འཆི་བསླུ་བདུད་བཞི་དབྱིངས་གྲོལ།

དམ་ཆོས་སྐུ་གསུམ་དགོངས་མཛོད་ཀྱི་ཆ་ལག་འཆི་བསླུ་བདུད་བཞི་དབྱིངས་གྲོལ་ཞེས་བྱ་བ་བཞུགས།

སྐུ་གསུམ་ཡོངས་འདུས་ཚེ་ཡི་ལྷ་ལ་འདུད། །འཆི་མེད་ཡེ་ཤེས་རྡོ་རྗེའི་ཚེ་སྲོག་ཏུ། །རྒྱས་འདེབས་འཆི་བ་བསླུ་བའི་གནད་ཟབ་མོ། །བདུད་བཞི་དབྱིངས་སུ་གྲོལ་བྱེད་འདི་རུ་བསྟན། །དེ་ལ་དམ་ཆོས་སྐུ་གསུམ་དགོངས་མཛོད་ཀྱི། །ཚེ་སྒྲུབ་སྙིང་པོ་བཅུད་འདུས་ཆ་ལག་ལས། །འཆི་བསླུ་བདུད་བཞི་དབྱིངས་གྲོལ་བྱ་བ་ལ། །སྤྱི་དོན་རྣམ་པ་བཅུ་གསུམ་ཡོད་པ་ལས། །དང་པོ་འཆི་བ་བརྟགས་པ་ནི། །གློ་བུར་ལུས་བྱད་མདངས་ཤོར་དང་། །སྤྱོད་ལམ་སྔར་ལས་འགྱུར་བ་དང་། །ཚེ་གཟུགས་ཉམས་ཤིང་མི་གསལ་དང་། །རླུང་གི་རྒྱུ་བ་མི་སྙོམ་པ། །སྣའི་རླུང་མཉམ་པར་མི་རྒྱུ་ཞིང་། །ཕལ་ཆེར་གཡས་ནས་རྒྱུ་བ་དང་། །དོན་མེད་དུ་ནི་ཡིད་མི་བདེ། །ཆགས་སྡང་ཡུལ་ལ་རྟོག་པ་ནི། །སྔར་ལས་ལྷག་པར་འགྱུ་བ་དང་། །ཤེས་རྒྱུད་འཇམ་རྩུབ་གོ་ལྡོག་པ། །བྱུང་བ་དངོས་ཉམས་རྨི་ལམ་དུ། །ཉི་མ་ཟླ་བ་ནུབ་པ་དང་། །མུན་སྲོད་ཡིད་ནི་མི་བདེ་བར། །གཅིག་པུ་ལྷོ་ཕྱོགས་འགྲོ་བ་དང་། །བོང་བུ་རྔ་མོང་མ་ཧེ་སོགས། །ཞོན་ནས་འགྲོ་བ་རྨི་བ་དང་། །གནས་འཚོལ་གཤིན་པོ་དང་འཕྲད་ནས། །བཟའ་བཏུང་བྱེད་པ་རྨི་བ་དང་། །གོས་ཕྲེང་དམར་པོས་བརྒྱན་པ་སོགས། །ཤས་ཆེར་རྨིས་ན་འཆི་བའི་རྟགས། །མེ་ཏོག་ལས་ནི་འབྲས་བུ་དང་། །དུ་བ་ལས་ནི་མེར་ཤེས་པ། །སྤྲིན་ལས་ཆར་འབྱུང་ཤེས་པ་བཞིན། །འཆི་བ་ཡི་ནི་སྔ་རོལ་དུ། །འཆི་བའི་ལྟས་འདི་འབྱུང་བ་ཡིན། །གཉིས་པ་འཆི་བ་སྤྱིར་བསླུ་ན། །རང་གི་འབྱོར་བ་ཅི་ཡོད་ཀྱིས། །དཀོན་མཆོག་གསུམ་ལ་མཆོད་པ་དང་། །ཚོགས་འཁོར་བསྐང་བཤགས་སྦྱིན་པ་གཏོང་། །སྲོག་བསླུ་ཉེའུ་འདོན་སཙྪ་གདབ། །ཚེ་སྒྲུབ་སོགས་འབད་བསླུ་ཐུབ་པའི། །རྟགས་མཚན་མ་མཐོང་བར་དུ་འབད། །གསུམ་པ་ཁྱད་པར་དུ་བསླུ་བའི། །སྦྱོར་བ་ཡོ་བྱད་བཅའ་གཤོམ་ནི། །ཚེ་ཡི་དཀྱིལ་འཁོར་བྱས་པ་དེའི། །ལྷོ་ཡི་ཕྱོགས་སུ་འཆི་བསླུ་འདིའི། །ཡོ་བྱད་རྣམས་ནི་བཤམས་པར་བྱ། །དེ་ཡང་དུར་ཁྲོད་ལམ་རྒྱ་གྲམ། །མཆོད་རྟེན་རྙིང་པ་རྣམས་ཀྱི་ས། །རོ་ཐལ་རྫ་ཐལ་བྲ་ནག་དང་། །ཚིག་ཕྱེ་རྣམས་ནི་ཆུ་ལྐུགས་པ། །དུག་ཁྲག་སྦྱར་བས་སྦྲུས་པ་ཡིས། །ཁ་ཏོག་ནག་པོ་གཤིན་རྗེའི་གཟུགས། །ཁ་གདངས་མཆེ་བ་བཞི་གཙིགས་པ། །མི་སྡུག་པ་ཡི་རྣམ་འགྱུར་ཅན། །གཡས་པས་དབྱུག་ཏོ་གཡོན་ཞགས་འཛིན། །ལྟོ་བར་སྲིད་པའི་འཁོར་ལོ་ནི། །རྒྱས་བསྡུས་གང་རུང་བྲིས་པ་བཅུག །དུར་གཡམ་སྟེང་དུ་རོ་སོལ་གྱིས། །ཆོས་འབྱུང་བྲིས་པའི་སྟེང་དུ་བཀོད། །རེ་བ་ནག་པོའི་གདན་ལ་བཞག །མདུན་དུ་དུག་གི་མེ་ཏོག་དང་། །ཉའི་གསུར་ཚིལ་ཆེན་སྒྲོན་མེ་དང་། །མཁྲིས་པའི་དྲི་ཆབ་འབྲུ་ནག་དང་། །ཤ་ཆེན་ཞལ་ཟས་བཅས་པ་བཤམས། །ཁམས་སའི་ཕོར་བ་བཅུ་ཡི་ནང་། །གཏོར་མ་བཅུ་ལ་ཉ་ཤ་དང་། །སྲན་ཆང་ཁྲག་དང་ཤ་ལྗེན་དང་། །ཁུར་བ་ཐུག་པ་སྒོག་པ་ཙོང་། །བུ་རམ་ཞོ་མར་ལ་སོགས་པས། །བརྒྱན་པ་བཅུ་དང་དེའི་གསོག་སྣོད། །ལྕགས་སླང་གཅིག་བཅས་ཉེ་ལོགས་བཤམས། །ལས་སྔགས་བཟླས་པའི་ཆུ་ཡིས་ནི། །སྒྲུབ་བྱའི་ལུས་པོ་ཡོངས་རྫོགས་སམ། །ཡན་ལག་ལྔ་ཁྲུས་བྱས་པའི་ཆུས། །འབྲུ་ལྔའི་ངར་ཕྱེ་སྦྲུས་པ་ཡིས། །སྒྲུབ་བྱའི་གཟུགས་གླུད་ཁྲུ་གང་བ། །དཀར་སེར་དམར་ལྗང་མཐིང་ཀ་ལྔའི། །སྙིང་གར་འབྱུང་བ་ལྔའི་འཁོར་ལོ། །སོ་སོར་མ་ནོར་བཀོད་པར་བྱ། །གོས་དང་རྒྱན་བཏགས་སྐྱེ་མཆེད་དོད། །ཧ་ཅང་གཙང་མའི་གཞི་མའི་སྟེང་། །ཀུ་ཤའི་གདན་བཀྲམ་དེའི་སྟེང་བཤམས། །དེ་ཡི་ཕྲག་པ་གཡས་གཡོན་ལ། །སྟག་པ་གླང་མའི་བྱང་བུ་ལ། །འཆི་བདག་ཕོ་མོའི་ཁྲམ་བྲིས་བཙུགས། །སྤྱི་བོ་དང་ནི་ཕྱོགས་བཞི་རུ། །མར་མེ་ལྔ་ཡང་བཀོད་པར་བྱ། །མཐའ་སྐོར་རིན་ཆེན་སྣ་ཚོགས་དང་། །འབྲུ་སྣ་ལྔ་སོགས་འབྲུ་ཡི་རིགས། །ཤ་མར་བུ་རམ་ཟས་ཀྱི་རིགས། །སྨན་སྣ་དར་གོས་ལྤགས་རིགས་དང་། །ཚོན་སྣ་ལྔ་སོགས་རྫོངས་ཆས་ཀྱི། །དཀོར་ཆ་ལོངས་སྤྱོད་ཇི་འབྱོར་བསགས། །དཀྱིལ་འཁོར་ཉེ་བར་སློབ་དཔོན་མདུན། །སྒྲུབ་བྱ་རེ་ནག་གདན་ལ་འཁོད། །ཚོན་སྐུད་སྣ་ལྔ་འདོམ་དགུ་པས། །ལན་བཅུ་དཀྲིས་པའི་སྣེ་ནང་མ། །སྒྲུབ་བྱའི་སྲིན་ལག་གཡོན་མ་དང་། །ཕྱི་མ་གཤིན་རྗེའི་ལག་གཡོན་གཏད། །གཞན་ཡང་ཁྲམ་ཤིང་བྲེ་སྲང་གྲི། །སྒྲུབ་བྱ་གོས་དཀར་མེ་ཏོག་སོགས། །ཤིས་པའི་རྫས་རྣམས་འདུ་བར་བྱ། །རྩ་བའི་དཀྱིལ་འཁོར་བདག་བསྐྱེད་ནས། །ཚེ་འགུགས་ཚེ་བསྟིམས་ལ་སོགས་པ། །ཐུགས་སྒྲུབ་སྐུ་གསུམ་ཡོངས་འདུས་དང་། །ཚེ་སྒྲུབ་སྙིང་པོ་བཅུད་འདུས་ལྟར། །འདས་དང་མ་འདས་འཇིག་རྟེན་གྱི། །གཏོར་མ་བསྔོ་དང་ཚོགས་བསྐང་སོགས། །འདི་ཡི་སྔོན་དུ་འགྲོ་བར་བྱ། །བཞི་པ་མཆོད་རྫས་བྱིན་བརླབ་ནི། རཾ་ཡཾ་ཁཾ་གིས་མ་དག་པའི་དངོས་འཛིན་ཐམས་ཅད་བསྲེགས་གཏོར་སྦྱངས་ཏེ་སྟོང་པར་གྱུར། སྟོང་པའི་ངང་ལས་ཨོཾ་ཨཱཿཧཱུྃ་སྭཱ་ཧཱ་ལས་འདོད་ཡོན་ཟད་པ་མེད་པའི་ལོངས་སྤྱོད་ཀྱི་དངོས་པོ་མཁོ་དགུ་ཚང་ཞིང་བཟང་དགུས་འབྱོར་བ་དགྱེས་དགུར་སྤེལ་བའི་མཐུན་རྫས་ཀྱི་ཚོགས་དང་བཅས་པ་རྒྱ་ནམ་མཁའི་མཐའ་དང་མཉམ་ཞིང་དུས་འཁོར་བ་རྒྱུན་ཆད་མེད་པར་འབྱུང་བ། འདོད་ཡོན་གྱི་རྣམ་པ་ཐམས་ཅད་པར་འཆར་བས་ནམ་མཁའི་ཁམས་གང་བར་གྱུར། ཨོཾ་ཨཱཿཧཱུྃ་དང་ཁྱད་པར་དུ། །སྔགས་དྲུག་ཕྱག་རྒྱ་དྲུག་པ་ཡིས། །བྱིན་གྱིས་བརླབས་ཤིང་བདེན་སྟོབས་བརྗོད། །ལྔ་པ་མགྲོན་རྣམས་དགུག་པ་ནི། ན་མོ། དཀོན་མཆོག་གསུམ་ལ་ཕྱག་འཚལ་ལོ། དཀོན་མཆོག་གསུམ་གྱི་བཀའ་བདེན་པ་དང་། ཆོས་ཉིད་རང་བཞིན་རྣམ་པར་དག་པའི་བདེན་པ་དང་། ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། ཁྱད་པར་དུ་ཡང་བཅོམ་ལྡན་འདས་པདྨ་གར་དབང་ཚེ་དཔག་ཏུ་མེད་པའི་དཀྱིལ་འཁོར་གྱི་ལྷ་ཚོགས་འཁོར་དང་བཅས་པ་རྣམས་ཀྱི་བདེན་པ་དང་། བདེན་པ་ཆེན་པོའི་བྱིན་གྱི་རླབས་ཀྱིས་བསྒྲུབ་བྱ་ཆེ་གེ་མོའི་ཚེ་སྲོག་ལ་བར་དུ་གཅོད་པའི་འཆི་བདག་གཤིན་རྗེའི་དཔུང་ཚོགས་འཁོར་དང་བཅས་པ་ཐམས་ཅད་གཟུགས་ཀྱི་རྟེན་འདི་ལ་མཆིས་པར་གྱུར་ཅིག །ཨོཾ་བཛྲ་ཨཀྵ་ཡ་ཛ༔ ཛཿཧཱུྃ་བཾ་ཧོ༔ ཉ་གསུར་དུད་དང་བཤུགས་པའི་སྒྲས། །ཡིད་ཆེས་པར་ནི་བཀུགས་ནས་སུ། །གཟུགས་བརྙན་གཤིན་རྗེ་དངོས་སུ་གསལ། །པུཥྤེ་སོགས་ཀྱིས་ཉེར་སྤྱོད་དབུལ། །དྲུག་པ་བདེན་པའི་བཀའ་བསྒོ་ནི། །སྙིང་རྗེ་བྱང་ཆུབ་སེམས་ལྡན་པས། ཨོཾ། གང་དག་ཆོས་རྣམས་ཐམས་ཅད་ཀྱི། །རྒྱུ་དང་འབྲས་བུའི་མཚན་ཉིད་ནི། །མངར་དང་ཁ་བའི་ས་བོན་ལས། །འབྲས་བུ་སོ་སོར་སྨིན་པ་བཞིན། །དགེ་དང་མི་དགེའི་ལས་རྣམས་ཀྱི། །འབྲས་བུ་ཡང་ནི་དེ་བཞིན་ཏེ། །དེ་བས་ཞེ་སྡང་གདུག་རྩུབ་སོགས། །མི་དགེའི་ལས་རྣམས་ཀུན་སྤོངས་ལ། །ཞི་ཞིང་བྱམས་པའི་སེམས་ཀྱིས་ནི། །འགྲོ་བ་འདི་ལ་ཕན་པར་མཛོད། །དེ་ཡི་གདུག་རྩུབ་བསམ་པ་ཞི། །གཞན་ཕན་བྱང་ཆུབ་སེམས་ལྡན་པས། །ཇི་ལྟར་བསྒོ་བའི་བཀའ་ནོད་ཅིང་། །གཏོར་མ་ལེན་པར་མོས་པ་བྱ། །བདུན་པ་གཏོར་མ་བསྔོ་བ་ནི། །བཅུ་ཚན་བཅུ་པོ་བསངས་སྦྱངས་བྱ། སྟོང་པའི་ངང་ལས་གཏོར་སྣོད་བྷྲཱུྃ་ལས་རིན་པོ་ཆེའི་སྣོད་ཟབ་ཅིང་རྒྱ་ཆེ་བའི་ནང་དུ་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པ་བདུད་རྩིའི་རྒྱ་མཚོ་ཆེན་པོར་གྱུར་པར་བསམ་ལ། ཨོཾ་ཨཱཿཧཱུྃ།གིས་བྱིན་གྱིས་བརླབས། གཏོར་མ་དང་པོ་ལ་དམིགས་ཏེ། རང་གི་ལག་པ་གཡས་པའི་མཐིལ་དུ་ཟླ་བའི་དཀྱིལ་འཁོར་གྱི་སྟེང་དུ་བདུད་རྩི་འབྱུང་བའི་ཨོཾ་དཀར་པོ་གསལ་བ་ལས་བདུད་རྩིའི་རྒྱུན་བབས་པ་གཏོར་མ་དང་འདྲེས་ནས་འཆི་བདག་འཁོར་བཅས་ཀྱིས་གསོལ་བས་མཉེས་ཤིང་ཚིམ་པར་བསམ་ལ། སམ་བྷ་རས་བསྔོས་སྒྲུབ་བྱར་བསྐོར། ཧོ། འཆི་བདག་གཤིན་རྗེ་ནག་པོ་འཁོར་དང་བཅས་པ་ཁྱེད་རྣམས་ཀྱིས་གཏོར་མ་འདི་བཞེས་ལ་སྒྲུབ་བྱ་ཆེ་གེ་མོ་འཆི་བའི་ནད་གདོན་བར་ཆད་ཐམས་ཅད་མྱུར་དུ་ཞི་བར་མཛད་དུ་གསོལ༔ ཞེས་གཏོར་སྣོད་ནང་དུ་བཞག བརྒྱད་པ་འདོད་གསོལ་བྱ་བ་ནི།། ན་མོ་དཀོན་མཆོག་བདེན་པའི་བྱིན་རླབས་དང་། །ཕན་མཛད་ལྷ་ཡི་གཟི་བརྗིད་དང་། །རྟེན་འབྲེལ་བསླུ་བ་མེད་པའི་མཐུས། །བྱད་ཕུར་རྦོད་གཏོང་ཟུག་པ་དང་། །ཁྲམ་དང་དལ་ཁ་བབས་པ་སོགས། །མི་མཐུན་རྐྱེན་དང་བར་གཅོད་ཀུན། །ཤེལ་དཀར་དྲི་མས་ཕྱིས་པ་བཞིན། །ཞི་ཞིང་ལྷག་མེད་དག་གྱུར་ཅིག ། ཨོཾ་ཨ་ཀཱ་ལ་མྲྀ་ཏྱུ་ཛྭ་ར་དུཥྚཱཾ་སརྦ་ཤཱནྟིཾ་ཀུ་རུ་ཡེ་སྭཱ་ཧཱ། ཞེས་བརྗོད་འགལ་རྐྱེན་བར་གཅོད་ཀུན། །གླུད་ལ་ཐིམ་བསམ་རྨ་སྒྲོས་བྱབ། །ཁྲམ་རིས་ཕྱིས་ལ་ཁྲམ་ཤིང་གཅོག །དགུ་པ་སྐུ་གླུད་བསྔོ་བ་ནི། །སྐུ་གླུད་ངར་མི་རྫོང་ཆས་རྣམས། །རཾ་ཡཾ་ཁཾ་གིས་སྟོང་པར་སྦྱངས། །ཨོཾ་ཨཱཿཧཱུྃ་གིས་བྱིན་གྱིས་བརླབས། །སམ་བྷ་ར་སོགས་གསུམ་མམ་བདུན། །བདེ་གཤེགས་བཞི་ཡི་མཚན་ནས་བརྗོད། །ཧཱུྃ་ཡཿ ལས་ཀྱི་འཆི་བདག་ནག་པོ་སོགས། །གཤིན་རྗེའི་ཚོགས་དང་འབྱུང་བའི་ལྷ། །སྟོང་ཕྲག་བརྒྱད་ཅུའི་བགེགས་ཀྱི་ཚོགས། །ལན་ཆགས་མགྲོན་གྱུར་ཐམས་ཅད་ལ། །མི་བས་ལྷག་པའི་གླུད་དང་དཀོར། །སྔགས་དང་ཕྱག་རྒྱ་ཏིང་འཛིན་གྱིས། །རབ་སྤེལ་ལོངས་སྤྱོད་འདོད་དགུའི་སྤྲིན། །སྒྲུབ་བྱའི་སྲོག་གི་གླུད་དུ་འབུལ། །ཁྱེར་ཅིག་ཁྱེར་ཅིག་སྟོབས་ལྡན་རྣམས། །སྲེད་དང་ཆགས་དང་ཞེན་པ་དང་། །དྲན་དང་བཟུང་དང་བསམ་དང་རེག །གློད་དང་ཞི་དང་གྲོལ་བར་མཛོད། །ཅེས་བརྗོད་སླར་ཡང་ངར་མི་རྣམས། །བསྔོ་ཞིང་གླུད་ཆེན་ནང་དུ་བསོགས། །བཅུ་པ་དཀོར་ཆའི་རྫོང་འདེབས་ནི། །སརྦ་བིད་པཱུ་ར་ཡིས་སྤེལ། །ཁ་འབར་མ་ཡི་སྔགས་བརྗོད་ཅིང་། འབྲུ་རྣམས་བྲེ་ལ་གཞལ་ནས་འབུལ། །དེ་བཞིན་ཟས་རྣམས་སྲང་ལ་གཞལ། །ཨ་ཀ་རོ་ཡི་སྔགས་རྒྱས་འབུལ། །རིན་ཆེན་སྨན་སྤོས་ཚོན་ལ་སོགས། །མཁའ་མཛོད་སྔགས་རྒྱས་སྲང་གིས་གཞལ། །གོས་ཀྱི་རིགས་སོགས་གཞན་རྣམས་ཀྱང་། །ནམ་མཁའ་མཛོད་ཀྱི་སྔགས་རྒྱས་འབུལ། །ཀུན་ལ་སྤེལ་ཚིག་འདོད་གསོལ་ནི། །རིག་པས་འཕྲུལ་ཏེ་བརྗོད་ཅིང་སླར། །ཧཱུྃ་ཡཿ ཆོས་ཀྱི་རྒྱལ་པོ་གཤིན་རྗེའི་ཚོགས། །འཆི་བདག་འཁོར་དང་བཅས་རྣམས་ལ། །སོ་སོའི་དགྱེས་སྐོང་མཐུན་རྫས་ཀྱི། །དཀོར་ཆ་སྣ་ཚོགས་རྫོངས་སུ་འདེབས། །འབྲུ་སྣ་བུ་རམ་ཤ་མར་ཐུད། །ཆན་ཐུག་ཁུར་བ་ལ་ཕུག་དང་། །ཉ་ཤ་ཤིང་ཏོག་ལན་ཚྭ་ཚོས། །སྨན་སྤོས་དར་ཟབ་མར་མེ་དང་། །གོས་རྒྱན་རིན་ཆེན་རྐང་འགྲོས་སོགས། །འདོད་ཡོན་ལོངས་སྤྱོད་རྒྱ་ཆེན་འདི། །དེང་གི་སྒྲུབ་བྱ་འདི་ཉིད་ཀྱི། །སྲོག་གི་རིན་དང་གླུད་དུ་འབུལ། །མ་བརྐུས་པ་ཡི་འཇལ་དུ་འབུལ། །མ་བསད་པ་ཡི་སྟོང་དུ་འབུལ། །མ་ཆགས་པ་ཡི་བུ་ལོན་དུ། །འབུལ་ལོ་མཉེས་ཤིང་ཚིམ་གྱུར་ཅིག །འཆི་བདག་འཁོར་བཅས་སྤྱན་ལམ་དུ། །མི་ཤེས་མ་གུས་བག་མེད་པས། །ཉེས་འགལ་ནོངས་པ་གང་བགྱིས་རྣམས། །མཆོད་སྦྱིན་འདི་ཡིས་སྐོངས་གྱུར་ཅིག །མོས་པ་བཞིན་དུ་རྒྱས་གྱུར་ཅིག །བསྔོས་པ་བཞིན་དུ་ཐོབ་གྱུར་ཅིག །འདོད་པ་བཞིན་དུ་འབྱུང་གྱུར་ཅིག །བསམ་པ་བཞིན་དུ་འགྲུབ་གྱུར་ཅིག །འབུལ་བ་བདག་གིས་མི་ནོར་ལ། །བཞེས་པ་ཁྱོད་ཀྱིས་མ་ནོར་བར། །ཐུགས་ཀྱིས་བརྣག་པ་ཞི་བར་མཛོད། །ནད་གདོན་རྐྱེན་དང་བར་ཆད་སོལ། །བྱམས་ཤིང་ཕན་པའི་བསམ་པ་ཡིས། །འཆི་བའི་འཇིགས་པ་བསལ་དུ་གསོལ། །ཞེས་བརྗོད་འཁོར་བཅས་མཉེས་པར་བསམ། །བཅུ་གཅིག་དུག་ཁྲུས་བྱ་བ་ནི། །ཧཱུྃ་ཧྲཱིཿ རིགས་འདུས་རྒྱལ་བའི་གསང་གསུམ་གྱི། །བྱིན་རླབས་ཐུགས་རྗེ་ལས་བྱུང་བའི། །ཕ་རོལ་ཕྱིན་དྲུག་རང་བཞིན་ཆུས། །ཉོན་དྲུག་དྲི་མ་དག་གྱུར་ཅིག །འདོད་ཆགས་ཞེ་སྡང་གཏི་མུག་གསུམ། །འདི་དག་འཇིག་རྟེན་དུག་གསུམ་སྟེ། །དཀོན་མཆོག་གསུམ་ལ་དུག་མི་མངའ། །མཆོག་གསུམ་བདེན་པས་དུག་བཅོམ་མོ། །ནམ་མཁའ་ས་ཆུ་མེ་དང་རླུང་། །དུག་གི་ཕ་དང་མ་ཡིན་ཏེ། །གནས་དག་ཡུམ་ལྔའི་བྱིན་རླབས་ཀྱིས། །འབྱུང་ལྔའི་དབྱིངས་སུ་དུག་བཅོམ་མོ། །སངས་རྒྱས་རྣམས་དང་རང་སངས་རྒྱས། །འབྲས་བུ་བཞི་ཐོབ་ཉན་ཐོས་དང་། །བདེན་པར་སྨྲ་རྣམས་གཟི་བརྗིད་ཀྱིས། །ལས་ཉོན་བག་ཆགས་དུག་བཅོམ་མོ། །འཇམ་དཔལ་ཁྲོས་པའི་རལ་གྲི་དང་། །གསང་བའི་བདག་པོའི་རྡོ་རྗེ་དང་། །ཚངས་པ་ཡི་ནི་བེ་ཅོན་དང་། །དབང་པོའི་རྡོ་རྗེས་དུག་བཅོམ་མོ། །དྲག་པོའི་རྩེ་གསུམ་ལྷ་མིན་སྒྱུ། །སྐེམ་བྱེད་མདུང་ཐུང་མེ་ལྷའི་དབལ། །ཆུ་ལྷའི་ཞགས་པ་ཀླུའི་རིགས་སྔགས། །ཁྱབ་འཇུག་འཁོར་ལོས་དུག་བཅོམ་མོ། །དོན་དམ་ཆོས་ཉིད་འགྱུར་མེད་དང་། །ཀུན་རྫོབ་རྒྱུ་འབྲས་བསླུ་མེད་དང་། །ལྷག་བསམ་རྣམ་དག་བདེན་སྟོབས་ཀྱིས། །ཁྱོད་ལུས་དུག་གིས་མི་ཚུགས་ཤོག །བསྲུང་བྱའི་ལུས་ངག་ཡིད་གསུམ་གྱི། །གྲིབ་དང་ནད་གདོན་གྲིབ་རྣམས་ཀུན། །རང་བཞིན་རྣམ་དག་དབྱིངས་ཆེན་པོར། །ལྷག་མེད་ཉིད་དུ་དག་གྱུར་ཅིག །རྡོ་རྗེ་སེམས་དཔའི་ཡིག་བརྒྱ་དང་། །ཁྲུས་བདུན་རིགས་པ་བརྗོད་ཅིང་བཀྲུ། །བཅུ་གཉིས་གླུད་ཡས་བསྐྱལ་བ་ནི། །གཤིན་གཟུགས་ལྷོ་རུ་ཁ་བསྒྱུར་ཞིང་། །གླུད་དང་རྫོང་ཆས་རྣམས་ཀྱིས་བསྐོར། །ལྟ་སྒོམ་དམིགས་པའི་གདེང་ལྡན་པས། །ཧཱུྃ་ཡཿ ཉོན་ཅིག་འཆི་བདག་གཤིན་རྗེའི་རྒྱལ། །ལས་ལས་གྲུབ་པའི་རྫུ་འཕྲུལ་ཅན། །སྐྱེ་འགྲོ་ཀུན་གྱི་སྲོག་དབུགས་བདག །དགེ་སྡིག་ཤན་ཐང་འབྱེད་པ་པོ། །འཁོར་དང་བཅས་པ་ཁྱེད་རྣམས་ལ། །དེ་རིང་ཡོན་གྱི་བདག་པོ་ཡི། །ཚེ་དང་སྲོག་གི་གླུད་འབུལ་ཞིང་། །བུ་ལོན་ལན་ཆགས་འཇལ་ཟིན་གྱིས། །དགྱེས་ཤིང་མགུ་བར་གྱུར་ནས་ཀྱང་། །མཆོད་སྦྱིན་བཟང་པོ་འདི་སྣོམ་ལ། །སོང་ཞིག་གཞན་དུ་འགྲོ་བར་གྱིས། །ཕྱིན་ཆད་འཁོར་འདིར་མ་གནོད་ཅིག །ཁྱོད་ཀྱི་འཁོར་གྱི་ཡི་དྭགས་ལ། །བཟའ་བཏུང་ལོངས་སྤྱོད་བྱིན་ལགས་ཀྱིས། །ཁྱེར་ལ་འཁོར་གྱི་ཡི་དྭགས་རྣམས། །མ་འཚེ་བར་ནི་གཞན་དུ་དེངས། །གདོན་དང་བགེགས་རིགས་ལན་ཆགས་མགྲོན། །མ་ལུས་མཆོད་སྦྱིན་འདི་ལོངས་ལ། །ཐ་དད་རང་རང་གནས་རྣམས་སུ། །མགུ་བའི་སེམས་ཀྱིས་ད་སོང་ཅིག །བདག་ནི་རྣལ་འབྱོར་སྒྲུབ་པ་པོ། །སེམས་ནི་བྱང་ཆུབ་མཆོག་ཏུ་བསྐྱེད། །ཚོགས་ནི་ཡོན་བདག་འདི་ཡིས་བསགས། །དོན་ནི་འགྲོ་ཀུན་དོན་ལ་དགོངས། །ལས་ནི་རྒྱལ་ཀུན་ཕྲིན་ལས་སྟེ། །བཀའ་ནི་དཀོན་མཆོག་གསུམ་གྱི་བཀའ། །བཀའ་དང་དམ་ལས་མ་འདའ་བར། །ཉི་མ་དེ་རིང་ཕྱིན་ཆད་ནས། །ཡོན་སྦྱོར་སྦྱིན་པའི་བདག་པོ་ལ། །མ་གནོད་གཤིན་རྗེའི་ཁྲམ་ཁ་ཕྱིས། །མ་བཅིངས་འཆི་བདག་ཞགས་པ་ཁྲོལ། །མ་གསོད་ཚེ་སྲོག་སླར་བྱིན་ནས། །མ་འཚེ་རྫོང་ཡས་འདི་ཁྱེར་ལ། །མ་འདུག་འཁོར་བཅས་རང་གནས་བསྐྱོད། །རྒྱལ་བའི་བཀའ་ལ་མི་ཉན་མེད། །ཟབ་མོའི་དོན་ལ་མི་སེམས་མེད། །བདེན་པའི་ཚིག་ལ་མི་བརྟོན་མེད། །རེག་གཅོད་མཚོན་གྱིས་མི་འཇིགས་མེད། །འཚོ་བའི་ཟས་ལ་ཀུན་ཀྱང་འདུ། །འཆི་བའི་སྲོག་ལ་ཀུན་ཀྱང་འཛེམས། །རང་གི་ལུས་ལ་དཔེ་ལོངས་ལ། །གཞན་ལ་གནོད་པ་མ་བྱེད་ཅིག །འགལ་རྐྱེན་བར་ཆད་ཀུན་སོལ་ལ། །རང་རང་གནས་སུ་ད་བསྐྱོད་ཅིག །འཆི་བདག་ནག་པོ་ད་གཤེགས་ཤིག །སྲོག་བདུད་ནག་པོ་ད་གཤེགས་ཤིག །ལས་ཀྱི་གཤིན་རྗེ་ད་གཤེགས་ཤིག །ཆོས་རྒྱལ་འཁོར་བཅས་ད་གཤེགས་ཤིག །གདོན་བགེགས་འབྱུང་པོ་ལན་ཆགས་མགྲོན། །ཐམས་ཅད་མ་ལུས་ད་སོང་ཅིག །བདག་ཉིད་ཆེན་པོ་སངས་རྒྱས་བཀའི། །ཚིག་ལས་འདས་ན་རྡུལ་དུ་རློག །དེ་བས་བགེགས་ཆེན་ཁྱོད་སོང་ལ། །དམ་ཚིག་གཉན་ལས་མ་འདའ་ཞིག །སྔགས་བརྗོད་ཐུན་བྲབ་གུ་གུལ་བདུག །རོལ་མོ་དང་བཅས་ཚམས་རྔམས་ཀྱིས། །ལྷོ་ཡི་ཕྱོགས་ཀྱི་གྲོང་མཐར་བསྐྱལ། །མཚམས་གཅོད་བསྲུང་བའི་འཁོར་ལོ་བསྒོམ། །བཅུ་གསུམ་པ་ནི་རྒྱལ་དབྱངས་ཏེ། །སྒྲུབ་བྱས་གོས་དཀར་དྲི་མེད་གྱོན། །སྟན་དཀར་མེ་ཏོག་བཀྲམ་སྟེང་འདུག །རྣལ་འབྱོར་དཔོན་སློབ་ངག་སྙན་པོས།། ཨེ་མ་ཧོ། སངས་རྒྱས་རྣམས་ནི་བདུད་ལས་རྒྱལ། །ཆོས་ནི་ཆོས་མ་ཡིན་ལས་རྒྱལ། །དགེ་འདུན་མུ་སྟེགས་རྣམས་ལས་རྒྱལ། །དབང་པོ་ལྷ་མིན་རྣམས་ལས་རྒྱལ། །མེ་ཡིས་ཤིང་རྣམས་བསྲེག་པ་དང་། །ཆུ་བོའི་རྒྱུན་གྱིས་མེ་གཞིལ་བཞིན། །བྱང་ཆུབ་སེམས་ཀྱི་རྟེན་འབྲེལ་གྱིས། །བདུད་བཞི་དཔུང་བཅས་ཕམ་པར་བྱས། །རླུང་གིས་སྤྲིན་རྣམས་གཏོར་བ་དང་། །རྡོ་རྗེས་རིན་ཆེན་ཕུག་པ་ལྟར། །ཚོགས་གཉིས་བསགས་པའི་བདེན་འབྲས་ཀྱིས། །སྒྲུབ་བྱ་འཆི་བདག་གཡུལ་ལས་རྒྱལ། །ལྷ་རྣམས་བདེན་པར་རབ་ཏུ་གནས། །ས་ཡང་བདེན་པར་གནས་པ་ལགས། །སངས་རྒྱས་ཀྱང་བདེན་ཆོས་ཀྱང་བདེན། །བདེན་པས་རྒྱལ་འགྱུར་རྫུན་མ་ལགས། །ཛ་ཡ་ཛ་ཡ་སུ་ཛ་ཡནྟུ། །ཞེས་བརྗོད་ཀུ་ཤས་བསངས་གཏོར་བྱ།། ༧ རྗེས་ལ་ཚེ་དབང་རྒྱས་པར་བསྐུར། །ཡང་ན་འདི་ལྟར་མངའ་གསོལ་བྱ། །སྭ་བྷཱ་ཝ་ཡི་སྔགས་ཀྱིས་སྦྱངས། །སྒྲུབ་བྱ་སྐད་ཅིག་དྲན་རྫོགས་སུ། །ཚེ་དཔག་མེད་པའི་སྐུར་གསལ་བའི། །ཐུགས་སྲོག་འོད་ཀྱིས་ཞིང་ཀུན་ནས། །ཚེ་ཡི་ལྷ་ཚོགས་སྤྱན་དྲངས་ཐིམ། །སླར་ཡང་འོད་འཕྲོས་འཁོར་འདས་ཀྱི། །ཚེ་བཅུད་བསྡུས་ཏེ་ཐིམ་པར་མོས། །ཚེ་འགུགས་རྒྱས་བསྡུས་གང་རུང་བྱ། །བུམ་པ་མགོར་བཞག་བུམ་ཆུ་བླུད། །ཧཱུྃ་ཧྲཱིཿ ཚེ་དཔག་མེད་པའི་གསང་གསུམ་ལས། །ལེགས་བྱུང་འཆི་མེད་བདུད་རྩི་འདིས། །དེང་འདིར་ཁྱོད་ལ་དབང་བསྐུར་བས། །ཚེ་ཡི་དངོས་གྲུབ་ཐོབ་པར་ཤོག །ཨོཾ་བཛྲ་ཨ་མྲྀ་ཏ་ཨ་བྷི་ཥིཉྩ་ཧཱུྃ། ཚེ་རིལ་སྦྱིན་ཞིང་འདི་ལྟར་བརྗོད། །ཧཱུྃ་ཧྲཱིཿ ཚེ་ཡི་རིག་འཛིན་མ་ལུས་པའི། །འཆི་མེད་གྲུབ་པའི་དམ་རྫས་འདིས། །དེང་འདིར་ཁྱོད་ལ་དབང་བསྐུར་བས། །འཆི་མེད་རྡོ་རྗེའི་ཚེ་ཐོབ་ཤོག །ཨོཾ་ཨ་ཡུ་སིདྡྷི་ཨ་བྷི་ཥིཉྩ་ཧཱུྃ། དེ་ནས་ཚེ་ཆང་བླུད་པ་ནི།། ཧཱུྃ་ཧྲཱིཿ ཚེ་ལ་དབང་བ་ཐམས་ཅད་ཀྱི། །བྱིན་རླབས་སྙིང་པོ་བསྡུས་པའི་བཅུད། །དེང་འདིར་ཁྱོད་ལ་དབང་བསྐུར་བས། །རིག་འཛིན་ཚེ་ལ་དབང་བསྒྱུར་ཤོག །ཨོཾ་མ་ཧཱ་ཨ་ཡུ་སིདྡྷི་ཨ་བྷི་ཥིཉྩ་ཧཱུྃ། རྡོ་རྗེ་སྤྱི་བོར་བཞག་བྱས་ལ། །ཧཱུྃ་ཧྲཱིཿ མཆོག་གསུམ་བདེན་པའི་བྱིན་རླབས་དང་། །རྩ་གསུམ་བསྲུང་མའི་གཟི་བརྗིད་ཀྱིས། །བུ་ཁྱོད་མི་མཐུན་ཕྱོགས་ལས་རྒྱལ། །ཚེ་གེགས་ཞི་བའི་བཀྲ་ཤིས་སྩོལ། །ཚེ་མཐར་ཕྱིན་ཅིང་དམ་ཆོས་འཕེལ། །ཚེ་དབང་རིག་འཛིན་འགྲུབ་པར་ཤོག །ཅེས་སོགས་བརྗོད་ཅིང་མེ་ཏོག་འཐོར། །གསོད་གཅོད་རྐུ་འཕྲོག་བརྡུང་བརྡེག་དང་། །ཚིག་རྩུབ་འཁོན་འགལ་བརྙས་པ་སོགས། །སྲོག་ལ་གནོད་པའི་ལས་སྤང་ཞིང་། །ཚེ་ཐར་སྲོག་བསླུ་ཉེ་འདོན་དང་། །མཆོད་དང་སྦྱིན་ལ་བརྩོན་པ་སོགས། །འཚོ་འགྱུར་དགེ་ལ་འབད་པར་གདམས། །དཀྱིལ་འཁོར་སྒྲུབ་པའི་ལས་རིམ་གཞན། །དཀྱུས་བཞིན་བྱས་པས་གྲུབ་པའོ། །ས་མ་ཡཱཿ གུ་ཧྱཿ ཞེས་ཚེ་སྒྲུབ་སྙིང་པོ་བཅུད་བསྡུས་ཀྱི་ཆ་ལག་འཆི་བསླུ་བདུད་བཞི་དབྱིངས་གྲོལ་ཞེས་བྱ་བ་འདི་ཡང་སྔགས་བན་རོལ་བའི་རྡོ་རྗེའི་བློ་མཚོ་ལས་བྱུང་བའོ།། དགེའོ།། དགེའོ།། དགེའོ།།