སྔོན་འགྲོའི་ངག་འདོན་སྐུ་གསུམ་སྒོ་འབྱེད།

༄༅། དམ་ཆོས་སྐུ་གསུམ་དགོངས་མཛོད་ལས། །སྔོན་འགྲོའི་ངག་འདོན་སྐུ་གསུམ་སྒོ་འབྱེད་བཞུགས། ཨེ་མ་ཧོ། སྐུ་གསུམ་བདེ་གཤེགས་ཡོངས་འདུས་པད་འབྱུང་དངོས། །བཀའ་དྲིན་གསུམ་ལྡན་བླ་མར་གསོལ་བ་འདེབས། །དྲན་དང་ཤེས་བཞིན་བག་ཡོད་རྣམ་དཔྱོད་བློ། །འབྲལ་མེད་གནས་ཤིང་བརྟན་པར་བྱིན་གྱིས་རློབས།། ཀུན་སློང་ནི། འགྲོ་རྣམས་མར་ཤེས་དྲིན་དྲན་ལན་ལྡོན་ཕྱིར། །འཁོར་བ་དོང་སྤྲུགས་བྱང་ཆེན་ཐོབ་འདོད་བློས། །ཕུན་སུམ་ཚོགས་པའི་དུས་གནས་སྟོན་འཁོར་ཆོས། །ཡེ་ནས་མ་བཅོས་རང་བྱུང་ལྷུན་གྲུབ་བསྒོམ།། ཀུན་སྤྱོད་ནི། སྐྱོན་གསུམ་དྲི་མ་དྲུག་དང་མི་འཛིན་ལྔ། །འདུ་ཤེས་ལོག་བཞི་མ་དག་སྤྱོད་ལམ་སྤངས། །ཕྱིན་དྲུག་འདུ་ཤེས་བཞི་བསྐྱེད་དབང་ཤེས་ཚོགས། །མ་ཡེངས་ལེགས་པར་རབ་ཉན་འཛིན་བགྱིད་འཚལ།། དལ་འབྱོར་རྙེད་དཀའ་ནི། དལ་བ་བརྒྱད་ཐོབ་ལྔ་གཉིས་འབྱོར་བ་ཚངས། །འགལ་རྐྱེན་བརྒྱད་ཚན་གཉིས་དབང་མ་སོང་བའི། །རྟེན་བཟང་འདི་འདྲ་དཔེ་དང་གྲངས་རྣམས་ཀྱིས། །བརྟགས་ནས་རྙེད་པར་དཀའ་ཚུལ་ཡང་ཡང་བསམ།། མི་རྟག་པ་ནི། ཕྱི་སྣོད་འཇིག་རྟེན་ནང་བཅུད་སེམས་ཅན་དང་། །དམ་པ་མཆོག་དང་སྐྱེ་དགུའི་བདག་པོའི་རིགས། །གཞན་ཡང་མཐོང་ཐོས་དོགས་པའི་དངོས་ཀུན་མཐའ། །རྟག་བརྟན་མེད་པས་འཆི་ཆོས་མྱུར་བསྒྲུབ་བྱ།། ལས་འབྲས་ནི། ཅིས་ཀྱང་མི་ཕན་ཤི་ཡང་ལས་རྗེས་འབྲང་། །གང་སྟོབས་འཕེལ་རྒྱས་ཅིག་ཤོས་ཉམས་སྲིད་གཞན། །རྒྱུ་འབྲས་བསླུ་མེད་མི་འགྱུར་དུས་སྨིན་པའི། །དཔེར་མཚུངས་ལུང་བཞིན་རིགས་པས་བརྟགས་དཔྱད་བྱ།། ཉེས་དམིགས་ནི། བླང་དོར་འགལ་བས་རིགས་དྲུག་འཁོར་ཞིང་འཁྱམས། །ངན་སོང་གནས་གསུམ་སྡུག་བསྔལ་བློས་མི་དཔོག །མཐོ་རིས་གསུམ་ནའང་མནོག་ཆུང་ཉེས་དམིགས་མང་། །འགྲོ་ཀུན་བདེ་འདོད་སྡུག་བསྔལ་མྱོང་ཚུལ་བསམ།། ཕན་ཡོན་ནི། སྲིད་དང་ཞི་བའི་བདེ་ཞིང་སྐྱིད་པ་ཀུན། །རབ་དཀར་དགེ་བའི་རྒྱུ་ལས་བྱུང་ངེས་པས། །ཐོག་མཐའ་བར་གསུམ་དགེ་བའི་ཐབས་ལམ་མཆོག །རྩེ་གཅིག་ཚུལ་བཞིན་བརྩོན་ལ་མྱུར་འཇུག་འཚལ།། སྐྱབས་ཡུལ་ནི། མདུན་མཁར་དཔག་བསམ་ཡལ་ག་ལྔ་པའི་རྩེར། །བརྒྱུད་ལྡན་སྐུ་གསུམ་ཡོངས་འདུས་རྩ་གསུམ་ལྷ། །སངས་རྒྱས་བྱང་སེམས་ཉན་རང་དམ་པའི་ཆོས། །བསྟན་སྲུང་དམ་ཅན་ཚོགས་རྣམས་གསལ་བར་བསྒོམ།། སྐྱབས་འཚོལ་ནི། རང་གི་གཡས་གཡོན་ཕ་མ་མདུན་རྒྱབ་ཏུ། །དགྲ་བགེགས་གཙོར་གྱུར་མཁའ་མཉམ་འགྲོ་བ་ཀུན། །ལུས་དཔག་མེད་པར་སྤྲུལ་ནས་ཕྱག་འཚལ་ཞིང་། །སྒོ་གསུམ་གུས་པས་སྐྱབས་འགྲོ་བྱེད་པར་མོས།། སྐྱབས་འགྲོ་ནི། དཀོན་མཆོག་ཀུན་དངོས་རྩ་གསུམ་འཁོར་ལོའི་མགོན། །རྩ་ཐིག་རླུང་གྲོལ་གཞི་ལམ་འབྲས་རྫོགས་དཔལ། །བདེ་མཆོག་ཟབ་གསལ་རྡོ་རྗེ་གསུམ་བདག་ཉིད། །སྐུ་གསུམ་ཡོངས་འདུས་བླ་མར་སྐྱབས་སུ་མཆི།། སེམས་བསྐྱེད་ནི། མཁའ་མཉམ་འཁོར་བར་གནས་པའི་མར་གྱུར་འགྲོ། །བླ་མེད་སྐུ་གསུམ་གོ་འཕང་ལ་འགོད་ཕྱིར། །མ་ནོར་ཡང་དག་རིམ་གཉིས་ལ་ཞུགས་ནས། །བདེ་གཤེགས་སྙིང་པོ་ངེས་པའི་སེམས་བསྐྱེད་དོ།། རྟེན་གྱི་སྟོབས་ནི། སྤྱི་གཙུག་པད་ཟླར་བླ་མ་རྡོར་སེམས་དཀར། །རྡོ་རྗེ་དྲིལ་འཛིན་སྙེམས་མ་གྲི་ཐོད་སྦྱོར། །ལོངས་སྐུའི་རྒྱན་རྫོགས་འགྱིང་བག་སྐྱིལ་ཀྲུང་བཞུགས། །ཐུགས་ཀར་ཟླ་སྟེང་ཧཱུྃ་དཀར་ཡིག་བརྒྱས་བསྐོར།། སུན་འབྱིན་པའི་སྟོབས་ནི། དབང་པོ་བསམ་པ་མཁྱེན་མཆོག་འདིར་དགོངས་ཤིག །སྡིག་ལྡན་བདག་གིས་བྱས་ཤིང་བསགས་པ་ཀུན། །མི་འཆབ་མི་སྦེད་གནོང་འགྱོད་མཐོལ་བཤགས་འབུལ། །བཟོད་པར་བཞེས་ལ་བྱང་ཞིང་དག་མཛད་གསོལ།། ཀུན་སྤྱོད་ཀྱི་སྟོབས་ནི། ཡབ་ཡུམ་སྐུ་ལས་བདེ་ཆེན་བདུད་རྩི་བབས། །ནད་གདོན་སྡིག་སྒྲིབ་ཉོན་མོངས་དུད་ཁུ་དང་། །རྣག་ཁྲག་སྦྲུལ་སོགས་རྣམ་པར་བཀྲུས་ཤིང་དེད། །ལས་ཀྱི་འཆི་བདག་ངོམ་ཤིང་ཚིམ་པར་གྱུར།། ཨོཾ་བཛྲ་ས་ཏྭ་ས་མ་ཡ༴སོགས། སོར་ཆུད་པའི་སྟོབས་ནི། རང་ལུས་དྲི་མེད་ཤེལ་གོང་ལྟ་བུར་གྱུར། །མགོན་པོས་བུ་ཁྱོད་སྡིག་སྒྲིབ་དག་གོ་ཞེས། །ཉེས་སྡོམ་དམ་བསྟན་ཉམས་ཆགས་སོར་ཆུད་ཕྱིར། །འོད་ཞུ་ཐིམ་པས་གསང་གསུམ་བྱིན་ཐོབ་གྱུར།། ཚོགས་ཞིང་གསལ་གདབ་ནི། མདུན་མཁར་སྐུ་གསུམ་ཡོངས་འདུས་ལྷ་ཚོགས་རྣམས། །ཏིལ་གོང་ཁ་ཕྱེ་ལྟ་བུར་བཞུགས་པར་གསལ། །མ་གྱུར་འགྲོ་རྣམས་ཚངས་པ་ཆེན་པོར་གྱུར། །སྲིད་ཞིའི་ཕུན་ཚོགས་ཀུན་ལ་དབང་འབྱོར་བསམ།། ཕྱི་ཡི་མཎྚལ་ནི། བཀོད་ལེགས་རཏྣའི་མཎྚལ་མཛེས་པ་ལ། །རིན་ཆེན་སྨན་འབྲུའི་ཚོམ་བུ་ལེགས་པར་བརྒྱན། །སྟོང་གསུམ་འཇིག་རྟེན་གྲངས་མེད་བློས་སྤྲུལ་ནས། །འགྲོ་རྣམས་སྤྲུལ་པའི་སྐུ་མཆོག་ཐོབ་ཕྱིར་འབུལ།། ནང་གི་མཎྚལ་ནི། རང་ལུས་མཎྚལ་བཀྲག་མདངས་རྒྱས་པ་ལ། །ཕུང་ཁམས་སྐྱེ་མཆེད་དབང་ཚོགས་ཚོམ་བུའི་སྤྲས། །གངས་ཆེན་མཚོ་ལྔའི་ཞིང་ཁམས་མཐའ་ཡས་སྤྲུལ། །འགྲོ་རྣམས་ལོངས་སྤྱོད་རྫོགས་སྐུ་ཐོབ་ཕྱིར་འབུལ།། གསང་བའི་མཎྚལ་ནི། ཀུན་བྱེད་རྒྱལ་པོ་སེམས་ཉིད་མཎྚལ་ལ། །སྒྲོན་དྲུག་སྣང་བཞི་རང་གསལ་ཚོམ་བུ་བཀོད། །སངས་རྒྱས་རང་སྣང་ཞིང་མཆོག་དམ་པར་སྤྲུལ། །འགྲོ་ཀུན་བླ་མེད་ཆོས་སྐུ་ཐོབ་ཕྱིར་འབུལ། ཨོཾ་མ་ཧཱ་རཏྣ་མཎྚ་ལ་སརྦ་པཱུ་ཛ་མེ་གྷ་ཨཱཿཧཱུྃ།། བླ་མའི་རྣལ་འབྱོར་སྒོམ་པ་ནི། བདག་ཉིད་ཕག་མོ་དམར་གསལ་སྤྱི་གཙུག་སྟེང་། །པད་ཟླའི་གདན་ལ་སྐུ་གསུམ་ཡོངས་འདུས་དཔལ། །མན་ངག་དོན་བརྒྱུད་ཐོ་བརྩེགས་རྣམ་པ་ལ། །སྐྱབས་གྱུར་མ་ལུས་ཁྲོམ་ཚོགས་ལྟ་བུར་གསལ།། ཚོགས་གསོག་ནི། བརྒྱུད་གསུམ་ཡོངས་རྫོགས་བླ་མ་འདིར་གཤེགས་བཞུགས། །དད་བརྒྱས་ཕྱག་འཚལ་མཆོད་འབུལ་ཉེས་ལྟུང་བཤགས། །དགེ་ལ་ཡི་རང་ཆོས་བསྐུལ་བཞུགས་གསོལ་འདེབས། །འགྲོ་ཀུན་སྨིན་གྲོལ་སྐུ་གསུམ་མངོན་གྱུར་ཤོག། གསོལ་འདེབས་ནི། དཀོན་མཆོག་གསུམ་དངོས་རྩ་གསུམ་འཁོར་ལོའི་མགོན། །སྐྱབས་ཀུན་ཡོངས་འདུས་བརྒྱུད་ལྡན་བླ་མ་ལ། །སྙིང་ནས་གུས་པས་གསོལ་འདེབས་ཐུགས་དམ་བསྐུལ། །དབང་དང་བྱིན་རླབས་དངོས་གྲུབ་དེང་འདིར་སྩོལ།། ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། དབང་བཞི་ནི། བླ་མའི་གནས་བཞིའི་ཡི་གེ་འབྲུ་བཞི་ལས། །བདུད་རྩི་འོད་ཟེར་དཀར་དམར་མཐིང་སེར་བབས། །སྒྲིབ་དག་སྣོད་རུང་ཡེ་ཤེས་དབང་བཞི་རྫོགས། །རིག་འཛིན་བཞི་སྨིན་སྐུ་བཞི་ཐོབ་གྲོལ་གྱུར།། ཨོཾ་ཨཱཿཧཱུྃ་ཧྲཱིཿ རྫོགས་རིམ་ནི། བླ་མ་དགྱེས་ཤིང་བརྩེ་བས་འོད་དུ་ཞུ། །སྙིང་དབུས་ཐིམ་པས་ཐུགས་ཡིད་དབྱེར་མེད་འདྲེས། །མ་བཅོས་སོ་མ་རང་ཤར་རིག་པའི་གཤིས། །བསལ་བཞག་འབད་རྩོལ་གྲོལ་འཁྲུལ་བློ་ལས་འདས།། ཨ་ཨ་ཨ། འཕོ་བའི་དམིགས་རིམ་ནི། རང་ཉིད་ཕག་མོའི་སྙིང་དབུས་དྷུ་ཏིའི་ནང་། །རྣམ་ཤེས་ཐིག་ཕྲན་ཧྲཱིཿཡིག་འདར་འཕྲིག་འཕར། །སྤྱི་བོར་སྐུ་གསུམ་ཡོངས་འདུས་འོད་དཔག་མེད། །པད་ཟླར་བཞེངས་སྟབས་མཚན་དཔེའི་རྒྱན་རྫོགས་གསལ།། གསོལ་འདེབས་ནི། ཨེ་མ་ཧོ། སྐྱབས་ཀུན་ངོ་བོ་གསུམ་ལྡན་བླ་མ་དང་། །དབྱེར་མེད་སྐུ་གསུམ་ཡོངས་འདུས་འོད་དཔག་མེད། །གསོལ་བ་འདེབས་སོ་བརྩེ་ཆེན་ཐུགས་རྗེས་ཟུངས། །བླ་མའི་ཐུགས་ཀར་འཕོ་བར་བྱིན་གྱིས་རློབས། ཧྲཱིཿལྔ། ཧིཀ་ལྔ། ཕཊ་ལྔའོ། བསྡུ་རིམ་ནི། སྤྱི་བོའི་བླ་མ་འོད་ཞུ་རང་ལ་ཐིམ། །འཕོ་འགྱུར་མེད་པ་རྡོ་རྗེའི་ཚེ་དབང་ཐོབ། །གདོས་བཅོས་མི་དམིགས་ཚེ་མཐའ་ཡས་པར་གྱུར། །སྣང་གྲགས་རྟོག་པ་ལྷ་སྔགས་ཆོས་སྐུར་འདྲེས།། ཨོཾ་ཨཱཿཧཱུྃ་བཛྲ་གུ་རུ་པདྨ་ཨ་ཡུ་ཥེ་བྷྲུཾ་ནྲི་ཛ་པུཎྱེ་ཛྙ་ན་གུ་ཎ་ཀརྨ་སརྦ་སིདྡྷི་ཧཱུྃ། བསྔོ་སྨོན་ནི། དམིགས་བཅས་དམིགས་མེད་དུས་གསུམ་ལེགས་བྱས་ཚོགས། །འཁོར་གསུམ་ཡེ་དག་ཆོས་དབྱིངས་ཀློང་དུ་བསྲེ། །སྐུ་གསུམ་བླ་མའི་དགོངས་མཛོད་ཀློང་ཆེན་པོར། །སྲིད་ཞི་མཉམ་ཉིད་མངོན་རྫོགས་བྱང་ཆུབ་ཤོག །ཅེས་སྔོན་འགྲོའི་ངག་འདོན་སྐུ་གསུམ་སྒོ་འབྱེད་ཞེས་བྱ་བ་འདི་ཡང་སྔགས་བཙུན་གར་དབང་འཇིགས་མེད་རྣམ་རྒྱལ་བས་བྲིས་པ་དགེ་བར་གྱུར་ཅིག །