་དབང་ཐོབ། རྦོད་གཏོང་བྱད་ཁ་ལས་གྲོལ། ངག་གི་སྡིག་སྒྲིབ་དག སྔགས་བཟླ་བ་ལ་དབང་། འབྲས་བུ་ལོངས་སྤྱོད་རྫོགས་པའི་སྐུ་ཐོབ་པའི་སྐལ་བ་ཅན་དུ་བྱས་པའོ།། རིལ་བུའི་དབང་ནི། ཚེ་རིལ་ཐོགས་ལ། རིལ་བུ་འདི་ཉིད་སྐུ་གསུམ་ཡོངས་ཀྱི་བྱིན་རླབས་འཁོར་འདས་ཀུན་གྱི་ཚེ་བཅུད་མ་ལུས་པ་དམ་རྫས་མྱོང་གྲོལ་རིལ་བུའི་རྣམ་པར་བསྡུས་ཤིང་དྲིལ་ནས་ཁྱེད་རང་རྣམས་ཀྱི་སྙིང་ཀར་བསྟིམ་པས་འཁྲུལ་བ་མེད་པ་ཐུགས་ཀྱི་དབང་དང་དངོས་གྲུབ་མ་ལུས་ཐོབ་བྱུང་སྙམ་དུ་མོས་མཛོད། ཧཱུྃ་ཧྲཱིཿ སྐུ་གསུམ་བདེར་གཤེགས་དགོངས་ཀློང་ནས། །རང་བྱུང་འཁོར་འདས་དྭངས་མའི་བཅུད། །མྱོང་གྲོལ་འཆི་མེད་རིལ་བུ་འདིས། །རིགས་ཀྱི་བུ་ལ་དབང་བསྐུར་བས། །གཟུང་འཛིན་རྟོག་སྒྲིབ་རྨོངས་པ་ཞི། །སྐུ་གསུམ་དགོངས་བཅུད་ཉམས་སུ་མྱོང་། །ཐུགས་ཀྱི་ནུས་བྱིན་དངོས་གྲུབ་དབང་། །མ་ལུས་དུས་འདིར་ཐོབ་པར་ཤོག །ཚེ་བསྙེན། ཙིཏྟ་ཨ་བྷི་ཥིཉྩ་ཧཱུྃ། ཞེས་བྱིན། ཚེ་དབང་དུ༴སོགས་དང་། འཇིག་རྟེན་འདྲེན་པའི༴སོགས། ཚེ་དཔག་མེད་པའི་བཀྲ་ཤིས་ཤོག དེས་ཐུགས་ཀྱི་དབང་ཐོབ། རྨོངས་འཐིབས་འཁྲུལ་བ་གྲོལ། ཡིད་ཀྱི་སྡིག་སྒྲིབ་དག བསྐྱེད་རྫོགས་བསྒོམ་པ་ལ་དབང་། འབྲས་བུ་ཆོས་ཀྱི་སྐུ་འགྲུབ་པའི་སྐལ་བ་རྒྱུད་ལ་བཞག་པའོ།། གཏོར་དབང་ནི། དབང་གཏོར་བཟུང་ལ། གཏོར་མ་འདི་ཉིད་ཕྱི་ལྟར་འབྲུ་སྨན་རྩི་བཅུད་རིན་པོ་ཆེ་སྣ་ཚོགས་སྦྱར་བའི་གཏོར་ཟླུམ་རྒྱན་དང་ལྡན་པའི་རྣམ་པ་ལ། ནང་ལྟར་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་འོད་དང་འོད་ཟེར་གྱི་ཚོགས་དཔག་ཏུ་མེད་པ་རབ་ཏུ་འབར་ཞིང་འཕྲོ་བའི་ཀློང་དུ་བླ་མ་སྐུ་གསུམ་ཡོངས་འདུས་ཀྱི་ལྷ་ཚོགས་མ་ལུས་པའི་ངོ་བོར་བཀྲ་ལམ་མེར་བཞུགས་པའི་སྐུ་ཡི་གནས་གསུམ་ལས་འོད་ཟེར་དཀར་དམར་མཐིང་གསུམ་བདུད་རྩིའི་རྒྱུན་དང་བཅས་པ་བྱུང་། ཁྱེད་རང་རྣམས་ཀྱི་སྤྱི་བོ་ནས་ཞུགས་ཤིང་སྒོ་གསུམ་དང་དབྱེར་མེད་དུ་ཐིམ་པས་ལྷ་ཚོགས་རྣམས་ཀྱི་སྐུ་གསུང་ཐུགས་ཀྱི་བྱིན་རླབས་དབང་དང་དངོས་གྲུབ་ཐམས་ཅད་སྐད་ཅིག་ཉིད་ལ་ཐོབ་བྱུང་སྙམ་དུ་མོས་མཛོད། ཧཱུྃ་ཧྲཱིཿ སྐུ་གསུམ་ལྷ་ཚོགས་མ་ལུས་པའི། །གསང་གསུམ་བྱིན་རླབས་བདུད་རྩིའི་རྒྱུན། །དབང་དང་དངོས་གྲུབ་འོད་ཕུང་གི། །རྣམ་པར་བྱོན་ནས་སློབ་བུ་ཡི། །ལུས་ངག་སེམས་ལ་ཐིམ་ནས་ཀྱང་། །སྐུ་གསུམ་ཡོངས་འདུས་ལྷ་ཚོགས་ཀྱི། །བྱིན་རླབས་དབང་དང་དངོས་གྲུབ་རྣམས། །སྐད་ཅིག་ཉིད་ལ་ཐོབ་པར་ཤོག །གུ་རུ་ཞི་དྲག་ཕག་སེང་སོགས། །སྤྲུལ་སྐུའི་ལྷ་ཚོགས་འཁོར་བཅས་ཀྱིས། །སློབ་མའི་ལུས་ལ་བྱིན་གྱིས་རློབས། །འགྱུར་མེད་སྐུ་ཡི་དབང་ཐོབ་ཤོག །ཐོད་ཕྲེང་རིགས་ལྔ་སྟངས་དཔྱལ་སོགས། །ལོངས་སྐུའི་ལྷ་ཚོགས་འཁོར་བཅས་ཀྱིས། །སློབ་མའི་ངག་ལ་བྱིན་གྱིས་རློབས། །འགགས་མེད་གསུང་གི་དབང་ཐོབ་ཤོག །འོད་སྣང་མཐའ་ཡས་ཀུན་ཏུ་བཟང་། །ཆོས་སྐུའི་ལྷ་ཚོགས་འཁོར་བཅས་ཀྱིས། །སློབ་བུའི་སེམས་ལ་བྱིན་གྱིས་རློབས། །འཁྲུལ་མེད་ཐུགས་ཀྱི་དབང་ཐོབ་ཤོག །ལུས་ལ་བདེ་དྲོད་སྦར་དུ་གསོལ། །ངག་ལ་ནུས་སྟོབས་བསྐྱེད་དུ་གསོལ། །སེམས་ལ་ཉམས་རྟོགས་སྤར་དུ་གསོལ། །འཆི་མེད་ཚེ་ཡི་དབང་ཐོབ་ཤོག །ཚེ་བསྙེན། སརྦ་ཨ་བྷི་ཥིཉྩ་ཧྲཱིཿ ཞེས་གནས་གསུམ་དུ་གཏུག ཚེ་དབང་དུ༴སོགས་དང་། འོད་སྣང་མཐའ་ཡས་རིགས་ལྔ་ཐོད་ཕྲེང་རྩལ། །གུ་རུ་ཞི་དྲག་ལ་སོགས་གཙོ་དང་འཁོར། །སྐུ་གསུམ་ཡོངས་འདུས་དཀོན་མཆོག་གསུམ་གྱི་དངོས། །རྩ་གསུམ་བསྲུང་མར་བཅས་པའི་བཀྲ་ཤིས་ཤོག །དེས་དབང་ཡོངས་རྫོགས་ཐོབ། གནས་སྐབས་འཆི་མེད་ཚེ་ཡི་དངོས་གྲུབ་ཐོབ་ཅིང་། འཆི་བདག་གཤིན་རྗེའི་འཇིགས་པ་ལས་གྲོལ། སྒོ་གསུམ་ཆ་མཉམ་དུ་བསགས་་པའི་སྡིག་སྒྲིབ་དག ལམ་བསྐྱེད་རྫོགས་སྤྱི་དང་ཁྱད་པར་བདེ་སྟོང་གི་རྣལ་འབྱོར་བསྒོམ་པ་ལ་དབང་། མཐར་ཐུག་ཏུ་འབྲས་བུ་སྐུ་གསུམ་ལྷུན་གྱིས་གྲུབ་པའི་གོ་འཕང་མངོན་དུ་བྱེད་པའི་སྐལ་ལྡན་དུ་བྱས་པ་ཡིན་ནོ།། མཐའ་རྟེན་གྱི་དབང་ནི། དེ་ནས་དབང་ཐམས་ཅད་ཀྱི་མཐའ་བརྟན་པར་བྱེད་པ་རྒྱལ་སྲིད་རིན་པོ་ཆེ་བདུན་དང་། བཀྲ་ཤིས་པའི་རྟགས་རྫས་བཅུ་དྲུག་ལ་སོགས་པས་གནས་སྐབས་སུ་འདོད་རྒུ་ཡིད་བཞིན་དུ་འབྱོར་བ་འཁོར་ལོས་བསྒྱུར་བའི་རྒྱལ་པོ་ལྟ་བུ་དང་། མཐར་ཐུག་ཏུ་དོན་གཉིས་ལྷུན་གྱིས་གྲུབ་པ་ཆོས་ཀྱི་འཁོར་ལོས་བསྒྱུར་བ་ཆེན་པོར་མངའ་གསོལ་བར་མོས་མཛོད། ཧཱུྃ་ཧྲཱིཿ འགྲོ་དྲུག་ཁ་ལོ་ཐར་ལམ༴སོགས། ཞེས་དང་། ཨོཾ་ན་མོ་བྷ་ག་ཝ་ཏེ༴སོགས། སྭཱ་ཧཱ། ཞེས་ཚེ་གཟུངས་བརྗོད། ཚེ་དབང་དུ༴སོགས་དང་། བརྟན་གཡོའི་དགེ་མཚན་མཆོག་གྱུར་རྒྱལ་སྲིད་བདུན། །རྒྱལ་བའི་མཚན་དཔེ་ལས་བྱུང་བཀྲ་ཤིས་རྟགས། །བྱིན་རླབས་རྫས་མཆོག་བརྒྱད་སོགས་མངའ་དབང་བསྒྱུར། །ཕུན་ཚོགས་དཔལ་ལ་རོལ་བའི་བཀྲ་ཤིས་ཤོག །བྱིན་རླབས་བཀའི་དབང་ནི། སླར་ཡང་སློབ་དཔོན་སྐུ་གསུམ་ཡོངས་འདུས་རྒྱལ་བའི་དབང་པོར་གསལ་བའི་སྐུའི་གནས་གསུམ་ནས་འཕྲོས་པའི་འོད་ཟེར་གྱིས་རབ་འབྱམས་ཕྱོགས་བཅུའི་ཞིང་ཁམས་མཐའ་ཡས་ཤིང་མུ་མེད་པ་ན་བཞུགས་པའི་རྒྱལ་བ་སྲས་དང་བཅས་པ་ཐམས་ཅད་ཀྱི་མཁྱེན་བརྩེ་ནུས་གསུམ་གྱི་བྱིན་རླབས་དང་དངོས་གྲུབ། སྐུ་གསུམ་ཡོངས་འདུས་རིག་འཛིན་བླ་མའི་ལྷ་ཚོགས་རྣམས་ཀྱི་གསང་གསུམ་མི་ཟད་པ་རྒྱན་གྱི་འཁོར་ལོའི་དཔལ་དང་ཡོན་ཏན། ཕྱི་སྣོད་འབྱུང་ལྔའི་དྭངས་བཅུད། ནང་བཅུད་འགྲོ་བའི་ཚེ་བསོད་བཀྲག་མདངས། རིག་འཛིན་དྲང་སྲོང་རྣལ་འབྱོར་གྲུབ་པ་རྣམས་ཀྱི་ཡེ་ཤེས་དང་ཡོན་ཏན་ཐམས་ཅད་འུབ་ཀྱིས་བསྡུས་ཏེ་ཁྱེད་རང་རྣམས་ལ་བསྟིམ་པས་སྐུ་གསུམ་ཡོངས་འདུས་མ་ཧཱ་གུ་རུའི་ལྷ་ཚོགས་རྣམས་ཀྱི་གསང་བ་གསུམ་དང་ཁྱེད་རང་རྣམས་ཀྱི་སྒོ་གསུམ་དབྱེར་མེད་དུ་གྱུར་པའི་མོས་པ་མཛོད།བྱས་ལ་ཚེ་འགུགས་རྒྱས་བསྡུས་གང་རུང་གི་མཐར། ཚེ་བསྙེན་དང་ཚེ་གཟུངས་བརྗོད་ཅིང་། རྟེན་གསུམ་སྤྱི་བོར་གཏུག་ལ། ཨོཾ་ཨཱཿཧཱུྃ། ཆོས་སྐུ་སྣང་བ་མཐའ་ཡས། ལོངས་སྐུ་ཐུགས་རྗེ་ཆེན་པོ། སྤྲུལ་སྐུ་པདྨ་འབྱུང་གནས། མཁར་ཆེན་ཡེ་ཤེས་མཚོ་རྒྱལ། པ་གོར་བཻ་རོ་ཙ་ན། ཚངས་པ་ལྷ་ཡི་མེ་ཏོག གྲུབ་བརྙེས་རྒྱལ་བ་བྱང་ཆུབ། སྤྲུལ་པའི་རྗེ་འབངས་ཉེར་ལྔ། འཕགས་བོད་ལོ་པཎ་རྒྱ་མཚོ། འཇིགས་མེད་རྣམ་རྒྱལ་བཟང་པོ། ཆོས་བདག་རྩ་བརྒྱུད་བླ་མ། ཡི་དམ་ཞི་ཁྲོ་རབ་འབྱམས། མ་ཚོགས་མཁའ་འགྲོ་རྒྱ་མཚོ། མདོར་ན་སྐུ་གསུམ་རྩ་གསུམ་མཆོག་གསུམ་རྒྱ་མཚོའི་ཚོགས་སྤྱི་དང་། ཁྱད་པར་དུ་རིག་འཛིན་སྐུ་གསུམ་ཡོངས་འདུས་ཀྱི་ལྷ་ཚོགས་སྤྲུལ་པ་ཡང་སྤྲུལ་བཀའ་སྡོད་བསྲུང་མའི་ཚོགས་དང་བཅས་པའི་ཐུགས་རྗེ་དང་ཕྲིན་ལས་བསམ་གྱིས་མི་ཁྱབ་པའི་སྟོབས་ཀྱིས། རྡོ་རྗེ་སློབ་མ་འདི་རྣམས་ཀྱི་རྒྱུད་སྨིན་ཅིང་གྲོལ་བར་བྱིན་གྱིས་བརླབ་ཏུ་གསོལ། ནད་གདོན་འཇིགས་ཚོགས་རྐྱེན་དང་བར་ཆད་ཐམས་ཅད་ཞི་བར་བྱིན་གྱིས་བརླབ་ཏུ་གསོལ། ཚེ་དང་ཡེ་ཤེས་ཡོན་ཏན་ཐམས་ཅད་འཕེལ་ཞིང་རྒྱས་པར་བྱིན་གྱིས་བརླབ་ཏུ་གསོལ། འཆི་མེད་ཚེ་ཡི་རིག་འཛིན་ཐོབ་པར་བྱིན་གྱིས་བརླབ་ཏུ་གསོལ། མཆོག་དང་ཐུན་མོང་གི་དངོས་གྲུབ་ཐམས་ཅད་ཚེ་འདི་ཉིད་ལ་མྱུར་བ་ཉིད་དུ་ཐོབ་པར་བྱིན་གྱིས་བརླབ་ཏུ་གསོལ། ཚེ་གཅིག་ལུས་གཅིག་ལ་སྐུ་གསུམ་ལྷུན་གྱིས་གྲུབ་ཅིང་འགྲོ་དོན་མཐའ་རུ་ཕྱིན་པར་བྱིན་གྱིས་བརླབ་ཏུ་གསོལ། ཞེས་བརྗོད་ཅིང་སྲོག་བསླུ་ཉེའུ་འདོན་པ་མཆོད་སྦྱིན་སོགས་ཁས་བླང་དུ་བཅུག་ལ། རྟེན་སྙིང་བརྗོད་ཅིང་མེ་ཏོག་འཐོར། དེ་ལྟར་དབང་བསྐུར་གྱི་རིམ་པ་གྲུབ་ནས་དབང་ལྷ་སྐུ་གསུམ་ཡོངས་འདུས་རིག་འཛིན་བླ་མའི་ལྷ་ཚོགས་རྣམས་ཀྱིས་བཀྲ་ཤིས་བདེན་ཚིག་གི་སྒྲ་དབྱངས་འགགས་མེད་དུ་སྒྲོགས་པ་དང་ཆབ་གཅིག་པར་ཕུན་ཚོགས་མེ་ཏོག་མནྡ་ར་བའི་ཆར་ཆེན་པོས་གནམ་ས་བར་སྣང་ཐམས་ཅད་ཡོངས་སུ་གང་བས་བརྟན་གཡོའི་ཁམས་ཐམས་ཅད་དགེ་ལེགས་ཀྱི་གཟི་བྱིན་མཆོག་ཏུ་བསྐྱེད་པའི་མོས་པ་མཛོད། དོན་གཉིས་མཐར་ཕྱིན༴སོགས་དང་། བྱིན་རླབས་མཁའ་ལྟར་ཡངས་པའི་བླ་མ་རྗེ། །དངོས་གྲུབ་སྤྲིན་ལྟར་འཁྲིགས་པའི་ཡི་དམ་ལྷ། །ཕྲིན་ལས་གློག་ལྟར་མྱུར་བའི་མཁའ་འགྲོ་མ། །རྩ་གསུམ་བསྲུང་མར་བཅས་པའི་བཀྲ་ཤིས་ཤོག །ངོ་བོ་ཀ་དག་སྐྱེ་མེད་ཆོས་ཀྱི་སྐུ། །རང་བཞིན་ལྷུན་གྲུབ་འགགས་མེད་ལོངས་སྤྱོད་རྫོགས། །ཐུགས་རྗེ་ཀུན་ཁྱབ་རྩོལ་མེད་སྤྲུལ་པའི་སྐུ། །སྐུ་གསུམ་ཡོངས་འདུས་ལྷ་ཚོགས་བཀྲ་ཤིས་ཤོག །མི་འགྱུར་ལྷུན་པོ༴སོགས། སྐུ་གསུང་ཐུགས་ཀྱི་བཀྲ་ཤིས་ཤོག །ཅེས་བརྗོད། དེ་ནས་རྗེས་ལ་དམ་བཅའ་དང་། །ཡོན་འབུལ་དགེ་བསྔོ་སྤྱི་ལྟར་རོ།། ཞེས་པའི་དམ་བཅའ་ནི། དེ་ལྟར་ཐོབ་ཅིང་ཁས་བླངས་པའི་དམ་ཚིག་དང་བསྲུང་སྡོམ་བསླབ་པའི་རིམ་པ་རྣམས་ལ་ཚུལ་བཞིན་དུ་བརྩོན་པར་བྱའོ་སྙམས་པས་འདིའི་རྗེས་སུ་ཟློས། གཙོ་བོས་ཇི་ལྟར༴སོགས། ལན་གསུམ། ཡོན་འབུལ་ནི། དེས་བླ་མ་སྐུ་གསུམ་ཡོངས་འདུས་ཀྱི་དཀྱིལ་འཁོར་དུ་འཆི་མེད་ཚེ་ཡི་དབང་བསྐུར་ཟབ་མོ་ལེགས་པར་ཐོབ་པ་ཡིན་པས་བཀའ་དྲིན་གཏང་རག་གི་ཡོན་དུ་མཎྚལ་ཕུལ། ཞེས་མཎྚལ་རྒྱས་བསྡུས་གང་རུང་ཕུལ་ལ། སླར་ཡང་ལུས་ལོངས་སྤྱོད་དུས་གསུམ་དགེ་ཚོགས་དང་བཅས་པ་འཁོར་ལོས་བསྒྱུར་བའི་རྒྱལ་སྲིད་ཀྱི་དཔལ་འབྱོར་ལྟར་སྤྲུལ་ཏེ་བླ་མ་དང་དཀྱིལ་འཁོར་གྱི་ལྷ་ཚོགས་དབྱེར་མེད་པ་ལ་འབུལ་བ་ལགས་པས་ཐུགས་བརྩེ་བ་ཆེན་པོས་ཆ་ཤས་ནས་རིམ་པར་ལོངས་སྤྱོད་དུ་གསོལ་སྙམས་པས་འདི་བཞིན་རྗེས་ཟློས་གྱིས། དེང་ནས་བརྩམས་ཏེ༴སོགས་ནས། སྤྱད་དུ་གསོལ། ལན་གསུམ། བསྔོ་སྨོན་ནི། དེ་ལྟར་སྨིན་བྱེད་ཚེ་ཡི་དབང་མཆོག་ལེགས་པར་ཐོབ་པའི་དགེ་བས་མཚོན་དུས་གསུམ་གྱི་དགེ་ཚོགས་ཐམས་ཅད་ཕྱོགས་གཅིག་ཏུ་བསྡོམ་ཏེ་མཁའ་ཁྱབ་ཀྱི་འགྲོ་རྣམས་སྐུ་གསུམ་ཡོངས་འདུས་རྫོགས་པའི་སངས་རྒྱས་ཀྱི་གོ་འཕང་མཆོག་ཐོབ་པའི་རྒྱུར་བསྔོ་བར་བགྱིའོ། །དེའི་མཐུ་ལ་བརྟེན་ནས་སེམས་ཅན་ཐམས་ཅད་རྣམ་མཁྱེན་བླ་ན་མེད་པའི་ཡེ་ཤེས་ཚེ་འདི་ཉིད་ལ་མངོན་དུ་བྱེད་པར་གྱུར་ཅིག་སྙམ་པས་མཐུན་འགྱུར་མཉམ་དུ་མཛད་པར་ཞུ། བསོད་ནམས་འདི་ཡིས༴སོགས་ནས། སྒྲོལ་བར་ཤོག །ཅེས་བརྗོད་དོ། ས་མ་ཡཱཿ ཡང་དག་དབང་ལྡན་སློབ་དཔོན་གྱིས། །དམ་ཚིག་སེལ་མ་ཞུགས་པ་ལ། །ཚེ་ཡི་དབང་མཆོག་འདི་བྱིན་པས། །དུས་མིན་འཆི་བ་བཟློག་པར་འགྱུར། །ནང་རྒྱས་བྱད་མ་རྦོད་གཏོང་སེལ། །སྔགས་བཟློག་དྲེགས་པའི་ཟ་ཁ་ལྡོག །ནད་མཚོན་དུག་སོགས་མི་མཐུན་ཕྱོགས། །ཐམས་ཅད་འདི་ཡིས་སེལ་བར་ནུས། །གནད་གསང་ཐབས་ལ་བརྩོན་གྱུར་ན། །འཆི་བདག་བདུད་ཀྱང་བྱམས་ཤིང་གདུང་། །དུས་ལ་བབས་ཀྱང་རིང་དུ་བཤོལ། །འཆི་མེད་དངོས་གྲུབ་དེ་དྲུང་གནས། །གུ་ཧྱཿ ཞེས་དམ་ཆོས་སྐུ་གསུམ་ཡོངས་འདུས་ཀྱི་ཚེ་དབང་འཁོར་འདས་བཅུད་དྲིལ་མཚམས་སྦྱོར་དང་བཅས་པ་འདི་ཡང་། དད་བརྩོན་དམ་ལྡན་རྣལ་འབྱོར་དམ་པ་པདྨ་ཚེ་མཆོག་ནས་ཡང་ཡང་བསྐུལ་ངོར། གར་དབང་འཇིགས་མེད་རྣམ་རྒྱལ་བས་འཇུག་བདེར་ཁྲིགས་ཆགས་སུ་སྤེལ་བ་དགེ་ལེགས་འཕེལ་བའི་རྒྱུར་གྱུར་ཅིག །དགེའོ།། དགེའོ།། དགེའོ།།