གཡང་འགུགས་མཚམས་སྦྱོར།
གཡང་འགུགས་ལ་ཐོག་མར། རང་དང་མདུན་བསྐྱེད་ཀྱི་ཐུགས་ཀ་ནས་འོད་ཟེར་སྣ་ཚོགས་ཕྱོགས་བཅུའི་མཁའ་དབྱིངས་ཁྱབ་པར་འཕྲོས་པས་རབ་འབྱམས་དག་པའི་ཞིང་ན་བཞུགས་པའི་སྐུ་གསུམ་རྒྱལ་བ་སྲས་དང་བཅས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དབང་དང་བྱིན་རླབས་དངོས་གྲུབ། ཕྱི་སྣོད་འབྱུང་བ་ལྔ་ཡི་དྭངས་བཅུད་སྙིང་པོའི་ཡང་ཞུན། ནང་བཅུད་འགྲོ་བའི་ཚེ་བསོད་སྟོབས་འབྱོར། དཔལ་ཡོན་བདེ་སྐྱིད་བཀྲག་མདངས་གཟི་བརྗིད། སྙན་གྲགས་ཁ་རྗེ་རླུང་རྟ་སོགས་ཕྱྭ་གཡང་དངོས་གྲུབ་ཐམས་ཅད་གནོད་པ་དང་ཉམས་ཉེས་རྒུད་པ་མེད་པར་མར་མེ་གཅིག་ལས་གཉིས་ཆད་ཀྱི་ཚུལ་དུ་འོད་ཟེར་སེར་པོ་གསེར་གྱི་མདོག་ཅན་གྱི་རྣམ་པར་རྡོ་ཁབ་ལེན་ལ་ལྕགས་ཕྱེ་འདུས་པ་ལྟར་འུབ་ཀྱིས་བསྡུས་ནས་བདག་མདུན་གཡང་རྫས་རྣམས་ལ་མཚོ་ལ་ཁ་ཆར་བབས་པ་ལྟར་སིབ་སིབ་ཐིམ་ཞིང་། དེ་བཞིན་དུ་ལྷའི་རིན་པོ་ཆེ་ཡིད་བཞིན་དབང་གི་རྒྱལ་པོའི་རྣམ་པར་ཆར་ལྟར་བབས་པས་གནས་ཁང་དང་བང་མཛོད་ཐམས་ཅད་ཏིལ་གོང་བཞིན་མེར་མེར་ཁྲིག་ཁྲིག་གང་ནས་ཕྱྭ་གཡང་ཕུན་སུམ་ཚོགས་པའི་དཔལ་ལ་དབང་འབྱོར་བར་བསམ།