ནོར་སྒྲུབ་སྤྱི་ལ་མཁོ་བའི་སྐོར་ལྷ་མོ་བརྒྱད་གཡང་ལས་བཏུས་པ།

༄༅། ནོར་སྒྲུབ་སྤྱི་ལ་མཁོ་བའི་སྐོར་ལ་བརྒྱད་ལས། དང་པོ་གཡང་འགུགས་ལེགས་བཤད་གཞན་ནས་བཀོལ་བ་ནི། ཀྱེ། ཁུ་ཡེ་ཕྱྭ་དང་གཡང་བླན་ནོ། །གཡང་འགུགས་གཡང་བླན་གར་སྲིད་ན། །སྔོན་ཚེ་བསྐལ་པའི་དང་པོ་ལ། །སངས་རྒྱས་བསོད་ནམས་སྟོབས་ཆེན་པོས། །དུས་གསུམ་དགེ་བའི་ཕྱྭ་གཡང་བསྡུས། །རྗེས་འཇུག་འཚོ་བའི་ཆེད་དུ་བསྔོས། །བཅུད་མཆོག་ཟས་གཡང་དེ་ནས་སྲིད། །བར་དུ་སྤྱན་རས་གཟིགས་དབང་གིས། །གདོང་དམར་བོད་ལ་ཐུགས་རྗེ་བསྐྱེད། །དལ་འབྱོར་ཆོས་ལྡན་མི་བརྒྱུད་སྤེལ། །རིན་ཆེན་འབྲུ་སྣའི་གཏེར་སྒོ་ཕྱེས། །མི་གཡང་ནོར་གཡང་དེ་ནས་སྲིད། །དེ་རྗེས་སྲོང་བཙན་སྒམ་པོ་ཡིས། །རྒྱ་བལ་ནོར་གཡང་བོད་དུ་བླངས། །ཆབ་སྲིད་པདྨའི་མཚོ་ལྟར་རྒྱས། །དགེ་བཅུའི་ཆོས་ཀྱི་ལམ་བཟང་བཏོད། །དབང་ཐང་ཆོས་གཡང་དེ་ནས་སྲིད། །དེ་འོག་བཀྲ་ཤིས་འོམ་བུའི་ཚལ། །བྲག་དམར་དཔལ་གྱི་བསམ་ཡས་སུ། །མཁན་སློབ་ཆོས་གསུམ་ཞལ་འཛོམ་སྟེ། །དམ་པ་ཆོས་ཀྱི་སྒྲོན་མེ་སྦར། །སློབ་དཔོན་ཆེན་པོའི་བྱིན་རླབས་དང་། །ཆོས་ཀྱི་རྒྱལ་པོའི་ཐུགས་བསྐྱེད་ཀྱིས། །འཇིག་རྟེན་དཔལ་མགོན་ནོར་གྱི་ལྷ། །མཆོད་ཅིང་བརྔན་ནས་ནོར་གཡང་བསྡུས། །མཐའ་བཞིའི་རྒྱལ་ཁམས་མ་ལུས་པའི། །བདེ་ལེགས་དཔལ་འབྱོར་ཕྱྭ་དང་གཡང་། །ཐམས་ཅད་བོད་ཀྱི་ཡུལ་དུ་བཀུག །རྒྱལ་པོའི་མངའ་ཐང་དར་ཞིང་རྒྱས། །གཙུག་ལག་དགེ་འདུན་ས་གཞི་གང་། །མངའ་བདག་ཆེན་པོའི་བསམ་པ་འགྲུབ། །གཡང་འགུགས་གཡང་ལེན་དེ་ནས་སྲིད། །ད་ལྟ་རྣལ་འབྱོར་སྒྲུབ་པ་པོས། །སྦྱིན་བདག་ཚེ་གཡང་སྤེལ་བའི་ཕྱིར། །བཀྲ་ཤིས་ལྷ་གཞི་དཀར་པོ་བཏིང་། །གཡང་རྟེན་སྣ་ཚོགས་གཅལ་དུ་བཀྲམ། །གཡང་ལྷ་འཁོར་བཅས་སྤྱན་དྲངས་ཏེ། །ཏིང་འཛིན་སྔགས་རྒྱའི་གཟི་བརྗིད་བསྐྱེད། །དར་དཀར་གཡབ་ཅིང་གཡང་བླན་ན། །ཆོས་ཀྱི་དབྱིངས་ཀྱི་བྱིན་རླབས་དང་། །རྒྱལ་བ་སྲས་བཅས་བདེན་པ་དང་། །ནོར་ལྷ་འཁོར་བཅས་མཐུ་སྟོབས་ཀྱིས། །འཁོར་འདས་ལམ་གསུམ་དཔལ་འབྱོར་ཀུན། །ཁུ་ཡེ་ཕྱྭ་དང་གཡང་དུ་ལེན། །ཕྱོགས་བཅུའི་སངས་རྒྱས་ཞིང་རྣམས་ཀྱི། །ངོ་མཚར་བཀོད་པ་རབ་འབྱམས་དང་། །རྩ་གསུམ་བྱིན་རླབས་དངོས་གྲུབ་དང་། །མཐུ་སྟོབས་ཕྲིན་ལས་གཡང་དུ་ལེན། །འཆི་མེད་གྲུབ་པའི་སྐུ་ཚེ་དང་། །རབ་བརྟན་རྡོ་རྗེ་བདུད་རྩིའི་བཅུད། །བློ་ལྡན་མཁས་པའི་རྣམ་དཔྱོད་དང་། །གྲུབ་པའི་ཉམས་རྟོགས་གཡང་དུ་ལེན། །འཕགས་སྐྱེའི་དགེ་འདུན་དར་རྒྱས་དང་། །མཁས་བཙུན་བཟང་གསུམ་ཐོས་བསམ་སྒོམ། །ཚངས་དབང་འཁོར་ལོས་སྒྱུར་རྒྱལ་གྱི། །མངའ་ཐང་དཔལ་འབྱོར་གཡང་དུ་ལེན། །སྟེང་ཕྱོགས་ལྷ་དང་འོག་ཕྱོགས་ཀླུ། །བར་ཕྱོགས་མི་ཡི་འཇིག་རྟེན་གྱི། །བརྟན་གཡོའི་དྭངས་མ་བཅུ་བཞི་དང་། །སྣོད་བཅུད་དགེ་མཚན་གཡང་དུ་ལེན། །བཀྲ་ཤིས་རྫས་རྟགས་རྒྱལ་སྲིད་བདུན། །དཔག་བསམ་ཤིང་དང་འདོད་འཇོའི་བ། །མ་རྨོས་ལོ་ཏོག་རིན་ཆེན་རི། །གཏེར་བུམ་བཅུད་རྣམས་གཡང་དུ་ལེན། །རྒྱ་གར་ཆོས་དང་རྒྱ་ནག་ཁྲིམས། །སྟག་གཟིག་ནོར་དང་གེ་སར་སྟོབས། །ཧོར་གྱི་རྩལ་དང་བོད་ཀྱི་ཚེ། །མཐོ་རིས་འབྱོར་བ་གཡང་དུ་ལེན། །རྣམ་ཐོས་སྲས་ཀྱི་དཔལ་འབྱོར་དང་། །ཀུ་བེ་ར་ཡི་རྟ་གཡང་དང་། །གང་བ་བཟང་པོའི་ལུག་གཡང་དང་། །ཛམ་ལྷའི་ནོར་རྣམས་གཡང་དུ་ལེན། །ནོར་རྒྱུན་མ་ཡི་ཕྱུགས་གཡང་དང་། །ཞིང་ལྷ་ཚངས་པའི་འབྲུ་གཡང་དང་། །མི་ཐུབ་དགྲ་ལྷའི་གོ་མཚོན་གཡང་། །ཉི་ཟླའི་བཀྲག་མདངས་གཡང་དུ་ལེན། །ཕྱུག་པོའི་ནོར་དང་བཙན་པོའི་སྟོབས། །འཕན་པོའི་བུ་དང་དར་པོའི་འཕྲུལ། །ལྷབ་ལྷུབ་གོས་དང་བང་མཛོད་ནོར། །བཅུད་ལྡན་ཟས་རྣམས་གཡང་དུ་ལེན། གཟུགས་བཟང་སྐད་སྙན་བློ་གྲོས་གསལ། །རང་བཞིན་བཟང་ལ་དགེ་བཅུ་སྤྱོད། །ཚེ་རིང་ནད་མེད་དབུ་འཕང་མཐོ། །བསོད་ནམས་དར་རྒྱས་གཡང་དུ་ལེན། །ཕྱོགས་ལས་རྣམ་པར་རྒྱལ་བའི་གཡང་། །འདོད་རྒུ་ལྷུན་གྱིས་གྲུབ་པའི་གཡང་། །མི་ཉམས་རྟག་ཏུ་བརྟན་པའི་གཡང་། །བཀྲ་ཤིས་དཔལ་འབྱོར་དགེ་ལེགས་ཀྱི། །ཕྱྭ་གཡང་ཐམས་ཅད་འདིར་ཁུག་ཅིག །ཉི་ཟླ་བཞིན་ཏུ་ཤར་ཞིང་བྱོན། །ལྷོ་སྤྲིན་བཞིན་ཏུ་འཐིབས་ཤིང་བྱོན། ཆུ་ཆེན་བཞིན་ཏུ་འབྲུབ་ཅིང་བྱོན། །སྦྲང་ཆར་བཞིན་ཏུ་འབབས་ཤིང་བྱོན། །འཐོར་བ་སྡུས་ལ་ཉམས་པ་གསོས། །ཕྱྭ་ཡི་ཉི་མ་ཀྱི་ལི་ལི། །གཡང་གི་ཟླ་བ་ཏ་ལ་ལ། །ཕྱྭ་འདི་རི་ལ་མ་བྲོས་ལ། །གཡང་འདི་སྒོ་ལ་མ་ཉམས་ཤིག །ཛ་ཡ་ཛ་ཡ་སིདྡྷི་ཧོཿ སྲིད་ཞིའི་དྭངས་བཅུད་གཡང་རྟེན་རྣམས་ལ་འུབ་ཀྱིས་བསྡུས་པར་མོས། །གཉིས་པ་གཡང་རྣམས་སྦ་ཞིང་བརྟན་པར་བྱ་བ་ནི། ཧཱུྃ། དཀོན་མཆོག་རྩ་གསུམ་བྱིན་རླབས་དང་། །ཆོས་དབྱིངས་འགྱུར་མེད་བདེན་པ་ཡིས། །འཁོར་འདས་ཕྱྭ་གཡང་དྭངས་མའི་བཅུད། །བཀྲ་ཤིས་གཡང་རྟེན་རྣམས་ལ་ཐིམ། །ས་བཅུད་སེར་པོ་གསེར་ལ་བསྡུ། །ཆུ་བཅུད་ལན་ཚྭའི་སྙིང་པོར་བསྡུ། །མེ་བཅུད་འབར་བའི་ཤེལ་ལ་བསྡུ། །རླུང་བཅུད་སྲབ་འཇམ་དར་ལ་བསྡུ། །མཁའ་བཅུད་མེ་ལོང་གཙང་མར་བསྡུ། །སྤྲོས་པས་ཁམས་གསུམ་བཀྲག་མདངས་ལྡན། །བསྡུས་པས་རྟེན་ལ་གཟི་བྱིན་བསྐྱེད། །བརྟན་པས་མི་འགྱུར་རྡོ་རྗེ་འདྲ། །མི་ཉམས་ཉི་ཟླའི་གའུར་སྦ། །མི་ཤིགས་རྡོ་རྗེའི་ཕྲེང་བས་བསྡམ། །བདུད་རྩི་ཐབ་སྦྱོར་རིག་སྔགས་ཀྱི། །བདེན་པའི་མཐུ་ཡིས་བགེགས་ལས་སྲུངས། །ཆོས་ཀྱི་དབྱིངས་སུ་བཅུད་སྦས་པས། །སངས་རྒྱས་ཀྱིས་ཀྱང་མི་གཟིགས་ན། །གནོད་བྱེད་བགེགས་ཀྱིས་ལྟ་ཅི་སྨོས། །ཆོས་ཉིད་ཐབས་ཤེས་སྐུ་གསུང་ཐུགས། །ཚད་མེད་ཡེ་ཤེས་ཕ་རོལ་ཕྱིན། ཁ་སྦྱོར་བདུན་གྱི་ཕྱག་རྒྱ་ལས། །ནམ་ཡང་འདའ་བར་མི་འགྱུར་ཞིང་། །ཚེ་གཡང་བཀྲ་ཤིས་འཕེལ་བར་ཤོག །ཨོཾ་བཛྲ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ། བཛྲ་རཀྵ་རཀྵ། ལན་གསུམ་བརྗོད། །དེ་དང་འབྲེལ་བར། མ་འབྱོར་བ་དང༴སོགས། ཡིག་བརྒྱ། ཨཱ་ལི་ཀཱ་ལི། རྟེན་འབྲེལ་སྙིང་པོ་ལན་གསུམ་བརྗོད་ལ་ལྷག་ཆད་ཁ་བསྐང་ཞིང་ནུས་པ་བརྟན་པར་བྱའོ། །གསུམ་པ་བརྟན་བཞུགས་ནི། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་མགོན་པོ་རྣམ་ཐོས་སྲས་འཁོར་དང་བཅས་པ་བདག་ལ་དགོངས་སུ་གསོལ། ཇི་སྲིད་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་མི་གནས་པའི་མྱ་ངན་ལས་འདས་པའི་ས་ལ་མ་བཞག་གི་བར་དུ་རྒྱལ་བ་རྣམས་མྱ་ངན་ལས་མི་འདའ་བར་བརྟན་པར་བཞུགས་སུ་གསོལ། །བྱེ་བྲག་ཏུའང་ཕྱྭ་གཡང་སྒྲུབ་པའི་རྟེན་འདི་རྣམས་ལ་བསྐྱེད་ཅིང་སྤྱན་དྲངས་པའི་ལྷ་ཚོགས་ཐམས་ཅད་ཇི་སྲིད་འབྱུང་བ་བཞིའི་གནོད་པས་མ་ཞིག་གི་བར་དེ་སྲིད་དུ་བརྟན་པར་བཞུགས་སུ་གསོལ། །བརྟན་པར་བཞུགས་ནས་ཀྱང་བདག་དང་སྦྱིན་པའི་བདག་པོ་ལ་ཚེ་དང་བསོད་ནམས། དཔལ་དང་འབྱོར་བ། སྙན་གྲགས་རླུང་རྟ། ཕྱྭ་གཡང་ལོངས་སྤྱོད་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཨོཾ་སུ་པྲ་ཏིཥྛ་བཛྲཱ་ཡ་སྭཱ་ཧཱ། ཞེས་ལན་གསུམ་བརྗོད།