འཆི་བསླུ་བདུད་བཞི་དབྱིངས་གྲོལ་ལ་ཉེ་བར་མཁོ་བའི་ཁ་བསྐང་།

ན་མོ་གུ་རུ། འདིར་འཆི་བསླུ་བདུད་བཞི་དབྱིངས་གྲོལ་ལ་ཉེ་བར་མཁོ་བའི་ཁ་བསྐང་ཅུང་ཟད་ཅིག་འབྲི་བར་བྱ་སྟེ། དེ་ལ་ཐོག་མར་ཡོ་བྱད་བསགས་པའི་སྐབས་སུ་སྲིད་པའི་འཁོར་ལོ་བསྡུ་ན་མུ་ཁྱུད་གསུམ་བསྐོར་བའི་ལྟོ་བར་ཆུ་རིའི་མཐར། བྱ་སྦྲུལ་ཕག་རྣམས་གཡས་སྐོར་དུ་གཅིག་གི་ཁ་ནས་གཅིག་བྱུང་བ་བྲི། དེའི་ཕྱི་ལིང་ཚེ་དྲུག་ལ་སྟེང་ནས་གཡས་སྐོར་དུ། ཨ་སུ་ཏྲི་དུ་པྲེ་ནྲི་རྣམས་བྲི། དེ་རྒྱབ་ལིང་ཚེ་བཅུ་གཉིས་ལ་མ་རིག་པ། འདུ་བྱེད། རྣམ་ཤེས། མིང་གཟུགས། སྐྱེ་མཆེད། རེག་པ། ཚོར་བ། སྲེད་པ། ལེན་པ། སྲིད་པ། སྐྱེ་བ། རྒ་ཤི་རྣམས་བྲིས་ལ་རྟེན་སྙིང་ལན་བདུན་གྱིས་བརླབས་ཏེ། དུར་ཁྲོད་དང་མཆོད་རྟེན་རྙིང་པ། ལམ་རྒྱ་གྲམ་རྣམས་ཀྱི་ས། རོ་ཐལ་རྫ་ཐལ་བྲ་ནག་ཚིག་ཕྱེ་རྣམས་ཆུ་ལྐུགས་དུག་ཁྲག་སྦྱར་བས་སྦྲུས་ནས་གཤིན་རྗེའི་གཟུགས་བྱས་ལ་ལྟོ་བར་གཞུག་གོ། ༧ དེ་བཞིན་དུ་འབྱུང་ལྔའི་འཁོར་ལོ་ལྔའང་རེ་རེ་ནས། ལྟེ་བ་དང་རྩིབས་བཞིར་ནམ་མཁའི་འཁོར་ལོར་ཨེ་དང་། རླུང་ལ་ཡཾ། མེ་ལ་རཾ། ཆུ་ལ་ཁཾ། ས་ལ་ལཾ་རྣམས་རེ་རེ་བྲི། ཕྱིའི་མུ་ཁྱུད་ལ་དབྱངས་གསལ་བཀོད་པ་སྤྲོ་ན་རང་མདོག་ཏུ་བྱ། སྟོང་པའི་ངང་ལས་ས་བོན་འབྱུང་བའི་ཡི་གེ་སོ་སོ་ལས་བྱུང་བའི་ལྷ་མོ་ལྔ་འཁོར་ལོ་རང་རང་གི་མདོག་ཅན་རྒྱན་དང་ལྡན་པར་གསལ་བའི་ཐུགས་ཀའི་འོད་ཀྱིས་དབྱིངས་ནས་ཡེ་ཤེས་པ་སྤྱན་དྲངས། བཛྲ་ས་མ་ཛཿ ཛཿཧཱུྃ་བཾ་ཧོ། ཨོཾ་བཛྲ་ཨརྒྷཾ༴སོགས། ཤཔྟ་པྲ་ཏིཙྪ་ཡེ་སྭཱ་ཧཱ། ཨེ་སོགས་རང་སྔགས་སོ་སོར་ཉེར་གཅིག་རེ་དང་། དབྱངས་གསལ་རྟེན་སྙིང་རེ་བརྗོད་པས། འོད་དུ་ཞུ་ནས་འཁོར་ལོ་སོ་སོའི་རྣམ་པར་གྱུར་བར་མོས་ལ། འབྲུ་ལྔའི་ངར་ཕྱེ་ཁྲུས་ཁུས་སྦྲུས་པའི་སྒྲུབ་བྱའི་རང་གཟུགས་ཀྱི་གླུད་སྡེ་ལྔའི་ཁ་དོག་དང་མཐུན་པར་སོ་སོའི་སྙིང་ཀར་བཅུག་ཏེ་རྒྱན་ཆས་ཡོ་བྱད་དང་ལྡན་པར་བཤམས་བཀོད་དཀྱུས་མཐུན་བྱ། ༧ ཚོན་སྐུད་སྣ་ལྔ་འདོམ་དགུ་ལ། ན་མོ་རིག་འཛིན་རྩ་རྒྱུད་ཀྱི་བླ་མ་སྐུ་གསུམ་མཆོག་གསུམ་རྩ་གསུམ་དམ་ཅན་རྒྱ་མཚོ་སྤྱི་དང་ཁྱད་པར་དུ་ཨོ་རྒྱན་ཚེ་དཔག་ཏུ་མེད་པའི་ལྷ་ཚོགས་རྣམས་ཀྱི་བདེན་པས་སྒྲུབ་བྱའི་སྡིག་སྒྲིབ་ནད་གདོན་བར་ཆད་མི་མཐུན་པའི་ཕྱོགས་ཐམས་ཅད་སྐད་ཅིག་ཐང་ཅིག་ཡུད་ཙམ་ལ་ཚོན་སྐུད་འདི་ཉིད་ལ་ཐིམ་པར་གྱུར་ཅིག ཨོཾ་ཊཱཀྐི་ཧཱུྃ་ཛཿ ལན་གསུམ་བརྗོད་ལ། བསྒྲུབ་བྱའི་ཡན་ལག་ལྔ་ལན་བཅུར་དཀྲིས་པའི་སྣེ་ནང་མ་སྲིན་ལག་ལ་བཏགས་ཤིང་། ཕྱི་མ་གཤིན་རྗེའི་ལག་གཡོན་དུ་བཞག ༧ ཤིང་བྱང་ཁྲམ་བཅུ་པ་ལ་གོང་བཞིན་བདེན་བདར་སྔོན་དུ་འགྲོ་བས། སྒྲུབ་བྱ་འདི་ཉིད་གེགས་བདུད་གཤེད་གསུམ་དང་གཏད་ཁྲམ་ལ་བབས་པ་སོགས་མི་མཐུན་པའི་ཕྱོགས་ཐམས་ཅད་སྐད་ཅིག་ཐང་གཅིག་ཡུད་ཙམ་ལ་ཁྲམ་ཤིང་ནག་པོ་འདི་ཉིད་ལ་ཐིམ་པར་གྱུར་ཅིག ཨོཾ་ཊཱཀྐི་ཧཱུྃ་ཛཿ ལན་གསུམ་བརྗོད་ནས་གཤིན་རྗེའི་མདུན་དུ་བཙུགས། ༧ རལ་གྲིའམ་གྲི་ཆུང་ལ་བདེན་བདར་སྔོན་དུ་འགྲོ་བས། ལས་ཀྱི་ལྷ་པདྨ་དབང་ཆེན་སོགས་གཉེན་པོ་སྟོབས་ཀྱི་ལྷ་རྣམས་ཀྱི་ནུས་སྟོབས་བྱིན་རླབས་ཐམས་ཅད་རལ་གྲི་འདི་ལ་ཐིམ་པར་གྱུར་ཅིག ཧྲཱིཿབཛྲ་ཀྲོ་དྷ་ཧྱ་གྷྲྀ་ཝ་ཧཱུྃ་ཕཊ། ལན་གསུམ་བརྗོད་ནས་ཉེ་དྲུང་དུ་བཞག ༧ ཁྲམ་གཅོག་ཕྱི་སོགས་ལ། སྔར་བཞིན་བདེན་སྟོབས་བརྗོད་པ་སྔོན་དུ་འགྲོ་བས། སྒྲུབ་བྱ་ཆེ་གེ་མོ་འཆི་བདག་གི་ཞགས་པ་ལས་ཐར་བར་གྱུར་ཅིག གཤིན་རྗེའི་ཁྲམ་ལས་ཐར་བར་གྱུར་ཅིག མི་མཐུན་པའི་ཕྱོགས་ཐམས་ཅད་ལས་ཐར་བར་གྱུར་ཅིག ཅེས་བརྗོད་ལ། སྒྲུབ་བྱ་མིང་འདི་ཞེས་བགྱི་བའི་་འགལ་རྐྱེན་མི་མཐུན་པའི་ཕྱོགས་ཐམས་ཅད་ལུས་ལས་དུ་རླངས་ཀྱི་རྣམ་པས་ཐོན་ནས་གླུད་ལ་ཐིམ་པར་བསམ་ཞིང་། ལས་ཀྱི་རྡོ་རྗེས་བསྒྲུབ་བྱ་ཚོན་སྐུད་ཀྱིས་བཅིངས་པའི་སྣེ་ནང་མ་ནས་བཀྲོལ་ནས་གླུད་ལ་དཀྲི། ཁྲམ་ཤིང་གི་ཁྲམ་རིས་གྲིས་ཕྱིས་ཤིང་ཁྲམ་གཅོག་ལ་གཤིན་རྗེའི་དྲུང་དུ་བཞག དེ་ལྟར་གཏོར་མ་བསྔོ་བ་སོགས་ལན་བཅུའི་བར་དུ་བསྒྱུར། ༧ གླུད་བསྔོ་བ་ནི། ངར་གླུད་རཾ་ཡཾ་ཁཾ་གིས་སྦྱངས་ཏེ། སྟོང་པའི་ངང་ལས་ཨོཾ་ཨཱཿཧཱུྃ་སྭཱ་ཧཱ་ཞུ་བ་ལས་བྱུང་བའི་ངར་མི་ཕུང་ཁམས་སྐྱེ་མཆེད་ཐམས་ཅད་རྫོགས་པ་ལོངས་སྤྱོད་བསམ་གྱིས་མི་ཁྱབ་པའི་དཀོར་ནོར་དང་བཅས་པར་བསམ་ལ། ཨོཾ་ཨཱཿཧཱུྃ་གིས་བྱིན་གྱིས་བརླབས། ནམ་མཁའ་མཛོད་ཀྱི་སྔགས་རྒྱས་སྤེལ་ལ། ཧཱུྃ། འབྲུ་བཟང་ངར་གྱི་མི་བོ་ཆེ། །ཁམས་ལྔའི་རང་བཞིན་ཉིད་ལས་གྲུབ། །རྣམ་ཤེས་ཚོགས་བརྒྱད་ཡང་དག་ལྡན། །གཟུགས་མཛེས་སྒེག་འགྲོས་ལམས་སེ་ལམ། །སྨྲ་མཁས་ངག་སྙན་ཀྱུ་རུ་རུ། །སེམས་ཀྱི་རྟོག་དཔྱོད་ཧྲིག་གེ་ཧྲིག །མཛེས་པའི་གོས་རྒྱན་པུ་རུ་རུ། །བཟའ་བཏུང་ལོངས་སྤྱོད་སྤུངས་སེ་སྤུང་། །འདི་འདྲའི་གླུད་བཟང་ཡ་མཚན་ཅན། །ཏིང་འཛིན་སྔགས་དང་ཕྱག་རྒྱ་དང་། །ཆོས་ཉིད་རོལ་པའི་མཐུ་ལས་གྲུབ། །མི་བས་གླུད་དགའ་བཞེས་སུ་གསོལ། །བཞེས་ནས་བསྒྲུབ་བྱ་འདི་ཉིད་ལ། །གདུག་རྩུབ་སེམས་ཀྱི་ཁྲོ་བ་སྤོངས། །བཟུང་བ་ཐོངས་ལ་བཅིངས་པ་ཁྲོལ། །ཟོས་པ་སྐྱུགས་ལ་ཤི་བ་གསོས། །ཞི་དང་བྱམས་པའི་སེམས་ཀྱིས་ནི། །འཆི་བའི་འཇིགས་པ་ཞི་བར་མཛོད།། ཅེས་བསྒྲུབ་བྱའི་ལོ་གྲངས་ལ་སོགས་པ་བསྔོ་ཞིང་བར་མཚམས་སུ་སཾ་བྷ་དང་དེ་བཞིན་གཤེགས་པ་བཞིའི་མཚན་བརྗོད་མཐར། ཧཱུྃ་ཡ། ལས་ཀྱི་གཤིན་རྗེ༴སོགས་བརྗོད་ནས་ངར་མི་ལོ་གྲངས་གླུད་ཆེན་སྡེ་ལྔའི་རྩར་འབུལ་ཞིང་། འཆི་བདག་གི་གཟུགས་ཀྱི་མདུན་དུ་བཀོད་པར་བྱའོ།། ༧ རྫས་འཇལ་བྱེད་ཀྱི་བྲེ་ལ། ཨོཾ་ཨརྨ་སརྦ་པ་ཙི་ཡེ་སྭཱ་ཧཱ། ཞེས་བྲིས་ལ་གོང་གི་བདེན་བརྗོད་མཐར། བྲེ་འདི་ཉིད་འབྲུ་སྣ་ལྔ་སོགས་གཞལ་དུ་རུང་བའི་ནུས་པ་དང་ལྡན་པར་གྱུར་ཅིག ལན་གསུམ། གོང་གི་སྔགས་ཉེར་གཅིག་བརྗོད། ༧ སྲང་ལ། ཨོཾ་ཏིཔྟ་མཐོང་བའི་རྒྱལ་པོ་སྭཱ་ཧཱ། བྲིས་ལ། བདེན་བརྗོད་མཐར། སྲང་འདི་ཉིད་འདོད་དགུ་གཞལ་བའི་ནུས་པ་དང་ལྡན་པར་གྱུར་ཅིག ལན་གསུམ། གོང་གི་སྔགས་ཉེར་གཅིག་བརྗོད། དེ་ནས་དཀོར་ཆ་རྣམས་ཨོཾ་སརྦ་བིད༴སོགས་ཀྱིས་སྤེལ། ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སམྦྷ་ར་སམྦྷ་ར་ཧཱུྃ། གསུམ་མམ་བདུན་སོགས་དང་། ཧོ་འཆི་བདག་གཤིན་རྗེའི་རྒྱལ་པོ་འཁོར་དང་བཅས་པ་ལ། འབྲས་ཏིལ་གྲོ་ནས་བྲ་སྲན་ལ་སོགས་པ་འབྲུ་ཡི་བྱེ་བྲག་སྣ་ཚོགས་པ་བྲེ་གཅིག་བཅུ་བརྒྱ་སྟོང་ཁྲི་འབུམ་ས་ཡ་བྱེ་བ་དུང་ཕྱུར་གྲངས་མེད་ཀྱི་བར་དུ་འབུལ་ལོ། །སྒྲུབ་བྱ་འདི་ཉིད་ཀྱི་ཚེ་དང་བླ་དང་སྲོག་གི་གླུད་དུ་བཞེས་ལ་གནོད་དང་གདུག་པའི་བསམ་སྦྱོར་དང་བྲལ་ནས་ཕན་པ་དང་བདེ་བ་བྱང་ཆུབ་ཀྱི་སེམས་དང་ལྡན་པར་མཛད་དུ་གསོལ། དེ་བཞིན་དུ་ཟས་རིགས་རྣམས་སྲང་ལ་གཞལ་ཞིང་། ཨོཾ་ཨ་ཀ་རོ༴སོགས། གསུམ་མམ་བདུན་སོགས་དང་། ཧོ་འཆི་བདག༴སོགས། ཐོག་མཐའ་འདྲ་བར་བྱས་ལ། ཇ་མར་ཤ་ཐུད་བུར་སྦྲང་ཤིང་ཏོག་སོགས་ཟས་ཀྱི་བྱེ་བྲག་སྣ་ཚོགས་པ་སྲང་གཅིག་བཅུ༴སོགས་དང་། ཡང་རིན་པོ་ཆེ་སྨན་སྤོས་ཚོན་སྣ་སོགས་ལ། ན་མཿསརྦ་ཏ་ཐཱ་ག་ཏ་བྷྱོཿ༴སོགས། ཁཾ་སྭཱ་ཧཱ། ཧོ་འཆི་བདག༴སོགས། གསེར་དངུལ་གཡུ་བྱུར་སྨན་སྤོས་ཚོན་སོགས་ལོངས་སྤྱོད་ཀྱི་བྱེ་བྲག་སྲང་གཅིག་བཅུ༴སོགས། གོས་དར་ལྤགས་རིགས་ཀྱི་རས་མ་དང་ཉེར་སྤྱོད་གཟུགས་འགྲོས་སོགས་སྤར་བཏབ་པ་ཡོད་ན། ནམ་མཁའ་མཛོད་སྔགས་དང་སྤེལ་ཚིག་གི་ཐོག་མཐའ་འདྲ་བ་བྱས་ཏེ། གོས་ཕྲུག་དར་ཟབ་ལྤགས་རིགས་སོགས་ཉེར་སྤྱོད་སྤྱན་གཟིགས་མཐུན་རྫས་ཀྱི་བྱེ་བྲག་གཅིག་བཅུ༴སོགས་བརྗོད། ༧ མཇུག་ཏུ། དེ་ལྟར་གནས་སྐབས་སུ་འཆི་བ་བསླུ་བ་དང་། འཆི་མེད་ཚེ་ཡི་མངའ་གསོལ་བ་གྲུབ་ནས། ཇི་སྐད་དུ། གསོད་གཅོད་རྐུ་འཕྲོག་བརྡུང་བརྡེག་དང་། །ཚིག་རྩུབ་འཁོན་འགལ་བརྙས་པ་སོགས། །སྲོག་ལ་གནོད་པའི་ལས་སྤང་ཞིང་། །ཚེ་ཐར་སྲོག་བསླུ་ཉེ་འདོན་དང་། །མཆོད་དང་སྦྱིན་ལ་བརྩོན་པ་སོགས། །འཚོ་འགྱུར་དགེ་ལ་འབད་པར་གདམས། །གསུངས་པ་ལྟར། གཞི་སྲོག་ཆགས་གང་རུང་། བསམ་པ་གསོད་འདོད། སྦྱོར་བ་གསོད་ཐབས་ལག་ལེན། མཐར་ཐུག་སྲོག་འགག་པ་སྟེ་སྲོག་གཅོད་ཀྱི་ཡན་ལག་བཞི་ཚངས་བས་གཞན་གསོད་པའམ། གསོད་དུ་འཇུག་པ། གཞན་ལ་བརྡུང་བརྡེག་བྱེད་དམ་བྱེད་དུ་གཞུག་པ། མཐུ་གཏད་སོགས་གཞན་གྱི་ཚེ་སྲོག་ལ་གནོད་པའི་ལས་དང་། སྔགས་པ་ནུས་ལྡན་མི་དཔོན་གཙོ་བོ་སོགས་ལ་འགལ་བའི་ལས། གཞན་ལ་ཚིག་རྩུབ་འཐབ་འཁོན་བརྙས་བཅོས་བྱེད་པ་སོགས་ནི་ཚེ་དང་ལས་དང་བསོད་ནམས་འཛད་པའི་རྒྱུ་ཡིན་པས་སྤང་དགོས་ཤིང་། ཚེ་ཐར་དང་སྲོག་བསླུ་ཉེའུ་འདོན་པ། ལམ་འཕྲང་བསལ་བ། རི་རྒྱ་རྔོན་རྒྱ་སྡོམ་པ། ཉ་སྦྱིན་གྲོག་སྦྱིན་སོགས་མཆོད་སྦྱིན་ལ་བརྩོན་པ། ངན་སློང་ལ་ཟས་སྦྱིན། ཉམས་ཆུང་ལ་སྐྱེལ་མ་དང་ལམ་སྟོན་སོགས་བསམ་པ་བྱང་ཆུབ་ཀྱི་སེམས་དང་ལྡན་པས། སྤྱོད་པ་འགྲོ་བ་གཞན་ཚེ་རིང་བ་དང་། ཡིད་དགའ་བར་འགྱུར་བའི་ལས་རྣམས་ནི། འཕྲལ་ཕུག་ཀུན་ཏུ་རང་གི་ཚེ་དང་བསོད་ནམས་འཕེལ་བ་དང་། སྲོག་འཚོ་བར་འགྱུར་བའི་གདམས་པ་ལགས་པས་བརྩོན་པར་གྱིས་ཤིག །བརྗོད་ལ་ཁས་ལེན་སྣ་རེ་བྱེད་དུ་བཅུག་གོ། །ཞེས་པའང་འཆི་བསླུ་བདུད་བཞི་དབྱིངས་གྲོལ་ལ་དགོས་གལ་ཆེ་བར་མཐོང་ནས་སྔགས་བན་འཇིགས་རྣམ་པས་བྲིས་པ་དགེའོ།།