གཡང་སྒྲུབ་དཔལ་ཡོན་འབུམ་བརྡལ།
དྷརྨཏྲིཀཡཱཀོཥཏྲེཿ པྲསུརསདྷཀཤྲཱིགུཎལཀྵཔརམཱསྟིཿ
དྷརྨཏྲིཀཡཱཀོཥཏྲེཿ པྲསུརསདྷཀཤྲཱིགུཎལཀྵཔརམཱསྟིཿ
དམ་ཆོས་སྐུ་གསུམ་དགོངས་མཛོད་ལས། །གཡང་སྒྲུབ་དཔལ་ཡོན་འབུམ་བརྡལ་བཞུགས། །
སྐུ་གསུམ་བདེ་གཤེགས་ཡོངས་རྫོགས་རྗེ་ལ་འདུད། །འགྲོ་ཀུན་དབུལ་ཕོངས་རྒུད་པ་སེལ་བའི་ཕྱིར། །རིན་ཆེན་མང་སྤྲུལ་ནོར་བདག་རྣམ་ཐོས་སྲས། །བསྒྲུབ་ཐབས་དཔལ་ཡོན་འབུམ་བརྡལ་འདི་རུ་བསྟན། །དེ་ཡང་སྦྱོར་བ་དངོས་གཞི་རྗེས་དང་གསུམ། །དང་པོ་སྦྱོར་བ་ཡོ་བྱད་བཅའ་བཤོམ་ནི། །སྐུ་གསུམ་བླ་མའི་དལ་གྱི་མདུན་ནམ་གཡོན། །སྟེགས་བུ་མདའ་ཚད་གྲུ་བཞི་ཁོད་སྙོམ་ལ། །བ་བྱུང་དྲི་བཟང་སྨན་གྱི་ཁུ་བས་བྱུག །སྣ་ཚོགས་དར་གྱིས་ལེགས་པར་ཁེབ་བྱས་སྟེང་། །རིན་ཆེན་སྨན་དང་འབྲུ་དཀར་ཚོམ་བུར་བརྡལ། །དེ་དབུས་རིན་པོ་ཆེ་ཡི་སྣོད་ནང་དུ། །རིན་ཆེན་འབྲུ་སྨན་དཀར་དང་གཙང་སྦྱར་ཕྱེར། །ལྔ་ཚན་ལྔས་བྲན་མར་གྱིས་སྦྲུས་པ་ལས། །གདན་ཟླུམ་སུམ་བརྩེགས་རིན་ཆེན་ཟུར་བརྒྱད་སྟེང་། །ནོར་ལྷ་སྤྱི་ཡི་སྒྲུབ་གཏོར་ཆ་ལྔ་པ། །རིན་ཆེན་འབར་བའི་དབྱིབས་ལྡན་གསེར་གྱི་མདོག །ནོར་བུའི་འདབ་ལྡན་མཛེས་ཤིང་བརྗིད་པ་བཀོད། །གདན་སྟེང་བང་རིམ་གསུམ་ཀ་རིལ་བུས་བསྐོར། །དེ་མཐར་མར་ཐུད་སུམ་བརྩེགས་དབྱིབས་ཀྱིས་བསྐོར། །རྩེ་རྒྱན་རྒྱལ་མཚན་ནེའུ་ལེས་མཚན་པ་དང་། །ལྔ་སྒྲོམ་ལ་སོགས་རྒྱན་གྱིས་མཛེས་བྱས་པ། །དར་ཚོན་སྐུ་ཙཀ་གདུགས་དང་བཅས་པ་བཤམས། །གཡས་སུ་གཡང་སྒྱེ་དཀར་མོ་ནུ་དགུ་དང་། །གཡོན་དུ་གཏེར་གྱི་བུམ་པ་བཟོ་ལེགས་ནང་། །ནོར་བདག་བསྙེན་བསྒྲུབ་ལས་སྦྱོར་དབྱངས་གསལ་སྔགས། །རྟེན་སྙིང་སྤེལ་ཚིག་དང་བཅས་སེང་ལྡིང་ལ། །དྲིལ་ཏེ་གནོད་སྦྱིན་འཁོར་ལོའི་ལྟེ་བར་བཙུགས། །དེ་མཐར་རྫས་བརྒྱད་སྲིད་རྟགས་རིན་ཆེན་གཟུགས། །མགོ་མཇུག་མ་ལོག་ཕྱོགས་མཚམས་སོ་སོར་བཀོད། །ཁྲིམས་ལྡན་ན་བཟའ་སྔགས་པའི་དམ་རྫས་དང་། །བླ་དཔོན་གདན་ཁྲི་འདུས་སྡེའི་ན་བཟའི་རྡུལ། །རྒྱལ་པོའི་ཨ་ར་བཙུན་མོའི་ཕོར་བ་དང་། །དཔའ་རྒོད་རལ་ཤུབ་ཁ་དྲག་ཅན་གྱི་སྐྲ། །སྐྱེས་པའི་སོར་གདུབ་བུད་མེད་རྣ་བའི་རྒྱན། །རྒྱ་ཡི་རལ་བ་བོད་ཀྱི་ཕྲེང་བའི་རྒྱན། །བུ་བདུན་སྐྱེས་པའི་མ་ཡི་ནོར་གཡུ་དང་། །འཕན་དར་ཕྱུག་པོའི་འབྲུ་ནོར་ཟས་སྣ་དང་། །མཁས་པའི་ལྗགས་དང་བློན་ཆེན་སྙིང་སོགས་རྫས། །དབང་ཆེན་ལག་པ་སྤོས་ཤེལ་ཁབ་ལེན་རྡོ། །རྐྱང་སོགས་རི་དྭགས་རྣ་བ་འབྲོང་བུའི་རྭ། །ཟ་བྱེད་མཆེ་བ་རྙབ་བྱེད་སྡེར་མོ་དང་། །སྣོམ་བྱེད་སྣ་དང་འདབ་ཆགས་བཟང་དགུའི་མཆུ། །གནགས་ལུག་རྟ་ཕྱུག་སོགས་ཀྱི་སྤུ་སྣ་དང་། །དར་ཟབ་གཅན་གཟན་པགས་པའི་རས་མ་དང་། །ས་ཆུ་རྡོ་ཤིང་མེ་ཏོག་བཟང་པོའི་རིགས། །དབང་པོ་རིལ་བུ་གངས་ཀྱི་ཐིགས་པ་དང་། །སེང་གེའི་འོ་མ་གཡུ་འབྲུག་ཁ་ཆུ་དང་། །རྒྱ་མཚོའི་ལྦུ་བ་སྲིན་ཁྱུང་སྡེར་མོ་སོགས། །རིན་ཆེན་སྨན་སྤོས་ཤིང་ཏོག་འབྲུ་སྣའི་རིགས། །ཐམས་ཅད་རྙེད་པ་མཆོག་སྟེ་དེ་མིན་ཀྱང་། །གང་རྙེད་གཙང་སྦྲར་བཅས་ཏེ་ལེགས་པར་བཀང་། །མདུན་དུ་འོ་སྦྲང་ཞོ་མར་ཆང་གི་མཚོ། །དུང་ཟངས་དངུལ་གསེར་གཡུ་རིས་མཚན་པ་བཀོད། །དེ་ཡི་མདུན་ནམ་རྒྱབ་ཕྱོགས་གང་བདེ་བར། །བུ་དགུའི་ཕ་ཡི་མདའ་ལ་དར་སྣ་ལྔ། །གསེར་གཡུ་དུང་གཟི་མེ་ལོང་བྱི་རུ་བཏགས། །གཞན་ཡང་གནོད་སྦྱིན་དགྱེས་པའི་མཐུན་རྫས་དང་། །མཁོ་དགུའི་ཡོ་བྱད་དངོས་སམ་རི་མོ་བཤམས། །དེ་མཐར་མཆོད་རྫས་སྣ་ཚོགས་ལེགས་པར་བཀྲམས། །གཞན་ཡང་གནོད་སྦྱིན་རྒྱུན་གཏོར་རྒྱས་པའི་དབྱིབས། །གཙོ་འཁོར་དགུ་ལྡན་མཐེབ་ཀྱུ་གསུམ་རིམ་བརྩེགས། །རྒྱན་མཛེས་རྫས་ལྡན་སླར་ཡང་དེ་གསོ་ཕྱིར། །རིལ་བུ་བསུང་བཅད་དཀར་རྫས་སྐྱེམས་དང་བཅས། །རྒབ་འདྲེ་མནན་པའི་ལིང་ག་རང་གཞུང་བཞིན། །མནན་ཐོད་རྫས་བཅས་བསགས་ཤིང་མནན་དོང་བརྐོ། །རྡོ་ཤིང་གཞི་ལ་ཐལ་བའི་ཏྲི་བྲིས་སྟེང་། །མི་གཟུགས་གསེར་གྱི་རྣ་ཆ་རྐེད་གྲི་ཅན། །རི་བོང་ཞོན་སྟེང་སྲེག་བྱ་ལྡིང་བ་ཡི། །གཡས་ཀྱིས་ཕྱག་མ་གཡོན་པས་སྣོད་སྟོང་ཐོགས། །དེ་མཐར་ཡས་ལེན་སྲེག་བྱ་ཞོན་པ་བརྒྱད། །འདོད་པའི་ཡས་བདུན་ཆང་བུ་མཐེབ་ཀྱུར་བཅས། །དར་ཚོན་བལ་ཚོན་ནམ་མཁའ་རྒྱང་བུ་བཙུགས། །འོ་ཞོ་ཆང་ལད་ཐལ་རམ་སྦང་ཕྱེའི་ཟན། །ཡོས་ཆག་སྲེ་ལོང་བཀྲུ་བཤལ་བཟའ་བཏུང་ལྷག །ཟོ་རྐྱལ་ཡོལ་གོ་ལ་སོགས་སྣོད་ཀྱི་རིགས། །གོས་ཆད་ཐག་རུལ་ལྷྭམ་གྲད་རྔ་རྔོག་གླུད། །འགོང་པོའི་ཡས་སྟག་མི་ཁའི་རྫས་ཀྱིས་བསྐོར། །དེ་ཉིད་བསྒྲུབ་པའི་གྲལ་གྱི་མཐའ་རུ་བཞག །གཞན་ཡང་འོ་ཆབ་རྡོ་ཐུན་གུལ་ཡུངས་སོགས། །འོག་ཏུ་དགོས་པའི་ཡོ་བྱད་ཐམས་ཅད་བསགས། །དེ་ནི་སྦྱོར་བ་ཡོ་བྱད་བསགས་པའོ། །གཉིས་པ་དངོས་གཞི་བསྒྲུབ་པའི་རིམ་པ་ནི། །སྐུ་གསུམ་འདུས་པའི་ཐུགས་སྒྲུབ་རྒྱས་བསྡུས་སོགས། །གང་ཡིན་ཕྲིན་ལས་གཞུང་བསྲང་བསྙེན་བསྟོད་རྗེས། །འགུགས་འཆིང་སྡོམ་མྱོས་ལ་སོགས་དམིགས་གནད་དང་། །ལྡན་པས་དམ་སྲི་རྒབ་འདྲེ་ནོན་ངེས་སུ། །མནན་སྟེང་རྡོ་རྗེ་གཞོན་ནུའི་རྟེན་གསུམ་བཞེངས། །དེ་ནས་ལས་བྱེད་མི་འཆི་ཐབ་སྦྱོར་བསྒོམ། །འོ་ཆབ་རྡོ་ཐུན་སྔགས་ཀྱིས་ནུས་ལྡན་བྱ།། ཧཱུྃ་ཧྲཱིཿ སྐུ་གསུམ་ཡེ་ཤེས་སྒྱུ་འཕྲུལ་རྣམ་རོལ་ལས། །རང་རྩལ་མ་འགགས་སྣང་བ་པྲ་ཕབ་བཞིན། །སྐད་ཅིག་དྲན་རྫོགས་ཁྲོ་རྒྱལ་བདུད་རྩི་འཁྱིལ། །ལྗང་ནག་རབ་གཏུམ་མི་བཟད་འབར་བའི་སྐུ། །སྤྱན་གསུམ་མཆེ་གཙིགས་རྫི་སྨིན་མེ་ལྟར་འབར། །དབུ་སྐྲ་དམར་སེར་གྱེན་བརྫིས་རྡོར་ཕྱེད་བརྒྱན། །ཕྱག་གཉིས་རྒྱ་གྲམ་བདུད་རྩིའི་བུམ་པ་བསྣམས། །ཁྲོ་ཆས་ཡོངས་རྫོགས་མེ་ཀློང་པད་ཉིའི་སྟེང་། །བརྐྱང་བསྐུམ་གར་གྱིས་བདུད་སྲིན་འབྱུང་པོ་གནོན། །སྨིན་མཚམས་གློག་འཁྱུག་ཞལ་ནས་ཐོག་སེར་འབེབ། །བགེགས་ཚོགས་མཐར་བྱེད་འཇིགས་པའི་གད་རྒྱངས་སྒྲོགས། །འཁོར་འདས་མཉམ་པར་རོལ་པའི་ཏིང་འཛིན་ཅན། །སྲིད་གསུམ་སྐད་ཅིག་སྒྲོལ་ནུས་མཐུ་ལྡན་གྱུར། །ཨོཾ་བཛྲ་ས་མ་ཡཱ་ཛཿ ཛཿཧཱུྃ་བཾ་ཧོཿ ཏིཥྛ་ལྷནཿ ན་མོ་ན་མཿཧཱུྃ། ཨོཾ་བཛྲ་ཨརྒྷཾ་པཱ་དྱཾ་པུཥྤེ༴སོགས། ཤཔྟ་པཉྩ་བ་ལིངྟ་སརྦ་པཱུ་ཛ་ཁཱ་ཧི། ཧཱུྃ་ཧྲཱིཿ སྐུ་གསུམ་བདེ་གཤེགས་ཕྲིན་ལས་འདུས་པའི་དཔལ། །གཏུམ་ཆེན་རབ་འཇིགས་ཡེ་ཤེས་ཁྲོ་བོའི་རྒྱལ། །བགེགས་ཚོགས་མཐར་བྱེད་ཧཱུྃ་སྒྲའི་གད་རྒྱངས་ཅན། །མི་འཆི་ཐབ་སྦྱོར་ཧེ་རུ་ཀ་དཔལ་བསྟོད། །ཐུགས་ཀར་ཉི་སྟེང་ཧཱུྃ་ལྗང་སྔགས་ཀྱིས་བསྐོར། །འོད་འཕྲོས་བདུད་བགེགས་དམ་སྲི་མཐར་བྱས་ནས། །ཁྲོ་བོ་ཀུན་གྱི་མཐུ་སྟོབས་ནུས་བྱིན་བསྡུས། །སྐུ་དང་ཐུན་རྫས་འོ་ཆབ་རྣམས་ལ་བསྟིམས། །བགེགས་ཚོགས་མཐར་བྱེད་མེ་མཚོན་ཐོག་སེར་དང་། །ཉེས་སྐྱོན་དག་བྱེད་ཡེ་ཤེས་བདུད་རྩིར་གྱུར། །ཨོཾ་བཛྲ་ཀྲོ་དྷ་ཨ་མྲྀ་ཏ་ཀུཎྚ་ལི་ཧ་ན་ཧ་ན་ཧཱུྃ་ཕཊ། ཞེས་བརྒྱའམ་སྟོང་སོགས་བཟླས་ནས་རྡོ་ཐུན་དང་འོ་ཆབ་ལ་ཕུས་བཏབ། དེ་ནས་གླུད་ལ་ཆབ་བྲན་བསངས་སྦྱངས་བྱ། འབྲུ་གསུམ་ནམ་མཁའ་མཛོད་སྔགས་རྒྱས་བྱིན་རླབས། རཾ་ཡཾ་ཁཾ། ཨོཾ་སྭ་བྷ་ཝ༴སོགས། སྟོང་པའི་ངང་ལས་ཏྲཾ་ལས་གླུད་གཏོར་འདོད་པའི་ཡོན་ཏན་ལྔ་དང་ལྡན་པ་བགེགས་ཚོགས་རྣམས་ཚིམ་པར་བྱེད་པའི་ནུས་པ་དང་ལྡན་པར་གྱུར། ཨོཾ་ཨཱཿཧཱུྃ། ལན་གསུམ། ན་མཿསརྦ་ཏ་ཐཱ་ག་ཏ་བྷྱོ༴སོགས། སྭཱ་ཧཱ། ལན་གསུམ། མགྲོན་བཀུགས་ཁ་འབར་སྔགས་རྒྱས་ཚིམ་པར་བསྔོ། ཨོཾ་སརྦ་བྷུ་ཏ་ཨ་ཀརྴ་ཡ་ཛ་ཛཿ ལན་གསུམ། ན་མོ་མཆོག་གསུམ་སྐུ་གསུམ་རྩ་གསུམ་སྤྱི་དང་ཁྱད་པར་དུ་སྐུ་གསུམ་བདེ་གཤེགས་ཞི་ཁྲོ་ཡོངས་རྫོགས་འདུས་པའི་དཀྱིལ་འཁོར་གྱི་ལྷ་ཚོགས་སྤྲུལ་པ་ཡང་སྤྲུལ་བཀའ་སྡོད་ཕྱག་བརྙན་དང་བཅས་པའི་བདེན་པ་དང། སྔགས་དང་ཕྱག་རྒྱ་ཏིང་ངེ་འཛིན་རྣམས་ཀྱི་བདེན་པ་དང་། ཆོས་ཉིད་རྣམ་དག་རྟེན་འབྱུང་རྒྱུ་འབྲས་དང་བཅས་པའི་བདེན་པའི་མཐུས། །འགོང་པོའི་རྒྱལ་པོ་གཞོན་ནུ་དཔལ་ལ་སོགས་པའི་འགོང་པོ་བསེ་རག་གི་སྡེར་གཏོགས་པའི་གནོད་བྱེད་འབྱུང་པོ་ཐམས་ཅད་འདོད་རྫས་གླུད་ཡས་འདི་ཉིད་ལེན་པའི་ཕྱིར་དུ་འདིར་མཆིས་པར་གྱུར་ཅིག ཨོཾ་ཊཀྐི་ཧཱུྃ་ཛཿ ཏྲི་བཛྲ་ཨངྐུ་ཤ་ཡ་ཛཿ ཛཿཧཱུྃ་བཾ་ཧོ། ཞེས་བརྗོད། ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སམྦྷ་ར་སམྦྷ་ར་ཧཱུྃ། བདུན་ནམ་ཉེར་གཅིག་སོགས་ཀྱིས་མཆོག་སྦྱིན་སེ་གོལ་དང་བཅས་པས་བསྔོས་ལ། མཚན་བཞི་བརྗོད་ཅིང་བདེན་སྟོབས་སྨོན་ལམ་གདབ། དེ་བཞིན་གཤེགས་པ་རིན་ཆེན་མིང་ལ༴སོགས་དང་། ན་མོ་བདག་གི་བསམ་པའི༴སོགས་བརྗོད། ཧཱུྃ་ཧྲཱིཿ སྐུ་གསུམ་བདེ་གཤེགས་ཡོངས་རྫོགས་འདུས་པའི་བཀའ། །ཉོན་ཅིག་སྲིད་གསུམ་དབུལ་འདྲེ་འབྱུང་པོའི་ཚོགས། །མི་ལ་བསེ་རག་རྒྱལ་པོ་གཞོན་ནུ་དཔལ། །འགོང་པོ་སྤུན་དགུ་ཕོངས་བྱེད་སྡེ་རིགས་དཔུང་། །ཚེ་རབས་ལས་ཀྱིས་བསྐྱེད་པའི་ལེན་ཆགས་དང་། །གནས་སྐབས་རྐྱེན་གྱིས་བསྒྱུར་བའི་བགེགས་ཚོགས་ལ། །རྨད་དུ་བྱུང་བ་འདོད་ཡོན་ཡས་སྟག་བདུན། །ལོངས་སྤྱོད་ཀུན་འབྱུང་ཆང་བུ་མཐེབ་ཀྱུར་བཅས། །ནམ་མཁའ་རྒྱངས་བུ་དར་ཚོན་བལ་ཚོན་སོགས། །རང་རང་ཡིད་མཐུན་གླུད་ཡས་རྫས་བསགས་ཏེ། །ཏིང་འཛིན་སྔགས་དང་ཕྱག་རྒྱས་རབ་སྤེལ་ཞིང་། །མི་ཟད་གཏེར་དུ་བྱིན་གྱིས་བརླབས་ནས་འབུལ། །ལྟོག་འགོང་དབུལ་འདྲེ་སྡེ་དཔུང་སྡོང་ཟླར་བཅས། །ཚིམ་པར་གྱིས་ལ་ལྕགས་རིའི་ཕ་མཐར་དེངས། །གལ་ཏེ་མི་འགྲོ་གནོད་ཅིང་འཚེ་བྱེད་ན། །ཡེ་ཤེས་རོལ་པའི་ཁྲོ་མཚོན་མེ་དཔུང་གིས། །ལུས་སེམས་རྡུལ་དུ་བརླག་པར་གདོན་མི་ཟ། །དེ་བས་མ་འདུག་མྱུར་དུ་ཕྱིར་དེངས་ཤིག །ན་མོ་མཆོག་གསུམ༴སོགས། འབྱུང་པོ་ཐམས་ཅད་འདོད་ཡོན་གླུད་ཀྱི་གཏོར་མ་རྒྱ་ཆེན་པོ་བྱིན་པ་འདིས་ཚིམ་ཞིང་མགུ་བར་གྱིས་ལ་འཇིག་རྟེན་གྱི་ཁམས་འདིར་མ་གནས་པར་ཕྱིར་དེངས་ཤིག ཅི་སྟེ་མི་འགྲོ་བར་གྱུར་ན་ཡེ་ཤེས་ཀྱི་ཁྲོ་རྒྱལ་ཆེན་པོ་བདུད་རྩི་འཁྱིལ་བའི་ཚོགས་རབ་ཏུ་སྤྲོས་ནས་བགེགས་ཁྱེད་རྣམས་ཀྱི་ལུས་སེམས་རྡུལ་དུ་བརླག་པར་འགྱུར་ཏ་རེ། འཁྱིལ་བའི་སྔགས་སོགས་བརྗོད་ཅིང་ཡུངས་དཀར་དང་། །རྡོ་ཐུན་བྲབ་ལ་འདྲེ་འཇིགས་དུད་པ་བདུག །རོལ་མོ་དྲག་ཏུ་འཁྲོལ་རྗེས་འོ་ཆབ་ཀྱིས། །བདག་གནས་ཡོ་བྱད་ཀུན་ལ་བསང་གཏོར་བྱ། །དེ་རྗེས་བསྲུང་བའི་འཁོར་ལོ་བསྒོམ་པ་ནི།། ཧཱུྃ་ཧྲཱིཿ ཕྱི་སྣོད་གཞལ་ཡས་ནང་བཅུད་སྐུ་གསུམ་ལྷ། །ཕྱོགས་མཚམས་ཁྲོ་བོ་མཚོན་ཆ་མེ་གུར་འཁྲིགས། །བསྲུང་བྱེད་མཚམས་ཀྱི་དཀྱིལ་འཁོར་ལྷུན་གྱིས་གྲུབ། །བསྐལ་པའི་བར་དུ་སྲ་མཁྲེགས་བརྟན་པར་གྱུར། ཨོཾ་བཛྲ་ཙཀྲ་རཀྵ་རཀྵ་ཧཱུྃ་བྷྲཱུཾ། དེ་ནས་གཡང་གི་དཀྱིལ་འཁོར་སྟེང་། །གཡང་གཏོར་ལྷ་རུ་གསལ་བ་ནི།། ཧཱུྃ་ཧྲཱིཿ སྐུ་གསུམ་བདེ་གཤེགས་ཡེ་ཤེས་ཀློང་ཡངས་ནས། །ཐུགས་རྗེས་ཐབས་མཁས་སྤྲུལ་བསྒྱུར་ཅིར་ཡང་འགྱེད། །རང་མདུན་གཡང་རྫས་དཀྱིལ་འཁོར་གཏོར་མ་བཅས། །དངོས་འཛིན་མཚན་རྟོག་དམིགས་མེད་དབྱིངས་སུ་སྦྱངས། །སྟོང་གསལ་ངང་མདངས་མཁའ་ལ་འཇའ་ཚོན་བཞིན། །བསྲུང་འཁོར་དབུས་སུ་འབྱུང་བ་རིམ་བརྩེགས་སྟེང་། །གླིང་བཞི་རིར་བཅས་སྲིད་གསུམ་དཔལ་ཡོན་རྫོགས། །དེ་སྟེང་བྷྲཱུཾ་ལས་རིན་ཆེན་གཞལ་མེད་ཁང་། །རཏྣའི་ཀ་ཆེན་སྟོང་ཕྲག་བརྒྱད་བརྒྱ་དང་། །ཀ་ཕྲན་དཔག་མེད་རིན་ཆེན་ཀ་ཞུ་དང་། །གདུང་རིང་གདུང་ཕྲན་ཐོག་ཕུབ་ཏོག་དང་བཅས། །རྩིགས་པ་འདོད་སྣམ་ཕ་གུ་དྲ་བ་དང་། །དྲ་ཕྱེད་མདའ་ཡབ་གློ་འབུར་རྟ་བབས་དང་། །རི་དྭགས་ཆོས་འཁོར་གདུགས་དང་རྒྱལ་མཚན་སོགས། །བློ་ལྡན་འབུམ་གྱིས་གཞལ་བར་མི་ནུས་པའི། །ཚད་དང་མཚན་ཉིད་རྒྱན་དང་བཀོད་པ་རྫོགས། །འོག་ཕྱོགས་གཏེར་གྱི་ཁང་པ་དྲུག་ཅུ་དང་། །རིན་པོ་ཆེ་ཡི་མཛོད་མིག་གྲངས་མང་བཅས། །ཕྱི་རོལ་གཏེར་གྱི་བུམ་བཟང་དཔག་བསམ་ཤིང་། །རིན་ཆེན་ལྗོན་ཤིང་ཁྲུས་ཀྱི་རྫིང་བུ་དང་། །མ་རྨོས་འཁྲུངས་པའི་ལོ་ཏོག་འདོད་འཇོའི་བ། །སྐྱེད་མོས་ཚལ་དང་ལྷ་ཡི་ཁང་བཟང་རྣམས། །བརྒྱད་བརྒྱད་སྤེལ་མར་གནས་པས་རབ་ཏུ་མཛེས། །དེ་རྒྱབ་རིམ་གསུམ་འཁོར་ས་དང་པོ་ལ། །ཕྱོགས་དང་མཚམས་སུ་རིན་ཆེན་ཁང་བཟང་བརྒྱད། །སོ་སོར་དཔལ་ཡོན་རྒྱན་དང་བཀོད་པས་མཛེས། །འཁོར་ས་ཐམས་ཅད་གནས་ཁང་ཡོ་བྱད་སོགས། །ཕུན་སུམ་ཚོགས་པའི་ལོངས་སྤྱོད་རྒྱན་གྱིས་མཛེས། །གཞལ་མེད་ཁང་དབུས་ཆུ་སྐྱེས་འབུམ་བརྡལ་སྟེང་། །ཟླ་དཀྱིལ་རྒྱང་གྲགས་ལྔ་བཅུ་ཁྱབ་པས་མཛེས། །དེ་དབུས་མི་འཇིགས་སེང་གེ་དཀར་མོ་ནི། །བརྟན་བརྗིད་རྩལ་རྫོགས་གཡུ་རལ་རྒྱས་པའི་སྟེང་། །གསེར་མདོག་བཻ་ཡིག་འོད་ཀྱི་སྤྲོ་བསྡུ་ལས། །ཡིད་བཞིན་གཏེར་གྱི་བདག་པོ་རྣམ་ཐོས་སྲས། །བཙོ་མ་གསེར་གྱི་བེར་གསོལ་རྒྱན་མང་མཛེས། །མཐོན་མཐིང་ལྕང་ལོ་ཕྱེད་བཅིང་ཟུར་ཕུད་སྟེང་། །རིན་ཐང་གཞལ་མེད་རཏྣའི་པྲོག་ཞུ་གསོལ། །མི་མཐུན་ཕྱོགས་ལས་རྣམ་རྒྱལ་མཚན་རྟགས་དང་། །འདོད་འབྱུང་ནོར་བུ་སྐྱུག་པའི་ནེའུ་ལེ་བསྣམས། །ཞབས་གཉིས་སག་ལྷྭམ་རྒྱལ་ཆེན་རོལ་སྟབས་འགྱིང་། །མདུན་དུ་གཡང་གི་ལྷ་མོ་ནོར་རྒྱུན་མ། །ཕྱག་གཉིས་མཆོག་སྦྱིན་འབྲས་ཀྱི་སྙེ་མ་བསྣམས། །གཡས་སུ་ཆོས་སྤེལ་ལྷ་མོ་གཡང་ལྡན་མ། །ཕྱག་གཉིས་བཻཌཱུར་རྒྱུད་མང་ཆོས་སྒྲ་སྒྲོགས། །གཡོན་དུ་སྲིད་སྤེལ་གནོད་སྦྱིན་དཔལ་ཆེན་མོ། །ཕྱག་གཉིས་ནོར་བུའི་སྙེ་མ་ནེའུ་ལེ་འཛིན། །རྒྱབ་ཏུ་གཡང་སྤེལ་ཀླུ་མོ་དུང་སྐྱོང་མ། །ཕྱག་གཉིས་ཐལ་སྦྱར་ཀླུ་ཡི་ནོར་བུ་འཛིན། །བཞི་ཀ་གསེར་མདོག་སྣ་ཚོགས་དར་གོས་གསོལ། །ལྷ་ཀླུ་གནོད་སྦྱིན་རིན་ཆེན་རྒྱན་གྱིས་མཛེས། །གསུམ་ནི་པད་ཟླར་སྐྱིལ་ཀྲུང་ཕྱེད་པའི་སྟབས། །གཅིག་ནི་སྦྲུལ་མཇུག་རྫིང་བུའི་པདྨར་འཁྱིལ། །མདུན་གཡས་ཕྱུག་ལྷ་ལྗང་གུ་ཟས་གཞོང་ཐོགས། །མདུན་གཡོན་ཛི་ན་ཤར་བྷ་ནོར་བུ་སེར། །གཉིས་ཀ་སྣ་ཚོགས་དར་དང་རིན་ཆེན་སྤྲས། །པད་ཟླའི་གདན་ལ་ཕྱེད་སྐྱིལ་གར་གྱིས་བཞུགས། །དེ་རྒྱབ་ཕྱོགས་མཚམས་བརྒྱད་ཀྱི་ཁང་བཟང་ལ། །ཤར་ནས་བརྩམས་ཏེ་གཡས་སྐོར་རིམ་པ་བཞིན། །ཛཾ་སཾ་པཾ་གཾ་མཾ་པཾ་ཀཾ་པཾ་ལས། །ཛཾ་བྷ་ལ་ནི་གསེར་མདོག་རིན་ཆེན་བུམ། །ཡང་དག་ཤེས་སེར་རལ་གྲི་འབར་བ་བསྣམས། །གང་བཟང་གསེར་མདོག་རིན་ཆེན་བུམ་པ་འཛིན། །འབྲོག་གནས་ནག་པོ་རིན་ཆེན་མདུང་དམར་བསྣམས། །ནོར་བུ་བཟང་པོ་དཀར་པོ་ནོར་བུ་འཛིན། །ལྔས་རྩེན་སེར་སྐྱ་རིན་ཆེན་ཁང་བརྩེགས་བསྣམས། །ཀུ་བེ་ར་ནི་མདོག་ནག་རལ་གྲི་འཛིན། །པི་ཙི་ཀུཎྚ་ལི་དཀར་གྲི་ཕུབ་ཅན། །ཀུན་ཀྱང་གཡོན་པ་གཏེར་གྱི་ནེའུ་ལེ་བསྣམས། །རང་མདོག་རྟར་ཞོན་དཔའ་ཆས་གོ་ཁྲབ་བརྗིད། །སོ་སོའི་བཙུན་མོ་སྲས་བློན་འཁོར་ཚོགས་བཅས། །འཁོར་ས་གཉིས་པར་མཐའ་ཡས་ནོར་རྒྱས་བུ། །འཇོག་པོ་སྟོབས་རྒྱུ་པདྨ་པད་ཆེན་དང་། །དུང་སྐྱོང་རིག་ལྡན་ལ་སོགས་ཀླུ་ཆེན་རྣམས། །ཀླུ་ཕྲན་འབུམ་སྡེ་རང་རང་འཁོར་ཚོགས་བཅས། །འཁོར་ས་ཐ་མར་ལྷ་སྲིན་སྡེ་བརྒྱད་པོ། །སྐུ་མདོག་མ་ངེས་མཚོན་ཆ་སྣ་ཚོགས་འཛིན། །དེད་དཔོན་ཉེར་བརྒྱད་དམར་ནག་གྲི་ཕུབ་བསྣམས། །སྟོབས་ཆེན་སོ་གཉིས་ལྗང་ནག་མདུང་གྲི་འཕྱར། །ཀུན་གྱི་གཡོན་ན་ནེའུ་ལེ་དཔའ་བོའི་ཆས། །རང་རང་འཁོར་ཚོགས་དཔག་མེད་དང་བཅས་གསལ། །བདག་ཉིད་ཐུགས་སྲོག་ཧཱུྃ་ལས་འོད་འཕྲོས་པའི། །སྣ་ལ་ཁྲོ་བོ་འདོད་པའི་རྒྱལ་པོ་སྤྲོས། །ལྕགས་ཀྱུ་ཞགས་པའི་ཕྱག་རྒྱས་སོ་སོ་ཡི། །སྔོན་གྱི་ཐུགས་དམ་གཉན་པོ་རྗེས་དགོངས་ནས། །རྒྱལ་ཆེན་བཙུན་མོ་སྲས་འཁོར་སྤྲུལ་པར་བཅས། །ཐོགས་པ་མེད་པར་མདུན་དུ་སྤྱན་དྲངས་བསམ། །མཛེས་པའི་དར་ཕྱར་སྙན་པའི་དུང་འབུད་ཅིང་། །སྤོས་རོལ་དབྱངས་དང་བཅས་པས་འདི་སྐད་དོ།། ཧཱུྃ་བཻ། རིན་ཆེན་མང་སྤྲུལ་རྒྱལ་ཆེན་རྣམ་ཐོས་སྲས། །སྲིད་གསུམ་དབུལ་སེལ་ས་བརྒྱད་རྣམ་ཐོས་སྲས། །ཐུགས་རྗེ་ཐུགས་དམ་གཉན་པོ་རྗེས་དགོངས་ལ། །སྒྲུབ་པའི་གནས་འདིར་སྤྱན་འདྲེན་གཤེགས་སུ་གསོལ། །ད་ལྟ་སྙིགས་མ་ལས་ཀྱང་ཆེར་སྙིགས་དུས། །འགྲོ་ཀུན་དུག་ལྔའི་བསམ་སྤྱོད་འཇོལ་ཉོག་སྤྱོད། །རྐྱེན་དེའི་དབང་གིས་ཕྱྭ་གཡང་དཔལ་འབྱོར་རྒུད། །དབུལ་བཀྲེས་སྐོམ་འཁྱག་གདུང་བ་བསམ་མི་ཁྱབ། །ནོར་བདག་སྐྱེས་བུ་ཆེན་པོ་ཁྱོད་ལྟ་བུ། །གཤེགས་ཤིང་བྱོན་པའི་གནས་བཟང་མ་ལགས་ཀྱང་། །ཐུགས་བསྐྱེད་ཞལ་བཞེས་ཡལ་བར་མི་འདོར་ཕྱིར། །བསྟན་པ་བསྲུང་དང་འགྲོ་ལ་ཕན་གདག་སླད། །ཕྱྭ་གཡང་དངོས་གྲུབ་བསྒྲུབ་པའི་དཀྱིལ་འཁོར་འདིར། །གཤེགས་ནས་རྣལ་འབྱོར་བསམ་པ་བསྒྲུབ་ཏུ་གསོལ། །ཡེ་ཤེས་གཅིག་ལས་གང་འདུལ་རོལ་པའི་གར། །གནོད་སྦྱིན་གཏེར་གྱི་བདག་པོ་རིགས་ཆེན་བརྒྱད། །ཐུགས་ཀྱི་དགྱེས་སྡེ་བཞི་དང་སྲས་མཆོག་བཞི། །རང་རང་ཕྲིན་ལས་སྒྲུབ་ཕྱིར་གཤེགས་སུ་གསོལ། །གེགས་ཞི་ཚེ་འཕེལ་ལོངས་སྤྱོད་རྒྱས་པ་དང་། །མོས་ཚོགས་དབང་བསྡུད་ཞིང་བཅུ་སྒྲོལ་བའི་ཕྱིར། །འཁོར་ས་དང་པོར་བཞུགས་པའི་རྟ་བདག་བརྒྱད། །བསྒྲུབ་པའི་གནས་འདིར་སྤྱན་འདྲེན་གཤེགས་སུ་གསོལ། །ལོངས་སྤྱོད་ཕྱྭ་གཡང་དངོས་གྲུབ་སྩོལ་བ་དང་། །ལས་བཞི་གང་བརྩམ་ཐོགས་མེད་སྒྲུབ་པའི་ཕྱིར། །འཁོར་ས་བར་མར་གནས་པའི་ཀླུ་ཆེན་བརྒྱད། །ཀླུ་ཕྲན་འབུམ་དང་བཅས་ཏེ་འདིར་སྤྱོན་ཅིག །འཁོར་ས་ཐ་མར་ལྷ་སྲིན་སྡེ་བརྒྱད་དང་། །དེད་དཔོན་ཉེར་བརྒྱད་སྟོབས་ཆེན་སུམ་ཅུ་གཉིས། །སྤྲུལ་འཁོར་གནོད་སྦྱིན་བྱེ་བ་འབུམ་འབུམ་སོགས། །རབ་འབྱམས་ཕྲིན་ལས་བསྒྲུབ་ཕྱིར་གཤེགས་སུ་གསོལ། །མདོར་ན་ཡེ་ཤེས་ལས་དང་འཇིག་རྟེན་གྱི། །ནོར་ལྷ་གཡང་ལྷ་ཟས་གོས་ལོངས་སྤྱོད་ལྷ། །བྱང་ཕྱོགས་གནོད་སྦྱིན་གནས་སུ་བཞུགས་སོ་ཅོག །མ་ལུས་འཁོར་དང་བཅས་ཏེ་གཤེགས་སུ་གསོལ། །ཨོཾ་བཻ་ཤྲཱ་མ་ཎ་སརྦ་ས་པཱ་རི་ཝ་ར་ཨེ་ཧྱ་ཧི་བཛྲ་ས་མ་ཡཱ་ཛ་ཛཿཧཱུྃ་བཾ་ཧོཿ ཞེས་པས་སྤྱན་དྲངས་རྗེས་སུ་འབྲང་བའི་བགེགས། །བསྐྲད་ཕྱིར་ཐུན་བྲབ་དྲག་པོའི་རོལ་མོ་བྱ།། ཨོཾ་བཛྲ་ཀྲོ་དྷ་ཨ་མྲྀ་ཏ་ཀུཎྚ་ལི་ཧ་ན་ཧ་ན་ཧཱུྃ་ཕཊ། ཨོཾ་བཛྲ་ཡཀྴ་ཀྲོ་དྷ་ཛྭ་ལ་རཾ་ཛྭ་ལ་རཾ་ཕཊ་རཾ་ཕཊ་རཾ། ཞེས་སོགས་དྲག་སྔགས་མང་དུ་བརྗོད་བྱས་ལ། །རཀྵའི་སྔགས་ཀྱིས་བསྲུང་འཁོར་ཡང་གསལ་གདབ། །དེ་འཕྲལ་བརྟན་བཞུགས་བྱིན་རླབས་དབང་བསྐུར་བྱ།། ཧཱུྃ་བཻ། བདེ་གཤེགས་རིན་ཆེན་མང་སྤྲུལ་གནོད་སྦྱིན་དབང་། །མགོན་པོ་གནས་བསྲུང་ནོར་མང་རྣམ་ཐོས་སྲས། །བཙུན་མོ་སྲས་དང་བཀའ་འཁོར་སྤྲུལ་པར་བཅས། །དམ་ཡེ་དབྱེར་མེད་བརྟན་པར་བཞུགས་སུ་གསོལ། །བཛྲ་ས་མ་ཡཱ་ཏིཥྛནྟུ། ཨོཾ་བཻ་ཤྲ་མ་ཎ་ཡེ་སྭཱ་ཧཱ། ཨོཾ་བཻ་སྭཱ་ཧཱ། བཻ།རིང་མིག་འཛུམ་སོ་གཉིས་ཡུན་ཙམ་བརྗོད། ནོར་བདག་ཐུགས་ཀར་པདྨ་འདབ་བརྒྱད་པའི། །འདབ་མ་རེ་རེར་བཻ་ཡིག་བཞི་བཞིར་ལྡན། །བདག་མདུན་ཐུགས་ཀའི་འོད་ཟེར་ལྕགས་ཀྱུས་སྦྲེལ། །འཕྲོས་པའི་འོད་ཀྱིས་སྐུ་གསུམ་ལྷ་ཚོགས་བསྐུལ། །དབང་ལྷས་དབང་བསྐུར་རིན་འབྱུང་དབུ་བརྒྱན་ཅིང་། །གནས་གསུམ་རྡོ་རྗེའི་ཡི་གེས་མཚན་པར་གྱུར། །ཨོཾ་རཏྣ་མུ་ཀུ་ཊ་ཨ་བྷི་ཥིཉྩ་མཾ། ཨོཾ་ཨཱཿཧཱུྃ། མཆོད་རྫས་བསང་སྦྱངས་བྱིན་གྱིས་བརླབས་བྱས་ནས། །ནོར་ལྷ་འཁོར་དང་བཅས་ལ་འབུལ་བ་ནི། །ཞེས་པས་བྱིན་གྱིས་བརླབས་ལ། ཀུཎྚ་ལིས་བསངས། སྭ་བྷ་ཝས་སྦྱངས། སྟོང་པའི་ངང་ལས་ཨོཾ་ལས་རིན་པོ་ཆེའི་སྣོད་ཀྱི་ནང་དུ་ཨོཾ་ཨཱཿཧཱུྃ་གསུམ་འོད་དུ་ཞུ་བ་ལས་བྱུང་བའི་ལྷ་རྫས་མཆོད་པའི་བྱེ་བྲག་དཔག་ཏུ་མེད་པ་སྲིད་ཁམས་ཡོངས་སུ་གང་ཞིང་དཔལ་ཡོན་ཕུན་སུམ་ཚོགས་པར་གྱུར། ཨོཾ་བཛྲ་ཨརྒྷཾ་པདྱཱཾ༴སོགས། ཤཔྟ་སརྦ་པཱུ་ཛ་ས་མ་ཡ་ཨཱཿཧཱུྃ། ཧཱུྃ་བཻ། རབ་འབྱམས་ཕྱོགས་བཅུའི་འཇིག་རྟེན་ཐམས་ཅད་ན། །ལྷ་རྫས་མཆོད་པའི་བྱེ་བྲག་རྨད་བྱུང་བ། །དྭངས་ཤིང་ཡིད་འོང་དྲི་མེད་མཆོད་ཡོན་རྒྱུན། །ཡན་ལག་བརྒྱད་ལྡན་ཞབས་བསིལ་ཁྲུས་ཀྱི་རྫིང་། །ཆུ་དང་ཐང་སྐྱེས་ཡིད་བྱུང་མེ་ཏོག་ཚོགས། །ལྷན་སྐྱེས་གཙང་སྦྱར་དྲི་ཞིམ་སྤོས་ཀྱི་སྤྲིན། །ཉི་ཟླ་ནོར་བུ་སྣང་བྱེད་སྒྲོན་མེའི་འོད། །དྲི་ཞིམ་ངད་ལྡན་གདུང་སེལ་ལྷ་ཡི་ཆབ། །རོ་མཆོག་བརྒྱ་ལྡན་བཟའ་བཅའ་བལྡག་གཞིབ་ཟས། །སྙན་འཇེབས་སྒྲ་དབྱངས་རོལ་མོ་སྣ་ཚོགས་དང་། །འདོད་ཡོན་རྒྱལ་སྲིད་རིན་ཆེན་རྫས་རྟགས་རིགས། །དཔག་བསམ་སྐྱེད་ཚལ་ཅང་ཤེས་འདོད་འཇོའི་བ། །མ་རྨོས་ལོ་ཏོག་གཏེར་བུམ་ནོར་བུའི་མཛོད། །གོས་སྔོན་ལུང་ཐང་ཕྲེང་བ་སྨན་སྤོས་དྲི། །འབྲུ་སྣ་སྙིང་པོ་འབྲས་བུ་དམ་རྫས་སོགས། །རྒྱལ་ཆེན་རྣམ་སྲས་འཁོར་བཅས་དགྱེས་སྐོང་སྤྲིན། །མ་ཚངས་མེད་པའི་མཆོད་བརྟེན་སྒྲུབ་རྫས་ཚོགས། །གུས་པས་འབུལ་ལོ་དགྱེས་བཞེས་དངོས་གྲུབ་སྩོལ། །ཨོཾ་བཻ་ཤྲ་མ་ཎ་སརྦ་ས་པཱ་རི་ཝ་ར་བཛྲ་ཨརྒྷཾ་པདྱཱཾ༴སོགས། ཤཔྟ་མ་ཧཱ་སརྦ་པཱུ་ཛ་མེ་གྷ་ས་མུ་ཏྲ་སྥ་ར་ཎ་ས་མ་ཡེ་ཨཱཿཧཱུྃ། མ་ཧཱ་ཛྙཱ་ན་ཨ་མྲྀ་ཏ་ས་མ་ཡཱ་སརྦ་པཱུ་ཛ་བྷ་ལིངྟ་ཁཱ་ཧི། ཨ་མྲྀ་ཏ་པཱུ་ཛ་ས་མ་ཡཱ་ཨོཾ་ཨཱཿཧཱུྃ། ཞེས་མཆོད་བརྗིད་པའི་དབྱངས་བཅས་འདི་སྐད་དོ།། ཧཱུྃ་བཻ། དཔལ་ལྡན་ཞིང་གི་སྟོན་མཆོག་རིན་ཆེན་མིང་། །མཁའ་མཉམ་འགྲོ་བའི་དབུལ་ཕོངས་རྒུད་པ་ཀུན། །སེལ་ཕྱིར་ནོར་མང་རྒྱལ་པོའི་སྐུར་སྤྲུལ་པ། །ས་བརྒྱད་དབང་ཕྱུག་གནས་སྲུང་མགོན་པོར་བསྟོད། །སྲིད་སྐྱོན་ལས་འདས་གེ་སར་སྙིང་པོའི་དབུས། །འཇིགས་ཚོགས་ཀུན་བྲལ་གདོང་ལྔའི་དབང་པོའི་སྟེང་། །ཉི་གཞོན་འབུམ་ལས་ལྷག་པའི་གཟི་བྱིན་ཅན། །ངལ་གསོའི་དགེ་བ་སྟོབས་པོ་ཆེ་ལ་བསྟོད། །ཕྱག་གཡས་རྒྱལ་མཚན་འཁོར་གྱི་འཁུ་ལྡོག་འཇོམས། །གཡོན་པས་ནེའུ་ལེས་འགྲོ་བའི་དབུལ་བ་སེལ། །རིན་ཆེན་པྲོག་ཞུས་མངོན་མཐོའི་དཔལ་ཡོན་སྩོལ། །འདོད་འབྱུང་གཏེར་གྱི་བདག་པོ་ཁྱོད་ལ་བསྟོད། །དཔལ་ཆེན་མོ་སོགས་དགྱེས་སྐོང་བཙུན་མོ་བཞི། །གར་མཁན་མཆོག་སོགས་སྤྲུལ་པའི་སྲས་པོ་བཞི། །ཛཾ་བྷ་ལ་སོགས་རྟ་བདག་གནོད་སྦྱིན་བརྒྱད། །མཐའ་ཡས་ལ་སོགས་ཀླུ་ཆེན་བརྒྱད་རྣམས་བསྟོད། །གཞན་ཡང་དྲེགས་པ་སྡེ་བརྒྱད་ནོར་ལྷའི་ཚོགས། །དེད་དཔོན་ཉེར་བརྒྱད་སྟོབས་ཆེན་སུམ་ཅུ་གཉིས། །གནོད་སྦྱིན་བྱེ་བ་བདུན་འབུམ་ལ་སོགས་པ། །ཡེ་ཤེས་འཇིག་རྟེན་ནོར་ལྷའི་ཚོགས་ཀུན་བསྟོད། །མི་མཐུན་འཇིགས་ཚོགས་བྲེལ་ཕོངས་དབུལ་བ་སོལ། །ཚེ་བསོད་དཔལ་འབྱོར་སྟོབས་རྩལ་སྙན་གྲགས་སྤེལ། །སྲིད་ཆོས་མོས་བཞི་སྣང་བ་དབང་དུ་བསྡུས། །རྒབ་འདྲེ་བསེ་རག་ཕུང་བྱེད་རྡུལ་དུ་རློགས། །སྲིད་ཞིའི་ཕྱྭ་གཡང་ལེགས་ཚོགས་ཡོན་ཏན་ཀུན། །འབད་མེད་ལྷུན་གྱིས་གྲུབ་པའི་དངོས་གྲུབ་སྩོལ། །ཞེས་བསྟོད་བཟླས་དམིགས་གསལ་གདབ་འདི་ལྟར་བཟླ།། ནོར་ལྷའི་ཐུགས་ཀར་ཉི་སྟེང་བཻ་གསེར་མདོག །བཟླ་བྱའི་སྔགས་ཀྱིས་གཡས་སུ་བསྐོར་བར་བསམ། །བདག་བསྐྱེད་ཐུགས་ཀའི་འོད་འཕྲོས་དེར་ཕོག་པས། །འཁོར་བཅས་ཐུགས་དམ་ཞལ་བཞེས་རྗེས་དགོངས་ནས། །འཁོར་རྣམས་ཀུན་གྱིས་གང་བཅོལ་ལས་བསྒྲུབ་ཕྱིར། །གཙོ་བོས་ཕྱྭ་གཡང་དངོས་གྲུབ་ཀུན་བསྩལ་དམིགས།། ཨོཾ་བཻ་སྭཱ་ཧཱ། ཉེ་སྙིང་ངོ།། ཨོཾ་བཻ་ཤྲ་མ་ཎ་ཡེ་སྭཱ་ཧཱ། སྙིང་པོའོ།། ཨོཾ་བཻ་ཤྲ་མ་ཎ་ཡེ་མ་ཧཱ་ཡཀྴ་སརྦ་ས་མ་ཡ་ཙིཏྟ་ཧྲིང་ཧྲིང་ཛ་ཛཿསིདྡྷི་ཕ་ལ་ཧཱུྃ་བྷྲཱུྃཿ རྩ་སྔགས་སོ།། ཨོཾ་ཛཾ་བྷ་ལ་ཡེ་སྭཱ་ཧཱ། ཨོཾ་སཾ་པྲ་ཛྙཱ་ན་ཡེ་སྭཱ་ཧཱ། ཨོཾ་པུརྞ་བྷ་དྲ་ཡེ་སྭཱ་ཧཱ། ཨོཾ་གུ་ཧྱ་སྠ་ན་ཡེ་སྭཱ་ཧཱ། ཨོཾ་མ་ཎི་བྷ་དྲ་ཡེ་སྭཱ་ཧཱ། ཨོཾ་པཉྩི་ཀ་ཡེ་སྭཱ་ཧཱ། ཨོཾ་ཀུ་བཻ་ར་ཡེ་སྭཱ་ཧཱ། ཨོཾ་པི་ཙི་ཀུཎྚ་ལི་ཡེ་སྭཱ་ཧཱ། འཁོར་གནོད་སྦྱིན་བརྒྱད་ཀྱི་སྔགས་སོ།། ན་མོ་རཏྣ་དྲ་ཡཱ་ཡ། ཏདྱཐཱ། སི་མི་སི་མི། སུ་མུ་སུ་མུ། ཙནྡྷ་ཙནྡྷ། ས་ར་ས་ར། ཀ་ར་ཀ་ར། ཀི་ལི་ཀི་ལི། ཀུ་རུ་ཀུ་རུ། མུ་རུ་མུ་རུ། ཙུ་རུ་ཙུ་རུ། ས་དཱ་ཡ་ཨཏྨ་ན་ནི་ཏྱ་ན་ཙན་དཱ་དྷུ་སྭཱ་ཧཱ། དཱ་ན་དྷ་ཡེ་སྭཱ་ཧཱ། ན་མོ་ར་ཐ་ན་པ་རི་པཱུ་ར་ཡ་སྭཱ་ཧཱ། མ་ཧཱ་པུཎྱེ་ཛྙ་ན་པུཥྚཾ་ཀུ་རུ་ཧཱུྃ་བྷྲུཾ། ནོར་ལྷ་སྤྱིའི་སྔགས་སོ།། ཨོཾ་བཛྲ་ཡཀྴ་ཀྲོ་དྷ་ཛྭ་ལ་རཾ་ཛྭ་ལ་རཾ་ཕཊ་རཾ་ཕཊ་རཾ། ལས་སྦྱོར་གྱི་སྔགས་སོ།། དེ་ནས་དམ་རྫས་གཏོར་མ་འབུལ་བ་ནི། རྒྱས་གཏོར་དཀར་མངར་རྒྱན་གྱིས་མཛེས་པ་བཤམས། འཁྱིལ་བའི་སྔགས་ཀྱིས་བསངས་ཤིང་སྭ་བྷས་སྦྱངས། སྟོང་པའི་ངང་ལས་རིན་ཆེན་སྣོད་ཡངས་པར། །རིན་ཆེན་སྨན་སྤོས་འབྲུ་སྙིང་རྩི་བཅུད་དྲི། །ལེགས་པར་སྦྱར་བའི་དམ་རྫས་གཏོར་ཆེན་པོ། །འབྲུ་གསུམ་སྔགས་ཀྱིས་སྦྱངས་སྤེལ་བདུད་རྩིར་བསྒྱུར། །ཞེས་བསམ། ཨོཾ་ཨཱཿཧཱུྃ་ཞེས་ལན་གསུམ་བརྗོད། ནོར་ལྷ་འཁོར་བཅས་ལྗགས་ཀྱི་སྦུ་གུ་ཡིས། །གཏོར་མའི་བཅུད་རྣམས་དྲངས་ཤིང་གསོལ་བ་ཡིས། །དགྱེས་ཤིང་ཚིམ་ནས་ཚེ་ཆོས་སྲིད་ནོར་བཞིའི། །ཕྱྭ་གཡང་དངོས་གྲུབ་མ་ལུས་བསྩལ་བར་མོས། །ཨོཾ་བཻ་ཤྲ་མ་ཎ་ཡེ་ན་མཿསརྦ་ཏ་ཐཱ་ག་ཏ་བྷྱོཿ༴སོགས། ཁཾ་སྭཱ་ཧཱ། ལན་བདུན། ཨོཾ་ཙ་ཏུར་བཱ་སུ་དྷེ་ཝཱི་ཙ་ཏུར་ཡཀྴ་པུ་དྲ་ཡེ་ཨ་ཀ་རོ༴སོགས། ཕཊ་སྭཱ་ཧཱ། ལྔ། ཨོཾ་ཨཥྚ་ན་ག་ཤ་ཏ་ས་ཧ་པྲ་ཀོ་ཊི་ཡཀྵ་རཀྵ་ས་ཨེ་དཾ་བྷ་ལིང་ཏ་གྷྲྀ་ཧྞནྟུ་ས་མ་ཡ་རཀྵནྟུ་མ་མ་སརྦ་སིདྡྷི་མྨེ་པྲ་ཡཙྪནྟུ་མ་མ་སརྦ་ཀརྨ་ས་དྷ་ཨ་མོ་གྷ་ཡ་སྭཱ་ཧཱ། གསུམ་སྟེ་སྔགས་རྣམས་བདུན་ལྔ་གསུམ་བརྗོད་རིམ་པར་འབུལ། མཆོད་བསྟོད་བྱ་ཞིང་གཡང་འགུགས་དམིགས་འདོན་གྱེར། ཞེས་པར། ཧཱུྃ་ཧྲཱིཿ དངོས་འབྱོར་ཡིད་སྤྲུལ་ཏིང་འཛིན་ལས་བྱུང་བའི། །ནོར་ལྷ་འཁོར་བཅས་དགྱེས་སྐོང་མཆོད་པའི་སྤྲིན། །གུས་པས་འབུལ་ལོ་དགྱེས་པར་བཞེས་ནས་ཀྱང་། །ཕྱྭ་གཡང་དངོས་གྲུབ་མ་ལུས་སྩལ་དུ་གསོལ། །ཨོཾ་བཻ་ཤྲ་མ་ཎ་ཡ་སརྦ་ས་པཱ་རི་ཝ་ར་བཛྲ་ཨརྒྷཾ་པཱདྱཾ༴སོགས། ཤཔྟ་མ་ཧཱ་སརྦ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། ཧཱུྃ་བཻ། རིན་ཆེན་མང་སྤྲུལ་ནོར་བདག་རྣམ་ཐོས་སྲས། །བཙུན་མོ་སྲས་དང་བློན་བློན་པོ་སྤྲུལ་བ་སོགས། །མ་ལུས་འཁོར་དང་བཅས་ལ་ཕྱག་འཚལ་བསྟོད། །ལོངས་སྤྱོད་འདོད་དགུའི་དངོས་གྲུབ་མྱུར་དུ་སྩོལ།། ༢ བདག་གི་ཐུགས་ཀ་ནས་འོད་ཟེར་སེར་པོ་གསེར་གྱི་མདོག་ལྟ་བུ་འཕྲོས། ནོར་ལྷ་འཁོར་དང་བཅས་པའི་ཐུགས་ཀར་ཕོག དེ་རྣམས་ཀྱི་ཐུགས་ཀ་ནས་གསེར་བཙོ་མའི་མདོག་ཅན་གྱི་འོད་ཟེར་དཔག་ཏུ་མེད་པ་ཕྱོགས་བཅུར་འཕྲོས་པས་སྐུ་གསུམ་བདེ་གཤེགས་སྲས་དང་བཅས་པ་མ་ལུས་ཤིང་ལུས་པ་མེད་ཐམས་ཅད་ཀྱི་བྱིན་རླབས་དབང་དང་དངོས་གྲུབ། ཕྱི་སྣོད་འབྱུང་བ་ལྔའི་དྭངས་བཅུད་བཀྲག་མདངས། ནང་བཅུད་འགྲོ་བའི་ཚེ་དང་བསོད་ནམས་དཔལ་འབྱོར་སྙན་གྲགས་སྟོབས་རྩལ་དབང་ཕྱུག་མངའ་ཐང་ལོངས་སྤྱོད་སོགས་སྲིད་དང་ཞི་བའི་ཕྱྭ་གཡང་དངོས་གྲུབ་ཐམས་ཅད་རྡོ་ཁབ་ལེན་གྱིས་ལྕགས་ཕྱེ་བསྡུས་པའམ། རིན་པོ་ཆེ་སྦུར་ལེན་ལ་རྡུལ་ཚོགས་འདུས་པ་ལྟར་འུབ་ཀྱིས་བསྡུས་ཤིང་ནོར་མང་རྣམ་ཐོས་སྲས་འཁོར་དང་བཅས་པའི་ཕྱྭ་དང་གཡང་གི་དངོས་གྲུབ་ཐམས་ཅད་འོད་ཟེར་སེར་པོའི་རྣམ་པར་འདུས་ཏེ་བདག་གནས་ཡོ་བྱད་ཐམས་ཅད་ལ་ཐིམ་པས་ལེགས་པའི་ཡོན་ཏན་ཐམས་ཅད་དབྱར་གྱི་མཚོ་ལྟར་གོང་ནས་གོང་དུ་འཕེལ་ཞིང་རྒྱས་པར་གྱུར་བར་བསམ་ལ། སྣ་ཚོགས་སྤོས་དུད་རོལ་མོ་དབྱངས་དང་བཅས། །གཡང་རྟེན་མདའ་དར་ཐོག་ལ་འདི་སྐད་དོ།། ཧཱུྃ་ཧྲཱིཿ སྐུ་གསུམ་རྒྱལ་བའི་ཞིང་ཁམས་ཐམས་ཅད་ནས། །སྐུ་གསུམ་རྒྱལ་བ་ཞི་ཁྲོའི་ལྷ་ཚོགས་རྣམས། །ཕྱྭ་གཡང་དངོས་གྲུབ་བསྒྲུབ་པའི་དཀྱིལ་འཁོར་འདིར། །ཕྱྭ་གཡང་དངོས་གྲུབ་སྩོལ་ཕྱིར་བྱིན་ཕོབ་ཅིག །ངོ་བོ་ཀ་དག་བློ་འདས་ཆོས་དབྱིངས་ནས། །ཆོས་སྐུའི་སྟོན་མཆོག་མགོན་པོ་འོད་མི་འགྱུར། །ཀུན་བཟང་འོད་སྣང་མཐའ་ཡས་འཁོར་དང་བཅས། །སྒྲུབ་པའི་གནས་འདིར་ཕྱྭ་དང་གཡང་ལ་སྤྱོན། །ཆོས་སྐུའི་ཕྲིན་ལས་མཛད་མཆོག་སོ་དྲུག་གིས། །འཕོ་འགྱུར་མེད་པ་རྡོ་རྗེ་སྙིང་པོའི་ཚེ། །ཡོངས་གྲུབ་འདུས་མ་བྱས་པ་དོན་དམ་གཡང་། །རྒྱ་ཆད་ཕྱོགས་ལྷུང་བྲལ་བའི་དཔལ་ཡོན་སྩོལ། །རང་བཞིན་གསལ་སྟོང་ལྷུན་གྲུབ་དག་ཞིང་ནས། །ངེས་པ་ལྔ་ལྡན་རིགས་ལྔའི་ལོངས་སྤྱོད་རྫོགས། །སྐུ་དང་ཡེ་ཤེས་རང་སྣང་གཙོ་འཁོར་ཚུལ། །སྒྲུབ་པའི་གནས་འདིར་ཕྱྭ་དང་གཡང་ལ་སྤྱོན། །ཟབ་ཅིང་རྒྱ་ཆེ་ལོངས་སྐུའི་ཕྲིན་ལས་ཀྱི། །བདེ་སྟོང་འགགས་མེད་ཚངས་ཆེན་རྔ་སྒྲའི་ཚེ། །གངས་ཆེན་མཚོ་ལྔའི་ཞིང་གི་ཕྱྭ་དང་གཡང་། །བླ་མེད་རྣམ་པ་ཀུན་ལྡན་དཔལ་ཡོན་སྩོལ། །ཐུགས་རྗེ་ཀུན་ཁྱབ་འགྲོ་འདུལ་ཞིང་རྣམས་ནས། །ཕུན་སུམ་ཚོགས་པ་ལྔ་ལྡན་སྤྲུལ་པའི་སྐུ། །མ་ངེས་གཙོ་འཁོར་སྤྲུལ་པ་ཡང་སྤྲུལ་བཅས། །སྒྲུབ་པའི་གནས་འདིར་ཕྱྭ་དང་གཡང་ལ་སྤྱོན། །མཁྱེན་བརྩེ་ནུས་བྱིན་ཕྲིན་ལས་མཐའ་ཡས་པས། །སྐྱེ་འཆི་བགྲེས་རྒུད་མེད་པ་རྡོ་རྗེའི་ཚེ། །དོན་གཉིས་ལྷུན་གྱིས་གྲུབ་པའི་ཕྱྭ་དང་གཡང་། །ཕན་བདེ་ཀུན་འབྱུང་དཔལ་ཡོན་ཕུན་ཚོགས་སྩོལ། །ཁྱད་པར་དཔལ་ལྡན་མཛེས་པའི་ཞིང་ཁམས་ནས། །ཕོངས་པ་ཀུན་སེལ་བདེ་གཤེགས་རིན་ཆེན་མིང་། །བསོད་ནམས་མཆོག་སྩོལ་གཙོ་འཁོར་སྤྲུལ་པར་བཅས། །སྒྲུབ་པའི་གནས་འདིར་ཕྱྭ་དང་གཡང་ལ་སྤྱོན། །སྔོན་གྱི་ཐུགས་བསྐྱེད་སྨོན་ལམ་རྗེས་དགོངས་ལ། །སྲིད་ཞིའི་ཚེ་བསོད་དཔལ་འབྱོར་འདོད་དགུའི་གནས། །ཕུན་སུམ་ཚོགས་པའི་ཡོན་ཏན་མ་ལུས་ཀུན། །འཕེལ་ཞིང་རྒྱས་པའི་དངོས་གྲུབ་དུས་འདིར་སྩོལ། །མཁའ་ཁྱབ་སྤྲུལ་པའི་ཞིང་མཆོག་དཔལ་རི་ནས། །སྐུ་གསུམ་བདེ་གཤེགས་ཀུན་དངོས་པདྨ་འབྱུང་། །གང་ལ་གང་འདུལ་གཙོ་འཁོར་སྤྲུལ་པར་བཅས། །སྒྲུབ་པའི་གནས་འདིར་ཕྱྭ་དང་གཡང་ལ་སྤྱོན། །རྨད་བྱུང་མཛད་པ་བསམ་གྱིས་མི་ཁྱབ་པས། །རབ་འབྱམས་སྐུ་གསུམ་ཞིང་ཁམས་མ་ལུས་པའི། །ཚེ་དཔལ་ཆོས་སྲིད་ལེགས་པའི་ཡོན་ཏན་ཀུན། །དེང་འདིར་བདག་ལ་ཡོངས་རྫོགས་སྩལ་དུ་གསོལ། །བྱང་ཕྱོགས་རིན་ཆེན་སྣ་བདུན་གཞལ་ཡས་ནས། །ལོངས་སྤྱོད་གཏེར་གྱི་བདག་པོ་རྣམ་ཐོས་སྲས། །བཙུན་མོ་སྲས་བློན་བཀའ་སྡོད་སྤྲུལ་འཁོར་བཅས། །སྒྲུབ་པའི་གནས་འདིར་ཕྱྭ་དང་གཡང་ལ་སྤྱོན། །གནོད་སྦྱིན་ལྷ་ཀླུ་དྲེགས་པའི་ཚོགས་རྣམས་ཀྱི། །འཆི་མེད་ཚེ་དང་རྒུད་མེད་ལང་ཚོ་མདངས། །འཛད་མེད་ལོངས་སྤྱོད་དཔལ་འབྱོར་ཡོན་ཏན་ཀུན། །བདག་ཅག་རྣམས་ལ་བྱིན་ཕོབ་དངོས་གྲུབ་སྩོལ། །བུ་དཔལ་རིགས་རྒྱུད་གསལ་བའི་དངོས་གྲུབ་སྩོལ། །མི་ཕྱུགས་སྲིད་ཀྱི་རྒྱུད་འགབ་འཕེལ་བརྟན་མཛོད། །བསམ་པའི་དོན་དང་གཉེར་བའི་ལས་རྣམས་ཀུན། །འབད་མེད་ཡིད་བཞིན་འགྲུབ་པའི་དངོས་གྲུབ་སྩོལ། །འོག་མིན་མཁའ་སྤྱོད་གཡུ་ལོ་བཀོད་སོགས་ནས། །མི་གཡོ་མགོན་དང་དབང་ཕྱུག་འདོད་པའི་རྒྱལ། །གཙུག་ཏོར་རྣམ་པར་རྒྱལ་དང་གདུགས་དཀར་མོ། །མྱུར་མ་དཔའ་མོ་སོ་སོར་འབྲང་མ་སོགས། །དབང་ཐང་བུ་དཔལ་སྩོལ་མཛད་མ་ལུས་ཀུན། །དེ་རིང་གནས་འདིར་ཕྱྭ་དང་གཡང་ལ་སྤྱོན། །རྨངས་པོའི་སྲིད་སྤེལ་བརྒྱུད་འཛིན་བུ་དཔལ་སྩོལ། །ནད་གདོན་རྐྱེན་ངན་བར་ཆད་དབྱིངས་སུ་སོལ། །ཆོས་དང་སྲིད་ཀྱི་ལེགས་ཚོགས་དཔལ་ཡོན་ཀུན། །འཕེལ་རྒྱས་བརྟན་པའི་ཕྱྭ་གཡང་དངོས་གྲུབ་སྩོལ། །འཇིག་རྟེན་མེས་པོ་ཚངས་པ་ཆེན་པོ་དང་། །ཁམས་གསུམ་དབང་ཕྱུག་སྲིད་པའི་ལྷ་ཆེན་པོ། །རྩ་གསུམ་ལྷ་ཡི་དབང་པོ་བརྒྱ་བྱིན་སོགས། །ཕྱྭ་གཡང་དངོས་གྲུབ་སྟེར་བའི་ལྷ་རྣམས་ཀྱང་། །དེ་རིང་གནས་འདིར་ཕྱྭ་དང་གཡང་ལ་སྤྱོན། །ཁམས་གསུམ་ལྷ་ཡི་དཔལ་འབྱོར་གཡང་ཆར་ཕོབ། །འོག་ཕྱོགས་སྲིད་པའི་བདག་པོ་འདོད་སྟེར་དཔལ། །ཀླུ་དབང་དགའ་བོ་ཉེར་དགའ་སོག་མ་མེད། །མི་མགོན་དཀར་པོ་གཙུག་ན་རིན་ཆེན་སོགས། །ལེགས་ཚོགས་ཀུན་སྤེལ་ཀླུ་གཉན་ས་བདག་ཀུན། །དེ་རིང་གནས་འདིར་ཕྱྭ་དང་གཡང་ལ་སྤྱོན། །ལོངས་སྤྱོད་རིན་ཆེན་གཏེར་གྱི་དངོས་གྲུབ་སྩོལ། །སྟོང་གསུམ་སྲིད་པའི་གཉན་རྗེ་མཐུ་བོ་ཆེ། །སྐུ་བླ་གེར་འཛོ་ཏི་སེ་གཉན་ཐང་ལྷ། །རྨ་ཆེན་སྤོམ་ར་སྟོང་ཁྱབ་བསྟན་མ་སོགས། །སྐྱེ་དགུའི་བསམ་འཕེལ་ཀླུ་གཉན་ས་བདག་རྣམས། །དེ་རིང་གནས་འདིར་ཕྱྭ་དང་གཡང་ལ་སྤྱོན། །རྨ་གཡང་ལོངས་སྤྱོད་འདོད་དགུའི་ཆར་ཆེན་ཕོབ། །སྲིད་ཞིའི་བདེན་གསུང་མངའ་བ་ཐམས་ཅད་ཀྱི། །བདེན་པའི་སྟོབས་དང་ཐུགས་བསྐྱེད་སྨོན་ལམ་མཐུས། །རབ་འབྱམས་ཕྱོགས་བཅུའི་ཞིང་གི་དཔལ་ཡོན་དང་། །རྒྱལ་བ་སྲས་བཅས་མཁྱེན་བརྩེའི་ནུས་བྱིན་དཔལ། །ཕྱི་སྣོད་འབྱུང་ལྔའི་བཀྲག་མདངས་དྭངས་མའི་བཅུད། །ནང་བཅུད་སྐྱེ་འགྲོའི་ཚེ་བསོད་དཔལ་འབྱོར་གཡང་། །སྲིད་དང་ཞི་བའི་ཕུན་ཚོགས་མ་ལུས་པ། །དེ་རིང་གནས་འདིར་ཕྱྭ་དང་གཡང་དུ་ལེན། །མཁས་གྲུབ་ཁྲིམས་ལྡན་བཤེས་གཉེན་བླ་སློབ་མཆེད། །དམ་གཙང་སྣོད་ལྡན་རིགས་བཟང་བློ་གསལ་བ། །དགེ་འདུན་སྡེ་གཉིས་ཚོགས་བཅས་དབང་འདུས་ནས། །རྒྱལ་བསྟན་འཛིན་སྐྱོང་སྤེལ་བའི་དངོས་གྲུབ་སྩོལ། །རྒྱལ་པོ་རྒྱལ་ཕྲན་བློན་པོ་མི་ཆེན་གཙོ། །དབང་ཆེ་རྩལ་དྲག་འབྱོར་ལྡན་སྦྱིན་བདག་འབངས། །སྐྱེ་འགྲོ་ཕོ་མོ་ཐམས་ཅད་དབང་འདུས་ནས། །སྒོ་གསུམ་དགེ་ལ་སྦྱོར་བའི་དངོས་གྲུབ་སྩོལ། །གཟུགས་ཅན་གཟུགས་མེད་ལྷ་འདྲེ་མི་མ་ཡིན། །དྲི་ཟ་སྲིན་པོ་མཁའ་རྒྱུ་འབྱུང་པོའི་སྡེ། །ལོག་འདྲེན་གདུག་པ་ཅན་རྣམས་དབང་གྱུར་ཏེ། །བསྒྲུབ་པའི་བར་ཆད་སེལ་བའི་དངོས་གྲུབ་སྩོལ། །སྟོབས་རྩལ་བཀྲག་མདངས་བླ་ཚེ་སྲོག་དབུགས་དྲོད། །ཁ་རྗེ་རླུང་རྟ་སྙན་གྲགས་དཔལ་འབྱོར་གཡང་། །རིན་ཆེན་འབྲུ་ནོར་རྐང་འགྲོས་དབང་འབྱོར་བས། །འདོད་རྒུའི་ལོངས་སྤྱོད་འཛད་མེད་དངོས་གྲུབ་སྩོལ། །དངོས་གྲུབ་གཏེར་མཛོད་རྒྱལ་ཆེན་རྣམ་སྲས་ཀྱིས། །དགོས་འདོད་རེ་སྐོང་དངོས་གྲུབ་གཡང་ཆེན་སྩོལ། །བཙུན་མོ་རྣམ་བཞིས་བཞེད་དགུའི་ལོངས་སྤྱོད་དང་། །ཆོས་སྲིད་དཔལ་འབྱོར་རྒྱས་པའི་གཡང་ཁུག་ཅིག །སྲས་མཆོག་བཞི་ཡིས་ནོར་ཕྱུག་ཟས་གོས་རྒྱན། །ལོ་ཏོག་འབྲུ་དྲུག་འཕེལ་བའི་གཡང་ཁུག་ཅིག །ཛཾ་བྷ་ལ་ཡིས་གནགས་ཕྱུག་གཡང་སྤེལ་ཅིག །པུརྞ་བྷ་དྲས་ལུག་གི་གཡང་སྤེལ་ཅིག །མ་ཎི་བྷ་དྲས་ནོར་རྫས་ལོངས་སྤྱོད་སྤེལ། །ཀུ་བེ་ར་ཡིས་རྟ་དྲེལ་གཡང་སྤེལ་ཅིག །ཡང་དག་ཤེས་སོགས་ནོར་ལྷ་གཞན་རྣམས་ཀྱིས། །ཚེ་བསོད་དཔལ་འབྱོར་ཕུན་ཚོགས་གཡང་ཁུག་ཅིག །ཁུ་ཡེ་ཁུ་ཡེ་སྲིད་ཞིའི་ཕྱྭ་ཁུག་ཅིག །ཧུ་ཡེ་ཧུ་ཡེ་སྣོད་བཅུད་གཡང་ཁུག་ཅིག །ཕྱྭ་ཁུག་གཡང་འཕེལ་ཕུན་ཚོགས་དཔལ་ཡོན་རྒྱས། །ཕྱྭ་ཆགས་གཡང་ཆགས་བཀྲ་ཤིས་བདེ་ལེགས་ཤོག །མེ་ཏོག་འཐོར་ཞིང་རྟེན་འབྲེལ་སྙིང་པོ་དང་། །སུ་པྲ་ཏིཥྛའི་སྔགས་ཀྱང་བརྗོད་པར་བྱ། །དེ་རྗེས་ཚོགས་བསྐང་ལ་སོགས་གཞུང་བཞིན་ནོ། །གསུམ་པ་རྗེས་ཀྱི་ལས་སྦྱོར་རིམ་པ་ལ། །བསྒྲུབ་པ་རྫོགས་ནས་གཡང་སྒོ་བསྡམ་པ་ནི།། ཧཱུྃ་བྷྲུྃ། ནོར་ལྷའི་རྒྱལ་པོ་དཔལ་ལྡན་རྣམ་ཐོས་སྲས། །བཙུན་མོ་སྲས་དང་བཀའ་འཁོར་སྤྲུལ་པར་བཅས། །སྲིད་དང་ཞི་བའི་ཕྱྭ་གཡང་བདག་པོ་རྣམས། །མ་ལུས་འཁོར་དང་བཅས་པ་ཐམས་ཅད་ལ། །བཟང་ཤིང་སྣ་ཚོགས་བསྲེགས་པའི་དུད་སྤྲིན་དང་། །ཤེལ་ཚིག་འབྲུ་སྣ་གཙང་ཕྱེ་མར་ཐུད་ཕྲོམ། །རིན་ཆེན་འབྲུ་སྨན་སྣ་ཚོགས་འབྲས་བུ་དྲི། །ཇ་ཆང་འོ་ཞོ་གསེར་གཡུའི་སྐྱེམས་ཕུད་སོགས། །བཟའ་བཏུང་གོས་རྒྱན་ལོངས་སྤྱོད་སྤྱན་གཟིགས་ཚོགས། །རྨད་བྱུང་མཆོད་རྫས་ཡོ་བྱད་སྣ་ཚོགས་ཀྱིས། །བསང་ངོ་མཆོད་དོ་བསྐང་ངོ་མངའ་གསོལ་ལོ། །དགྱེས་ཤིང་ཚིམ་པར་མཛོད་ལ་བདག་ཅག་གིས། །འདོད་པའི་དོན་སྒྲུབ་རབ་འབྱམས་ལས་གྲུབ་མཛོད། །ཕྱྭ་གཡང་སྒྲུབ་པའི་རྫས་ལ་བརྟན་པར་བཞུགས། །གནས་དང་ཡོ་བྱད་རྣམས་ལ་བྱིན་གྱིས་རློབས། །ཕྱྭ་དང་གཡང་རྣམས་མ་ཉམས་མ་འཐོར་བར། །མི་འགྱུར་མི་གཡོ་སྲ་ཞིང་བརྟན་པར་མཛོད། །ཤར་གྱི་གཡང་སྒོ་ཚེ་འཛིན་དཀར་མོས་སྡོམས། །རྐང་འགྲོས་ཕྱུགས་ཀྱི་ཕྱྭ་གཡང་རྟེན་ཕུར་ཚུགས། །སྲིད་པའི་ལྷ་རབས་ཤམ་པོས་སྒོ་སྲུང་མཛོད། །གཡོ་མེད་ཏིང་འཛིན་རྡོ་རྗེའི་རྒྱས་ཐོབ་ཅིག །ལྷོ་ཡི་གཡང་སྒོ་ནོར་འཕེལ་སེར་མོས་སྡོམས། །རིན་ཆེན་ནོར་རྫས་འཕེལ་བརྟན་གཡང་ཕུར་ཚུགས། །སྐུ་ལྷ་འོད་དེ་གུང་རྒྱལ་སྒོ་སྲུང་མཛོད། །སྩོལ་མེད་ཡོངས་གྲུབ་ནོར་བུས་རྒྱས་ཐོབ་ཅིག །ནུབ་ཀྱི་གཡང་སྒོ་དགའ་བྱེད་དམར་མོས་སྡོམས། །སྣ་ཚོགས་ཡོ་བྱད་འཕེལ་རྒྱས་གཡང་ཕུར་ཚུགས། །དབང་ཕྱུག་མ་ཧཱ་དཱེ་བས་སྒོ་སྲུང་མཛོད། །མ་འགགས་རང་ཤར་པདྨས་རྒྱས་ཐོབ་ཅིག །བྱང་གི་གཡང་སྒོ་ལོ་ཏོག་ལྗང་མོས་སྡོམས། །ལོ་ལེགས་འབྲུ་འཕེལ་གཡང་བརྟན་རྟེན་ཕུར་ཚུགས། །ཡུལ་ལྷ་རྨ་རྒྱལ་འཕན་པོས་སྒོ་སྲུང་མཛོད། །ཕྲིན་ལས་ཀུན་འགྲུབ་རྒྱ་གྲམ་རྒྱས་ཐོབ་ཅིག །ལྷ་ཆེན་ཚངས་པ་བརྒྱ་བྱིན་སྟེང་ནས་སྲུངས། །ཀླུ་རྒྱལ་མི་མགོན་དཀར་པོས་འོག་ནས་སྲུངས། །དཔལ་ལྡན་ཚོགས་ཀྱི་བདག་པོས་གཡས་ནས་སྲུངས། །ལྷ་མོ་དབྱུག་གུ་སྤུན་གསུམ་གཡོན་ནས་སྲུང་། །མི་ཐུང་ནོར་གྱི་བདག་པོས་མདུན་ནས་སྲུངས། །གནོད་སྦྱིན་ཙི་ཏྲ་དམར་པོས་རྒྱབ་ནས་སྲུངས། །ནམ་ཡང་ནུབ་མེད་ཕྱྭ་གཡང་འཕེལ་ཞིང་བརྟན། །དུས་ཀུན་ཕུན་ཚོགས་དཔལ་ལ་སྤྱོད་པར་ཤོག །དེ་ནས་སྦྱིན་བདག་ཕོ་མོ་སོ་སོ་ལ། །ཕྱྭ་དང་གཡང་གི་རྫས་རྣམས་གཏད་པ་ནི།། ཧཱུྃ་ཧྲཱིཿ བདེ་ཆེན་དངོས་གྲུབ་འབྱུང་བའི་དཀྱིལ་འཁོར་འདིར། །སྐུ་གསུམ་ཡོངས་འདུས་ནོར་ལྷ་རྒྱ་མཚོའི་ཚོགས། །དངོས་གྲུབ་ཀུན་འབྱུང་བདེར་གཤེགས་རིན་ཆེན་མིང་། །འཛད་མེད་གཏེར་གྱི་བདག་པོ་རྣམ་ཐོས་སྲས། །མ་ལུས་འཁོར་དང་བཅས་པ་ཐམས་ཅད་ཀྱི། །ཐུགས་རྗེ་བྱིན་རླབས་ནུས་སྟོབས་ཕྲིན་ལས་ཀྱིས། །རྣལ་འབྱོར་བདག་ཅག་ཡོན་སྦྱོར་འཁོར་བཅས་ལ། །ཕྱྭ་གཡང་མཆོག་དང་ཐུན་མོངས་དངོས་གྲུབ་སྩོལ། །ཞེས་པས་གསོལ་གདབ་དེ་ནས་འདི་བཞིན་གཏད། །དེ་ཡང་གཡང་གཏོར་གཡང་སྒྱེ་གཏེར་བུམ་འོ་སྦྲང་སོགས་ཀྱི་མཚོ་རྣམས་གཏད་ལ། ཧཱུྃ་ཧྲཱིཿ སྐུ་གསུམ་ནོར་བདག་གཡང་ལྷ་འཁོར་བཅས་ཀྱིས། །བྱིན་གྱིས་རླབས་པའི་སྒྲུབ་རྫས་གཡང་གི་རྟེན། །གཡང་གཏོར་བརྗིད་ལྡན་རིན་ཆེན་འབར་བ་དང་། །གཡང་སྒྱེ་དཀར་པོ་རྣུ་དགུ་མཛེས་པ་དང་། །གཏེར་གྱི་བུམ་བཟང་ཕྱག་རྒྱའི་མཚན་རྟགས་ཅན། །དུང་ཟངས་དངུལ་གསེར་གཡུ་ཡི་རི་བོའི་མཐར། །འོ་སྦྲང་ཞོ་མར་ཆང་གི་མཚོ་འཁྱིལ་རྫས། །ཕྱྭ་གཡང་བཀྲ་ཤིས་ཕུན་སུམ་ཚོགས་པའི་ཕྱིར། །དེང་འདིར་སྦྱིན་བདག་རྣམས་ལ་གཏད་པ་ཡིས། །ཕྱྭ་གཡང་དངོས་གྲུབ་ཐོབ་ཅིང་འཕེལ་བརྟན་ཤོག །མདའ་དར་སྐུ་གཟུགས་ཕྱག་མཚན་སོགས་གཏད། གཡང་རྟེན་སྨྱུག་དཀར་སྒྲོ་མདེལ་མཛེས་པ་ལ། །རིན་ཆེན་དར་སྣས་བརྒྱན་པའི་མདའ་དར་དང་། །སྐུ་གཟུགས་ཕྱག་མཚན་བླ་རྡོ་སྲོག་འཁོར་སྔགས། །ནོར་ལྷའི་རྒྱལ་པོ་ཡུམ་སྲས་འཁོར་བཅས་རྣམས། །བརྟེན་བསྒྲུབ་བསྐང་བའི་རྫས་མཆོག་ཁྱད་འཕགས་རྣམས། །དེང་འདིར་སྦྱིན་བདག་རྣམས་ལ་གཏད་པ་ཡིས། །གཡང་ལྷ་འཁོར་བཅས་མི་འབྲལ་འགྲོགས་པར་ཤོག །སྦྲ་གུར་སོགས་འབྲོག་པའི་ཡོ་བྱད་གཏད་ལ། ཆོན་ཕུར་ཀ་དར་མཛེས་པའི་སྦྲ་གུར་དང་། །རྡང་བྱུག་སྐེ་མཆར་སྣ་ཐག་ལག་སྦྲེལ་སོགས། །ཐ་གུའི་རིགས་དང་སྒ་སྟན་སྲབ་མཐུར་སྒྲོག །ཟོ་རྐྱལ་སྣོད་རིགས་འབྲོག་འཛིན་ཡོ་བྱད་ཀུན། །དེང་འདིར་ཡོན་བདག་རྣམས་ལ་གཏད་པ་ཡིས། །རྐང་འགྲོས་འཚོ་སྐྱོང་ལོངས་སྤྱོད་མི་འབྲལ་ཤོག །མཁར་ཁང་སོགས་རོང་པའི་ཡོ་བྱད་གཏད་ལ། བཀོད་ལེགས་མཁར་ཁང་ཏོག་དང་བ་གམ་ཅན། །མཛོད་ཁང་བང་བ་སྒོ་གླེགས་ལྡེའུ་མིག་དང་། །འཇོར་དང་ཐོང་གཤོལ་ཟོར་བ་འབྲང་ཞགས་སྒ། །འོབ་དང་ཆང་སྣོད་ཡོལ་ཀོ་རོང་འཛིན་ཆས། །དེང་འདིར་ཡོན་བདག་རྣམས་ལ་གཏད་པ་ཡིས། །འབྲུ་དྲུག་སོ་ནམ་སྐྱེད་འཕེལ་མི་འབྲལ་ཤོག །ཡོ་བྱད་མཁོ་བའི་རིགས་གཞན་རྣམས་གཏད་ལ།། རིན་ཆེན་རྫས་རྟགས་རྣམ་བཀྲའི་ཟངས་དཀར་དང་། །ཁྲོ་ཆེན་རྫ་སྐྱོགས་གཟར་བུ་ཐབ་ཆའི་རིགས། །ཆ་གཞོང་བྲེ་ཕུལ་ཉག་སྲང་པར་བུ་སྡེར། །སྲིད་པའི་ཉེར་སྤྱོད་མེད་ཐབས་མེད་པ་ཀུན། །དེང་འདིར་ཡོན་བདག་རྣམས་ལ་གཏད་པ་ཡིས། །ལོངས་སྤྱོད་འདོད་རྒུ་རྟག་ཏུ་སྤྱོད་པར་ཤོག །སེར་སྐྱ་བུད་མེད་ཀྱི་ཆས་སོ་སོར་གཏད་ལ།། རིན་ཆེན་ཁྲི་གདན་ཤིང་རྟ་དར་གདུགས་འཕན། །རྨད་བྱུང་བླ་དཔོན་ཆེ་དགུའི་ལོངས་སྤྱོད་དང་། །རྟེན་གསུམ་ངུར་སྨྲིག་རྒྱལ་མཚན་མཆོད་པའི་རྫས། །རོལ་མོ་ལ་སོགས་སྡེ་གཉིས་འཕགས་པའི་ཆས། །དེང་འདིར་རིགས་ཀྱི་བུ་ལ་གཏད་པ་ཡིས། །ཆོས་མཐུན་བསམ་པ་ཡིད་བཞིན་འགྲུབ་གྱུར་ཅིག །གོ་ཁྲབ་རྨོག་ཕུབ་རལ་ཤུབ་མེ་རྒྱོགས་མདུང་། །སྐེད་གྲི་ཤང་ལང་སྐྱེས་པའི་ཡོ་བྱད་མཚོན། །དེ་རིང་ཡོན་བདག་ཁྱོད་ལ་གཏད་པ་ཡིས། །བདུད་དགྲའི་གཡུལ་ལས་རྣམ་པར་རྒྱལ་བར་ཤོག །གཟི་མཆོང་སྦུར་ལེན་གཡུ་བྱིར་མུ་ཏིག་དང་། །མུ་མེན་ལ་སོགས་ཟ་མ་མོ་ཡི་རྫས། །ཐམས་ཅད་དེང་འདིར་ཁྱོད་ལ་གཏད་པ་ཡིས། །འདོད་དོན་ཡིད་ལ་སྨོན་ཀུན་མྱུར་འགྲུབ་ཤོག །བཟའ་བཏུང་ལོངས་སྤྱོད་རྐང་འགྲོས་ཀྱི་རིགས་རྣམས་གཏད་ལ། མར་ཐུད་ཟན་སྦྲང་ཟས་སྣའི་ལྷུན་པོར་སྤུངས། །ཇ་ཆང་འོ་ཞོ་བཏུང་བ་རྒྱ་མཚོར་བསྐྱིལ། །རིན་ཆེན་དར་ཟབ་འབྲུ་སྣའི་ཕུང་པོ་བརྡལ། །རྐང་འགྲོས་གོས་རྒྱན་ཡོ་བྱད་སྣ་ཚོགས་བཀྲམ། །དེང་འདིར་སྦྱིན་བདག་རྣམས་ལ་གཏད་པ་ཡིས། །དཔལ་འབྱོར་ཕུན་ཚོགས་འཕེལ་ཞིང་བརྟན་པར་ཤོག །མེ་ཏོག་སིལ་མ་འཐོར་ཞིང་རབ་གནས་བྱ། །དགེ་ཞིང་ཤིས་པའི་ཚིགས་བཅད་ཅི་རིགས་བརྗོད། །ཡི་གེ་བརྒྱ་པས་ལྷག་ཆད་ཁ་བསྐང་ཞིང་། །གཡང་དཀྱིལ་བརྟེན་རྫས་ལ་དམིགས་རྟེན་བཞུགས་བྱ། །ཡང་ན་གཤེགས་སུ་གསོལ་བ་སྤྱི་དང་མཐུན། །དེ་རྗེས་བསྔོ་སྨོན་ཤིས་བརྗོད་རྒྱ་ཆེར་བྱ། །ས་མ་ཡཱཿ གུ་ཧྱཿ ཞེས་རྒྱལ་ཆེན་རྣམ་མང་ཐོས་སྲས་འཁོར་དང་བཅས་པའི་གཡང་སྒྲུབ་དཔལ་ཡོན་འབུམ་བརྡལ་ཞེས་བྱ་བ་འདི་ཡང་རྣལ་འབྱོར་དམ་པ་པདྨའི་མཚན་ཅན་གྱིས་བསྐུལ་ངོར། སྔགས་བན་འཇིགས་མེད་རྣམ་རྒྱལ་གྱིས་བྲིས་པ་དགེའོ།། དགེའོ།། དགེའོ།།