རྒྱུན་ཁྱེར་ཡང་སྙིང་འདུས་པ།

དམ་ཆོས་སྐུ་གསུམ་དགོངས་མཛོད་ལས། །རྒྱུན་ཁྱེར་ཡང་སྙིང་འདུས་པ་བཞུགས། །

སྐུ་གསུམ་ཡོངས་འདུས་ལྷ་ལ་ཕྱག་འཚལ་ལོ། །རྒྱུན་གྱི་ཕྲིན་ལས་སྤྲོས་མེད་ལམ་ཁྱེར་ཡང་སྙིང་འདུས་པ་བསྟན་པར་བྱ་སྟེ། དེ་ལའང་དོན་གསུམ་སྟེ། སྦྱོར་བ། དངོས་གཞི། རྗེས་ཀྱི་རིམ་པའོ། །དང་པོ་སྦྱོར་བའི་རིམ་པ་ལ། གསོལ་འདེབས་ནི། གདོད་མའི་མགོན་པོ་ཀུན་བཟང་སྣང་མཐའ་ཡས། །ཐུགས་རྗེའི་མངའ་བདག་འཕགས་མཆོག་སྤྱན་རས་གཟིགས། །མཐའ་ཡས་འགྲོ་བའི་འདྲེན་མཆོག་པདྨ་འབྱུང་། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །གསང་གསུམ་མཛོད་འཛིན་བཀའ་བབས་རྗེ་འབངས་གྲོགས། །དག་སྣང་ཆོས་ལ་དབང་བ་དྷརྨཱའི་མཚན། །ཆོས་བདག་རྩ་བརྒྱུད་བླ་མའི་ཚོགས་བཅས་ལ། །གསོལ་བ་འདེབས་སོ་བྱིན་རླབས་དབང་བསྐུར་སྩོལ། །རབ་འབྱམས་སྐུ་གསུམ་ཡོངས་འདུས་ལྷག་པའི་ལྷ། །མཆོག་གསུམ་རྩ་གསུམ་དམ་ཅན་བསྲུང་མར་བཅས། །མ་ལུས་ལུས་པ་མེད་པ་ཐམས་ཅད་ལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །དེ་ལྟར་གསོལ་བ་བཏབ་པས་ཕུང་ཁམས་དག། །སྒོ་གསུམ་ལྷ་སྔགས་ཆོས་སྐུའི་རོལ་བར་རྫོགས། །འཁོར་འདས་མཉམ་ཉིད་སྐུ་གསུམ་དགོངས་ཀློང་སྨིན། །ཚེ་འདིར་རྡོ་རྗེ་འཆང་དབང་མངོན་གྱུར་ཤོག །སྐྱབས་འགྲོ་ནི། ན་མོ། བདག་སོགས་འགྲོ་ཀུན་བྱང་ཆུབ་སྙིང་པོའི་བར། །སྐུ་གསུམ་འདུས་པ་འགྲོ་མགོན་པདྨ་འབྱུང་། །རང་བྱུང་རིག་པ་དོན་གྱི་བླ་མ་ལ། །འདུ་འབྲལ་མེད་པའི་ངང་ནས་སྐྱབས་སུ་མཆི། །ལན་གསུམ། སེམས་བསྐྱེད་ནི། ཀྱཻ་མ། བཟོད་དཀའ་འཇིགས་རུང་འཁོར་བའི་གྲོང་ཁྱེར་དུ། །འཁྲུལ་རྟོག་སྒྱུ་མས་བསླུས་པའི་འགྲོ་བ་ཀུན། །སྐུ་གསུམ་དབྱེར་མེད་བླ་མའི་གོ་འཕང་ལ། །འགོད་ཕྱིར་དོན་དམ་རྡོ་རྗེའི་སེམས་བསྐྱེད་དོ།། ལན་གསུམ། ཚོགས་བསགས་ནི། ཧཱུྃ་ཧྲཱིཿ སྐུ་གསུམ་ཡོངས་འདུས་ཆོས་ཉིད་གདོད་མའི་ལྷར། །མངོན་སུམ་རང་ཞལ་མཇལ་བས་ཕྱག་འཚལ་ལོ། །ཉམས་སྣང་ཡོན་ཏན་གོང་འཕེལ་མཆོད་པ་འབུལ། །རིག་པ་ཚད་ཕེབས་དགོངས་པའི་ཀློང་དུ་བཤགས། །ཆོས་ཟད་བློ་འདས་ཆེན་པོར་ཡི་རང་ངོ། །དོན་དམ་རྡོ་རྗེ་སྙིང་པོའི་ཆོས་འཁོར་བསྐོར། །འཁོར་འདས་དབྱེར་མེད་ངང་དུ་བཞུགས་གསོལ་འདེབས། །འཁོར་གསུམ་དམིགས་མེད་ཆོས་དབྱིངས་ཀློང་དུ་བསྔོ།། དེ་ནས་བཀའ་བསྒོ་བ་ནི། ཧཱུྃ་ཧྲཱིཿ མ་རིག་ལས་ཉོན་གཟུང་འཛིན་འདྲེ་གདོན་བགེགས། །རྟོག་འཇོམས་དབང་ཆེན་ཁྲོ་བོས་བཀའ་བསྒོས་བཞིན། །མི་ལྡོག་ཆོས་དབྱིངས་ཡེ་ཤེས་ཀློང་དགུར་དེངས། །བཀའ་ལས་འདས་ན་རིག་སྟོང་རྡོ་རྗེས་གཞོམ། །དྲག་སྔགས་བརྗོད་ཅིང་ཐུན་བྲབ་བོ། །བསྲུང་འཁོར་ནི། ཧཱུྃ་ཧྲཱིཿ ཕྱི་སྣོད་གཞལ་ཡས་ནང་བཅུད་སྐུ་གསུམ་ལྷ། །ཕྱོགས་མཚམས་ཁྲོ་མཚོན་མེ་དཔུང་འབར་བས་གཏམས། །རང་བཞིན་ལྷུན་གྲུབ་དག་པ་རབ་འབྱམས་ལ། །འཁྲུལ་རྟོག་འབྱུང་པོས་ནམ་ཡང་གླགས་མི་རྙེད། །བཛྲ་ཙཀྲ་རཀྵ་རཀྵ་བྷྲཱུཾ། བརྡ་ཕྱག་ནི། ཧཱུྃ་ཧྲཱིཿ སྲིད་ཞི་གཉིས་མེད་སྐུ་གསུམ་མཉམ་བརྡལ་ཡང་། །མ་རིག་སྒྲིབ་གཡོག་རང་གསལ་ཐབས་ཀྱིས་བསལ། །སེམས་ཉིད་རིག་པ་རང་ཤར་སྐུ་གསུམ་ངང་། །གཉིས་མེད་ཡེ་ཤེས་རང་ཞལ་མཇལ་ཕྱག་འཚལ།། ཧཱུྃ་ཨ་ལ་ལ་ཧོ། བྱིན་འབེབས་ནི། ཧཱུྃ་ཧྲཱིཿ རང་བྱུང་ལྷུན་གྲུབ་མཁའ་སྤྱོད་དཔལ་རི་ནས། །སྐུ་གསུམ་ཡོངས་འདུས་བླ་མའི་ལྷ་ཚོགས་རྣམས། །གནས་འདིར་བྱིན་ཕོབས་སྒྲུབ་པའི་རྟགས་མཚན་སྟོན། །དབང་དང་བྱིན་རླབས་དངོས་གྲུབ་མ་ལུས་སྩོལ། །བཛྲ་ས་མ་ཡཱ་ཨེ་ཨ་རལླི་ཕེཾ་ཕེཾ་ཧྲིང་ཧྲིང་ཛ་ཛཿ བྱིན་བརླབས་ནི། རཾ་ཡཾ་ཁཾ། མཆོད་རྫས་དངོས་འཛིན་མ་དག་བསྲེག་གཏོར་བཀྲུས། །རྣམ་དག་རང་བྱུང་མཆོད་པའི་སྤྲིན་ཆེན་པོ། །དཀྱིལ་འཁོར་ལྷ་ཚོགས་དགྱེས་སྐོང་དམ་པ་རུ། །ཏིང་འཛིན་སྔགས་དང་ཕྱག་རྒྱས་སྦྱངས་སྤེལ་བསྒྱུར། ཨོཾ་ཨཱཿཧཱུྃ། ལན་གསུམ། བཤགས་བསྡམ་ནི། ཧཱུྃ་ཧྲཱིཿ རང་བྱུང་རིག་པ་ཡེ་གྲོལ་སྙིང་པོའི་ལྷ། །མ་རིག་གཉིས་རྟོག་མཉམ་ཆེན་ཀློང་དུ་བཤགས། །སེམས་ཉིད་ངང་དུ་སྐུ་གསུམ་ཡེ་རྫོགས་ཕྱིར། །མི་གཏོང་རྩེ་གཅིག་བསྒྲུབ་པར་དམ་བཅའ་འོ།། བཛྲ་ས་མ་ཡཱ་ཨ་ཏི། གཉིས་པ་དངོས་གཞི་ལ། བསྐྱེད་རིམ་ནི། ཧཱུྃ་ཧྲཱིཿ ཆོས་དབྱིངས་སྟོང་ཆེན་བློ་འདས་དེ་བཞིན་ཉིད། །དམིགས་མེད་སྙིང་རྗེའི་རང་མདངས་ཀུན་ཏུ་སྣང་། །རིག་པ་རྒྱུ་ཡི་ཧཱུྃ་མཐིང་འོད་ལྔ་འབར། །དེ་ལས་ཨེ་ཡཾ་ར་སུཾ་ཀེཾ་རཾ་བྷྲཱུཾ། །རིམ་པར་འཕྲོས་ཤིང་འོད་དུ་ཞུ་བ་ལས། །འབྱུང་བ་རིམ་བརྩེགས་བསྲུང་འཁོར་དུར་ཁྲོད་དབུས། །རྒྱ་དཔངས་མཐའ་ཡས་དཔལ་གྱི་རི་བོའི་སྤོར། །སྐུ་གསུམ་ཞི་ཁྲོའི་ཕོ་བྲང་པདྨ་འོད། །ཐོག་རིམ་བཞི་ལྡན་ཚད་དང་མཚན་ཉིད་རྫོགས། །དེ་དབུས་སེང་ཁྲི་པདྨ་ཉི་ཟླའི་སྟེང་། །ཧཱུྃ་སྔོན་འཕྲོ་འདུས་ཡོངས་སུ་གྱུར་པ་ལས། །བདེ་གཤེགས་ཡོངས་འདུས་གུ་རུ་པདྨ་འབྱུང་། །ཨ་ཙར་གཞོན་ཚུལ་དཀར་དམར་མཚན་དཔེ་རྫོགས། །ཕོད་ཁ་ཆོས་གོས་ཟབ་བེར་སག་ལྷྭམ་གསོལ། །ཤ་བའི་མཉེན་ཞུ་རྒོད་ལྡེམ་དར་སྣས་བརྒྱན། །རྡོ་རྗེ་ཐོད་བུམ་ཁ་ཊཱཾ་ཕྱག་རྒྱས་མཛེས། །རྒྱལ་པོ་རོལ་སྟབས་སྣང་སྲིད་ཟིལ་གྱིས་གནོན། །སྐུ་ལ་གདན་གསུམ་དཀྱིལ་འཁོར་མ་འདྲེས་རྫོགས། །ཕྱོགས་བཞིར་བཱི་མ་མི་ཏྲ་ཞི་བ་འཚོ། །སྦ་མི་ཁྲི་གཞེར་མངའ་བདག་ཆོས་ཀྱི་རྒྱལ། །མཚམས་བཞིར་འོད་འཆང་མ་སོགས་ཊཱཀྐི་བཞི། །སོ་སོའི་རྒྱན་དང་ཆ་བྱད་མ་འདྲེས་གསལ། །དེ་རྒྱབ་སྤྲུལ་པའི་གུ་རུ་མཚན་མཆོག་བརྒྱད། །རིག་འཛིན་བརྒྱད་དང་བཀའ་བབས་གྲུབ་བརྙེས་བརྒྱད། །འཕགས་བོད་མཁས་གྲུབ་ལོ་པཎ་གཏེར་སྟོན་ཚོགས། །རིག་འཛིན་སློབ་དཔོན་ཤིང་རྟའི་སྲོལ་འབྱེད་རྣམས། །སོ་སོའི་སྤྲུལ་པ་ཡང་སྤྲུལ་འཁོར་ཚོགས་བཅས། །དཔག་མེད་ཏིལ་གོང་ཁ་ཕྱེས་ལྟ་བུར་གསལ། །དེ་སྟེང་ཐོད་ཕྲེང་རིགས་ལྔ་གངས་ཆེན་མཚོ། །རང་རིག་ལོངས་སྤྱོད་རྫོགས་པའི་འཁོར་ཚོགས་བཅས། །དེ་སྟེང་ཆོས་སྐུ་ཀུན་བཟང་སྣང་མཐའ་ཡས། །སྟངས་དཔྱལ་སྤྲོས་མེད་འོད་ལྔའི་ཀློང་དུ་གསལ། །འོག་ཕྱོགས་ཁྲོ་བོ་རོལ་པའི་གཞལ་ཡས་ན། །ཆེ་མཆོག་ཡོངས་འདུས་པདྨ་དྲག་པོ་རྩལ། །དཔལ་ཆེན་གཙོ་དགུ་ལ་སོགས་འཇིགས་པའི་གར། །གཅིག་ཏུ་མ་ངེས་རྣམ་འགྱུར་མཐའ་ཡས་སྟོན། །གཞན་ཡང་རཀྴའི་སྡེ་དཔོན་དགུ་ལ་སོགས། །རྔ་ཡབ་དཔལ་རིའི་ཞིང་གི་རྟེན་བརྟེན་པ། །མ་ལུས་ལུས་པ་མེད་པ་ཐམས་ཅད་ཀུན། །མངོན་སུམ་ལྟ་བུར་གསལ་བརྟན་རྩལ་རྫོགས་བསྒོམ། །ལྷ་ཚོགས་ཀུན་གྱི་གནས་གསུམ་འབྲུ་གསུམ་ལས། །འཕྲོས་པའི་འོད་ཀྱིས་ཟངས་མདོག་དཔལ་རི་ནས། །སྐུ་གསུམ་ཡོངས་རྫོགས་བླ་མའི་ལྷ་ཚོགས་རྣམས། །མཁའ་ལ་འཇའ་སྤྲིན་འཁྲིགས་ལྟར་སྤྱན་དྲངས་གྱུར། །སྤྱན་འདྲེན་ནི། ཧཱུྃ་ཧྲཱིཿ རང་སྣང་རྣམ་དག་རྔ་ཡབ་དཔལ་རི་ནས། །རང་རིག་གདོད་མའི་མགོན་པོ་པདྨ་འབྱུང་། །རང་བྱུང་སྐུ་གསུམ་ལྷ་ཚོགས་འཁོར་བཅས་རྣམས། །བྱིན་རླབས་དངོས་གྲུབ་སྩོལ་ཕྱིར་གཤེགས་སུ་གསོལ། །བཛྲ་ས་མ་ཡ་ཛཿ ཛཿཧཱུྃ་བཾ་ཧོ། བཞུགས་གསོལ་ནི། ཧཱུྃ་ཧྲཱིཿ རང་བྱུང་རིག་པའི་དབྱིངས་ནས་སྤྱན་དྲངས་པའི། །སྐྱེ་འགགས་འགྱུར་མེད་དོན་དམ་ཡེ་ཤེས་ལྷ། །ཀུན་རྫོབ་བློ་ཡིས་བསྐྱེད་པའི་དམ་ཚིག་ལྷར། །ཆུ་ལ་ཆུ་བཞིན་བརྟན་པར་བཞུགས་སུ་གསོལ། །བཛྲ་ས་མ་ཡཱ་ཏིཥྛ་ལྷན། ཕྱག་འཚལ་བ་ནི། ཧཱུྃ་ཧྲཱིཿ རང་བྱུང་སྐུ་གསུམ་དོན་གྱི་པདྨ་འབྱུང་། །ཡེ་ནས་མི་གཉིས་རང་རིག་ངོ་བོ་རུ། །ཤེས་ཤིང་རྟོགས་ནས་དོན་དམ་ཡེ་ཤེས་ལྷར། །སྒོ་གསུམ་འདུ་འབྲལ་མེད་པར་གུས་ཕྱག་འཚལ། །ཨོཾ་ཨཱཿན་མོ་ནཱ་མཿཧཱུྃ། ཕྱི་མཆོད་ནི། ཧཱུྃ་ཧྲཱིཿ དངོས་འབྱོར་ཡིད་སྤྲུལ་སྔགས་རྒྱ་ཏིང་འཛིན་གྱིས། །རབ་སྤེལ་ཉེར་སྤྱོད་བདུན་དང་འདོད་ཡོན་ལྔ། །བཀྲ་ཤིས་རྟགས་རྫས་རྒྱལ་སྲིད་རིན་ཆེན་སོགས། །རྨད་བྱུང་ཀུན་བཟང་མཆོད་སྤྲིན་རྒྱ་མཚོར་འབུལ། །ཨོཾ་བཛྲ་ཨརྒྷཾ༴སོགས། ཤཔྟ་མ་ཧཱ་སརྦ་པཱུ་ཛ་མེ་གྷ་ཨཱཿཧཱུྃ། ནང་མཆོད་ནི། ཧཱུྃ་ཧྲཱིཿ རྩ་བརྒྱད་ཡན་ལག་སྟོང་སྦྱར་ཨ་མྲྀ་ཏ། །རྒྱུ་རྐྱེན་སྣ་ཚོགས་སྦྱར་བའི་རཀྟ་དང་། །འབྲུ་སྨན་རྩི་བཅུད་སྦྱར་བའི་བྷ་ལིང་སོགས། །མཆོག་ཐུན་དངོས་གྲུབ་སྒྲུབ་པའི་དམ་རྫས་འབུལ། །ཨོཾ་ཨཱཿཧཱུྃ་མ་ཧཱ་ཨ་མྲྀ་ཏ་རཀྟ་བྷ་ལིང་ཏ་སརྦ་པཱུ་ཛ་ཁ་ཧཱི། གསང་མཆོད་ནི། ཧཱུྃ་ཧྲཱིཿ ཚོགས་དྲུག་རང་གྲོལ་ཐབས་མཆོག་ཡེ་ཤེས་དང་། །ཡུལ་དྲུག་གནས་དག་ཤེས་རབ་དབྱིངས་ཀྱི་ཡུམ། །མཉམ་སྦྱོར་ཟག་མེད་བདེ་སྟོང་མཆོད་པ་དང་། །མ་རིག་ལས་ཉོན་བག་ཆགས་བསྒྲལ་མཆོད་འབུལ། །མ་ཧཱ་པྲ་ཛྙཱ་ཛྙཱ་ན་པཱུ་ཛ་ཧོ། བསྟོད་པ་ནི། ཧཱུྃ་ཧྲཱིཿ མ་བཅོས་སྤྲོས་བྲལ་བླ་མ་ཆོས་ཀྱི་སྐུ། །བདེ་ཆེན་ལྷུན་གྲུབ་བླ་མ་ལོངས་སྤྱོད་རྫོགས། །པད་སྡོང་ལས་འཁྲུངས་བླ་མ་སྤྲུལ་པའི་སྐུ། །སྐུ་གསུམ་རྡོ་རྗེ་འཆང་ལ་ཕྱག་འཚལ་བསྟོད། །ཀུན་བཟང་རིགས་ལྔ་མཁན་སློབ་རྗེ་འབངས་གྲོགས། །མཁས་གྲུབ་ལོ་པཎ་རིག་འཛིན་བརྒྱུད་པར་བཅས། །སངས་རྒྱས་འཕགས་ཚོགས་ལྷ་མོ་སྒོ་སྲུང་གིང་། །དབང་དྲག་ལྷ་ཚོགས་བསྲུང་མར་བཅས་ལ་བསྟོད། །མདོར་ན་དག་པའི་ཞིང་ཁམས་དཔལ་གྱི་རིར། །ཡེ་ཤེས་དབྱིངས་ནས་སྤྲུལ་པའི་སྐུ་གསུམ་ལྷ། །ཐུགས་དམ་ཐུགས་རྗེས་འཁོད་པའི་སྤྲུལ་འཁོར་ཚོགས། །མ་ལུས་ཡོངས་སུ་རྫོགས་ལ་ཕྱག་འཚལ་བསྟོད།། ཛབ་ནི། སྐུ་གསུམ་ཡོངས་འདུས་གུ་རུའི་ཐུགས་དབུས་སུ། །གསེར་རྡོར་རྩེ་ལྔ་ནས་ཙམ་ལྟེ་བ་རུ། །ཟླ་སྟེང་ཧཱུྃ་སྔོན་སྤུ་ཡིས་བྲིས་ལྟ་བུར། །ཤིན་ཏུ་ཕྲ་བའི་སྔགས་ཕྲེང་འོད་ལྔ་པ། །གཡས་སུ་འཁོར་བའི་འོད་ཀྱིས་སྣོད་བཅུད་སྦྱངས། །སྣང་སྲིད་དག་པ་ལྷ་དང་གཞལ་ཡས་ཁང་། །སྒྲ་གྲགས་སྟོང་པ་སྔགས་མཆོག་རྡོ་རྗེའི་དབྱངས། །དྲན་བསམ་རང་གྲོལ་སྐུ་གསུམ་དགོངས་པའི་ཀློང་། །མ་དག་རྟོག་འཁྲུལ་མཚན་མ་རང་སར་གྲོལ། །རབ་འབྱམས་དག་པའི་སྣང་བ་འུབ་ཆུབ་རོལ།། ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ཞེས་བར་མི་ཆད་པ་ཆུ་བོའི་རྒྱུན་བཞིན་དུ་བཟླའོ།། སྤྱིར་ནི་བསྙེན་བསྒྲུབ་ལས་གསུམ་འདི་ཁོ་ན་ལ་ཚངས་ཀྱང་། བྱེ་བྲག་སོ་སོར་བཟླ་བར་འདོད་ན་བསྒྲུབ་པ་ནི། ཧཱུྃ་ཧྲཱིཿ སྐུ་གསུམ་དམ་ཚིག་སེམས་དཔའི་ཐུགས་དབུས་སུ། །ཡེ་ཤེས་སེམས་དཔའ་རིག་འཛིན་ཚེ་དཔག་མེད། །ཚོན་གང་དམར་གསལ་པད་ཟླར་ལོངས་སྤྱོད་རྫོགས། །ལྷ་ལྕམ་དཀར་མོ་མདའ་དར་ཚེ་བུམ་སྦྱོར། །དེ་ཡི་ཐུགས་ཀར་ཉི་སྟེང་ཏིང་འཛིན་སེམས། །གསེར་རྡོར་རྩེ་ལྔ་ནས་ཙམ་ལྟེ་བའི་དབུས། །ཡུངས་དཀར་ཕྱེད་འདྲའི་ཟླ་སྟེང་གསལ་འཚེར་ཧྲཱིཿ ཤིན་ཏུ་ཕྲ་བའི་སྔགས་གཡས་འཁོར་བ་ལས། །འོད་ཟེར་དཔག་ཡས་ཀུན་བཟང་མཆོད་སྤྲིན་སྤྲོས། །སྐུ་གསུམ་བདེ་གཤེགས་ཡོངས་རྫོགས་མཆོད་ཅིང་བསྐུལ། །མཁའ་མཉམ་འགྲོ་བའི་ལས་ཉོན་སྒྲིབ་ཚོགས་སྦྱངས། །མ་ལུས་ཕྱམ་གཅིག་སྐུ་གསུམ་ཐོབ་པར་བྱས། །བྱིན་དབང་འོད་ལྔའི་རྣམ་པར་འདུས་ཤིང་ཐིམ། །མཆོག་ཐུན་དངོས་གྲུབ་མ་ལུས་མྱུར་ཐོབ་བསམ། །ཨོཾ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛཿ ཧྲཱིཿམ་ཧ་རི་ནི་ས་ར་ཙ་ཧྲཱི་ཡ་ཙིཏྟ་ཧྲིང་ཧྲིང་ཛ་ཛཿ སརྦ་སིདྡྷི་ཕ་ལ་ཧཱུྃ་ཨཿ རིག་འཛིན་ཡབ་ཡུམ་བསྒྲུབ་པའི་ཡང་བཅུད་འདི། །འབུམ་ཕྲག་ཞེ་གཉིས་གྲངས་འཁྱོལ་ལས་སྐལ་ལྡན། །ཚེ་ལུས་འདིའམ་འཕོས་མ་ཐག་ཉིད་ནས། །དཔལ་གྱི་རི་བོར་མཆོག་གི་ས་ལ་རེག །ལས་སྦྱོར་ནི། ཧཱུྃ་ཧྲཱིཿ སྐུ་གསུམ་ཡོངས་འདུས་བླ་མའི་ཐུགས་ཀ་ནས། །འོད་ཟེར་དཔག་ཡས་ནམ་མཁའ་གང་བར་འཕྲོས། །སྐུ་གསུམ་བདེ་གཤེགས་སྲས་བཅས་མ་ལུས་པའི། །སྐུ་གསུང་ཐུགས་དང་ཡོན་ཏན་ཕྲིན་ལས་ཀྱི། །ཚེ་དབང་བྱིན་རླབས་ཐུན་མཆོག་དངོས་གྲུབ་དང་། །སྣོད་ཀྱི་སྙིང་པོ་དངས་བཅུད་བཀྲག་མདངས་འོད། །བཅུད་ཀྱི་ཚེ་བསོད་སྟོབས་འབྱོར་དཔལ་ཡོན་རྣམས། །མར་མེ་མཆེད་ལྟར་མ་ཉམས་མི་གནོད་པར། །བསྡུས་ཤིང་ཐིམ་པས་སྲིད་ཞིའི་ཚེ་བསོད་ལ། །དབང་བསྒྱུར་བསྟན་འགྲོའི་ཕན་བདེ་སྤེལ་ནུས་གྱུར། །ཨོཾ་ཨཱཿཧཱུྃ་བཛྲ་གུ་རུ་པདྨ་ཨ་ཡུ་ཥེ་བྷྲཱུཾ་ནྲི་ཛཿཔུཎྱཻ་ཛྙཱ་ན་གུ་ཎ་ཀརྨ་སརྦ་སིདྡྷི་ཧཱུྃ། ཞེས་བཟླ་ཞིང་། ཐུན་མཐར་ཚེ་བསྐུལ་བྱའོ།། རྗེས་ལ་ཚོགས་ཀྱི་ལས་རིམ་སྤྱི་མཐུན་བྱ་བར་སྤྲོ་ན། ཚོགས་རྫས་རྣམས་བྱིན་གྱིས་བརླབས་པ་ནི། ཧཱུྃ་ཧྲཱིཿ རྨད་བྱུང་འདོད་ཡོན་ཚོགས་ཀྱི་ལོངས་སྤྱོད་རྫས། །དངོས་འཛིན་མཚན་མའི་བག་ཆགས་དབྱིངས་སུ་སྦྱངས། །རྣམ་དག་དམ་རྫས་བདུད་རྩིའི་གཏེར་ཆེན་པོ། །དཔག་མེད་ཀུན་བཟང་མཆོད་སྤྲིན་ལྟ་བུར་གྱུར། །རཾ་ཡཾ་ཁཾ། གསུམ། ཨོཾ་ཨཱཿཧཱུྃ། གསུམ། སྤྱན་འདྲེན་ནི། ཧཱུྃ་ཧྲཱིཿ རང་བཞིན་ལྷུན་གྲུབ་དཔལ་རིའི་ཞིང་ཁམས་ནས། །རང་རིག་གདོད་མའི་མགོན་པོ་པདྨ་འབྱུང་། །རང་བྱུང་སྐུ་གསུམ་ལྷ་ཚོགས་མ་ལུས་རྣམས། །ལོངས་སྤྱོད་ཚོགས་ལ་སྤྱན་འདྲེན་གཤེགས་སུ་གསོལ། །བླ་མེད་སྒྲུབ་པའི་གནས་མཆོག་ཉམས་རེ་དགའ། །སྐལ་ལྡན་རྣལ་འབྱོར་མཆེད་ལྕམ་དམ་རེ་གཙང་། །ལོངས་སྤྱོད་དམ་རྫས་བཀྲག་དང་མདངས་རེ་བཟང་། །གནས་འདིར་བྱིན་ཕོབ་དབང་དང་དངོས་གྲུབ་སྩོལ། །བཛྲ་ས་མ་ཡཱ་ཛ་ཛཿ ཨ་ཝེ་ཤ་ཡ་ཕཻཾ་ཕཻཾ། ཚོགས་མཆོད་ནི། ཧཱུྃ་ཧྲཱིཿ དམ་རྫས་ཟག་མེད་ཚོགས་མཆོད་བདུད་རྩིའི་སྤྲིན། །རྨད་བྱུང་འདོད་དགུའི་འོད་ཕུང་འཕྲོ་བ་འདི། །སྐུ་གསུམ་ཡོངས་འདུས་བླ་མའི་ལྷ་ཚོགས་ཀྱིས། །བཞེས་ནས་མཆོག་ཐུན་དངོས་གྲུབ་དེང་འདིར་སྩོལ། །མ་ཧཱ་ག་ཎ་ཙཀྲ་པཱུ་ཛ་ཁཱ་ཧི། ཚོགས་བཤགས་ནི། ཧཱུྃ་ཧྲཱིཿ བདག་སོགས་མ་རིག་ལས་ཉོན་དབང་གྱུར་ཏེ། །དུས་གསུམ་བསགས་པའི་སྒོ་གསུམ་ཉེས་ལྟུང་སོགས། །འཕྲལ་གྱི་རྐྱེན་དང་ཡུན་གྱི་སྒྲིབ་གྱུར་ཀུན། །ཚོགས་ཀྱི་མཆོད་པས་བསྐང་བཤགས་དག་པར་བགྱི། །བཛྲ་ས་མ་ཡ་ཤུདྡྷེ་ཨཿ བསྒྲལ་བསྟབས་ནི། ཧཱུྃ་ཧྲཱིཿ མ་རིག་རྒྱུ་ལས་བྱུང་བའི་གདོན་དང་བགེགས། །བདག་མེད་རྟོགས་པའི་མཚོན་གྱིས་དུམ་བུར་གཏུབ། །རྣམ་ཤེས་རིག་པ་ཆོས་ཉིད་ཀློང་དུ་སྤོར། །ལས་སྒྲིབ་གཟུགས་ཕུང་ཚོགས་ཀྱི་འཁོར་ལོར་འབུལ། །རཱུ་ཏྲ་ཧ་ལ་པཉྩ་པཱུ་ཛ་ཁཱ་ཧི། འདིར་ཚོགས་ལ་རོལ། ལྷག་གཏོར་ནི། ཨོཾ་ཨཱཿཧཱུྃ་ཧ་ཧོ་ཧྲཱིཿ ཕཻཾ་ཕཻཾཿ ཧཱུྃ་ཧྲཱིཿ སྐུ་གསུམ་ཡོངས་འདུས་རྒྱལ་བའི་དཀྱིལ་འཁོར་གྱི། །བཀའ་སྡོད་བསྲུང་མ་གནས་ཡུལ་དུར་ཁྲོད་བདག །དབང་ཕྱུག་གིང་ལིང་ཤ་ཟ་འབར་མའི་ཚོགས། །ལྷག་གཏོར་བཞེས་ལ་ལས་བཞི་འགྲུབ་པར་མཛོད། །ས་མ་ཡ་ཨུཥྩི་ཊ་བྷ་ལིང་ཏ་ཁཱ་ཧི། བསྐུལ་བ་ནི། ཧཱུྃ་ཧྲཱིཿ རབ་འབྱམས་རྒྱལ་བའི་ཞིང་ན་བཞུགས་པ་ཡི། །སྐུ་གསུམ་སྒྱུ་འཕྲུལ་དྲྭ་བའི་དཀྱིལ་འཁོར་ལྷ། །ཐུགས་རྗེས་ཡེ་ཤེས་སྒྱུ་མའི་གར་བསྒྱུར་ལ། །ཐུགས་དམ་མ་གཡེལ་ཐབས་མཁས་འགྲོ་དོན་མཛོད། །ངན་རྟོག་འཁྲུལ་བའི་བག་ཆགས་གཞི་ལ་དག །ཉམས་རྟོགས་ཡོན་ཏན་བཟང་ཞེན་རང་སར་གྲོལ། །སྦྱངས་བགྲོད་མཐར་ཕྱིན་ཉམས་ལེན་ཟད་སར་སྐྱོལ། །སྐུ་གསུམ་ལྷུན་གྱིས་འགྲུབ་པའི་ཕྲིན་ལས་མཛོད།། ཆད་ཐོ་ནི། ཧཱུྃ་ཧྲཱིཿ སྔོན་ཚེ་ཀུན་བཟང་འོད་སྣང་མཐའ་ཡས་ཀྱིས། །རྡོ་རྗེ་སྙིང་པོའི་གསང་རྒྱུད་རྟག་ཏུ་བརྟན། །བར་དུ་རྒྱལ་བ་རྒྱ་མཚོ་སྤྱན་རས་གཟིགས། །འཁོར་བ་དོང་སྤྲུགས་འགྲོ་བའི་དོན་སེམས་བསྐྱེད། །ཐ་མ་པད་འབྱུང་རྒྱལ་བ་གཉིས་པ་ཡིས། །སྐུ་གསུམ་མངོན་གྱུར་བསྟན་འགྲོའི་བདེ་སྐྱིད་སྤེལ། །དེ་རྗེས་རང་སྣང་དག་པ་དཔལ་རིའི་རྩེར། །རང་རིག་སྐུ་གསུམ་ཡོངས་འདུས་པད་འབྱུང་གིས། །འཇིགས་མེད་རང་ཡན་ཞིག་པོ་རྗེས་སུ་བཟུང་། །མཛོད་གསུམ་ཕ་ཕོག་བསྩལ་ཞིང་བཀའ་བབས་ཚེ། །ཟབ་གསང་གཉན་གྱི་བསྲུང་མ་དམ་ལྡན་རྣམས། །ཇི་ལྟར་ཁས་བླངས་དམ་བཅས་མ་གཡེལ་བར། །དམ་རྫས་ཐ་ཚིག་གཏོར་མ་འདི་བཞེས་ལ། །རྣལ་འབྱོར་ཕྲིན་ལས་གང་བཅོལ་མྱུར་འགྲུབ་མཛོད། །བསྟན་མ་ནི། ཧཱུྃ་བྷྱོཿ དཔལ་གྱི་བཀའ་ཉན་བོད་སྐྱོང་བསྟན་མའི་ཚོགས། །དམ་རྫས་བཤལ་ཆུའི་གཏོར་མ་འདི་བཞེས་ལ། །པདྨའི་བཀའ་བཞིན་མུ་སྟེགས་ཀླ་ཀློ་སོགས། །ཐབས་ཀྱིས་བཟློག་ལ་རྒྱལ་བསྟན་དར་བར་མཛོད། །མ་མ་ཧྲིང་ཧྲིང་བྷ་ལིང་ཏ་ཁཱ་ཧི། བྲོ་མནན་ནི། ཧཱུྃ་ཧྲཱིཿ མ་རིག་རཱུ་ཏྲ་ལས་ཉོན་དམ་སྲི་བདུད། །ཀློང་དགུར་མནན་ནོ་ཐེག་པ་རིམ་དགུའི་རྒྱ། །ཡང་དག་རིགས་སད་བྱང་ཆུབ་སེམས་ལྡན་པ། །དེ་སྲིད་ནམ་ཡང་ལྡང་བར་མ་གྱུར་ཅིག །ཨོཾ་ཨཱཿཧཱུྃ་ལཾ་ནན། སྟྭཾ་བྷ་ཡ་ནན། མཆོད་བསྟོད་སྔོན་བཞིན་ནི། ཧཱུྃ་ཧྲཱིཿ དངོས་འབྱོར་ཡིད་སྤྲུལ༴སོགས། ཤཔྟ་ཨ་མྲྀ་ཏ་རཀྟ་བྷ་ལིང་ཏ་སརྦ་པཱུ་ཛ་ཨཱཿཧཱུྃ། ཧཱུྃ་ཧྲཱིཿ མ་བཅོས་སྤྲོས་བྲལ༴སོགས། རྡོ་རྗེ་འཆང་ལ་ཕྱག་འཚལ་བསྟོད། །དངོས་གྲུབ་བླང་བ་ནི། ཧཱུྃ་ཧྲཱིཿ སྐུ་གསུམ་ཡོངས་འདུས་རྒྱལ་བའི་དབང་པོ་ཡིས། །སྐུ་གསུང་ཐུགས་དང་ཡོན་ཏན་ཕྲིན་ལས་ཀྱི། །དབང་དང་བྱིན་རླབས་དངོས་གྲུབ་མ་ལུས་པ། །དེང་འདིར་བདག་ལ་ཡོངས་རྫོགས་སྩལ་དུ་གསོལ། །སྙིང་པོའི་མཐར། ཀཱ་ཡ་ཝཱཀྐ་ཙིཏྟ་གུ་ཎ་ཀརྨ་སརྦ་སིདྡྷི་ཧྲཱིཿ བཟོད་གསོལ་ནི། ཧཱུྃ་ཧྲཱིཿ སྒོ་གསུམ་མ་རིག་བག་མེད་དབང་གྱུར་པས། །སྐུ་གསུང་ཐུགས་དང་རྩ་བ་ཡན་ལག་གི། །དམ་ཚིག་ཆགས་ཉམས་འགལ་འཁྲུལ་གྱུར་པ་ཀུན། །སྙིང་ནས་བཤགས་སོ་དག་ཚངས་དངོས་གྲུབ་སྩོལ། །ཡིག་བརྒྱ་བརྗོད། རྟེན་ཡོད་ན་བརྟན་བཞུགས་བྱ། བསྡུ་ལྡང་ནི། ཧཱུྃ་ཧྲཱིཿ སྣོད་བཅུད་དཀྱིལ་འཁོར་དམ་ཚིག་ཡེ་ཤེས་སེམས། །རིམ་པར་འོད་ཞུ་ཏིང་འཛིན་དམིགས་མེད་ཡལ། །སླར་ཡང་རང་རིག་དོན་གྱི་པདྨ་འབྱུང་། །མཚན་དཔེ་རྒྱན་རྫོགས་མཁའ་ལ་འཇའ་བཞིན་གསལ། །ཨོཾ་ཨཱཿཧཱུྃ། བསྔོ་བ་ནི། ཧཱུྃ་ཧྲཱིཿ ཟག་བཅས་ཟག་མེད་ཀུན་རྫོབ་དོན་དམ་ཆོས། །དུས་གསུམ་ཀུན་ཏུ་བགྱིས་པ་ཅི་མཆིས་རྣམས། །གཅིག་ཏུ་བསྡོམས་ནས་འགྲོ་ཀུན་དོན་གྱི་ཕྱིར། །འཁོར་གསུམ་དམིགས་མེད་ཆོས་ཀྱི་དབྱིངས་སུ་བསྔོ། །སྨོན་ལམ་ནི། །ཧཱུྃ་ཧྲཱིཿ འཁོར་བར་གནས་པའི་སེམས་ཅན་ཐམས་ཅད་ཀྱི། །ལས་ཉོན་བག་ཆགས་མ་ལུས་ཀུན་བྱང་ནས། །ཕྱམ་གཅིག་གདོད་མའི་མགོན་པོའི་གོ་འཕང་མཆོག །འབད་སྩོལ་མེད་པར་མྱུར་དུ་ཐོབ་གྱུར་ཅིག །བཀྲ་ཤིས་ནི། ཧཱུྃ་ཧྲཱིཿ རང་རིག་གདོད་མའི་མགོན་པོ་པདྨ་འབྱུང་། །རང་བྱུང་སྐུ་གསུམ་ལྷ་ཚོགས་འཁོར་བཅས་ཀྱི། །བྱིན་རླབས་ཐུགས་རྗེ་ནུས་པའི་བདེན་སྟོབས་ཀྱིས། །འགྲོ་ཀུན་སངས་རྒྱས་ཐོབ་པའི་བཀྲ་ཤིས་ཤོག །ཅེས་སོགས་ཀྱིས་ཤིས་པ་བརྗོད་ཅིང་མེ་ཏོག་གི་སིལ་མ་འཐོར་བས་མཐའ་བརྒྱན་པར་བྱའོ།། ཞེས་སྐུ་གསུམ་ཡོངས་རྫོགས་འདུས་པ་མ་ཧཱ་གུ་རུའི་སྒྲུབ་ཐབས་རྒྱུན་ཁྱེར་གནད་ཀྱི་ཉམས་ལེན་སྙིང་པོར་དྲིལ་བ་ཡང་སྙིང་འདུས་པ་ཞེས་བྱ་བ་འདི་ཡང་དམ་པའི་རིགས་ཅན་བསྒྲུབ་བརྩོན་པདྨ་ཚེ་མཆོག་སོགས་ཆོས་འདིར་དོན་གཉེར་ཅན་རྣམས་ལ་ཕན་པའི་བློས་སྔགས་ཟོབ་མགོ་སྤྲུལ་གྱིས་བསྡུས་ཏེ་སྤེལ་བ་དགེའོ།། དགེའོ།། དགེའོ།།