གཡང་འགུགས་སྲིད་ཞིའི་དཔལ་འབྱོར་དབང་སྡུད།
༄༅། བླ་མ་ནོར་ལྷའི་གཡང་འགུགས་སྲིད་ཞིའི་དཔལ་འབྱོར་དབང་སྡུད་ཅེས་བྱ་བ་བཞུགས། ན་མོ་གུ་རུ་པུཎྱེ་ཛྙཱ་ན་སིདྡྷི་བྷྲཱུཾ། ཧྲཱིཿ ཀ་དག་བློ་འདས་ཆོས་སྐུ་སྣང་མཐའ་ཡས། །ལྷུན་གྲུབ་རང་གདངས་ལོངས་སྐུ་སྤྱན་རས་གཟིགས། །ཐུགས་རྗེའི་སྒྱུ་འཕྲུལ་སྤྲུལ་སྐུ་པདྨ་འབྱུང་། །སྐུ་གསུམ་ཡོངས་འདུས་རཏྣ་ཐོད་ཕྲེང་རྩལ། །བརྒྱུད་གསུམ་རིག་འཛིན་བླ་མའི་ཚོགས་བཅས་ཀྱིས། །ཐུགས་རྗེ་བརྩེ་བ་ཆེན་པོས་མྱུར་དགོངས་ལ། །སྲིད་དང་ཞི་བའི་ཁམས་ཀྱི་ཚེ་བསོད་དཔལ། །ཡེ་ཤེས་ཡོན་ཏན་མ་ལུས་གཡང་དུ་ཁུག །བདག་གནས་ཡོ་བྱད་ཀུན་ལ་བྱིན་ཆེན་ཕོབས། །དབང་དང་དངོས་གྲུབ་མཆོག་རྣམས་དེང་འདིར་སྩོལ། །སྐུ་གསུམ་བདེ་གཤེགས་ཡེ་ཤེས་རང་རྩལ་ལས། །མ་རུང་རཱུ་ཊ་འདུལ་ཕྱིར་སྐུར་བཞེངས་པ། །ལོག་འདྲེན་བདུད་སྲིན་དམ་སྲི་གདུལ་དཀའི་གཤེད། །ཆེ་མཆོག་ཡོངས་འདུས་དབང་ཆེན་ཧེ་རུ་ཀ། །ཡི་དམ་ཞི་ཁྲོའི་ལྷ་ཚོགས་འཁོར་བཅས་ཀྱིས། །རབ་འབྱམས་ཕྱོགས་བཅུའི་ཞིང་རྣམས་ཐམས་ཅད་ཀྱི། །ཚེ་དཔལ་སྟོབས་འབྱོར་ལེགས་ཚོགས་གཡང་དུ་ཁུག །བྱིན་དབང་དངོས་གྲུབ་མ་ལུས་དེང་འདིར་སྩོལ། །དབྱིངས་ཀྱི་ཡུམ་ཆེན་ཤེས་རབ་ཕ་རོལ་ཕྱིན། །ཕྱི་ནང་གནས་ཡུལ་དུར་ཁྲོད་ཞིང་ཀུན་གྱི། །མ་སྲིང་མཁའ་འགྲོ་ཡོངས་ཀྱི་སྤྱི་རྗེ་མོ། །ཁྲོ་རྒྱལ་ཀུན་ཡུམ་ཕག་མོ་རྣལ་འབྱོར་མ། །མ་མོ་མཁའ་འགྲོ་བྱེ་བ་འབུམ་ཚོགས་ཀྱིས། །ཨོ་རྒྱན་མཁའ་འགྲོའི་གླིང་སོགས་མ་ལུས་པའི། །ཕུན་ཚོགས་དཔལ་ཡོན་འབྱོར་དགུ་གཡང་དུ་ཁུག །རབ་འབྱམས་ཕྲིན་ལས་འགྲུབ་པའི་དངོས་གྲུབ་སྩོལ། །རིན་ཆེན་མིང་སྤྲུལ་ནོར་བདག་རྣམ་ཐོས་སྲས། །དངོས་གྲུབ་གཏེར་མཛོད་བཙུན་མོ་སྲས་བློན་འཁོར། །སྐུ་གསུང་ཐུགས་ཡོན་ཕྲིན་ལས་སྤྲུལ་པ་ལྔ། །ལོངས་སྤྱོད་འདོད་འབྱུང་རྣམ་སྲས་རིགས་ཆེན་བརྒྱད། །སོ་སོའི་འཁོར་དང་ཡང་འཁོར་བཅས་རྣམས་ཀྱིས། །བདག་ཅག་རྣལ་འབྱོར་བཙུན་སྔགས་ཐམས་ཅད་ཀྱི། །བསླབ་སྡོམ་དམ་གཙང་མཁས་བཙུན་བཟང་གསུམ་འཛོམ། །ཐོས་བསམ་བསྒོམ་དང་མཉན་བཤད་སྒྲུབ་ལ་བརྩོན། །ཆོས་མཐུན་དགེ་བའི་བསམ་སྤྱོད་གོང་འཕེལ་ནས། །རྒྱལ་བསྟན་བསྲུང་སྤེལ་ནུས་པའི་དངོས་གྲུབ་སྩོལ། །གཙང་རིས་ལྷ་ཡི་མགོན་པོ་གནས་སྲུང་ཁྱོད། །ལྷ་ཆེན་ཚངས་པ་དབང་པོ་ཉེ་དབང་སོགས། །དབང་བསྒྱུར་ལྷ་ཡི་སྡེ་དཔོན་མཛད་པའི་ཚེ། །འཁོར་ཚོགས་ལྷ་དམག་བྱེ་བ་འབུམ་བཅས་ཀྱིས། །དཀར་པོ་ལྷ་ཡི་ཚེ་བསོད་གཡང་དུ་ཁུག །ལྷ་ཡི་མངའ་ཐང་ལོངས་སྤྱོད་དངོས་གྲུབ་སྩོལ། །ཐུབ་པའི་བསྟན་བསྲུང་རྒྱལ་ཆེན་ངལ་གསོས་པོ། །ཡུམ་སྲས་རྟ་བདག་དེད་དཔོན་སྟོབས་ཆེན་སོགས། །དབང་བསྒྱུར་གནོད་སྦྱིན་སྡེ་དཔོན་མཛད་པའི་ཚེ། །གནོད་སྦྱིན་ནོར་ལྷ་བྱེ་བ་འབུམ་བཅས་ཀྱིས། །གླིང་བཞིའི་མི་ཡི་ཚེ་བསོད་གཡང་དུ་ཁུག །རང་རང་ལས་ཀྱི་དངོས་གྲུབ་འདོད་རྒུར་སྩོལ། །འཛད་མེད་གཏེར་གྱི་བདག་པོ་རྣམ་ཐོས་སྲས། །ཀླུ་ཆེན་བརྒྱད་དང་དགའ་བོ་ཉེ་དགའ་སོགས། །དབང་བསྒྱུར་ཀླུ་ཡི་སྡེ་དཔོན་མཛད་པའི་ཚེ། །འཁོར་བཅས་ཀླུ་གཉན་བྱེ་བ་འབུམ་ཚོགས་ཀྱིས། །ཀླུ་ཡི་ཚེ་བསོད་དཔལ་ཕུན་གཡང་དུ་ཁུག །ས་བདག་ཀླུ་ཡི་མངའ་ཐང་ལོངས་སྤྱོད་སྩོལ། །སྔོན་བསགས་ལས་དང་འཕྲལ་བྱུང་རྐྱེན་དབང་གིས། །བཀྲེས་ཕོང་དབུལ་བས་ཉམས་ཐག་འགྲོ་བ་རྣམས། །སྲིད་པ་གསུམ་གྱི་དཔལ་ཡོན་དབང་འབྱོར་ནས། །བདེ་སྐྱིད་ཕུན་སུམ་ཚོགས་པའི་དངོས་གྲུབ་སྩོལ། །མི་ཟད་ནམ་མཁའི་མཛོད་བརྙེས་ཛཾ་བྷ་ལ། །སྐུ་གསུང་ཐུགས་ཡོན་ཕྲིན་ལས་སྤྲུལ་པ་ལྔ། །ནོར་ལྷ་ཕོ་དགུ་ཛཾ་ལྷ་ཉེར་གཅིག་སོགས། །གཡང་བདག་ནོར་ལྷ་ཕོ་རྒྱུད་ཐམས་ཅད་ཀྱིས། །ནང་བཅུད་འགྲོ་བའི་ཚེ་བསོད་གཡང་དུ་ཁུག །བསྲུང་བྱར་གྱུར་པའི་སྐྱེས་པ་ཕོ་རིགས་རྣམས། །ཡངས་རྩལ་སྟོབས་ལྡན་དཔའ་རྒོད་རྐྱེན་གསུམ་འཛོམས། །དབང་ཤེས་འདོད་ལྔས་ངོམས་པའི་བདེ་མཆོག་སྩོལ། །ལོངས་སྤྱོད་གཏེར་གྱི་བདག་མོ་ནོར་རྒྱུན་མ། །སྤྲུལ་པའི་ལྷ་མོ་གཡང་བདག་མཆེད་ལྔ་དང་། །བཙུན་མོ་རྣམ་བཞི་ནོར་ལྷ་མོ་དགུ་སོགས། །ནོར་ལྷ་གཡང་བདག་མོ་རྒྱུད་ཐམས་ཅད་ཀྱིས། །ཕྱི་སྣོད་འབྱུང་ལྔའི་དྭངས་བཅུད་གཡང་དུ་ཁུག །འཚོ་ཆས་སྦྱོར་བའི་ཟ་མ་མོ་རིགས་རྣམས། །སྙིང་ཉེ་རྒྱུད་དྲང་ཕྲག་ཡངས་ཟས་བཅུད་ལྡན། །ལོངས་སྤྱོད་བུ་ནོར་ཕྱུགས་འཕེལ་བདེ་སྐྱིད་སྩོལ། །མདོར་ན་སྐུ་གསུམ་རྩ་གསུམ་བསྲུང་མའི་ཚོགས། །ནོར་ལྷ་གཡང་བདག་ཕན་སྐྱོབས་གྲོགས་མཛད་ལྷའི། །ཐུགས་རྗེ་བྱིན་རླབས་ནུས་སྟོབས་ཕྲིན་ལས་ཀྱིས། །ཕྱི་སྣོད་འབྱུང་བའི་བཅུད་ཀྱི་དྭངས་མ་དང་། །ནང་བཅུད་འགྲོ་བའི་ཕྱྭ་དང་གཡང་རྣམས་བསྡུས། །ཁྱད་པར་སྲིད་པ་གསུམ་གྱི་འབྱོར་བ་དྲུག །མཐོ་རིས་ཡོན་ཏན་བདུན་དང་སྡེ་བཞིའི་དཔལ། །འབད་མེད་ལྷུན་གྱིས་གྲུབ་པའི་ཕྱྭ་གཡང་སྩོལ། །ཟས་གོས་ནོར་འཕེལ་རྟ་ཕྱུག་རྐང་འགྲོ་འཕེལ། །ལོ་ཏོག་འབྲུ་འཕེལ་བཞོན་ལེགས་དཀར་བཅུད་འཕེལ། །ཡོ་བྱད་ཀུན་འཕེལ་འཁོར་གཡོག་རིགས་རྒྱུད་འཕེལ། །བཙན་ཕྱུག་འཕན་དར་འཛོམས་པའི་དངོས་གྲུབ་སྩོལ། །སྲིད་ཞིའི་དཔལ་འབྱོར་དབང་སྡུད་གཡང་འགུགས་འདི། །དད་ལྡན་པདྨ་ནོར་བུས་བསྐུལ་བའི་ངོར། །སྔགས་རྒན་གྲོལ་ཞིག་པ་དེས་བྲིས་འདིའི་མཐུས། །ཇི་ལྟར་སྨོན་པ་ཡིད་བཞིན་འགྲུབ་གྱུར་ཅིག །དགེའོ།།